August 23, 2020
Case No. 19 (short story)
Written by Remruati Haylor
"Keini hi Police kan ni , khawiah nge ruang chu a awm ?" ka tih rual chuan local police lo awmsa pakhat chuan rang takin inchhung lamah min luhpui nghal a.
" Thil eng nge maw hmuhchhuah in nei tawh em? " kal pahin ka zawt a.
"Thil danglam deuh han hmuhchhuah tur a awm lo , mitthi hi thah nilovin mahni inti hlum anih ka ring " tiin min lo chhang nghal zung zung a.
" case an file miau sia tih theih kan nei lo, kan hna thawh mai lo chu"
"anu in mahni inthat anih a ring thei ngang lova "
" Engpawh chu nise kan mitthi chungchang ve thung hi le? " melh zeuh pah chuan ka zawt a rang takin min lo chhang nghal a
" A hming chu Laldinpuii a ni, kum 36 mi niin ft5"2' a sang a ni, fanu kum7 mi a nei a Serchhip khua niin Aizawl ah hian thla hnih liamta atang khan an rawn awm a, an ṭhenawmte sawi dan chuan mi dawr nghakin a inhlawh ṭhin a , zu a in nasat bakah a che bawraw ṭhin viau a ni awm e. Ni hnih liamta ah khan a fanu chin hriatloh in a bo daih lehnghal a, a rilru hah a intihlum pawh a ni mahna " Police pa in a tih lai chuan chiang zet hian ka melh he haw a " kan chhui chiang phawt aniang chu " tiin ka nuih sak a.
Room chhung kan luh chuan ruang chu khumah an lo mut fel than tawh a, a in khaina puan erawh celling fan ah lakthlak loh in a lo la uai a , ruang ka hmuh rual chuan stool emaw ṭhuṭhleng pawh dawh lovin engtin nge khitiang inchung sang lutuk ah a in khai theih tih chu ka rilru ah a rawn lang hmasa ber.
" Tunge a ruang hi hmu hmasa ber? "tiin ka zawt leh a, ka ṭhuihhruai leh ka ṭhian ni bawk Ruatfela'n ruang a endik lai chuan banga Pi Laldinpuii lehkha hnuhnung in tar chu ka lo endik ve thung a.
" Pi Laldinpuii dawr nghahna pa in a hmu hmasa ber a mahse a bialpa nen nizanah pawh an inhmu a ni awm e, a fanu a bo avanga a ṭah nasat thu leh zu a ruih thu a sawi tel bawk " Police pa in a tih chuan banga lehkha intar melh vung vung chung hian " ka pu, hemi lehkha hi bang ah hian lo tar ve chhin teh " ka ti chhuak hlawl a, mak ti hle mahse ka ngen ang chuan lehkha phek chu bangah chuan a rawn tar ve mai bawk a.
"Eng nge ni ta? "Mak tih hmel tak hian min rawn en ha a.
"Lehkha I tar khan khitah emaw khutah emaw tar lovin I lu zawn ah tak I tar mai a mahse hemi lehkha tartu erawh hi chu ft5"2' ni lovin ft5"10' tal a nih angai ang " ka tih takah chuan a inngaihtuah nghal vung vung a, mahni intihlum ni lovin thah anih hi ka ring nghet nghal bur .
" Bakah helaia a kutziak zawng zawng hi a inang vek a mahse a tawpa a hming Dini tih lai hi hawrawp dang daih a ang I ti ve lo maw? " tiin ka zawt let a,lehkha chu ngun takin a han thlir vang vang a, a ni mai awm mange ti rilru hmel te pawh a pu.
" Damchhan tiha D leh a hminga D a ziah dan hi a inang lo anih hi , handwriting lama mithiam ten a in an leh an loh chu an hre mai ang " a ti sup a, a ni pawhin inang lo ti mahse a chiang ngam bik lo.
" Pi Christy I lo kal lawk thei angem? " Ruatfela'n min rawn koh rual chuan ruang bulah ka va ṭhu hnai ve nghal a.
"A inkhaina puan ang khi chuan a nghawng a hrui thla duk ruih ang hi a siam thei lo hrim hrim, han en chian deuh hian hrui ze nei a rehhlum a ang ka ti " Ruatfela chuan a thil hmuhchhuah ang ang te chu min hrilh nghal zung zung a.
A inkhaina puan in zia a nei si lova, a nghawngah hian engvanga hrui ze nei thla chu lang ve ringawt nge a nih?
" a nih chuan an rehhlum hnu ah mahni intihlum anga a lan theih nan an khai leh a nih dawn chu! " Ruatfela leh police Pa chu an lo but nghat a, ka rindan hi a dik ngei ka ringtlat a ni.
"Keimah ngeiin Pi Lalinpuii bialpa leh a nu chu thu zawhfiah leh ka duh " tih leh chhuah ka rual a, a bak zawng chu forensic leh Medical examiner te kutah a awm tawh.
Pi Laldinpuii ruang hmu hmasa ber tu leh a dawr nghahna neitupa Pu Sangzuala aṭang chuan bul kan han ṭan a, pa ti chet chawt a ni a kum60 mi vel a ni bawka zawhna pawh a chhang ṭha hle amaherawhchu a landan ringawt aṭang hian a fihlim tihna a ni lo.
" Ngatinge zing kar kar ah Pi Dini inah I va kal? "Ruatfela'n ṭha takin Pu Sanga chu a zawt a.
" Zingkar ah dawr bungrua a rawn thleng dawn a, Dini hi dar6 a rawn thleng tur a nih laiin dar7 ah pawh ala rawn thleng lova. Ka call lahin phone a la thei bawk si lo ka mangang in ka va kalchilh ta ringawt a ni, nu fel tak ni asin" tiin a chhanglet a, a finfiah nan a phone chu a hmuh bawka han rinhlelh na tur pakhatmah kan nei lo.
" Nizan dar 11 leh zing dar 5 inkar ah Khan khawiah nge I awm? " a han ti leh a.
Zan dar11 leh zing dar6 inkar vela thi anga ngaih a ni a, dar11 hi Pi Dini bialpa haw hun chiah nia sawi a ni bawk.
" Ele... Inah ka awm, ka tupa pum anat avangin zankhua in kan buai a hmun dangah kal hman ka ni lo "
Pu Sanga chu zawhna chi hrang hrang kan zawh hnuah pawh rinhlelhna tur kan la hmu chuang lo cheu, nizanah inah a awm ngei a ni tih finfiahna a nei bawk nen fihlim a ngaih a ni.
Pi Laldinpuii nu kan han kawm leh a naute pa tumahin an hriat loh thu leh Pi Din'in a zep tlat thu bak thuthar hriattur leh case a min pui thei tur pakhatmah hriatbelh tur a awm lo mahse ka mi rinhlelh ber Pi Dinpuii bialpa ka kawm hnu ah erawh thu thar ka hriatbelh tawh ngei ka beisei.
"Nizanah khan a bulah I awm a, zu a ruih bakah a rilru a na hle tih hrereng chungin ngatinge I hawsan ?"
Chiang fiahfai takin Lalrengpuia Pi Dini ngaihzawng Pa chu ka zawt a ,minute 20 lai thu kan inzawh hnuah pawh a kâ a ang ṭha duh der lo ,a thah a nih loh thu bak a sawi duh meuh lo.
" Hna a kal ka ngai a ka riak thei hleinem" a rul tawk lek hian min chhang zel a, a awmdan leh landan aṭang hi chuan a bialnu thi hi a tuar vak lo a nih hmel hei hian ka rinhlelhna a ti zual hle bawk .
" Khawiah nge Mercy a awm? Nangmah ngeiin sikul ah I va thlah a ni lawm ni ?" tiin Lalrengpuia chu Pi Dini fanu bo ta chungchang chu ka zawt a.
" Ka thlah ngei alawm mahse anu in a sikul bang a hruai tur thu min hrilh a a bak zawng chu a bo tih ka hre leh tawp a ni mai " tih lekin min chhang duh chauh.
Mercy kha anu in hruai turin sikul ava thlen khan midangin an lo hruai haw daih tawh a, chutaṭang chuan a thi nge ala dam tih pawh hriat a ni tawh lo .
" anih chuan nizanah I inah I awm ngei a ni tih finfiahna I nei em? " a mit ah tak chuan ka melh kalh a " neilo tiraw? Hetiang pawh hi a ni daih thei, I bialnu rui leh rilru na I hawsan nachhan chu I thah hnuah intihlum anga lan tir I duh avangin " ka tih chhunzawm zat a, ka tum ang ngeiin a zia a rawn chhuah ṭan ta ngei a.
" Ka thah a ni lo , henu hi ka that lo " tih pahin a ṭhutna aṭangin a rawn tho chhuak ur ur a, min rawn khawih a tum ta mai!
Rang takin an lo dang bet nghal vat a, a thinrim luatah a hmai te lah chu a sen ṭul a rilru fim a pu thei tawh lo a ni ber.
"Autopsy result aṭangin kan la hria ang chu " interrogation room chu ka chhuahsan a, Ruatfel'an min rawn zui nghal a.
" Pi Christy, mi thinchhia leh midang kutthlak ching tak a ni a a bialnu hmasa pawh alo hnek tawh a ni awm e . Pi Dini nen pawh hian an in hnial buai anga a rekhlum mai te hi a ni mai lo maw ?" Rualfela nge nge a fing ṭhin mange, keipawhin heihi ka rin dan chiah a ni.
" Thil chhia a awm lova engmah a bo hek lo , inrawkna a nih loh chuan mimal buaina vang a ni ngei ang " tiin ka chhang a, finfiahna ṭha tak kan la nei loh avangin Rengpuia hi kan man ngawt thei lova, finfiahna ṭha tawk tak ka la mamawh.
" Chuan Mercy kha lo chhui zui rawh aw, a hmelhriat emaw a mi ngainat tak a nih loh chuan chutiang ringawt in hmelhriat loh a zui haw lo tawp ang " ka ti leh a.
Chau hnep hnawpin inah ka haw hnak hnak a, inchhung ka luh chuan rin loh lutuk maiin bawngsa rim ka hriat rual chuan ka harh nghal kawk in ka hria.
" Sawma eng nge hetah I tih? " ka meng bial nasa mai, ka awmdan avang chuan min rawn la nuih suk zui.
Kan pa hi Evangelist a ni a, a team te nen hmun hran hran ah Pathian rawngbawl in an zin kual ṭhin a tunah pawh hian Phullen a awm tur a nih laiin hetah ei rawng alo bawl daih hi ka mumang a nih te ka ring zawk hial.
" Bawih... I nu thih champha ah hian nangmah chauhin ka awm tir thei hleinem che " ka chal ah a rawn fawp zeuh a, nilengin ka buai lutuk a ka nu thihchampha meuh pawh ka Lo mangnghilh alawm mawle.
" A thihchampha vawihnih na alo ni leh der tawh " tih pahin nghet takin ka kuah a.
Ka nu hian kum2 liamta ah khan lungphu chawl in min kalsan ani tih hi tun thlengin ka la ring thei lo, zanah te hian min rawn call leh tur ang te hian ka hre tlat ṭhin.
" Vawiin ah eng chungchang nge in chhui leh taka I va nguai ve ?" ka bag ah lai chu min rawn laksak a,ka dar a malis pah bawka.
" Thuruk " tih pahin ka nuih ver ver a " tak taka min zawt tawh suh ka tih kha sorkar thuruk hi chu ka sawi chhuak thei lo " min ngaihtuah avanga min zawt a ni tih hre tho mah ila ka hrilh thei bik lo.
"I duh ang chuan le, ka lo ṭawngṭai pui dawn che nia...han inthlak la chaw ei kan lo siam ange " ka samah duat takin a rawn chul a, ka nu thih champha pawh lungngai takin ka hmang dawn lova ka lawm takzet mahse zep lo chuan ka nu kha ka ngai in min la dampui se tih baka duh ka nei lo.
Zing ka thawh meuh chuan Sawma chu a inbual mek a, rawng pawh a lo bawl fel leh diam tawh a pasal ṭha ber chu a va ni chiang tak em.
" Morning "
Hlim hmel pu sang chung hian bathroom aṭangin a rawn chhuak a.
" Morning .... huan ah I kal em ni? " a chapal-a lei kai nuai chu ka va melh zeuh a.
" mmm...thil ka ti tla a, hnim karah ka zuk zawng mawle "
" haha... A hnim tawh sia hman ver vawr hunah ka la thlo ang "
" ka rawn haw leh veleh kan tifai dun dawn nia " a tih chuan kan innuih a, inneih thar hlim te pawh kan ang.
Sawma'n office thleng min thlah a, Gospel camping nei tur an la nih avangin Phullen lam panin a inkhalh chhuak leh nghal a , keimah vang chauh in a rawn haw vang vang a buai hle mahse min ngaihsak a ni tih hi a ti lang ṭang ṭang ṭhin.
" Ruatfel.. thuthar a awm em? " ka mawng em pawh ka hûn hma in ka zawt nghal a , ka rilru a kap em a tin ni .
" aw hei autopsy result " a tih chuan ka dawhkana file chu ka chhiar nghal zung zung a .
" Pi Dini an rehhlumna hrui kha bawlhhlawh bawmah an hmu a an TV hrui a ni awm e chutah chuan Rengpuia finger print pawh an hmu . Rengpuia phone ah erawh thil danglam engmah hmuhchhuah a awm lo." Ruatfela chuan a ti nghal zung zung a.
"Anih Mercy ve thung kha? "
" A chungchang engmah hriat tur ala awm lo " ka kawchhung a boruak tawt lutuk chu ka han thaw chhuak halh a, hepa hi thu zawhfiah leh ka duh.
"Mercy chu kan zawn leh phawt angai dawn a nih chu , pawisa avanga inruk bo na erawh a ni lo tawp ang " ka ti zui sap a,
pawisa phut avanga in ruk bo na chu nise pawisa an rawn phut daih tawh ang.
Pi Dini thihna a mawhphurhtu ber Rengpuia man theihna tur khawp finfiahna kan nei tawh a amaherawhchu Mercy erawh a amah ber a thi nge ala dam tih pawh kan hriat loh avangin Mercy case ah hi chuan Rengpuia hi kan man ngawt thei lo.
" Autopsy resulta a lan danin Pi Laldinpuii hi TV wire hmanga rehhlum a nih hnuah celling fan a khai leh a ni a, a inkhaina hrui leh a kuttin ah I DNA leh finger print an hmu bawk. I inpuang anih chuan I hremna hi a nep phah ang chuvang chuan hun I neih lai hian inpuang mai rawh " Rengpuia nen chuan kan inhmachhawn ran a, tunah erawh nimin ang khan min melh tawh lo, thudik kan hriatchhuah takah chuan a zam ve deuh te pawh a ni mahna .
" ka that lo " ala ti ve ṭang ṭang , engang pawhin phat tum teh mahse a thah a ni tih a chiang tawh tho tho mahse ka tum ber zawk chu a kâ aṭang ngeia hriat a ni.
Ka rin ang ngeiin Rengpuia hi ft 5"11' vela sang a ni a, kha lehkha kha ama tar ngei niin Pi Dini chu tihluihna hmanga ziah tir a ni a a hnu ah Rengpuia ngei hian a tawpa Dini tih chu a ziak leh a ni. Kutziak lama mi thiamte pawhin lehkha a thu inziak leh a tawpa 'Dini' tih inziak kha a ziaktu a in an loh thu an finfiah vek tawh.
" A in luahna ten Pi Dini thih zan khan in in hau thawm an hria a engkim kan hre vek tawh "
" Ih... englo ania " a ngawih vung vung hnuah a rawn ti chhuak hlawl a, dawhthei takin a ṭawng leh hun chu ka lo nghak ran a.
" khami zan khan Mercy chungchang velah kan inhau ngei alawm, a thinrim chuan ka hnungzang ah a rawn ṭham vak a mahse kut vawikhat pawh ka thlak lo. Dinpuii hi ka thah a ni lo, Mercy pawh ka fanu ang chiahin ka en a ka tihbo a ni lo" tiin ala ṭang ve ṭang ṭang .
" Finfiahna zawng zawng in nangma lam a hawi vek tawh a , I tih theih zawng chu I hremna a nep theih nan a inpuan mai hi a ni "
" ka thah a ni lo ka tih chu " vin ṭhah hian min rawn au khum a,mi thinbutut tak a ni a tual a that pawh hi a awihawm loh hran lo.
" anih chuan court ah kan inhmu dawn nia" tih pahin ka chhuahsan nghal nal nal a.
Pi Dini case fel tawh mahse Mercy erawh kan la hmuh miau loh avangin ka awm ala nuam thei chuang lo, ni 4 lai a bo tawh a damin kan hmu leh angem tih pawh ka hrelo.
Ni hnih a liam leh hnuah pawh Mercy chu kan la zawng reng tho a, thuthar engmah hriat tur ala awm chuang lo chutih lai chuan Rengpuia lah ala inpuang duh der lo, a tawp thleng a ṭang dawn niin a lang.
"Christy hei case thar I nei leh tawh ania " Sir in a tih chuan mak ka ti lem lo, case mak deuh deuh hi engtik lai pawhin ka buaipui ṭhin miau a.
" Tukin zing dar 5 leh minute 15 vel khan Tuirial ah bawlhhlawh hal tuten bawlhhlawh zingah kut bung an hmu a, a taksa dang erawh tunah an la zawng mek a , kut erawh zir chian turin an la tawh "
" aw le, ka hrethiam e " ka ti tak na in ka huphurh ru hle.
Huizz, kut bung ringawt tunge a ni tih pawh kan la hriat loh chu a thattu ka zawng dawn chu ania huphurhawm ṭe ṭaw tak a ni.
A bul ṭan nan Medical examiner Dr. Jerry chu hmu turin ka kal a , a hma pawhin kan lo thawkdun fo tawh bakah ṭhian ṭha tak kan ni bawk a keimah ngeiin zawhna zawh ka duh.
" Chibai... Jerry ah! Dr. Jerry " tih pahin ka nui lut har har a, a ni lahin thil duh ka nei tih alo hrethiam nghal.
"Min treat loh chuan ka kâ ka ang dawn miah lo ania " tiin min lo fiam let a.
" a aia ropui zawk ka la tihsak ang che tih pawh hriat va ni suh, thil thar hriat I nei tawh em? " ka tih zawm zat a, a ni pawh a nui tawp.
" a kutzungpui a a fingerprint hi ala hmuh theih hlauh a " tih pahin paper hi min rawn pe a, chutah chuan a identity zawng zawng chu a inziak vek a.
" Mercy Zonunsangi, kum 7... anu Laldinpuii apa erawh a inziak lang lo " Dr. Jerry an a tih lai chuan paper chu ka en renga, a tawp a tawpah Mercy ka hmu ta!
"ka lawm e "
" ni lo , Pu Modi Ji-a hnenah lawmthu sawi zawk rawh. Mercy Aadhar card a fingerprint aṭangin alawm tunge a ni tih ka zawn chhuah...All the credit goes to Aadhar card " a ti vel ham ham a, hna a thawh loh lai hi chuan a thawveng ve khawp mai.
" anih chuan Pu Modi Ji-a nen chuan ka la treat ang che u " ka ti a, kan han nui leh rih a.
" Helai hi han enchiang deuh teh " kut bung chu chiang zet hian ka zung en a, ka mur deuh sung sung thei a rim te pawh ka hre tel deuh.
" a ruh leh a tî vel hi mam taka zai thlak a ni a, chem hriam taka sah anih hmel. A kut ruh bawk lai taka chan anih danah hian a titu chu tha chak tak a ni ngei ang " Dr. Jerry an a tih chuan ngaihtuahna a ti kalthui takzet.
"Chuti chu a taksa dang pawh a chansawm vek ang a " ka ti sap a,rin aiin he case hi a buaithlak dawn tlat.
" ni chiah e mahse a lu ruh erawh a chansawm thei hauh lo ang , khawiah emaw a paih ngei ang "
" bawlhhlawh zingah ala awm maithei anih loh vek pawhin luiah te pawh a paih bo daih thei bawk " ka lo tih zawm zat a,engkimah Rengpuia ka ringhlel lehnghal vek tawh.
Zawhna ni ta chu engvanga Mercy hi that nge a nih? Engvanga naupang pawisawi lo chungah hetiang taka rawnga che nge a nih ? A chhanna erawh Rengpuia chiah in a hria.
" Pi Christy, Rengpuia chu ka dawp leh pawhin engmah a hriat loh thu leh tumah a thah loh thu bak a sawi duh lo " Mi dawp thiam tak Ruatfela meuhin a tih takah chuan eng nge maw ka tih angai dawn a nih hi.
" A hmasa berin Mercy Pa hi tunge a nih kan zawn chhuah angai ,Pi Dini hian Mercy Pa chungchang hi anu takngial pawh engvanga hrilh duh miah lo nge anih tih nen lam engkim a bul aṭangin kan chhui phawt angai " ka ti dap dap a, kei tluk zetin Ruatfela pawh hian a huphurh ve hle tih hai rual a ni lo.
A bul aṭangin case chu kan han zir chiang leh a, pi Dini ṭhenawm khaw vengte mai bakah a chhungte leh a ṭhiante pawh zawhna kan han zawt ṭha leh vek a, case a min pui thei tur erawh thil hmuhchhuah thar pakhatmah kan nei lo. Mercy Pa takngial pawh tumahin hria an awmlo.
Heti ringawt hi chuan Mercy thattu nia rinhlelh ber Rengpuia man theihna khawp finfiahna kan hmuh miau loh chuan case hi a zuzi mai mai dawn tih a chiang reng , kan hnu chhui dan hi kan her rem deuh a ngai dawn a nih hi.
" I sawi ang khan Pi Dini social media hman awmchhun a Fb account chu kan chhui chiang a, mi pahnih biak nasat deuh a nei a pakhat zawk chu fake ac a ni a tunah phei chuan a deactivate daih tawh lehnghal "tiin Thansangi chuan min rawn hrilh a.
"A mi biak pakhat erawh a dawr nghahna pa Pu Sanga a ni!! " a ti ta mai!
Hei zet zawng kan hnuchhui na atana thil pawimawh lutuk a ni chutah an inbiak dan lah chu dawr neitupa leh a mi chhawr lai anga inbia an ni hauh lo , an zahmawh thlalak te an in thawn a chu mai ala ni lo Pu Sanga chuan a nupui hi ṭhen thei se chuan nupui ah neih daih a duh thu te, a fanu Mercy erawh api (pi Dini nu) te bula awm tir mai tur te in a hrilh a , chu aia mak zawk chu Rengpuia nen alo kawp reng tih a hriatchhuah avangin thah ah te a vau a, rin aiin case hi a buai chho tawlh tawlh mai.
" fake account aṭanga rawn be tu pawh chu lo chhui chiang leh ula thil hmuhchhuah dang kan nei leh em em ang " tiin ka hrilh a, amaherawhchu tunge a ni tih zawn chhuah a awlsam lo tawp ang.
" Jacob... Pu Sanga chu thu zawhfiah turin kan kawl rih angai ang... bakah " ka ti chiah a ka luahchhuak lutuk chu ka uak nghal pawp a, Thansangi'n min rawn buaipui nghal a.
" I ṭha maw? "
" aw...ka rim huat deuh ka hip lut thut alawm mawle " ka ti chuai raih a, tun hnaite aṭang khan ka chau in zing luakchhuak te hi ka nei reng a,ka pum chak loh vang nge mawni?
" nanghi I rai a ni lo maw? " Nui chungin Thansangi chuan min rawn fiam zui zeuh a mahse a nih theihna chin a awm.
" ka rai a ni maithei " ka nui chhuak hak a, ka rai tak tak nge tak tak lo tih pawh ka inhriat hma hauh in ka hlim nghal em em ringawt.
" ni e, ka hman veleh ka test ang " tui ka in nghal khawlh khawlh a.
" chuan Mercy zirtirtute khan eng nge maw hriat an neih takin in lo va zawt dawn nia"ka tih zawm zat a.
Interrogation room ah Pu Sanga nen kan inhmachhawn leh ran tawh a, zawhna apiang ṭha takin a chhang zel a mahse Pi Dini nen an inkar ah engmah a awm loh thu in a ṭang ve tlat.
"Heihi Facebook aṭanga in in biakna a ni a" tih pahin an inbiak na chu ka hmuh kher a, a thlan a hru chhen tawh mai.
"Tun hnai maia in inbiak dan aṭang hi chuan hnathawk leh a chhawrtu inlaichinna ang kha a ni lo tawp mai, ka sawi zel dawn nge I in sawifiah zawk dawn? " ka ti ve ngat a, a sawi tur hrelo chuan a chil a han lem dak a.
"Ni e, Dini nen hian kan inkawp ngei alawm kan inhmangaih hle bawk kha mi tenawpa rawn lan hma kha chuan..!" Thaw deuh halh chung hian a sawi chhuak ta nge nge a.
" Chuan a kawp che tih I hriat avangin I thinrim chuan I that ta a ?"
" nilo, nilo ka thinrim insum zo lo khan thah ah ka vau ringawt alawm mahse ka that lo "
" anih leh engvanga Mercy kha pawm ve duh lo nge I nih? " ka ti leh a, rinhlelhawm khawpin a zam nghal em em ringawt.
" Fa Dini ang rual ṭhiau ka nei tawh a, naupang kum7 mi enkawl leh chu ka peih tawh lo " a ti tawl a, a ṭawng duhdan avang chuan ka mitko ka tih kan ãk phah nghe nghe .
" Nupui nei lai I ni a Dini chunga I thil tih dan avang hian inchhirna I nei miah lo em ni? "
" kha mi hûr nu kha engtik lai mahin neih ka tum ngai lo ,ka nupui hi ṭhen ka tum bawk hek lo" ati leh daih a, a thusawi a inkalh ta nuk hlawm mai.
" Neih I tum si loh chuan engvangin nge I umzui reng? Nge in chungchang hi I nupui hrilh a tum avangin I dahṭha ta zawk? anih loh vek pawhin vau beh nan a fanu I thahsak zawk?" a mize dang phawrh chhuah a inpuan tir chu ka tum ve ngar ngar a.
" ka that lo ka tih chu mawle " a awki a san vak a, thil hrechhuak ni awm tak hian a ngawi leh daih a chutah a kâ ah pawh zen ila min seh lovang tih tur khawpa aw nem hian, " Pawisa nuai hnih lai ka pe a ,dil let leh ka tum a " a nui lui deuh suk a "lo umzui lo tawp ila ṭha tur " a ti zui sup a.
Hepa hian mize pahnih a nei a nih dawn hi!
Sawma nen kan inbiak zawh veleh mu turin ka inpuahchah nghal a, ka maimichhing fel chiah tih in ka phone a rawn ri ral ral a.
" Ka chau asin mawle "
Number hlang mah nise zanrei tawh a call a nih vang hrim hrim in phun nuah nuah pah chuan ka la ta tho a.
" Hello" ka ti chher chhap a.
"Pi Christy a ni em? " hmeichhia a ni a, a hlauhthawn hmel hle bawk.
" aw, eng nge ni ta? "
" Mercy te Miss Puii ka nia, sikul CCTV ah Mercy rawn hruai tupa kha a lang a"
Ka mutna aṭangin ka ṭhu chhuak nghal zawt a.
" A lang chiang vak lo na in in hnuchhuina ah a puih theih tak cheu in ka tia " a phun sap sap a, a zam hle tih ka hre thei.
" ka hrethiam e.. hlauhthawn tur engmah a awmlo, I address min rawn thawn la tunah tape la turin ka rawn kal nghal ang" mutchhuak leh chau pawh a sawi theih tawh loh.
" nilo naktuk zing dar 9 ah kan sikul gate bulah kan inhmu zawk dawn nia , chutah chuan ka pe ang che" a tih takah chuan a duhthlanna chu ka zahsak ta zawk a,
naktuk a inhmu tur chuan kan in remsiam a.
Ka helhhawlh vang nge pawh ka hrelo zanah pawh ka muhil hlei thei lo ,video en mawlh chu ka chak a ka za zek zek tawh .
Mercy te sikul gate bulah chuan Miss Puii chu ka nghak ran a , nghahhlelh tawh nak alaiin dar9 ah pawh ala rawn lang lo. Min rawn hmu fuh lo a nih ringin ka hawi kual vel a a hmel awm ang hmuh tur takngial pawh a awm chuang lo.
Darkar hnih zet ka nghah leh hnu chuan call a la thei bawk si lova ka ngaihṭha lo chuan an office ah ka han kal ta ringawt a .
" Miss Puii hmuh ka duh a,a awm em? " tiin stuff room-a ka mi hmuh hmasak ber hnenah chuan ka zawt a.
" Ilo la hre ve nange Miss Puii te chu nichin lawk khan a sikul kal tur scooty in a accident a tunah nikhaw hrelo in damdawiin ah a awm mek " a ti ta mai ! chhan ngaihna pawh ka hrelo .
Tih dan dang a awm tak mial in tiin an sikul Principal hnenah Mercy bo ni a CCTV footage chu ka dil ta ringawt a, engkimah min puih inhuam hle mahse February ni 5 a thil thleng zawng zawng an record na tape chu an hmu zo tlat lo.
Beidawng tak chungin ka let leh hna hna a tunah chuan beisei tur pakhat chiah ka nei ta chu chu Miss Puii rawn harh hun nghah a ni .
"Pi Christy tun thlengin thuthar hriat tur ala awm lo" Ruatfela chu ka bulah a rawn ṭhu hnak a, case dang pawh kan buaipui thei tawh meuh lo.
" Ruatfel he case hi mak I ti ve em? Engkim hi a buai nuai mai ,finfiahna ṭha tak awm si lovin finfiahna kan neih sa te hian tupawh tualthattu angin a kawk thei vek a eng nge maw diklo chu a awm a ni " ka ti sap a, eng nge maw chu a awm ngei mai mahse zawng chhuak turin engtin nge bul ka ṭan dawn ka hrelo .
" He case hi a titu hriat lohin a awm leh reng dawn a nih hi "
" Chu chu ka thlen tir dawn lo " inring tawk takin ka ti ve tak na in bul ṭan dan tur ka hre der si lo.
Miss Puii lo harh hun kan nghahna lamah ni hnih lai a liam leh der tawh a, ṭhu mai mai hman erawh kan ni lo finfiahna kan la zawng reng tho.
Pregnancy test kit-a rin sen pahnih ka hmuh rual chuan bathroom ah mahni chauh in ka nui ver ver a , inah awm ila chuan ka au chhuak ngei ngei ang.
Sawma nen hian kum5 lai kan in nei ve tawh a, fa nei thei tawh lo tura kan in ngaih hnuah hetiang thu lawmawm lutuk a thleng ta mai hi ka la awi thei lo.
Hmaichhan ngeiah hrilh ka duh a, hrilh chak tawh hle mah ila ka la zep ve ṭang ṭang .
Inthiarna aṭanga ka chhuah chuan Ruatfel'an "Pi Christy I sawi ang khan media lam chu ka hrilh tawh e" a rawn ti a buk nghauh pahin, " a ṭhat hlauh chu " ka ti let a.
" mahse Miss Puii ala harh si lova engvanga media te hnenah a rawn harh tawh thu leh Pi Laldinpuii inah finfiahna a awm thu hrilh ve ringawt nge kan nih? " hriatthiam loh hmel tak hian min rawn zawt a, ka chhan hma in ka han nui leh te te phawt a.
" Thang kan kam dawn mawle, Miss Puii rawn harh hun nghakin kan ṭhu mai mai thei hleinem he case phenah hian thil mak tak a awm ka ring tlat a ni. " a hmel aṭangin ka thusawi hi ala hrethiam chuang lo tih ka hre thei.
" Engtin? "
" I la hre mai ang chuan zanin chu haw lo turah lo in ngai phawt rawh " ka tih leh phei chuan a bo tulh tulh.
Ruatfela nen kan pahnih chauhin Pi Laldinpuii inah light off thim vek chung hian KFC kan ei dun mial mial a , a reh bawka niang kan thil ṭhial hmuar hmuar ri bak thawm dang hriat tur a awm lo.
" Ngatinge light hi kan on mai loh?" Ruatfela chuan a rawn ti sa sa a. Kei lah pek chuan ṭawng ṭha ta mai lo chuan, " tihian a tui zawk" ka ti let sa sa a, midang in min rawn hmu se chuan mi â pahnih emaw min rawn ti hial ang.
Dar 1 a rik meuh chuan rai no chaklo tih takah ka muthlu lawp lawp tawh a,a khat tawkin Ruatfel an min rawn nghawk harh leh zeuh zeuh ṭhin a.
" ngatinge hetah hian kan awm reng tih hi ka la hrethiam thei lo " a rawn ti leh sa sa a, zan reiah chuan a ṭawng pawh hi a ring khawp mai.
" media ho in hetah hian finfiahna a awm thu an puang tawh a, ka ruahmanna a kal fuh chuan hetah hian tuemaw finfiahna zawng turin a rawn kal ngei ang " ka ti ve tlat.
" Lo kal lo ta se kan chang thlawn dawn tihna em ni chuan inah pawh nilovin heta light off chung meuh a KFC kan ei te khan awmzia a nei lo bawk anga"
" ni mai e" ka lo ti sam et a, thim hle mahse a ner nang lai tur hmel hi ka mitthla thei.
" chuti... " a ti dek dek a, thawm ka hriat thut avangin a hmui chu ka kut in ka hup sak nghal vat a, kan che ngam tawh lo.
Ka rin ang ngeiin finfiahna rawn zawng turin tu emaw chu a rawn kal ta ngei a, tunge a nih tih chiah hriat kan hmabak ta.
Ke pen thawm chu a rawn hnai zel a, kan awmna pindan ah torch light en kual pup pup chung hian a rawn lut phei zel a min rawn hnaih ta maw tih in silai ka phawrh chhuak sawk sawka a awmah tak tin pahin ," Man I ni e" ka tih rual chuan Ruatfel'an light a rawn on ve nghal chat bawk a.
Light a rawn en rual chuan phawk fe hian chupa chu ka melh nghal kawk a, ka mit nghal sawlh bawk!!
" Sawma hetah eng nge I rawn tih? " tih chu aw khur dar dar chungin ka sawi chhuak thei hram.
Dar8 bawr vela kan inbiak kha chuan Phullen ah a awm thu kha min hrilh sia mahse tunah hian eng nge hetah a rawn tih? Phullen a awm tur a ni asin.
Ka vai ruai mai hian ka hria ka suangtuahna mai mai nise ka ti takzet.
" Duat.. " tih pahin min rawn khawih a tum a mahse a awm ah silai chuan ka lo nawr sawk a .
" Che suh... Min rawn hnaih leh chuan ka kap ang che "
" Duat min ngaithla teh " ka thusawi hrelo ang maiin min rawn hnaih zela.
" Ruatfel "
Ka sawi anga a awm tak loh avang chuan Ruatfela chu ka han mitmei zeuh a, a tih tur a hai bik lo Sawma chu a hnungkhirh pawp a handcuff a bun tir nghal mawlh mawlh a.
" man I ni e " a tawp nan inseh ruh ṭun chungin ka ti leh hram a.
Sawma chu kan han dawp ngial pawhin midang ang tho in engmah a sawi duh lo,a ngawi tlat a zawhna pawh a chhang ṭha duh der lo. Finfiahna ṭha tak tello chuan ani pawh hi Police ten kan kawl reng thei bik lo.
" Ruatfel eng nge maw tal sawi a nei em? " Interrogation room aṭanga a rawn chhuah rual rual chuan ka lo zawt vat a.
" Hmuh che a duh thu bak a sawi lo " tih chiahin min chhang a.
Tunah tak hi chuan Sawma hmel hmu turin ka la inpeih lo , khawvela ka neihchhun leh ka mi hmangaih ber hi hetiang mi a ni ang tih hi ka la ring thei lo. Mipa a zawnga zaidam leh Pathian ṭhih kha a ni ṭhin sia .
Zanreiah bang nghengin melh ngai melh ngur ngur chung hian ka inngaihtuah vung vung a, ka rilru te te chuan Sawma hian thiamlohna lo nei miah lo se ka ti takzet.
Ka ngaihtuah chian pauh leh mak ka ti tulh tulh .
Ka muhil thei mai lo bawk nen Sawma kutziak leh Pi Dinpuii lehkha a kutziak te chu ka han khaikhin leh vela ka ngaihbel vang nge pawh ka hrelo 'Dini' tih lai chu Sawma kutziak nen a inang ta riau te hian ka hria a, chutah Sawma hi ft 5"10' alo ni lehzel bawk nen engkimah ka ngaihbel zo vek tawh.
" Lalpa min pui hram teh" ka ti leh sap thin a, ka rilru natna te hi Pathian hnena thlen mai loh chu tihtheih ka nei tlem hle.
Ka pum chul heuh heuh pah a ka ṭhut veng veng lai chuan thil hriatchhuah thut ka neih avangin thil dang ti khawtlai lovin ka team te ho ka call nghal a.
A zan a zanin ka team te ho nen chuan kan kawmthlang chu zawn bik pawh nei lovin kan lai nghal ngat ngat a, hmanni ah khan Sawma hi huanah a kal a a tih zen zen ngai loh a nih avangin laih chhin hrim hrim hi ka duh.
" Pi ber eng nge laih chhuah kan tum ber hi?" Jacob chuan thlan tla hluam hian min rawn zawt a.
" ka hrelo han lai zel phawt teh u"
"Engmah kan hmu lovang kan zawng..." A sawi zawh hma hma in Ruatfela chuan " Thil ka chek ania!" tih pahin luruh a rawn hai chhuak ta nawlh mai ,kan pathum chuan mak ti takin kan in melh ha hlawm a ṭawng tur kan awm tawh lo. A sam ala ṭawih lo lehnghal a endik turin Forensic lam kan pe nghal a.
Tunah zet zawng Sawma tan talchhuah ngaihna a awm tawh lo, ka pasal thil tih hi thup tur ka nih laia hetiang thil ka tih nachhan hi keipawhin ka inhre tawh bik lo.
Kar khat a ral leh meuh chuan Mercy te principle in February ni 5 a CCTV footage a hmuhchhuah thu Ruatfel'an min rawn hrilh chuan nidang zawng aia hma in ka kal a, office kal ringawt pawh hi thih hreh in ka hreh tawh.
" Mercy DNA leh luruh a sam DNA kha a in mil a chuan Mercy DNA leh Pu Sawma DNA a inmil leh chiah chiah bawk "Ruatfela chuan a ti nghal zung zung a, ka thu hriat mal tin te chuan min vit sawk sawk nimai hian ka hria.
" chuti chu pafa an ni tihna em ni? " ka ti chuai raih a,hetiang em em a rilru na hian ka la awm ngai lo.
" E.. chuan taka Miss Puii kha a rawn harh tawh a, accident ni lovin Pu Sawma sut a ni awm e " a ti leh a, chhan ngaihna pawh ka hrelo.
Vawilehkhatah finfiahna a rawn lang zut zut a, hetiang zozai hmachhawn tur hian ka la in peih lo Sawma hian hetiang thil hi a ti thei ngai lovang tiin ka la inhnem ve ṭang ṭang.
Video ka en hnu phei chuan hai rual loh in Sawma ngei a ni tih ka hria, thil thlen dan zawng zawng chu hrilhfiah ngai lovin a rawn fiah nghal uar uar mai.
Ka rilru natna te chu thinrimna ah a inthlak thawk a, hmanhmawh takin Sawma tanna cell ah chuan amah hmu turin ka kal ta nge nge a.
" Engmah ka pehhel kual lovang engvangin nge Mercy te nufa kha I thah? " ka luh rual rual chuan ka ti nghal thawr a, a hmelah danglamna eih a awm lo.
" Engmah ka hrelo " a la ṭang ve ṭang ṭang.
" I hriat loh chuan keiman ka hrilh vek ang che , Mercy chungchang hi pi Dini hian sawi chhuah a tum a mahse nangchu Pathian thuhril tu leh mite zah rawn I nih avangin mualpho I hlauh luatah phone ah pawh be ngam lovin Fb ah fake account hmangin I vau ṭhin a rei tak a kâ I hup theih tak si lovah chuan an nufa chu I dahṭha ta a ni " ka ti ta piap piap mai, mak ti hmel pawh ala pu eih lo.
A hmel danglam hlek lo chu kei ngei pawh hian mak ka ti.
" Duat... Engthil mah ka ti lo"
" anih chuan ngatinge pi Dini te inah I kal? Ngatinge kan huan ah.... Kan huanah ngei Mercy lu ruh a awm? Thil dang pawh ...."ka sawi zawh hma in ka hnuk a ulh titih ta mai.
" a chhan a pawimawh ber lo, i hriat kha hetiang hi ka ti ngai lovang tih hi " a vantirhkoh aw nem leh zaidam tak chuan min chhang let a, nidang chu nise ka nem lehnghal maithei mahse tun ṭumah chuan ni tawh love.
" finfiahna zawng zawng in I lam a kawk vek tawh , tuna I tih theih zawng chu inpuan chauh a ni tawh " a mit ah tak ka melh kar a, ka ti mai mai lo tih pawh a hre ngei ang.
" ka... " a ti dek dek a thil dang a sawi leh hma in ka lo pawtchat hmak a.
" Sawma, mualpho I hlauh luatah I thil tih hi I hria em? I fanu a ni asin, Kum7 mi lek pawisawi lo chunga I thil tih hi... " ka sawi chhunzawm thei tawh lo, ka tlan chhuak daih a toilet ah insum na tel hauh lovin ka ṭap chhuak nghal hawm hawm a, ka tawt up up ni ber in ka hria .
Sawma an man aṭanga kar hnih a liam hnuah pawh ngai ka la awh thei meuh lo, ka nu ka ngaih a zual a room ah mahni a inngaihtuah ngawt ngawt chu ka hna ber a ni.
Tlai khat chu ka nu ka ngaih em avangin a phone hlui tawh tak chu ka enkual vel mai mai a mahse tum loh deuh maiin kum 2 liamta a message min thawn a tum mahse min thawn hman loh avanga draft a in save ta chu ka hmu chhuak ta thut mai!!
Hei zet chuan min ṭhawng chiang kher mai!
Rang takin Sawma hmu turin ka inkhalh chhuak nghal a, ka thinrim lutuk hi ka puakkeh mai dawn hian ka hria , ka duh loh dan deuha ka chet loh nan inseh ruh ka ngaih phah hial.
" Duat, ka ngai lutuk che " min hmuh rualin Sawma chuan min rawn kuah a, ala inchhir chuang miah lo anih dawn hi.
" Engvanga ka nu kha that nge I nih? " ka ti vin nghal tuarh a, mak ti takin min rawn melh nghal kawk bawk.
" Eng chungchang nge I sawi tak mai? " engmah hrelo niawm tak hian a insiam ṭha lehnghal vat a.
"Ka nu in Mercy chungchang a hriat vang em ni? " tih pahin phone chu ka hmuh a.
Kum2 liamta daih tawh ah khan ka nu in Sawma chanchin hi min hrilh a tum daih tawh alo ni a Sawma'n a vau thin thu thlengin min hrilh vek alo tum chu a ni sia , ka nu kha lungphu chawl a thi nilovin tihluih na avanga a lungphu chawlh tir a ni zawk.
" Engkim min hrilh vek rawh, kan naute vang tal pawh hian " ka pum chu ka khawih kher a, a meng phawk nasa mai!
" maw! naute a!! Haha... " tunah tak hi chuan a hlim ve tak tak in ka hria.
" aw naute kan nei dawn mahse eng nge maw tal min hrilh ve loh chuan apa hi kumkhua in a hre ngai lovang " ka naute chu vau nan tak ka hmang a, a inpuan theih nana ka tih theih awmchhun a ni tawh.
" umm.. khawngaih takin " a kut chuan ka pum chu ka han dawm tir a "I ka aṭang ngeia hriat ka duh " ka ti zui sap a.
Sawma chu a ngawi vang vang a engmah a sawi duh leh dawn lo emaw ka tih laiin a rawn ṭawngchhuak ta nge nge a.
"Ka hlau a ni, mualpho chu sawi loh khatiang thu hriattir che kha ka zak em a tin ni . Miten rawngbawltu ve si tiin min nuihsawh tur kha ka ngaingam lova ka kawng daltu apiang ka dah bo ta zel a ni. "
Ka insum thei tawh lo a hmaiah ka beng nghal sawk a, inchhir hmel pawh ala pu chuang lo.
" ka hua che " ka ti chhuak sep a " hremna I pumpelh hauh lovang"ka ti zui hlak bawk.
Ka hriat duh ka hre ta bawka room atanga chhuah pah chuan ka kawr a voice recorder in vuah chu phelh in Ruatfela ka pe a, ka mittui ti tla lo turin ka insum hram hram bawk.
" Pi Christy I ṭha maw? " Ruatfela chuan min rawn zawt vat a.
" ṭha mah mah " tih pahin ka nui lui sak a, ka pum dawm chungin ka kal nghal nal nal a.
Ka pasal a ni emaw khawvela ka mi hmangaih ber pawh nise dan chunga leng tumah an awm lo, thil tisual tu chuan hremna a hmu mai tur a ni.
A tawp ta
Ig- @Remruati_Haylor
Mizo quotes- @Haylor_r (Lo follow hram hram ru )
(I back hma in a hnuaia fakna khu hmet keuh ang u aw chuan comment lamah kan inhmu vek Dawn nia)
