ZERO-41 by Remruati Bawitlung (Haylor)

Chapter-41

.

"Alexa ....Alexa"tiin ka au zel bawka, a chang leh chhuak rawh ka lo ti kher kher kha ka inchhir leh thul.

" Ale..." ka au leh tur chuan leia a tarmit lo tla bal ka hmuh chuan ka ding nghal chawt ringawt. He tarmit hi Alexa ta ani tih ka hai hauh lo a chhan chu a sir ah dragon lem sticker a bel vang ani.

"Alexa... " tarmit chhar pah a ka pen leh chiah chuan kawng thlang lamah tuihawk nen ka tleng thla ta pur pur mai!! ṭe thlak rawng rawng pahin hnim leh thingṭang te chu ka tawn thla pawp pawp a, han in ham tang tum teh mah ila ka vawn ngheh hman ngang loh avangin ka tawlh thla zel mai bawk si,ka mangang tawh takzet,ka thi ngei dawn anih hi !!.

.

Thui fe ka tawlh thlak zel hnu chuan tuiah ka tla thla ta bawrh mai, tui ka hleih thiam loh avangin thei leh thei lo in ka han in hai ve nawk nawk a, vanneih thlak lutuk in tuifawn in lungpui lian zet bulah min len phei hlauh mai chutah zet zawng ka in man bet nghet ta kher mai.

Tui ka hak nasat em avang chuan khuh bawrh bawrh pahin ka bawk hle hle a,che tur pawhin tha ka nei tawh lo. Ka hlauthawng bawk nen ka tha pawh ala khur der der mai.

Minute 10 vel zen zawn ka bawh reng hnu chuan tui ah ka ke lam ala inchiah bawk nen ka vawt ti lutuk chu ka khur der der a,hetiang ang hian ka awm reng thei lo ani tih ka hriat avang chuan thawh tumin inben kan ka han tum zeta ka ner nghal sawk ringawt.

.

Ka ban a nat em avang chuan ka han en nghal vata,ka kutzungchal chen velin alo kak chu niin ka jacket lah a thler vek bawka, thisen a kai hnuang lehnghal.Keima thisen ka hmuh takngial pawhin ka mit a vai nghal ruai thei alawm chutikhawp chuan thisen hi ka ngaina lo.Na pawh a sawi theih tawh loh thei leh thei lo in ka han in beng kang hram hram a, ka awmna hmun hi ka hriat tawh loh avangin a rang thei ang berin kawng ka hmuh vat angai.

"Alexa.... " he ramhnuai a awmchhun anih avangin ka han au leh vak thin na in rannung hram bak thawm dang hriat tur a awm lo.

.

Beidawng tak chungin ka ban dawm ṭai chung chuan hma lam panin ka bai saih saih a, ka khel ka sawh nat deuh avangin ka duh ang pawhin ka kal ṭha hlei thei lo.

" Alexa... "a khat tawkin ka au reng bawka, ka mangan tawh em avangin ka mittui pawh a rawn far leh fap thin,ka rilru te te chuan damin ka haw pawh ka inring tawh lo.A chang leh midang hmuh miah loh a ka chhuah ruk avang khan ka in inchhir leh thul  mahse thil thleng tur ang zawng zawng chu a thleng fel vek tawh, engmah siam ṭhat theih anih tawh loh avangin kawng ka zawn hmuh vat angai.

.

Ruah lah chu a sur cherh cherh renga, khawpui lah a ri chawl lo bawk nen han tawm hul na mai tur a awm bawk si lo ṭhut tawpa ṭah chhuah hawm hawm ka chak takzet.

Chutia thlabar tak chunga ka kal chhat chhat lai chuan ka hnung lam aṭangin, "ding rawh "tih leh silai inload ri ka hre zui zat bawk, rang lutuk in ka banphar nghal vata, thawk pawh ka thaw ṭha ngam tawh lo.A aw aṭangin min rawn la hnaih lutuk lo ani tih ka hre nghal, mahse engtin nge kei hi ka tlanchhiat hman tehlul ang.

.

"rawn hawi rawh " a tih takah chuan muang changin banphar reng chungin ka han hawi phei a,a hmai a tuam vek bakah lukhum a khum tlat avangin a hmel ka hmu thei lo.

"khawngaih in min kap suh... "ka ṭawng chhuak thei chu ka in awih lo lek lek zawk!!

Ka hmel a hmuh takah chuan a silai ken lai chu a dahthla a, min rawn pan hnaih pahin a hmai khuhna an phelh chiah chu Arden lo ni rengin!!ka lawm lutuk chu ka hnuk a ulh leh tlat peka, ka mittui a rawn tla nghal zung zung ringawt.

"Arden.. " ka tih rual rual chuan nghet takin min rawn kuah bet nghal thlawp a, kei lah lungchhe sa bawk nen ka ṭap chhuak nghal hawm hawm bawk.

.

"engtin nge helai hmunah te i awm theih... camp ah him taka awm tur i ni asin "

"ka... ka... " ṭawng pawh ka ṭawng ṭha thei lo,insum hram hram tumin ka han in hnit hlawp hlawp leh rih ṭhin,hetiang anga nghet taka min kuah hian ka thla a muang in ka dam nghal sawng sawng thei nia mawle.

"i ṭha em? " a tih chuan ka lo bu nghat a,mahse ka ban kak a hmuh takah chuan a hmel a rawn danglam nghal vek anih chu!!

"heihi tu tih nge.... min hrilh rawh tu tih nge? " a hmel aṭangin a thinrim ani tih hai rual ani lo.

"ih.. ka... ka... tuihawk in min len thla a " ka tih takah chuan a hrethiam nghal mai in ka hria.

.

"ngatinge i room ah i awm mai loh....engvangin nge ramhnuai ah te i rawn kal? " tih pahin ka jacket thler hnuang tawh chu min phelh tir a,ka inrin loh lai takin ka tank top chu a rawn pawt thler ta thut mai!!

"engthil nge maw i tih le?"bra chauh ka hak tawh avang chuan ka veilam in ka han inkhuh ve ṭang ṭang tak na in min hmu vek tho.Ka tank top in ka ban uluk taka min tuam sak lai chu ka lo thlir renga, min ti na in min hliam fo ṭhin mahsela ka mamawh laiin a rawn inlan vat ṭhin thung.A tuam zawh chuan a jacket chu phelh in min rawn hak tir nghal vata ,Ka kut ka duh angin ka chet thei lo bawk nen min hnehsawh takzet.

.

"na ila nei em? "

"aih.... "

"na i neih chuan min hrilh vat ang che " a tih chuan ka lo bu nghat a,

"kan kal vat angai...."

" maw!! "

"bengchheng suh " tih pahin min kai nghal dawr dawr ringawt.

"engtin nge hetah ka awm tih i hriat? "

"camp kan luh vat angai..."

"mahse.... mahse engvangin nge he ramhnuai ah hian i awm? ,engvangin nge silai i ken? chuan engvangin nge i hmai i tuam?" ka tih zawh rual rual chuan a ding thut a, ka hmuiah a rawn fawp thut ringawt!!

.

A aia duhthawh in min rawn fawp dawn emaw ka tih laiin min rawn nuih suk pah chuan, "i ngawi thei tawh angem ? zawhna min zawt tawh suh " tih pahin a kal nghal nal nal anih chu!!keilah lah min rawn fawh avang khan ka lo danglam leh vek pek tawh.Mak tih hmel takin ka hmui khawih pahin Arden chu ka zui leh ta ringawt a, hetiang anga min ṭhawn thut thut reng te chuan ka lungphu pawh a buai vek thei ang.

"umm.... Alexa.... " ka ti chiah chu thingbul ah ka in chhuih khut a,ka ṭhingṭhi nghal rawp bawk.

"fimkhur rawh" tih pahin min rawn kai tho nghal lawp a,uluk takin ka inhliam leh hliam loh a rawn endik nghal vat bawk.

.

"a na lo... ughh.... saw saw ka chhuih palh alawm mawle " tih paha ka hawi kual vel lai chuan ka piah lawkah ruang ka hmu ta thut mai!!  

Read More

ZERO-40 by Remruati Bawitlung (Haylor)

Chapter-40

.

Alexa nen ngawi renga breakfast kan lo ei dun mawlh mawlh lai chuan ka bulah Jade a rawn ṭhu ve hlawl mai,a phone melh zeuh zeuh pah chuan a hawi kual hrak hrak bawk.

"eng.... engtin ?"

"shhh..... "a rawn tih takah chuan kun hniam deuh pahin a aia zawi chuan, "engtin nge phone i kawl theih bik a ?"ka han ti sap a.

"chutiang a pawimawh ber lo... enteh u " tih pahin Alexa nen chuan tawlh hnai deuh turin min han hui nghal vata.

"ka hriat dan chuan tun hnai hian cocaine an rawn tawlh ru ani awma mahse enganga nasa pawhin chhui mahse an man thei lo " a tih takah chuan thinrim hmel zetin Jade chu ka melh nghal khai ringawt,thil pawimawh deuh a rawn sawi dawn emaw tih nak alaiin chutiang thil ho mai mai te rawn sawi.

.

"Jade....chutiang te chu a thleng fo alawm....an man chhuah zel te chuan tuman an tawlh ru duh nang "

" i va han mawl tak ngaihtuah chiang ta che.... an rawn tawlh lut ani tih an hriat rual rual in an man ṭhin alawm... "

"in group ah va kal rawh.... in point an paih sak cheu nge "

"Tina....ka la sawi zo lo " a tih rual rual chuan ka ding nghal zawt a, ka thleng chawi pahin,"chutiang chu kan buaina tur ani ve lo....helai ah hian thu ho mai mai ngaithla tur nilo in inti thawveng turin alawm ka kal " tih pahin ka kal nghal nal nal bawk.Anih na takah chuan ka thinrim vang pawh ani lo,Arden hi hetiang thil ah hian a inhnam hnawih ve ani tih chiang takin hre lo mah ila a bula vela mi te leh an gang ṭhan len na hnar ber anih avangin hetiang lampang thil hi chu ka ngaithla duh lo.

.

Jade thu rawn sawi kha ngaihtuah zui neuh neuh pahin ka ṭhu renga,khua lah chu a dur in thli lah a thaw vuk vuk mai bawk si a,Arden ka ngaihtuah chhuak lo thei lo.Tunah hian helai ramhnuai zau leh pilril tak ah hian a awm chu ani awm sia, mahse zawhna ni ta chu engvanga helai hmun thleng thleng rawn kal nge maw anih le? thil tih tur pawimawh tak nei lo se chu a rawn kal hauh lo ang.Ka inngaihtuah nasat em avangin a tira ngaihtuah pawh ka ngaihtuah duh loh khan ka rilru a ti hah zual zel a,ka ngaihtuah chian pauh leh hriat chian chakna leh rinhlelh na in ka khat bawk si.

"urggh.... ngatinge hetiang hian ka awm tlat le?" thil ka hriat tam pauh leh ka na dawn ani tih ka hai bik hauh si lo mahse Arden avang hian ka beng ka chhi nghal hru zel chu anih hi.

.

Bell a rawn rik takah chuan dinning hall ah inhmuh khawm tur ani tih ka hrechhuak nghal zawk ,minute 5 chauh awm tawh mahse thli a thawt nasat mai bakah ruah a sur dawn avangin inha lum turin kan room lam panin ka tlan chho nghal hlawk hlawk bawk.Hmanhmawh takin kawngka chu ka hawng nghal pawp a ,Alexa in ka bag alo hai mek lai ka va hmuh chuan ka ding nghal chawt !!!

"ughh... Tina ugggh"

"engthil nge i tih? " tih vin hluk pahin ka bag chu ka chhuhsak nghal pawp a,ka rin hlelh ang ngeiin leh phat rual loh in Alexa hi ka bag a kutṭang lem dahtu kha ani.

.

"nanghi ka bag a kut lem dah tu kha i ni tiraw? "

"aih.... aih nilo, keimah ka nilo "

" anih engvangin nge ka bag i hai si.... ka lakah hian engthil nge i duh, engvanga khatiang thil kha ti nge i nih? "

"enteh... Tina, engthil mah ka tilo chuan... "

"chhuak rawh... "

" maw!! "

" chhuak rawh " ka thinrim lutuk hi ka khur nghal vek thei, ka bag ah kut lem alo dah kher kher bawk nen,chu chuan min ti thinrim zual takzet.

Ka bag chu ka zip ṭha sawk sawk a,ka jacket lak lawp pahin hall lam panin ka tlan let nghal dawr dawr bawk.

.

Dinning hall ka luh rual rual in Hailey chuan min lo ko nghal vata, ka ṭhutna tur min lo hauh sak sa ah chuan ka ṭhu nghal chat bawk.

"Hailey... umm.. thil hrilh tur che ka nei lo "

"eng thil? "

"ih... kha ka bag a kut kha a dah tu ka hre tawh " ka tih takah chuan mak tih hmel takin min rawn en nghal kawk a, zawi sap a, "tunge? !" a ti zui zat bawk.

"umm... ughh Alexa "

" maw!! "

" umm... nia a mak ka la ti kei pawhin khatiang thil kha engvanga ti nge anih pawh ka hre bik lo mahse a hmel ka hmuh khan midang dah anih rinna ka nei tlat anih chu !! mahse ka bag a check lai chiang takin ka hmu bawk si a"

"chutianga i hmuh te chuan a tih ani ngei ang... a tih nilo se tu tih nge ni chuang ang " a tih chuan, "ni e.. " ka lo ti thawp sat ringawt.

.

Ruah a sur nasat em avangin programme a tawp hnu ah pawh kan la ṭhu khawm ṭhap hlawm a, ṭhenkhat an titi khawm mur mur laiin kei erawh in thil ka lo ngaihtuah leh veng veng tawh thung.Alexa fiahna pawh awmlo a ka puhna ve ringawt na chu ka inthiam lo leh hnuhnawh, programme chhung zawnga min rawn pan tak miah loh avang chuan ka han zawng kual leh hnuhnawh a,ka hmuh tak mai lo avang chuan ka ṭhut na aṭanga tho chhuak meuhin Claire hnenah chuan, "Alexa i lo hmu em? "ka va ti ta ringawt a.Ani lah chuan a damloh avangin zingah camp a chhuahsan daih tawh thu min lo hrilh daih anih chu!!

.

" ka hrethiam e... " tih leh tlan chhuah ka rual nghal, Nichin lawk khan chiang takin ka hmu bawk si a,attendance a dah nge dah lo tih camp director ka zawh fiah vat angai.

Ruah sur karah ka jacket khum chung chuan camp director room lam panin ka tlan phei nghal dawr dawr a, minute 5 lai kal  anih avangin ka huh vek hman tho.

"pu Robin.... tunah hian register kan check vat angai " ka va ti ve thawr ringawt, anih lah chuan mak tih hmel zetin ka ang phuau chungin min lo la en reng zui.

.

"ughh... ka... puih theih na che ka nei em? "

"tunah hian attendance register kan check vat angai "

"eng... engvang chuan maw!! " tih pahin register chu a rawn phawrh chhuak a, laksak vut pahin, "Alexa .....tunah hian hall ah a awm ve lo "

"tu Alexa maw? "

" Alexa Gonzalez "

"hriat sual i nei ani lo maw....Alexa tih hming pu he camp ah hian in register an awmlo"

"Alexa Gonzalez ani chiang alawm.... tarmit bun brace vuah kha.... ka hai thei lo hrim hrim "

"i chiang chiah maw?"

" aw"

.

Ka hriat chian em avang chuan camp a hming pe lut zawng zawng list chu min rawn hmuh leh ta nge nge a, mahse Alexa Gonzalez tih hming pu in register reng reng an awm lo thil mak leh zawhna ni ta chu tunge Alexa kha ni ta ang? engvanga khatianga rawn inlan kha nge anih?

.

"tikhan a awm chu i la ring fo em? "

"thil hriat sual ka nei aniang..... pu Robin pawi ka ti lutuk ka rawn tih buai che avangin... ka kal nghal mai ange " tih pahin ka chhuak lehnghal zal zal a, mahse beidawn mai ka tum bik hauh lo, engkim zawn chhuah veka engvanga rawn inlan nge anih tih ka zawn chhuah vek hma loh chuan ka beidawng dawn lo.

Pawn ka chhuah meuh chuan ruah pawh alo hmi seng seng tawh a, khawimah kalkawi lovin ramhnuai ah thing kan fawm na lampang pan chuan ka nghal hlawk hlawk bawk, midang in min rawn hmuh ka hlauh mai bakah khaw thim hma ngeia let leh hman ka duh avangin nal hle mahse a chak thei ang berin ka kal zel a

Read More

ZERO-39 by Remruati Bawitlung (Haylor)

chapter-39

.

"umm... Arden leh Dylan, khawi zawk hi nge i thlan dawn?" he zawhna tehhrep hi pehhel dan kawng a awm chhung chuan ka pehhel ngei ang,ni e anih na takah chuan Arden hi ka thlang zawk ngei alawm mahse engtik lai mai pawhin a buai renga kan pahnih inkar hi engmah chiang a awm bawk si loh avangin leh ka pi avang hian Dylan hi ka kalsan mai thei bik lo.

" umm... Arden hi thlang ta ila thil thleng tur chu i hriat kha... "

"kha kha chu i kutah a in nghat.... ughh chutiang ngaihtuah hrih suh saw mei an chhem ṭan tawh ania"

"lo va kal rawh " ka tih pawhin min kaih tlat avang chuan ka kal leh ta nge nge a.

.

Chutia ka lo ṭang luih a Hailey in min pawh dawr dawr lai vel chuan Alexa in mit khap lek lo hian min lo melh kur reng anih chu!! ka ṭhut hnu pawhin min rawn la melh reng avang chuan ka awm a ti nuam lo takzet.

"zai ve ta che " Hailey chuan min rawn nghawk zeuh a,ka lo phu zuk lehnghal.

"umm... ka awm a nuam lo, ka lo va lut mai dawn " tih leh thawh ka rual nghal, Alexa pawh rawn ding chhuak ve nghalin "i lut dawn mi?" a rawn ti ve vat bawk ,aih tih na chi ani tawh bawk si lo nen ka lo bu nghat ringawt a ,a ruk tak chuan min rawn zui ve ka hlau takzet.

"keipawh luh ka lo tum chiah a " ka hlauh ang ngeiin thil a thleng ta, ṭhut leh mai ka duh rum rum tawh mahse ka lo nuih suk ta zawka.

.

A ruk tak chuan Hailey hian kal lo turin min rawn ngen se ka ti takzet mahse chutiang tih a hnekin hmuh pawh min rawn hmu lo.

"ngatinge i din renga... "

"umm... "

" kal ang " a tih takah chuan hreh tak chungin ka zui chho ta ringawt a.Ngawi rengin ka zui chho zela a ruk tak chuan ka awm a nuam thei chuang lo,chhuanlam tur awm se chuan ka let leh chiang khawp ang a chhan chu Alexa bulah hi chuan thinthi in ka a thei thlawt lo ,a chhan lah ka hre hek lo.

"Bawih.... " chu aw zet chu a van mawi chiang em, rang lutuk in ka hawi let nghal vata tupawh chu nise lawmthu hrilh mawlh mawlh mai ani ka duh.

.

Dylan chu ka pan hnai sawk sawk a, duhthawh takin ka fawp nghal tawn tawn ringawt, chutiang anga kan awm takah chuan Alexa pawhin min kalsan ve maiin ka hria.Dylan chuan nghet takin ka kawngah min kuah bet tlata hetiang anga kan in fawh loh na chhin pawh hi ka hre tawh love.Midang tumah an awm tak loh ah chuan inthlah mai kan tum bik hauh lo Arden ka mamawh na zawng zawng te leh ka duhna te chu Dylan hnenah hrithlak ka tum ta a mahse chutia duhthawh takah kan infawh lai tak chuan hla tak aṭangin Arden an min rawn thlir reng ani tih ka va hmuh thut avang chuan rang lutuk in ka tawlh hnung nghal hrut ringawt,

.

" bawih tinge? "

"umm....ka " tih pahin Arden awmna chu ka va melh zeuh a mahse a lo awm tawh miah lo. Engthil nge ka chhungah thleng ta hi ka thil hmuh kha ka mitthla mai mai maw alo nih a.

"ka hmangaih che " tih pahin Dylan chuan in rawn fawh leh a rawn tum pawhin lehlam ka hawi hmak, Chawplehchilh in ka mood a rawn in thlak danglam nghal vek thei nia mawle.

"enge awmzia? "

"umm.... mut hahdam ka mamawh in ka hria " ka tih takah chuan a ngaihṭhat lohna te kha a bo deuh in ka hria.

"ni e... han mu tawh rawh"ka chalah rawn fawh zeuh pahin "mangṭha le " a ti zui sap bawk.

*

*

________________________________________

.

Zanlai ah ka ṭhangharh thut avang chuan sana ka en nghal vata dar 2 a lo ri va tawh.Ka mit nuai nawk nawk pahin mut leh mai ka han tum na in ka tui a hal em avang chuan ka tho chhuak leh ta nge nge a midang erawh an muttui hle thung.

Tui ka in pah chuan Ka mutna ka sawn avangin ka muhil thei lo pawh ani mahna tiin ka lo inngaihtuah vung vung lai chuan thawm ka hriat avangin ka hawi let nghal vata, Arden alo awm reng ani tih ka hmuh chuan ka tui in lai ka phuh chhuak lo chauh.

Midang an rawn harh thut ka hlau bawk nen hawi kual vat vat pah chuan zawi zet hian, "eng nge hetah i rawn tih? " ka lo ti vat bawk.

"i bulah ka mu dawn"

" maw!! "

.

" ka mut a chhuak.... " tih leh a jacket phelh a rual nghal, chhuatah a paih nghal tawp bawk.

"engthil nge maw i tih le? " a jacket chhar sawk sawk pahin a banah chuan ka han man bet a, min rawn la nuih suk zui.

" midang in an hmu che nge "

"a pawi vak dawn mi?"

"chhuak zawk rawh " ka tih chuan a lo mu fel vek tawh chu niin.A mut tak tlat avang chuan a jacket chu midang hmuh theih loh turin ka khai ta ringawt a,an rawn harh nge harh lo tiin ka melh kual deuh reng bawk.

.

" rawn mu rawh.... " inkuangkuah chungin khum bulah ka ding reng ringawt,midang in an rawn hmuh te hi a hlau ve miah lo amawn le? Ka thinrim rual rual in Arden ka hmuh theiha a awm hian ka thla a muang in ka hlim veng veng lawi bawk si a, ka awmdan hi ka duhlo takzet a chhanchu Arden tello hian ka awm thei lo ani tih ka inhriat kar vang ani.

"tikhan mu rawh "

"aih... " tih pahin min rawn kuai ṭhu nghal dawr a, min man beh tlat avang chuan midang tih harh ai chuan tiin ka mu leh ta nge nge.

.

Midang in min rawn hmuh ka hlauh avangin a sir ah midang en kual reng chung chuan ka mu ran a,amah hnung chhawn zawnga ka mut tlat avang chuan hnung lam aṭangin ka dar ah a khabe nghah pahin nghet takin ka kawngah min kuah bet tlat bawk.

"min thlah rawh " ka han ti sap a, ka ṭawng hria ang pawhin a awmlo.Chutia che miah lova a awm reng takah chuan a muhil tawh emaw tiin thei leh thei lo hian ka han hawi let a,min lo en reng chu niin!! ka hawi let rang kher mai.

"muhil rawh " ka beng bula rawn tih sap pahin ka kut chu nghet takin a rawn hum tlat bawk.Mutthilh tumin ka han maimichhing leh vang vang ṭhin a mahse ka bulah he mihring zun ngah lutuk mai hi a mut chhung chuan engtin nge ka mutthilh theih ang.

.

"i muhil tawh em? " a tawp a tawp ah chuan ka ti ta nge nge a, a lo la muhil lo chiang kher mai.A ban min rawn kham tir pah chuan ka khabe ah dawm in amah en turin min kuai phei a, duhthawh takin ka hmuiah a rawn fawp nghal tawn tawn bawk.Fimkhur thu ah tiin blanket chuan kan inkhuh tlata,thei chu nise ka lak aṭanga kalsawn tawh lo tura ngen mawlh mawlh mai ka duh hetiang anga awm dun renga kumkhua a chen dun hial ka duh takzet .

.

_________________________________________

.

☆7:00 am☆

.

Tawng ri sep sep ka hriat rual rual chuan ka ṭhu nghal zawt a,ka bul ka en nak chuan Arden a lo awm tawh hauh lo, a thawh lai pawh ka hre lo hrim hrim midang ho awmdan chu ka han thlithlai nghal vata ,a lan dan chuan engmah an hre lo niin a lang.

"Tina.... min ko khawm tawh ania" Alexa chuan insiam mawlh mawlh pah chuan a rawn ti a, kei lah zan ka mu ṭha lo bawk nen ka lu a na bûr lehnghal.

"lo zuk kal rawh " tih pahin phur lo zet hian ka tho nghal ṭuih ṭuih a,ka tlai anih vaih chuan hremna ka pumpelh dawn hauh lo ani tih hre reng chung chuan ka han in phih fai nghal sawk sawk a,ka tank top ha tur darthlalanga ka in en nak chuan Arden an min khawihna hnuhma leh fawhna te chu ka awm leh nghawng velah a lo duk thluah hlawm mai!! hmanhmawh zetin ka thawmhnaw chu ka thlak leh ta ringawta, hrem tawk lo vel chiah chiah in ka thleng hman hram bawk.

Read More

ZERO-38 by Remruati Bawitlung(Haylor)

Chapter-38

.

" mahse thisen kha... "

" hei sauce anih hi... hawh kal vat ang engmah anih loh hi "

" lo va kal rawh "

" i ti ve ziah... " tih pahin min kai tho lawp a, min pawt chhuak nghal dawr dawr bawk.

Inhmuh khawmna tur an sawi ah chuan midang ho pawh an lo awm nak nak tawh hlawm a,ka hlauhthawn lutuk vang nge pawh ka hrelo ka thinphu hi a la pangngai thei reng reng lo.Engtin nge kha thil kha ka bag ah a awm theih? Tu dah nge nita ang?  tia ka lo inngaihtuah reuh reuh lai chuan an kutbeng thawm leh au dur dur thawm chuan ka suangtuahna atang chuan min harh chhuah tir nghal zawk a, engvanga kutbeng nge an nih a, eng chungchang nge an sawi tih pawh hre hauh lo chuan ka kut chu ka han beng mawl ve leh ta ringawt a.

.

"Dismiss " Camp director in a tih rual rual chuan group te te ah an inṭhen darh nghal zung zung a, kei erawh hrilhhai tak leh a ngaihna hriat loh hmel zetin ka la ding reng thung.

"Tina... " ka phut nasat em avang chuan  ka hawi let nghal vata, Alexa bawk!! henu hian vawi engzat nge maw min tih phut a tum le?

"lo kal rawh... "

" awle.... mahse eng nge kan tih dawn?"

" thing kan fawm dawn... zanin ah bon fire kan nei dawn lawm "

" awle... " tih pahin Alexa chu ka zui phei nghal hnak hnak a,ramhnuai lam kan pan avang ringawt pawh hian ka phur lo takzet.

.

Rei pawh kan kal hma in Alexa chuan thing chu a fawm nghal mawlh mawlh a, kei erawh in a ngaihna ka hre der mai bawk si lo, ka hman tlak loh tak zet zet.

"henghi kan tih kher angai amawn le " tiang hawl pah chuan zei lo zetin hnim ro chu ka han rap phei ri ruap ruap a, kei chauh ka ni bik lo Alexa tih loh ka group ami ho zawng zawng hian thing fawm tur reng reng kan hrelo mai pawh ani lo a hmuh pawh kan hmu lo.

Alexa thing fawm khawl sa bulah chuan an lo ruk hlau niawm fahran hian kan lo nghak ṭhap hlawm a,thosi leh rannung lah a tam mai bawk si thlamuang taka ṭhut mai mai ngam pawh ani lo.

.

"henu hi ka hmu ngai lo reng reng " ka hnunga ṭhu hmeichhe pahnih in Alexa chungchang an sawi chuan ka beng a verh nghal zar mai!! Kei chauhin ka hmu ngai lo emaw ka lo ti a midang pawhin an lo hmu ngai bik lo anih dawn hi.

"Ti hi chuan point kan hmu ṭha ber ang " nuih sang pahin Alexa chuan a thing kuah lai chu ka hma ah tak a rawn theh darh nghal chuai a,heng thing zawng zawng hi amah chauha a fawm khawm vek anih avangin hetiang thil hi a vawikhat tihna chu ani hauh lo ang.

"wow...a ṭha hle mai engtin nge i tih bik a?" kut beh pahin Nathan chuan a han ti a,midang pawhin kan beng ve nghal tliar tliar bawk .

.

"kut hnathawktu fanu ka ni a, heng thil te hi chu engmah ani hleinem...hei khua a thim ṭep tawh bawk si a kan kal nghal mai dawn mi niang? " a tih takah chuan kan lo bu nghal ṭhap hlawm a,thingṭang chu kan pawm theih ang tawk in kan pawm ṭhap hlawm a, lungawi hmel takin camp lam panin kan in zui nghal sap sap bawk.

.

Thing ka dah rual rual chuan ka kut vel chu ka beng fai nghal sawk sawk a, ka thak deuh sep sep lehnghal in ka hria.Midang an rawn kal hma in tiin ka kut silfai tum in kan room lam chu ka pan chho hnak hnak a

"khawiah nge i kal dawn?.... "Alexa in ka dara rawn khawih pahin a rawn tih chuan ka phu leh chiang kher mai !! ka hnungah a kal emaw ka tih laiin engtik lai khan nge maw a rawn thlen hman ni.

"ugh... ka intifai lawk dawn "

" anih chuan kal rual ang " a tih chuan ka lo bu nghat a, kan inzui chho lehta nge nge a.

.

" ehee... ka phone ka theihnghilh "

"nakinah i la mai dawn nia.... kan let leh dawn tho alawm "

" lo han kal rawh ka rawn um ang che "

"kan rei dawn hleinem "

"umm..lo han chho rawh "a tih tlat avang chuan engmah sawi lo in thawk halh pah chuan ka chho leh nghal nal nal.

Ka thak nasat em avangin hmanhmawh takin ka jacket phelh sawk sawk pahin kawngka ka kalh nghal hmak,ka ban vuak thuak thuak pahin light kan on chiah mai chu ka mengphawk chiang te e !!

.

Kan thawmhnaw zawng zawng chu tu tih hriat loh in alo hai darh vek anih chu!!  chu aia thu lawmawm loh chu tuemaw hemi room chhung ah hian ala awm tih ka hrethei.Thawm dang hre lo mah ila chawplehchilh in ka tha a khur leh nghal zawih zawih mai, ka jacket chu nghet takin ka han hum sauh sauh a ,thawkleh khatah tlan chhuah tumin kawngka hawn kan tum chiah mai chu ka hnung lam aṭangin tha chak em em mai hian min rawn pawm kang ta nawlh mai!! hneh tawh loh nak alaiin au chhuah han tum ve teh mah ila ka kâ a hup bet tlat mai bawk si,mangang leh beidawng ru tak siin theihpatawpa tal mai loh chu tih theih dang ka nei tawh lo.

.

"che suh... " Lalpa leh!!  chu aw zet chu!!   chawplehchilhin min ti zawi nghal vek alawm mawle,tehhrep chuan ....engtik lai maha ka ning ngai loh leh theihnghilh ngai loh tur aw ani tlat.

"keimah.... " banga min nawr beh pah chuan ka kâ a hupna chu a han phelh thla nghal vata, Arden ka hmuh rual rual in ka mittui a rawn tling nghal ringawt anih chu!!

ugh... phiangsen chuan a thaw lum ham ham mai te leh a aw thum dut leh zun nghah zet mai te hian ka thinphu a ti rang leh tawh kher mai!! engtik ah mah ngaiah ka nei thei dawn lo chu anih hi.

.

Ka au chhuak dawn lo ani tih a hriat rual rual chuan Alexa bag chu a hai chhunzawm lehnghal bawrh bawrh a, a hmanhmawh hmel em em lehnghal.

" Eng nge hetah i rawn tih? " min chhang lo in a thil tih ngai a tih chhunzawm char char tho.

" Arden.... " ka vin deuh hlek avang chuan rawn hawi pahin a bag ken lai chu a rawn theh phei lawp a.

" lo khung ṭha rawh " tih ringawt in min chhang anih chu!!

"eng.... eng nge hetah i rawn zawn?  engvangin nge hetah hian i awm? "

"nakinah ka hrilh ang che "

" maw!! Arden ka fiamthu lo ania... engthil nge i zawn tih min hrilh loh chuan ka au chhuak vak dawn ania "

.

A hmanhmawh bawka a thinchhe ngang mai, a thil zawn lai a hmuh tak loh avang chuan a bag ken lai paih pawp pah in a pistol pai lai chu rang lutuk in a phawrh chhuak zawt a, banga min nawr beh pahin ka kâ ah min tih ta ran mai!!silai meuhin min tin takah chuan chet chu sawi loh ka chet ka hlau zek zek zawk.

"helai hmunah hian thil pawimawh lutuk thuhruk ani a....engthil mah i sawi chhuak tur ani lo "

.

A mit ah tak chuan ka en kar a, engtik laiin nge ka mittui a rawn tlak pawh ka hrelo, a gloves phelh pahin ka mittui chu a rawn hru hul zeuh a.

"engtin mah ka ti dawn lo che " a ti zui sap bawk, mahse silai in min la tin reng avang chuan a thusawi te chu ka ring zo thlawt lo.

Chutia hlauthawng leh khur der der a ka awm reng lai chuan kawngka kik ri in "Tina... " tiin a chhunzawm zat bawk.

Chutah leh Arden chuan silai chu ka kâ aṭangin a phawi chhuak zawk a,ka hmuia fawh tawn tawn pahin tukverh ah a zuang chhuak nghak zawk bawk.

.

Khatiang anga thawm dim leh hnehsawh zeta a zuan chhuah tak daih avang chuan mak tih hmel takin tukverh ah chuan ka han dakchhuak vang vang a,

" kawngka lo hawng rawh " tih thawm ka hriat rual rual chuan bag rem ṭhat sawk sawk pahin kawngka chu ka va hawng nghal vata, rin ang ngeiin Alexa chu hlauhthawn hmel takin kawngkah bulah chuan a lo ding tau a,inchhung a luh rual rual in thil diklo a awm nge awm lo tiin a hawi kual nghal vat bawk.

.

"Ngatinge i va rawn hawng har ve "

" nia... hla ka lo ngaithla daih alawm mawle "

ngaihṭhat loh hmel zetin chik zet hian min rawn en kar a, confi hmel takin ka lo ding vah thung,engthil pawh thleng se henu bulah kher kher hi chuan ka sawi lo ang .

"anih chuan kal ila "

" awle... " ka jacket thlak sawk sawk pahin kan inzui chhuak ve leh mai bawka.

.

"bawih... i chau em?"Dylan chuan tui min rawn pe nghal vata,Hailey pawh rei lo teah a rawn kal nghal vat bawk.

"hetah hian lo ṭhu rawh "

"ka ril aṭam thil ei phawt ang u "Hailey chuan a lo ti nghal vata.

"anih chuan Ken hnenah eitur rawn keng turin kan ti ange? "

" nilo... " ka lo ti nghal hluk ringawt, diktak chuan camp a awm kan ni a, midang ei ang chu kan ei ve mai tur ani. Ni e, Dylan hi a hausa te meuh mai mahse kan dawn ang apiang chu a ei ve mai tur ani.

.

"lo ṭhu rawh u.... ka han bia ange " tih leh thawh a rual nghal, engmah sawi hman pawh ani lo.

"tinge thil thleng a awm em ni? " Hailey chuan min rawn nuih suk pahin min rawn nghawk tel zeuh bawk.

"aih... engmah "

" min hrilh dawn lo amaw... anih i group awmna vang em ni "

" aih nilo e.... ihh englo ania, Arden hi hetah hian awm ve ta se "

" no way... thil theihloh tawp anih chu "Hailey chu ka en nghal haw ringawt, engvanga awki san nghal ringawt nge maw anih le?

.

" umm.... ka tihawmzia chu Arden leh helai ramhnuai hi maw "a fiamthu ani tih ka hriat hian ka thaw nghal huai thei.

"nia tiraw...? "

"Dylan nena in in hualna hi engtin nge i tih dawn?"

"engvangin nge ka tihtawp ve ringawt ang " 

Read More