30 days with Mr Genius -20

 CHAPTER -20

★Aurora's POV★

' Engpawh chu nise Keifer nen inhmu phawt rawh u ' Peter an a tih chuan 

' Min nawr avangin hmuh ka tum a mahse Isabelle nen an awmdun alawm. Ka chungah a thinrim tih chu ka hria mahse kha nu khan engvanga a kut a vuan bik nge a nih? ' 

Peter-a khuma mut ar ar pah chuan ka lungawi lo chu ka phun char char reng a, Peter erawh in ngawi rengin ka awmdan chu min hriatthiam hmel tak hian min lo en reng ringawt .

Tlai banah Peter nawr luihna in Keifer hmuh ngei tumin classroom ah ka han let leh a kha a ni a, Rosy chu sawiloh Isabelle lehzel in Keifer ban a vuan tih ka hmuh rual rual chuan ka rilru na chu ka tlan let nghal daih a. Khang hmeichhe ho kha ka huat tluk zetin Keifer pawh hi ka hua. 

Ka insum thei lo chu khum aṭang chuan ka ṭhu chhuak nghal zawt a ' Engvanga an khawih kha haw miah lo nge maw a nih le? Hepa hian min ngaihtuah ve miah lo a nih dawn hi, insawifiah na hun takngial pawh min pe lo. ' kut phar meuh chuan ka ti tân tân a. 

Keifer vang hian zawhna tamtak chhanna awm si lo ka inzawt reng mai dawn chu a nih hi. 

' Aurora naktuk te han nghak ve phawt la, a duh tak tak che a nih chuan biak dan tur che a zawng em em ang ' Peter lah chuan a lo ti sam êt a , ka rilru a nat avanga a in thleng thleng va kal ka nia a thusawi pakhat pawh hian min hnem lo. 

Hepa hi ka hrechiang a min be turin min rawn zawng hauh lovang .A rilru ah hian vawikhat pawh ka awm ve miah lo emawni le?  Nilo,  Aurora Walton hi mipa pakhat pawhin an hnar tur a ni lo. 

' I sawi dik aman min rawn pan em em ang, mahse tumah hi ka nghak ngai lo chuan naktuk thleng pawh ka nghak hek lovang ' inringtawk tak chuan kan ti ham ham; ka hmelṭhatna hian Keifer ngei pawh hi ala ti â khawp ang. 

' Mahse tun thlengin nangman I nghak ziah a, I pan hmasa zawk ziah chu a nih hi. ' a rawn tih rual rual chuan rum zeta melh pahin lukham chuan ka vawm nghal pawp a, a lo la inbum zui. 

' Hey!  I kâ kha veng fimkhur rawh ' thinchhia tih takah ka lo ti vin nghal hlar a, ka mizia a hrechiang tawh bawka, ' Ka sawi dik nangpawhin I tih kha 'a rawn ti leh hram pek a nih chu. 

Ni e, a sawi dik chiah a vawikhat nan Keifer hi ka umzui renga, a nghaktu zawk ka ni ziah ṭhin a , a vawikhat nan mipa ka pan hmasak leh chân ka hlauh em em awmchhun kha a ni tlat. 

' Hahh... Aurora Walton ka nih hi, min hua nge haw lo tih te mai mai ka chhimbuk dawi leh zaih zaih mai ang ' ka tih chuan. 

' Chhimbuk a ni lo, Chhimbu dawi zawk alawm ' Peter chuan min lo hrilh nghal vat a. 

'Ka duh duh dan in ka sawi ang' ka lo ti hmuk thung. 

Engang pawhin Keifer chungah thinrim in midang han thik ve viau ṭhin mahila vawikhat in hmu ila chuan ka rilru ka thlak lehnghal daih aniang chu. Min ngaihtuahna ṭawngkam pakhat ringawt pawh hi ka lawm tawk a tling ve em em tho. 

' Min ngaithla teh, Rosy chungchang kha hrilhfiah phawt la, alo hrethiam em em ang che ....Isabelle chungchang ve thung kha chu amah I zawt dawn nia ' 

Peter hian kan pahnih a kan inbiak chuan kan sawifel nghal mai hi a ring tlata, mahse Keifer hian hmeichhe dang alo be hman zel a, biak chu sawiloh hmeichhe dang a bula an awm apiang hian tlawm ah ka la a ka induh tawk na hian min hnungtawlh tir leh ṭhin .

Ka phone chu ka han check vela ,Keifer an restaurant ah min hmuh a duh thu alo thawn chu niin, ka nui nghal ver ver ringawt. 

' Vawikhat chiah be turin ka kal leh ang ' ka ti zo chiah tih in ka pi in min rawn call thut a, a nazawng in min rawn be ngai si lova thil thleng a awm a ni tih ka ring thiam nghal. 

Rang takin ka pi call chu ka la nghal vat a, ka rin ang ngeiin a aw aṭangin a hlauthawng hle a ni tih hai rual a ni lo amaherawhchu ka nu a biak theih loh bakah zual lam a pan thut tih hre tur erawh chuan ka la inring lo asin mawle . 

Ka pi ṭawng mawlh mawlh lai chuan ka phone chu ka dah thla nghal riai riai a, ka bing nghal mup mup mai hian ka hria. 

Ka nu nen hian ka hriat aṭangin kan inkarah hian boruak ṭha a awm ngai lova, a awmdan avang hian ka haw hluah hluah ṭhin mahse ka nu neih chhun kha a ni miau a, ka tan thil  tamtak a rukin a lo ti ṭhin a ni tih ka hriat phei hi chuan ka inthiam lo in keimah zawk hi ka in haw takzet . 

' Peter ka nu... ka nu ' ka ti bah nuai a, ka mâng vek a,  ngaihtuahna mumal pawh ka pu thei lo. 

'Engtin nge a awm? ' 

' A... A zual thut, LA ah ka let vat angai nilo Keifer ka hmuh vat angai ' Keifer an min lo nghak reng tawh ang, ka kal hma in hmuh ngei ngei ka duh a ni. 

'Anih chuan restaurant thleng ka thlah ang che ' Peter an a tih pawh chuan keimah chauh a kal ka duh avangin restaurant lam pan chuan ka in khalh chhuak nghal a,ka chet buai tak vek avangin min ngaihtuah hle nghe nghe .

Restaurant ka thlen rual rual chuan Taylor hnenah Keifer awmna chu ka zawt nghal vat a, a kawhna restaurant hnung lam pan chuan eng thil nge thleng dawn tih hre lek lovin ka tlan phei nghal dawr dawr a ,ka lungngaihna tizual tu a ni dawn tih ka hre der silo.

Keifer leh Rosy te inkuah lai chu ka va hmuh ta thut mai!! Ka ding nghal chawt a, ka awm hmun ah chuan ka inhum ruh nghal vat a , ka awm zawn chu vih sawk sawk ang mai hian a rawn na nghal zawk zawk bawk. Hetiang hian vawikhat mah ka la awm ngai loh avangin ka rilru na avanga rawn na a ni tih pawh ka hrelo. 

Vawilehkhatah ṭah chhuah hawm hawm chakna hian min rawn pump nghal ut ut a , mipa avangin vawikhat pawh ka la ṭah ngai loh avang hian tlawm ta riau in ka inhre tlat lehnghal. 

Rang takin ka in her vut a, a lehpek awm leh tawh ngai lo turin Keifer chu ka hnungchhawn hmak a, chak zetin ka pen nghal hlawk hlawk bawk. 

Keifer hi ka zêm buai renga, min ning tih pawh ka hria mahse contract a zawh hma tal chu min ngaihtuah ve thei mai lo em ni?  Tuna ka thil hmuh ringawt pawh kha ka tan chuan a na tawk tawh viau a ni. 

 Keifer hian min lo ning takzet a nih dawn hi, ka lo tibuai ve chhen kha a âtthlak takzet,  ka mumang aṭanga ka harh chhuah hi a hun tawh pawh a ni mahna. 

' Aurora... Aurora ' Taylor chuan min rawn ko nghal chul a, chhang lovin hma lam panin ka pen hlawk hlawk reng thung .

Car a ka lut tur chu Keifer an min rawn nang ching hman a , engtin nge hetah ka awm tih a hriat pawh ka hre nek love . 

Ka ban a rawn vawn zawng te chuan ka lo sa nghal zak a, a hmel ka hmuh hian ka thin a rim zual hle. Min vawnna paih thlak nghal pawp pah chuan, ' F*ck off ' ka ti vin nghal hlar a, rang takin car ah ka luhsan hmak a, vawikhat pawh hawilet lovin ka tlan chhuak nghal nal nal bawk. 

Aurora.... I bungrua pakhat ve mai mai a nih kha,  I chan avang hian lungngai suh tiin ka inhnem mawlh mawlh renga , awmzia awm hram se ka ti takzet. 

★LOS ANGELES ★

A zan a zan in Los Angeles lam ka pan nghal a, chau pawh sawi lovin ka nu damdawiin awmna lam chu ka pan ding nghal chat a, rilru na hle e tilo chuan ka mittui chu a hul hiau a, Keifer bak ka rilru ah a awm theih tawh meuh lo. 

Ka nu awmna ka thlen chuan pawnah Trinity chu amah chauh hian alo ṭhu ngui bâm a, a bulah ngawi rengin ka va ṭhu ve nghal mai bawka. 

' Aurora ...' Tih duai pahin Trinity chuan min lo ṭah khum a, chutiang mai mai a ṭap chi ka lo ni lo bawk nen ka melh ngai melh in ka ṭhu ngawi reng ringawt. 

' Engtin nge a awm? ' tiin ka zawt sap a, ka ṭawng ri châng châng chauh a ni ber. 

' A harh thei lova, tunah ICU ah a awm meka ala harh lo na in a thaw erawh a panngai tawh ,I pi a lut meka midang erawh luh min phalsak lo' Trinity chuan ṭap ṭiau chung hian al o ti nghal zung zung a , ka nu mai bakah mimal harsatna leh rilru natna ka nei bawk nen boruak hi a rit in ka tawt nghal up up mai. 

Ka ṭap thei bawk si lo ka ṭhu mai mai te hi ka thaw a chham mai dawn emaw tih mai tur hian ka awm zawn hi a tawt in a na zawk zawk reng a. 

Eng ang pawh ka rilru na mahse ṭhut mawl tawp mai loh chu ka ti lang ve mai mai ngai lo. 

 Hetiang tehhrep tuar tur hian engthil nge tihsual ka neih?  Tu pawh hian min ngaihsak lo in min kalsan vek an tum ni mai te hian ka hria. 

Chutia ngawi renga kan thut tlawk tlawk lai chuan damlo pakhat hi an rawn nawr phei a,  nu pakhat hian a kut chelh sak in a hmangaih thu chu a hrilh nawn mawlh mawlh a,  room a an nawr luh hma thleng in a kut chu a chelh sak tlat bawk. 

An nawr lut chiah tih in chunu chu ka bulah chuan a rawn ṭhut nghal hnawk a,  a hmai hup chung hian a inhnit faih faih reng a, henu ang hian ṭah ve ka chak takzet. chhungrul ah erawh ka na vawng vawng thung. 

' Engtin nge hmangaihna chu a awm? ' tiin ka bula ṭhu nu chu ka va zawt tawl a, mak min tih hmel hle nghe nghe. 

' Hmangaihna maw ' tih sap pahin a mittui chu a hru nghal zeuh a, ' Nula hmangaihna hian a huam zau lutuk a, hetia sawi fiah mai theih hi nise ka ti takzet ' tiin min lo chhang a, mahse hmangaihna tih hi hre fo mah ila a awmzia ka hre miah lo thung .

' Chân mai hlauhna te,  thîkna te,  duhsakna te... Hmangaihna chuan a hlimna ah a hlim tir che anga a lungngaih chuan a ti lungngai ve ang che. A chhiatna I duh ngai lo anga , a kiangah chuan I hlim em em anga I haw hlen thei ngai lovang. Hmangaihna chuan ngaihdamna te,  ngilneihna te, inrin tawnna te pawh a keng tel a ni mahse I tawn hma loh chuan hriatthiam theih a ni lo' tia min hrilh chuan ka inngaihtuah nghal vung vung a. 

Hmangaihna hi ka hrethiam dawn lo emaw ka ti a mahse ka hrethiam tlat thung a chhanchu Keifer chunga ka rilru put hmang ang chiah anih vang a ni. 

Anih chuan Keifer hi ka bungrua mai mai ni lovin ka lo hmangaih reng amaw!!  

I chhiar zawh veleh khawngaihin fakna mawlh khu aw.. Xoxo

 

 

Read More

30 days with Mr. Genius -19

 

CHAPTER -19

' Keifer hmeichhe chungah hian sual lutuk ṭhin teh suh ' group dang ami Sophia chuan min rawn hau a, hre lo ang hmakin ka tih tur ka chhunzawm nghal a.

' Mahse a hmeichhe duh chungah chuan a fel viau ang ' hmeichhe pakhat ṭawng ri pawh ka hre zui zat .

Ka chanchin an sawi khawm nak nak lai chuan Landon bawk chuan, ' I chanchin hi chu hmeichhe ho tan chuan topic pakhat a ni ve hrim hrim ,nang lahin Aurora ringawt I ngaihtuah ve thung a ' a rawn tih chuan, ' I thil tih lai chiah kha ngaihtuah rawh ' ka lo ti hmuk thung a.

Hmeichhe chungah hian ka sual lo , an mahni ka duh loh avangin misual angah min chhuah mai zawk a ni.

' Kha hei vang hian lawm sual leh chapo an tih sup sup nachhan che mahse chapo vang nilo in tihbuai I nin avanga pehhel vek I ni tih chu hria se an rawn ti buai tawh miah lo ang che engpawh chu nise I duh thu hi engtik ah nge I hrilh dawn ?' Tia min rawn zawh leh chuan, ' Zanin ah'  tiin ka lo chhang sam et a .

Ka duh thu hi zep reng ka tum lo, ka nu in a phal emahrethiamo emaw, min lo duh let ve lo mahse ka duhthu hi hre hrim hrim rawh se, chutiang chu a ni ka ngaihdan chu.

Ban veleh classroom lamah ka chhukthla nghal a, Aurora hi biak ngei ngei ka duh a ni.

Classroom ah chuan Isabelle leh midang tlemte chauh an lo awm tawh a, Isabelle'in min rawn hmuh chuan min rawn pan nghal vat a.

' Keifer haw rual ila ' tih pahin ka banah a rawn vuan chawt a.

' Ka hman lo' tiin ka lo chhang tawl thung, mawi hnai taka ka hnar dan a ni.

' Mahse vawiin ah football in practice dawn bawk si lova ' a rawn ti leh a, min rawn vawnna kut chu muang changa pawh thlak pah chuan ,' Ka awm mai mai anih pawhin I tan chuan hun ka nei lo ' tih hmak pahin ka chhuak nghal a.

Tiang khan mawi hnai takin hmeichhia ka hnawl mai ṭhin a mahse a hnu lawkah mi ngeiawm leh sual tiin min chhuah leh nge nge tho.

Rang takin school parking lot lam ka pan nghal a ,Aurora car tlan chhuak chiah lai ka va hmuh takah chuan min hawsan a ni tih ka hrethiam nghal.

*Restaurant ah hmuh che ka duh* tiin message ka thawn nghal a,  a hmuh veleh a rawn kal ve mai ang.

In ah haw hmasa lovin ka duty zan nilo mahse Aurora lo kal hun nghakin restaurant  hnung lamah chuan ka ṭhu a,  kei ang lo takin ka zâm ru khawp mai.

' Keifer '

Hmeichhe aw ka hriat rual chuan rang takin ka tho nghal vat a, mahse Aurora nilovin Rosy zawk a lo nih avang chuan ka tum nghal hmuk a.

Hetah hian I awm ka ring rengah tih pahin a kun nghal lâp a, a awmdan aṭang chuan thil diklo a awm tih ka hrethiam.

' Eng nge hetah I rawn tih? ' ka tih chuan ngawi rengin min rawn kuah nghal thlawp a,   engtin mah ka lo ti let ve lem lo thung.

' Naktuk tlaiah ka haw tawh dawn a,  hetiang ringawt hi chuan ka kalsan thei tawh lo che , a hma ang khan awm leh ang ' a ṭap nghal zawih zawih a, mahse hmeichhe ṭap thlem hi ka thiam ve lo, ka ding ngawi reng ringawt.

' Mawh?  Keifer in kawp leh ang ' min sawi pah chuan a rawn ti leh a, ' Ka duh lo' tiin ka lo chhang vat a.

' Aurora vang em ni?  Ka laka hetianga I awm nachhan hi khanu vang kha a ni tiraw? ' tia min rawn zawh leh chuan ka lo bu nghauh a, a nih na tak pawh a ni.

' Mahse engvangin?  Eng nge kei aia a ṭhat bik na ?' tiin a au vak vak a, thil hi a ti harsa dawn tlat.

' Nang aia a ṭhat bik angai lo, ka duh chuan a tawk ' ka tih zawh rual chuan Taylor'in Aurora a koh ri chu ka hre thut a, rang takin umzui nghal ka tum a mahse Rosy bawk chuan ka banah a rawn vuan a.

' Kal suh, khanu khan ala kalsan vat ang che ' a rawn tih chuan a kut thin thlak pah in' A ni chuan ka nu vang mai mai in min kalsan ve lovang ' ka ti ngat a,  rang takin Aurora chu ka umzui nghal a.

Rosy hian ka nu vau na avangin min kalsan a, Aurora erawh ika nu vang hian vawikhat pawh a tawlh hnung lo.

Aurora car-a a lut tur chiah chu ka va nangching hman a, a kut ka kawih rual rual chuan rang takin a thing thla nghal sawk a.

' F*ck off ' tih pahin car ah a lut nghal hmak a, vawikhat pawh rawn hawi let lovin a tlan chhuak nghal a.

' Phiangsen chuan ' tih vin hluk pahin ka bula pot chu ka chhuih keh nghal chuai a; Rosy in min kuah lai kha a rawn hmu hman a ni tih ka hrethiam mai.

Chak zet in Aurora in lam panin ka in khalh chhuak nghal a, zanin ah la la hian engkim ka hrilh vek angai a ni.

A in ka va thlen chuan a lo in kalh ṭhiap a,  a rawn haw hun nghakin a gate pawnah ka nghak ta ringawt a, amah ka hmuh hma loh chuan haw mai ka tum lo.

Zankhua in a in kawtah chuan ka vei thauh thauh reng a ,a khat tawkin ka call reng bawk a mahse a in ring ral ṭhak ṭhak .Zing dar 8 thleng ka nghah pawhin Aurora hmel hmuh tur a awm chuang lo.

School kal a hun tawh avangin breakfast ka ei sawk sawk a, school ah ka tlang nghal a project kan buaipui ni a nih avangin Aurora lo kal hun nghakin classroom ah chuan ka ṭhu renga, minute 5 chiah ṭan hma in a awm tawh a mahse tun thlengin a la rawn kal lo.

Ka tih ngaihna hrelo chuan Peter bulah chuan ka vei fua fua reng a, Aurora chungchang zawh duh hle mah ila Peter meuh han zawh chu ka duh bik lo.

' Keifer ...vei tawh lo la chuan Aurora awmna chu ka hrilh ang che ' min ning hmel tak chuan a rawn ti ta ringawt a.

' Sawi rawh ' ka lo ti vat a.

' Aurora chu Los Angeles ah a kir leh tawh, a nu in hniam lam a pan thut a, a hrilh lo che mi, hrilh tur che khan a rawn kal sia ' Peter chuan a ti ta mai a, min ṭhawng takzet. 

Youtube channel Remruati Haylor tiin ka siam thar a , in ngaithla peih lo anih pawhin khawngaihna min lo subscribe vek tal turin ka ngen che u 😁.👇 

Read More

30 days with Mr Genius -18

 CHAPTER -18

Keifer biak a thil hrilhfiah vek ka duh avangin a apartment ep chiah a apartment ruak ka lei takah khan ka lo nghak ta ringawt a. A chang leh a kawngkhar bulah ka lo nghak thul, eng em em nge a tih a tun thleng thlenga alo la haw loh ni. 

Chutia corridor-a ka lo nghah mek lai chuan Keifer nu nen kan in tawk ta thut mai !! A hmel aṭang hian min hmuh a rin ring bik lo pawh a ni mahna mak tih hmel zet hian min rawn en reng ringawt. 

' Kan in be lawk dawn mi niang ?' Tih pahin kawngka chu a hawng nghal rawk rawk a, he Chinese nu khirh zet hi ka be peih tawh lo asin mawle. 

Kan pahnih chuan inhma chhawn ran hian kan ṭhu a, zam lo ta ve ve chu kan in melh kâr mai alawm. 

' Ka hrilh tawh che khan ka hria ka fapa hmuh theiha awm tawh lo tur che in ' ngeiawm zet hian a nui lui a, a thinrim nui lui a ni tih ka hai bik lo. 

' Miss Wu....' Inla polite fahran hian bul kan ṭan te te phawt a. 

' I fapa hi puitling a ni tawh a, engkim I hrilh a I tih tir vek angai tawh lo, zalen takin awmtir ve tawh rawh ' thil chu a nihna tak chuan ka sawi piap piap a, sawi mawi pawh ka tum chuang lo. 

A tih ṭhin dan ang bawkin min rawn nuih nghal sak a min rawn nuih el a ni zawk mah ang chu ,' Ka fapa hi keiman ka hrechiang bera ,ka enkawl dan tur pawh midang hrilh ngai lovin ka hrechiang ber ' a rawn ti ve kher a ,kan in chhang tawk hmak hmak khawp mai.

' Vawikhat tal a thil duh I zawt ve tawh em?  A hlim em, a lungngai em, ṭanpui angai em tihte hi vawikhat tal I hriat sak tawh em?  Sak lo tiraw? Keifer hian eng harsatna chiah nge a paltling tih te hi vawikhat chiah thlithlai ve rawh ' ka ti leh a, ka ngen a ni zawk mah. 

Nia, ka sawi chhuak lem lo na in Keifer hian anxiety emaw depression emaw ala nei ta ve ang, nilo alo nei tawh reng maithei bawk.

' Chu chu min hrilh angai lovang, ka fapa hian a mamawh awmchhun chu hmabak eng tak a ni chuan chu hmabak eng tak chu a nei meka nangni ho hian in lo tibuai ani. Chuvang chuan ka fapa hnaiah hian awm tawh suh ' thip zet hian min rawn melh a, hmeichhe dang ang chu ni ila ka hlau viau ang mahse an ni ang mai mai kha ka ni ve tlat lo. 

' Miss Wu I thil tih dan avang hian i la inchhir khawp ang, chuan I fapa hi engtik ni ah emaw chuan i la chân ang ' ka tih phei chuan ' thi rawh ' tih melh hian min rawn melh a.

 Keifer rilru pawh a puitling ve zela anu kalh zawnga a chet hun ala awm dawn tih hi ka hmuh tlang vek avanga confi taka sawi thei ka ni. 

' Chhuak rawh ' a rawn ti ta mai ,in melh rum tawh tak kan ni. 

Ngawi rengin amah melh reng chung chuan ka ṭhutna aṭang chuan ka tho nghal a, ' I fapa hi kumkhua in I thuhnuai ah I dah thei dawn lo' ka ti leh hram a, hawi sang vah chungin ka chhuak nghal nal nal bawk. 

' Hreptak chuan 'thinrim zet chung hian ka ti phei nghal mawlh mawlh a , Keifer hi ala ti khawlo vek dawn a nih hi. Nakin ah ala buai khawp ang. 

Car ah ka lut sawk sawk a,' F**k you ' tih mawlh mawlh pahin chak zet hian ka tlan chhuak nghal a. 

' Nang Chinese nu te te khan min vau tur a ni lo' te ka ti thul, ka tum loh deuhin ka racist zêk lehnghal. 

In ka thlen chuan ka tih ṭhin dan ang bawkin ka thinrim chuan ka bag chu ka paih nghal pawp a, ka chungah Keifer a lungawi lo bawk nen ka awm mai mai pawh ka thin a rim hler hlur mai. 

Ka pheikhawk ka phelh lai chuan ka phone chu a lo ri ve sek a, Sebastian an min rawn call a ni tih ka hmuh rual rual chuan ka phone chu ka khup hmak a, pickup tum na ka nei lo. 

A tukah pawh chuan classroom bulah Keifer lo kal hun nghak chuan ka ding renga, anu thu min hrilh te kha chuan ka nê pawh a khawih pha lo ,kalsan hi ka tum mai mai lo. 

Keifer biak ka duh nak alaiin nilengin project an khawih ni alo ni lehzel bawk nen biak chu sawi loh hmuh na hun takngial pawh ka nei lo. 

' Peter khawiah nge Keifer te project tihna Laboratory hi a awm? ' tiin Peter chu ka zawt ta ringawt a, alo hawihai nasa mai. 

' Ka hre bik hauh lo mahse kan zawng thei alawm ' 

' Anih chuan tunah kal nghal ang ' 

' Class minute 5 hnuah kan neih dawn hi ' 

' Thih I duh loh chuan min lo zui vat rawh ' tiin ka vau a, mahse ka ti tak tak lo tih erawh a hre thung. 

Peter nen chuan Keifer te Laboratory awmna zawng chuan kan inzui chho a ,room chi hrang hrang a tam bawk nen zawn hmuh mai mai chi ziazâng a ni lo. 

Chutia Peter nen classroom lama let leh kan tum lai tak chuan Landon leh mipa pahnih hi cartoon box pawm chunga rawn phei chu kan tawk hlauh mai a ,Landon hi Keifer ṭhian ṭha ber anih bakah an project tihna ah hian a tel ve a ni. 

' Landon eng nge I pawm kha? ' ka ṭawng hma in Peter chuan a lo zawt nghal vat a. 

Landon pawh chuan ṭha deuh hian ' Rosy in project ti ho tan juice a lei sak a, kan zuk la anih hi ' a ti ta mai!! 

' Rosy a awm ve mi ka sawi awmzia chu in project tihna ah ' tiin ka lo zawt nghal vata, ka vîn bawka an pali chuan min en ṭhap hlawm mai. 

' Aw.... Naktuk ah pawh a rawn kal ang ' an zinga pakhat chuan alo la ti ang deuh deuh a, ka sa lutuk a Peter phei chuan a hmai a hup tawp. 

' Ka rawn kal ve dawn, kal ang u' Laboratory awmna hre hauh si lovin hma chu ka hruai a, min rawn zui dat dat hlawm a. 

Laboratory awmna kan thleng ṭep tawh tih in tu emawni hian min rawn kuai her nghal lawp a, Chris lo ni rengin. 

' Aurora... Library ah min kalpui thei angem? ' tiin min rawn zawt a. 

' Thil dang tih tur ka nei ' tiin ka lo chhang hmak thung. 

' Reilo te chauh ' tih pahin ka ban ah a rawn vuan chawt a, chutah Keifer chu room atang chuan a rawn chhuak ve chiah lehnghal. 

Keifer chuan Chris a min vawnna chu a rawn hmuh chuan a hmel a dur nghal khup a, thinrim hmel te pawh a pu mahse engmah sawi lovin a lut lehnghal daih ringawt. 

' Keifer ' auh pahin zui ka tum zet a mahse Chris chuan, ' A rei lovang ' tih pahin min kai nghal dawr dawr a, Keifer chu ka be hman leh ta lo. 

★ Keifer's Pov ★

Chris an Aurora kut a vuan lai ka hmuh avang khan project lamah ka rilru ka pe thei tawh lo, engmah tih nachang pawh ka hre lo. 

' Keifer.... Aurora vang em ni? ' Landon chuan ka bula rawn ṭhut pah chuan min zawt a, ka chhang lo. 

' I awmdan aṭang hian in in biak ṭhat leh ṭhat loh a hriat theih vek ania.... Cool lutuk teh suh ' a rawn ti leh a, ka hma a lehkha chu ka chhiar san daih a, ka chhan peih loh vang a ni. 

' Ngatinge in in tih thiam loh leh a? ' Landon an min rawn zawh lai chuan Rosy chuan a awmna aṭang chuan min rawn nuih a, Landon pawhin a hrethiam nghal. 

' Rosy maw in in tih thiam loh nachhan, a thik em ni? ' tia min rawn zawh leh chuan lehkhabu en chung chuan ka lo bu nghat a. 

' Anih Aurora hi I duh em? ' tiin min rawn zawt leh a, vawikhat pawh inngaihtuah nawn lovin, ' Aw ' tiin ka lo chhang vat a. 

Nia, Aurora hi ka duh mahse tih lan dan ka thiam lo. 

' Anih chuan inbia ula, a fel vek mai dawn alawm' 

' I ngaih ang kha a ni lo' tiin ka lo chhang bul hmut a. 

Biak ka tum in Chris a bulah a awm a, a bula awm ka tumin Chris bawk a bulah alo awm hman zel a, biak na hun ka nei lo. 

Zaninah hian ka nu a haw dawn a, nizanah Aurora nen an inhmu leh tih ka hria, Aurora car-a a lut lai kha ka hmu hman a, ka va dan hma in a tlan hman a ni. 

' Keifer heihi eng nge? ' tih pahin ka nu chuan ka bag aṭangin Aurora teddy bear te reuh tê kha a rawn phawrh chhuak a. 

' Teddy bear ' tiin ka lo chhang a. 

' Teddy bear a ni tih chu ka hria mahse engtia I neih nge? ' ka nu chuan min rawn zawt leh a, ka ning ta hle mai. 

' Ka chhar a nih kha ' tih ringawt in ka chhang leh a mahse ka nu erawh a lawm lo hle. 

' Bawiha.... Khanu ta kha a ni em? ' 

' Ka nu.... Khanu kha a ni lo,  hming a nei' ka vin lek lek avang chuan ka nu chu a meng phawk nghal kawk a, min en reng ringawt. 

A hming chu Aurora a ni , khanu kha ni lovin. 

' Keifer.... I awmdan hi eng nge awmzia? ' hetiang hian ka vawikhat chhanna anih avangin ka nu chuan hnuk ulh ṭeuh hian a rawn ti a ,ka inthiam lo lehnghal .

' Ka tihpalh ' ka nu chu ka kuah nghal vat a ,vin kha ka tum dan a ni lo mahse Aurora chungchang anih tawh chuan engtiang mah a an tih hi ka ngaithei lo ka nu pawh nise .

' In in karah awm a awm em ni? ,  hetianga I nu meuh I chhan tak mai' 

' Engmah a awmlo ' 

' Anih chuan I thusawi hi ka awih thlap ,Bawiha I lehkha zir chiah ngaihtuah ang che ka tih tawh kha ' a tih chuan ka lo bu nghat a. 

Dawt ka sawi ngai loh avangin ka nu hian ka sawi a nih tawh chuan min ring nghal a, tunah pawh Aurora nena kan inkarah hian ka rilru put hmang chauh lo chu engmah a awm lo. 

_________________________________

Project kan tih laiin Rosy chu a rawn lut leh a, ka bula a rawn ṭhut pawhin awm ve lo ang maiin ka tih ngai ka ti ngar ngar zel a. Vawikhat pawh beiseina pek ka tum lo. 

' Kha juice hi in rawh ' Landon chuan nimina Rosy juice lei ang chiah chiah kha min rawn pe a,  Rosy lei bawk anih leh ringin ka ṭhutna a ṭhut pah chuan bawlhhlawh bawmah ka paih hmak a, midang pawhin min en ṭhap .

' Engthil nge maw I tih le?  Aurora in project ti ho a leisak a nih kha ' Landon'an a tih rual rual chuan ka tho thut a, rang takin bawlhhlawhbawm a mi chu ka va chhar leh vat a, ka awmdan chu mak ti takin min lo la thlir ṭhap hlawm a.

Aurora in Rosy a thik anga, a tih dan ang chiahin a rawn ti ve tih ka hria. Henu tak hi chu ! 

' Keifer ' Rosy chuan a rawn ti dek dek a, min biak hma chuan ka kal daih a , room atangin ka chhuak nghal hmak a. 

Aurora in a thik tih ka hriat avangin biak ringawt pawh ka tum lo. 

' Keifer lo ding teh ' Rosy chuan min rawn umzui a. 

' Ding rawh Keifer Wu ' a au vak takah chuan  ka ding thut a .

' Ngatinge min pehhel I tum tlat a tihsual ka nei em ni?  Nge khanu kha I hlau zawk? ' Aurora chungchang a rawn sawi chuan ka hawi let vat a, ' Aurora hi I game ah hnuh luh tum hlek suh , he I game khelh atan hi chuan a rilru a ṭha mah mah ' tih pahin pawnah tih tur ka nei lo bawka, room ah bawk chuan ka luhsan leh a. 

Rosy in Aurora a puhna te kha ka awih in rin chuan in tisual der. Aurora hi kawlh viau in insual hrat mahse khatiang mi kha a ni lo. ' A ni lo' a tih chuan a ni lo a ni mai, dawt a sawi kual duah ve ngai lo. Engkim kha Rosy game khelh vek a ni tih ka hria. 

I chhiar zawh veleh fakna khu hmet hram rawh aw, I hmu lo anih pawh han refresh la a lo lang leh mai ang. 

Read More