Rainer Black-50 by Remruati Bawitlung(Haylor)

CHAPTER -50

"THE OLD RAINER IS BACK"

" Tunge i nih?  ka chungah engthil nge i tih? "

Ka puan sin lai a inkhuh ṭhat mawlh mawlh pah chuan ka ti nghal tuarh tuarh a, mangan tawh nak alaiin engmah hre lo ang hmak in a bawk thlur reng a, vawikhat pawh a rawn che eih lo .

" Tho rawh tunge i nih?  khawiah nge ka awm? "

A mut thlur reng avang chuan vin tuarh tuarh pahin lukham in a hnungzangah ka vaw ta vak vak ringawt a, peihloh hmel zet hian a rawn che ṭulh ṭulh duh chauh.

" I van bengchheng tak "

Aw ki hniam leh thum zet hian a rawn ti chher chhap a, a awmdan chuan ka thin a ti rim zual hle.

" Enga!! " ka lo ti chuai raih.

Ka mipa hriat ngai pawh nilo bulah ka tho a, chutah ka chungah engthil nge a tih pawh ka hriat loh laiin bengchheng min ti amaw?!!

Thinrim hle mah ila ka hnuk a ulh ṭun tawh avangin ka ṭawngchhuak ṭha thei reng reng lo. Tun thlengin a hmel takngial pawh ka la hmu lo a, ka ngaihdan tur pawh a ngaihtuah ve miah lo a nih dawn hi.

"Engthil nge ka chungah thleng? "

Ka hlauthawng a ni tih a hre ve pawh a ni mahna khum aṭang chuan a rawn tho chhuak nghal ṭuih ṭuih a, hmelṭha in chhelo hle mahse ka hlauh deuh avangin a che vel en kar pah chuan ka inkhuhna puan chu nghet takin ka vuan ṭai a, min rawn khawih a tum a nih pawhin lukhama lo vaw nghal thei turin ka kut lehlam in lukham ka vuan ran bawk.

"Kha inha rawh "

 Tih hmuk pahin t-shirt var pakhat hi a rawn theh phei a, ka inhak duh a rin avangin min hnungchhawn zawnga din daih pahin a tshirt chu a ha nghal mawlh mawlh bawk.

" khawiah nge ka kawr a awm? " a engah mah hma in ka vin nghal em em ringawt.

"ka paih... "

Min chhan dan hmuk hmuk hi Rainer nen danglamna an nei lo, ughhh!!  engvanga ka mi hriat ngai pawh nilo hi Rainer nen ka tehkhin theih zawk?  Atthlak lutuk, a let sing chuangin Rainer a ṭha fe zawk.

" enga!!? ka paih a !!"

 Engvanga ka kawr chu paih ringawt nge a nih? Hur leh lutuk, min râwn hmasa lovin ka kawr alo paih daih avang hian ka sa nghal phat!!

" Hmela " lukham in ka vawm nghal pawp !

" Engvangin nge i paih?  engthil nge ka chungah i tih? Hmela " tih tuarh tuarh pahin lukham dang chuan ka vawm lehnghal pawp a," Tenawm lutuk...thlawk bo rawh " ka thin a rim bawk nen ṭawngkam chhe tak tak a ṭawngkhum tuarh tuarh pah chuan vawm lehna tur ka zawng kual nghal chung bawk.

Vawm lehna tur ka dap kual lai chuan khum bul dawhkan a phone chu ka ban fuh hlauh !!

"ka haw lutuk che " tih paha vawm leh ka tum lai tak chuan min rawn hmu fuh ta mai!!  Rang lutuk hian phone chu min rawn chuhsak pawp a, ka in rin hma in khumah chuan min rawn bawh bet ta thut mai!!

" Tho rawh. ..min khawih hlek suh "

Tal chhuah tumin ka leng nghal awrh awrh a,a kapah te pawh ka nghawk fuh deuh in ka hria , mahse min bawhbeh chu sawi loh a kut hrawl zetin ka ban pahnih a man beh tlat tawh avangin ka duh ang pawhin ka tal hlei thei lo.

" Che tawh suh "

" min thlah rawh.... tho rawh " Min khawih dawn emaw ka tih avangin ka mittui chu a tling nghal pum tawh a, ka mangang lutuk hi ka rilru in ka ṭawngṭai nghal mawlh mawlh bawk.

"Che tawh suh ka ti na dawn lo che " a tih pawh chuan ka tal aih aih reng a,a chak em em mai lehnghal .

"Nizanah engthil mah a thleng lo, hriatchhuah tum rawh "

Ka mit ah tak en kalh pahin min rawn vin let nghal hluk a, a aia na in ka ban rek ah a hmer vang vang bawk .

Chutia a tih takah chuan ka tal tawp chawt ringawt! Tal leh tur pawhin tha ka nei tawh lo

" Hmela ni lovin ka hming chu Ruben a ni chuan i kawr ka paih nachhan chu mipa pakhat in a luah khum che avangin...."

" mah... mahse engvangin nge kawr i hak loh? " ka tih rual chuan ka chung atangin a tho nghal vat a, ka kut a hmer na a thlah rualin a na nghal vang vang mai.

Ngawi rengin nichina a t-shirt min rawn pek amah vawm nana ka hman tak chuata let bal chu chhar in ka hmuh theih tur hian a rawn pharh a, "Beer-a min thehhuh lai kha i hre tawh lo a ni tih min hrilh suh "

Ka hrechhuak thei tawh lo tih melh hian ka lo melh ha a, mahse mumang ang maiin ka hre deuh ruai ruai thung.

" Ngaihtuah chhuah tum rawh mipa pakhat in khawih a tum che a ka rawn chhanchhuak che a nih kha....  nangmah vangin pawn aṭangin ka ṭhianten min kalh khum lehnghal, he room ah hian ka duh reng vanga riak ka ni bik lo "

A sawi zel takah chuan ka chet theih tawh loh avanga mipa pakhat dum zet in inchung lamah min put chhoh lai te, ka duh lo chung min khawih a tum lai te, min luah khum lai te leh mipa pakhat in min rawn chhan lai te thleng chuan ka hrechhuak nghal uarh uarh a, beer-a ka theh lai erawh ka hrechhuak thei tawh lo thung.

Ka mal leh ban vel a rawl ṭhum nachhan hi mipa pakhat in min khawih a tum avanga ka tal na vang alo nih dawn hi.

" Anih chuan engmah a thleng miah lo amaw? " lawm ru tak si hian ka ti sap a.

" Aw... kha heihi ha hrih rawh, kawngka hawn dan tur kan ngahtuah dawn nia "

A t-shirt bawk kha min rawn pe leh a, tunah zet chuan phur takin ka lo la vat tawh.  A chungah thinrim a hnekin engtin mah min tih loh chu sawi loh min chhanchhuah avang khan a hnena lawmthu sawi ka ba tawh zawk.

Ka inhak lai chuan bang lam a hawi daih a, hur leh tenawm tih vela ka lo ṭawngkhum avang khan ka inchhir leh hnuhnawh.

"Ka tihpalh.... chuan ka lawm takzet " ka zah ve deuh avangin zawi sap hian ka va ti dek dek a, a khi deuh suk a ni tih ka hre thei.

" Khatiang ang em em a i ruih kha chuan a hlauhawm a nia " Hahh.... ka rui emaw a lo ti a ni maw!  zu farkhat pawh ka in tawp si lo.

"ka rui reng reng .... " ka tih laia kawngka rawn beng dawt dawt ri ka hriat rual chuan ka phu nghal zawk!!

 Rawn ben mai pawh duhtawk lova an rawn tlawh tak chawrh chawrh avang chuan mak tih hmel taka in en pahin ka ṭhutna aṭang chuan ka tho chhuak nghal.

" Rawn hawn an tum a niang...a ṭhat hlauh hi " tih sup pahin kawngka lam chu a pan nghal vat a, tukverh aṭanga chhuah a ngaih hma a an rawn hawn avang chuan ka lo lawm ru hle.

" An hawng thei lo aniang "

Va puih tuma ka thawh rual chuan kawngka chu an rawn tlawh hawng nghal ṭhuai mai !! chutah tum loh lutuk maiin Rainer ka va hmu thut bawk a , ramhuai hmu ang maiin ka lo meng phawk nghal kawk ringawt !! Amah chauh nilo in Amira leh Declan te pawh an tel!!

" Rainer.... " ka ti sap thei chauh.

A hma ai zawngin a meng rum emaw tih mai tur a ni, mipa dang nen min rawn hmuh thut bakah a tshirt ka lo ha lehzel bawk nen mak ti hmel te pawh a pu mahse min rawn melh dan erawh a hlauhawm in a thinrim hle a ni tih hai rual a ni lo.

"Tute nge in nih? "

Reuben an a tih rual rual chuan Rainer insum zo lo chuan a hmaiah a hnek ri nghal pawp ringawt!! phawk fe a men nghal kawk pahin ka kã ka hup nghal.

" Thlah rawh " ka ti nghal tuarh a mahse ka kal hnaih ngam lo .

A ban lehlam awrh mahse a veilam in khumah a rek bet nghal chawt a!! a thin a rim tawpkhawk bawk aniang a hma ai zawngin a chak in ka hria,Reuben pawh a che hman meuh lo .

" Rainer thlah rawh "

 Ka thusawi te chu engah mah a ngai lo,hria ang pawhin a awmlo .A tawpah a thah dawn takngial avangin Declan chuan a rawn thlelh hlauh zawka, rawn ṭhelh lo phei se chuan Reuben hi a rek hlum duh ang.

" ka sawi reng kha...He mi hur nu hian mipa dang a lo kawp reng alawm " A sir aṭangin ngeiawm zet hian Amira chuan a rawn ti nghal zawt zawt a nih chu!! a rukin min rawn nuih deuh suk lehnghal!!

Ka rin lo lutuk leh ka mumang ah pawh ka la mang ngai loh thil Amira in a ti ta mai chu mak ka tiin han sawi mai tur pawh ka hre lo.

Engtin nge hetiang dawt muhlum hian min puh theih zawk?

"Tikhan i awih tawh em?  henu hi mi lehchiah leh bum hmang a nih hi "

 Amira in min tih khum piap piap lai pawhin Rainer chuan engmah a ti lo, rum zeta min rawn melh khai pah chuan a ding khawng reng a ,min lo chhan a hnekin ngawi rengin min hua a ni tih hria takin room aṭangin a chhuak nghal hmak!

Rainer an min hnungchhawn a a kal liam lai chu mittui tling pam chung hian ka en zui vawng vawng a, ka thinlung hi vih sawk sawk ang mai hian a rawn na nghal zawk zawk bawk.

Eng thil nge thleng tih vawikhat pawh min zawh loh avang hian ka rilru a na in ka lungawi lo takzet.

" Bum hmang " A kal hma in Amira chuan min rawn ti leh kher a, Declan pawhin a zui ve nghal.

Reuben chu rawn tho chhuak nghal in a nghawng chu a tuai nghal nauh nauh a, Rainer thinrim hmel ringawt ka mitthla ah a awm avangin buaipui nachang pawh hre lovin ka ding khawng reng ringawt.

" A hnek na reuh hle mai " a tih bul bul ri te chu hre vek mah ila ka che sawn eih lo, ka la hamhaih vang te pawh a ni mahna .

" I bialpa khan I rui a ni tih hre phei se chuan a â thei ang " engah mah ngaih loh hmel zet hian a khi nghal suk a, rui anga min sawi ve ziah avang hian ka lo lungawi lo ngang mai.

" Ka rui lo... nizanah khan tui bak in ka nei lo "

Ni e, dawt ka sawi lo zu chu sawi loh tui pawh no khat bak ka in lo.

" I sawi dik.... zu rim i nam lo ,a nih chuan drugs i rui a nih chu " hriat ṭhan tawh hmel zet hian a ti sam et ringawt, mahse ka tan chuan thil liantham lutuk a ni.

" Mah... mahse tui bak ka in lo ka tih chu " ka ti let ve leh ngat, ka rui miau lova a tawp thlengin ka ṭang tlat dawn.

" Anih chuan an hrai rui che a nih chu " a rawn ti leh hram!!  mahse a thil sawi hian awmzia a nei tlat, ngaituahna pawh a ti kal thui hle.

Nizana thil thleng kha mumal takin ka hrechhuak thei tawh lova, nikhaw hrelo in ka awm thut bawk!! Anih chuan a awmzia chu tuemaw in min hrai rui tihna maw ni a!!

"Tui chu tuin nge pe che ?"

Reuben sawi a nih loh avangin kawngka lam chu kan hawi phei rual ṭhawt a, kawngka bulah inkuangkuah chung hian Declan alo ding reng chu niin.

" Amira in " Ka tih takah chuan Amira nih ka ring nghal "nizana tui min pek hnu ah khan thil dang engmah ka ei in ka in leh tawh lo hrim hrim"

Anih chuan Amira in min lo hrai rui reng amaw!!  mahse engvangin?




Amira hming a hriat rual chuan Declan chuan mak ti hmel leh awih loh hmel pawh a pu lo, a khi nghal suk ringawt.

" A thangah i awk chu a nih hi " ala ti ang deuh deuh a, heng mite hi engvanga nghal leh ngeiawm em em nge maw an nih le?  min hnem tur an ni zawk asin .

" Mahse engvangin? "

" A chiang mai alawm " tih pahin a jacket hi a rawn theh phei a, ka lo dawng chat bawk.

" Ha rawh ka thlah ang che " tih pahin a kal daih lehnghal.

A thusawi hriatthiam loh hmel zet hian a jacket chu ka ha nghal sawk sawk a, Declan nen hian kan vawikhat inbiakna chauh ni mahse ka awmna hmun hi ka hriat miau loh avangin min thlah dawn mahse ka hnial lem lo.

" ka lawm e... " Reuben chu ka hrilh nawn leh ngat a, keimah vangin hnek a tawk lehnghala ka inthiam lo takzet.

"I bialpa hi chuhpui tu i nei a ti a nih kha " ka chhuah dawnah Reuben chuan a rawn ti ringawt!!  mahse a sawi tum ka man nghal Declan thusawi ka hriatthiam loh kha a rawn sawifiah a ni.

" midang ring lutuk suh ang che" rawn tih leh zeuh pahin min rawn bye bye a, ka mi hriat ngai pawh nilo in hetiang thil min hrilh avang hian mak ka ti hle.

Mahse!!  a awm tho e, thil hi ka man lo thei em alawm!   Amira in dawt a min puh nachhan kha tudang vang nilo in Rainer vang a ni tih hi engvanga hre miah lo nge ka nih! ? atthlak lutuk.

Kawng tluanin Declan nen kan inbe lo hrim hrim ,Rainer nen an inkawm nachhan pawh ka hrethiam nghal mai an mizia alo in ang em a nih hi.

" ka lawm e... " tih pahin ka seatbelt chu ka phelh nghal rawk rawk a, kan in kawt thleng min thlah thlap avang hian fel ka ti ru hle bawk.

" Declan... " ka chhuah dawn chuan a hming ngeiin ka ko thlap a.

" Engvanga min thlah nge i nih? "

Kan in nel lova kan inbe ngai bawk hek lo,hetianga ka chunga ṭhat a chhuah thut nachhan leh min thlah nachhan hi hriat hrim hrim ka duh.

" Min zawh ka ring renga... "a khi deuh suk ,"Rainer an thlah tur che in min tih vang a ni" a tih rual chuan ka meng phawk leh nghal kawk tawh.

"a nih chu " tih bak sawi tur ka hre lo, ngawi rengin kawngkhar chu ka khar khap a, a tlan liam lai chu ka en zui vung vung ringawt.

Inchhung ka luh rual rual chuan Braydon an min lo melh Salla leh tun tawh!!  nizan zet zawng min man chiang viau ang.

" Khawiah nge i kawr ? kha kha tu kawr nge?  Nizanah khawiah nge i riah? " a lo ti nghal zung zung a, a thinrim hmel em em lehnghal.

Ngatinge mi zawng zawng hi ka chungah an thinrim tak vek mai le? ka kham tawh takzet.

"ka. . .ughh... "

"Engvangin nge engmah min hrilh loh? "

Dawt sawi ka duh loh rual rual in thudik ka hrilh chuan a thinrim dawn bawk si, chutah Amira chungchang ka hrilh leh ngat phei chuan min ring dawn lo chiang sa.

" Ih... englo "

" Sadie... i va rei ve, ka nghak rei tawh lutuk che " Ka insawifiah hma in Nolan a rawn lut hlauh mahse engvanga rawn kal thut nge maw a nih le?

Ka û in Nolan a hmuh rual chuan an in Hi five nghal a, Braydon thinrim lai pawh a nui nghal sung mai lawm.

"ka tihpalh takzet ... nizanah Sadie nen project kan buaipui tlaivar a, chemical in a kawr a ei chhe lehnghal a heihi ka rawn hak tir ta mai a nih hi... E chuan...phone battery a low avangin kan rawn hrilh thei lo che a, pawi ka ti takzet "

Nolan an nal tak leh awihawm lutuk tak maia dawt a sawi lai chuan mak ti takin ka lo melh ha ringawt, sawi zawm tur pawh ka hre mai lo.

" nia... " za lo zeta nuih suk pahin Nolan chu ka kawk ta ringawt a, Nolan sawi a nih vang nge ka û pawhin a awih kher mai.

" a lehpek ah chuan min rawn hrilh tawh ang che ...project pawh nise " ka chalah a fawp nghal zeuh a, " han inthlak la breakfast pawh ka peih fel tawh " tih pahin kitchen lam a pan nghal a.

" Nolan... eng nge awmzia? "

" nakinah lawmthu min hrilh dawn nia mahse a lehpek a awm tawh lo ang " ka khi nghal sek a, thihna ata min rawn chhanchhuak nimai hian ka hria .

" mahse i va rawn kal hma ve "

" Niminah note i la si lova.... kha heihi la rawh " note thar vek nizana a ziah tih hriat reng hi min rawn pe a.

" ka lawm e... " kuah zeuh pahin note chu ka la a, inchungah inthlak turin ka tlan chho nghal a.

__________________________________________

★Declan's POV★

Kan ṭhian ho kan awm khawm nuk nuk lai chuan kan hlat deuh takah tukverh melh vung vung pahin Rainer chu amah chauh hian a ṭhu run a, rilru mawlh tu nei niawm takin a melh ngai a melh vung vung bawk.

" Rainer rawn kal rawh " midang in an han ko ṭhin tak na in hria ang pawhin a awm lo.

Tun thla reilo te chunga Rainer mizia inthlak danglam dan chungchang hi kan ṭhian ho ti ti tam ber pawh a ni reng a , a nelawm sawt in a nui tam sawt em em a mahse nimin thilthu ah a inthlak danglam lehnghal vek bawk.

Heng a chunga thil thleng zawng zawng te hi midang in hrelo mahse kei chuan chiang takin Sadie a ni tih ka hria.

Rainer hian Sadie hi a thinlung zawng zawng in a hmangaih tawh a, awlsam takin a move on mai mai dawn lo tih pawh kei tluka hre chiang an awm lo.

Hmeichhia hi kawp nual tawh mahse hetiang ang em em a vei leh thlak danglam tu hi an la awm ngai lo, tunah chuan mi luhlul leh rothap engmah ngaihtuah ngai lo hlimna chu Sadie kutah chiah a awm ta. Party , games leh engmah in a ti hlim zo tawh lo , tisawn a awm ngawt ngawt tawh mai a nih saw .

" Tinge Rainer saw? " Sam chuan a rawn ti sa sa a.

" Tibuai suh u... in thil tih lai kha ti mai mai rawh u " tiin ka lo hrilh nghal vat, a chhan chu a va tibuai a nih vaih chuan thil thleng tur hi a hriat lawk loh.

" A hlim viau emaw tih laiin artui chhung mu pawh sehkeh zo tawh lo ang maiin a awm leh tak saw " Shane chuan fiamthu titak deuh hian a rawn ti a,mahse Rainer ber tianga a awm tawh saw chuan midang pawh kan hlim thei tak tak tawh lo.

" Aiah... " ti tuarh ri kan hriat rual chuan Rainer lam chu kan hawiphei ṭhap hlawm a, Ashton chu chhuatah alo zal der tawh Rainer erawh mitthi sun ang maiin tum hmuk chungin room a chhuahsan daih thung.

" i ṭha maw? " Ashton chu kan va buaipui nghal vata, Rainer a va tibuai anga, a ni thinrim tuar lo in a lo khawih tih hriat reng reng.

" Video games khelh pui turin sawm ka tum mai ania... ka ban hi a na lutuk khawih suh u"

Ashton pawh hi mi tawrhchhel tak a ni mahse Rainer'n a khawih meuh chuan a mittui a tling pam mai alawm, tiang khawp chuan a kutthlak a na.

" Hepa hian eng nge maw a hriat le? " an phun nak nak hlawm a.

" The old Rainer is back " Danny an a tih chuan chil lem dak pahin kan en ṭhap hlawm a.

Ni e, Rainer kan hriat ṭhin kha a rawn let leh tawh mahse a hma aiin a tawrh hlelhawm fe zawk a ni tih hi hre tel bawk se ka duh.

(Chhiar zawh veleh fakna khu aw )