ZERO-51 BY Remruati Bawitlung(Haylor)

Chapter-51

A khalh chak em avangin hma lam melh kar pah chuan ka ṭhu khar a,nghet takin seat belt ka kuah ṭai bawk.Kan hma a motor tlan ho chu kan tlanpel zung zung hlawm a, kan lam pana motor an rawn tlan apianga a kawi leh zawk ṭhin avangin ka hlau ru hle bawk. 
"i... i khalh muang..... "ka sawi zawh hma hma in kan hma zawn ah tak hian motor light eng zetin min rawn chhun pup avang chuan ka mit hliah pahin ka ṭe nghal tuarh a, motor dang nen kan insu emaw ka tih vek tawh hnuah car chu a rawn ding thut a, a ri nghal tuarh bawk. 

Hma lamah ka bu nghal lawp a, ka hlauthawng tih mai loh chu na ka neih awm pawh ka hre lo ka chiai ani ber mai. 
"hreptak chuan.... " Arden aw ka hriat rual rual chuan ka hawichhuak nghal vata, kawng sirah fel takin kan lo ding then tawh chu niin. 
"mo... motor kha.... " 
"kawng en nachang pawh hrelo, motor khalh tlak pawh an ni lo.." a tih takah chuan sawi zui vak ka tum lo, ama thiamloh ah midang a puh mai mai ani. 

Ka thinrim bawk si ka hlauthawng bawk nen hetiang ringawt hi chuan ka chuang thei tawh lo ang,car kawngka hawn pahin ngawi rengin chhuah san daih ka han tuma mahse ka ban ah a rawn vuan hman. 
"khawiah nge kal i tum?"
"en ta che... chuan reng na chi pawh anih tawh loh hi... " 
"i hlau mi?  hahh... engthil mah a thlen loh hi... " 
"min thlah rawh... subway in ka rawn haw mai ang " tih paha ka kut ka pawh thlak pawp rual chuan ner nghal sawk a,thil diklo a awm ani tih ka hre nghal bawk. 

"Ngatinge i kut kha a na em ni? " 
" Engmah ani lo?"tih pahin a steering chu a han hum vang vang a,a na tak tak lo emawni le? 
"khawimaw rawn la teh? "ka ngaih a ṭhat zan loh avangin a kut chu ka han pawt sawk a, ti lang lo mahse a na bawk aniang a ṭang theilo hrim hrim. 
"damdawiin ah kal ang... "
"ka duh lo " 
"ok... a nih chuan keimahin ka kal anga nimai lawm... "
"na i nei em ni, i in sawh na lo tiraw?" a hma zawngin min zawt der silo. 
"ka insawh nat em kha internal bleeding pawh ka nei maithei asin.... "ka tih takah chuan a hlauthawng ve deuh te pawh aniange, ngawi rengin car a ti nung a, damdawiin lam panin kan tlan ta nge nge a. 


★HOSPITAL★

Xray result nghah pahin ṭhuthleng ah inhlat deuh tak hian kan ṭhu ran a a tu amah inbiak hmasak bik ka tum hek lo inhmelhriat ngai miah lo te pawh kan ang zawk. 
" i insualna tiraw....? " tih sap pahin ka va melh zeuh a min chhan tum hmel pawh a pu lo, a melh ngai a melh renga a in ngaihtuah ngut ngut bakah a rilru a hah hmel em avang chuan biak chhunzawm pawh ka tum tawh lem lo. 

Chutia kan pahnih chauha ngawi renga kan ṭhut reng lai chuan sana ka han melh zeuh a result lam hun alo ni der tawh. 
"result kan lam tawh dawn mi niang " ka ṭawng zawi nge a hre lo der pawh ka hrelo,a ṭhut ngai angin a ṭhu reng ringawt. 
"doctor in minute15 hnu ah rawn kal rawh u a ti sia... hei kal a hun tawh" a aia ring deuh hlek chuan ka han ti leh ngat a, a rawn hawi ta nge nge alawm. 
"awle "tih pahin a tho thut a,nghah pawh min nghak lo in a kal nghal nal nal ringawt. 

"enge maw a hriat le?  a phone a theihnghilh tih pawh a in hre lo" tih nung nung pahin ṭhuthleng a Arden phone thlauh chu ka la a,call a dawng lehnghal. 
"he phone number bawk chu...." nizan a rawn call tu bawk kha,hemi number aṭang hian miscall a tam mai bakah Arden hian pickup ngai bawk si lova a pawimawh lo anih ringin ka reject ve hmak ringawt.  

Doctor room ka thlen rual rual in Arden chhuak lam nen kan intawk leh hman,"eng nge.... " tih bak ka sawi hman lo,a kal liam hman daih anih chu!! 
"umm... Doctor eng nge a an? a ṭha tiraw? " Arden hmel awmdan aṭang kha chuan ṭhat hmel pawh a pu lo. 
"a ban ruh a khik mai bakah rei tak a enkawl loh avangin zual lam a pan zela, zai mai angai ang " ṭha deuhin min lo chhang ve mai bawka. 
"anih... engtin nge a tih?" 
"a lan dan chuan zai a duh hmel loh... mahse zai anih loh chuan a kut hian ngai a awm thei tawh lo ang " ka mit nghal sawlh ringawt, kei a tuar tu pawh nilo hi hetiang anga ka nat chuan Arden phei chuan na avan ti dawn em? 

"awle... ka hrethiam e" chhuah mai ka han tum a, doctor bula hmeichhe pakhat lo ṭhu ve chuan, "ani khan Depression a nei em?" mak tih hmel zetin ka melh nghal kawk ringawt. 
"maw!!... ka... ka van hre mai lo " engvanga min zawt thut nge maw anih le? 
"umm....psychiatrist panpui ve hrim hrim la a ṭhat ka ring"ka rin dan chuan amah hi Psychiatrist anih hial ka ring hetiang min zawh danah hian.Chhan dan tur pawh ka hrelo buk nghat pahin damdawi an chawhna lehkha chu ka la a ka chhuak nghal vat bawk. 

Pawn ka chhuah meuh chuan kawtah car nen min lo nghak ran tawh a, Arden hmel ka hmuh hian ka ngaihtuahna a kal thui takzet. Engvanga luhlul leh tawrhchhel em em nge maw anih le, nizan ah pawh khan no takngial pawh a hum nghet zo tawh lo kha ani a, tunah la engmah thleng lo ang maiin motor a la khalh lui tlat chu ani si a, engvanga a natna leh rilru natna te hi sawi chhuak duh miah lo nge maw anih le? 
"subway in kan haw mai dawn mi?"
"ka kut lehlam chauh pawhin ka khalh thei tho alawm " kha leh chen kha kut na chungin a khalh thei tho tih hre mah ila amah ka ngaihtuah vang zawk ani reng si a. 
"mahse..... awle a ṭha e " a tih luih leh theih dawn loh avangin tihian sawi buai lo in chuang hle hle ila a ṭhat zawk ka rin avangin ka ṭhu lut nghal ṭhak a,tunah tak hian motor khalh thiam ka chak takzet. 

In kan thlen meuh chuan ka thaw nghal huai mai ,khalh chak lo mahse thin thi in ka awm lo hrim hrim.Arden an car garage a a hung ṭhat lai chuan ka lo luhsan daih a, engtin nge inzai turin ka thlem ang tih bak ka ngaihtuah thei tawh lo, engpawh chu nise a ka tum ve hrim hrim tur ani. 

Khuma ka lo ṭhut kun lap lai chuan ngawi reng hian a run lut a, in hmelhriat miah lo ang hian engtik thleng nge maw kan awm dawn le? 
" ngatinge hetiang hian i awm?" rei fe a ngawih vang vang hnu ah, "engtin maw ka awm?" tih bakin min rawn chhang lo, hetiang ringawt hi chuan engmah min hrilh dawn lo ani tih ka hriat avangin a hma ah tak ka va ding ran a,a kut hum vang vang pah hian,"ka hnenah sawi duh pakhat mah i nei lo em ni? inzai chungchang tal pawh ,hriat ve ka phu lo em ni?" a mit ah tak ka en chho kar a "engkim min hrilh vek rawh, engvangin nge hetiang ang hian kan awm, hlim tur kan ni asin inpehhel tur nilo in.... tun atang chuan zep awmlo in inngeih takin awm tawh ang" a hawi sawn daih avang chuan thei leh thei lo in a hmai chu ka han khawih a ,"ngatinge inzai i duh miah loh a?" a hmuiah ka han fawp zeuh bawk. 

A hmel aṭang chuan thil min hrilh duh a nei ani tih hai rual ani lo, mahse ka sawi tawh ang khan a theih chen chen zep tum tlat ṭhin mi ani.A chil lem dak pahin ka kut chu a dah thla riai riai a, tukverh lam hawi daih pah chuan thawk a han la kawk bawka. 
"MMA league ah ka tel... chuan karleh chawlhni hi final ani tawh" a ṭawng chhuak ve ta!!  mahse chu chuan min ṭhawng kher mai. 
" M.....MA maw?!!" ka dang a awk nghal vek, ka hriat miah loh in MMA league ah alo tel amaw!! chu chu thuhran nise, hei vang hian maw inzai a lo duh loh a!!  nilo... ka inbeng dai hram hram tur ani, a bo daih ṭhin nachhan kha zep miah lova min hrilh avang hian lawm zawk tur ka ni .

"ngatinge min hrilh mai loh.... " 
"min chhuahsan ka hlau ani " 
" nilo... nilo.... " zaidam tak hian ka kut pahnih in a hmai chu ka han dawm a ," i thil tui zawngte hi tilo turin dan ka tum reng reng lo che.... mahse i hmai vung bur te, thi sung te leh duk chur te ka hmuh hian ka hlauthawng ṭhin asin...  Arden a rorum mah mah ani,i hlau ve lo em ni?" ka ṭawngkam avang chuan a rawn khi suk a, boruak pawh a zang phah sawt in ka hria.
" mahse nuam ka ti alawm ..." 
" anih i kut ve thung hi... zai anih loh chuan.... " 
" nilo....  karleh lawk hi final ani tawh a ka inhnuk dawk thei lo "

"mahse zual lam a pan zel hi " Arden luhlul lutuk leh tumruh lutuk hian ka hnuk a ti ulh dawn alawm mawle. 
" a pawilo....match hmasa ah pawh engtin mah a awm lo.... " 
"zai chu i duh lo tak tak amaw? " ka tih chuan a bu nghat a,a ruk tak chuan a in tih nat belh ka hlau takzet.Ka tihngaihna hrelo chuan nghet takin ka han kuah ringawt a,a inhnuh dawh hlau lutuk hmel ka hnuh hian tawpsan turin ka hrilh ngam thlawt lo. 
"anih... MMA zawh veleh engpawh thleng se i inzai ang tih min tiam rawh... " 
"awle.... " a tawp a tawp ah Arden kha a rawn let leh ta,a hlim hmel ka hmuh hian ka insum zo lo ṭep ṭhin. 

___________________________________________

★Arden's POV ★

 - 5:30 AM -

Midang kal hma a mahni chauha trainging ka duh avangin hma takah ka tho a,nidang ang lo tak maiin Valentina chu ka bulah alo mu tawh hauh lo, a mu thei lo anga couch ah a riak pawh ani mahna.Ka in phih fai zawh hnu chuan thawm dim thei ang berin ka inha sawk sawk a, bag ah pahin hmanhmawh takin room aṭangin ka chhuak nghal vat bawk. 
"Good Morning.... " tun ang zing karah Tina rawng bawl mek lai ka hmuh chuan mak ka ti takzet, nidang ah chuan tun ang hun hi chu a zanlai vel kha ani ṭhin si a, engvanga tho hma thut nge maw anih le? 
.
"i mu thei lo em ni? " 
" nilo e....kha breakfast pawh ka peihfel tawh...tun aṭang chuan breakfast ei lo in ka kal tir tawh dawn lo che" a mut ala chhuak ani tih a hmelah hai rual ani lo, ham bai bai chungin a thil siam chu ka hma ah a rawn chawp a,ti lang thiam lo mah ila ka chhungril ah hian ka hlim veng veng. 
"va mu leh rawh.... " ka tih chuan a t
nui awi tap ringawt.A awmdan aṭang hian a lungawi vak lo ani tih hre mah ila, amah ka ngaihtuah avanga sawi ka nih avangin sawi sual neiin ka in hrelo. 

" ughh.... tlaiah ka lo nghak dawn che em? " 
"umm... "
" dar engzat thleng? " chu zawhna zet chuan min in tih thiamloh tir takzet mahse Tina hnena han insawifiah vak ngaihna ka hrelo , ka hruai loh ṭhin chhan chu Krissy ang khan tuar ve se ka duh ani tih hi a hriat ka duh lo. 
"ka tlai chuan ilo haw mai dawn nia.... " ka khawngaih avangin min nghak reng turin ka duh tawh lo. Nilo.. khawngaih a!! engthil nge ka ngaihtuah tak hi, henu hi engtik aṭang khan nge ka lo khawngaih tak?  hreptak chuan min ti â thei takngial dawn. 

Ka thil ei pawh a tui tawh nek love, a bula awm tam loh hi a ṭha zawk. 
"ka kal... " tih hmuk pahin ka tho thut a, a ṭawng hma in ka chhuak nghal hmak bawk.Bike ka lak chhuah lai te chuan ka mit sirin hmu reng mah ila vawikhat pawh ka hawi duh lo,nem taka awm hi ka duh lo.Ka insum thei tawh thlawt lo ka tlan chhuah hma deuh chuan side glass aṭangin ka en ta nge nge a, heti khawpa a chunga ka sual chung pawh hian nui sang chungin ban vaiin min la vai liam thei nia mawle, henu hi mi eng nge maw tak chu ani. 
"Arden bye.... " a tih lauh lauh ri chu ka pehhel thei ngang lo, chak zeta tlan chhuah pahin ka ban chu ka vai zeuh a, ka nui ani tih ka inhriat chhuah rual rual in ka ban ka dahthla lehnghal vat bawk. 

MMA Training Centre ka thlen chuan rin ang ngeiin tumah an lo la awm lo, MMA league ah hian ka chak anih hlauh chuan ka lo chak ber ṭhin UFC a tel chu ka ban phak lawka a awm tawh avangin phur ru tak siin kawngka chu ka han hawng chik rawt a, ka kut ka tuam mawlh mawlh lai chuan tu emaw hian light a rawn hmet eng tuarh ringawt.
"wow.... a ropui hle mai, a boruak pawh a nawm hi le " min rawn pan hnaih pahin Ethan chuan ngeiawm zet hian a rawn ti a, helai hmun ah hian ka kal ṭhin tih engtin nge a hriat tih chu zawhna lian tak ani. 

"hetah eng nge i rawn tih dawn? " 
"min phatsan tu hi engtiang chiaha thui nge alo kal tawh tih thlithlai turin mawle "
"han thlithlai ta che" ngeiawm zeta ka chhan let rual rual chuan ka kawrah a rawn ṭham nghal tawn ringawt,ka duh chuan kut ka thlak nghal pawp thei amaherawhchu ú ang maia ka en anih avangin ka kut hmawr pawha khawih ka tum hauh lo. 
" Hmela MMA hi bansan vat rawh....chutilo chuan..." 
"Chutilo chuan eng nge.....Krissy pawhin min lawmpui ngei ang ka let leh hi " 
" khatiang khan ka nau hi chhuanlam ah hmang hauh suh ang che.... " 
"tumah in min dang thei lo " tih pahin a kut chu ka paihthla nghal sawk a "chuan ka thutiam ah ka la ding reng ani tih hria ang che " 

"anih chuan prove rawh....Valentina Garcia hi zuah tawh suh"
"zawimuangin thinlung na takin ka siam phawt ang...chutah chuan a na tuar lo in a thi ang" 
"Engtiklai aṭang khan nge zawimuanga thah chu ilo tuipui taka....nge i hmangaih avangin ila hum zawk... " 
"lo thlir tawp mai rawh.... " tih pahin ka bag ka la lawk a, Training centre chu ka chhuahsan nghal vang vang bawk. 

Anih na takah chuan Krissy vang hian ka thil tui ber MMA hi ka chawlhsan phah ani, mahse ka inchhir ngai lo a chhanchu ka inhliam a hlauh avang leh min hmangaih avanga sawi ani tih ka hriat avangin.
Krissy nen hian kum3 lai kan inkawp hman a,ka hmeichhe kawp hmasak ber anih mai bakah ka nunna hial ani in ka hre ṭhin.Amah ka atchilh em avangin ka thil duh leh tuizawng pawh inchhir na nei hauh lo in ka bansan hmiah hmiah mai zel .Kum naupang te in Ethan te nen kan pathum chuan kan khawsa ho ṭhin a,nu leh pa ka neih loh avangin ka chhungkaw neih chhun an ni hial bawk. 

Kan hmalam hun kan duan lai leh hlim taka kan awm ho lai chuan tlaikhat chu Krissy ruang an chhar thu in min rawn sawi nghing ta lawh mai.Heta ṭang chian hian ZERO misual leh nunrawng chu miten an lo hmelhriat phah ta ani.

Read More