30 days with Mr. Genius -10

 

CHAPTER -10

In ka thlen rual rualin khumah ka bag ka theh thal nghal tawp a, chair ah ka ṭhu tum nghal bâr bawk. 

Vawiin nilengin Keifer nen kan in be leh miah lova a mood a fuh loh hmel bakah a tum renga chutiang na nâ na chu keipawhin biak hmasak ka tum bik lo a in hmelhriat ngai lo ang mai in kan awm hmak. Chu mai pawh chu ala duh tawk lo hun a zawh hma hma in alo va haw daih lehnghal. 

' Hepa hian buaina lian zawk a duh tak tak emawni le? ' mahni a phun mai loh chu tih theih dang ka nei bawk si lo. 

Ka thinrim ka inhrosak vel lai chuan phone call ka dawng nawlh a, number hlang mah nise ka la ta tho a. 

' Aurora... Landon ka nia, Keifer ṭhianpa' a rawn ti nghal zung zung a. 

' Engtin nge ka number I neih theih? ' ka lo ti vin hlar a. 

' Chu chu a pawimawh ber lo, tunah Keifer khua a sik mek a damdawi I va pe thei angem? 'A rawn ti ta maia. 

' Mahse vawiin khan a dam ṭha viau sia ' ka ti zui a. 

' Hei damdawi pe mai turin min rawn ngen a,  Keifer meuh in min rawn ngen tawh chuan a na hle aniang ' a rawn tih leh chuan ka thin ala rim bawk nen ka lo induh ve khanglanga. 

' Nangman va pe mai rawh' ka ti ve hmak a,  min mamawh te chuan keimah ngei min rawn call ve ang chu. 

' Professor nen zanriah kan kil dun dawn a khawngaih in.... Address ka lo thawn ang che' aw leh ai tih em pawh ka sawi hma in phone a dah daih a ,message ka dawng zui nghal a. 

Zaninah hna a ka kal angai bawk nen hmanhmawh takin damdawi nen Landon address min pek na lamah chuan ka inkhalh  chhuak nghal a, hetia a damloh daih te chuan restaurant ah pawh a rawn kal thei dawn lo a ni maw! 

Keifer apartment ka thlen chuan kik ngai lo in kawngka alo in hawng sa a, Landon a kal a rin vang pawh a ni mahna kawngka a kalh loh nachhan. 

Keifer apartment chu rin ang ngeiin a felfai in engkim chu a hmunah a awm thlap vek a,lehkha thiam tih takah lehkhabu pawh a nei ṭhahnem khawp mai, a in hi lian vak lo mahse a nuam in a fai takzet. 

' Keifer ' ring vak lo in ka au a, min chhan mai loh avang in a room ah ka lut phei nghal a, khumah inkhuh hlun chung hian a lo khur hlak hlak chu niin. 

Rang lutuk in damdawi ka eitir nghal a,  a pang lah chu a sa huam a keimah ka ni tih pawh a hrelo aniange a muhil zui lehnghal mai a. 

Han tih mai ngaihna pawh ka hrelo tih dan tur zawh tumin Trinity ka call ta ringawt a,  ka damlo khat ve ropui sia tih hmasak ber tur pawh ka hrelo. 

' Tunah hian Keifer khua a sik a engtin nge ka tih ang ?' Phone a lak rual rual chuan ka ti nghal ringawt a, ani lah chu a lo chiai ve em em ringawt. 

'Damdawi a ei tawh em?  Engtin nge a awm? ' 

' Damdawi a ei tawh,  a khur char char a engtin nge ka tih dawn sawi vat teh' a ruk chuan ka hlauthawng ve tho. 

' A tlun a nih chu....puan huh in hru rawh ' 

' A hlauhawm em? ' 

' Hlauhawm e ' a rawn tih takah chuan ka hlauthawng ta kher mai, puan zawng chuan ka hawikual nghal ruai a. 

'Maw! ' 

' A thihpui theih ania' Trinity in a rawn tih leh phei chuan ka chiai nghal vek ni berin ka hria. 

' Puan... Puan... Puan' tih pahin kan zawng vela, engang puan nge an hman ṭhin tih pawh ka hre reng reng lo. 

' Puan ka hrelo' ka mangang chuan Trinity chu ka vin hrep hrep a. 

' Anih chuan damdawiin ah kal mai rawh u ' a rawn ti leh a, phone ka dah hnuah Keifer chu kaihthawh tumin ka sawi nawk nawk a, a zâwi vêk tawh lehnghal.

' Keifer tho rawh, damdawiin ah kal ang ...hey ! harh teh ' ka ti chul a,ka sãwi reng bawka mahse a che eih lo. 

' Tho teh... I thawh loh chuan tukverh ah sawn ka paih daih ang che' tih te in ka vau ta ringawt a;  a thih loh hram ka beisei. 

' I va bengchheng ve ' a rawn ti sap takah chuan chhuatah ka ṭhu nghal hnawk a, ala dam tih ka hriat hian ka thaw nghal huai mai .

' Hmela ' ka ti zui sep a, ka hriat miah loh in ka mittui alo tla hman reng chu niin .Kum tamtak hnua ka mittui a tlak leh vawikhatna. 

' Min ti muhil thei lo' a rawn ti leh a, ka hlim tluk zetin ka ngei. 

' Ngatinge min chhan vat mai loh, min ti hlauthawng alawm ' damlo mahse ka vin nghal khur khur a. 

' Ka chau...buaina ka duh lo kal tawh rawh ' a damlo chung pawh hian ala ngeiawm tho a nih hi. 

' Lawmthu min hrilh zawk tur I ni asin damdawi ka rawn ken sak che a,  I thi lo chauh a nih kha ' ka ti let tun tun a. 

' Ka lawm e, kal rawh keimah chauha awm ka duh ' tih pahin puan a sin ṭha a, minute 2 pawh a liam hma in tui takin a muhil lehnghal sûk sûk a. 

Ka thinrim lutuk insum zo lo chuan khum bula towel tê chu bathroom ah ka va tih huh sawk sawk a. 

' Kha... ' tih pahin ka vawm pawp a ,mahse a mut ngaiin a mu reng tho. 

Ka inthiam lo leh deuh a, towel huh chu la leh in a chalah ka dah leh ta nge nge a, thinrim khum hrep dawn pawh ni ila a damlo miau sia han tih vak ngaihna pawh a awmlo.

Darkar khat lai hna kal hma in hun ka la nei bawka, Keifer in chu kan enkual vel a ,a thil engkim mai hi ka tan chuan hmuhnawm a tling. 

A lehkhabu neih ho ka en thuak thuak pawhin arsi, thla leh van lampang hrim hrim khi a ngaina tih hai theih a ni lo amah nen pawh a inhmeh lo zawk . 

' Keichuan arsi pawh ka thlir ngai loh laiin nangchuan I ngaina em em a, kan inang lo ngawt mai ' mahni a inbiak mawlh mawlh pah chuan lehkhabu pakhat chu ka la chhuak a,  kan keu chiah chu a diary lo ni rengin. 

Rang lutuk in min rawn en nge en lo tih hriat hmasak tumin a bedroom lam chu ka hawi let vat a vanneihthlak lutuk in min hmu lo hlauh. 

Mi diary chhiar ru tu nih chu duh lo viau mah ila ka chhiar chakna a tam zawk avangin a phek hnuhnung ber chiah ka chhiar ang tiin ka intiam ta ringawt a. 

Inthiam lo tak chungin a phek tawpna ber chu kan keu phawk a, thil eng nge maw deuh a ziak dawn emaw ka tih laiin a thil tih chak a ziah chhuahna chauh hi alo ni a. 

' Astronomer nih ka chak, Australia-a arsi thlir ' tih ka chhiar lai chuan ka mit ko ka san zeuh a ' Kan scientist-a hian arsi a atchilh hle a nih dawn hi ,a arsi chu heta hi ka awm reng sia'  ka tia, ka thusawi avang chuan mi â ang maiin ka nui nghal ver ver a. 

' Sahuan a kal, tattoo chhut, nikhat chiah hun awl neih chuan midang anga nun zalen neih ' tih ka chhiar thlen chuan ka chhiar chhunzawm duh tawh lo. 

Keifer hi ka lainat takzet a nu vangin sahuanah takngial pawh ala kal lova a thil chak chu hun awl neih leh midanga anga nun;  hetiang hi thil nih dan tur pawh a ni lo.

Chutia Keifer diary ka ngaihtuah zui ngut ngut lai chuan Landon hi a rawn lut hlawl a. 

' Aurora pawi ka ti lutuk ka tih buai che avangin ' a rawn ti nghal zung zung a, Landon a rawn kal takah chuan Keifer hna ah a kal thei bawk si lova kei lehzel ka kal loh chuan a ṭha lo. 

' Anih chuan ka kal' tih pahin kal mai chu ka han tum a, Landon bawk chuan, ' Khawngaihin a nu hrilh suh aw' a tih zawm zat a. 

' Engvangin? ' hriat chak hmel zet hian ka let leh ngat a. 

' A apartment ah hmeichhia a kal tih a hriat chuan a in sawn tir leh duh mai ang ' a tih chuan. 

' Eng nge I sawi awmzia? ' tiin ka zawt leh a, engkim hriat vek ka duh. 

' A nu chuan apartment ṭha taka awm tir a duh a mahse Keifer hian ama thawh chhuah tawk leh midang ang tho a apartment pangngai a awm a duh avangin hetah hian a awm thei hram a ,he in aṭang hi chuan chhuah tir lo hram rawh ' a ti chuai raih a. 

Hetiang khawp hian a nimaw a nu khuahkhirhna hnuaia awm hi hrehawm a lo tih. 

' Puitling a ni ve tawh a, a duh duh danin a awm thei alawm ' ka ti leh kher a. 

' Nilo... Keifer hi chuan a nu hrehawm ti lai hmel hmuh leh rilru hah taka awm tir ai chuan amah a tawrh vek hi a thlang zawk. Engtik ah mah a nu mittui tla lai a hmuh theih loh ang bawkin amah kalh zawngin a awm ngai lovang .Engpawh chu nise Keifer ka va buaipui tawh ange ' tih leh bedroom a luh a rual nghal a. 

' Hahh... Kei ang lo takin fapa fel tak I ni a mahse nang aiin ka hlim zawk ' ka ti sep a, keipawh ka chhuak ve nghal a. 

Restaurant ka thlen chuan Taylor chu customer in an hauh avangin an hma ah hian alo ding zum zât a, a phu tawk a hmu a nih saw tih pahin ka nuih liam mai mai a thil dang ka tih san hmak a. 

Dawhkan ka hrukfai lai chuan mipa pakhat hian, ' Hetiang hi a thleng reng ṭhin em ni? ' a rawn tih rual chuan ka hawi chhuak vat a,  uniform a hak avangin heta thawk thar a ni tih ka hre nghal. 

' Ka hrelo' tih liam puat pahin Taylor chu ka va melh zeuh a, a kawrah coffee a an leih lai ka va hmuh takah chuan ngawih mai mai chi ah ka ngai tawh lo. 

' Engthil nge maw I tih le? ' customer an ni bawka pangngai tak hian ka va ti a. 

' Henu hian kan thil order loh hlir min rawn pe alawm ' hmeichhe pakhat inla zet hian a rawn ti a. 

' Nangkha lo in rawlh suh ' pakhat in a tih ri ka hre zui zat bawk. 

' In order ang takin kan thlak leh vek thei alawm ,hetianga ti lo hian sawi ṭha ve mai ta che u' ka thinrim thut loh nan ka insum hram hram a. 

' Anih chuan min rawn pe vat teh u ' 

' Kan pek hma cheu in ngaihdam in dil phawt angai ang ' ka ti ve tlat a. 

' Hahh... Nangni ho lah hi waitress ve mai in nih kha, in thawhna dawr pawh hi ka lei vek thei tih I hria em? ' a rawn tih leh takah chuan ka insum thei tawh thlawt lo. 

' Han lei ta pauh che mahse I lei hma in I bag first copy hi thlak phawt rawh ' ngeiawm zeta tih pahin a bag chu ka khai chhuak va va a. 

' I va zak lo ve , ka bag hi a original ngei a nih hi ' tiin ala ṭang ve ṭang ṭang .

' A original a nih si chuan... ' ti ban charh pahin a bag logo chu dawhkanah ka chhu chawrh a,  a keh ta chuai mai! 

' Oh! Lunghlu a keh ' ka ti leh kher a, a zak bawk aniang a hnar a sen nghal ṭawl ṭawl mai alawm. 

Inthlakna room-a ka luh chuan Taylor chuan min rawn la umzui zel a. 

' Aurora ka lawm lutuk ka lawm takzet zet a ni mahse engtin nge bag chungchang kha I hriat? ' tia min zawh chhen takah chuan locker a ka bag chu ka la chhuak a, nichina nu ta nen khan a inang chiah chiah a quality tih loh chu .

' Ehee... A inang chiah chiah a nih hi ' ramhuai hmu thut ang mai hian a meng phawk nghal kawk a. 

'Himalaya Crocodile Diamond Birkin anih hi... Kim Kardashian, Victoria Beckham leh keimah chiahin kan nei ' ka lo tih zawm zata, a hma aiin mak a ti lehzual. 

' Woww.... Hetiang thil hi ka vawikhat hmuhna ' a thilrna lamah a chilthil a tla lo chauh. 

Keifer awm bawk si lova a tih ai zawng zawng tih ka duh a nidang zawng aiin ka thawkrim a ka chau hle bawk. 

' Kha.. I chau tawh a nih kha chawl tawh rawh ' nichina pa bawk khan tui min rawn pe a, ka bulah a rawn thu nghal tharh bawk.

' Matt ka nia chuan nangchu Aurora ' a ti nghal zung zung a, a hmelṭhat ang bawkin a fel a nih hi. 

' Engtik aṭangin nge I rawn thawh? ' tiin ka lo zawt a. 

' Morning shift ka nei ṭhin a karkhat ka thawk tawh ' 

Zing lamah a thawh vang niang thawk ho mah ila zanin hi kan vawikhat inhmuhna. 

' I ril a ṭam em ?' Zawh awm tak min zawt a ni ,ka ril a ṭam tih ka hmelah a lang chhuak emawni le ?

' Minute 10 kan la nei a ,zanriah ei chhuak ila ' chutia min sawn na nâ nâ chu ka lo aw ve mai bawka .

Matt nen zanriah kan ei kham veleh Keifer khan engang pawhin haw tur khan min hrilh mahse ka rilru ka thlak leh thut a,in a haw ta lo chuan Keifer inah ka let leh ngat a .

Landon pawh alo haw tawh avangin Keifer bulah chuan ka va inthawlh nghal a, a taksa lum hiam mai kuah chung chuan a awmah ka bei hle hle a. Ka lo chau ve deuh bawk nen reiloteah ka muhil nghal mai a. 

In chhiar zawh veleh fakna khu theihnghilh lo ang u aw...i comment te ka lo hmu thin a , ka inzir zel bakah ziah leh pawh min ti phur thin a chuvang chuan comment lamah min l lo fuih phur zel thin teh u kha ...lol .

Read More

30 days with Mr. Genius -9

 

CHAPTER -9

Car lum lutuk chhunga ka awm reng takah chuan a inthiam lo leh deuh aniang a rawn lut ve ta nge nge a mahse lehlam ka lo hawisan hmak. 

A rawn luh hnuah pawh min be ta mai lo chuan kan ṭhu ngawi dun kar reng a kei lah a chungah ka thinrim bawk nen biak hmasak ka tum bau lo. 

'Ka tihpalh ' a tawp a tawpah a rawn ti ve ta nge nge alawm. 

' Engvangin ' ka lo ti leh lawi a, han chhaih kual ve hrim hrim hi ka duh.

' Ka vin che avang khan ,naupang kha a thiam lo nachungin nangpawh I thiam bik lo'  nia, ngaihdam min dil tawh tho a ka thiam loh a ni ve mai aniang chu. 

_________________________________

School ah Volunteer club ho room chu ka zawng kual a vawiin ah in hmuh khawm tur an ti lehnghal a ka peih lo takzet, tlanbo daih te ka duh. 

'Zawn I nei em ni? ' ka hawi kual lai chuan mipa pakhat tarmit vuah chut hmel zet hian min rawn zawt a, chhang lo in ka en ringawt a ka hawisawn lehnghal. 

' Aurora.. ' 

Ka hminga min rawn koh chuan sam hnung lama theh hawrh chung hian ,' Eng nge?  Engtin nge ka hming I hriat, stalker mi I nih? ' ka lo ti nghal ringawt a, a lu chu thing in a lo pha nasa mai. 

' Stalker ka ni lo, Landon ka nia Keifer ṭhianpa ' a in sawi takah chuan in kawm awm reng te pawh an nih hi mahse Keifer erawh a chut hmel ve lo. 

' Keifer em ni I zawn? ' 

' Engtin nge ka zawng tih I hriat? ' Keifer awmna min hrilh theih takin tiin Volunteer club awmna ka zawng tih ka hrilh mai duh bik lo. 

' Engtik lai pawhin I zui chawt renga, I duh tih ka hrereng a nia ' amah zawk chu a sawi pah chuan a lai nghal ringawt a, ning hmel zetin ka mit ka lo chet kual ralh a. 

' Ka zawng tih I hriat te chuan a awmna chu min hrilh vat mai la ' ka lo nawr ve sek a. 

' Anih chuan min lo zui rawh ' tih leh kal a rual nghal a. Landon chu ka zui ve zela a tawpah Volunteer club tih inziahna room chu kan thleng hlawl mai. 

Hepa hian engtin nge Volunteer club ho room ah min hruai daih theih , Keifer awmna ah min hruai dawn a ni lawm ni. 

' Eng nge hetah kan tih dawn?' hrethiam lo tih hriat takin ka zawt ta ringawt a,  min chhang lovin classroom chhungah chuan kan inzui lut a Volunteer club member ho chu an lo ṭhu ṭhap a Keifer pawh a lo tel ve reng chu niin. 

Han en mai pawh hian an vai mai chuan geek awmkhawm emaw tih tur an ni. Mi fel awmkhawm na club anih vang aniang Principal in zawm ngei ngei tura min tih nachhan. 

' Volunteer club ah engthil dang nge maw ka beisei le? ' ka hriat tawk lekin ka phun sep a; ka va in lan takah chuan midang chauh nilo Keifer pawhin mak a lo ti ngei mai. 

' Thiante u Aurora a nih ni' Landon chuan a han ti a. 

' Hi! ' an lo ti rual ṭhap a, za lo zeta ka khik hnuah ka ner zui nang a, Keifer pawh tih tawh nak alaiin geek rual bulah ka awm dawn chu a ni sia. 

Keifer bulah ṭhut tumin ka han pan ruau ruau a ka ṭhut na turah tak mipa pakhat alo ṭhu khanglang lehnghal. 

' Thu sawn vat rawh ' zawi leh vin zet hian ka ti deuh hluk a, min lo hlau ngang mai a insawn nghal. 

' Eng nge hetah I rawn tih dawn ?'

'Volunteer club hi ka zawm alawm' nuih pahin amah si chet hian ka ṭhu kher a, ngeiawm zetin a banah ka kuah nghal thak a .

' Min en ṭhup ania' hawi kual chung hian ka kut chu a rawn phelh a, ka kuah ṭha leh ngat tho. 

An zinga a hotu ve deuh ber chuan an club kalphung leh an thil tih ṭhin te chu a sawi a. An hman apiangin tar enkawlna ah te,  hnuchham in ah te leh vantlang tana ṭangkai thei thil ti a an in volunteer ṭhin thu te chu a sawi duah bawk a. A hma in hetiang thil hi ka la ti ve ngai si lova ka peih lo lawk takzet. 

Member tam lo mah ila group ah kan inṭhen a, chung ho chu hmun hran hran a in sem darh leh tur kan nih avangin Keifer awmna group ka pawt fuh lo chuan ka lung a ti awi thei lo. 

' Khawiah mah ka kal dawn lo group C a ka awm loh chuan ' ka tih chuan min rawn en ṭhap hlawm a. 

' Kan awmna tur ṭheuh kan pawt a keini pawh kan lungawi bik chuang lo mahse kan sawisel bik hleinem' tlar hmasa lama mipa pakhat chuan min rawn hnial a. 

' Ka sawi ang chuan a ni mai, min sawn loh chuan he club aṭang hian ka bang ang' ka tih leh phei chuan an ri nghal hluk a, an in hrilh ru nghal sep sep bawk a. 

Khawi hmunah pawh awm ila boruak hi ka siam leh hat ṭhin.

Tlema a hruaitu te ho an in rawn khawm hnu chuan pakhat hi a rawn ding chhuak leh a. 

' A nih chuan ṭhiante u kan lungawi tlan zawk nan group C ah chuan kan sawn mai dawn mi,  a pawm zawng in ban i phar ang u ' an pawm tih entir nan a tam zawkin an ban chu an phar ṭhap a, mi fel ho awmkhawm na club tih takah an fel hlawm phian hi le. 

' Geek ho hi ka ngaina' ka hriat tawk lekin nuih ver ver pah hian ka ti sep a, Keifer erawh a lo tum lian ngang mai. 

Class ban veleh parking lot lamah Keifer chu ka kai thla dawr dawr a, thil hmuh tur ka neih thu ka sawi avangin a ṭang tlat bik lo. 

' Surprise ' tih pahin a hma chiah a car tuna neih lai nen a pianhmang inang zet mai chu ka kawk a, mak ti takin a ding ngawi reng ringawt. 

' I car thar a nih hi... Hawh ride ila' tih ham ham pah hian a car tura ka leisak Ford escape dum ngei mai kawngkhar chu ka hawnsak a, a lawm viau dawn emaw ka tih laiin a hmel chu a dur nghal khup a. Engmah sawi lovin a kal daih ringawt. 

' Keifer... ' a banah ka va vawn sak a,  hriatthiam loh hmel tak hian, ' Kha I car chahbi tur ' car chahbi chu a kutah ka hmeh bel a mahse leiah a thlak thla nghal. 

' Engthil pek mah ka duh lo' tih pahin a kal nal nal a,  keilah thinchhia tih takah ngeiawm zet hian, ' I car ṭawng zet ai chuan ka car hi a ṭha fe zawk, kha chahbi hi la la lawmthu pawh min hrilh kher angai lovang ' ka ti zui kher a mahse ka  ṭawng hre lo angin a kal lui hmiah hmiah tho. 

'Hey ! Lo ding teh,  engvanga car pawh chu duh lo viau nge I nih... I nu vang em ni? ' vin zeta tih pah hian a hma ah tak ka va ding a. 

' Aw' a vin ṭhah ṭhah hle. 'Mi pangngai angin min nung tir ve tawh rawh u, buaipui ngai ka ni tawh lo keimah in ka inbuai pui vek thei' a ti zui a. 

' Mahse engvanga car vang ringawt a thinrim nge I nih a? ' ka tih chuan, ' heng thil zawng zawng hi ka ning tawh, min tibuai tawk tawh viau a ni lawm ni tunah chuan duhtawk tawh rawh. Nangpawh hi ka nu ang chiah I ni' tiin min chhanglet hrep a, sawi tur pawh ka hrelo a engmah hi ka hrethiam tawh lo. 

Thiamloh na ka neih awm pawh ka hre lo keichuan ṭanpui ka tum mai kha a ni sia. 

★Ohel Children's Home★

Inrinni ah hnuchham in a in volunteer tura ruahmanna an siam tawh sa angin fahrah te inah chuan ka va kal ta ngei a niminah khan Keifer kha khati khawp khan ka chungah thinrim lo se chuan ka kal hauh lo ang. 

Luhna bulah chuan kan group ami te pahnih chuan min lo nghak reng tawh a, Keifer erawh ka hmu ve lo thung. 

' Kartawp hi hetiang hian ka hmang ang tih ka ring ngai lo asin mawle' tih nung nung chung hian shades ka vuah te te phawt a, phur lo zet chung hian car aṭang chuan ka chhuak at at a. 

Mawng then sawi na na chung hian chumi te pahnih lam chu ka pan a, ka peih lo lutuk hi let lehnghal mai te ka duh. 

' Hi!...  Guys' ka ti ban charh a. 

' Darkar khat in I rawn tlai ania' a hmeichhia zawk chuan a rawn ti a, a mipa zawk chuan alo nghawk nghal zeuh a . 

' Khawiah nge Keifer? ' tiin ka zawt ta zawka. 

' A luhna a rei tawh ' a tih chuan ka sa nghal ringawt, ka chungah thinrim pawh nise min lo nghah ve tal tur ania. 

Ka in feng chhing bawka Sister te chuan min en duh in han tih vak ngaihna pawh an hrelo. Shades vuah ra chung hian Father an biak lai chuan an sirah ka lo ding ngawi reng a, Keifer hmuh tur a awm mai lo bawk nen a kham hian ka kham hluah hluah. 

' Aurora min rawn zui rawh ' mipa zawk chuan min rawn ko a, pheikhawk sâng ka bun bawk nen umphak tumin ka tlan phei aih aih a. 

Naupang ho awmna a kan luh chuan Keifer chuan naupang ho chu lem hi a lo ziahpui mek a, a nui hmel ka hmuh hian ka lo hlim ve em em ringawt mahse min rawn hmuh rualin thinrim hmel min rawn hmuh lehnghal. 

Keifer ang tho in kan ṭhian pahnih te pawh chuan naupang ho chu an infiam pui a kei erawh Shades la vuah râ chung hian chair ah bawp khawkherh meuh in ka ṭhu tlat a , zep lo chuan naupang ho hi ka ning. 

' Aurora lo kal ve rawh ' kan ṭhian pakhatin min rawn koh ngial pawhin hrelo ang maiin hmun dang ka hawi hmaka .

' Keifer unaupa I hmelṭha sia bialnu I nei em? ' hmeichhe naupang kum6 mi velin a zawh chuan ka beng ka lo chi nghal hru a. 

' Nei love ' a biang piai paha a tih rual rual chuan an bulah ka va tlanphei rawk rawk a ,chu hmeichhe naupang bulah chuan, ' A nupui ka nih hi, ka pasal hi hnaih vak suh ang che' ka ti nghal khur khur a, Keifer an min rawn khak nghal. 

' Nge... Naupang pawh nise ka thik tho alawm ' ka lo ti let hlar a. 

Ka pawnfen avang chuan naupang ho in alien emaw min ti aniang tih tur khawpin min en duh a, engatan mah ka lo ngailo thung. 

' Kha hei hian inkhuh rawh ' Keifer chuan a jacket hian ka mal lang huar chu a rawn khuh a,  Keifer a ni bawka lawm takin ka lo pawm ve mai bawk a. 

' Miss... Pangpar lem min ziah sak thei angem?' Mipa naupang kun4 mi vel hian min rawn zawt a, peih lo viau mah ila a lehkhabu chu ka laksak ta tho a. 

' Ka thiam lutuk chutiang mai mai te chu 'tih pahin rawng sen hian pangpar chu ka han ziahsak dawn a a engamah hma in ka ti pherh nghal ringawt. 

' Ka thiam I ti sia I ziah pherh hi' naupang te te si min sawisel ngam ka ti. 

' ka ning... ka ziak leh peih lo,  pangpar ziah ka thiam lo' tih pahin lehkhabu chu ka pe let a ' mahse ka thiam I hre duh em? ' ka ti leh a naupang te chu a lo but nghauh a. 

' Love leh sex.... S. E. X' nuih pah hian ka ti a, Keifer erawh a rawn meng bial nasa mai. 

' S. E. X chu eng nge?' naupang â tih takah min rawn zawt khauh a, lo hrilhfiah leh pawh ka huphurh vak lo. 

' Fu*k I hria em?  F. U... ' ka ti chiah a Keifer chuan ka banah a rawn vuan lawk a min kaichhuak ta dawr dawr mai. 

Pawn a kan chhuah veleh ka ban theh sawk pah hian ,' I thil sawi kha I hria em, naupang mai ala nih kha' min vin nghal ringawt a. 

' An la hre tho tho dawn tuna lo hriat hi eng nge a pawi na? ' ka ti ve hmak. 

' Aurora...' Vin zet hian a ti a, a ngaihna I awm lo tih melh hian min rawn melh zui bawk a. 

' Tikhan min vin vak zel suh ' 

' Ngatinge hetiang hian I awm? ' 

' Nangmah zawk kha ngatinge hetiang hian I awm, ngatinge car vang ringawt in hetiang hian I awm?' ka vin let ta nge nge a. 

A ngawih vang vang hnu ah zawi sap hian, ' Ka nu in engtik lai pawhin a thu thu in min awm tir a. Ka car, ka apartment leh ka kawr hak tur thlengin engkim a duhzawng hlir min tih sak a mahse kei chuan mi pangngai anga awm ve ka chak zawk. Ka car, ka apartment leh ka hak tur te pawh keima thawh chhuah ngei a lei ka chak laiin I chhungte pawisa hmanga thil min leisak hi ka duh lo' a ti chuai raih a, a mitmeng ah natna leh lungngaihna bak hmuh tur a awm lo. 

Anih chuan lo ngai reng mah rawh se keima thawh chhuah ngei in eng nge maw tal ka la leisak em em ang. 

' Ka... Ka tihpalh'ka ti mahse engmah sawi lovin min luhsan daih a. 

Khatianga a mimal chungchang min hrilh avang khan ka lawm takzet, thil han sawi zut zut chi ani bawk si lova a rilru tawt lutuk a inbun ruak ve ta nge nge a nih kha. 

A nu in a khuahkhirh tih chu ka hria mahse hetiang em em hian a khuahkhirh ka ring ngai lo. Midang te ang bawkin mahni thawh chhuah ngeia in chawm a duh vang niang a rukin part time hna a thawh nachhan. 

Read More

30 day with Mr. Genius -8

 

CHAPTER -8

"I'm your biggest fan

I'll follow you until you love me"- Paparazzi🎼

' I tray chawi dan kha a diklo ' kan thawhpuinu phun peih zetin min rawn sawisel leh takah chuan nin hmel zet hian ka meng kual ralh a ,ka thil tih engkim hi a sawisel ni ber hian ka hria. 

' Okay... ' inher pahin za lo zet hian kan nuih te te phawt a, ' Tunge I hming?' tiin ka zawt zui zat a. 

' Taylor ' ka awmdan chu mak ti takin min rawn melh a. 

' Aw le... Taylor, kalsawn rawh ka kawng I dal ' ka ti deuh hmak a, hawi vah chung hian ka kal âwt âwt a min ngei leh viau ang chu.

Thiam engmah nei lo mahila Keifer bula thawh ka duh ve miau sia ka theih ang tawka rim hian ka thawk ve a, thinchhia tih takah customer ka nin deuh chu a rukin anchhia (curse )ka lawh deuh reng. 

Kan vei ngun bawka pheikhawk sang inchi li vel ka bun bawk nen ka ke hi a bung mai dawnin ka hria. 

Tuma hriat loh in dawr hnung lamah ka va ṭhu chawl daih a, ka pheikhawk kan phelh chiah chu hnara hlit phawt ang huai a ni ka thawveng nghal sawng sawng te hian ka hria. 

Ka ke chu a kham mai pawh a ni lo a innawt pilh lehnghala, a sen hler hlur mai. 

' He pheikhawk phiangsen vang vek hi ' ka thinrim chuan ka designer pheikhawk ka lo duat em em ṭhin chu ka pet thal tawp a. Engkim hi ka kham hluah hluah. 

Thinrim ṭun chunga ka ṭhut tum bur lai chuan ngawi rengin Keifer chuan ka pheikhawk let bal chu a rawn chhar a .Ka ke bulah fel takin a rawn hung thlap a. 

' Inhrem reng lovin ngatinge pheikhawk bun nuam I bun mai loh? ' tih pahin ka ke pilh laiah chuan bandaid a bel a, ngun takin a hmel chu ka lo en renga. 

' Ka ralthuam a nih hi ' ka tih chuan a khi deuh suk a, mahse dawt ka sawi miau lo pheikhawk sang ka bun loh chuan mahni inrin tawkna ka hlauh a ; ho ta riau hian ka in hre ṭhin .

' Hetiang hna hi I thawh chi a ni lo, haw la I nihna diktak ang khan va awm leh rawh ' tih pahin a ding nghal hluai a, a ti mai mai lo tih a hmel aṭang pawhin a hriat theih. 

' Maw! heihi ka nihna diktak zawk a ni,  engpawh ti ila chu chu ka nihna diktak a ni mai' ka lo ti vin nghal hlar a. 

' Nangte chu lalfanu ang mai a ni lawm ni I nih waitress nilovin zaninah la la hian banna thehlut rawh ' tih pahin inchhungah min luhsan daih a. 

' Lalfanu ka ni lo,  clown ka nih hi' ka ti zui hram a. 

Nichin lawkah kha chuan angel ang mai a ni a tunah lah ramhuai ang maiin min hnawhbo a tum leh a; engang pawhin min ṭawngkhum in min ban tir tum teh mahse a tawp thlengin ka thawk ang. 

Keifer nen kan in melh salla deuh bawk nen thatho lo zet in ka haw a. Engvanga min pehhel leh min hnawh bo tum reng nge a ni tih hi ngaihdan pawh ka nei lo, min duh loh thu lah min hrilh bawk si lo. 

In ka thlen chuan Sebastian an dawhkan ah thleng a lo rem mek a,  min rawn hmuh rual chuan min lo nuih nghal sâng a. 

' Rawng ilo bawl vek elaw?' tih pahin ṭhu tura min tihna ah chuan ka ṭhu a, gentleman  takin ka chair a pawt chhuak thlap bawk. 

' I chauh tih reh nan hei wine hi in rawh ' ka no ah wine a rawn thli chhuak kar kar a, Keifer an eitur min lei sak duhlo bawka kan ei ṭeuh ange. 

________________________________

Keifer an project a buaipui leh tawh avangin class ah ka ṭhu ngui bam a, a awm loh hi chuan engkim hi a ninawm vel vek. 

' Aurora...Keifer te chu ka enthla a Isabella pawh a tel ve ' Peter chuan ka bula rawn ṭhut pah hian a rawn ti a, ka lo sa nghal zak mai. 

' Chu phungpuinu mai mai chu ' inseh ruh chung hian ka lo ti a. 

' Nangpawh top3 ah lang la chuan research leh project I khawih ve tho ang ' a tih phei chuan ka thinrim zual, top3 chu sawiloh test apiangin "D " ka hmu ziah ania. 

' Sawi tawh suh, Keifer hian hmeichhia hnaih lo se a ṭha nimai '

' Anu ang chiah I nih chu ' 

' Maw? ' ka lo ti deuh ha a, a sawi awmzia ka hre lo. 

' Keifer hi chu anu hian a khuahkhirh leh lutuk a, hmeichhia in an rawn beisei ve deuh pawhin anu in Keifer hriat loh hlanin a hau hrep zela tumah in an hnaih ngam lo. Rosy pawh kha a hau hrep alawm' a ti siam siam a, ' Tunge Rosy chu? ' tiin ka zawt nghal a. 

' Keifer nen an inkawp ve zuai hman a mahse lungngai suh Texas ah an pem tawh ' a ti nghal zung zung a, an pem ta daih chuan ka thaw a ti vêng nghal huai a. 

Class banah khawimah kalkawi lovin parking lot lam ka pan nghal a ,tum loh deuh maiin Keifer leh Isabella te inbe mawlh mawlh lai chu ka va hmuh fuh a. 

' Sawnu ker kawr saw ' inseh ruh ṭun chung hian an inkarah ah ka va ding siah a, Isabella chuan mak ti takin min rawn melh kawk a. 

' Ka duh aiin pakhat in kan tam' Isabella melh ram ram chung hian ka ti kher a, min ngei hmel ngang mai. 

Chutah Isabella chuan min runluih nan min hmu lo ang mai hian, ' Keifer a lehpek ah chuan kan inah kan ti dun dawn nia' a ti ve sak a, kan in khing tawk khawp mai. 

' Kal ang ' Keifer banah nghet takin ka kuah nghal a, thil a sawi hma hma in a car-ah ka nam lut dawr dawr bawk a. 

' Isabella naktukah kan inhmu leh dawn nia ' bye bye chung hian ka ti leh ngat a. 

In er tawh nak alaiin car-a ka lut tur chu ka pheikhawk ka rap lek lehnghal a pose lai zet  hian car kawngkhar ah ka in vuan ṭai a,  Isabella hmuh lai a lo ni kher kher bawk nen a hun lo takzet. 

' Haha...bang ah thil I vawm chuan I vawm nat ang zat chiah khan a rawn sawt let leh ṭhin ....bye Aurora ' a rawn ti leh kher a, min deusawh tih chu ka hria mahse a sawi awmzia ka hre miah lo thung. 

' Engthil chungchang nge a sawi pawh ka hre nek love ' phun nung nung chung hian car-ah chuan ka lut nghal a. 

' Newton's third law of motion a nih kha ' Keifer chuan min lo hrilh fiah a mahse ka bo tulh tulh thung. 

' Maw? Eng third law maw? ' ka lo ti hu a, ' ka ning lutuk Physics tih vel hi ka kham hluah hluah ka hriatthiam turin sawi teh' ka tih chhunzawm nghal hlar a. 

Min nin hmel zet hian a sam a tuai thuak a, ' Karma chungchang a nih kha a sawi ' a ti daih mai;  anih chuan a sawi awmzia chu ka inbilh kha karma a tihna maw lo ni a, hmeli mai mai chu. 

Top student tih takah an in man nghal zung zung mai alawm. 

' kal ang ' ka tih ngaihna hre lo chuan ka ti ta ringawt a. 

' Tunge ka car-ah rawn chuang turin ti che' min lo ti heu mai,  ni dawn tak keimah leh keimah ka insawm tak. 

' Ka pasal car-ah ka chuang thei lo em ni?  Ka chhuk dawn chuang lo kal vat ang' tih pahin ka indawm nghal ṭai a,  ani pawhin tih ngaihna a hre bik lo a tlan chhuak ta nge nge a. 

Rei pawh kan tlan hma in motor chu a rawn ri ṭuk ṭuk a, kawng laiah a thi ta daih mai. He car hi ṭawng ka ti ru reng a ni. 

' A nung thei tawh lo tih min hrilh miah suh ' ka lo ti nghal vat a. 

' Kawng sirah hun angai, lo khalh la kan nawr ange' tih leh car aṭanga chhuah a rual nghal a. 

' Hey!...hetiang car ṭawng lutuk hi ka khalh peih hleinem ' a ṭawn ṭawn nen a ui ve em em a. 

' Ka rawn nawr dawn nia' a rawn tih leh takah chuan mit chet kual ralh chung hian ka han thaw hak a, driver seat lamah ka insawn phei ṭuih ṭuih a. 

Eng tin tin emaw kawng sirah kan hung thei hram a, car chhung a lum bawk nen pawnah a car rawn la tu turte chu kan lo nghak ran a, kalsan tura ka tih pawhin a car hi a kalsan duh bik hauh lo. 

' A lum bawk si hmun dangah nghak ila' tiin ka sawm ta ringawt a. 

' Taxi a rawn kal leh veleh lo va haw rawh... I lu a na vek ang ' a ti a. 

' Aih, I rualin ka haw dawn ' ka ti ve tlat. 

Chutia car rawn la tur te kan nghah lai chuan kan hma lawka dawr ah chuan cold drink lei ka rilruk a,  a lum bawk nen a zia viau ang. 

' Sawtah sawn in tur lei ang' dawr chu ka kawk va va a. 

Ka lum ti hmel a hmuh chuan, ' Ok' a ti nghal a,  dawr lamah kan inzui phei hnak hnak a. 

Dawr chhung kan luh meuh chuan kan tla hrang nghal a, ka zawn ber chu Keifer-a in ngun leh a duh nia ka hriat Pepsi chu a ni. 

Ngawi rengin Pepsi ka hmuh rual chuan lak mai ka han tum a mahse mipa naupang kum11 mi vel hian min lo lak khalh daih a, pakhat chauh a awm tawh lehnghal. 

' Hey... Naupang a dang la mai rawh ' tih pahin laksak ka han tum a alo phal bik ṭhak lo. 

' Nangman la zawk rawh ' min rawn chhang let zawt zawt a,  engpawh thleng dawn se ka laksak tho tho ang. 

' Maw! Hah...  A upa zawk ka nih hi' ka duh tawh chu ka nei ngei ngei thin tih hi ala hre lo niin a lang. 

'Fanta leh Coca-cola pawh a awm heihi la mai rawh ' min rawn ti ve khanglang. 

' Bit*h...kha thil phiangsen kha min rawn pe phiangsen rawh ' tih pahin a Pepsi ken lai chu ka va chuh a, a lo kuah ve tlat bawk nen ka la maithei bik lo. 

' Min pe rawh ka tih chu' tih pahin kan pahnih chuan kan au tuarh tuarh a, a chak phian lehnghal a kan inchuh na lamah naupang kum11 mi nen kan insual chu a ni nghal der. 

Kan in chuhbuai bap bap lai chuan hnung lam aṭangin Keifer an min rawn pu nghal lawp a, ngawi rengin min chhuahpui nghal nal nal bawk. 

' Min dah thla rawh kha naupang kha ka vel dawn ' tiin ka au tuarh tuarh a.

' Engthil nge I hriat a?  Naupang mai a nih kha' min dahthlak pah chuan min vin let hrep a. 

' Mahse I pepsi tur... ' ka ti dek dek a, ' Naupang chhia viau suh,  naupang khing rual pawh I ni tawh lo' tiin min pawtchat nghal a. Ama tana ti ka ni reng sia, a chungah hian ka lungawi lo takzet. 

' Ka kham tawh lutuk mi pangngai ang hian awm ve tawh rawh ' a tih rual chuan car pakhat hian min rawn tlanpel a, chu car aṭang chuan nichina naupang kha a rawn dak chhuak a Pepsi lek va va chung hian lei min rawn chhuah khum a nih chu!  

A hma aiin ka thin a rim zawk. 

' Naupang pawh nise ka thin ti rim tu apiang chu ka vel zel ang ' tih vin hlar pahin ka eitur ken lai chu leiah ka paih pawp a,  car chhung lum zetah chuan ka luhsan daih a. 

(chhiar zawh veleh fakna khu hmet keuh ang aw)

Read More

30 days with Mr. Genius-7

CHAPTER -7

'She's poison but tasty'

Keifer an min ngaihsak duh lo bawka ka thinrim chuan pizza box nga ka order a , ka ril a lo ṭam ve bawk nen box hran hran ami chu ka ei lawr kual vel a .

" keimah in ka ei vek anga nimai,  naktuk ah ka hmuh rual rual che in ka ei zo vek ang che " ang hlawih hlawih chung chuan ka ei chhunzawm char char a, hmuam ṭun chungin ka kâ ah ka hnawh luh belh zel a, ka kut lehlam ah ka la keng cheu bawk.

A tawpah phei chuan ka luak chhuak lutuk chu ka uak lek lek tawh,  ka ei zawng zawng kha chhiar ila chuan box khat a tling ang.

Ka eina pawh dah fel ta lo chuan khumah ka mut san thlawp a,  ka piantirh ata hetiang em em hian ka la puar ngai lo.

Zan reiah ka pum na in min kaitho a, sana ka en chuan dar 1:30 a lo ri va tawh. Ka thlantui in min lo bual huh vek tawh chu niin ,khumah ka pum dawm chung hian ka mu kawm ngal a ;a na a rawn chhuah deuh phei chuan ka han vial leh tawp tawp ṭhin a minute 20 a ral leh hnuah pawh a reh thei der lo.

Sebastian hi tlaiah khan New York a rawn thleng a, koh duh loh viau mah ila ka tih ngaihna hre lo chuan ka call ta ringawt a.

" hello " a rawn ti dek dek a, " ka pum a na lutuk,  damdawiin ah kal ka ngai in ka hria " ka lo ti nghal zung zung a.

" Aurora... Tunah emergency meeting kan nei mek asin "

" tun ang hunah hian maw? " ka ti chuai raih a.

" damdawi lo ei phawt la, ala nat reng chuan damdawiin ah kan kal dawn nia... meeting a zawh veleh ka rawn call ang che " a ti a phone chu a dah nghal a.

" damdawi ka kawl lo" ka ti tak na in ka thusawi a hre hman tawh lo.

Heti ringawt hi chuan ka tuar thei tawh lo, ka mangang chuan ka rilru a rawn awm hmasa ber Keifer chu ka call ta ringawt a, zan reiah ka call vang pawh a ni mahna rin loh lutuk in alo la nghal hlauh ,a lehkha zir ala mu lo aniang.

" lehkha ka zir " a rawn ti nghal ringawt a.

" rawn.... rawn kal nghal rawh,I rawn kal loh chuan ka that ang che " phone a dah hman ka hlau lutuk a ṭawng pawh ṭawng ṭha hleithei lo hian ka vau nghal khur khur a.

" ṭawng kual duah lo khan engtin nge I awm sawi rawh ? " min ngaihtuah hmel tak hian a rawn ti leh a .

" ka pum a na lutuk ... address ka rawn thawn ang che" tih leh phone dah ka rual nghal.

Nidangah ka pum hi lo na fo tawh ṭhin mahse tuna ka pum nat ang hi chuan ala na ngai meuh lo.

A zia takin deuhin tiin thei leh thei lo hian fridge a tui vawt chu ka va in leh khawlh khawlh ṭhin a, ziaawm lam a pan thei chuang lo.

Ka na ti lutuk chu kitchen chhuatah ka ṭhu hnawk a, fridge nghengin Keifer lo kal hun chiah ka nghak tawp tawh.

" hmela... I va rei tak" pum dawm vawng vawng paha sana ka en chuan Keifer ka biak atangin minute 5 pawh ala ral lo.

" hey!  Pum-a thlak theih che chu nise ka thlak daih tawh ang che phiangsen che hian" tiin ka pum chu ka hau mawlh mawlh a, ka pum chu nilo se anchhia ka lawh bawrh bawrh tawh ang.

Minute 10 pawh a ral hma in door bell a rawn ri tlâng tlâng a Keifer a nih ngei ka beisei.

Kawngka ka hawng sa tawh a hawn sak ngai lovin kawngka chu a rawn hawng ri rak a, a pen thawm pawh ka hre thei.

" Aurora... "

Lalpa leh!!  Keifer ngei a ni.

" Hetah... Hetah ka awm " ka theih tawka ring hian ka lo ti a,  in a lian sia a hre lo maithei.

Hmanhmawh taka choka lama a rawn tlan phei ri chu ka hre zui nghal a, min rawn hmuh rual chuan ka bulah a rawn ṭhingṭhi rawk rawk a, " damdawi inah ka hruai ang che " ka chhan hma hma in zo zet hian min pawm kang nawlh a,  min chhuahpui nghal nal nal bawk.

Emergency room ah mipui zik hut hut na ah chuan min mut tir a, damdawiin hi kum tamtak hnua ka kal lehna chauh a ni lehnghala a ruk chuan ka hlau takzet.

" Khawiah nge I chhungte? " doctor in min zawh chuan Keifer melh chung hian, " hubby... " ka ti kher a,  mak ti takin min rawn en ha ringawt.

" a pasal mi I nih? " doctor  chuan a zawt veleh a 'aih ' a ti hmak dawn emaw ka tih laiin ngawi reng hian a bu nghauh a,  a rukin ka khi sek a.

Dan angin ka pasal a ni miau a,  ka pasal a ni lo tiin dawt a sawi duh bik miah lo.

Keifer an min kalsan daih ka hlau bawk nen doctor ten min buaipui lai chuan Keifer banah nghet takin ka vuan tlat a.

" kal miah suh... I kal chuan ka rek ang che " thei leh thei lo hian ka ti ṭawk ṭawk a, nurse in eng damdawi emawni hian min rawn chiu a reilote ah ka pum na chu a rawn reh riai riai a,  ka muhil nghal siai siai bawk.

Doctor sawi dan chuan chaw ka ei ṭhat ngai loh avangin pumpui ulcer nasa tak ka nei a,  hun rei tak thil ka ei loh hnuah ka pum in a dawl zawh loh tur khawpa tam thil ka ei leh thut ta sia indigestion ka nei tel niin a sawi.

Kha pizza phiangsen vang vek kha.

Tui taka ka mutthilh lai chuan ṭap leh na tuar thawm chuan min ti harh hlawl a, damdawiin ah ka lo la awm reng chu niin .Keifer lah chu stool-ah ṭhu in bang
ngheng chung hian alo muthlu bâm a,  a kut lehlam in ka kut nghet takin a chelh tih ka hmuh chuan ka nui nghal ver ver a.

" ka ei zo vek tak tak duh ang che " ka hriat tawk lek hian ka phun sep a;hetiang anga min ngaihsaktu leh min buaipui tu hi ka vawikhat tawnna a ni a awmdan pawh ka thiam lo.

Ka mutna hi parda in an zar hliah vek a chu chu remchangah la in Keifer muhil lai chu a hmuiah zawite hian ka va fawp a, rinloh deuh mai hian vawikhat min rawn fawp leh zeuh a mahse a rawn meng ta thut mai!!

Rang lutukin a ṭhutna aṭang chuan a tho nghal zawt a,  ka kut ala vuan reng a ni tih a hmuh rual chuan a kut chu a la sawn nghal vat bawk a, a awmdan avang hian ka nui lo thei lo amah zawk hi a inthiam lo niin ka hria.

" Dar 6:30 a ri tawh a nih hi, doctor ka va ko ange " a ti bah nuai a, doctor hmu tur chuan a kal nghal a.

In thleng min thlah leh thlap a,  phut let nei miah lovin ama pawisa in damdawi min lei sak vek bawka ,ka tan chuan vantirhkoh hi a ni ringawt.

"Vawiin chu I chawl hahdam dawn nia " khumah min mut tir thlap a,  ka pum pawh a na tawh tawp silova damlo angin min la en char char tho.

" tunah I haw nghal dawn em ni? "

" School kal ka ngai alawm" tih pahin nizana ka pizza eina bal chu bawlhhlawh bawmah min paih sak veka.

" chawl ve la "

" test a awm dawn a,  ka chawl thei lo" a ti deuh hmak , a chawlh veih chuan a nu a rawn lan lehnghal ka ring.

Ehee... Test kan nei dawn tih pawh ka lo hre ve reng reng hleinem.

"Hetah hian damdawi ka dah...na chhawkna hi kawl reng tawh ang che, mangṭha le "
A sawi duh a sawi zo te te a kal daih a tum a, lawmthu êm pawh ka la hrilh loh kha mawle.

" Duat... " a rawn hawi let ve mai bawka.

" ka vantirhkoh I ni "

Nui chung hian zep map lo in ka hrilh thawr a,  a hmelah danglamna eih a awm lo min rawn en vung vung a a in her vut a vawikhat pawh rawn hawi let lovin a kal nghal nal nal.

Keifer kal hnu lawkah ka inbual fai nghal sawk sawk a, mut hahdam chu sawi loh school kal turin ka insiam nghal a breakfast ei hman ngei ka tum bawk.

Keifer an min buaipui dan vel leh min ngaihsak dan te chu ka ngaihtuah let a, nui ver ver chung hian ka car kawngkhar ka hawng rak a.

" I va hlim hmel ve " Sebastian ka hmuh rualin ka nui tawp nghal hmak.

Ka car ngheng chung hian alo ding reng chu niin Keifer ka ngaihtuah atalang in ka lo hmu miah lo lehnghal.

" kum tamtak ka lo hre tawh che a khatianga I nui lai kha ka vawikhat hmuhna " min rawn pan hnai a, thinrim hmel zet hian ka lo melh hra thung.

"Breakfast kan ei dun dawn mi niang ?" nizanah ka mamawh laia a awm loh avang khan hauh hrep ka chak viau na in ṭha deuh hian ka be ta zawk a.

" tehreng mai " min rawn nuih a, ka car ah kan lut nghal a.

Sebastian nen chuan breakfast kan ei dun ta ngei a, innei mai tawh tur ni mah ila kan inkarah hian eng nge maw tak hian inpawh loh rukna riau kan nei .

" I pumna chu eng nge a an? " inthiam loh hmel zet hian min rawn zawt ta nge nge a.

" ka ṭha tawh... Na ka nei tawh lo" za lo zet hian ka nui der a,  lemchan te mai mai hnehsawh tak ka ni.

" zaninah I buai loh chuan zanriah kan ei dun dawn mi niang ?"

Nilo.. zaninah hna a kal ka ngai ,Keifer bulah hna thawh ngei ngei ka duh.

" okay... " tih pahin ka mit ramhuai chuan ka melh a, " oh!!  School ka tlai dawn...zanin dar10 ah ka inah kan inhmu dawn nia " ka bag ka la a, siai zeuh pahin ka chhuak nghal a.

Sebastian chauh nilo tu mipa mah hi ka be chhe ngai lo a chhanchu ka engmah an ni tlat lova ka biak chhiat nachhan tur ka hrelo. Keifer chauh hi ka mipa ngaihtuah awmchhun leh ka ngaihven awmchhun a ni a ,ani pawh hi ka thil neihte zinga pakhat ve mai ...ka ngainat leh duh em em ang chauhin ka ngai hmiah.

★Horace Mann School★

Miss Gaby chuan test question paper a rawn sem diat diat a question kan en chiah mai chu pakhat pawh thiam ka nei lo, engmah ka zir loh chu sawiloh class ah pakhatmah ka ngaithla ngai lova a mual bo in ka bo.

" Peter I thiam em? " ka piah lawka ṭhu Peter chu ka va be ru sa sa a, kut zaizir hian tlem ka thiam hi a rawn ti a.

"Nang I thiam em? " tiin min rawn zawt let leh a.

" theih chu nise he question paper phiangsen hi ka pawtthler ang " ka tih chuan a nui chhuak lo chauh.

Miss Gabby chuan minute40 hun kan neih tur thu te, tuna kan test ho zawng zawng hi exam na ah a pawimawh tur thu leh college zawn nan thlengin a pawimawh tur thu te chu a sawi dap dap a, midang ho in ngun taka an ngaihthlak laiin kei erawh ka beng lehlamah a lut a lehlamah a chhuak lehnghal .

Midang in an chhan tliar tliar lai chuan ka hma chiaha ṭhu Keifer ke chu ka pheikhawk chuan ka va chhir zeuh a, eng nge ti niawm tak hian a rawn hawi deuh a.
" tha deuhin I chhang dawn nia " tih ringawt hi ka lo hrilh a ,a chhan chhunzawm lehnghal char char.

Keifer chhan lai chuan midangin an zawh buai ṭhin avangin hnung lam aṭangin ka lo veng a , a chhan ṭhat loh mawlh ka hlau.

Ka paper pawh chhang ta lo chuan nizanah ka mu ṭha lo bawk nen muthlu lek lek in Keifer chu ka ven chhunzawm zel a.

" Keifer... " lehlam aṭanga rawn ti su su ri ka hriat rual chuan ka harh nghal kawk a,  " I rawn koh leh chuan Miss bulah ka sawi ang " ka lo ti let hrep a ka hmuh loh in Keifer pawh a nui tawp.

" Minute 5 in la nei"

 Miss Gabby in a puan chuan ka question paper chu ka han en ve dawn a alo awm tawh reng reng lo. Dawhkan hnuai ka bih lahin a tla bawk silo ,engtin nge ka paper ka dawhkan ami ngei chu a bo daih theih.

" Peter...Peter... Ka paper I lo hmu em? " a lu alo thing nar nar a,  a ngaihna pawh ka hre tawh lo.

Ka paper ka zawn kual chhungin hun a zo hman a,  ka paper lah ka la hmu der bawk si lo.

Aw le... A pawilo, engmah ka chhang chuang lova ka paper bo daih mahse a pawina a awmlo tiin ka rilru ka siamfel nghal a,  ka hahdam leh huai ta mai.

Chutia midangin an submit sap sap lai chuan Keifer pawh a zo ve ta aniang a ṭhutna atangin a ding a ka lam pawh rawn hawi lem lo hian ka paper ngei mai chu min rawn pe ta mai!

" a awihawm deuh nan a chhanve chauh ka chhang " a ti sam et a, a kal daih lehnghal.

Peter nen chuan mak ti takin kan in en ha a ,a ni phei chu kei ai ai in mak a tih hmel zawk.

" Keifer'an I paper a chhansak che tih hi ka la awih thei lo" Peter nen corridor ah kan inzui phei chhat chhat a,  kei ngei pawh hian mak ka ti.

Engvanga khatiang thil kha ti nge a nih? A chhanna erawh Keifer chiahin a hria.

" a â deuh a ni lo maw? "  tiin ka zawt hâ a.

" mahse a IQ 190 a nia,  a â thei lo hrim hrim"

" anih chuan engvanga ti nge a nih? " ka ti leh a.

" kei deuh hian asin mak ti,nidangah chuan darkar chanve pawh a ṭhut hma in a zo daih zel a... a ṭhu rei ka ti reng a ni,  I paper a chhansak vang che alo nih kha "

_________________________________

Ka thawhna restaurant ah phur zet hian pheikhawk sang nen ka pen lut a Keifer an min hmuh chuan mak a ti ngei mai, min en reng ringawt.

" Hi!  Duhtak " ka ti deuh kher a, a duh lo leh ang chu.

" Eng nge hetah I rawn tih? " midang hriat hlau tak si hian min rawn zawt a.

" eleee... Hna ka thawk dawn" ka tih phei chuan ṭawng ngaihna pawh a hre lo.

"Keifer....nizan aṭangin a rawn thawk thar chauh a, a locker tur ilo va kawhhmuh dawn nia" dawr neitu chuan alo ti nghal zung zung a,  Keifer pawhin a hnial ngam bik lo locker room lamah kan inzui lut ta nge nge a.

" wow.. a nuam hle mai" tihchhan nei deuh hian locker room thim rek ruk, en mai pawha nawm loh hmel zet chu ka fak der chiam a ,ani erawh in min ning hmel zet hian min rawn en a " Engvanga rawn thawk nge I nih? " tiin min zawt zui zat a.

" nangmah vangin "

" mahse ngatinge? " a ti leh a.

Zawhna a ngah reuh hle mai.

" hmuh reng che ka duh alawm" ka lo ti sam et a, ka chhan danah erawh a lungawi lo tih a hriat theih.

" haw la va mu hahdam rawh " tih pahin ka banah a vuan lawk a min kai chhuah a tum a mahse ka lo ṭang ve tlat.

" ka haw dawn lo" min vawnna chu ka thing thla pawp a,a inrin hma in bangah ka nam bet thut a mak ti takin min en reng ringawt .

Zawi tein ka kutzungchal hian a biangah ka zut thla a, a mit takah en kar chung hian" min hnawhbo tum eng ang mahla I thei lo ang " a hmui zawnah ka thaw lum ham ham a, mak deuh maiin ka thinphu a rang in electric volt sang taka deh ang mai hian ka ṭek chuai chuai a engtin emaw tak ka sawifiah theih si loh hian ka awm.

"Ka ta I ni tawh a ka ta angin awm rawh " zawi te hian a hmuiah ka han fawp thut a," oops! " ngeizawm zeta tih leh kher pahin ka locker ka hawnsan daih a,  a ni erawhin ngawi rengin ka che vel chu alo thlir reng thung.

(chhiar zawh veleh fakna khu aw ...)

Read More

30 days with Mr Genius -6

CHAPTER -6

'Sweet but Psycho'

★Aurora's POV★

Balcony ah wine in mai mai pahin thla eng hnuaiah contract chu ka han thlir vang vang a,  hetianga contract ka sign tir loh hi chuan min pehhel leh dawn tih ka hriat avang chauha contract hi siam ka ni.

" ka duat viau ang che " tih pahin contract chu ka fawp a.

Ni e, ka thil neih te hi chu ka duat in a ṭha thei ang berin ka enkawl ṭhin ,chutiang chiah chuan Keifer pawh hi ka enkawl ang.

A tukah chuan phur takin school ah ka kal leh a mahse classroom a ka luh hma in Junior year ho room ah ka lut hmasa ta zawk a, ka pawi sawitu apiang chu ka palzam ve mai mai ngai lo.

Junior year room ka luh chuan an lo awm nuk nuk a, a ṭhen an zai a a ṭhen dawhkanah te an ṭhu a, mipa leh hmeichhia kil khata lo infawp lah an bang lo.

Chutia an class a mi pawh nilo min hmuh takah chuan an reh nghal ṭhap a ,keilah Sharon ṭhutna lam panin tlar hnung lamah ka bai phei sawih sawih a.

" Nangnu phiangsen hi I la duh belh a ni maw? " Sharon chu a ṭhutna aṭangin a rawn tho chhuak a, ka hma ah tak ding in min rawn hmachhawn ran a.

" Phiangsen a... ?"  ka nui lui hak a,  Phiangsen tih te mai mai,  ka middle name a nih hi.

" aw ...duh belh e " ngeiawm zetin ka tih chhunzawm zat a.

" hahh...banah toilet ah lo awm ang che"

" tunah hian chingfel law law ang " tih pahin ka bag a ketchup chu ka phawrh chhuak a, a kawrah tak ka kap sen luai a,  midang ho chu an lo wow nasa mai.

Sharon thinrim chuan rin ang ngeiin ka samah a rawn kek nghal bawrh bawrh a,  keilah ka duai bik der lo ka kek let ve nghal a kan insual chu a ni nghal der.

Chutia tumahin min ṭhelh pawh tum lova min en ṭhap lai chuan principal in min rawn ṭhelh a,  office ah min ko lut nghal.

Reife Principal in thu ṭha min hrilh hnu chuan classroom lam ka pan chhat chhat a,  principal thusawi zozai pawh kha pakhatmah ka hre zui tawh lo chutah volunteer club ho zawm turin min ti lehnghal a ,ka duh pawh ka thlang thei lo.

Corridor ah engmah thleng lo ang maia ka kal haih haih lai chuan Keifer leh Isabella te pahnih chu ka tawk hlawl a ,ka hmuh zawng ringawt pawh hian va pawh ṭhen sawk ka chak.

"Morning Dear " Isabella hmuh lai ngeiin Keifer ban chu ka va kuah chawt a, ka hmel a hmuh chuan mak ti hmel te pawh a pu.

" khawiah nge I kal dawn? " bei hnap chung hian ka zawt a, ka kuahna ka kut chu a pawt thla rang ngei mai.

" ughh... Keifer nen hian presentation nei dun turin min ruat a , hawh kal tawh ang " Isabella chuan min lo chhang a , rum zet hian ka va melh a.

" nakinah kan inhmuh dawn kha aw" an kal hma chuan ka ti leh hram a, mahse engmah sawi lovin an pahnih chuan an inzui a.

"Vawiin chiah henu bulah hian ka kaltir ang che " ka hriat tawk lekin ka phun sep a, kan insual na ka biang leh hmui vel hi na ut ut lo se chuan ka zui ve ngei ngei ang.

Ngawi rengin kan classroom ah ka lut a,  engkim mai hi ka ning vel vek.

" ngatinge I hmai chu? " ka ṭhutna a ka ṭhut rualin Peter chuan min lo zawt a , chhan pawh ka chhang peih lo.

" in in sual leh tawh em ni? " tiin min rawn zawt nawn leh a.

" mmm...a lehpek ah chuan a lu ka pawt darh tawh ang " inhum ruh nghalin dawhkan chu ka chum dawt a ,ka insual leh chuan min hnawtchhuak tawh dawn a, Keifer nitin hmuh ka duh chuan ka in bengdaih hram hram angai.

" Aurora... Eng club nge I zawm dawn? "

" chutiang min zawt suh, ka mu dawn " tih hmuk pahin dawhkanah ka bawk thlawp a, ka lu ka biang leh ka hmui tur ut ut hian ka khua te hi a ti sik dawn te hian ka hria .

Rei pawh ka bawh hma in Keifer'n min rawn kal pel fua a, a ṭhut ruala ka hawi chhuah chuan ka dawhkanah hian ice pack te reuh te hi a lo awm a .

Mak ti takin ice pack chu ka la a, Keifer ka en chuan engmah hrelo ang mai hian a ṭhu a mahse a dah tih ka hai lo.

Nui ver ver chung hian ka hmai vung el ul chu ka han dep vang vang a, ka dam nghal sawng sawng in ka hria mahse thil hriatchhuah thut ka nei a, ka ice pack ken lai chu dawnkan ah ka dah hmak a;  a chhan chu Isabella leh Ice pack hi an hming bulah ' I ' a awm ve ve vang a ni.

Ka mi thik tawh hi chu pe na ve ngat ngat tak ka ni.

Keifer chu topper tih takah engtik lai pawhin lehkha a bih renga hetianga a zir malh malh tawh hi chuan Isabella a rawn lang ngei ngei.

Isabella chu Keifer bulah ṭhut phei a tum lai ka hmuh chuan rang takin Keifer bulah chuan ka va ṭhu thak a, a lehkha zir lai tihbuai duh lo viau mah ila Isabella a rawn inrawlh ve sek ai chuan keiman ka tibuai zawk mai ang.

"Zaninah dinner ei dun ang " ka va ti dek dek a.

" ka hman lo " 

" zawhna a ni lo" ka lo ti ve hmak.

Chinese chhungkua aṭanga seilian a nih angin midang aiin tih a har dawn tih chu ka hria mahse ka beidawng ve ngai lo tih hi ala hrelo niin a lang.

Dinner ei dun tur ringawt pawha hman lo chu eng nge a tih ṭhin chiah tih thli thlai tumin class ban veleh ka zui ru ta a, minute 10 vel lek a tlan hnu ah a bag nen restaurant ah hian a lut a ; car aṭangin a lo chhuah leh hun ka lo nghak ta ringawt a.

" Engthil teh hrep nge maw a tih le? " minute 5 pawh ka nghah hma in ka ning nghal der. Car aṭangin ka chhuk ta ringawt a, restaurant a ka va luh nak chuan Keifer hmel reng reng hmuh tur a lo awm hauh lo.

A ruk te te chuan ka zui tih a hria anga min bum a nih te ka ring hman, waiter kawr nen kitchen aṭanga a rawn chhuah hma zawng kha chuan.

Rang lutuk in dawhkan kil berah ka ṭhu nghal tawt tawt a,  min hmuh loh nan chanchinbu ka chhiar der ta ringawt a a che vel chu ka thlithlai a ni zawk mah.

A nu khan routine a siam sak vek ṭhin sia,  restaurant a thawh hi a tel hauh lo ang le!!  A nih chuan a nu hriat loh hlanin a lo in hlawh ru reng a ni maw?

Chutia a awmdan vel ka enthlak ruk reng lai chuan ka lam panin a rawn kal ta mai!! vawilehkhatah ka inhliahna chanchinbu chu a rawn pawt sawk a, a awm mai mai pawh a nelawm tawh loh sa nak alaiin a thinrim hmel phei hi chu hmuh a nuam lo ve thlawt.

" Eng nge hetah I rawn tih? "

" thil ei turin "

" haw tawh rawh... hetah engmah tih tur I nei lo" awka vin miah si lo, ngeiawm si hian a ti a.

" a nih chuan kan sawi tlang law law ange... I hnathawk lai en turin ka rawn kal " khabe dawm meuh in ka en kar a, a hmel aṭang hian min ning tih a hriat theih.

Waiter a ni miau a , hnathawk dang ten an complain hma in, " Eng nge I ei dawn? " min en miah lo hian min zawt daih a,  ka rin aiin thil hi a hmachhawn thiam daih mai.

" I hmui " mak tih hmel zet hian min rawn en a.

"Tunah hian fawh che ka chak takzet " ka tih  zawm leh zat a, min en reng ringawt.

Rang takin a insiam ṭha lehnghal vat a, a lehkhabute a thil ziah nauh nauh pah chuan, " Coffee in la,  haw vat ang che " a ti deuh hmak a, a kal nghal nal nal bawk.

Coffee chu amah pawhin min rawn pe duh tawh lo , mipa pakhat hi min rawn pek tir a ; hepa zet hi zawng ka thil neih tawh ah chuan a la hlu ber awm e.

Vawiin a kan insual na lamah ka awm a nuam lo deuh bawk nen coffee ka in zawh veleh tips ah $500 ka hnutchhiah a ,phur lo tak chungin ka haw ta ringawt a.

Ka khuma ka ṭhut rualin ka bag atangin ka phone ka la chhuak nghal sawk sawk a, Keifer thawhna restaurant ah hna thawk tur an lak belh dawn avangin an manager chu ka call a , awlsam lutuk in waitress hna ka hmu nghal.

Ka inbual fai hnuah ka mu deuh chiah tih in Sebastian hian min rawn call hlawl a, Keifer ka rilru a a awm lai tak a lo ni bawk nen ka phone chu lukham hnuaiah ka theh lut pawp a, chaw pawh ei lovin ka muhil zui nghal a.

_________________________________

Chhun chawlh a zawh veleh phur takin classroom lam ka pan a ,Keifer lehkha zir hma va nang hman hram ka duh bakah vawiin tlai aṭangin hna ka ṭan tawh dawn bawka pheikhawk pawh tlema hniam deuh ka bun ve ngei.

" Aurora... I va kal chak em em? " ka hnung ah Peter an min rawn umzui hlawk hlawk a .

" Keifer ka hmuh hman ngei ngei angai "

" Aaaa... Hepa hian Physics bak a ngaihtuah lo,physics practical room ah professor ho nen experiment an ti leh daih tawh ang "

" chuvang tak chuan kan hmanhmawh angai " ka pen hlawk hlawk a, ka tlan ti tih tawh.

Classroom-ah ka tlan lut a mahse Keifer a lo awm tawh lo,  vawiin nileng in practical room ah project a buaipui char char avangin ka la hmu miah lova vawikhat tal hmuh ngei ngei ka duh a ni.

" physics practical room-ah a awm ang? "

 Peter chuan Keifer a awm lo tih a hriat rualin a ti nghal a , nuih pahin practical room a kal chu ka tum a mahse Sharon ṭhian pakhat hmeichhia emaw tih tur khawpa tuai hian kawngka bulah min lo dang ve khanglang.

Keifer hmuh ngei ngei ka duh bawk nen engmah sawi lovin ka kalpel a mahse ngeiawm zet hian ," I nu leh Pa, I pi te hausakna chen ve mai mai I nih kha...neih engmah I nei lo" min rawn ti zui hram a mahse ka haw hran lo, ka nihna diktak a ni miau a.

A ṭawng hrelo ang maiin ka kal lui ngat ngat a.

"father's day ah pa nei lo tur kan awm in ka hria " a rawn ti leh chiah chu in humruh ngai khawpin insum har ka ti.

Ni e... Ka pa hi Billionaire a ni a chutiang bawkin ka nu pawh real estate developer a ni a millionaire tho a ni. Chutah ka pi hian lawng siamna company bakah cruise company a nei a Billionaire alo ni lehzel bawk nen an zar ka zo a, an hausakna chen satliah ve mai mai ka ni mahse ka pa chungchang leh a jail tan chungchang erawh ka ngaithla liam ve mai mai thei lo.

Ka thinrim lutuk chu insum hram hram ka tum a mahse " I pa nen chuan jail-ah in lawm dun mai aniang chu, ka khawngaih hle mai che " a rawn ti leh khanglang a, insum ka ngaihna chhan ka hre tawh lo.

Chu tuaipa chu ngawi rengin ka pan hnai a " Joker hmaikawr vuah mai mai I nih kha " tiin min rawn ṭawngkhum zui zel a, kei erawhin ka pen hum lai chu ka hum nghet sauh sauh a, a bul ka thlen rualin pen chuan vih ka han tum a mahse Keifer an ka banah min rawn vuan hman.

Ka thinrim lutuk hi ka mit a sen vek tawh a,  a rukin ka khur dar dar bawk.

" Ti suh " ka mit a en kalh pah hian a rawn ti sup a,chu tuaipa lah chuan min lo hlau ngang mai .

Keifer'an ti lo tura min tih takah chuan thinrim hle mah ila pen chu chhuatah ka thlak thla a,  chu tuaipa tukhum sama keh dak lawp pah hian, " Joker nilovin killer clown hmaikawr vuah lo ka ni zawk " tiin a hriat tawk lek hian ka ti hram a, rang takin Keifer chuan classroom ah min kai lut nghal dawr dawr a.

" Engthil nge maw I tih le?  Khapa kha I vit ṭep a nih kha " Keifer chuan a theih ang tawkin min hau a. Keilah ka ṭhutna ah bawp khawkherh leh inkuangkuah chung hian ka thiltih avanga inchhirna nei miah lovin Keifer thusawi chu ka lo ngaithla kar a.

" ka vit loh kha " mahni inthiam chawp ka tum ve ngar ngar

" mahse I vit ṭep alawm... Khatiang kha engtin nge I tih theih ?" lu dawm meuh in a ti a,  a thinrim tel bawk.

" Wo sihuān ni (I like you)" a ṭawng laklawh lai chuan mandarin in ka ti thut a, a ṭawng tawp thut a mak tih hmel takin min rawn en nghal kawk bawk.

Chinese ṭawng tukin zingah tlemte ka zir a, hman nghal zel mai ka duh.

" Chinese in min chhang dawn lo em ni? " ka mitko ka san âk a, a hrilhhai hmel hian ka nuih a ti za.

" mawh?? wu sihuan ni ka tih chu... " ka ti nawn leh ngat a, a tih ngaihna hre lo chuan ,"project buaipui tur ka nei " tih leh kal a rual nghal a.

A chhuah hma in " Wo ai ni ( I love you)" ka ti leh hman hram.

Physics genius tih takah Keifer chu ban thlengin ka hmu leh tawh lo ,Peter sawi dan phei chuan scientist pawh vawikhat alo pui tawh a ni awm e.

Tlaiah Keifer nghah pahin ka piahtirh ata a vawikhat nan waitress form nen mi eitur ka sem kual a,  Keifer ka hmuh theihna tur a nih dawn phawt chuan engmah tih hreh ka nei lo.

" I tray chawi dan kha a dik lo chuan customer order I ziah dan pawh a dik lo" ka thawhpui nu waitress ve tho hian nichin aṭang tawh khan ka thil tih apiang min sawisel sak char char a,  Keifer vang chu nilo se ka ṭim hrep tawh ang bakah vawiin chu Keifer hi a lo kal har takzet.

" kha hei no leh thleng hi lo sil rawh "

" maw? "

" I rawn thawk thar chiah a, thleng vawikhat sil te mai mai chu thawk thar ho in an ti vek ṭhin "

Hah... Henu hi a inla senior vel a ni maw?  Zakthei lo lutuk mai.

" thleng siltu an awm reng alawm " ka lo ti ve tlat.

" chupawh nise... Kha hei hi lo sil rawh "

" Keifer hi khawiah nge? " zawn kual pah chuan ka ti a.

" Keifer te chu vawiin a off day alawm " a lo ti heu mai,ka mood a off nghal vek.

" Enga!!? " vin zet hian ka ti tuarh a, engmah pawh ti ta lo chuan choka aṭangin ka chhuak daih a,  min rawn la au zui nasa mai.

Chau hnepin inah ka haw a, nichin kha chuan ka ril a ṭam tawp si lova engvanga in ka thlen veleh a ril ṭam thut nge maw ka nih le? 

" engpawh ka ei chak " ka pum ka tuai vut vut a, eitur lah chu engmah ka nei der lo.

Chutia ka rilṭam ka leh ka leh lai chuan Trinity in Keifer phone number min rawn thawn tawh tih ka hrechhuak thut a,Keifer no. chu ka dial nghal a .

Vawi nga vel ka call tawh a, a la thei chuang lo ; rilṭam nen ka thinrim hlur tawh.

" tuna I lak loh chuan I chak lo ang " phun nuah nuah pahin ka call leh a, a la tawh dawn lo emaw ka tih tawh hnuah a rawn la hlauh.

" ka ril a ṭam " ka ti nghal ringawt.

" Tunge? "

"Hey.... Engvangin nge call I lak theih loh ?"  A engamah hma in ka vin nghal hluk hluk a.

"Number hriatloh call ka la ngai lo mahse engtin nge ka number I neih theih? "

" chu chu a pawimawh ber lo ...ka ril a ṭam , zanriah ei chhuak ang "

" ka hman lo, pizza order mai rawh " a ti a,  phone a dah hmak.

" hey... hey... zawhna ka zawt lo che, tuna I rawn kal nghal loh chuan ka pawtsawm che anga ka chhum ang che " ka ti tuarh tuarh a,    ka thusawi lah chu a hre ve tawh der silo.

Read More

30 days with Mr. Genius-5

CHAPTER -5

A tukah chuan ke na chung chung chuan pheikhawk sang ka bun leh ta tho a,  pheikhawk sang kher kher bun ngei ka duh sia bai uih uih chung pawhin ka bun lui tlat dawn hi a ni ringawt. 

" hreptak chuan... " ka ke na avang chuan ka phun nuah nuah renga, a nat deuh apiangin anchhia ka lawh bawrh bawrh reng bawka rei lovah school ka thleng ve mai bawk a. 

Classroom ka luh chuan tumahin 'morning' pawh min ti ve lova min en ṭhup reng ringawt, ka hmaiah thil a awm anih te ka rin phah hial. 

"Min en kur reng suh u " tih vin hlar pahin ka ṭhutna lam ka panin ka bai phei uih uih a ,Keifer erawh school a rawn la thleng lo pawh a ni mahna a ṭhutna a lo ruak hiau a. 

Ka ṭhutna ka thlen phei chuan ka dawhkanah marker dum hian 'thi rawh ' tih hi lian deuh hian an lo ziak a, ka ṭhutna pawh ketchup in an lo thai kawi nuai a ka thinrim lutuk hi ka alh thei mai dawnin ka hria. 

" Hethil hi tu tih phiangsen nge? " ring zet hian ka au lâwng lâwng a, ka ni hnihna chauh mah nise tumah hi ka dim dawn lo. 

" sawi rawh u " ka tih leh pawh chuan a rukin an in hrilhru sep sep hlawm a ,a ṭhenin min nuih bawk a tumah in min chhan an tum lo. 

" ka zawng chhuak khawp ang " ka ti a thinrim tak chungin ka bag a rawmawl chuan ka hrufai nawk nawk a, ka ṭhu lui ngat a. 

Chutia ka ṭhut tum bur lai chuan ka piah lawka ṭhu mipa chut hmel zet hian ka dawhkanah paper them hi a rawn vawm phei zeuh a, mak ti takin ka va en a. 

" en rawh " a tih chuan ngawi rengin paper chu ka han hawng a chutah chuan ' Sharon ' tih ringawt hi a lo inziak a,  a awmzia pawh ka hrelo. 

" Eng nge awmzia ?" Paper chu ka hmetkhawr nghal a. 

Chupa chu hlauh hmel tak hian a hawi zak zak phawt a chutah ka bul hnaih set ah hian a rawn kun phei a. 

" I dawhkan a thil ziaktunu a nih kha...Junior year (grade 11th ) ami? " a rawn ti sa sa a chunu chu tunge a nih pawh ka la hre chuang lo. 

" maw?" Ka lo la ti hu zui .

" nimina i insual pui tunu kha " a tih takah chuan ka thinrim thar leh hnuhnawh a ,nimin ah pawh khan min ti thinrim tawk tawh viau asin mawle .

A chak dawn lo lutuk .

" Mahse engvanga min hrilh nge i nih ?" 

" lawmthu sawina a nih kha ...nimina i chhan nu kha ka nau ania " a rawn ti leh sa sa a engmah sawi lovin ka lo nuih suk ringawt .

 

Sharon chu han zilh hlak ka duh viau na in Keifer vang chauhin ka ṭhutna ah chuan ka ṭhu ngat ngat a .Minute 10 a liam leh meuh chuan Keifer pawh a rawn lut ve ta nge nge alawm. 

" Hi! " 

Engmah thleng lo ang maiin ka lo nuih sang a mahse a hnungah hmeichhe pakhat in a rawn zui tih ka hmuh rualin ka nui tawp chiang kher mai. 

" Henu hi tunge? " tiin ka zawt a mahse min chhang lovin ka dawhkana thil inziak chu a rawn melh zeuh a, ka ṭawng hrelo ang maiin a ṭhu zui hmak bawk. 

Chunu lah chu Keifer piah chiah ah a ṭhu lehnghal a ,an awmdan aṭang hian an in nel hle tih pawh hai theih a ni lo. 

Rei lovah physics practical class kan ṭan nghal vat a, an pahnih chuan an in partner a engkimah an in râwn a, an ti dun zel bawka kei ve thung chu an ṭawng ngaithla reng reng in hun ka hmang thung. 

Engtin tin emaw chunu hming chu Isabella a ni tih te chu ka hre lehzel a, naupang leh zirtirtute ṭawngkam aṭangin an pahnih hian topper a ni tih te thlengin ka hriat belh a, he physics class zet chu Keifer chungchang ka hriat belh ta nual mai. 

"Keifer hi i duh deuh a ni lo maw ?" Ka partner leh nichin lawka ka dawhkana thil ziaktu min hrilh tupa khan a rawn ti a ,Keifer leh Isabella te ṭawng ngaihthlak ka tum lai tak a ni bawk nen ka phu chiang kher mai.

" deuh ni lovin ka duh " ka ti chhuak phawng a,ka zep peih vel lo.

"A awmlo hran lo,  Mr. Genius te chu hmeichhe tamtak in an duh rawn miau a... Engpawh chu nise Peter ka nia " 

" Aurora... Practical kha lo ti rawh ,ka pui hman lo che " Keifer te pahnih en reng chung chuan ka tih chhunzawm zat a. 

An pahnih awmdan vel leh an engkim mai chu ka thik vel vek a, ka hmu thei tawh thlawt lo ka ṭhutna aṭangin ka tho sawk sawka an pahnih inkar ah tak chuan ka va ding kher a,  Isabella chuan min lo melh rum ngang mai .

"Eng nge hetah I rawn tih? " a thil tih lai ti reng chungin Keifer chuan min zawt a chhan dan tur ka hre der lo. 

" ka pasal bulah ka awm thei lo em ni? " min runluih rei tawh bawka ka ti ve ngat a, midang awm lai pawhin ka sawi hreh lo tih a  hriat chuan a hlauhthawn ve hmel deuh in ka hria. 

" I dawhkan ah va kal tawh rawh " a rawn ti leh ringawt a. 

" min rawn tih pui rawh " ka ti ve tlat, Isabella hnen aṭang hian ka hruai hrang tur hi a ni ringawt. 

A tih ṭhin dan ang bawkin ka ṭawng hre lo ang mai hian a awm leh tlat tawh a,  hetiang anga a awm tawh hi chuan ka zia ka chhuah angai leh nge nge ṭhin .

" Duat.... Min rawn pui lawk teh,  a rei lo ang " ngeiawm zet hian ka ti duai a. 

" tikhan min ko tawh suh " 

" I rawn kal loh chuan a aia ringin ka ti ang " kan in blackmail leh ta chu a nih hi, a luhlul bawka ka lakah hi chuan luhlul thei lek lova ka siam angai. 

A tawpa tawpah chuan min ning viau mahse min pui turin a rawn kal ta nge nge a, ka kal hma in Isabella nen kan in melh rum te te phawt a a hnungah nui ver ver chung hian ka bai phei auh auh a. 

★ Keifer Wu's pov ★

Rei tak chhung min umzui tawh a, inneih certificate pawh nei mah ila tun thlengin a hming pawh ka la hre lo , hriat pawh ka tum lo. 

Class room-a ka luh chuan tumah an lo awm tawh lo an haw vek tawh pawh a ni maithei. 

Ka bag ah ka lehkhabu ka khung sawk sawk a mahse a dawhkana ' thi rawh ' tih inziak kulh chu tukin zing aṭang tawh khan ka mit a ti kham hle. 

A dawhkana a lehkhabu chu ka lak hma in ngun takin ka chhiar a,  a hming hre chak lo mah ila Aurora tih chu ka hmuhhmaih thei bik lo. 

Ngawi rengin a dawhkan hnuaiah a lehkhabu chu ka dahṭhat saka, ka rawmawl ah lai chuan a dawhkana thil inziak chu ka hrukfai sak nawk nawk a,  reh vek thei lo mahse hmuh a nuam ta deuh. 

" Eng thil nge ka tih hi? "

Harh chhuak thut niawm takin ka rawmawl chu ka ak daih a ; henu hi ka hnaih tur a ni lo. 

Classroom aṭang chuan ka chhuak nal nal a mahse tum loh deuhin Aurora in bai aih aih chunga a car lam a pan lai chu ka va hmu fuh thut a, kalsan daih duh mah ila car a luh hma thleng chu ka enzui ta tho a,  a chesual nawn leh lo hlauh. 

Chutia Aurora ka thlithlai reng lai chuan ka nu call ka dawng nawlh a, vawiin tlaiah hian zanriah kan kil dun dawn tih ka hrechhuak leh chiah. 

Tlai ka hlau bawka hmanhmawh takin inhmuhna hmun tura kan ruat lawk ah chuan ka tlan nghal a, ka tlai vaih chuan zilhna ka dawng leh dawn tih ka hai lo. 

Engang pawhin tlan mah ila ka thlen chuan ka nu a lo ṭhu rân tawh a,  a hmel aṭangin a lungawi lo tih ka hria. 

" ka nu, ka tihpalh " zah takin chibai ka buk nghal mawlh mawlh a,kei ngei pawh hi ka tlai avangin ka inthiam bik lo. 

" bawiha... ṭhu rawh " a tih chuan ka ṭhu nghal a, ka nu thu hi ka hial awm ka la hrelo. 

" tunlai hi I dam ṭha maw?  Class bakah I test lo tihte ka lo hria a " 

Dinner kan ei mawlh mawlh lai chuan ka rin ang ngeiin a rawn sawi chhuak a,  kan principal a lo zawt leh vek tawh .

Dawt hrilh ka duh lo a ka ngawi renga,  Aurora chungchang hi a hria anih chuan a rilru a na in zanah a mut theih loh phah leh dawn a ,a thawi pawhin ka sawi thiang lo. 

" hei I cher vek alawm...thil ei ṭha la,  I hriselna chauh ngaihtuah tawh ang che " duat takin ka samah a rawn chul a, ka nu hlim hmel ka hmuh theihna a nih chuan engpawh tih ka huam,  ka ti rêng bawk. 

" Bawihte...part time hna kha chu thawk tawh miah suh,  I lehkha zir chauh ngaihtuah ang che .A hunah tak gym kal la football avang hian scholarship bakah college ṭha takah a hlang kai thei che tih hi hre reng rawh " he thu hi kan inhmuh apiangin a sawi ziah ṭhin a,  en lo pawhin ka sawi chhuak thei. 

" Min ngaihtuah suh " 

Ka nu leh Pate fa neihchhun ka ni bawka, ka nu hian min atchilh ka ti mai ṭhin .Ka damloh chuan mi â ang maiin a phili a , engkimah min buaipui a, ka nun hman dan leh ka underwear thlengin engkim min hriat sak vek. 

" Chuan I daily routine pawh ka rawn thawn tawh aw,  tun ṭum chu Senior Year te i ni tawh bawka darkar khatin I lehkha zir ka ti tam a " ka kut chu a hum vang vang a. 

Ka sawi tawh kha ka nu hian ka nitin hun hman dan tur routine min siamsak veka,  chutiang ang chuan ka awm ngei ngei angai. Hmeichhia ka ngaihtuah a thiang lova ngaihzawng neih ngat phei chu a phal lo hulhual. Ka tette aṭanga min enkawl dan a ni bawka a hrehawmna ka hre hran lo, engkim hi ka tana ṭha tura a tih a ni tih hi ka ring nghet thlap. 

"Chuan.... Ka neih chhun I ni tih hi hre reng ang che, ka duatte ka hmangaih che " min chhuang tih hriat tak hian min rawn en a. 

Ni e,  ka nu neihchhun liau liau ka ni. Ka nu hi a chi kawng a phui avangin fa a nei thei lova mahse thiamna hmangin ka Pa chi chu a chhul ah a kap lut a, min pai chhung zawng hian min chhiat an hlauh avangin pawna a chhuah pawh an phal sak lova damlo ang maiin khumah chaw an pe a ni. 

Harsa takin ka piang chhuak a, ka hrisel loh avangin kum2 lai damdawi in ah ka awm leh a ,ka thi ṭhelh nghe nghe. 

Ka nu chul hi a ṭhat loh avangin an paih lehnghal a, kei chauh hi an engkim a engkim an neihchhun ka lo ni ta a ni. 

" e... Taka, I apartment kha te I ti tawh em?  I insawn dawn mi niang ?" Min ngaihtuah hmel takin min zawt a mahse ka nu vangin thla hnih danah ka insawn ziah a,  tunah chuan midang te angin rei tak luah ve ka duh tawh. 

" aih... A te lo" 

" tun aia lian hi ka lo zawng leh dawn nia... " ka nu in min biak mawlh mawlh lai chuan kan piah lawk aṭangin Aurora ṭawng ri ka hre thut a, rang takin ka hawi phei a. 

Ka hre dik chiah,  kan inneih certificate keng chung hian min lo nuih ver ver a thil atthlak tak a ti leh dawn tih ka hria. 

" Keifer.... " ka nu in min rawn koh rual chuan ka hawi let leh a mahse Aurora nena kan chungchang hi ka nu hian a hre tur a ni lo. 

Aurora chu a ṭhutna aṭangin a tho chhuak a,kan lam pan in a rawn bai phei auh auh bawk a ; thil atthlak a tih hmain ka nu bulah chuan, " washroom ah ka va kal lawk ange " tih leh thawh ka rual a,  ka nu min chhanna pawh ngaihsak lovin ka kal nghal nal nal a ka nu in min rawn hmuh hma in hmun reh lamah Aurora chu ka kai phei dawr dawr a. 

" oh!!  Mama's boy " a tih takah chuan ka nu thusawi kha a lo ngaithla vek tih ka hre thei.

" kal tawh rawh " ka thinrim emaw thinrim lo emaw ka ṭawngkam hi dawnsawn a nuam ngai lo. 

" he paper ah hian I sign loh chuan he kã hi I  nu bula âng thei turin a in peih reng ania " tih pahin a hmui chu a kawk a, henu hian min chhaih buai reng zawng chu a nih hi. 

" nitin nangmah hmu tur che in hun ka nei lo" ka ti a,  ka ti tak tak bawk. Ka nu routine siamah Aurora hmuh hi a tel tlat lo. 

" a nih chuan " tih leh kal nghal mai a tum a,ka nu a hrilh duh tak tak dawn tih ka hriat avangin ," ni 30 na ah kan inṭhen ang " tih pahin ka sign ta nge nge a, min hmin ta chu a nih hi. 

" aw le... tehreng mai,  hre reng rawh nitin in vawikhat tal hmuh che ka duh dawn ania" ka mit ah tak en in min nuih ver ver a. 

Engthil phiangsen nge tih a tum ka hrelo, he thil hi ka nu in a hriat loh chuan a tawk. 

(Fakna kha aw)

Read More

30 days with Mr. Genius-4

CHAPTER -4

2days later 

★ Los Angeles, California ★

Ka pi nen ngawi rengin zanriah kan ei dun mawlh mawlh lai chuan ka nu leh a bialpa chuan min rawn zawm a,  ka pi in lo be mahse kei erawh a awm ve tih pawh hre lo ang hmakin ka ei ngai in ka ei reng thung.

"Aurora.... New York a ka pent house ah I insawn dawn tih ka lo hria a " ka pi chuan a tih ṭhin dan ang bawkin min zawt thlap a.

" New York ah maw? " ka nu chuan a lo ti ha a mahse a ṭawng hre lo ang hmakin, " an peih fel tawh zawk, naktuk aṭangin ka luah ṭan ang " ka ti a.

" pawi I tih loh chuan engvanga insawn thut nge I nih? " ka pi nge nge a polite ṭhin e,  hei vang hian ka zah phah hle.

" school ka kal dawn ,Horace Mann School aṭanga graduate ka duh " ka tih chuan ka nu a lo meng phar nasa mai.

" maw?!  School a... mahse School kal I duh loh avangin home school I kal char char kha a ni sia" mak ti takin ring leng lawng hian a ti vak a.

A sawi dik chiah, school ah naupang dang tih duhdahna leh endawngna ka dawn fo avangin school kal ka duh tawh lova mahse hei Keifer Wu vangin ka rilru ka thlak leh ta chu a nih hi.

" chupawh nangmah vang a ni lawm ni" aw ki san miah lovin ngeiawm zet hian ka nu chu ka va melh kher a.

" Enga!  Keimah vang in maw ? Hahh" ka huat tur kher in min rawn nuih let sak a ,ka zia zawng zawng pawh hi ka nu aṭanga ka lak ti ila ka sawi sual awm love.

"Mipa dang dang I kawp lawr kual vela midangin an hre lo emaw I ti a mahse naupang dang ten min chhaih nan an hmang a ni lawm ni ? I hriat vek kha..." wine in pahin zaidam deuh hian ka ti a, ka nu erawh a sa tawh kher mai a alh lo chauh .

" in pahnih khan duhtawk rawh chu " boruak a sosan hma in ka pi a lo in rawlh vat a.

Ka nu hian ka tet lai aṭang tawhin min ngaihsak tak tak ngai lo, mipa leh a hna bak ngaihtuah a nei lo, ka pi bulah min dah tawp a ani erawh mipa dang dang nen an cheng a, an zin kual bawk a tun thleng pawhin a zia hi a la sim chuang lo.

"Pasal I nei ṭep tawh a engvanga graduate kher kher chu duh tlat nge maw I nih le?  Sebastian te chhungkua an lungawi lo palh hlauh ange" a rawn la ti leh hram.

"Chutia I duh viau te chuan Sebastian chu va nei la " ka ti ve sak a, ka ngawi mai mai thei bik lo.

Inneih chungchang pawh hi ka nu ruahmanna vek a ni a, Sebastian hausakna ka neih ṭhen a duh vang chauhin.

" nangma tana ka tih vek a nih hi " a awki a rawn san thut a, nuih pahin ka thil ei dan ngai chuan ka lo la ei ngar ngar a, nghal ve tak ka ni.

"I chiang chiah maw, ka tana ti I ni tih? " ka va melh khâi a.

"Haha.... Henu hian nungchang mawi pawh a hrelo a nih hi" a au deuh lâwng lãwng a, "nang ang rual ka nih hian ka nu hi ka hnial zawt zawt ngai lo " tih pahin a thinrim chu a rawn tho chhuak thut a.

Keilah in zam map lo hian ," kum15 ka nih in fa ka nei ve lo tal alawm" ka ti ve sak a chutah a thinrim insum zo lo chuan ka samah a rawn ṭham ta mai !

"I nu ka nih hi min zah ta che "

"Zah I duh chuan ka nu angin awm ta che " keh let ve ka tum a mahse ka pi in min rawn ṭhenhrang hman.

" duhtawk rawh u,  in zak lawm ni.... Aurora I room ah chho nghal rawh chuan Katie nangpawh I inah haw tawh rawh " dinning room khawk rawm rawm hian a ti tuarh a, ka pi meuh a rawn ṭawng chhuah takah chuan kan chhang ngam bik lo.

" ka hua che " ka room ka pan hma in ka
ti leh ngat a, min ngei leh viau ang.

Ka nu chungah hetiang anga ka awm avang hian midang chuan mak pawh min ti maithei mahse engtik lai mahin ka nu angin a awm ngai tlat lo, pawisa hmuh nan bak min hmang ngai lo. Fanu angin min en loh ang bawkin keipawhin ka nu anga en ka tum tawh bik lo.

LA - a ka awm chhung chuan nitin in ka nu ka hmuh leh angai dawn a ka theih anga rangin New York a kal vat vat ka duh.

" Trinity.. naktuk ah New York ah let ka duh a tricket min lo buaipui sak rawh " ka room balcony ah cigarette ka pak khu hlat hlat a,  hei pawh hi ka nu aṭanga ka zir leh bawk.

" I rualin ka rawn kal ve thei dawn si lova in enkawl ṭha viau ang che " a ti sep sep a, ka awm lo tur hi a lungngai ve tak tak emawni le?

" hey!... Khatiang khan awm vel suh" ka ti let hlar a,  hetiang anga rilru nem lutuk te hi ka hua.

" thinchhe viau mahla ka ngai dawn lutuk che" ka inrin hma in min rawn kuah thut a,huat hmel angin lang mah ila a rukin ka lo nui tet tet thung.

" chaw te kha ei ṭha ang che,  I thinrim avangin nghei mai mai tawh suh " Trinity hi ka nu ai mahin ka nu a ang mah zawk.

" aw... ka hria" ning hmel zet hian ka mit ka lo chet kual ralh a.

★Horace Mann School,  New York★

Queen of Extra ka ni ka tih tawh kha, school-a ka ni hmasa berah designer lar tak kutchhuak Versace hlangin ka inthuam a,  high heel nen classroom ah ka pet lut chhat chhat a ka inthuam dan aṭang ringawt pawhin mi mit fukna ka ni nghal amaherawhchu Keifer erawh min rawn en chu sawi loh a thil ziah lai ala ziak mawlh mawlh reng a ,min rawn la hmu lo.

"Zirlai thar kan nei a ,kut I beng ang u " kan zirtirtunu in a tih rual chuan Keifer chu a rawn hawi chhuak a, min rawn hmu chiah chu thlarau hmu thut te pawh a ang, a meng buai nasa mai.

" Aurora Walton ka nia, helai hmunah hian lunghlu la turin ka rawn kal a ni" a rukin Keifer chu ka va siai zeuh a, midang erawh ka thusawi awmzia hrelo in an hawi hu hlawm a.

Zirtirtunu in ka duh na lai takah ṭhu turin min ti bawka ṭhutna awl lam pan ta mai
lo chuan Keifer ṭhutna lam chu ka pan phei zel a, a tawpah Keifer hnung chiaha ṭhu hmeichhe pakhat bulah chuan ka ding chat a.

" insawn rawh " zawi leh nelawm loh zet hian ka ti a, chunu lah chu mi zakzum chi alo ni lehzel a, a insawn rang teh e.

" Hello..."

Nui ver ver chung hian Keifer hnungah chiah hian ka ṭhu thak a, ani erawh a rawn hawi let duh ṭhak lo min hrelo ang hmakin zu awm tlata mawle.

Class chhung zawngin Keifer chu ka tibuai char char a,  a khat tawkin a dawhkan ah paper a thuziak hi ka vawm deuh reng a, a chang leh a hnung ka tihzat sak a, a chang leh ka sam in a beng ka hawlh zat sak thul chutichung pawh chuan engah mah min ngai duh chuang lo.

Hepa hi mi eng nge maw ve tak chu a ni.

Chhun chawlh a hun meuh chuan Keifer vangin ka ṭhut na lamah ka mawng leh kawng a na hler hlur tawh mai,  chawlh hmasa chhung zawngin chhuak lovin lehkhabu a chhiar char char a ka chhuak duh bik si lova ka taksa zawng zawng hi a kham ṭhum tawh.

Keifer chu Cafeteria lam pana a kal pawhin a hnungah phur takin ka zui ve zel a,kei hi psycho dik tak chu ka ni hepa vang hian ka ã let der tawh chu a nih hi.

Chutia ka zui zel takah chuan thil hrechhuak thut niawm tak hian a ding thut a , rawn hawi let pah hian ," Engthil nge I duh? " tiin min zawt a.

" ka thil duh chu I hriat kha... chuan ngaihven pawh ka duh tel bawk " ka lo ti ham ham a.

" I â em ni? "

" aw... Ka duh che avangin ka ã tawh " a rul tawk lekin ka chhang ve zel a,tih vak ngaihna a hre bik lo.

" min rawn zui tawh suh " a ti leh ringawt a,  a thinrim tel bawk.

" aw I tih hunah ka zui tawh lo ang che "

" aih " a ti bung hmut a, a chiang fek fawk khawp mai.

" anih chuan I nupui ka ni tih hi school pumpui hnenah ka hrilh ang " ka duhdan ni lo mahse loh theih loh in ka vau ti tih tawh.

" engtin pawn awm la ka rilru ka thlak dawn lo" a ti hmak a, a kal nghal nal nal bawk.

Hah... A rilru ala thlak khawp ang.

Keifer zawn pahin cafeteria ah ka kal a,  ka hmu tak mai loh avangin kil khatah keimah chauhin ka chhun chaw ka ei niap niap a  ,a hma ang bawkin thian ka nei leh dawn lo a nih hi.

" Hmeli ...engthil maw Miss hnenah I lo hrilh a?" Kan piah chiaha hmeichhe pakhat ṭawng lung lung ri ka hriat leh chuan ka hawi phei ta nge nge a,  nichin aṭang tawh khan a  bengchheng tawh khawp mai.

Hetiang anga mahni zirlaipui te tih duhdah hi ka kham tawh takzet, tumah in chhan an tum bawk si lo. Keipawh endawng leh tihduhdah ka lo tuar hrep tawh a ka beng leh mit an ti kham tawh takzet.

" ka chungchang hi I lo hrilh vel amaw? " tih pahin chunu chhun chaw eitur ah tak chuan chil a chhak kher a,  chutah zet zawng ka ngawi mai mai thei tawh lo.

" nang ramhuai fanu leh anchhedawng nu kha... I bengchheng hle mai" ka ṭhut na aṭangin ka thil ei lai ei mial mial reng chung hian ka ti a, min rawn en nghal ṭhap a.

" maw?  Engthil maw I sawi kha ?" a rawn thinrim ngang mai , ka bulah a rawn kal phei nghal.

" ka sawi I hre duh amaw? F*ck you" ka ti chiah chu cafeteria a awm ho zawng zawng chu an lo au nasa mai.

" hmeli " thil dang sawi belh lovin ka samah tak a rawn ṭham ta mai, ka lo zam duh bik hauh lo nghet takin ka kut pahnih in a samah ka ṭham ve nghal.

Kan pahnih chuan kan insual nghal bawrh bawrh a tumah in min ṭhelh an tum lo,  hmuhnawm thlir in min lo thlir ṭhap a, min tih phur nan an au dur dur bawk

" midang ti duhdah thei tawh lo turin ka siam dawn che" ṭe chul chung hian ka ti a, a aia na in a samah chuan ka ṭham nghet sauh a,  tlawm mai mai ka tum bik lo ka thih thlengin ka bei let ang.

Chunu pawh chuan ṭawngkam chhe tinreng in min ṭawng khum a, anchhia min lawh bawrh bawrh reng bawk; chutia ṭhelh tu awm lo ta reng chu tu emawni hian hnung lam aṭangin min rawn pu lawp a chunu sam chu ka la pawt ṭang ṭang reng tho.

" min thlah rawh " ka ke ka leng vak vak a mahse cafeteria aṭang chuan min pu chhuak nghal dawr dawr a

" min dah thla rawh ka tih chu " ka ṭe nasa bawka mi reh ṭhep ṭhawp na laiah chuan min dah thla ta nge nge a, chutah chupa lah chu tudang nilovin Keifer lek chu lo niin ,ka thinrim tawh lo chiang kher mai.

Ka han ding ngil dawn ngial a ka pheikhawk bun a sang bawk nen ka ke ka rap na ngam der lo.

" I ke a na em ni? " rang takin min ṭhut tir nghal vat a,  nichin lawk kha chuan min huat hmel hle sia eng vanga min ngaihsak leh em em si nge maw a nih le?

" aw.. "

Ka ke ka ti ulh a ni maw!  hreptak chuan ; khanu vang vek kha .

Muang changin min tih nat hlau tak si hian ka pheikhawk sang zet chu min phelh sak a, ngun takin a che vel chu ka lo en ran a.

" I ni hmasa ber a nia khatianga che lo tur kha i ni" min hau ti tih deuh a mahse ka lo nui duh lek chauh.

" thleng nawn leh pawh nise ka insual pui leh tho ang,  khatiang in tih duhdahna kha ka hmu thei ve lo" ka ti a,  ka ti tak tak bawk.

" eng ang pawhin bei let mahla a reh tak tak thei lo"

" nilo... ṭha nia ka hriat apiang chu ka ti zel ang , ka thil duh loh chu ka bei let anga ka thil duh erawh engti kawng zawng pawhin ka neih theih nan ka bei ang " amah tih chhan deuh hian ka ti kher a,  a lakah hian ka beidawng dawn lo tih hi hre rawh se.

"LA aṭangin ka rawn kal vang vang a,  thla hnih nilo ni 30 chauh nitin ka bulah awm rawh.... Ni 30 chauh " zawi sap hian ka tih chhunzawm zat a mahse nichin lawka a Angel zia kha a rawn in thlak thawk a nih chu.

Tun lawka min ngaihsak hle si khan ka pheikhawk chu a theh thal tawp a, a ze ngai chhuah leh in a tho hmak a.

" LA ah let leh rawh " tih chiah a sawi, a kal nghal nal nal ringawt.

Inneih chungchang ka sawi apiangin engvanga hetianga awm thut ziah nge maw a ni le ? Kumkhua in kan inneih dawn pawh ni hlei lo.

" Hey.... Hey... Hetianga awm leh tur si engvanga min pui nge I nih... Hey!!  ding rawh ka tih chu" tiin ka au zui lawm lawm a, ka pheikhawk in ka vawm zui hman hram peka.

Read More

30 days with Mr. Genius -3

CHAPTER -3

Ka thlenna hotel ah Keifer Wu ngaihtuah veng veng chung hian ka ṭhu ar ar a,  hepa hi ka rilru aṭangin ka paih bo thei thlawt lo. Vawiin a min buaipui dan te min ngaihsak ang khan tuman min la ngaihsak ngai lo.

" khapa kha ka duh"

" maw? " Trinity in ka ṭawng ri a hriat chuan a rawn ti haw a.

" Keifer Wu hi ka ta ni turin ka duh"

" in ineih chhung chuan I ta a ni mai alawm"

" a dik..." Tih ringawt in ka lo chhang a.

A sawi dik chiah hepa hi ka ta a ni tawh, pasal ka neih hma reilote chhung chu ka thil duhzawng leh ka hlimna tak tih ve hi ka phu a ni.

" E... Taka, Horace Mann School ah chuan admission ka ti fel tawh " a tih chuan ka nui a " mahse engvanga pasal neih dawn dawn a school kal ṭha leh nge I nih? " tiin min zawh chhunzawm zat a.

" Infiam turin " ka sawi zawh rual chuan ka han melh zeuh a, a hriatthiam loh hmel takzet.

A tukah chuan Keifer duh ang ngei chuan dar 12 ah court ka thleng a ,  darkar 1 in ka tlai lui ngat .

Court kawtah inṭhenna lehkha nen inṭhen nghahhlelh hmel zet hian alo ve thauh thauh tawh a, ka han hmuh chuan ka nui lo thei lo;  hetiang anga thil siam sawisel bo hi ka la hmu ngai lo.

" Duat... min lo nghak rei tawh em? " hlim hmel pu sang chung hian ka va kuah chawt a, a mak ti chu che miah lovin a ding khawng nghal awt a mahse rei lovah min namsawn nghal.

" kha hetah hian sign rawh " tih pahin inṭhenna lehkha chu min rawn pe a, ka tel lovin inṭhenna lehkha pawh lo la fel vek tawh mahse ṭhen ka tum hauh lo.

" ka tlai chhan min zawt phawt dawn lo em ni? " lehkha la ta lo chuan ka in kuangkuah daih a.

" class ka nei a sign vat la, tifel zo vat vat ang "

Ni dawn tak , period khat keimah vangin a kal lo tawh a, period hnih a kal lo leh phawt dawn chu a nih hi.

" inṭhen ka duh reng reng hleinem "

A mak ti hmel ka hmuh chuan ka lo nui leh ringawt tawh.

"Kha... " lehkha chu min rawn pe nawn leh ngat a, " infiam kual nan hun ka nei lo"

" anih chuan kan infiam kual chhung nen thla hnih a ral hunah ka sign ang " ngeiawm zet hian ka ti a,  anih erawh thinrim insum tih hriat takin a in hum ruh ṭang ṭang thung.

"Eng thil chiah nge I duh? "

" nangmah " ka lo ti sam et a.

Trinity sawi ang khan kan inneih chhung chuan ka ta a ni dawn a, in ṭhen hnuah ka ta a nih tawh dawn loh ai chuan ṭhen loh ka thlang zawk; ka thil duh tak ka neih hian a sualna ka hrelo.

A hma kha chuan a wine in nachhan ka zawh hnuah ka ṭhen ang tiin ka ngaihtuah a mahse nimin a min buaipui dan leh enkawl dan ka hmuh khan ka rilru ka thlak chiang hle .

" Engvangin? " thum deuh bul hian min rawn zawt a.

" a chhan chu....ka duh vang che in"

"Lehkha hi sign vat rawh " a vin lek lek mahse hetiang vang mai mai hian ka rilru ka thlak dawn lo.

" ka sign I duh chuan thla hnih chhung nitin min hmu turin rawn kal ziah rawh " nui deuh ver ver chung hian ka ti a, min en rum ngang mai.

" Maw? " hetiang hi a thleng dawn tih a ring lawk bik lo.

" thla hnih chauh " ka ti leh a.

Ni e,  thla hnih chauh ka pasal neih hma chhung chauh ka mamawh. 

Hepa hi khawvela ka thil duh ber a ni a, reilote chhung chauh tal ka ta ni turin ka duh .Thla hnih a ral hnuah chuan ka bag leh pheikhawk te ang bawkin ka duh tawh lo anga chumi hunah chuan ka nun atangin ka paih bo vang vang thei tawh ang.

Reilote chhung chauh ka thil duh tak nen hlim taka infiam hi ka phu ve rêng a ni.

" I â em ni? " teh thlawt a; mahse hetiang thu hi ka vawikhat hriatna pawh a ni tawh lo a ngaiah ka nei tawh.

" ka thil duh ka neih dawn chuan â ṭhin e" ngeiawm zet hian hnai takah ka kal hnaih a, a awm ben thek thek pah hian "I duh emaw duh lo emaw he lehkha a ka sign hma chu ka ta I ni tawh tho tho.... Duat"

A Insum thei tawh bik lo aniang inṭhenna lehkha ka kut a hmehbel chawt pah hian, " tu ta mah ka ni lo" a ti vin hluk a,vawikhat pawh rawn hawi let leh tawh lovin a kal nghal nal nal a,  kei erawh ka lo nui ver ver thung.

_______________________________

A tukah chuan Los Angeles ah let leh vat ka ngaih avangin ka let hma in Keifer te school ah amah hmu turin ka va kal leh hram a , beidawn san ka tum hauh lo.

An school a lian bawk nen hmeichhe pakhat hnenah Keifer awmna chu ka zawt ta ringawt a.

" Keifer Wu.... Senior year (class-XII) ami kha maw? " a tih chuan hria niawm takin ka lo bu nghauh a.

" Engtin nge I hriat nghal theih? "Tiin ka zawt let nghal; henu hian a ngaizawng a ni maw?

" Mr. Genius te chu a lar alawm, he school ah na nâ na hi chuan, tunah chuan football an practice mek in ka hria "

Enga!!  Henu hian ka duh aiin Keifer chungchang a hre mah mah, eng ang hmeichhia pawh nise ka thik tho tho.

Khawi mah kalkawi lovin an football (American football ) practice na ah chuan ka kal ve nghal a, mipui ṭhutna aṭangin bawp khawkherh leh in kuangkuang chung hian Keifer che vel chu ngun takin ka thlir reng a,  eng ang pawhin helmet khum mahse ka zuk hre chat thei.

Rin ang ngeiin Keifer chu a thiam in a che vel pawh a hmuhnawm khawp mai, a engkim mai hi ka duh ; a englai mah hi sawisel tur ka hrelo ka Hermès bag limited edition ang mai kha a ni.

An inkhelh lai chuan Keifer chu a rawn hawi chho thut a, a tawp a tawpah min rawn hmu ve ta nge nge alawm.

" Hi! " ka ṭawng ri hre thei lo mahse ka zuk bye bye zeuh a,  a nui tawp chiang khawp mai.

Chutah ball a keng bawk nen pakhat chuan a rawn su thlu nghal tawp a, a nat hmel lutuk a ka lo ner sawk mai.

An practice zawh veleh nichin a ka lam a rawn hawi avang khan an coach in a hau mawlh mawlh lai chuan mipa ho dressing room lamah ka lo va lut phei daih a,  engpawh thleng dawn se hepa hi LA -a ka let leh hma in hmuh ngei ngei ka duh.

Football Player ho chu an inthlak na room lam panin an rawn haw haw phei dup dup a,  kei erawh kawngka bulah Keifer changin ka lo ding rân a.

Nidangah helai hmunah hian hmeichhia an kal fo tawh pawh a ni mahna min hmuh chuan tumah in mak an ti lo,  engmah thleng lo ang maiin an lut sap sap hlawm a.

 Keifer chu a hnuhnung berah a rawn kal phei chhat chhat a ,min rawn hmuh rual chuan a meng bial deuh na in ka biak hma hma in min luhsan hmak.

" hreptak chuan "

Inseh ruh chungin mipa rual inthlak lai chuan ka va lut ve hmak, tunah erawh mak tih hmel takin min lo en ṭhap tawh thung .

" Keifer.... Keifer Wu, inbia ang " amah ka hmuh mai loh avang chuan ring zetin ka ti thawr a, min en hrak hrak hlawm mai.

" rawn chhuak rawh " ka tih leh takah chuan bathroom aṭangin a rawn chhuak a hmanhmawh takin pawn lamah min kai chhuak nghal dawr dawr bawk.

" Engthil nge maw I tih le? " ka kut chu a paih nghal pawp a mahse a ban ah ka vuan leh hram.

" chhan na ka duh " a hmaiah ka han khawih leh kher a,  ka kut a la thla rang ngei mai.

" chhan na...ka chhan na maw I duh? ka chhan na chu 'aih' " Chiang zet hian a ti fak fak a, ka mit ah tak a melh kar bawk.

" mahse ka ta I ni tho tho"

Ka tih leh chuan bang chum dawt pah hian min ning hmel zetin a thaw hruih a,  ka lo phu zawk lehnghal.

" ka... " a ṭawng hma in a phone a rawn ri thut a, a rawn call tu chu a nu a ni tih a hmuh rual chuan a hmel a danglam nghal vek a, min chhang lovin hlauhthawn hmel takin inthlakna room ah min luhsan nghal a.

(I back hma in fakna mawlh mai khu aw ,chuan comment lamah kan inhmu leh vek Dawn nia)

Read More