March 16, 2021
Ka nu hmuh an la phal loh avangin Trinity nen chuan inah kan haw ta ringawt a, ka pi erawh ka nu a awmpui hnuah meeting a neih leh dawn avangin kan rualin a rawn haw ve lo thung.
' Aurora airport aṭangin I rawn kal tlang sia I inbual na tur ka lo siamsak dawn che mi? 'Trinity in min rawn zawh chuan ka lo bu nghat a; tun thlengin damdawiin a ka nu tawn nu thusawi kha ka rilru ah a awm reng mai.
Keifer laka ka rilru put hmang hi hmangaihna a nih chuan hmangaihna hian min ti na takzet. Hmangaihna chuan mite a ti hlim zawk tur a ni dawn lawm ni mahse ngatinge kei hi ka nat em em si.
' Trinity ' ka koh chuan a rawn hawi let vata, ka awmdan avang chuan a ngaih a ṭhat loh hmel hle nghe nghe.
' I awmdan hi I ṭha tih I chiang chiah amaw ?' tia min rawn zawh chuan ka awm dawm vang vang pahin ka han thaw chhuak hak a.
' Ka hrelo mahse helai hi a na takzet ' tih pahin ka awm chu ka tuai a, Keifer ka ngaihtuah zawng apiang hian ka thinlung hi ṭham nawk nawk ang mai hian a na.
Rang takin Trinity chu ka bulah chuan a rawn ṭhu nghal vat a, hetianga min khawngaih hmel leh min ngaihtuah hmel a put hian ka hua mahse min hnem tu tur erawh ka mamawh hle thung.
' I rilru a nat vang a nih kha ' a rawn tih takah chuan za lo zet hian ka nui chhuak hak a, ka rilru hi a na ngai lo ti ila dawt ka sawi ang mahse rilru na lutuk awmdan hrethiam lo tur khawp erawh chuan ka rilru hi a na khat in a khauh hle thung.
' Kal tawh rawh, hahchawlh vat ka duh ' ka ti ta ringawt a, hetianga ka awm lai hi tuman min hmu lo se ka duh vang a ni.
Wine in pahin bathtub ah kan ṭhu vang vang a. Eng ang pawhin inthih thawven duh teh mah ila Keifer ka rilru ah a rawn lan zel avang chuan, ' Hmela ka hua che' tih vin hluk pahin wine glass chu ka hmer vang vanga.
Keifer hi ka duh mai pawh nilovin ka hmangaih tih ka inhre tawh a.Tuna ka thinrim chhan pawh hi min duh let ve loh avanga thinrim ka ni zawk mah .
Rosy nen an in kuah lai te kha ka maimichhin apiangin ka mitthla ah a rawn lang a, a aw ri te chu ka bengah a ri nawn tluk tluk reng bawka ka kham hluah hluah.
Engang pawhin kal hla teh mah ila min rawn zui ve zel niawm tak hian ka kal hlat poh leh ka rilru ah a rawn lang ngun a, haw hle e tilo chuan hepa hi ka ngai tawh takzet .
Rei zet ka inbual hnu chuan khumah kan tlu zâl leh vang vang phawt a, chau viau e tilo chuan ka muhil thei miah lo lehnghal.
Khumah chuan ka inlet ka inlet a, ka muhil theilo lutuk thinrim thut chuan ṭhut chhuah hlawl pah chuan, ' Fuck you ' ka ti vin nghal hluk a, mut na ah lehzel hi chuan min thlah zalen ve thei lo emawni le, ka rilru ah a rawn lan zel ni.
Ka muhil thei bawk silo, ka nu a damlo bawk nen ka rilru tawt lutuk tih thawven ka duh luat ah Sebastian chu ka ko ta ringawt a , ka rin aiin a rawn thleng hma .
' Thil diklo a awm em ni tun ang hunah te min koh? ' hlauthawng tih hriat takin ka room ah chuan a rawn tlan lut a.
Nia, dar 3 a ri dawn tawh a rawn kal rawh tih chiah ka sawi a phone ka dah hmak bawka, ngaihṭhat loh hi chu a awm ve rêng e.
' Ka bulah rawn riak rawh ' tiin ka lo chhang ta zawka, mak tih hmel tak hian min rawn en a; hetiang thu hi ka hrilh ngai loh bakah hetiang zawng hian ka la awm ngai lova kei ngei pawh hian hetiang thu ka sawi ta mai hi ka in awi bik lo.
' Thil diklo a awm em ni? ' tiin min rawn zawt nghal vat a.
Mi zawng zawng mamawh ngai lo nia inhre ṭhin kha ka ni miau a, hetianga zawnga min zawt chat pawh hi a awm lo hran love .
'Ngawi rengin ka bulah hian mu la nimai' tih hmuk pahin khumah chuan ka mu nghal hmak a, lehlam hawi chung hian ka mu kawm ngal a. Ngawi rengin a ni pawh chu a rawn mu ve nghal mai bawka.
Sebastian nen hian hun rei tak kan inhre tawh a, mahse Keifer nen erawh thlakhat em pawh kan la inhre lo amaherawhchu Keifer bula ka awm apianga ka awmdan danglam tlat ṭhin ang kha Sebastian bula ka awm hi chuan a awm ve ngai lo.
Rei pawh kan mut hma in Sebastian chu ka lamah a rawn tawlh phei sut sut a, min rawn kuah a tum chiah tih chuan, ' Min rawn tawk hlek chu ' vin zet hian ka lo ti a, a kut a la let leh zâl zâl ringawt.
Mipa leh hmeichhia intawk miah lova mut chu midang chuan hria se â min ti viau maithei mahse Sebastian chungah hian rilru danglam ka pu miau lova, zan hlimawm tak han hmanpui vel hi ka tum lo bur!
Ka mut theih phah mial takin tia ko mai mai ka ni a, heti khawp hian ka rilru tawt lo se chuan ka ko miah lovang.
' Sebastian ' kan ngawih reng avang chuan ka va ko ta ringawt a mahse min chhang lem lo.
' Hey! Sebastian ' tih paha ka hawi let leh nâk chuan a lo muhil daih tawh chu niin ,thawk lak hak pahin ka tho leh ta ringawt a. Zanin chu ka tlaivar leh dawn a nih hmel.
Mahni chauh in choka ah wine ka in ta ringawt a, heng thil zozai hi vawilehkhat ah a thleng rual thut bawk nen keimah chauha hmachhawn hi ka huphurh takzet.
Che deuh sut sut ri ka hriat chuan kan meng nghal siar siar a khua a lo var der tawh chu niin.
Nizan ah khan ka hriat sual loh chuan choka ah khan ka awm sia mahse engvanga khuma mu leh daih nge maw ka nih le ?
Thil hrechhuak thut niawm tak hian ṭhut chhuah zawt pahin ka mutna bul ka en nâk chuan Sebastian chu ruak vekin tui taka a muhil sâk sâk lai chu ka va hmu ta thut mai.
Rang takin ka in en nghal vat a, ka hlauh ang nge nge in keipawh chu ruak vekin ka lo awm chu niin!!
Au chhuah ka tum zet na in Sebastian tih harh ka hlauh avangin thawm ka siam loh nan puan chuan ka kâ ka hup nghal vat a, thawm dim thei ang ber chuan ka tho nghal ṭhem ṭhem a, choka ah ka tlan lut nghal vat bawk.
' Engthil nge maw ka tih le? ' tih sap pahin tui chu ka in nghal khawlh khawlh a, nizanah khan wine kha ka in hnem viau aniang thil thleng engmah ka hrechhuak zo tawh lo.
' Engzat a tam chiah nge maw ka in le? ' tiin ka inzawt thul a ruk tak chuan ka mangang takzet, tuna ka thil ngaihtuah ang hi a thlen loh hram ka beisei mahse kan pahnih in ruak vekin kan mu bawk si.
' Aaa.... Engthil nge ka tih tak hi? ' ka sam keh nawk nawk paha ka lo indem mawlh mawlh lai chuan Sebastian chuan, ' Engthil mah a thleng lo' a rawn ti ta mai a, phut zuk pahin ka hawi let rang ngei mai.
Sebastian hma ah hi chuan hmeichhe chaklo leh derthawng ang taka lan ka duh loh avangin rang takin ka ding ngil nghal awt a, engah mah ngai lo ang maiin ka hawisang nghal vah bawk.
' Engmah a thlen loh chuan a ṭha a nih chu' tih pahin ka intuamna puan chu ka vuan nghet sauh a, nizana thil thleng zawng zawng kha hre chak hle mahila zawh ka tum hauh lo thung.
' I haw thei tawh ang ' tih zui zat pahin ka closet ka pan nghal nal nal a, Sebastian bawk chuan, ' Tunge Keifer Wu chu ni a?! ' a rawn ti ta thut mai, phawk zeta men pahin ka ding nghal chawt a .
Nizanah khan engthil chiah nge maw thleng le?
Remchan zawkna avangin zankhat Dan zelah ka rawn dah anga chuan Sunday erawh ka awl thung ang, chuan fakna mawlh Mai khu aw... Xoxo
