Dr Noel 2 - 11

 CHAPTER -11

 "I will never stop trying. Because when you find the one... you never give up."

Damdawiin ah pawh a ni telin inentir an pun belh zel a , admit pawh an tam chak hle.Khaw dang dang atang pawhin damlo an in luh chhawk zut ti ila ka sawi sual lo ang . Dr Noel leh ka nutei chauh thawk an awm hrih avangin an thawkrim in an hah thei hle a . Hetiang zat zat damlo rawn inentir an awm thin nachhan hi Dr Noel vang ka ti lo thei lo . 

Dr Noel hi a rawn kal atangin ala haw leh miah lo a , hna chawlh mai mai tih lah a nei ngai hek lo . Damlo in thiam an ti in biak nuam an ti thei em em a hei vang hi a ni ngei ang helai tlangdunga khaw awm zawng zawng deuh thaw hi in entir tura an rawn kal vang vang thin nachhan.  

Ka nutei leh Dr Noel chu sawi loh nitin mai hian damdawiin ah ka nutei pui turin ka awm deuh chawt thin a . Kei ngei pawh hi ka buai in tih tur ka ngah ve thin khawp mai . Damdawiin ah awm ve reng e tilo chuan Dr Noel pawh ka duh duh hunah ka hmu thei bik lo a ,a chang phei chuan nileng in ka hmu hman ngai mang lo . Nikhatah vawikhat hmuh hman tawk chang lah ka nei bawk . 

File a thil ziah luh tur ho ka nutei ka ziah luh sak lai chuan , ' i pu in zanin ah nilai zan thupui a hawng dawn a , lo va haw hma mai rawh aw ' ka nutei chuan a rawn ti a .

' Inkhawm ka tum lo asin , i inkhawm dawn lo em ni? ' ka lo ti nghal vat a .

' I inkhawm dawn loh chuan ka va tawiawm ve loh in , chaw ei hma a ngai dawn sia tih tur ka la ngah bawk nen rawng bawl hma deuh angai ang ' a ti leh a, a buai zia ka hriatpui ve veka ka hnial duh bik lo .

Ka thil ziah tawh ho chu Dr Noel bulah submit leh vek angaih avangin file keng chungin a office lam chu ka pan phei a , kal pahin ka insiam tha phei nghal mawlh mawlh bawk . Vawiin a ka vawikhat hmuhna tur a ni bawka ka phur tawh takzet . 

Dr Noel office ka thlen chuan a lo la buai avangin ka lo lut tih pahin ka lut nghal hmak a , staff ka ni lo bawka in tih polite vak kher a ngaiin ka hrelo atin ni. 

' Heihi ka zo tawh a ' tih pahin file chu dawhkan ah ka dah a . A tirah kha chuan damdawiin thil reng reng hi pawnlam mi khawih a duh ngai lo mahse an indaih loh tak em avang leh thil pawitham nilo record ngai bawk si a nih avanga ka lo tih ve hi phal chauh a ni . 

Ka file dah chu la in a endik nghal thuak thuak a , tshirt var plain ,kekawr dum leh pheikhawk var ringawt pawh hi a inhmeh em em zawng chu a nih hi . 

' Helai hi a dik lo a , i ziak tha leh lawk hman angem ? ' hawihhawm tak hian a rawn ti a mahse min nel emaw ngam deuhin min be ve tawh se ka ti takzet . 

' Aw le .... nang berin i tih te chuan ' nuih put put pah hian ka ti lui kher a , a naupang zawk mah ni ila han fiam vel leh a han tih luih vel hi nuam ka ti . 

Ka duh tih a hre ta sa sa over si lova han tih lan vel hi hrehna ka nei lem lo . Min hnar lova , min duh thu lah a sawi hek lo . Ka nawr lui lova a nin zawng anga awm pawh ka tum lo mahse ka duh zia hi hriattir erawh ka phu ve in ka hria . 

Ka ziak zo ṭep tawh tih in tu emaw ni hian ka hming ngeiin min rawn ko thut a , kawngka lam ka hawi phei nak chuan Christian chu pawnah alo ding reng chu niin . 

Bye bye pahin ka va nuih nghal sang a , Dr Noel ka en leh chuan a lawm loh hmel ngang mai mahse rang takin a insiam tha leh vat thung .

' Hei pawh hi a dik lo ' ka zo tawh emaw ka tih pawhin a dang chu a rawn sawi leh zel a , pawnah Christian'an min lo nghak ve reng tawh bawk nen ka hmanhmawh ru takzet . 

' A zo tawh em? ' tiin ka zawt ta ringawt a . Tun aṭanga reilote ah Christian hi Aizawl ah a haw tawh dawn a ,min lo ngen tawh ang leh ka lo tiam tawh angin thlah ve ngei ka duh a ni . 

Ka thu lo tiam tawh ah chuan ka din ngei ngei thin avangin theih dawn lo pawh nise tih theih dan kawng zawng talh thin ka ni a, ka duh na ah chuan ka tum chu ruh vet vet tak a ni .  

'Min lo nghak rawh ka zo ṭep' office aṭang chuan ka va au lung lung a , mi chiai chi ka lo ni bawk nen ka che leh thawt thawt tawh . 

' A dang ngai ala awm em? ' tiin ka zawt leh a , min rawn en vang vang pah hian , ' Awm tawh lo ' ka hriat tawk lek hian a rawn ti a . Ka nui na a chu min en danah hian a lungawi vak lo in ka hria . Ka thil ziah danah hian a lungawi lo emaw ni le?

Office atanga ka chhuah rual chuan Christian chuan ka sam tla chhum chu ka bengah min lo zeh sak nghal vat a , en lo mah ila ka hriatna thazam hian Dr Noel 'an min lo en reng tih a hre thei tlat peka . 

' Ka chhuak dawn tih ka pu hrilh phawt angai ' ka ti nghal ringawt a .

Christian nen hian kan in hriat na la rei lo hle mahse min rawn biak zeuh zeuh thin avangin kan innel in rei tak inhre tawh ang mai kan ni . A hma a V-a te ho nen a thil thleng kha chu kan sawi fel vek tawh a , tunah chuan fiamthu thawh nan kan hmang leh tawh zawk ; Dr Noel lakah erawh tun thlengin ka la zak hle thung . 

'Dil pui che i ngai dawn em ? ' min rawn nuih pah hian min rawn fiam a, a nui hmel ka hmuh hian engtin nge ka lo duh loh theih zawk . Hetiang khawpa hmeltha leh fel hi engtin nge ka lo hnawl theih tih hi ka la inzawt nawn fo dawn chu a nih hi . 

Christian hian vawikhat in date puiah min sawm tawh a , nidanga ka chhan ngai loh dan deuhin single chu nuam ka tih zawk thu in ka lo chhang pek a , ṭhian anga inkawm kan ti thlu ta a ni . 

Tattoo nei thep thup in in chei duhdah thin viau mahse a rilru erawh tattoo nei ve lo tamtak ai chuan a ṭha fe zawk tih hi ka hrechiang a , kawm a nuam ka ti hle bawk . 

' Ka rei dawn lo , ka hrilh zuai nga nimai ' tih pahin inchhungah ka tlan lut a , ka pu nilai zan thupui bu lo chhiar lai bulah chuan tui in khawlh khawlh pah hian , ' Pu ka chhuak lawk dawn ' ka ti a . Tlanchhuah lehnghal mai chu ka tuma mahse ka pu chuan alo phal lo ngang mai. 

Ka rei dawn loh thu  ka sawi pawh chuan . 

 Rawngbawl a hun tawh thu leh kachhuah leh chuan inkhawm kan tlai hman tur thu chu a chhuanlam tlat a , a phal lo chunga chhuah daih ka ngam bik bawk si lo .

' Pu.... a rei dawn lo , ka lo haw veleh ka rawn bawl dawn lawm ' a ngen tak te in ka ngen tawh a , mahse alo tlai ve tawh bawk nen a aw duh miah lo .

' Pawnah min nghak reng tawh ania , i sual si ' ti bui bui chungin lungawi lo zet chung hian room ah ka lut hmak a , ' ka bawl dawn chuang lo ' ka pu hriat theih turin ka ti leh kher bawka . 

Christian an pawnah min nghak reng tih hrereng chungin kan titau leh rih a ,rei min lo ti tawh viau ang .

' Puuu... a rei dawn lo ' tiin ka dil nawn leh ngat a , thinchhia tih takah ka thinrim lutuk chu ka tap deuh tuau tawh a . Rei kal pawh ka tum lo minute 5 vel lek zuk thlah a haw leh daih ka tum mai kha a nia .

Chutia ka pu in kal a phal tak tlat loh avang chuan duhthlan tur dang ka nei ta lo .

Ka mittui hruk fai sawk sawk pahin ka pu khum bul dawhkan a a ha lem dah chu ka la lawk a , ka pu chu a ha lem nen chuan ka hmachhawn ta ran mai . 

' Pu ... ' kan ti te te phawt a , a rawn hawi chhuah rual chuan , ' Reilote min chhuah tir loh chuan zanin ah ha tello in nilai zan thupui i hawng ang ' tiin ka pu chu ka vau ta mai a ;heihi ka vawikhat blackmail na pawh a ni tawh lo. 

A hma pawhin lo zawh na ah kal ve a phal loh avangin , a ha lem chu kan vawkpui ha ah ka vuah tur thu in ka blackmail tawh a , min kal tir chiang khawp mai . 

' I ã mai mai lutuk emai va dah vat rawh i ti bal ang ' ka pu in a tih pawh chuan ka hum nghet sauh a . 

' Ka ti tak tak ania , ka dah tha daih dawn ' ka tih leh takah chuan kal ka tum ruh hle tih a hrethiam ve ta aniang .

' Va kal vat rawh ' a ti ta nge nge a , a phal ta bawka phur takin a ha chu dawhkanah ka dah a hmanhmawh takin ka tlan chhuak nghal a . 

'Ka rei min ti em? ' engmah thleng lo ang mai chuan ka nui sang renga . 

'Aih , lo kal phawt teh ' ka ban a chelh pah hian min pawt hnai deuh a , ' i pu in a phal loh chuan rawn kal kher a ngai hleinem' a ti a ,ka mittui chu min rawn hruk sak a .

' Hahaha.... engmah a ni lo 'ka tawlh hnung nghal vata ,ka mittui chu ka hru nghal sawk sawk bawka . A van zahthlak reuh tak . 

Ka in lak hran daih avang chuan min rawn nuih pah hian ka sam chu min rawn hui kian sak leh a .Min rawn en vawng vawng pah hian ' Nanghi min hnawltu awm chhun i ni ' a ti ta mai a , a nuih avang hian dawt pawh alo ni reng maithei.

' I ho teh tuh lutuk ' tiin ka lo chhang ta zawka , a rawn nui chhuak thut ringawt . 

'i hman chuan kan kal dawn mi ? ' a tih chuan ka lo bu nghat a , diakkawn thleng thlah turin a car chuan kan kal nghal a . 

  

Read More

Dr Noel 2 - 10

 CHAPTER -10 

"You still look like a movie, you still sound like a song. My god, this reminds me of when we were young." — Adele

Tlaiah kan quarter ah chaw ei khawm an ti lehnghal a , engvanga vawiin tlai kher kher a ti nge maw an nih le .

Dr Noel ka duh thu ka hrilh khan ka thaw nghal huai a mahse kei anga mi zak lo thei pawh ka zak lutuk hi amah hmuh ka hreh leh zo vek . 

uEvelyn a inbual lai chuan ka nutei bulah chuan ,' chaw ei khawm in ti kher kher a ,ka peih lo e ' tiin ka phun ka phun a .

Ka nutei lah chuan ,' Noela kan kar zawk mah mah a nih hi ,chaw ei khawm loh kan hlauh mah nak laia . A peih lo chung chung pawhin kan hmin thei hram hram a , aman a tum vek dawn lehnghal ' a la ti ang deuh deuh a . Ṭhulh leh tih te chu khawilam .

' Aaa.... in ti buaithlak, ka ning ' ka tih pawh chuan , ' Kan eitur zawng zawng tum duh mah an awm a ' min ti let zek ringawt . 

Ka inbual zo chu ka nutei , pu Richard leh uEvelyn ten rawng an bawl a an buai mawlh mawlh laiin kei erawh  ṭhuthleng sei a mut ar ar pahin TV ka lo en der der a . Ka peih loh lutuk avang hian ka che peih thlawt lo . 

A khat tawkin kawngkhar chu ka melh deuh sek renga. Lo kal vat vat se ka tih tluk zetin hmuh ka hreh leh lawi a . Ka duh thu ka lo hrilh ta kher kher kha ka in chhir takzet .

Pu Richard an chawhmeh lo chan tura min hrilh avangin tum bur chung hian ka chan a ,mi in a chaw ei mai ka nap .

'Ninawm .... sil tur a tam thei si . Kan hmeh tur hi ka duh zawng pawh a ni lo , Awmtea te inah chaw ka ei daih dawn ' chhuanlam siama ka phun lung lung lai chuan Dr Noel chu a rawn lut ta thut mai ! Ka ngawi nghal hmak bawk . 

Ka thil sawi zawng zawng kha alo hre vek aniang nuam lo tih hmel deuh hian min rawn en a , ngawi renga a rawn luh rual chuan uEvelyn chuan alo ngaihven lehnghal vat tawh .

Ani hi chu a bu ang thlap a ni .A caring in mi hneh dan a hre riau a Dr Noel pawh hian a rukin alo duh daih tawh maithei ni . 

' Bawihi .... thingpui hi i pu te saw lo va pe rawh ' Pu Richard chuan a rawn ti a , hnial ngam chi pawh a ni lo .

Dr Noel leh ka pu an lo titi dun mawlh mawlh lai chuan thingpui chu tray hian ka chawi phei khur dur dur a , an awmna ka hnaih poh leh ka khur nasa zual . 

Dr Noel an ka kut khur nasa lutuk a rawn hmuh chuan min rawn nuih a , chhan awmlo in ka lo melh rum hrep thung . 

' Ka lawm e ' tray min chawi thlak sak pah chuan a rawn ti a .Engmah thleng lo ang maia a awm te hian  ka awm a ti nuam lo zual . 

Ka pu lah chuan nupui a nei tawh nge la nei lo tih te , a chhungten eng nge an thawh tih te chu alo zawt thlap a , ala zawt chik em em zui . 

' Nupui chu han nei tawh la chuan helai ah i nupui fanau te nen in awm anga, i khua a har lo sawt tur a nia . Hetah pawh nupui tur nula tha tak tak an tam alawm . ' a tih lai te chuan Dr Noel chu za lo zet hian a nui ringawt a , a hlim hmel phenah hian lungngaihna ruk a nei ni hian ka hre tlat peka , eng vang chiah nge a nih erawh ka hre lo thung . 

Ka pu thusawi kan ngaihthlak mek lai chuan bang kila ka pangpar phun a va hmuh chuan en vang vang pah hian ' Heihi lily var a ni em ? ' a rawn ti chhuak thut a , ka pu nen pangpar lam chu kan hawi phei nghal vat a . 

' Aw a nih ve saw .... Ka-tei hian Lily Var hi nalh a ti khawp a .Serchhip aṭanga a hawn vang vang a nih saw ' ka pu chuan min lo chhan sak nghal zung zung a . 

A hma chuan Lily var hi nalh ka ti ngai lo mahse ka naupan laia Dr Noel an ka nu thih dawna Lily var min pek atang khan he pangpar hian ka nunah hmun zau tak a chan phah ta a ni . 

' A par lai chuan a nalh thei lutuk ' ka lo ti vata , ka ṭawng lai chuan ngun takin min lo en reng a , ' Ka hria alawm ' tiin ama hriat tawk lek hian a phut zui sup a , a kun nghal lap bawk .

Engvanga hetianga awm thut hi nge maw a nih le ? Lily var sawi tak vang maia . 

Nichina Lily var chungchang kan sawi atang khan Dr Noel chu ka awmhmun atangin ka lo chik ka lo chik a , a awm a nawm loh hmel in a hmelah hian hlim luihna takngial pawh a awm tawh lo . 

Chaw pawh tlemte a ei a , a ei lui te pawh a ni zawk mah ang chu . Kan vai mai chuan kan hlim in kan ri luih luih renga , a tawp a tawpah phei chuan a tuar thei tawh ngang lo aniang nge ngawi rengin a chhuak daih a .Mahni tawkah kan buai em avangin  tuman a chhuak daih tih pawh an hrelo .

Thil diklo a awm tlat ni a ka hriat avangin ka um chhuak ve nghal vat a , ka hmu mai lo lehnghal. 

' Khawiah nge maw a kal daih le? ' phun sep sep pahin in sir lamah ka zawng phei a , light in a en phak loh chin a thim laiah chuan min hnungchhawn zawng hian meizial alo zu a .

Lei a chhir ngat ngat takah chuan ka ngaihtha lo chuan ka va pan phei nghal vat a , ka thawm a hriat rual chuan rang takin a rawn hawi nghal vat bawk . 

' I tha maw? ' tiin ka zawt a , alo bu nghat ringawt . 

' I ti tak tak em ? ' a that loh hmel em avang chuan ka zawt nawn leh ngat a . ' Ka ṭha,va lut rawh ' tha tak hian min rawn chhang a ,mahse a awmdan hian ka ngaih a ti tha thei chuang lo .

' Mahse i awmdan ah hi chuan ... ' tih paha khawih ka va tum chu vin zet hian , ' Min kalsan rawh ' a rawn ti ta ṭhawt mai , ka phu bawk nen phawk fe hian ka en nghal kawk ringawt .

Min tih dan avang khan ka lungawi lo chuan thinrim in kal tau hmak ka tum a , mahse a thawk a rawn rang thut avang chuan ka buaipui lehnghal vat tho .

' Tinge ....engtin nge i awm ?' ka ti nghal chul a ,a awm chu a han dawm vang vang a,a thawk a rangin a awm zawng chu na a tih hmel em avangin a dawm na laiah chuan ka va dawmpui ta ringawt a . 

A thaw a hah a nih te ka ring hial , panic attack a nei tih rin ngaihna pawh ka nei lo . 

' Min en rawh ' ka tih ngaihna hrelo chuan a bek tawn tawn ah vuan in ka ti ta ringawt a , thuawi takin min rawn en ve mai bawk.

' Ka thawk rualin i lo thaw ve dawn nia aw ... 1... 2... 3 ' ka ti a , ka sawi ang chuan thuawi takin ka thawk chhuah rualin alo thaw chhuak ve zel a , a na viau aniang a mittui a tling pum mai . 

A awmdan chu hmuh hrehawm ka tih em avangin nghet takin ka kuah ta ringawt a , ' Ka nutei kan hrilh ange , tihdan a hre em em ang , ' tiin ka hnem ta ringawt a .

Ka nutei pun in inah tlan haw mai tur ka nih laiin ka kal hlana alo thih daih ka hlau a ka kalsan ngam lo a ni, tihian ka awmpui ta ringawt mai a ni . 

Reilote ah a thawk pawh chu a rawn pangngai ve leh mai a , ka lo la kuah tuih avangin ,' kuah ka ngai tawh lo ' tih pah hian in lang hran pah in min rawn en a a rawn nui vur vur ringawt .

' Thawhah i nei mi , ka nutei va ka hrilh dawn em ni? ' ka hlauthawng lutuk aw khur dar dar chunga ka tih chuan a ngaih loh thu in min lo chhang vat a . 

' thawhah vang nilo in panic attack anih kha ' a rawn tih chuan ka bo deuh hu mai .

' Eng eng chu chu ? Heart attack maw? ' tiin ka lo zawt let hu a .

' Hetiang thil hi chu hre lo law law la nuam i ti zawk ang , va lut tawh rawh an lo zawng tawh ang che ' a ti a ; Nichinah kha chuan min vin hrep a tunah lah a mize ngai bawk a pu leh daih bawk sia a awm dan hi mak ka ti takzet .

A awmdan second reilote chhunga a thlak danglam thut thut avang chuan ' Ai pui leh Ai te i nei em ni? ' tiin ka zawt thut a , a nui chhuak hak a .  Ka tawng upa hman hi a dik lo emaw ni le ? tiin ka inzawh phah hial. 

' Nang hi chu aw ... ' tih pahin min rawn en a min nuih min nuih ringawt. 

I chhiar zawh veleh fakna kha lo hmet zeuh dawn nia aw 

 

 

Read More

Dr Noel 2 - 9

 CHAPTER -9 

'I'm a hot girl but I never lose my cool'

Ka nute in min rawn kaih thawh hma hma chuan ka in perh tho nghal vat a , damdawiin chhungah ka tlan lut nghal nal nal a uEvelyn chu ka tlan pel nghal fua a, ka hawi let rang kher mai .

Evelyn chu ka nutei te lam pan chuan a kal nghal vang vang a , let leh ka ngam tawh bawk si lo . Ka hnual nghal rawih mai .

Tih tur an in sem thlap hlawm a , an mahni buai buai a awm buai lai chuan kei erawh ka theih ang ang in Dr Noel pehhel tum chuan ka biru zak zak reng a, a ni erawh in ka pehhel tih hria ang pawn a lang lo . 

U Evelyn lah chuan Dr Noel chu a lo vir ve sek a , a thil tih apiang ava tihpui loh leh a kalna apiang ah kal ve zel a tum a ,ka beng leh mit a ti kham takzet .

Darthlalang ka nawh lai chuan Dr Noel hi a rawn lut hlawl a ,ngawi renga ka lam pana a rawn phei lai chuan Evelyn bawk chu a rawn lang leh chat tawh .

uEvelyn chuan ,' Noel ,tui hi a zo a engtin nge kan tih ang ' a rawn ti a .

' Pu Rama khan a pump thei ang ' tiin alo chhang vat a .

' Pu Rama a buai lutuk a ,min lo en pui lawk ' tih pahin a pawt chhuak nghal dawr dawr a .

Inngaizawng innel lutuk tawh kum tamtak lo inkawp tawh te pawh a ang zawk bakah hetiang em em hian uEvelyn hi a zak thei lo ang tih hi ka la ring pha ngai lo . 

Ka thinrim lutuk thik bawk si chuan ka darthlalang hrukna puan chu dawhkan ah ka paih let tawp a , saiip keng chungin damdawiin hnung lam chu tuma hriat loh in ka pan nghal daih a . 

Damdawiin hnung lama bawlhhlawh ka then fai mawlh mawlh lai chuan inchhung atangin tu emaw hian min rawn koh avangin ka hawi chho nghal vat a , Dr. Noel an tukverh atangin min lo en reng chu niin . 

Ka han hmu thut bawk nen ka phu lutuk chu hnung lamah ka eu nghal zawk a , min rawn la nuih vur vur zui . 

' Carolyn ' ka hming ngei mai chuan min rawn ko leh a , ka bihruk nasat tehreng nen engmah a hriat loh hian a ho zo vek .

' Lo chho lawk rawh ' a tih chuan chhang lo in ka tih ngai chu ka tih chhunzawn mawlh mawlh a , ka rilru a hmin leh mai ang tih ka hlau .Thosi lah chu an tam em em khawpa , ka inha chhing bawk nen thinrim burin ka in hiat thei nia mawle . 

Ka ti fai zo kawt lama ka han  chhuah chhoh ve meuh chuan chhun thingpui an lo in vek tawh a ,  ti ti mai mai pahin step ah chuan an lo ṭhu ṭhap hlawm a .Dr Noel erawh alo awm ve lo thung . 

' Aw... Carolyn quarter ah i haw phei daih emaw kan ti alawm , kan hmu mai si lo che a ' uEvelyn chuan a lo ti nghal zung zung a . Nichina Dr Noel an min rawn koh nachhan kha a ni ngei ang .

' I bo daih a , Noel pawhin a rawn zawng che a . I haw emaw kan tia kan ei zawh san vek che lawm ' ka nutei pawh chuan alo ti ve bawk a .

' Vawiin phei chu Noel'an min treat leh nghal ' an tih phei chuan ka sa nghal zak mai .

Hetiang hun ṭha lutuk hi engtin nge ka bawhpelh theih zawk . Tun hun bak hi chu mi a treat leh tawh lo maithei lehnghal . 

' A ho emai ' tih bui bui pahin lungawi lo fe chungin ka kut sil tur chuan bathroom lam ka pan nghal a , Dr. Noel nen kan in tawk leh chat tawh .

Pathian pawh hian in hmu reng turin min siam aniang . Hmuh ka hreh em avanga ka pehhel lai pawhin ka hma ah a rawn in lan leh zel zawng chu a nih hi . 

Kal pelh hmak ka tum pawhin ' Engmah ila ei lovang tiraw ? ' tiin min rawn zawt hram peka , ka lo ngawi reng thung .

' Heihi ala bang a ei rawh ' tih pahin eitur hi min rawn pe a . Nichinah khan an ei zawh tawh thu kha ka Nutei te khan an sawi sia Dr Noel hian min lo la dahsak ṭang ṭang a ni thei mai angem ? 

Lak tumin ka ban zuai hman tawh tih chuan thil hrechhuak thut niawm tak hian ka tawlh hnung deuh hrut a.Ka kut thlak thlak vat pah hian , ' ka ril a tam lo ' ka lo ti deuh hmak a , ka kalsan nghal nal nal bawk .

Engvanga hetiang anga awm vak nge ka nih pawh ka hrelo . Amah hmuh ka zah avang leh thik na vang a ni tawh ber aniang chu . 

Ka kut bal lutuk leh ka chawn thosi seh na vual sen tet tut thak huai huai mai chu tui in ka tleuh nghal bawrh bawrh a. Ka hiat pilh nasa bawk nen a thip nghal sup sup mai. 

Bathroom atanga ka let leh chuan a office kawtah Dr Noel chu alo la ding a , hnuai lam melh ngar ngar paha kal pelh ka tum lai tak chuan . 

'I zo tawh em ni ? ' tih pahin min rawn pan hnai a , ka lo melh reng ringawt . 

Ngawi rengin ka kut chu rawn la in damdawi hi ka kut ah chuan a rawn hmeh bel a .

'Heihi i inhnawih chuan thosi in a seh tawh miah lo ang che ' naupang biak hian min rawn bia a , chu chu ka lo ngaithei bik der lo .

' Ka lawm e ' tih hmuk pahin ka kut chu ka la thla nghal vat a , ka kal lehnghal nal nal a . 

Chawhnu lamah pawh tih tur ṭul ang ang chu kan ti leh mawp mawp hlawm a . Pu Richard leh pu Rama ten rit chawi theih ang ang an thiar fai laiin uEvelyn leh Nutei te chuan damdawiin bungrua chu an lo chhum thiang hlim a , kei erawh tih tur em em hrelo in an bulah ka lo tap ka lo tap thung .

' Bawihte Damdawi rawn thleng a tam sia Noela lo va tihpui la ' ka nutei chuan a rawn ti ta mai . 

Ka chhan hma hma chuan uEvelyn lah chuan ' keimah ka va kal ange ' alo ti nghal vata . Keilah ka lo ngawi mai mai duh bik lo ,' Helai hi chu a lum si , ka awm peih tawh lo ' tih pahin ka tho vat a , ' ka va pui ange ' tih leh chhuah ka rual nghal .

Dr Noel bula awm hi la zak tlat mah ila uEvelyn nen an awm ai chuan ka zak nawn awn awn zawk mai ang .

Damdawi leh Bungrua an dahkhawmna room ka luh dawnah chuan ka ding leh te te phawt a , nuih luih deuh sang pahin engmah thleng lo ang mai khan ka lut a , Dr Noel erawh buangrua endik in alo buai hle thung .

' I buai em ? ' tih pahin ka nuih deuh sang a , ka mizia ka thlak danglam thut vang aniang ka awmdan chu mak min tih hmel takzet .

' Eng nge ka lo tih ve ang ? ' ka ti nghal zung zung a , hetiang a engmah thleng lo anga han awm vel hi ka hnehsawh zawng tak a nia , harsa ka ti lem lo . 

' Hmanrua ho hi a kim leh kim loh receipt nen hian lo endik la , keiin Damdawi hi kan lo endik ange ' a tih rual rual chuan ka che nghal zung zung a ,mak tih hmel zet hian min rawn melh leh zeuh thin in ka hria .

Ka la naupan avang hian min ring lo nge ni a khat tawkin min rawn en pui deuh renga , lawm tur ka nih laiin min rin tawk lohna hian min ti thinrim zawk . 

A hma in damdawi leh hmanrua vel te hi chu alo thleng ve zeuh tawh thin a , ka nutei ka pui ziah thin ,ani pawhin min rin laiin ani hian min ring lo bik amaw ?. uEvelyn chu nise a ring bik leh tho ang . 

Engkim hi ka ngaikawi vek tawh chu anih hi . 

Ka thinrim chu ka sa nghal phat a ,amah melh nghal hraw pah hian , 'Min ring lo anih chuan ka ti ve lo ang mai, ka ti chak reng reng hleinem ' ka ti hmak a,a ruk tak chuan zaktheilo min ti viau ang mahse ka rilru a awm hi ka pai reng thei tawh tlat lo . 

' Eng nge i sawi awmzia ? ' hriatthiam lo hmel taka min rawn en te hian min ti thinrim zual . 

'Min en enpui renga ka ning ' ka tih hmak takah chuan insum tih hriat takin a thaw chhuak deuh halh a . A receipt ken lai dawhkan a dah pah hian , ' I pawi ka sawi em ni ? ' zaidam tak hian a rawn ti ang lawi a . Min vin hrep se ka rilru a nawm zawk ka ring .

' Aih ' 

' Kartluan in min pehhel tawh a, vawiin ah lah min thinrim khum reng bawka ' a rawn tih takah chuan engmah a hrelo emaw ka tih laiin engkim alo hre vek zawk a nih hi . Ka pehhel tih te , a chungah ka lungawi loh zia te pawh hrelo ang maia a awm laiin a lo hre vek zawk chu a nih hi . 

' Engkim i hriat vek chuan hria angin awm mai ta che ' ka ti leh ringawt a , mak tih hmel takin min rawn en thung .

' Engmaw maw engkim ka hriat chu ? ' tiin min rawn zawt nawn leh ngat a, ka ning lutuk chuan , 'Ka duh che tih hi ' ka ti chhuak nghal phawng ringawt . 

Ka thusawi avang hian ka inchhir lehnghal chiang kher mai , rang takin ka hmui ka hup nghal vata , room aṭang chuan ka tlan chhuak nghal daih bawk. 

Mipa hi ka duh thu vawikhat mah ka la hrilh hmasa ngai lova , ka duh hmasa ngai bawk hek lo . Mahse thinlung taka ka duh ve awmchhun hi engvangin nge ka duh hmasak a ngai bik kher kher. 

Read More

Dr Noel 2 - 8

 CHAPTER -8 

' I'm wearing the smile you gave me '

Min thlah rawh ka tih pawh chuan min pawm bet tlata , a office ah min luhpui nghal dawr dawr bawk . 

' An insual saw ṭhelh an ngai alawm ' tiin ka la au tuarh tuarh reng a , tal chhuah ka tum phet vang nge ni a thin in a tuar ta bik lo aniang vin zet hian , ' Che suh ' tih pahin damlo an muttir na khum ah chuan min ṭhut pawp a , ka ngawi chiang hle . 

Ka hma ah tak dingin ' Mipa insual lo ṭhelh hi i hlau lo em ni? ' tiin min rawn vin hrawk a , Awka vin a a ṭawng ngai loh avangin min ti phu chiang kher mai , ngawi rengin ka melh kar ringawt . 

Keimah vanga insual an nih vang nge ni ka awm a nuam thei tlat lo, mahse Pu Rama'n hetah rawn insual tawh suh u ,rang takin haw vat rawh u a ti lung lung ri ka hriat takah chuan ka thaw nghal huai mai .

A office aṭang hian thawm leh ṭawng ri engkim chiang takin a lo hriat theih vek a , a hmuh theih vek bawk . Chuti chu Dr Noel hian engkim a lo hria a min lo hmu vek tih na em ni ?! 

Lalpa leh !!

Dr Noel chuan lungawi loh hmel zet hian min rawn en a ' Kha i hnar thi kha hei hian hru rawh ' tih pahin gauze hi min rawn pe a. Ka hnarah min nghawk fuh tih pawh ka lo hrelo , ka hmai pum hi a na chhuak vek mai hian ka hria . 

Ka hnar thi hrukfai mawlh mawlh pah hian ' Ka thiam loh pawh a ni lo ' ka ti ringawt a , engkim a lo hre vek nia ka hriat vang a ni .

Nia , a ruk chuan keimah leh keimah hi ka in dem takzet a , ka thiam loh a ni tih pawh ka hria . V-a ka ṭhen hma hauh in mipa dang ka fawp a ,in sawi thiam vak ngaihna pawh ka hrelo .Dr Noel lakah hian ka zak takzet tih mai loh chu amaherawhchu mahni indah hniam ngai lo ka nih avangin mi hmuh ah inthiam lo angin ka awm duh lo a ni . 

Ka hnar thi chu ka hruk fai hnuah pawh ala rawn thi lehzel avang chuan ka gauze ken lai chu min rawn dawm pui vat a , ' Dak rawh ' tih pahin min kuai dak deuh a ,min rawn deh zawng te hian ka mur chuai chuai thei nia mawle .Min en chiang phei se chuan ka hmul thi te hi a din ṭhuau hial ania ka rin ni .

 ' a reh mai ang ' tih pahin a inla hrang lehnghal vat a . 

Engmah hrelo ang mai chuan a awm a, file ah thil a ziak lut mawlh mawlh pah reng bawk . Ka hnar thi ala reh loh avangin kal ala phal bawk si lova ka thu ngawi reng ringawt . 

Chutia engmah hrelo ang maia a thut reng takah chuan insawi fiah ngei a ṭha in ka hre tlat peka , min ngai khawlo vak ang tih te pawh ka hlau leh hnuhnawh viau. 

' Ih englo ania ' tiin bul ka han ṭan te te a , ' A nihna takah chuan V-a'n min rawn hruai duh loh vang ania , ka thiam loh pawh a ni lo ' ka ti dek dek a .

' Rinawm loh hi tihpalh vang a ni lo , duh thlanna ngei a ni ' a rawn ti hmak a , ka zak lutuk hi ka lum nghal pup pup thei . Ka thlan nghal up up bawk . 

Ka tih ngaihna hrelo chuan , ' Mahse ' ka ti leh hram a .Ka mit ah tak chiang kelh kawlh a rawn en pah hian ,'An lakah hlimna i hmu lo a nih chuan kalsan mai rawh . Tumah rinawm loh san ngai suh ' fiah fek fawk hian a rawn ti a . A thusawi tin mai thudik hlawm chuan min chhun zawk zawk ni mai hian ka hria .

Thil tam sawi duah lo mahse a thusawi tin mai chuan min hneh nghal em em a , min hau in min vaw kher lo mahse thudik chuan ka rilru a thlak thleng chiang hle . 

Chhan pawh ka chhang ngam tawh lo , ngawi rengin ka ṭhu kun lap a . A hmel hmuh ringawt pawh hi ka zak tawh . 

Ka hnar thi a reh mai tak loh avangin ka hnar chhungah hliam a awm leh awm loh en nan torch light eng zet hian chiang kelh kawlh in a han en ta ringawt a, ka te nghal chem chem in ka hria . Zahawmna in hlih sak ang velah ka ngai . 

Zanin zet zawng zahna hlir zahna hlir . Hnapkhir alo awm phei  chuan ka chhe vek a ni mai . 

' Engtin nge a awm ,a pilh em? ' tiin ka lo zawt nghal vat a .

' Hei hi ei la , a zia loh chuan ' a ti ringawt a, a sawi zawh loh avang chuan hriat chak hmel zet hian , ' Chuan engtin? 'tiin ka zawt leh ngat a .

' Chuan tih dan dang kan ngaihtuah ang ' a ti ta mai , a thusawi chuan min hnem lo takzet .

Rin loh tak maiin damdawi ka ei hnu lawkah ka hnar thi chu a rawn reh ve leh mai a ,a bulah la awm chak viau mah ila chhuanlam ka nei tawh miau lova ,phur lo zet chung chuan ka haw hna hna a . 

Zankhua in Dr.Noel thusawi kha ka ngaihtuah a ,mutthilh ka tum pawhin ka rilru ah a rawn lang leh zel tho  .

A sawi engkim kha dik ka ti in ka pawm vek . Mipa tamtak kawp tawh mah ila an lakah hlimna ka hmuh loh avangin kalsan mai lovin midangah ka pakai zel a . Midangah hlimna ka hmu loh chuan a dangin ka thlak leh mai thin .

Hetiang hian a hma in ka awm ngai bik lo mahse khawvela ka neihchhun ka tih hial ka nu in min kalsan tak aṭang khan chhungril ah khawhar rukna ka nei thin a , lungngaihna hlira ka khah thin avangin hetiang zawng hian hlimna ka zawng ta a ni chuan tumah in min hrethiam ngai lovang . 

Thil tamtak ka ngaihtuah chho zel a , Dr Noel lakah ka zak in hrehawm ka ti a . Ka nundan hi kei ngei pawh hian ka ning tawh takzet a ni .

' Aaa.... ka zak lutuk' tih pahin ka in let leh tap thin a , inchhirna hlirin ka khat bawk .

A tuk zingah pawh chuan zan lamah ka mut theih loh avangin hma takah ka tho a , a vawikhat nan ka pu ka thawh khalh ve ngei .Nidanga ka tih khat em em rawng chu ka lo bawl vek bawk .  

Ka nutei a rawn thawh chuan ka lo thawh khalh ve ngei avangin a lawm lutuk chu hlim hmel a pu sang renga . Fel deuha ka awm hi chuan kei aiin ka chhungte hi an hlim zawkin ka hria . 

' Tinge i hmai kha?' ka nutei chuan min rawn endik nghal vat a ,a vung mai bakah a duk deuh raih bawk nen thup theih pawh a ni lo .

' Nizanah birthday lawmna ah min nghawk fuh palh a , a na tawh lo ' ka lo ti nghal zung zung a . Ka thusawi chu a awih a ni ngei ang engmah min zawt zui tawh lom

Chaw kan ei lai te chuan ka rawngbawl chu a tui bik ta riau emaw tih mai turin an phahnih chuan an phur in min fak deuh sek renga , a tuk zinga thawh hma leh pawh min ti chak zo vek . 

Tlai lamah hi chuan loh theih lohna avangin rawng hi ka bawl ve zeuh zeuh thin a , zing lamah erawh tun hi ka vawikhat bawl na a niang . 

In lama ka thil tih tur zawng zawng ka tih zawh vek tawh hnuah nizan lama thutlukna ka lo siam tawh ti puitling turin  V-a nen chuan kan in hmu ngei a , sawi tur a vang takzet .

' V-a kan pahnih hian in ṭhen ang ' a hmai chhanah chuan ka ti tawl mai a . Chhuanlam siam ka tum lova dawt sawi ka tum hek lo . Nun lem taka awm kha ka peih tawh loh vang zawk a ni . 

Nidangah chuan ka ngaihzawng te nen pangngai takin kan inthen ngai lo .Midang ka neihsan daih thin avangin an lo inthiar fihlim loh leh an call leh message ka reply ngai lova an beidawng in min kalsan mai thin a ni . 

' Min lo kawp reng a ni maw ? ' tiin min zawt ta nge nge a , chhan ngaihna ka hre der lo .

V-a hi mipa mahni induh tawk ve tak leh luck ve tak a ni bawka , inthen chungchang ka sawi takah chuan ṭhen lo turin min ngen dawn lo tih hi kei tluka hrechiang an awm lo .

Chhan dan tur hre lova ka ngawih reng takah chuan 'vawikhat mah min rawn be tawh suh ang che ' min tih khum zek a , min kalsan nghal nal nal bawk . 

Engkim a tawp vek takah chuan ka ruak nghal vek hian ka hria mahse ka rilru erawh a na eih lo thung . Hetiang vang te pawh hi a ni mahna ka ṭhiante pawhin i thluak hi thir atanga siam aniang an lo tih thin nachhan. 

Ni te a liam a kar khat a ral leh hnuah pawh Dr. Noel chu hmuh ka hreh em avangin ka hel ngat ngat a , damdawiin ah pawh ka kal tawh ngai meuh lo . Chhuanlam ho te te siam in inah ka tawm deuh chawt a . V-a nen kan inṭhen tawh bawk nen phone pawh ka khawih ngai tawh meuh lo . 

' Ka pa vawiin chu bungrua alo thleng teuh dawn a . Dr. Noel a rawn awm atang hian damdawiin pawhin hma a sawn chak khawp mai . ' ka nutei chuan ka pu chu a hrilh mawlh mawlh a .

Ka pu pawh chuan ' Kum khati zat kha kan lo awm ve tawh a, Doctor a awm lo reng a damdawiin pawh hi a kawrawng vek tawh a nih hi. . A rãm tawh mai dawn emaw kan tih hnuah Noel hi Pathian in min pe a nih hi ' a lo ti ban charh charh a . 

' In entir pawh nitin mai hian mi 30 vel hi chu an rawn kal ziah thin alawm . Khawdang atang pawhin an rawn pan nasa tawh khawp mai . Mizoram ah pawh kan Surgeon neih that ber te zinga mi ngat kha a ni ve a ' chhuang takin ka nutei chuan a ti a . 

Ka pu lah chuan min lo hmer tel leh hman tawh .

' Ka-te vawiin chu i nutei te va pui ve la ' ka pu in a tih lai te chuan TV en chungin thuthleng ah ka lo mu leh zar tawh a, a tawng hria ang pawhin ka awm duh lo . 

Bedroom atangin ka nutei lah chuan , ' Damdawi leh damdawiin bungrua a rawn thleng nual dawn a , min rawn puih ngei ngei angai ang ' alo ti ve bawka . Dr. Noel ka hmuh hreh nen nen loh theih loh in ka hmuh leh angaih hmel . 

' Vawiin chu fridge silfai ka ngai ' ka lo ti ve hmak a .

' Vawiin ah staff hnatlang kan nei dawn a ,  OPD pawh kan khar dawn . Richard leh Evelyn te pawhin min rawn pui dawn a nangphei chu kal lo ngam tur pawh i ni lo '  ka nutei chuan a rawn la ti ang deuh deuh a . uEvelyn hming ka hriat rual rual chuan ka beng ka lo chhi nghal hru a. 

Phullen a kan awm atanga a vawi khat nan OPD chawlh laiin Dr.Noel an staff hnatlang a ko a. Damdawiin leh a chheh vel an tih fai dawn mai bakah bungraw lo thleng ho an tih fel dawn avangin ka nutei thahnem ngai lutuk in midang a sawm leh tawh aniang pu Richard-a leh uEvelyn te an rawn kal ve dawn danah . 

Ka peih loh na ai mahin Dr.Noel hi ka hmuh hreh vang a ni zawk mah . Mahse uEvelyn a rawn kal ve dawn takah chuan phur lo zet chung in ka in siam ta nge nge a , nalh loh ka hlau ve bawk nen ka lo in chei nasa deuh aniang ka nutei lah chuan min lo tur ve sek lehnghal . 

' Inkhawm tur pawh kan nih loh hi tinge khatiang te i hak zùn a' ka inchei dan chu a rawn sawisel leh tawh .

 Dr. Noel hmuh ah mi smart tak anga lan ka duh avangin kawrfual dum ban tlawn nghawng nei ka ha a ni ve mai a , sawisel vak tur a awm in ka hrelo mahse ka nutei erawh in hnathawh kawr a ha thung . 

Ka nutei hnungah biru ti tih deuh hian ka kal zuk zuk a . Dr Noel hian ka hmuh hreh zia hi hria se chuan amah leh amah a in ti bo daih duh hial ang . 

Chutia ka nutei hnunga ngawi renga ka kal  mai mai lai chuan Dr. Noel chu a room atangin a rawn chhuak ta thut mai!

Ka phu bawk nen min rawn hmuh ka hlau bawk  nen rang lutuk hian hnim sam tawh sa an dah khawm na ah tak chuan ka va dive phei nghal pawp a , ka bawk nghal thlawp bawk ; chutah min hmuh hman  loh ringa kan hawi chhuah nak chuan Dr. Noel leh ka nutei chuan ka awmdan chu mak ti takin min lo en eng chu niin . Ka zak lutuk chu ka hawi let leh nghal vat a , an hmuh loh in ka in siam chhe vak ringawt . 

Read More

Dr Noel 2 - 7

 CHAPTER -7 

'if its not you, its not anyone '

' Min hnek miah suh 'min rawn nuih pah hian ka meizial min pawh thlak sak kha a pet nghal a , a ṭan chiah tihin za lo zet hian ka lo nuih let hak a. 

' Va lut ta che Sawmi alo mangang lutuk ange ' ka ti kher a , chiang zeta min rawn melh pah hian , ' nangpawh ' a rawn ti let ve ngat a. 

Nuih pah hian a meizial ken lai chu laksak leh in ka fawp nghal a , chu tih lai tak chuan Tangkapar tiin min rawn ko thut a ka thil zuk lai ka hak phah. Ka khuh nghal bawrh bawrh a , ka hnungzang rawn ben thak thak pah hian , ' Tui i duh em? ' a rawn ti a. 

'Tunge sawi ? ' ka lo ti vin nghal hlar thung .

 Ka hming hi ka duh loh zia an hre vek a , ka ṭhiante chu an ni lo tawp ang . Ka thinrim chu ka rilru in ka phun nghal mawlh mawlh a , hre thei se chuan nasa min ti ngawt ang . 

' Tui kan la ange ' tih leh thawh chu a tum nghal uai a , pawh let pah hian , ' a ngai lo ' ka lo ti nghal vat a . Thuawi takin ka bulah chuan a rawn ṭhu ve nghal mai bawk a . 

Birthday leh V-a lam reng kan ngaihtuah tawh lo , kan pahnih chuan thil ho te te sawi in kan titi a , kan in mil phian lehnghal. 

A ban a tattoo chu va melh zeuh pah hian ,' I tattoo kha a va nalh ve ' ka ti a . Ka neih chak thin ka neih ngam ngai loh a ni bawk a tattoo neih min chak tir lehzual zo vek .

' Hemi hi chu a rei tawh ' tih pahin a kawr ban lehlam chu a pawt chho a , tattoo in alo khat vek chu niin , a hriat loh in ka meng bial deuh kawk in ka hria . 

Kan society nen tattoo hi chu a in mil lo em a , hetianga tam tattoo hi chu mak ti pawh ni ila ka in dem hran lo . 

'Heihi ka ui Roger tan a nia 'tih pahin ui kephah (paw) lem chu a kawk a . 

' A thi tawh em ni ,? ' tia ka zawh chuan alo bu nghat a .

A tattoo awmzia leh a chhutchhan te chu min hrilh keuh keuh a , a tuina zawng a ni ngei ang han hrilhfiah vel chu nuam a tih hmel takzet . 

' A na em? ' ka tih chuan , ' Heihi keimah leh keimah ka inchhut a nih hi ' tiin chhuang takin luruh lem chu a kawk a .

' Nangmahin maw !.... ka awi lo ' ka lo ti hmanhmawh. 

' Tattoo parlour ka nei alawm ' ka awih loh em avang chuan a ti a , a nih chuan tattoo artist alo ni reng a ni maw ! 

Ka ngawi vung vung a, ka rilru ah zawhna tamtak alo lut nghal. 

  ' I pa in a phal em ni? ' tiin ka tum loh deuh chu ka zawt thut a . Apa hi mi challang tak a ni a , a fapa hi tattoo artist ni turin a phal em nge a phal lo chung chung a zir lui zawk . 

' Ahhhh....' a ti fan raih a , a sawi hreh tih ka hria mahse ka hre chak telh telh thung .

Ka hre chak lutuk chuan ,'Chuan ... ' ka lo ti vat a, nuih chhuah hak pah hian , ' Phal lo e , Bangalore ah Master ti turin ka kal ve a hei tattoo artist ka rawn ni daih a nih hi ' tiin uang deuh hian a ti a . 

Mizoram ah chuan mi tam zawkin Sorkar hna thawh kan tum luai luai karah hetiang thil lo zir daih hi a risk a sang in mi huaisen mahni in ringtawk tak lo tan chuan a tih theih loh ang . 

Christian-a nen chuan kan vawikhat inhmuhna mah nise ka in nel nghal em em a , kan titi a kal tluang bawka ka nu in min tihsan dan te chu ka hrilh a . Ani pawhin Bangalore ah tattoo dawr a neih mai bawkah Delhi ,Kolkata leh Mizoram ah branch hrang hrang a hawn tawh thu te ,Phullen ah kar2 chiah a cham tur thu te leh vawi li a rawn kal tawh thu te chu min hrilh a . Rei tak in hre tawh ang mai kan ni. 

'Birthday lawmna ah hian ka rawn kal lo ang tih ka hlau, ka hmuh hmasak ber che kha chuan ila te lutuk a ,titi pui tham pawh ila nilo  ' a tih chuan mak ti takin ka en deuh hu a . Ani hi chu ka vawikhat hmuhna a ni a engtik lai khan nge min lo hmuh hman pawh ka hrelo . Ngaihdan pawh ka neilo. 

' Engtik laiin maw ka tet a? ' tia ka zawh chuan , ' I la naupang lutuk ' a ti leh ringawt a . Min ti vir tawk lek a mi han chhan dan vel hi a thiam ve ngawt mai . 

'hmm... ' ka ner khum nang a , nuih pahin ka lu chu a rawn chul a. Rilru tenawm pu a ti anih loh avangin ngaihloh lamah ka ngai lem lo . 

Nia , min nau en pawh hi a awmlo hran lo . A insawi danah kha chuan Master zir turin  phai lamah a kal tawh a alo ber kum 26 vel anih tawh ka ring . 

' Taktak a ... i hmeltha ka ti thei lutuk ' tih pahin ka mit ah tak min rawn en a ,lo duh ru ve ta na na na chu min rawn fawh a tum pawh chuan ka lo dawh ve mai bawka .

Kan hmui a in tawk dawn chiah tih chuan Awmtea phone chu a rawn ri ta mai !!

' Hmela chu ' tia phun ruk sep pah hian ka la nghal a Tei a ni tih ka hriat avangin vin zet hian , ' Eng nge? ' ka lo ti nghal ringawt bawk .

Tei chuan an haw tawh dawn thu leh min zawn nasat thu chu vin zet hian min rawn hrilh let ve nghal tun tun a . Kan in biak than dan a ni a kan ngai thutak lem lo . 

Awmtea phone pe tur chuan Christian-a nen kan pahnih chuan kan let leh a , Sawmi'n min rawn hmuh ka hlauh avangin ka kal hmasa zawk a . Min rawn kal hnaih lo turin ka hrilh sek bawk .

' Caro ....Sawmi hian a choke slam mai tur che nia ' a phone ka pek pahin Awmtea chuan min rawn hrilh ru sa sa a . Christian-a erawhin min thlah a tum avangin kan piah deuh lawkah min lo nghak thung . 

'Dik chiah ... V-a pawhin min rawn call nasa tawh lutuk . A average a lak in inti thiam lo reng ang in ni ' Tei chuan alo ti ve bawk a. 

' Tikhan kan in ṭhen a ni mai ,ani nihpui te zawng Jail tang reng ang ka ni ' ka lo ti ve tan tan a .

Ka sawi dik chiah reng a ni , V-a hi mi thikthu chhe lutuk a ni a a saptawng tak phei chuan mi toxic lutuk a ni . Phone ka nei lo tih hrereng mahse min rawn biak reng a tum a , ka pu phone ka hman thin avangin call lak theih loh chang te message reply loh chang te hian min ringhlel reng a . Mi luhlul leh rilru lian tih takah min rinloh na na na chuan runluih  nan ka kawp phah leh nge nge thin . 

' Engpawh chu nise fimkhur la , i nute in min rawn call leh hma in haw vat vat rawh ' Awmtea chuan a ti a . Kan in mangtha nghal sap sap hlawm a .

Kan awmna a hlat deuh avangin Christian-a chuan in thleng min thlah thlap a . Sawmi'n min hmu hman lo bawka ka thaw huai mai . 

Kawng tluan in kan titi zui mawlh mawlh a , ka thusawi apiang ngun taka min ngaithlak sak vang aniang ka ṭawng tawp hlei thei lo . 

Damdawiin kawt kan thlen chuan Dr Noel office chu alo la eng a ,a chhungah a awm tih ka hriat pawhin ka hlim tawk ve em em tho .

' Ka lawm e , mangtha em em' fiam pahin Car atang chuan ka chhuak nghal a , min rawn la en zui vang vang tih en lo pawhin ka hriatna tha tak hian a hre thei .

A motor a turn vel lai chuan vai liam tum in ka lo la nghak a , a tlan mai dawn emaw ka tih laiin Car atang chuan a rawn chhuak ta zawka . 

' Tinge i rawn chhuk leh a?' tia ka lo zawh rual rual chuan , ' Hei hi kan la tilo ' a rawn ti ringawt a . Mak ti taka ka lo en reng lai chuan min rawn fawp ta mai ! Ka haw bik lo ka ti tawh kha ka lo fawp let chiang kher mai . 

Rei pawh kan in fawh hma chuan Christian-a chu tu emaw hian a rawn kuai her lawp a , leiah bawh thlu nghal in a hnek ta buan buan a .An insual chu a ni nghal mai. 

' V-a ti suh ' tih pahin ka ṭe nghal chul a  .

' Ka bialnu hi i kut hmawr pawhin lo dek tawh suh ang che ' tih leh a hmaia hnek chu a rual a . Christian-a pawh a duai bik lo V-a chu a bawh bet ve nghal a a hnek nghal siah siah bawk . 

Keilah hmeichhia a zawnga in ti nu lo ber leh kawlhrawng ber chi ka lo ni bawk nen an insual reng ai chuan ka thei dawn lo tih hre reng chungin ṭhelh chu ka tum ta mai a .

 Tu zawkin nge min rawn nghawk fuh pawh ka hre lo ka biang a rik chawrh rual chuan lei ah ka let nghal tawp a ka lu a hai chhawlh thei nia mawle mahse ṭah te chu khawi lam ka mawng ka beng thuak thuak a ṭhelh leh tuma ka kal lai takin hnung lam atang hian Dr. Noel chuan ka zak tawn tawn ah min rawn dawm kang nawlh a , damdawiin chhungah min luhpui daih ringawt . 

Tunkar chu Pathian in rem a tih chuan zantin lo chhuah ka tum dawn a, naktuk zanah kan in hmu leh theuh dawn nia ..

XoXo @remruati_haylor

Read More

Dr Noel 2 - 6

 

CHAPTER -6 

Chaw ei lai chuan ka nutei chuan a ṭhiannu Evelyn rawn len a tum thu te chu a sawi a , a hma khan Dr Noel nen a sawi zawm deuh avang khan ka beng a ti kham takzet . 

Evelyn hi Lawngtlai a awm daih a ni. A hnathawh avangin Phullen ah hian kum 6 dawn a awm tawh a , khawtlang ah leh Kohhran ah a in hmang bawka nula fel leh hmeltha tiin Phullen ah na na na hi chuan mi hriat a hlawh hle . 

Ka nutei thian ṭha ber a ni a, kan in len pawh nasa hle bawk,a rawn riah loh leh chaw te a rawn ei fo thin amaherawhchu tun thlengin thinlung takin ka la nel thei lo. A tan chuan ka sual mah mah ti ila ka sawisual lo ang . 

A rawn len dawn chuan ka leng ve dawn ka tih chuan ka Nutei chuan,' Birthday lawm tur a awm leh tawh em ni? ' alo ti nghal vata .

' Aw ... Sawmi birthday a nia, scooty ka keng dawn ' ka lo ti nghal vata . Sawmi hi kan class a mi a ni a , V-a nen erawh an in mil loh em avangin a sawm tel ve lo a , kei maha ka kal mai angaih hmel .

Ka Nutei hi strict viau e tilo chuan hnatlang , YMA leh Kohhran thil tih na ah hi chuan tel ve ngei se min duh avangin min nawr lui zawk thin mahse birthday lawm tih vel erawh a phal vak ngai lo thung . Exam zawh chawlh lai chu nilo se tunah pawh hian kal a phal leh miah lo ang . 

' Teuh lo .... in lo in race leh ang , mi in an sawi duh cheu em kha ' a rawn ti leh ta . Nikum lama thil thleng tawh kha zan lama scooty lak chhuah ka dil apiang hian a rawn sawi chhuak ziah lehnghal .

Nikum ah daih tawh khan Birthday lawmna a kan kal chu kan haw lamah kan lo rui ve tawh bawk nen khaw pawn lamah kan in tlansiak vak mai a , kan ṭhianpa pakhat in a nunna a chan mai bakah ka ke ruh ka tih tliah phah lehnghal a , kan khua mai nilo khaw thenawm zawng zawng sawi kan hlawh hat hat phah a ni . 

' Ninawm ' tih bakin ka chhang duh lo a chhanchu kal a phal lo leh thut palh ang . 

'Sawi kai in rawn awm tawh suh a zahthlak emai ' bathroom a luh pah chuan a rawn ti leh hram a .

Nia , he khua ah hi chuan ka chhiatna bak mi in sawi tur an hrelo . Ka awmdan leh ka nun in alo zir lo bawk nen ; mi awm tha duhlo , mi ler leh sual tih hi mite min hriat dan a ni . 

V-an hla a zir dawn a Awmte'an min rawn hruai hman bawk si lo. Damdawiin leh in awm hmasa ber inkar hi a thim mai bakah a ramhnuai ve deuh bawk nen hlau lo mah ila kawng a chhe sia ke in ka chhuk thla peih lo takzet . 

Ka pu phone ah internet pack a awm loh avangin ka keng peih lo a , a torch light ka ken sak ta zawka . 

Ka pu in min ngaihtuah deuh nge ni min rawn thlah chu a tum tlat pek a ,a tar tawh si a a tluk te nia ka hlauh ni .

' Pu chho tawh rawh ka hlau lo ' ka tih pawh chuan ' In hmasa ber thleng khu ka zuk thlah ang che '  a ti ve tlat a . A tum tawh chu tih ngei ngei a duh thin avangin ka hnial buai peih lo . 

Rei pawh kan kal hma chuan car pakhat hi damdawiin atang chuan a rawn tlan thla a . Quarter a awm ho zingah Dr Noel lo car nei an awm loh avangin amah a ni tih ka hre nghal . 

Ka pu chuan alo phar ding a, ka hlauh ang ngeiin min phurh thlak tir chu a tum ta mai .

' Noel .... kawnah thil lei turin ni lawm ni i kal dawn? ' ka pu in a zawh chuan a lo bu nghat a . Rawn chuang rawh pawh a tih hma hma chuan ka pu in min nawr lut ta mai a , zak deuh nuam ti deuh bawk si chuan ka chuang a . 

' BDO tlangah ilo han thlah dawn nia ' ka pu chuan ala ti ang deuh deuh a , min phur pawh tih tawh mah nak laiin min thlah tura a tih leh phei hi chuan ka zak lutuk hi ka lo ip chawih chawih mai. 

Ngawi rengin Dr Noel chuan min phur thla a , ka sawi tur hrelo chu tukverh lam ka  hawi vauh vauh reng a . Ka thian ten mipa lakah hian ka zei thu min hrilh fo thin kha an lo ti mai mai a nih dawn hi . Dr Noel bulah hi chuan han zei ngaihna ka hre der lo . 

Amah melh hruk hruk pah chuan , ' Kawnah ka chhuk thla mai ang ' ka ti leh ringawt a , min chhang tawh dawn lo emaw ka tih hnuah , ' a awmna min hrilh la , ka thlah ang che . Zanah naupang mahni a chhuah a him lo ' a rawn tih chuan ka thinlung hi a na nghal vawng vawng mai . Naunpang tih ṭawngkam hian min ti na reng mai dawn chu a nih hi . 

Lehlam hawi daih pahin ka lo bu nghat a . Eng ang pawhin ngaihzawng nei lai ni mah ila , mi ler tih takah Dr Noel lakah hian beiseina ka nei tlat a chu chuan min la ti na dawn chauh chu a nih hi . 

Kawn kan thlen chuan eitur tlema zawng rawn lei tura an tih ho chu ka lei a, Dr Noel  pawhin a mamawh ho a la khawm a , a chhelo in a hmeltha bawka dawra lo awm ve te chuan an en duh ngei mai . 

Chutia dawra kan din reng lai chuan Evelyn a rawn lang thut a , ' Bawihte ... i nutei a awm em ? ' tih duai pahin ka darah a rawn kuah a , a hmeltha si a Dr Noel chuan a lo thlithlai bik ringin ka va melh zeuh a , en chu sawiloh Evelyn hnungchhawn zawnga a din daih avang chuan ka thaw nghal huai thei . 

U Evelyn in Dr Noel melh zeuh zeuh paha 'Ka rawn leng dawn a chho rual ila ' a rawn tih chuan birthday lawmna a ka kal dawn thu in ka lo chhang vat a , A ngaihven nih a duh avanga a chhuanlam ah min hmang mai mai in ka hria . 

' Anih chuan ka lo han chho ange ' tih pahin kal mai chu a tum a mahse kal ta mai lo chuan dawr nghaktu UZo-i chu a be kual leh vel a . A awmdan hi kei tluka hrechiang an awmlo . Dr Noel hi biak ngei a duh a mahse a ni in alo ngaihven ve si lo a , chuvanga hetianga tap tap hi a ni tih ka hre ve kar . 

 A tawpa tawpah chuan hun remchang a hmu a ni ngei ang ,a bawhpelh lo chiang hle . 

' Ehe .... Noel , eng nge hetah i tih ? ' tiin a be ta nge nge a ,a awmdan vel ka ei lo lutuk chu ka lo meng pual deuh ralh a . 

Dr Noel lah mi fel leh polite tih takah ṭha deuh hian alo chhang a , hetiang boruak hi chu ka hip ve thei thlawt lo . 

'Evelyn ka nia .... kha vawikhat chu ka rawn in entir tawh kha ' a ti vel luam a , 

Dr Noel lah chuan alo be chhe bik bawk si lo , ka thin a rim deuh ṭun mai . 

' Rintei te quarter ah ka kal dawn a , chho rual ila ' U Evelyn in a tih takah chuan ka ngaithla peih tawh lo . 

' Ka kal dawn ' Dr Noel hriattur kher in UEvelyn bulah chuan ka ti a , ka chhuak nghal nal nal bawk . 

Ka thil lei polythene pakhat a ka khung khawm lai chuan uEvelyn chu a rawn chhuak a . Min rawn pawh deuh chung chung pah hian ,'In in nel viau tawh em ni? ' tih hi min rawn zawt ringawt a,a hriat chak hmel hle bawk . Mak ti taka lo en deuh ha chung hian , ' Aihhh... Ngatinge?'ka lo ti hu a .

' Eng ni lo e , i kalna turah a thlah tur thu che a sawi a ' a tih takah chuan a rukin ka nui , kawna ka chhuk tur thu kha ka hrilh reng sia ,min thlah duh talh anih te min thlah sela a ni mai tih te chuan ka ngaihtuah vela  . 

Dr Noel chu a rawn chhuak a , a in khai bawr hle bawk .Car ah a thil lei ho a khung mawlh mawlh lai chuan ,' Lo va lut rawh, ka rei lo ang ' a rawn ti a ,kei lah ka lo induh ve deuh khanglang a . 

' A hla tawh lo , ke in ka chho mai ang ' ka ti leh kher a , nichin ah khan hmeichhia a karah naupang lehnghal zanah keimah in min kal tir dawn lo tih ka hre ve kar a induh ve theihna hun ka neih hi chuan ka bawhpelh dawn lo reng reng . 

' Ka zo .... kawi lampang ah nge i kal dawn? ' zaidam tak hian a rawn ti a , ka induh khum ngam tawh der lo .

'He lamah hian 'kawng kawh pahin ka lut nghal zal zal a . Sawi tur hre lo in ka thu mual mual a,ani lah a ṭawng tlem bawk nen ngawi rengin ka sawina BDO tlang lamah kan tlan chho a . 

A car te hi ala thar sia tuna ka thutna ah hian hmeichhe dang an la thut ka ring lo tiin thil atthlak tak tak chu ka ngaihtuah kual vel a, ka nui chhuak lo chauh . 

Sawmi te in kawtah chuan min thlah thlap a , inchhungah an awm vek avangin tuman min rawn hmu lem lo .

' Ala tlai loh hi' a sana en pah chuan a ti a . Tihian zankhua in a bulah hian ka awm chak mahse ka rilru ang hi a pu ve lo tih ka hrechhuak thut a . 

' Ka lawm lutuk aw' tih leh chhuah ka rual a , hawi let lo in inchhungah ka lut nghal a. 

Kan class ho chu an lo kim ṭhap tawh a , kan class a mi nilo midang pawh an lo awm ve nual bawka ,midang an han awm ve takah chuan ka zia thup in ngawi rengin Awmtea leh Tei bulah chuan ka va ṭhu a. 

Khawpui mite angin changkang takin birthday lawm tur kan ni lo a , cake zai leh wai wai chhum a ni leh mai dawn a,a rei dawn lo tih ka hriat kar avangin hemi zawh ah hian V-a nen inhmuh kan tum a ni . 

' Ka haw hma maithei a nia ' ka ṭhiante bulah chuan ka ti su su a .

' V-a nen in in hmu dawn mi ? ' Tei chuan alo ti vat a , aw tih hriat nan ka lo siai zeuh a . Zanin chu midang in min lo pawlh bawk nen kan thian thum chuan ngawi rengin kan thu thap a , kan fel hmel ve lutuk . 

Mi ler tih takah kan class ni ve lo ho chu kan mit chuan a scan kual leh zai zai tawh a , an zing pakhat chuan ka mit ala nghal chat bawk . 

' Saw pa saw tunge ? ' tiin ka thiante chu ka zawt leh sa sa a , Awmtea chuan ka mal a rawn chum nghal tawlh ringawt .

' A naaa... Mawla ' ring zet hian ka ti nghal lung lung a ,an rawn hawi thap a chupa lah chuan min rawn nuih vur vur lehnghal . 

' Christian-a saw maw ? ' Tei chuan a rawn ti a ,ka lo bu nghat a . A hming nen lam an lo hre leh vek tawh . Kei ve khua atanga fal deuh hlek a awm tih takah ka news lo riau . 

' Sawm'in a duh rapthlak , a sawm ve a nih saw ... BDO fapa a nia ' Te'in a tih rual rual chuan Awmtea chuan ,' I ler lutuk , V-a hi kawp leh ilo tum ange ' a rawn ti nem duai a . Awmtea pawh hian Aizawl mi bialpa a nei a , luangpawn ami a be ve tho sia . 

' Ka peih tawh miah lo ania , kan buai thei si . V-a hi a thinchhe si hlau rawh ' tiin min rawn vau ti tih a .

A hma pawhin V-a hi ka lo kawp fo tawh a , inkawp hi chu ngaiah ka nei tawh . Ka sawi tawh kha ka ler bawka mipa hmeltha tia an sawi hat hat tawh hi chu kawp loh pawh ka nei tawh lo . 

Ler viau e tilo chuan mipa tumah hi ka duh hmasa ngai lova, ka va ti hmasa ngai hek lo . Mahni tawka in duh ve larh thin ka nih vang nge ni V-a bak hi rei tak kawp ka la nei lo . 

Ka thian ten min khap tlat avang chuan Christian-a pawh chu awm ve lo ang maiin ka awm lui tlat a, Sawmi lah chuan a hauh tung mai bawk sia mitmei hmuh ngam pawh a ni lo . Sawmi hi nu lian tak a ni a insualpui te hi ka hlau teh ania . 

Thil kan ei hma chuan pawnah mahni chauh in V-a phone a biak mai mai pahin meizial ka zu hlat hlat a .V-a lah chuan tlaiah khan min rawn hruai tur thu a sawi vek tawh a, tunah lah a hman leh loh tur thu min rawn hrilh leh a . Ka thinrim lutuk chuan ka vin hrep a phone ka off hmak bawk .Awmtea phone chu nilo phei se chuan ka vawm darh vek maithei ni . 

Sual hle mah ila mahni thusawi a ding thlap thlap mi , theih dawn loh pawh nise tum lui tlat mi ka ni a hetiang mai mai a min ti hi ka lungawi thei thlawt lo . 

Ka mittui rawn tling pam chu a tlak mai loh nan ka in sut ka in sut a ,mi thinchhia tih takah thin a rim tawh hi chuan mittui hi a hnai tlat zel .

Ka rilru tawt lutuk tih ziaawm nan ka pawisa neih zawng zawng a ka lei zozial pakhat la awm chu tan leh tum in lighter chu ka han talh a , ala alh thei lo zui . Ka ṭawngkam hman uar em em ka ṭhian te pawh ina an uar ve tak vek Ninawm tih pah chuan lighter chu lei vawm nan ka hmang a . 

 Thinrim a kal tluang lai chuan ka meizial pet vu lai chu hnung lam atangin tuemaw hian min rawn pawh thlak sak thut a , ' Zawnga ' tih paha ka hawi let chiah chu Christian-a hian min lo nuih vur vur a . 

Read More

Dr Noel 2 - 5

 CHAPTER -5 

Ni te a liam a, ka ban pawhin dam lam a pan ve zel a . Sikul kan chawlh lai alo ni bawk nen nidanga ka tih thin dan ang bawkin ka nutei damdawiin ah ka pui thin a . Ka phur loh thin nen Dr. Noel a rawn awm atang hi chuan ka phur em em zel mai a ni .

Amah tlang takin be ngam lo mah ila a khat tawkin hmuh tura a awm thin ringawt pawh hi ka hlimpui ve em em tho. 

Tlai khat chu ka nute'in nilenga in a awm tura min tih tlat avangin nilengin Dr Noel ka hmu lo a, ka nileng awm a nuam lo vek thei . Mi tamtak chuan korean te, milar te an vei laiin kei chuan tih takzet in Dr Noel hi ka vei thung .

Nutei chuan ka bai chawh hlawrh hlawrh lai rawn en dek dek pah chuan' Bai kha i va siam hnem ve ' a rawn ti a. 

'Dr Noela ka suah ve dawn ' ka lo ti sam et ringawt. 

' I va zak lo tak ... Dr Noela pawh a ni lo ,ù ta che ... awi pa zawk rawh . Kum 34 a ni tawh a nang kum 17 chauh ila nih hi ' a rawn ti zek a.

Ka nutei hian awmdan tur hi min hrilh mawlh mawlh thin a , ka ù ngei ngei tur ka ù loh chang te hian min hrilh hre thlap thin . Mahse Dr Noel erawh ka lo duh ruk vang te pawh a ni mahna han ù hi a remlo ṭut in ka hria. 

' Nangpawh ka ù hleinem che ' ka lo ti hmanhmawh a .

' Ù reng nang , i nutei ka nih hi ' a rawn tih leh chuan ka dãng chiang khawp mai .

' Damdawiin ah reilote ka awm dawn a , chaw ei dawnah min lo ko mai dawn nia ' tih leh chhuah a rual a. Ka nutei hi chu a buai thin ngawt mai , a awm awl hman meuh lo .

Dr Noel a quarter ah a awm tih ka hriat kar avangin ka bai chhuanvawr suah tur chuan ka kal a . Ka kal hma chuan ka in pack nasa leh tawh nang mai . In chei tum vak loh mah ila lang that tum luatah ka lo in chei leh vak thin .

YouTube ah makeup tutorial en pah chuan ka in chei hlarh , ka hmai pawh ka hnawih tle nasa khawp mai . Keima tawkah nalh ka in ti in room ka chhuah san hma pawhin darthlalang ah vawi tam ka in thlek hman . 

Ka hmai chang a ni lo , ka kawr pawh Kendall Jenner te tih dan copy in ka tshirt chu hnung lamah ka ṭawn tawm a , ka chet deuh chuan ka laipawng a lang thei a ni . Crop top ka lo hak fo tawh avangin ka khawr lem lo . Ka tum ber zawk chu sexy leh itawm thei ang bera lan a ni . 

Ka bai ken lai tih buak hlau tak chung hian  uluk fahran in ka pen a , tibaw miah lo in ka thleng thei hram .

Kawngka chu ka kik karh karh a ,ka kik nawn leh pawhin a rawn hawng lo .A rawn hawn theih tak loh avang chuan damdawiin ah a chhuk leh a nih ringin kawngka chu ka hawng ta ringawt a . Dawhkan a dah a kal leh daih ka tum a ni .

Inchhung ka luh chuan bungrua engmah zu han awm lo a mawle , a rawn thlen tirh a hmun ka phiah sak bak kha a inah ka la kal leh miah loh avangin mak ka ti angreng hle . 

Tukverh bulah chuan Chair nawm hmel zet mai , Gamer ho ṭhut thin na ang kha pakhat hi a lo awm ve a , a bak chu lehkhabu in a khat ti ila ka sawisual lo ang.Lehkhabu a chhiar tam hle a nih dawn hi . 

Ka plate ken chu dawhkan ah ka dah a chhuah leh mai ka tum lai tak chuan Dr. Noel bathroom atanga rawn chhuak chiah nen chuan kan in su ta chawrh mai!!

Kawr a ha lo lehnghal a ,ka hmui ka lo hnawihsen ve bawk nen a dul ah ka hmui thla a chuang nghal kulh a , lipstick chu tuai reh sak chi va ni suh . 

Tum loh dan deuha thil a thlen takah chuan kan in hmu thut chu mak kan in ti in kan phu dun chiang khawp mai . 

' Ih.. chawhmeh rawn suah che ka tum a 'in lak hran vat pahin a enga mah hma chuan ka lo ti nghal zung zung a , ani chu a pangngai lehnghal mai a kei ve thung chu ka che buai leh vek tawh . Ka thinphu pawh a rang tawh  kher mai . 

' Eng chawhmeh? ' tih pahin a chhin chu a hawng nghal a . A taksa a ka lipstick sen kai chu hmuh hmaih a harsa takzet , a ni lahin hruk reh a tum bawk si lo nge a hmu lo zawk . 

' Ka lawm e ' tih pahin a khi nghal vur vur a . t-shirt a ha nghal mawlh mawlh bawk a lipstick bawk chu tireh lo in a hak hnan hmiah ringawt. 

' Ih Noel ' ka ti hman zuk a , chal chuar deuh tup a min rawn en takah chuan , ' Au Noel ' ka ti nawn leh a , ka rilru put hmang vang nge ni hetianga koh hi ka tim deuh tlat . 

' A tui lo maithei ' ka ti ta ringawt a . Ka tawngduh thin tehlul nen sawi tur ka hre lo reng reng . 

' Tui ang ,i fel lutuk e ' tih pahin fian a la nghal a , hetianga naupang chhia taka min treat hian ka lawm lo , ka rilru a na zawk . Engang pawhin lai lang ha in inla sexy ve teh mah ila vawikhat pawh a rawn melh lo . 

Ka bai siam ngei mai chu suak in a han hawp chhin a ngun takin ka lo en kar a, ' A thak maithei ' ka tih rual rual chuan min en rawn a , engmah sawi lo mahse a beng leh hmai chu a sen nghal vek a, a nui chhuak nghal huk ringawt . 

A awmdan avang chuan ka ngaihtha lo chuan ka han hawp ve chhin ringawt a ,alo thak lutuk chu niin .Ka bai te a ni sia tiin lem luih kan tum ngawt a ,ka hnar a rawn ur takah chuan Dr Noel kawrah tak ka phuh chhuak nghal thawt ringawt. 

A thak ka ti lutuk chu ka khuh nghal bawrh bawrh a ,ka taksa pum chu a sa nghal up up a . Hmarcha ka ngam ve hle ania hei zet zawng ka tilui thei ṭhak lo. 

Tui min rawn pe nghal vat a , 'Ka lawm e ' tih leh in ka rual a , ka khuh alo chhuak bawk nen Dr. Noel hmaiah tak ka phuh leh ta ṭhawt mai . Theih chu nise khuk ral chem chem ka chak . 

' Ka tih palh ' tih pahin ka khuh leh tuarh tuarh a , ka khuh vawih te nia ka rin ni . A kawr lah chu a huh vek a, a hmai chu a kut in a tuai nghal vat a , a huh hluam bawk .

' Ka tihpalh ' tih pahin a kawr huh chu ben fai tumin ka beng nghal mawlh mawlh a , a atthlak takzet . 

Ka tih huh vek avang chuan hmel hlim lo min hmuh dawn emaw ka tih laiin min rawn nuih ta zawka , ka thawveng nghal huai mai . 

' Ka ... ka kal mai ang , plate chu nakinah ka rawn lam leh mai ang ' tih pahin ka in her nghal vut a , kal nghal mai chu ka tum a mahse ka ban rek ah vuan in min rawn pawt ding a , mak ti takin ka lo en thung . 

' I hmui  ' tih pahin ama hmui zawk chu a khawih a , a thusawi hi ka hrethiam lo tawp mai .

Ka hmui pawh hru lova mak ti taka ka en reng lai chuan , ' I hmui hnawih kha a pherh vek a ' a rawn ti ta nge nge a . 

Ka hmui hup vat pah hian, ' ka awi lo ' ka lo ti hram a , ka rilru chuan ka in hnawih chhah zia a hre kur thung .

' Lo che suh ' tih pahin a kut chuan ka hmui chu rawn tuaifai mai a tum uk a, a mit ah tak ka lo en nghal kar a  mahse thil hrechhuak thut niawm tak hian a kut chu a la thla thut a , min vawnna thlah pah chuan a in la hrang nghal vat bawk .

A hmel chu vawilehkhat ah a rawn inthlak danglam a ni ber , a hma a nui vur vur kha lungngai hmel a rawn pu thut a , a ngaihna ka hrelo takzet . 

' Kan inthlak ange, i plate chu i nutei ka lo pe mai ang ' tih pahin ka awmve tih pawh hrelo ang maiin room ah min luhsan daih a nih chu . In neitu berin room ah min luhsan daih sia , ka tih ngaihna hrelo chu ka hawsan ta nge nge a .

Reilote chhung kha chu ka hlim ve hman takzet mahse a mitmeng dul raih atang khan lungngaihna nasa a nei in ka hria, min ti na hle bawk mahse chu aia na zawk chu naupang ang maia min en hi a ni . 

Ka haw thlak pahin ka nutei ka sawm kawi a ,kawr lai lang ka hak avang khan min la hau hrep zui .

 

 

Read More

Dr Noel 2 - 4

 

CHAPTER -4 

Ka haw duh tlat loh avang chuan ka pu chuan zaidam tak hian ' Bawihte .... kan lo zuk haw tawh mai dawn em ni, homework te i ti phawt anga kan kal leh dawn nia ' a rawn tih pawh chuan ka ṭhutna ngaiah chuan ka thu tlat tho a , ka nutei erawhin ka luhlul zia a hriat avangin min nawr lui duh tawh lo thung . 

Ka nu he khawvela ka neih chhun in nikhaw hrelo in min awm san daih a , ka hmuh theih lo ah a awm daih lai hian engtin nge inah ka haw san daih theih ang .Engtin nge engmah thleng lo ang maiin homework te ka tih san daih theih ang . 

Chutia ka nu ka nghah reng lai chuan Doctor pahnih hi hmanhmawh takin an rawn tlan lut ta mai , hai rual loh in ka nu chungah engthil emaw a thleng tih hrilh chawp ka ngai lo kher mai . 

Ka mak ti ka hamhaih bawk nen rang takin ka thutna atang chuan ka dinga , ka nutei chuan min lo kuah nghal vat a .

' Engmah a thleng lo ' tiin min hnem nghal mawlh mawlh a , ka nutei hi nurse a nih avangin ka ring em em a , a thusawi pawh rin nghal hmak ka duh takzet.Mahse naupang ã ka ni tawh lo a , engkim hi ka hrethiam ve vek tawh a , ka pawm duh lo mai zawng a ni . 

' Ka hria lawm ka nu chungah engmah a thleng dawn hleinem ' tiin za lo zet hian ka nui tawi tap a , ' ka zun a chhuak lutuk , ka va zung lawk dawn ' ka ti a , ka kal nghal tal tal bawk .

' Rei lo la' a rawn ti leh hram a . 

Ka nu an buaipui lai lai chuan lo awm ve reng chu hrehawm ka tih mai bakah a thaw ip pik thlak em avanga kal bo daih ka ni . Ka nutei bulah hian rilru na lo ang deuhin awm mah ila ka thinlung erawh a na vawng vawng thin a , a rukin vawitam tak ka lo tap fo tawh thin reng a ni . 

Kum 13 mi lek tan chuan ka tawrh hi na ka ti in vanduai ka in ti em em a , ka rilru natna te thup bo pui a mahni a tuar chi ka lo ni bawk nen hun rei tak atang tawh khan hlimna tak tak hi ka nei leh tawh ngai lo. 

Ka zun a chhuak miau lo a , zun in lam pan pawh ka tum hek lo. Kawng en mang lo leh kal tum bikna pawh nei lova ka kal mai mai lai chuan mipa pakhat hmanhmawh deuha rawn kal hian min rawn su thlu nghal tawp a ,thawh pawh tum lo in kawngah chuan ka thu nuai ringawt. 

Min rawn su thlu tupa bawk chuan' Ka tihpalh , i na em? ' tia min rawn kaithawh a tum lai chuan ka rilru na lutuk insum zo tawh lo chu zah pawh dawn lo in ka tap chhuak nghal hawk a , midang in ka tap ri an hriat ka hlauh avangin ka kã ka hup nghal vat bawk. 

Kawng laiah tak thu sawp nuai chunga ka tah vak takah chuan chupa chuan ' Khawi lai nge na? ' tiin min rawn ngaihven nghal a , kawng kal te chuan min en duh hle bawk . 

Min rawn su tupa chu a coat var hak atang chuan Doctor a ni tih ka hriat avangin' Doctor ka nu min chhan him sak rawh ' tiin ka ngen ta ringawt a , ka beidawn tawh em vang a ni . 

' Tho phawt la ' tih pahin zo zet hian min kaitho nghal lawp a,veivak ho in min en duh hle mahse nghet takin min rawn kuah a. Keipawnin a kawngah nghet takin ka lo kuah ve bawk a . A lian in a sang bawka a pum zawn ah ka hmai ka hnim tlat a, ka tah chhunzawn nghal hawm hawm bawk. 

Ka ṭah chhung zawng chuan ngawi reng hian ka lu ah alo chul heuh heuh a , engmah sawi lo mahse hetianga nghet taka min kuahtu leh dawhthei taka min nghak tu hi ka la tawn ngai loh avangin ka zang ve deuh huai hian ka hria . 

Ka la in hnit hlawp hlawp lai chuan kan dinna bula thuthleng ah chuan min thutpui a , ka mittui rawn hrukhul pah hian a Lily var bouquet ken lai atang chuan a par pakhat chu min rawn pe a . 

' Le, Bawihi ... i nu awmdan chu min hrilh rawh le ' tiin min zawt a , a coat ah chuan Dr.Noel tih hi a in tar va a . 

Hnuk ulh ṭun chungin ka nu awmdan zawng zawng chu ka hrilh ta veka , ngawi rengin dawhthei tak hian alo ngaithla ran a . Doctor a nih mai bakah ka nu a tih dam theih ka rin avanga hetianga hrilh ta vek hi ka ni . Kan vawikhat inhmuhna mah nise ka nel in ka ngaina nghal . 

' Doctor i ni tiraw ? i ti dam leh thei ang tiraw ? ' tiin ka zawt leh hram a .

' Lehkha i zir that a , School te i kal that chuan Pathian in a ti dam em em ang ' tiin min chhang daih thung a . 

' Naktuk ah ka birthday ah Anu hian min lawmsak i ring em ? A rawn harh ang a naktuk zingah chuan ' zawhna atthlak tak tak chu ka zawt reng a , mahse chung zawhna te chu ka rilru a awm reng chhanna ka neih si loh te an ni tlat a ni . 

' Kum engzat nge i nih tawh dawn ?' 

' Kum 13 ' 

 'Class engzat nge i nih tawh ? ' a tih chuan

'Class- VII ' tiin ka lo chhang vat a , a awmdan atang hian min lainat a ni tih ka hre thei . Pawl sarih lek ka ni a , kum 13 chiah ka la ni bawk mahse khawvela ka neih chhun biak theih lova a awm ta mai hi min khawngaih ve takzet in ka hria . 

A zawhna te chu tha takin ka chhang zela , ka rilru lak pen a tum vang te pawh a ni maithei . Min biak dan atang hian a nau mai pawh nilo , a fanu angin min en ni mai hian ka hria . Doctor ka hriat tawh ah chuan ala fel ber ang . 

Chutia kan pahnih a kan thut reng lai chuan hmeichhe pakhat hmeltha deuh mai hi kan lam panin a rawn kal a , vawileh khatah Dr Noel hmel chu a êng nghal vek in ka hria , a hlim a ni ber . 

Kan bulah chuan a rawn thu ve nghal a , Dr Noel chuan, ' Tete .... ka hman tep ' tih pahin a kut chu a fawh sak zeuh a . A bula a Lily var bouquet dah chu a pe nghal a .Naupang mawl leh ã ni ta bik lo chuan a bialnu a ni tih ka hrethei nghal . 

' Thu i awih a , i fel viau chuan i birthday kan lawm maithei ni ' Dr. Noel chuan UTetei melh pah chuan a ti a , a ni pawh chuan lo hrethiam nghal in , ' Ni e ... a nuam viau ang ' alo ti ve bawk a .

Minute 10 vel kan thut leh hnu chuan ka nu awmna ICU thleng chu min thlah chho a , ka rilru an thunun hneh bawka chumi tlai ah la la chuan ka pu rual in ka haw ta nge nge a . Mahse a tukah ka nu a thih leh tak si avangin vawikhat mah kan in hmu leh tawh lo a ni. 

★END OF FLASHBACK ★

Dr Noel leh UTetei kha hmu leh tawh lo mah ila tun thlengin an hmel kha ka la theihnghilh thei lo . Tunah chuan an innei tawh maithei bawk . 

Exam kan zawh tawh mai bakah ka ṭhian ten Dr Noel hmuh ve an chak avangin kan ṭhian thum chuan Awmtea scooty ah kan in hnawh khawm a , kan in lam pan chuan kan tlan chho nghal a .

Damdawiin tlang kawng hi a chhiat bakah an la metal ve loh avangin a khu hle a , Scooty alo ṭawng ve bawk nen kan pathum in min zo leh tawh pek lo . A ke hnung lam chu khuar laiah tak a tang tlat lehnghal. 

' Ninawm ' tih pahin scooty atang chuan ka  ṭum thla chhat a , heilai kawng bik hi a chhiat em avangin nawr a ngai ve ziah .

Nidangah a nawr tu a ka tan ziah bakah ka ṭhiante pahnih hi kei aia nu an nih avangin khalh chu ka thlang ta zawka , Awmtea leh Tei chuan min lo nawr ve thung tawh a ni . 

Awmtea hi mipa ah pawh a lian leh rit chi a ni a , Te-i nen thei leh thei lo in kan nawr ziah thin . Nidangah nawr chhuah a harsat theih em avang chuan accelerator chu ka hmet vak vak a , Awmte'an a rawn nawr chiah chu mipa tha tih takah vawilehkhat ah ka tlan chhuak nghal zawt a mahse ka lo in ring hman pek lo , bake ka hmet thut a ka tlu ta rup mai !!! A ri nghak awk ringawt . 

' A na lutuk ' tih pahin ka ban chu ka dawm nghal vang vang a , ka mittui a tlak ṭep laiin min rawn kaithawh pawh tum lo hian an pahnih chuan min nuih tluk tluk a . 

' I ṭha em ? ' min nuih sawh pahin an pahnih chuan min rawn kaithawh an tum a .

' Min lo be suh u ' ka lo ti vin nghal hlar a . 

' Kha i bal vek ania ' tih pahin Awmtea chuan min rawn kuah tho a , ' Phatsan tu ' ka tih leh phei chuan a hma ai zawngin an nuih a za tih mai tur ni . 

Scooty chu a khem deuh tih loh chu chhiatna pakhat mah a nei lo a , ban na chung chung chuan kan in phur chho leh ta nge nge a . 

Damdawiin kan thlen chuan damlo paruk vel hi an lo admit a , Doctor thar a rawn awm vang nge ni damlo in entir an tam sawt riau in ka hria .

Quarter ah thil te kan ei te te phawt a .Ka ban lah chu ala nat em avang chuan ka dah tawm reng a , ka tawrh a chhel bawka a nat thu ka sawi ri leh tawh lo hrim hrim .

Chhun chawlh laiin nidanga a tih thin dan ang bawkin ka nutei pawh a rawn haw a , an buai hle a niang ka pu bulah chuan , ' An mawl hlawm lutuk a , karleh ah Doctor in a hna a  rawn zawm chauh dawn ka tih ka tih pawhin in entir turin an rawn kal lui talh a , kan in ring hman lo a nih ber khu .Zing atangin mawng pawh ka la hung lo ' tiin a phun mawlh mawlh a . 

' Nu Rinte .... kan lo pui dawn che mi? ' Awmtea chuan alo ti hmanhmawh a , nidangah pawh darthlalang nawt leh chhuat nawt ten kan pui fo thin a , kan vawikhat na tur pawh a ni tawh lo . 

' Yesi .... Doctor thar lah khu a strict sia bathroom vel pawh tih fai angai ' a tih takah chuan Te-i nen Awmtea chu kan melh rum ngang mai . 

' Nu Rinte .... Doctor khuan nupui a nei tawh em? ' Te-i chuan tifuh inti zet hian a zawt a .

'Nei nang .... Civil Hospital-a ka thiannu kha chuan bialnu pawh a nei lo a ti ' Ka nute'in a tih chuan ka hlim lutuk hi sawi ngaihna pawh ka hre lo . 

' Ni daih ru ' Awmtea bawk chuan a ti leh a , ka kut ran dan chu a chal ah ka lo va kuk lawlh hman nia mawle . 

' Kei aia naupang chu ka duh lo mahse Evelyn in a star a ' a tih chuan ka zawi nghal vek . 

Evelyn hi ka ni thiannu a ni a BDO hnuaiah JE a nih mai bakah Phullen ah chuan Nula hmeltha leh fel, Kohhran ah pawh in hmang a nih avangin ka hnual nghal vek . 

' Awi .... Richard Pathlawi-a a awm tlata ' tih pahin an nui nghal dar dar a . Ka ni leh Pu Richard-a hi kum 6 dawn an in zui tawh a , keimah vanga la innei lo mai mai an ni te hian ka hre thin . Pathlawi fa pahnih nei tawh mah nise ka nutei tan hian ka duhpui takzet . 

Ka nutei puiin damdawiin chhuat te chu kan thian ho chuan kan nawt faia , Dr Noel a awm vang nge ni ka la ning miah lo . 

Darthlalang kan nawh lai te chuan a khat tawkin Dr Noel chu kan va bih leh zuk thin a , a rawn hawi veleh kan biru lehnghal vat thin a ,  kan hna pawt a sawt hlei thei lo  . 

' Ui .... Caro , Dr Noel chu avan hmeltha em em ' Awmtea chuan a rawn ti leh thin a , a chhiat loh thu leh a hmelthat thu min hrilh reng hian min ti atchilh zo vek dawn . 

Te-i lah chuan , ' Nangchu bialpa i nei tawh a , Dr Noel chu min pe ve tawh rawh ' a rawn tih khoh peka .

Ka chhan leh hma chuan Dr Noel chu a rawn kal thut a , min rawn kal pel pah hian , ' min rawn zui rawh ' ka hriat tawk lek chuan a rawn ti a , ka tih ngaihna hrelo chu ka thiante ka en ha ringawt .

Rang takin kan ṭhian ho chuan kan kal nghal vata , Room chhungah erawh keimah chiah ka lut thung . 

' Tah khan lo thu rawh ' ṭhu tura min tihna ah chuan ka ṭhu zum dui a , mi ti phawr phawr leh pawlawh tak ni mah ila Dr Noel bulah hi chuan ka zum dui mai lawm . 

A ṭhutna aṭang chuan a rawn tho chhuak a , min rawn khawih foul dawn emaw ka tih laiin ka ban , ka dah tawm reng chu a rawn khawih a . Ka na ti chu ka ner nghal sawk thei . 

Ka ti na tih ka hrilh miah si lova , ka dah tawm reng danah hian alo hrethiam pawh a ni mahna . 

'Engtin nge i tih nat ? 'ka ban khawih pah chuan min zawt a , pawn atangin ka ṭhiante chuan , ' Scooty atangin a tla ' an lo ti zut zut a , ka ngei lutuk a a rukin ka kut zungchal chu ka va hmuh zeuh a . 

' A na em? ' tih pahin ka ban na chu na lo te te hian a hmet zel a , X-ray na awm ve hek lo . A na lai tak a hriat theih nan a hmet a ni . 

Ka ban chu hmanraw awm chhun crepe bandage chuan min tuam saka , Card ah damdawi min chawh ho a ziah zawh hnu chuan hming ziah angaih avangin  ' I hming ? ' a rawn ti a . 

Pawn atang bawk chuan , ' Tangkapari ' Awmtea chuan ring zet hian a rawn ti lung lung a , Dr. Noel pawh a nui nghal vur vur a , chu tak chuan min ti zak zual .

Ka hming hi a ṭhing a , mite pawhin an nuihzat thin tih ka hria mahse Dr Noel-a a nuih ve chiah hian ka zak zual a , ka thlan nghal dup in ka hria . 

' A nilo ... Carolyn asin' ka lo ti nghal vat a , ' Tangkapari ni tho mahse ' ka ti chuai zui raih bawk . 

Hming tih inziahna zawnah chuan Tangkapari tih a ziak dawn emaw ka tih laiin Carolyn tih chauh chu a ziak a , ka hming hi ka duh vak lo a ni tih a hria pawh a ni mahna .

' Carolyn.... heihi ei la , i ban kha a dam vat mai ang ' tih kher pahin Card chu min pe a , ka zak lutuk a card chu ka pawtthla pawp a , ka tlan chhuak nghal vang vang a . 

 

Read More

Dr Noel 2 - 3

CHAPTER -3 

A tukah chuan kan exam dawn avangin ka pu in dar 6 velah min rawn kaitho a , nizanah tlemte ka chhiar bak lehkha ka zir loh avangin ka rilru pawh a hah pha lo .Ka thiamlo lutuk hi rilru hah nachang pawh ka hrelo . Eng ang pawn thiam lo mah ila exam hian min tih danglam phah eih lo. 

' Ka tho dawn reng ' mut ka kham loh em avang chuan ka lo ti vin leh hlar tawh a , exam nei dawn mah ila tho ta mai lo chuan ka mu leh nghal hmak .

Dar 7 velah ka nutei in min rawn kaitho ve tawh thung a , ka nutei hi chu ka hlau ve deuh bawk nen ka mu lui ngam tawh bik lo. Peih lo deuh leh mood uih zet chung chuan ka tho tum bur a . Nizan ah lah V-a nen kan in biak tui laiin internet pack a zo daih lehnghal a, tum ang hian thil hi a kal hlei thei thlawt lo . 

Ka nute'in min tur nasa viau na in ka insiam zawh meuh chuan alo tlai leh tawh hle a , ril tam a kal ai chuan tlai pawh thlang hmak thin kha ka ni a ,chaw ei tura dawhkan ka kil chiah chu ka nutei chuan 'ei suh i tlai dawn' tih melh hian min lo melh a .

' Eng nge ? ' ka ti nghal ringawt a . 

' Exam lai tal hi chuan tlai loh tur ' tiin min rawn khak leh tawh .

' Ka tlai dawn hleinem Awmte'an min rawn sawm dawn ' ka lo ti nghal vat a , ṭawngthei min ti leh ngawt ang .

Ka nutei hi chhang zawt zawt thin mah ila a thin a rim tak tak tawh hi chuan ka chhang ngam ngai bik lo . Bakah ka nu boral atang khan min enkawl seilian tu a nih avangin ka zah in ka hlau em em a , ka pu nen hian he khawvela ka neih chhun te an ni . 

Ka nutei bawk chuan ' Science stream ah Batch hmasa ber in nia , i fail bik chuan i zak dawn nia' a rawn ti leh a , ka rilru in ka zak leh chuang lo ang tiin ka lo chhang leh hman tawh . 

Phullen ah hian Arts stream chauh a awm thin a , kumin atang hian Science stream an rawn siam tan avangin batch hmasa ber kan ni a , hmanrua a tha lo in engkim mai chu kan ti ve naw naw a ni ber . A tir atanga Arts lak tum ka ni a mahse ka nute'in Science min lak tir luih avanga peih lo chung chung a zir ve mai mai chauh ka ni . 

' Pu internet pack a awm tawh lo a , min lo thun sak ' chaw bar mawlh mawlh pah chuan ka ti a , ka nutei ngaihdan alo ni leh tawh lo ngang mai .

' Ka pa thun reng reng suh , exam zawh hma loh chuan i phone pawh thukru hmak rawh ' alo ti nghal zung zung a , chutah ka pu lah chuan , ' In exam zawh veleh kan thun dawn nia ' alo ti ve bawk nen , ka lungawi lo takzet .

Ka pu hian tun thlenga min la hauh lo danah a zu kan ru tih kha ala hrechhuak lo aniang. 

' V-a lah kha in la inzui emawni , khapa kha mi tha a ni lo ania' ka nutei chuan a ti a . 

Phone chungchang sawi tawh hi chuan V-a hming hian a chhunzawn ngei ngei . Kei ngei pawh hian mipa lerh leh thalo a ni tih ka hria mahse kan khua ah na nã na hi chuan rawlthar zingah a chhelo pawl leh a hmeltha ber , luck ber a ni hial ang . A zei in a luck bawka ka ngaizawng thei hi ka lo in tih theih ruk mah nak laiin ka nutei hian a duh lo em em mai bawk si , a buaithlak a nih hi . 

Ha ka nawh zawh veleh ka kam ka thuah sawk sawk a , ' Ka kal dawn' ti leh chhuah ka rual nghal a . V-a nen in then tura min tih tawh hi chuan ka ngaithla peih thlawt lo . 

Kan school ah hian class XI leh class XII chiah a awm a chutah khaw chhung atangin minute 15 vel kal ala ni zui . Kan awmna damdawiin quarter atang phei hi chuan a hla lehzual a , ke a kal phei chuan minute 30 dawn kal vel a ni ang . 

Awmtea nen scooty tawng tawkin school lam panin kan in sawh thla bawp bawp a, Te-i erawh in sikul an hnaih deuh avangin Sikul ah min lo nghak tawh thung . 

Sikul kan thlen rual rual in Te-i chuan , ' In van tlai em em ? Carolyn eng nge news chu ? Doctor thar chungchang vel chu min hrilh vek rawh ' alo ti nghal bawrh bawrh a , hrilh tur ka ngah lutuk hi ka sawi zawng pawhin ka chil a phuan bawrh bawrh thei ang .

' Exam zawh ah ka hrilh ang che u ... V'an min lo nghaka , ka va hmu lawk ange ' tih leh kal ka rual a .

V-a pawh hi kan sikul ami tho a ni a , a ni erawh Class-XII a ni tawh a Arts a la bawk a ni . 

V-a nen rei pawh kan in hmuh hma chuan dar a rawn rik avangin exam hall ah kan lut nghal a , engmah zir lo mah ila tun thleng hian ka rilru ala hah thei chuang lo .

Class -VII ka nih thleng kha chuan class ah a thiam thei pawl ka ni ziah thin a , lehkha pawh ka zir taima hle thin mahse ka nu in min thihsan atang khan nun hian awmzia a nei in ka hre tawh ngai lo a , rilru hahna nasa tak ka neih phah bawk nen khata tang khan engkimah hmasawn lam aiin a hnungtawlh zawngin ka kal zel a , tun dinhmun hi ka thlen phah ta a ni . 

Exam a zawh meuh chuan kan thian ho chu kan in hmu khawm leh tham tawh a, kan thiam lo tlang bawk aniang nge exam chungchang kan sawi ri leh tawh lo hrim hrim . Awmtea phei chuan a thutpui pa a star thu bak sawitur a rawn nei lo . 

' Tumaw doctor thar chu ? ' Tei chuan a hriat chak em em chu min zawt leh ta nge nge a .

' Dr Noel a nia ' ka tih rual rual chuan , ' Engmaw !! i Dr Noel kha maw!? ' an rawn ti rual nghal thawt ringawt .

Ni e , Ka sawi ve ziah thin Dr. Noel ngei kha a ni . 

★FLASHBACK ★

4 Years Ago 

Ka nu chu stroke avangin Civil hospital ah kan luhpui a , ka nu unau neihchhun ka nutei chuan ka nu chu a riahpui thin a kei erawh ka pu in min awmpui thin thung a ni .

Thil hre vek rual ka nih tawh avangin zantin ka nu ngaiin a rukin ka tap thin a , sikul ban veleh damdawiin ah ka tlawh haw ziah thin bawk a ni . 

Tlai khat chu ka sikul bang chu phur takin ka nu hmu tur chuan damdawiin ah ka kal kawi leh a , naktuk mai hi ka birthday a nih tawh avangin nidang zawng aiin ka phur zual a , a chhanchu ka nu hian kumtin thil pek min pek thin vang a ni .

Damdawiin ka thlen chuan ka lo phur ve tawh tehreng nen ka thu hriat chuan min thawng takzet . Ka nu hian lung thalo a neih sa tawh avangin damdawiin ka thlen hma deuh khan nikhaw hrelo in a lo awm thut a , ICU ah an lo dah chu niin . 

Ka nutei chuan tap insum tih hriat tak hian ' Bawihte ... ' tih pahin min rawn kuah a , tap lo mahse a tah a chhuak hle tih ka hre thei . Naupang mai mah ni ila engkim kha ka hrethiam vek tlat .

' Anu chu ka hmu duh ' ka lo ti bul hmuk a, ka luhlul bawka vawikhat pawh ka mittui ka ti tla lo .

' Bawihte ... i nu , i nu chu a biak theih hrih loh , oxygen a hip angai a nakin ah kan be dawn nia ' tiin min hnem mahse ka nu chu biak theih loh in nikhaw hrelo in a awm tih ka hre ve kar , a chhanchu an tawng ri ka hriat vang a ni . 

Haw a hun tawh hnuah pawh haw ka duh loh avangin ka nu awmna ICU room kawtah chuan ka thu tlat a, ka nu rawn harh hma loh chuan haw ka tum lo . Ka nutei pawhin tihngaihna a hriat loh avangin ka bulah chuan a rawn thu ve ta ringawt a , a rukin a tap a rap a ni tih kei kum 13 lek pawh hian ka hre kar a ni . 

Read More

Dr Noel 2 - 2

 

Dr Noel 2

(I LOVE YOU 3000)

Chapter -2

Ka nutei a rawn la haw lo bawk nen chokidar Pu Rama tih loh ah damdawiin hrechiang ber tu ka nih avangin Pu Rama chuan min rawn ko lut nghal vat a.Current a awm lo bawk nen phone light bak eng a awmlo. 

Dr Noel an chhuar hawn kual paha thil a zawn vel lai chuan khuamah chuan tlangval pakhat ke thi hnuang hi an thut tir a , thi a chhuak nasa bawka an hup beh chung pawhin thi ala rawn hnam chhuak thei nia mawle . Pakhat ve thung chu a chal a ti kak aniang Pu Rama chuan a chal chu puan hian alo hup sak ve thung a . Midang pahnih rawn kal ve erawh in ṭangkaina an nei lo,an tih tur hrelo chu an lo ding reng ringawt . 

Hliam tuar te hi an hmel atang pawhin khawdang an ni tih ka hre thei nghal a . Engtia chesual nge maw an nih ni. 

' Khawiah nge kutkawr ,forcep leh bakcheh a awm , hmanraw dang ho pawh hi khawiah nge i nute'in a dah ?' ruah a sur bengchhen em avangin Pu Rama chuan ring zet hian min rawn zawt a ka hriat loh thu in ka lo chhang vat thung. 

Ka nutei hi a buai theih em avangin ka pui ziah thin a, hmanrua pawh hi keima tih fai leh dah te vek a ni a mahse ka dahna ka hrechhuak zo tawh tlat lo . Ka lo kai ve bawk nen ka chiang lo ruai mai . 

'Ngaihtuah rawh khawiah nge hmanrua ho zawng zawng i dah? ' Dr Noel chuan ka dar tawn tawn ah vuan in min rawn zawt a ,hriatchhuah chu sawi loh ka theihnghilh  tulh tulh zawk in ka hria . 

' Ih ' ka han ti kual vel a , min rawn hnim danah ka rim chu a hria tih ka hre thei nghal .

' Tunah kan mamawh tawh ania' Pu Rama chuan alo ti ve bawk a. 

Meng si sap chung hian' Ka... ka hre chhuak thei tawh lo ' nuih pah hian ka ti leh kher a, Dr Noel thin in a tuar ta lo bathroom ah min pawt lut a ,tui bucket khat chuan min rawn leih ta mai . Ka harh deuh kawk in ka hria . 

Ka hriat thin Dr Noel -a kha a ni ta lo emaw ka ti hman hial . Ka hriat thin kha chu a fel in mi zaidam tak kha a ni si a . 

' Mami .... tikhan i hrechhuak thei tawh em ? ,a pawimawh ania ' zaidam tak hian min zawt a , a hmel erawh a dur khup thung intih nulat ve tawh nak laiin naupang en in min la en zui .

A thinrim lutuk a insum mai mai  ani tih hai theih a ni lo .

A hmanhmawh nak alaiin hriatchhuah tumin ka lu chu ka han dawm vang vang phawt a . 

' Ka chhum hnuah ka thur chhuak leh a.... E... ka hrechhuak chiah ' ka tih rual rual chuan min kai chhuak nghal dawr dawr a , a kut lehlam in a phone light chuan kawng a en pah bawk a 

' Khawi room ah nge a awm ? ' tih pahin a en kual zel a , a hmanhmawh lutuk a ka hmanhmawh ve zo vek .

Hmanrua ka dahna Store room ah chuan ka hruai lut a , engmah ka sawi hma hma in a enkual nghal zung zung a.

' A dang ala awm em ?' tiin min zawt leh a heng ho chauh hi a awm thu a ka lo chhan rual rual chuan a thinrim thut a kawngkhar chu a khar ta ṭhuai mai . Ka phu nghal zawk ringawt . 

Ruah a do na lamah a huh zawr vek lehnghal a , chhuatah ala far tluk tluk zui .

Beidawn hmel zet hian ' Hmanrua engmah a awm loh hi ' a ti hul hak a . Chhan ngaihna ka hre lo .

Hmanrua awm ang ang chu tray faiah  forcep hian a thur mawlh mawlh a , hmanhmawh takin a kal lehnghal daih a , a hnungah ka zui ve nghal dawr dawr a .

A lu a hliam awm zawk chu hmanrua awm ang anga a tih fai sak lai chuan Pu Rama chuan Dr Noel bulah chuan , ' Rinte-i chu ka be tawh a , ruah a sur nasat em avangin lei min in a dang a nih chu ' a rawn ti ta mai a . Ka nutei lei min in a dan daih chuan hliam tuar te hi Dr. Noel an amah chauhin a buaipui angai dawn a ni maw ! A vawikhat rawn kalna a ni a , damdawiin chungchang engmah a hre bawk si lo. 

' Catgut hi khawiah nge a awm? ' min rawn bia a ni tih hai rual loin a tawng pah chuan min rawn en a .

' A awm lo ' ka lo ti heu mai . A tih ngaihna hrelo chu a thaw chhuak nghal hak a .

A thuina tur ber Catgut a awm bawk si lo , thi a chhuak hnem tawh bawk si .Damdawiin hnai ber Saitual ah kalpui dawn se leimin in kawng a dang bawk nen Dr. Noel hi a beidawn hmel takzet . 

A rawn kalpui tu pakhat zawk chuan mangan hmel tak hian 'Ka pu engtin nge kan ti tak ang? ' tiin a rawn zawt khoh pek a . 

Hmanrua awm bawk si lo , damdawiin hnai ber lah a hla bawk si Dr. Noel thinrim chuan damlo hriat phak si loh hian ' Hrui in kan ṭawn anga ni mai lawm ' a ti ta mai . Pu Rama nen chuan kan hlauthawng chu kan in melh hrek ringawt . 

A nihna takah chuan ka nutei thiam loh vek pawh a ni lo . Doctor hmasa zawk kha hetah a awm ngai lo a , engkim nurse kutah a awm ta vek a ni . Doctor tello chuan Nurse ringawt chuan thu an vaw thla thei bik si lo a , damdawiin hian engmah a neih loh phah ta a ni . 

' Taka ... kan vawk chhul kan lakna hriau kha a la awm asin ' ka ti chhuak hlawl a , idea tha tak a ni em tih erawh ka hrelo .

' Tui sa ah kan thlak anga ,a hman theih mai angem ?' Pu Rama pawh chuan alo ti ve bawk a. Chu thu a hriat chuan Dr. Noel hmel pawh hmuh a nuam leh ta deuh alawm . 

Ruah sur karah chuan hmanhmawh takin kan vawk thuina catgut bang la tur chuan Quarter ah ka tlan chho nghal hlawk hlawk a , a nal in a diak bawk nen ka chapal bun lai chu ka la tlansan zui . Ka let leh lamah ka la mai ang tih rilru pu ran chung chuan ka chapal chu ka tlansan daih a ,ka hah lutuk chu thawk pawh ka thaw tha thei lo.

Zu ruih nen hah nen ka luak lo chauh . 

Bang kil kara ka pu catgut dah paw zet mai chu ka la a , eng mah ti kawi lovin damdawiin lam pan chuan ka tlan let leh vang vang a ,ka chapal pawh ka hre chang tawh lo.

 A nal ka tih tawh kha , damdawiin kawt ah tak chuan ka la tawlhthlu pawp zui . Na sawi hman pawh a ni tawh lo , ka tho sawk sawk a inchhungah ka tlan lut nghal a.

Dr. Noel an a endik hnuah chuan kan chhuang so nghal bawrh bawrh a . Duh vak lo mahse a dang a awm miau si lova , a pawm mai angai a ni .

Hliam a thui lai chuan catgut lo chep chat turin bakcheh keng tai chungin ka lo inring ran a , Pu Ram'an torch light in alo chhun thung .

' Chep chat rawh le ' a rawn tih rual chuan chep chat tura a tih na laiah chuan ka zuk chep a mahse bakcheh a bil em avangin a chat thei ta reng reng lo mai . 

Dr. Noel chu nin hmel zet hian a han thaw halh a , Pu Rama nen chuan kan in melh leh hrak tawh . 

Vawithum vel kan cheh takah chuan a chat thei ta hram a , a hriam zawk pawh a awm renga a bil zawk ka laksual vang vek .

Uluk taka a thui mawlh mawlh lai chuan ka tlan hah bawk nen ka thil in khan min rawn ṭhing let ṭan a , ka pum atang chuan min rawn pump nghal up up a , ka luak chhuak lutuk chu ka chil te a rawn rial a , ka sawi ngam bawk si lo , a rukin ka uak ka uak mai. 

Hliam a thui zawh vek tawh hnuah an pahnih chuan damdawi a chawh nghal a, naktuk lama damdawiin lian zawk lama kal turin a ti nghal bawk a . Enkawl zui duh pawh nise enkawl na tur a awm miau loh avangin lungsi lo deuh chung chuan a haw tir ta ringawt a , ka thaw nghal huai bawk .

Damlo an chhuak chiah tih chuan ka ban chu a rawn en thut a , ka in ring lo bawk nen ka lo in dang nghal ṭung a . 

' A pilh a nih hi ' tih pahin a tifai nghal sawk sawk a , betadine chu min hnawih sak nghal a , min rawn khawih avang khan ka mur nghal chuai thei nia mawle . 

Aw khur dur dur chung hian , ' Nichinah khan ka tlu a ' ka lo ti sep a , ka ke lah chu a berh em em mai lehnghal a chutah chapal khing ka la bun lo zui . A ruk tak chuan ka zak chem chem mai. 

' Haw tawh rawh i nu leh pa ten an lo ngaihtuah tawh ang che ' a rawn tih chuan a rukin ka nui a , naupang ang maiin min en leh tawh . 

Buk nghat pahin ka tho nghal a , ka chhuak tur chu , ' kha ei rawh ' tih pahin damdawi mum 1 hi a rawn theh phei a, mak ti takin ka lo dawng chat a .Zawhna ka zawh hma chuan , ' I penṭawng nat lutuk loh nan' a rawn ti leh kher a , ner sawk pahin ka chhuak nghal vang vang ringawt. 

Ka tih reng kha , zu rim kha a hre tlat a ni . Ka zak lutuk hi thih nawn awn awn mai te ka duh . 

Ka-te tho tawh rawh ka pu in a rawn tih sek takah chuan ka ṭhu chhuak nghal hawl a , mutthluk pah chuan ka ṭawngtai nghal bawk . Ka ṭawngṭai rei deuh nge ni ka pu bawk chuan min rawn kaitho leh a vin zet hian , ' ka ṭawngtai ' ka lo ti hlar a .

I ṭawngṭai rei lutuk chaw kan ei dawn tia phun phei mawlh mawlh pah chuan room atang chuan a chhuak nghal a . 

Ka lu chu a na kher mai , ka tui lah a hal em em mai bawk si .Vin zet hian ,' ninawm' tih pahin ka tho chhuak ta nge nge a .Sana ka en nak chuan dar9 alo ri tep tawh chu niin . 

Ka nutei leh ka pu chuan chaw an lo ei mek a , in phih hmasa ta lo chuan ka va kil ve nghal a . Lu nat nak alaiin ka nutei phun bak hriat tur a awm leh tawh lo.

Ka nutei chuan , ' Sorkar hian min thlahthlam lutuk a, kan Doctor hmasa lah kha a awm ngai bawk si lo keini tan tih ngaihna a awmlo . Bungrua kan nei lo pawh hi kei deuh hian asin hrehawm ti ' tiin a phun zui mawlh mawlh a .

Ka pu pawh chuan , ' Chu Doctor thar chu karleh a rawn kal tur ang khan i sawi si a' tiin a zawt a .

' Min hrilh lawk hmasa lo in nizan ah a rawn thleng thut a, keini lah leimin in min dang bawk nen , tukin zingah min hauh hrep kha damdawiin in bungrua a neih loh lutuk avangin ' ka nutei chuan a ti tan tan a .

' Doctor tha tak a nih dawn chu , kum tamtak hnuah Doctor tha kan nei ve ta nge nge alawm ' ka pu in a tih chuan ka nutei chuan a thlawp tih hriat nan a lo bu nghat a . 

Nichin khan a hauh hrep thu a sawi zo chiah a , a huat vak ka lo rin laiin an fak leh ang lawi a . Ka nutei hian damdawiin hi a hmangaih takzet ani tih hi kei mimawl ber pawh hian ka hre thei . 

'Bawihte ... in exam tur chu i thiam tawh em? ' ka nute'in min rawn zawh chuan nakina ka zir tur thu in ka lo chhang vat a .

' I zir hma in Dr. Noel-a awmna quarter khi lo han phiah fai sak rawh aw ' a tih chuan ka phur leh lutuk a , ka helhhawlh nia mawle .

Ka nutei damdawiin ah a kal chiah tih chuan thleng pawh sil lovin room ah ka tlan lut nghal a . Ka nutei makeup ka hman sak a , chutah ka jeans kekawr zinga nalh ka tih ber mai leh ka jacket thul khung leather jacket ngei mai chu ka inbel a . Hmun phiat tur chuan hmunphiah nen Dr. Noel quarter lam chu ka pan chho a . 

Minute 4 vel lek kal mah nise ni a sat mai bakah ka in thuam lum bawka , ka thlan a luang nghal zawih zawih mai .

'🎼Noel Noel ' tih hla sa rat rat chung chuan kawngka chu ka kik karh karh a , vawithum ka kik hnuah pawh ala rawn hawng lo .

' A lum si ' phun pahin ka thlan chu ka hru a , kik nawn leh ka tum lai tak chuan a rawn hawng thut a , rang lutuk in ka ding ngil nghal zawt a . Ka sam chu inla no zet hian hnung lamah ka theh phei nghal hnap bawk . 

Tshirt plain var sar leh kekawr bul dum hi a ha a, kan khaw awmdan nen pawh a in chei mil thlap bik mai . 

 

' A nute'in han phiah sak rawh min tia ' tih pahin ka hmunphiah ken lai chu ka hmuh nghal a , mak min tih hmel takzet.

' A ngai lo , ka lo ti mai ang ' a tih rual rual chuan , ' Maimawm ril pawh hi ka lo hawl fai ang ' tih pahin inchhungah ka lut nghal a , a tawng ve hman meuh lo .

Chutia lut tura min sawm lo chung pawha ka luh luih takah chuan tihtur zawngin ka hawi kual nghal ruai a . An luah lohna a rei tawh bawka a paw ṭha khawp mai. 

Phur zetin hmun chu ka phiat tarh tarh a , Dr. Noel pawhin tih ngaihna a hre bik lo aniang ngawi rengin thil dang chu min tihsan daih a . Ka chet zawng ringawt pawh hian a lum lutuk a ka thaw a chham mai dawn in ka hria . 

Ka thlan nasat em avang chuan , ' I jacket kha i phelh duh chuan hetah hian i dah dawn nia ' tih pahin chair fai chu min rawn kawhhmuh ringawt a , min rawn hrilh ve ringawt nachhan pawh hi ka hrelo .Phelh ta lo chuan ka ha tlang ta tho a, thlan huh vek mah ila chhelo ka in ti miau a , phelh ka tum hauh lo .

Hmun ka phiah lai te chuan kun alo ngai bawk nen ka kekawr chu ka pawt chho sek  a chu chuan min ti hah zual . 

' Doctor hmasa kha a awm khat lutuk a , a quarter pawh hi a bal vek a nih hi ' tiin ka tawng siam siam renga , ngawi rengin thil tih pahin ka thusawi chu alo ngaithla a , ka rin aiin a ṭawng duh lo .

Ka tawng bawrh bawrh lai chuan Dr Noela thil phawrh chhuah atang chuan chukchu pathum hi a rawn tlan chhuak thut mai a , ka zia ka thup hman tawh lo rang lutuk hian a hma ah tak chuan chukchu pathum chu ka kut hlap chuan ka beng pherh ta vek mai a , ka chet dan mak a ti lutuk chu a mengphawk kawk in ka hria , chutah a khi zui nghal vur vur bawk . 

Ka zah leh hnuhnawh avang chuan  ' Ih... ka phiat zo a, ka kal mai ang' tih leh thawh ka rual a ,hawi let lo in ka kal chhuak nghal vang vang a . 

@remruati_haylor

Story hi ni khat danah ka dah dawn a , ka hman dan zirin zan zawn pawhin rawn dah zeuh zeuh ka lo tum dawn nia . 😉

 

Read More