My Drug is You-20 by Remruati Bawitlung(Haylor)

CHAPTER-20

Asher chuan ka ban ah vuan in min pawt hrang nghal dawr dawr a,a thinrim hmel em em lehnghal.
"tun aṭang chuan khami zawhna kha zawt leh tawh suh ang che"
"ngatinge? "
"ka sawi ang chuan awm tawp mai rawh" ka kut paih pawp pah chuan a kal nghal daih a,engvanga hua em em nge maw an ni le? He inchhung ah hian hei lo pawh hi sawi thiang lo ala awm ṭeuh ta ngei ang.

Rachael leh Joel te chuan dinner pawh an rawn kil lova ka thusawi avanga rawn inlan leh tawh lo an ni tih ka hriat ve kur avangin ka inthiam lo ru hle. Engpawh chu nise thil ka eitui lai anih mai bakah hetiang ang chaw ṭha hi ka ei lohna a rei tawh bawka ka hma a awm chu ka ei zo nghal duak duak mai, keimah ngei pawhin mak ka inti zawk.
"fimkhur rawh i hak ange? " Asher chuan napkin in ka hmui mawm vel chu a rawn hru fai nawk nawk a,a nu leh pate erawh in min hmu lo derin an ei ngaiin an ei char char thung.

"keimah chauhin ka ei hleinem... naute nen hian kan ei alawm... "tih pahin ka ei lui leh ngat a.
"hahh...hmeichhe ṭawp tak ini manner pawh neilo"
"engmaw!! tunah khan engmaw i sawi a"
"ei mai mai rawh"
"hetiang anga ei hi a ṭha lo viau em ni nge in chhungkaw dan ani lo zawk"
Ka tih takah chuan napkin paih pawp pahin Asher chu a tho thut a, kal a tum lai takin anu chuan, "Bawiha ei puar phawt rawh" alo ti nghal vata
"henu bulah hian ka chaw ei a tui nek love "tih pahin dinning room a chhuahsan nghal vang vang bawk.

"umm....Coco ei ṭeuh rawh aw... engah mah ngai suh " Grace chuan za lo zetin min rawn nuih eng ang mahse ka ei chakna a bo vek tawh mahse Pu Samuel erawh ngawi rengin a ei dan ngai angin a ei char char thung.
Hemite chhungkaw awmdan hi ka hrethiam tawh nek love chu mai bakah an zahawm khep khup hlawm bawk si a nuam pawh ka ti nek love.

Chutia kan ṭhut ngawi reng lai chuan Grace chuan, "Duhtak, i damdawi kha a zo tawh a vawinah Asher ka chah theihnghilh daih alawm mawle"
"a pawilo...naktuk ah kan lei leh mai dawn nia "
" mahse BP sang damdawi ani a... vawikhat ei hmaih pawh a pawi asin "
" ka lo lei dawn mi?" ka tum loh deuhin ka ti chhuak hlawl ringawt.
"khua a thim tawh bawk si a "
" ni e... Joel ka leitir mai ang" Samuel pawh chuan alo ti ve bawka mahse ka sawi laklawh tawh avangin ka tho vata.
"damdawi hming chu min lo hrilh ula... ka rawn let leh nghal ang "

Phur takin damdawi lei tur chuan ka chhuak nghal nal nal a,midang ka ṭanpui vang te pawh ani mahna ka lo khi leh vur vur ṭhin.
Damdawi dawr hnaivai ah an lo neih loh zel avangin a aia hla chu ka pan zel a darkar khat dawn lai chu damdawi dawr zawngin ka thang tawh.
A tawp a tawpah damdawi dawr pakhat hian an lo nei hlauh, lawm takin damdawi khai chung chuan car lam chu ka pan nghal vata,kawngka ka hawng tur chiah chu pa pakhat hian ka kut ah a rawn man chat mai!!

"tunge maw.... " ka sawi zawh hmain chupa hmel ka hmu chiah chu ka mengphawk chiang ngei mai.
"Logan.... "
"ka chhuah tawh hauh lo ang che " a aia nghet chuan ka kut chu a man bet tlata,ka mangang ru ngei mai.
"min hai aniang min thlah rawh"
"ka hai hauh lo che nanghi Meghan ngei kha i ni..."
"min thlah vat loh chuan police ka ko dawn nia "
" haha... police i ko ang maw!!  nang hi police hnenah ka hlan dawn che bum hmang nu" a tih takah chuan ka mangang lutuk in a kut ah ka seh sak vaka, a khup ah ṭhu hnawk khawpin ka tlawh chawrh a rang takin car ah ka lut a chak mangkheng in ka khalh chhuak nghal fua bawk.

Ka hlauthawng lutuk chu thawk pawh ka thaw ṭha thei tawh lo, min rawn umzui lo ani tih ka hriat rual rual chuan car chu ka tiding nghal vata, fimkhur thu ah tiin rang takin number plate ka thlak nghal vat bawk. Hunter car anih avangin a car reng reng ah hian number plate tamtak a thukru ṭhin a buaina a awm chuan a thlak mai ṭhin.
Buaina ka la tawk dawn chauh ani tih ka hriat chuan rang takin Hunter ka call nghal vata, vawi10 chuang ka call hnu ah pawh a pickup thei chuang lo.
"Engtin nge khapa khan min rawn zawn hmuh theih zawk kum4 lai a liam tawh si a "Hunter bula kal ta lo chuan Asher te ina awm chu a him zawka ka hriat avangin ka tlan tlang nghala, ka thlan tuiin min leih luh vek tawh.

Kum li liamta ah kha chuan Hunter hi min hmangaih ber tu emaw tiin kan pahnih a nuamsa taka kan awm theih nan sugar daddy tamtak ka lo nei tawh ṭhin a chu chu Hunter phalna thlapa ti ka ni.
Mahse Hunter chu a ni telin a duham chho telh telh a,a tawpah phei chuan an pawisa ruksak turin min nawr lui hial anih kha,kei lah ka la naupang in Hunter thusawi ang apiang chu ṭha vek turah ngaiin a sawi ang apiang chu ka ti mai ṭhin a, mahse kan duham luatah buaina nasa zawk kan tawh phah ta ani.

Chutiang ang chiah chuan Logan pawh hi hun rei tak chhung ka sugar daddy alo ni tawh ṭhin a, mahse mipa fing leh fel tak anih avangin kan bum mai mai theih ani hauh lo.Thla khat lek ah min atchilh tak em avangin kan duh angin thil a kal thei ta lo.Thla thum hnu lekah inneih pui hialah min sawm tak avangin kan duh aia rei chu kan inkawp a ngai ta tlat mai.Hunter chuan kan hlawkna tur anih avangin inhual pui turin min ti ta a, a sawi ang chuan ka ti reng bawka mahse Hunter nen a inkawp reng leh inhmu reng kan nih avangin kan inthup seng tawh lo, rang takin Logan chuan min man chhuak nghal vata Hunter nen chuan min thah hial a tum tak avangin kan tlanchhe ta a mahse min rawn zawn erawh ka ring ngai lo.

Logan khan thil tamtak min pe mahse thil dang erawh kan ruksak lem lo, kan hlauh ber zawk chu hming diklo leh nihna diklo hmanga thil ti kan nih avangin mi thil ti thei tak ani si a eng case pawh file se alo berah kum3 tal chu kan tang ngei ang, hemi anih avang hian fimkhur thu ah tiin part time hna takngial pawh thawk tawh lo turin Hunter chuan min ti ta a,chuvang chuan zan lama thawh chi leh vawikhata sum hai luh ṭawk theihna poker te leh car emaw bike racing te chu ka sum hmuhna ber te an ni a, Hunter erawh a thluak vawrh vir in eng eng emaw a ti a, sum pawh a ngah tawh hle.
Tunah erawh kum li lai a liam tawh a, mahse part time job erawh hlawh a tlem em avangin thawh kan tum tawh ngai lo.

In ka thlen chuan hmanhnawh takin car aṭang chuan ka chhuk thla vata,
"min atchilh lutuk vang vek "hawikual hrek hrek pah chuan ka phun bul bul a, ka hawi nasa bawk aniang mipa pakhat hi ka su chawrh ringawt. Logan emaw tiin ka maimichhing nghal vata,ka hlau lutuk chu ka che thei tawh lo ani ber.

"i va rei ve "

Asher aw ka hriat rual rual chuan a kawngah nghet takin ka kuah nghal vak a,ka thaw nghal siai siai bawk.
"eng nge maw i hriat le? " ka kut phelh pah chuan min nam sawn nghal dawrh a,ka tlu ṭep lehnghal.

"eng nge hetah i tih?" ka tih chuan lehlam a hawi nghal hmaka, a awmdan aṭang hian ka haw har em avangin min lo nghak ani chiang mai.
"min lo nghak em ni? "
"rawn lut vat rawh " tih pahin a lut nghal daih a,khik suk pahin ka zui lut ve nghal vat bawk.

Inchhung alo reh ṭhap tawp avangin sana ka en nghal vata, ka rin aiin ka thang rei daih mai.
"hei.. i pa damdawi tur "ka ti chuan a pawt thla vata, anu leh pate room ah a lut nghal zat bawk.
Engpawh chu nise hei ai hian ka fimkhur tawh tur ani, mahse engvanga kum li hnu a min rawn zawng hmu leh nge maw anih le.
"engtin nge ka tih tak ang " tih sap pahin khumah chuan ka han ṭhu hnak a,ka hun liam tawh a ka thil tih sual ten min vaw let mek zel chu anih hi.

Kawngka ka kalh loh avangin a rawn inhawng thut avang chuan ka phu ngei mai, hepa bawk chu engvanga min ti hlauthawng reng nge maw anih le?
"i kik maithei lo em ni... "
" inchungah han mu rawh " hmm... tlaiah kha chuan a room a awm kha a phal lo viau si a engvanga a rilru rawn thlak leh thut nge maw anih le?
"mahse... "
" ka fa tan chauha ti ka ni " ka sawi zawh hma hma chuan a rawn ti nghal vata, he naute hi kan chhuanlam reng mai dawn anih hi.

"i room awmna ka hre hleinem... " ning hmel zet hian a han thaw halh a,min vin hrep dawn emaw ka tih laiin, "rawn kal rawh " pangngai taka a tih avang chuan mak ka ti hle.
Ngawi rengin inchung ah chuan kan inzui chho hnak hnak a, a room a han hawn nak chuan felfai tak ani mahse lehkhabu a tam hle a, a zirlai ani bawka ruhro lem bangah a tar fer fur mai.
"hethil hi... " khawih ka tum rual rual chuan ,"khawih hlek suh... engthil mah hi khawih suh ang che"
naupang kum5 mi lek pawh ka ni lova khawi loh tur inhrilh rual pawh kan ni tawh lo.

"anih chuan inhnuai ah sawn vek mai la "
"zanah i mut dawn ah chauh ka room ah hian i awm ang....a bakah chuan luh pawh in beisei suh ang che, chuan i hmel hi hmuh ka duh vak loh avangin i mut duh hunah min rawn text mai dawn nia"
"ka hrethiam e.. " inhnial buai ka peih loh avangin ka jacket phelh chung chuan ka han ti a, chair ah ka theh thal tawp avang chuan alo ngaithei lo ngang mai.
" i jacket hi hetah hian khai ang che " felfai takin a khaina turah chuan min khaisak nghal thlap a, mipa che fel tak anih avangin kan inmil dawn lo tawp mai.
"awle... awle...ka mu tawh dawn, chhuk tawh rawh " ka tih chuan pajama nem zet hi a rawn theh thla pawp a," ka nu pek che anih kha"tih pahin a chhuak a, kawngka a khar nghal thlap bawk.

Read More

My Drug is You-19 by Remruati Bawitlung(Haylor)

CHAPTER-19

Doctor hmu tura ka kal hnak hnak lai chuan ka inngaihtuah mûk hle, Hunter puih hi ka duh bik lo chu chuan ka awm a ti nuam lo in min ti rilru hah takzet.
"hey.... " ka darah tuemaw hian a rawn khawih zeuh avangin ka hawi let vata, Freddie bawk kha!!
"eng nge hetah ila rawn tih?"chu thu chu zawt hmasa zawk tur ka ni asin le.
"umm...doctor hmuh ka tum a"
"anih chuan puih theihna che ka nei em? "
"Dr.Bruce King khawiah nge ka hmuh theih ang?"
"kan kalna tur a inang a nih chu"a tih chuan ka lo khi suk ringawt.

Freddie chuan Dr. Bruce chu min hmuh pui mai bakah ka thil hriat loh tamtak min hrilh belh ṭeuh bawka a ruk tak chuan ka hlawkpui in mi sual tak leh thawveng tak ani reng bik lo ani tih chu ka hre thar lehzel bawk.
"um... i pa chu a rang thei ang berin an zai vat ka ring"midang hriat duh vak lo mah ila min pui tu ber ani sia a hre lo thei si lo lawm le.
"i buai lo em ni tinge hetah i la awm reng? "
"ughh....engpawh chu nise Freddie ka nia " hre tawh tho mah ila nuih suk pahin "Coco" ka lo ti let ve suk ringawt, mipa in hetiang hian min la tih hmasak ngai loh avangin ka lai ru chem chem lehnghal.

"i phone number ka nei thei angem? "
"tehreng mai " engah nge ka phal loh ringawt ang bakah mipa chhelo leh hmelṭha tak ani lehnghal.
"umm...vawin chu ka hman si lova naktuk ah kan chhuak dun dawn mi niang ka sawi awmzia chu lunch ei turin,movie ughh...engpawh"
"Date maw!! "
" ani mai aniang chu umm...i duh loh pawhin lunch satliah ang pawhin "
"haha...nia.. " khik vur vur pahin ka kal nghal nal nal a
" ka rawn call ang che " a rawn tih phei chuan ka hmai a sen nghal ṭawn ṭawn thei.

America, Europe tih velah chuan khawlaiah mipa in i number an rawn dil che a i mi duhzawng tak an lo nih phei chuan in hre ngai miah lo pawh nise number an in pe mai ṭhin, an inbiak zui phei chuan inngaihzawn chu chiang sa mahse kei erawh mi pawhlawh leh awm duhdah viau angin lang mah ila pangngai taka mipa kawp hi ka la neih loh avangin hetiang thilah hi chuan ka zûm ru viau.
Zankhat chhuahpui te chu han nei ve lawp lawp ṭhin mah ila ka hna leh ka nihna in a mil loh em avangin hetiang ah hi chuan mi thar tak ka ni.

Ka ti ta sa sa engkim hi zawh vat vat a zalen taka awm ka duh tawh avangin Pastor Samuel te in lam pan chuan ka tlan nghal vang vang a, ka rilru te te chuan engpawh thleng dawn se Asher an rilru na taka min siam ang khan a chungah pawh ka let tir ve ngei tur ani tiin ka inhrilh mawlh mawlh a, inseh ruh ṭeuh chungin ka in hum ruh tân bawk.

Enhpawh chu nise Lily ka hrilh tawh ang khan tun dinhmun ah hi chuan Pastor Samuel te ina awm hi a ṭha ber in ka hria. Ka naute tan pawh keimah chauha enkawl tawp ai chuan a ṭha zawk anga,Hunter pawh awlsam takin ka pui thei bawk ang.

Kawngka pawh kik lovin hawng nghal ka han tum rawk a, an lo kalh avangin doorbell chu ka hmet leh ta nge nge a.Asher nu in kawngka chu a rawn hawng a min hmuh chuan mak tih hmel tak hian min rawn melh nghal kawk a mahse nu fing leh fel tak ani bawka rang taka insiam ṭha nghal in,"Coco nang i ni maw rawn lut ta che "a ti nghal diam a, a aw zaidam tak chu a hahdamthlak hle nghe nghe.
Inchhung kan luh rual rual chuan,"Samuel chuan inhnung lamah hahthel a phiat a, a zo ṭep tawh ang" a ti nghal zung zung bawka, min biak dan aṭang chuan min nel a tum ve hle tih ka hai lo chiang kher mai.

Ngawi rengin chair ah chuan ka ṭhu ran a midang an awm bawk si lova ka tlangnel ru phian bawk.
"i in checkup leh tawh hrim hrim em? "
"aih... "
" anih chu... " tih sap pahin a nui tawi tap mai, ka nelawm loh mai bakah ka lo ti hmuk hmuk bawk nen ka pawi sawi a hlau ni ber hian ka hria.
"umm....engatinge i rawn kal teh mial a? "
" in in ah ka awm tawh dawn mawle" Pastor Samuel a rawn lut ve chiah bawk nen an nu nen chuan mak tih hmel takin a han en nghal kawk a, ka thu sawi chuan a ṭhawng hle niin a lang.

Samuel pawh chu tui in pahin a rawn ṭhu ve nghal thak a, ka thutlukna avang chuan a hlim hmel hle nghe nghe.
"a ṭhat hlauh chu thutlukna ṭha tak ani "
"mahse in la innei bawk si lova" Samuel nupui Grace chuan alo ti ha bawka.
" Asher hi ka nei lovang mahse ka fa erawh ka pe thung ang, ka duh zawng chu naute ka nei hma a in îna awm hi ani" Grace chuan ka thusawi tin mai te chu a hrethiam lo in mak a ti hle a, han sawi mai tur pawh a hrelo.
"engkim a ṭha vek mai ang "Pu Samuel chuan a nupui chu alo hnem nghal vata, an tan chuan thil mak pawh ani reng ani mahse duhthlan tur dang an nei tlat lo.

"keichu hetiang ringawt hi chu ka pawm thei lo... Coco, inneih ula a ṭha zawk lo maw "
" hahh.... in fapa hi ka duh in ring em ni?,a nun in tih chhiat hma in a duh tak chu neihtir zawk rawh u"
"engatinge hetiang thil hi ka chungah a thlen tak mai, Pathian pawh a zahawm zozai tawh e "
"Grace...thil thleng engkim hian awmzia a nei ania, lo nghak tawp mai rawh " eng chungchang nge maw an sawi nuap nuap le, engpawh chu nise vawin aṭang hian awm nghal law law ila a ṭha ang.
"ka chau lutuk khawiah nge ka room tur hi? " zakthei lo zet chuan ka la ti ham ham lehnghal.

"eng nge hetah i rawn tih?" kan hawi rual nghal ṭhawt a, Asher chu puak mai thei niawm tak hian alo ding khur a, engang pawhin thinrim mahse a nu leh pate ka lamah an ṭang dawn ani tih ka hriat avangin ka zam duh der lo.
"Vawin aṭangin Coco kan inah a rawn awm tawh ang " Pu Samuel chuan ka sawi ngai lovin a hrilh hlauh.
"engmaw!! "
"i room ah a awm angai dawn a... guest room ah i bungrua vel sawn phei nghal la a ṭha ang "
" ka pa...engthil nge maw i tih le?"
"i hriat angin naupai tan chuan guest room khi a zau tawk lova,bakah bathroom a awmlo bawk nen Coco tan chuan i room a awm khi a awlsam zawk "

"Asher bawiha... Coco hian mut hahchawlh vat a duh dawn ania" Chutia anu lehzel pawhin a tih takah chuan ka khi nghal suk a, Asher erawh thinrim takin a room lam panin a kal cho nghal
vat thung.
"Coco... tun dinhmun ah chuan guest room a sawn lo va hahchawl mai la a ṭha in ka hria Asher chu kan lo sawipui leh dawn nia " Pi Grace ang nu a nei hi chu an vannei lel lul ngawt mai chutah lawmna chang an la hrelo zui.

Asher hi chu ka hrechiang lutuk tlat,a nu leh paten an tih tlat chuan a hnial rei bik dawn lo achhanchu raipuar hmun nuam lo taka awmtir duh tur khawpa rilru chhia ani tlat lo.
Mahse ka mamawh laia min ṭanpui a duh loh vang leh khanu kha a thlan zawk avangin rilru na taka siam hrim hrim hi ka duh.Min ngaihsak a in tiam tawh angin a tawp thleng a thutiama ding tur anih laiin ka thusawi tur em pawh a ngaithla duh lo ania, a ngaih anga mi ṭawphnawk leh mi tenawm ka nih loh zia hi la hre mawlh rawh se.

Nimin piah aṭangin ka awm a nuam tawh lo bawk nen guest room ka luh rual rual chuan khumah ka let nghal tawp a, ina ka khum nen a khaikhin chuan vanram hi ani ringawt. Inah kha chuan hnungzang ruh na vek khawpa ruh ah ka mu ṭhin a,ka pa a awm phei chuan thinthi pawhin ka mu ngai meuh lo.
Maktak maiin he ina ka luh tawh hi chuan ka thla hi a muang siai siai ṭhin, tuman min rawn tih nat mai chu sawiloh min rawn luhkhung dawn lo ani tih ka hriatreng avangin thlamuang takin ka han maimichhing vang vang a, ka chau bawk aniang reiloteah ka muhil nghal der.
________________________________________

"hey... " min rawn sawi nawk nawk avang chuan ka harh nghal vat a,ka in en chuan puan ka lo sin diam tawh a khua lah chu alo thim thet thet tawh lehnghal.
" eng nge? "Ka sat deuh huam avangin ka jacket phelh pah chuan ka ṭhu chhuak nghal vata, hetiang em em hian ka la mutui ngai lo.Tho hlim hlawl ka ni bawk nen Asher hmu lo ila chu ka awmna hi ka hai hrim hrim ang.
"rawn awm i tum tak tak em ni? "
"engvangin nge ka awm loh ang " kan inchhang tawk hle.
"hreptak chuan... min tibuai lo hian i awm thei miah lo em ni?"
"ka naute vang chauha awm hi ka ni " min chhan ṭhin dan ang bawk in ka han chhang let ve leh kher a, naute kan chhuanlam tawh hi chuan sawitur hi a vang pharh zel.

"anih chuan ka hmuh thei turah rawn in lan suh ang che "
"i â em ni... dawithiam ka nih loh hi engtin nge ka intih bo reng theih bik ang "
"Lalpa leh!! min ti â thei takngial dawn, engvanga lo rai kher kher nge maw i nih le?"
"mipa i nia kei hmeichhia sex kan hman te chuan rai tur ka ni dawn lawm ni "
" mahse vawikhat chiah te chu "
"vawikhat chiah ani tih i chiang chiah maw... khami zan khan ..."
" duhtawk rawh ,engpawh chu nise i rilru i thlak tur ani lo "
" hahh.... ka neih duh che i ring reng reng emawni le? "
"i jacket kha ha vat rawh chuan min rawn zui chhuak hauh suh ang che " tih pahin a chhuak nghal nal nal a, ka lo ner suk ringawt.

Ka jacket hnuaiah hian sport bra chauh ka hak mai bakah chet pui a awlsam zawk avangin thawmhnaw themlem deuh hi ka ha leh mai ṭhin.Ka dul te pawh rawn kiar ve deuh tawh mahse lai lang kawr hak ka bansan chuang lo.
Lum ka tih mai bakah Asher sawi vang hrim hrim khan ka jacket chu chair ah ka thehphei pawp a, sport bra nen chauh chuan ka chhuak nghal teu teu bawk.
"Grace ka ril a ṭam" ka tih chuan mak tih hmel takin min rawn en ha hlawm a, an lo awm kim vek avangin Asher chuan thawmhnaw dang ha turin min rawn mitmei zeuh a mahse ka hre duhlo der tlat thung.

"dinner ka peih fel ṭep... kha heihi lo in rawh " Rachael chuan juice chu min rawn pe nghal sawk sawk a, tuman min en hran loh avangin mak ka ti hle nghe nghe.
"umm.... Coco, thawhṭan ah in entir turin kan kal dawn mi niang " a tih chuan ka lo bu nghat a, peihlo viau mah ila naute tan ka tih tawh kha.
"chuan kan bazar nghal anga,hetiang anga chhuahpui tur hi ka nei ngai lova a nuam dawn lutuk "
"i pasal nen hian in inneihna a rei tawh hmel viau sia ngatinge fa in la neih loh a " ka tih chuan ngawi rengin a thil tih lai chu a dah hmak a, "umm.... min lo hrethiam lawk "tih leh inchung lama tlan chhoh a rual nghal, sawisual ka neih awm pawh ka hre si lova engvanga khatianga awm thut kha nge maw a nih le?

Read More

My Drug is You-18 by Remruati Bawitlung(Haylor)

CHAPTER-18

"hreptak chuan... " lei chhir khuk luih pahin ka lu chu ka han dawm vang vang a, khanu kha a â ta emawni le?  a rai mai bakah a khua a sik bawkah chutah amah kut thlak ngei tu chu a zui leh amaw!!
Ka thinrim bawk si tihngaihna hre lo chu car ah ka lut a, steering ben pawp pahin
"Dammit....!! "
ka han ti vin leh hlar ṭhin a, henu hian ngaihsak hi a phu hlawl lo, heti lai chen chen amah enkawl turin ka kal tawh a thuawi taka awm tur ani asin.
Chutia Coco ber a kalbo tak daih avang chuan damdawiin ah ka let leh ta nge nge a, ka eng tih mah a tui tawh nek love.

Doctor duty room a thil ka lo ngaihtuah vung vung lai chuan,"dude...tunlai hi i va hlim loh hmel ve?"
tun ang dinhmun ah hi chuan keimah chauha awm ka duh asin le, mahse Freddie hi a rawn inlan ve hman ziah.
"eng nge tih tur a awm em ni? "
"a tam alawm... emergency lamah pawh an in daih hleinem "
"anih chuan ka zuk pui ange.... "engmah pawh ngaihtuah lem lo in ka tho thurh a, Freddie chuan min lo pawt ṭhu rang kher mai.
"hey... hey.... i coat hi thlak phawt pawh " a tih chuan ka han in enfiah vata,ka dar zawnah hian kut thla chiang takin alo lang chu niin, Coco bak min khawihtu an awmlo,kan infawh lai vel khan min khawih ani tih ka hrechhuak nghal zawk bawk.

Ka apron(doctor coat var) chauh pawh nilo in ka kawr pawh chu ka thlak tel nghal vek, theih chu nise khanu kha ka ngaihtuahna aṭang pawh hian paih bo daih ka duh, mahse engvanga ka engmah nilo chu a nat ka hlau em em mai le? chubakah ka rilru ah a awm tlat bawk.
Ka kawr phelh te reng reng chu ka pawh sâwk sâwk avangin Freddie chuan mak tih hmel tak hian min lo en reng a
"ṭhianpa ....i ṭha lo tawp mai " a rawn ti nge nge bawk.
"ngatinge hmeichhiate hi hriatthiam an harsat em em mai le? an ngahtuahna pawh hi ka hrethiam tawh nek love" ka kawr pawh chu locker a khung mai lo chuan ka paih let tawp ringawt.

"Lily chungchang i sawi lo tawp mai "
"engmaw!!"
"Dude....tu hmeichhia chiah nge maw anih le nang meuh pawh thinrim insum zo lo a siam tu che chu" ka theih chhung chu midang bulah ka thinrimna ka tih lang ngai loh mai bakah hmeichhe chanchin ngat phei hi chu ka sawi ngai lo mahse henu hi zet hi chu ka rilru aṭang hian ka paih bo thei lo ani ber.
"theihnghilh rawh... "
"nanghi kha hmeichhia i mutpui chungchang kha i sawi tiraw? a chhanchu Lily tih lo ah kha nu bak kha chu inzawmna in nei lo....thil ho te emaw ka lo ti a, a lo thlak danglam nasa hle mai che "

"engmah ani lo "
"i hre lo maithei Lily hi a hma ang khan i melh tawh reng reng hleinem a awmzia chu a aia ngaihsak zawk i nei ....thawven chang te hi chu awm mahse thil hi ka chik teh mai ania"
"chutiang engmah a awmlo.... khanu kha engtik lai mah in ka ngaihsak zawk ngai lo "
"hahh... i tih tlat te chuan mahse Asher meuh pawh hmeichhe dangin an tibuai tawh ania... chunu chu ka hmuh vat angai anih chu...." tih pahin a faifuk chhuak rat rat a.Lily chauh hi la kawp mah ila hmeichhe lakah hian ka tla na lo tihna ani lo, high school aṭang tawhin campus heartthrob an tih ngat kha ka ni ve tlat chu chu Freddie pawh hian a hrechiang hle, mahse ka hmeichhe duh te lo chu ka ngaizawng duh bik ṭhak lo.

Emergency room a ka ṭhut reng lai chuan Lily chu ka bulah hian a rawn ṭhu ve nghal chat a, biak pawh ka tum lem lo.
"i phone i chhang duhlo lui nge"
"a ri hrelo "
"umm... Freddie an hetah i awm thu min hrilh a ,chuan.... Coco chu eng nge a an?"
"a ṭha"
" a ṭhat hlauh chu...ughh... Coco pa kha an zai thei dawn a mahse pawisa tamtham tak angai dawn"
" a bialpa a hausa alawm... a pek sak mai ang " ka lo ti hmak ringawt, Lamborghini khalh pha ngat kha ania ,Coco in a zui tlat pawh kha a awm tho e.

"Asher.... thinrim chhan tur a awm em ni? "
"ka thinrim lo... "
"anih chuan ngatinge hetiang hian i awm... "
"Lily tunah rih chuan keimah chauha awm ka duh"
" awle... ka hrethiam e mahse khanu vang kha anih lo hram ka beisei " tih pahin a tho hmak a, thinrim takin a kal nghal nal nal bawk.
Khatiang anga ka lo chhan avang khan ka inthiamlo leh hnuhnawh mahse ka chhungril aṭang hian ka sa chho up up ni mai hian ka hria.

___________________________________________

★Coco's Pov★

"ka hlawh min pe rawh... " ka tih chuan Hunter chu a khi nghal suk a, hetiang anga a nuih tawh hi chuan thil engnge maw tal a thleng ngei ngei.
"nizanah i duh ang ngeiin ka chak tawh a i duh tawk tawh em? "
"ka chawm seilian che a, chenna in ka pe bawk che chuan tunah hlawh i phut leh amaw?" zaidam zet hian a rawn ti kher a,min biak dan ṭhin anih loh avangin ka haw takzet.
"duhtawk rawh... " ka thinrim chu ka ding nghal uai a, pawisa mamawh tawh nak alaiin min chhaihkual vel avangin ka ngaithei tlat lo.

"ṭhu rawh....chapo thei pawh i nih loh hi.. "
" i duh ang ngeiin intlansiakna ah ka tel tawh a eng thil lehzel nge ti tura min la duh cheu chu ?"
"zan dangah pawh i rawn kal lo fo... chuvang... "
"Ti tura min duh chu sawi vat mai rawh "
"thil hote.... " tih pahin a rawn khi suk a, "Biakin hmun saw " a tih chhunzawm zat bawk.
"anih eng hlawkna nge ka hmuh ve ang "
"khatiang tur kha... Coco a rawn let leh ta " ni e, ka hlawkna tur lo chu thil tih ka tum ngai lo ani tih hi Hunter hian a hrechiang hle.

"i hriat angin i pa zaina pawisa i mamawh mai bakah ba rulh i ngai bawka.... "
"ka pa an zai phawt loh chuan ka ring lo che... " ka lo pawtchat nghal vat ringawt.
" i fing hle mai...a ṭha e ka ti ang amaherawhchu thla thum chiah ka pe ang che "
"buaina min siamsak loh phawt chuan "
"thats my girl"ka sam rawn chul pah chuan hnai takah hian a rawn ti sup a, ka lo melhrum ngang mai.

Hunter an ka pa zaina tur min tum sak dawn takah chuan phur takin damdawiin lam panin Hunter car chu ka khalh chhuak nghal vata, ka bike police in an la hren avangin ka lâ la chhuak thei rih lo.

Hunter ṭanpuina ka dil chuan a man pek let leh ngei angaih ṭhin avangin zah pawh dawn lo in Asher ṭanpuina ka dil tawp kha ani a mahse ka sawi zawh hma em pawha min hnawl hmak avangin Hunter ka pan leh mai angai chuan a man pawh ka pe ngei bawk ang, heng mite hian min ngaihsak loh ang bawkin keipawhin ka ngaihsak tawh dawn bik lo.

Ka pa awmna room ka luh chuan Lily alo awm hlawl mai,ka pa chu alo endik mawlh mawlh a hmu lo ang maiin couch ah chuan ka ṭhu daih thung.
"inbe lawk ang " a rawn tih takah chuan hawichho vah pahin,"sawi rawh" ka lo ti nghal sap bawk.
"pawnah inbia ang"
"hetah hian sawi mai rawh " ka pa chu a va melh zeuh a,nikhaw hre lova a mut reng avang chuan doctor te angin ka care ve teh chiam lo.
"Asher hi tibuai tawh suh,ka ngen che anih chu "
" duh lo ta ila "
"nangmah vangin hospital ṭha bera a thawhna theihna chance pawh a hlauh asin naktuk maiah sawn a thlak thu hi biakin ah an puang leh bawk anga heng zawng zawng hi nangmah vang vek ani asin"

"ka buaina tur a awm em ni? "
"Asher hi i ngaihtuah ve miah lo em ni?"
"hahh....ngaihtuah a!!, mahni hma sial hlawm leh lutuk " tih paha ka pa bula ka ṭhu tur chu min pawt her nghal sawk a,"enteh....Asher chungah hian engthil mah ka tih tir hauh lo ang che"
"engtin nge i tih chuan ang oh!!  an inah ka insawn dawn asin" insawi theih ka tum luatah ka tum loh deuh in ka sawichhuak ta thut mai!! mahse awm pawh ni ila eng nge pawi, ka hna a awlsam sawt ani mai alawm.
"engmaw! "
"an inah mawle....hum han tum chhin la, in la inṭhen thuai ang"
" hmeli.... "
" het het... nula fel lutuk tan khatiang ṭawngkam kha a mawi ve lo ania..."ka pa melh hrak pah chuan ka nuih suk a, doctor dang hmu turin ka chhuak nghal nal nal bawk.
~Xoxo~

IG- @remruati_b
Fb- Remruati Bawitlung/Haylor Sept

Read More

My Drug is You-17 by Remruati Bawitlung(Haylor)

CHAPTER-17

Ani pawhin min rawn fawp let rang kher mai,ka nghawngah a kut suih paha ka sam a ṭham zawng ringawt pawhin min ti phur zual sauh thei nia mawle.Hun rei tak hnu ah ka fawp leh a ni a a dan a dang in fawh reng mai hi ka duh.
A heh cherry ang maia thlum dek dek chuan khami zana thil thleng kha min hriat chhuak tir ta zawk mai!! ka suangtuahna aṭang chuan ka harh zawk a, ka inla hrang nghal vat bawk.
"ka tihpalh " tih pahin pawnah ka chhuak nghal vata, kalsan ka duh loh avangin inhnuai ah ka chhuk ta ringawt a,couch a ṭhut pahin ka indawm kun lap bawk.

Coco chunga ka inthiam loh ai mahin Lily chungah ka inthiam lo zawk, engtin nge vawihnih lai ka rinawm loh san theih?  Asher harh chhuak rawh hetiang mi hi i ni lo, tiin keimah leh keimah chu ka inhrilh nawn char char a mahse thil maktak mai chu ka fawh avang khan ka inchhir miah lo!!

Ka phone a rawn vibrate chur chur avang chuan ka la chhuak nghal vata,thawk halh pahin ka la nghal vat bawk.
"engthil nge thleng? ka rawn call nasa lutuk che"Lily aw hahdam tak han hriat leh chu a hahdamthlak teh e bakah a rawn call tih pawh ka lo hre lo reng reng.
"a damlo a...a mutthilh veleh ka haw ang " ka tih chuan a han ngawi vang vang a, Coco bula ka awm hian thik mahse a thik ngam lo ani ber, a chhanchu ka fa ani a ka ngaihsak tur ani tih a hai bik hauh lo.
"awle...tunah a mu em ni? "
" umm.... "

"Asher!! "

Chutia kan lo inbiak lai chuan ka hlauh ang ngeiin Coco chu a rawn chhuk ta ngei a rang fahran hian ,"nakin ah ka rawn be leh ang che " tih pahin phone ka dah nghal vat bawk, engmah thleng lo ang maia lo hmachhawn chu thil harsa tak ani.Ka rin ai daihin thil a harsa dawn tlat mai henu lakah hian ka inthiarfihlim vat angai.
"ngatinge hetah i rawn chhuk?"
"ka luak...." a sawi zo hman lo bathroom lam panin a tlan phei nghal dawr dawr a,ka zui lo thei lo. Henu hi chuan min va han tibuai tak em, hlat ka tum pauh leh a aia hnaiah min pawt a ,hnungtawlh leh chu thil harsa tak ani tawh ṭhin.

Commode bawha a uak tuarh tuarh lai chuan a sam hui kiang pahin a chal ah ka lo dawm sak ṭai a, a pang lah chu a sa hiam lehnghal.
"kalsawn rawh... " tih pahin min rawn nam nghal sawk a, hetiang ringawt hi chuan kalsan ka tum bik der lo.

A uak zo ta maw tiah a ding thut a pawnah a chhuak ta daih mai,nichin a thil thleng avang khan a lungawi vak lo tih a hriat reng.
"inchhungah lut rawh... " a luhlul ka tih tawh kha hria angin a awm duh lo hrim hrim,ka duty meuh kalsan in ka awmpui a hetiang anga a awm leh si avang hian min ti thinrim hle.
"lut rawh ka tih chu" ka pawt ding nghal sawka, engvanga hetianga awm thut nge a nih tih hi ngaihdan pawh ka nei lo.
" min rawn hnaih suh "
"duhtawk rawh....i khawsik a zual mai anga sin "
"min ngaihtuah ang takin awm der vel suh..."

" hreptak chuan rawn hruai chhuak lo tawp che ila ṭha tur"
"anih ngatinge i rawn kal? "
"police station ah i riak thei hleinem engpawh nise lut phawt ang... "
"Asher...tun aṭang chuan Lily hi hmu tawh suh"
"engmaw!! "
"khanu kha hmu tawh suh....fa ka nei hma tal chu keimah chiah min ngaihtuah tawh rawh... reilote chhung tal chu hlim taka awm ve ka duh "engvanga chu thu chu rawn sawi thut nge maw anih le?

"ka fawh avang che khan ka tihpalh... ngaih loh lamah ngai suh i lakah hian eng ngaihtuahna mah ka nei lo"
"reilote chhung pawh chu chu min tihsak thei lo maw? "
"aw.." ni e, dawt sawi kual vel ka tum lo, Lily hi ka kalsan thei lo.
"anih ka chungah engpawh thleng se i pawisa lo tiraw? " ka ngawih reng avang chuan a khi nghal suk a, diktaka sawi chuan ka tan chuan hmelhriat ngai loh ang mai ani, ka fa apai a ka tihtur ka ti a chuzawng chu ni kan inkara awm chu chuvang chuan a lakah hian eng rilru mah ka pu lo.

"ka hrethiam e"
"eng inzawmna mah neih ka duh lo "
"i hra em.... nangchauh hi he khawvela min ngaihtuahtu awmchhun i ni emaw ka lo ti a mahse ka lo ring sual der ani"
Ka inhma chhawn ran lai chuan Lamborghini sen nalh zet mai hi kan bulah tak chuan a rawn ding nghal vâng a,Coco hlauthawng hmel ka hmuh chuan mak ka ti letling zawk, engmah in a rilru a tih hah loh laia engvanga hetiang vang ringawt a hlauthawng em em nge maw anih le.

Car aṭang chuan mipa pakhat hi a rawn chhuak a,a bialpa kha ani tih ka hre nghal.
"enteh Hunter " a tih rual rual chuan a hmaiah a beng nghal sawk ringawt.
"engthil nge maw i tih le? " bên leh a tum chuan ka lo dang nghal vata,inrawlh ka duh lo viau na in kut inthlak hi chu ka ngaithei tlat lo.
"Asher... rawn inrawlh suh " Coco chuan a rawn ti vin nghal hlar a,mak ka ti takzet engvanga hepa lam hi ṭang tlat nge maw anih le?

"i hria maw!" a cigratte zuk lai chu Coco jacket ah chuan a han nawr hlum kher bawka, ani erawhin engah mah a ngai duh miah lo lehnghal.
"lut rawh " tih pahin chupa chu car ah chuan a lut lehnghal daih a, Coco pawh chuan luh ve mai a han tum a mahse a banah ka lo pawt thung.
"engthil nge maw i tih le? i damloh hi "
"ka chungah engpawh thleng se enga tan mah i ngai lo ani lawm ni " tih pahin ka kut chu a paih thla sawk a,a lut nghal hmak bawk. 

Read More

My Drug is You-16 by Remruati Bawitlung (Haylor)

CHAPTER-16

A chau bawk aniang reilote ah a muhil nghal mai,a ke a tawm chhoh vek avang chuan ka jacket in ka khuh ta ringawt a a khur nasa lutuk pawh kha a zia deuh.Amah ka khawih zawng ringawt pawh hian a khua a sik ani tih ka hre thei chu chuan min ti hlauthawng takzet a chhanchu ka enkawl a duh leh dawnlo tih ka hriat vang ani. Hetiang anga hmeichhe tawrhchhel leh luhlul hi ka la hre ngai lo, chumai bakah hetiang dinhmun ah pawh nau paitlang duh khawpa rilru huaisen a nei hi mak ka la ti tawp thei lo.

En duh chiah si lovin a khat tawkin darthlalang aṭang chuan ka han thlek leh zeuh ṭhin a ka hriat loh in ka lo khi leh vur vur zel. Zep lo ah chuan a hmelṭha ani tih a hre lo mai bawka mahse hmai duk chûr te leh a sam pheng phang te chuan a hmelṭhatna a ti bo chuang lo.Amah hian zir phei se chuan mipa tamtak hian an bawr ka ring mahse mipa um ê leh lerh tak ani lo tih a mizia aṭang hian a hriat reng.

An in kawt kan thlen chuan car ka tih ding avangin a rawn harh a,a rawn zi nghal ar ar bawk.
"oh!!  ka tihpalh " a ke a hlang kang avang chuan inthiam loh hmel zet hian a hlang thla nghal vata,ka jacket sin chungin a chhuak nghal hna hna bawk.A pa damdawiin ah a awm daih avangin amah chauha luhtir chu ka tum bik hauh lo, a chhuah rual rual chuan ka chhuak ve nghal vata a hnungah ka zui ta ringawt a.
"kal tawh rawh... " a tih pawh chuan ka zui lui tlata, min hnar a tum tawh bik lo.

"i khua a sik a mahse damdawi ei suh... "
" lungngai suh ka ei lo ang "
Kawngka chu a inlock emaw tiin hawng ka han tum a mahse in lock chu sawi loh a kalhna zu han chhe daih a mawle.
"kawngka kalhna hi a chhia elaw? "
"a chhiatna a rei tawh..." tih sam êt pah chuan a lut nghal daih a,engtin nge hetiang te chuan ka kalsan daih theih ang. A hma pawhin thi lek lek in min rawn call tawh a khatiang kha ka thlen nawn tir tawh tur ani lo.

Inchungah a chhoh avangin ka zui chho ve zela,step te lah chu a hlui tawh tih hriat reng rah zawng pawhin a ri ṭut ṭut mai.Light dim zet hnuaiah chuan kan chho zela engkim mai chu mak ka ti vel vek, mihring chenna hmun pawh a ang lo, a bal in a ṭawp em em a maimawm ril pawh a tam hle.
"ei chak i nei em? "
"aih nei lo"tih paha a room kawngkhar an hawng chiah chu ding meuhin ka hawikual a, ka hmui tuai pahin ka thaw chhuak hak bawk.

Eng ang room nge ni ngai, luh rual rual in hmuar rim a nam nghal huam a, engkim mai chu a bal vel vek.Coco lah chuan engmah ngaihsak lovin mut mai chu a han tum a mahse a mut hma in ring zet hian, "la mu suh " ka ti nghal vak ringawt.
"eng nge? "
" bedsheet fai i nei em? "
"nei lo "
" anih chuan kalsawn rawh.. " tih pahin a bedsheet chu ka han hlim pawp a, hei ringawt pawh hi damlohna tham a tling.

"engthil nge maw i tih le?"
"i mu thei tawh ang... heihi chu paih rawh " ka tih chuan meng pual ralh pah hian a mu nghal mai a, a thak lo hi a mak zawk. A bulah chuan ka ding ngawi renga,kal duh tawh hle mah ila hetiang ringawt hi chuan ka kalsan thei bik bawk si lo.
"kal tawh rawh... "
" muhil phawt rawh.. "
" khatiang anga i din reng te chuan ka muhil thei hleinem" thei leh thei lo hian a rawn ṭhu chhuak a,a dâng mai bakah amah hrim hrim hi a ṭha lo tih en mai pawh hian a hriat.

"i ke hi engtin nge i tih nat " a phalna pawh dil kher lovin ka zuk hlim nghal pawp a,a chawn chu alo duk kulh chu niin cm8 vel zet hi thuk lo te in alo kak bawk.
"engmah ani lo "
" lo che sawn suh ang che" tih pahin ka tho thut a, car ah firstaid box la turin ka let nghal vat bawk.

Ka let chhoh leh chuan bang ngheng chung hian a lo la ṭhu a, chau hle mahse a hliam hi tihfai phawt loh chuan a ser mai ang.
" ana maithei ania " tih pahin ka han tifai nghal vata,a na bawk aniang au chhuak lo mahse ka kawr a rawn ṭham nghal tawn mai.
"a zo ṭep tawh em?"
"umm... " tih paha ka hawi phei chiah chu chiang tak mai hian kan in melh nghal kawk ringawt ,a hmui ka hmuh chuan mak tak maiin fawh ka chak tlat anih chu.

Rang lutuk in ka hawisawn nghal vat ringawt,ka thinphu a rang mai bakah ka taksa a rawn lum nghal up up mai,Lily bulah takngial pawh hetiang hian ka awm ngai si lova engvanga henu bulah berkher hetianga awm nge maw ka nih le? 'i thil tih lai chiah ngaihtuah rawh 'tiin ka in hrilh nghal mawlh mawlh a, ka hawichhuak ngam tawh lo hrim hrim.
"a lum hle mai a" tih pahin a jacket chu a phelh ta mai !!  engmah sawi ngam lo mah ila ka thlan tui in min rawn leih nghal bawrh bawrh mai, ani pawh ka awm ang hian a awm ve tho aniang lum a tih danah.

Chutia melh pawh ka melh chhoh ngam loh lai chuan a room bulb chu a rawn chhe thut mai!! chumai bakah tukverh aṭangin thla chu a romantic tawk chiahin a rawn eng lut sar bawka chutah zet zawng ka thaw rang ta kher mai.
"a zo tawh... mu tawh rawh "
"awle... " tih pahin ka kawr a ṭhamna chu a thlah nghal vata, ka kal vat dawn tih a hriat vang pawh ani mahna,"ka mutthilh hma hetah i awm thei angem? " a tih chuan hnial chi a ni tawh lo.Ngawi rengin tukverh bulah dingin pawn chu ka han thlir vauh vauh a ,ka awmdan a dik tawh loh zia hre reng mah ila ka inthiar fihlim thei bawk si lo.

"um.... i hmanhmawh chuan kal rawh " ka awmdan avang chuan nuam a ti bik lo aniang.
"muhil rawh... " ka hawilet nak chuan min lo en leh kar tawh a, chutah zet zawng ka insum thei tawh lo,ka va pan hnai a a hmui ah ka fawp nghal tawn tawn ringawt. 

Read More

My Drug is you-15 by Remruati Bawitlung (Haylor)

CHAPTER-15 

"ka hmu peih bik lo " tih nung nung pahin ka pa awmna room lam chu ka pan nghal vata, ka thinrim mai bakah hmuhsitna leh endawngna ṭawngkam tin mai chuan min ti na in min ti hrehawm takzet. Pawn aṭangin ka pa chu ka thlir renga,ka pa vanga hetianga awm hi ka nih avangin ka dem lo thei lo. Kum10 mi chauh ka nih laiin keimah a khawsa turin min kalsan a ,khatih hun laia ka nun harsat zia kha ka hriatchhuah ringawt pawh hian ka mittui a rawn tling nghal pam thei.
Hmeichhe dangte ang tho in ṭah hawm hawm a,rinchhan neihte hi ka chak lo ani bik lo mahse midang rin hi thil harsa tak anih tawh avangin ka theih chhung chu midang hlata awm ka tum ṭhin.

'hmeichhe pangngai ve mai ka ni,danglamna ka nei lo ' tia keimah leh keimah ka lo inhrilh mawlh mawlh lai chuan Hunter hnen aṭangin call ka dawng leh tawh.Hepa lak aṭang hian chhuah han tum ve teh mah ila keimah zawk hian ka mamawh avangin ka nun hlui ah bawk ka let leh angai dawn anih hi.
"ka rawn kal nghal " ka han ti nghal ringawt a,la dam fel lo mah ila pawisa ka neih ngei ngei angai.
"minute10 chhungin rawn thleng ang che, an ṭan tawh dawn" a tih rual rual chuan sana ka en nghal vata,hmanhnawh lutukin inhnuai lamah ka tlan thla nghal dawr dawr bawk.

Tlan pangngai chuan minute30 vel tlan ani a mahse minute10 chhunga ka thlen ngei ngei angaih avangin ka tlan chhuak nghal fua a,bike la tharlam tak ani bawka a smooth zaih zaih hle mai. Rei pawh ka tlan hma in ka hnungah police bike pahnih hian min rawn um ta mai!! ka hmanhmawh em avangin a aia chak chuan ka han tlan leh a,an lak aṭanga tlanbo ka tum pawhin min rawn la umzui zel tho.
Ding tura min tih avang chuan ka ding ta nge nge a,bike a ka chhuk rual rual chuan a hmeichhia zawk chuan ka chawnah a rawn hlap nghal pawp ringawt mahse ka ṭe duh bik ṭhak lo.

"khawiah nge i licence " a tih chuan ka lo pe nghal vata,a fel nge fel lo tih a en zawh hnu chuan ,"speed limit aia sang a i tlan avangin man i ni e "an rawn tih takah chuan buaina ah ka in barh lut leh tawh ani tih hai rual ani lo.
"nangni pawh in tlan ve tho alawm"
"nanghi zu i in ani lo maw "
"teuh lo "
"anih chuan heihi ham rawh "tih pahin breathalyzer chu a rawn la chhuak a, ka ruih loh avangin inring tawk takin ka han ham nghal vata. "ka rui lo ka tih reng kha " ka tih chhunzawm zat bawk.
"dan i bawhchhiat avangin min rawn zui angai"
"ka hmanhmawh ania..."
"min rawn zui vat mai rawh " tih pahin min nam kun pawp a, ka kut chu hnunglamah handcuff in an phuar nghal tlat bawk.
__________________________________________

★Asher's POV★

"Asher... " Hnunglam ka hawi nghal vata, Lily ka hmuh rual rual chuan chawplehchilh in ka nui leh nghal suk mai.
"i mu dawn em ni?" a tih chuan ka lo bu nghat a,"darkar1 vel tal" ka tih chhunzawm zat bawk.
"umm....Coco chu in inah a awm dawn ta em? "
"ka hrelo "
"Asher.... innei tawh mai ang, naute chu ka fa ang chiahin ka en ang "
"thutlukna awlsam takin siam suh..."
"hetiang ringawt hi chuan thinthi in ka awm thei lo....kan inneih theih loh hi ka hlau takzet "
" Lily....  chutiang ngaihtuah suh " Coco nen hian inneih kan tum loh zia hi hria se chuan a thik hauh lo ang.

" i ngaihtuah ngai tho mahse a bula i awm hi chuan ka ngaihtuah tlat che... henu bula awm reng hi a ṭha lo "
"hlauthawng duh suh.... engtin mah ka awm lo ang "
"ka hmangaih che "
"keipawn ka hmangaih che " tih pahin ka han fawp zeuh a,ka hahdam nghal sawng sawng mai.
"tun chawlhni ah hian i pa in a puang tawh ang tiraw? "
"umm...." naktuk tukleh mai hi anih tawh avangin ka huphurh takzet,chumi hnu aṭang chuan mi zawng zawng in sawn ka thlak tih hi an hre vek tawh ang.

"ughh...summer picnic pawh a ni leh ṭep tawh ania...kumin chu bal kha cho tawh tak tak ang aw"
"ni e" call ka dawn avangin Lily melh deuh hrak pah chuan ka han pickup nghal vata, Police station aṭangin a nih thu an rawn sawi rual rual chuan Coco vang anih ka ring nghal.
"Police station ah ka kal vat angai"
"engmaw?"
"Coco an kawl meka.... Director min lo hrilh sak mai rawh"
"mahse.... "
"ka rawn let leh vat ang " tih pahin ka tlan nghal hlawk hlawk bawk.

Ka tlan laklawh lai te chuan ka thinrim lutuk hi tlan let leh daih mai te ka duh rum rum ṭhin ,henu hian buaina min siamsak hnem tawh takzet.
Police sawi dan kha chuan ka bail chhuak lo anih chuan thana ah a riah angai dawn si a,haw viau mah ila a rai bawk nen chutiang thil chu ka thlen thei bawk si lo.A chang leh a sual man chu hmu ve reng reng rawh se ti ten ka ngaihtuah thul engpawh chu nise heihi a tawpna a nih ngei ka beisei.

Police station ka luh rual rual chuan Coco chu kil khata alo indawm kun ngaih lai chu ka va hmuh takah chuan ka khawngaih tlat peka,hetiang ang hian engvanga awm thut nge ka nih pawh ka inhrethiam tawh bik lo .Khua a vawh deuh sûr mai bakah a damloh ka hlauh avangin biak tur ka zawng nghal vata, vanneihthlak lutuk in ka patea alo duty hlauh.
"Asher....tun ang zan reiah eng nge i rawn tih dawn? "min hmuh rual rual chuan alo ti nghal vata, keilah ka hmanhmawh bawk nen ka white coat takngial pawh ka lo la phelh lo chu niin
"umm... ka ṭhiannu bail angai a" hmeichhe tang awmchhun anih avangin a hre nghal.

"i ṭhiannu ani tih i chiang chiah maw " a awmdan leh inchei dan vel a hmuh sawn ka ṭhian anih a ring lo pawh ani mahna.
"aw...a tanna a rei tawh em?"
"darkar li vel chu a awm tawh ang...a chhungte call tura kan tih pawhin a ngawi renga, a phone a number awm hmasa ber an rawn call ta tawp mai anih kha"
"tunah a chhuak nghal thei ang tiraw? "
"aw....mahse lehkha tihfel tur a awma min rawn zui rawh "
"awle.... " tih pahin ka zui ve nghal mai bawka, he thu hi ka pa a hrilh loh hram ka beisei.
"Asher.... i ṭhian kawm te hi fimkhur ang che, buaina nasa tak tawk thei reng ini tih theihnghilh suh... "

Lehkha kan tihfel zawh hnu chuan Coco chu an ko chhuak nghal vata,a ke a ti na leh hman tawh aniang a rawn bai chhuak aih aih mai. Pawnah a rawn chhuah hun chu ka lo nghak ran a min rawn hmuh chuan lehlam a hawi nghal hmak ringawt.
"lawmthu min hrilh dawn nange? "
"ngatinge hetah i rawn kal?" henu hi mi mak tak zawng anih hi, ka ṭanpui hnu ah pawh lawmna chang zu han hre miah lova mawle.
"heta rawn kal hi ka duh bik hleinem... mahse min rawn call miau sia lawm "
"ka lawm e.... let leh tawh rawh "
"hahh....anih ngatinge i ke kha? "
" i buaina tur a awm lo "

"i awm ṭhat duh loh vang anih kha"
"engmaw i sawi kha... "
" lut rawh...ka thlah ang che " min chhang lo in a kal lui tlat tho.
"car ah lut rawh ka tih chu " a luhlul a chhuah tlat avang chuan a kut ah ka man chawt a, car ah ka nawr lut nghal dawr dawr a.
"hmela... kalsawn rawh... " car ka lock tlat avang chuan a chhuak thei tawh lo

Read More

My Drug is You-14 by Remruati Bawitlung(Haylor)

CHAPTER-14

Damdawiina ka let leh hnu pawh chuan Pastor Samuel thusawi bak ka rilru ah a awm thei tawh lo,ka nu leh pa ka dem ang hian ka fa lo piang mai tur hian min dem ve ang tih hlau tho mah ila Asher nen berkher hi chuan awmdun tur kan ni lo, ani chuan hmangaih a nei tawh a an pahnih inkara va tlakzeh hi ka duh lo takzet.
"i rawn let leh thei maw?"Freddie bawk kha inkuangkuah chunga min lo nuih vur vur lai ka hmuh chuan ning hmel zetin ka han meng pual nghal ralh a,engvanga rawn lut leh nge maw anih le? keimah chauha awm ka duh asin

"helai a doctor te hian tihtur an nei miah lo niin a lang "
"ka patient tlawh kual chu ka tih tur ani dawn lawm ni.... "
"hmai sêr i duh loh chuan heihi hnawih tur.... " tih pahin damdawi hmehchhuah chi hi ka kutah a rawn nem bet chawt a,ka mit ah tak chiang taka rawn en pah hian,"heihi i discharge paper ania..." a rawn tih chuan ka va ban nghal zuau a, ala sawn hman lehnghal.
"min rawn pe rawh... "
"damdawiin aṭangin i chhuak vat vat duh anih chuan rawn la rawh "
"ka duh lo "tih pahin khumah ka mu nghal vat a, ka inkhuh hmak bawk.
"i bill a sang zel dawn anih hi " rawh tih kher pahin a chhuak nghal a, kawngka inkhar ri ka hriat rual rual in ka inkhuhna pawh ka phelh nghal vat bawk.

Khapa kha ka hmelhriat ngai pawh ani tawp si lova engvanga min tibuai reng nge maw anih le?
Ka awmna room ah hian mi pahnih kan awm a, damlo dang pakhat ka awmpui tihna anih chu mahse a tar tawh mai bakah a mutthilh reng avangin biak pawh ka la inbe lo.A vawikhat nan chu pitar chu rawn tho in min rawn pan ta reuh a, ka lo muhil der nghal vat ringawt.
"chaw ei a hun tawh a....kan kal tawh dawn mi niang? "min rawn sâwi takah chuan mutthilh der na chi ani tawh lo.
"hetah hian call la...room ah hian an rawn pe mai ang che"
"he room aṭang hian rei tak ka chhuah tawh loh mai bakah ka thih hma ngeiin bawngsa hem hmin ei ka duh a... min chhuahpui lawk thei angem? "

A hmel aṭang hian a ti mai mai lo tih chu hre tho mahila bawngsa leina tur khawp pawisa ka neilo tih hi hria se chuan min sawm lo tawp ang.
"enteh... duh viau mahila... "
"pawisa ka nei alawm" ka rilru hre tlang niawm tak hian ka sawi zawh hma hma chuan a rawn ti nghal zat mai.
"awle... " chutia pawisa a neih takah chuan ka ei chak ve tho avangin ka lo bu nghat a,bakah a thih hma a a thil ti duh ber ka tihpui theih dawn avangin ka phur ru phian bawk. Ka nunah midang ṭanpui dil reng rengin ka khawsa ṭhin a tunah erawh midangin ṭanpui min rawn dil avang hian ka lawm takzet.

Wheelchair a nawr a ngaih tawh avangin damdawiin aṭanga hnai te ah ka kalpui ta ringawt a chubakah duh duh huna chhuah mai mai an phal loh avangin harsa tak chungin ka put chuah pui thei hram.
Mahse ni tla tur kawl sen phut mai a hmuh ruala a hmela hlimna rawn lang te chuan kei lehzel pawh min ti hlim thei nia mawle,a mittui tling pam te leh a nui hmel te chuan min khawih in a aia hmun nuam zawkah hruai min ti chak takzet .

Kan thil order a rawn thlen hnu chuan phur takin a eitur chu ka han zai sawm sak nghal vat vat a, min rawn nuih suk pah hian, "ei vek rawh... bawngsa hi ka ei thei hleinem " a rawn tih chuan mak tih hmel takin ka en ringawt.
"mahse... i duh thu kha i sawi sia "
"min hruai chhuah avanga ka lawmthu sawi na ah ngai rawh "
"anih chuan... "
"ni e.... ka natna avangin thla nga lai pawnah ka chhuak tawh lo va, ni tla lai thlir hi ka thil chak ber anih avangin ka sawm chhuak ta che anih kha... mahse ka chhungte hnenah sawi miah suh aw"

"min man chhuah loh hram ka beisei...thil dang ei duh i nei em?"a lo a lo thing vat a, nuih suk paha bawngsa ka ei chiah mai chu ka ei chakna a rei tawh bawka ka hma ah in chhawp reng mahse ka chil a put nghal zung zung thei.
"bawngsa ka eichak tih hre lawk ang mai lawm i nih..."
"i rai tih ka lo hria a... keipawh ka rai lai khan ka ei chak ber ani ṭhin alawm chuvang chuan i eichak ka ring ve tawp a"
"khua a thim tawh bawk sia kan ei vat vat anga kan let leh vat dawn nia"
"an discharge tawh che tih ka lo hria a... ummm, room chu a reh leh dawn hle mai " a hmel ngui bam ka hmuh hian ka khawngaih takzet.

Security bum dan kawng ka hre hnem bawka, kan lut tlang nghal zak mai.Sawi lo mahse a room a let leh a hreh bawk aniang lift a kan chuan chhoh lai te chuan kan inbe lo hrim hrim.
"lungngai mah ta che rawn hruai chhuak tur che in ka rawn kal ziah dawn lawm"
" i ti tak tak em? "
"tak tak e.... chuvang chuan lo dam vat vat la, a aia hmun nuam leh hla zawkah ka kalpui ang che" ka tih takah chuan a hmel ngui lutuk pawh kha a zia deuh in ka hria.

Room a ka nawr luh chuan nurse pahnih hi mangan hmel zet hian room ah chuan an lo tei kual thuak thuak a, min rawn hmuh rual rual chuan pakhat zawk chuan pawnah min kai hrang nghal vat bawk.
"min khawih hlek suh... " tih pahin ka ban chu ka lo thing thla nghal vata, keimah ang rual vel lek anih avangin ka hlau bik ṭhak lo.
"i thil tih kha i hria em? mi khawsa thei tak an ni asin, a chhungten an hriatchhuah vaih chuan an zuah hauh lo ang che " a enga mah hma in min vin nghal ringawt anih chu.
"mahse keichuan.... "
"tunge maw i nih reng reng le?  damlo te hi phalna lo chuan hruai chhuah mai mai phal ani hleinem,engthil emaw thleng se kan mawhphurhna vek ani asin"

"awle... ka hrethiam e" damdawiin dan kalhin thil ka tih avangin insawifiah vak pawh ka tum lo, mahse kha pitar duhthusam kha ka tihhlawhtling sak avangin ka lawm hrim hrim.
Ka din na ngaiah chuan ka ding renga, nurse erawh call a dawn avangin a kal ve nghal mai bawka mahse a mi biak hnenah, 'hmeichhe tawp leh ṭenghneng lutuk in min lo tibuai a, ka rawn kal nghal' a tih ri ka hriat rual rual chuan ka inhum ruh nghal vata,khatiang anga min tizui kher kha ka ngaihdan a ni ta tlat lo.

"engmaw i sawi kha " ka tih chuan a rawn hawi let nghal vata,a phone dah pah chuan, "engmah" min rawn nuih suk pah hian a rawn ti kher bawk.Engmah a tih takah chuan va hnial chhunzawm kher ngaia ka hriat tawh loh avangin thinrim tak chungin ka inher a, kal mai ka tum lai tak chuan,"mawl lutuk mahni nihna pawh hrelo " a rawn tih leh kher avang chuan vawikhat pawh in ngaihtuah nawn lovin ka va pan nghal nal nal a.

"ngaihdam min dil rawh "
"engvangin maw "
"i thil sawi avang khan "
" han in en ta che hrilh ngai lovin tupawn i ṭhing zia an hre vek ang chu.... "
"hahh...nurse chu i ni ve si amaw!!"
"engmaw.... "
"i awmdan hi an hriat hunah chuan an ban ngei ngei ang che..." a hmelah hlauhna a rawn lang nghal
"engtin nge an hriat anga? "
"ka report thei reng che ka duh hun hun ah ,chuan khi a finfiahna pawh ka nei nghal"CCtv chu ka han melh kher a, a thinrim bawk aniang a mit a sen vek tawh.
"hmeli... "tih pahin ka samah a rawn kek ta pawp mai,mahse a ban lehlam chu ka herh nghal pawp a,min thlah pahin a ṭhingṭhi nghal rawp bawk.

A au ring bawk si a midang rawn tlan thawm ka hriat rual rual chuan hnunglam aṭangin tuemaw hian min rawn pawm kang nghal lawp a min pawt hrang nghal vat bawk.
" min thlah rawh... " kan han tal ve tak hna in ka tal chhuak zo lo.
"min thlah rawh u ...a châk dawn lo"ka khawih thei tawh lo ani tih a hriat chuan a rawn ti nghal tuarh tuarh a,midang ho lah chuan an lo buaipui nghal sap sap lehnghal.
Min pawm sawn daih avang chuan,"vawikhatmah rawn kal tawh suh ang che " a tih lauh lauh ri bak ka hre thei tawh lo.

Hnung lam aṭanga min pawm tlat avang chuan a hmel pawh ka hmu thei lo room pakhat ah hian min hruai lut daih lehnghal .
"min thlah rawh " ka tih chuan chair ah min ṭhut tir nghal dawrh a,
"i lawm tawh em? " Asher thinrim hmel ka hmuh rual rual chuan tlanchhuah nghal daih ka chak takzet .
"i thil tih kha i hria em?  heta thawk hi ani asin "
"ṭawp leh ṭenghneng min ti alawm "
"i nihna a ni reng alawm" a ṭawngsual ani tih a hrechhuakin lehlam a hawi nghal daih a, Asher lehzel pawhin hetiang anga min ngai hi na ka ti takzet.

" maw!! "
"kha kha ka sawi tum ani lo"
"anih chuan khanu thusawi kha alo dik chiah anih dawn kha"
" ṭul lovah lo chuan ka hma ah rawn in lan tawh suh.... chuan kan in a awm kha ngaihtuah pawh ngaihtuah suh ang che "
"hahh.... i nihna diktak a rawn lang ta alawm... "
"kan nun ngaiah khan let leh ang....mahse ka fa erawh ṭha takin ka enkawl ang"
"awle....i thu vek alawm " tih pahin kawngka chu ka han hawng nghal pawp a, Lily chu rawn luh alo tum ve chiah bawk nen kan intawk hlawl mai.
" in pahnih khan han in hmangaih chhunzawm zel teh u..." Asher melh kher pahin ka han ti a, ka chhuak nghal nal nal bawk. 

Read More

My Drug is You-13 by Remruati Bawitlung (Haylor)

CHAPTER-13

Chutia lift a ngawi renga kan chuan dun reng lai chuan ka phone a rawn rik avangin melh ralh pah chuan ka han en nghal vata, Hunter ani tih ka hmuh chuan ka silent a ka ak ṭha nghal hmak.Ka ah hnu ah pawh ka phone chu a ri tawp hleithei lo,pawilo nakin ah ka call mai ang.
"i dam fel hma loh chu damdawiin hi chhuahsan suh ang che" 
"ka damlo reng reng hleinem... "
"ughh,  vawin ah khan engthil nge thleng? " zaidam tak hian a rawn ti sap a,hrilh vek chu duh hle mah ila buaina a chenfel phah dawn loh avangin ngawih reng hi a ṭha zawk.

"exam chu eng nge a an? " thil dang daih ka sawi ta ringawt a,min zawh chunzawm pawh a tum tawh chuang lo.
"ka exam lo "
" maw!! "
"a lehpek ah ka try ṭha leh mai ang " a tih takah chuan ka lo bu nghat ringawt ṭawng chhunzawm na chi pawh ani tawh lo a chhanchu keimah vangin a in exam lo tih ka hre nghal,a in exam dawn ṭep ah ka va call ani tih engvanga theihnghilh nge maw ka nih le?

Ka ngawih tak reng avang chuan a hrawk then kharh kharh pah hian,"ei chak te i nei em? " a tih takah chuan ka awm dan mak tak tak te chu ka rilru ah a rawn lang nghal zut zut mai,
"i hria em ka luak a chhuak reng bakah ka thil duh ber pizza takngial pawhin ka luak a ti chhuak anih chu!! engtik lai pawhin theitê leh chocolate cake hi ka ei chak ngawih ngawih reng a bakah ka ril a ṭam reng bawk si thil han ei ila ka ei tam thei leh der bawk si lo,  ka awmdan hi ka hrethiam tawh bik lo"
"i rai no vang anih kha.... " ngatinge rai avang ringawt in tawrh tur a tam em em mai le? hetiang tur tih hria ila lo pai tlang lo tawp ila ṭha tur.

"nakinah phei chuan i rawn thau vak anga i kawng te a rawn na vak vak mai ang "
"tak tak maw!" ka tih rual rual chuan lehlam hawi pahin a khi suk ringawt.Diktaka sawi chuan hetiang thil hi engmah ka hrelo,mi sawi thawm ka hriat ngai loh mai bakah high school pawh ka kal loh avangin ka bo takzet zet.
"damdawi ei ṭha ang che"
"enteh ka dul pawh a rawn kiar ṭan tawh asin " ka tih chuan ka dul chu a rawn khawih thut ringawt,ka lo inring lo bawk nen electric in min rawn man thut ang mai hian ka ṭek nghal chuai a, ka thinphu pawh a rang sawt hle. Ani lah chu ka awmdan pawh hre lek lovin a khi suk a, lift a rawn in hawng rual rual chuan a kut a la sawn vata a chhuak nghal daih bawk.

A chhuah hnu reilote ah ka chhuak ve nghal vata,a hnungah muangchanga kal pahin ka thinphu rang lutuk tih zia awm tumin thawk ka han la kawk kawk a, hnung lam aṭang pawn a chhelo tho nia mawle,hetiang em em hian a hmelṭha ani tih ka lo hre ngai lo reng reng.


Car dahna kan thlen phei chuan a phone en pahin ,"hreptak chuan"a tih takah chuan Pastor Samuel chu ka han zawng nghal vata mahse car ah alo awm awzawng lo.
"i pa in min lo nghak i ti ani lawm ni? "
"tunah khan a haw chiah...inah hruai tur che in min ti " tih pahin a phone a message chu min rawn hmuh a, ka chhiar hma hma in a ak daih lehnghal.
"in inah ka kal peih reng reng hleinem"
"keipawhin hruai haw che hi ka duh bik hleinem "
" anih a hnu... min hruai lo la nimai lawm"
"enteh...ka pa leh ka û te thinrim hmel hi hmuh ka duh tawh lo,chuan mawhphurhna hlen zo lo mi nih hi ka duh lo bawk"

Ka chungah ṭha hle mahse an chhungkua ka hmuh hian ka thik em avangin kal leh pawh ka duh tawh lo.Kei chhungkua mumal pawh nei lo hian ka vanduai bik zia ka in hriatchhuah leh ṭhin avangin an bul hnaia awm pawh ka duh vak lo.Ngawi renga ka ding reng avang chuan thinrim insum tih hriat tak hian,"heng thil zawng zawng hi ka fa tan chauha ti ka ni,ṭha deuh deuh a biak reng che hi nuam ka tih bik i ring em ni?
...i rawn kal duh lo anih chuan ka tilui lo ang che " tih pahin car ah chuan a lut nghal daih a,a ti nung nghal hlat hlat bawk.

Kei pawhin ka fa tana ṭha tur ka duh ve tho avangin phur lo zetin ka lut leh ta nge nge a, he naute hi mi eng nge maw tak chu ala ni ngei ang a pian hma hauh aṭang tawhin min control nghal der chu anih hi.
"kei pawhin ka fa tan chauh ka ti ve tho... " tih ve sak pah chuan ka jacket chu ka han phelh kher a,seat hnungah ka theh phei nghal tawp bawk.
"kal vat vat ang " ka ke ka hlang rual rual chuan ,"hey.... ka car hi tibal reng reng suh.... " tih pahin ka jacket chu la in a rawn theh phei leh kher anih chu.
"ka ke a vung nasa lutuk a a kham alawm" ka tih takah chuan insum tih hriat tak hian an han thaw chhuak halh a, shades vuah pahin a tlan chhuak nghal bawk.

Inchhung kan luh dawn chuan min lo nghak ve ngei anih chu ahma zawnga min nghak duh der si lo.Asher chuan hma a han hruai a, a hnungah inthlahrung takin ka zui chhat chhat bawk.
"ngatinge i hmai chu?" hmeichhe pakhat lo awm ve in a rawn tih chuan ning hmel zetin ka lo meng pual ralh ringawt. Ni e, ka hmai a vung in a duk thluah tih chu ka hre ve tho an rawn sawi lan sek hian thil thleng kha min hriatchhuah tir mai mai.
Pastor Samuel ka hmuh chuan inti fel fahran hian ,"hi....! " ka han ti sup a,midang ho chuan mak ti hle mahse ani pawhin 'hi!! ' a rawn tih let ve avang chuan ka ṭawng sual lo turah ka ngai.

"ka lo lawm a che....heihi Asher û Joel ania chuan heihi a nupui Rachael " Pastor Samuel chuan a han ti dap dap a,engvanga tun a taka min hmelhriat tir thut nge maw anih le?
"ngatinge hetah min koh? "
"haha.... tun aṭang chuan kan inah i awm tawh ang"
" maw!! " Asher nen chuan kan ti rual ṭhawt ringawt.
"Ka pa...min neih a duh lo tih i hriat vek tawh kha.. "
"in in nei dawn ka ti reng reng hleinem... Coco hian i fa a pai a enkawl hi kan mawhphurhna ani "
"nilo...henu hi ka chenpui thei lo ang" tih pahin Asher chu a chhuak nghal daih a, kawngka a khar nghal ṭhuai bawk.

"umm... ka tihpalh lutuk, buaina... "ka ti dek dek a,
"Coco.... kan tei kual mai mai dawn mi niang? " a rawn tih takah chuan ka lo bu nghat ringawt.

Samuel nen chuan an in piaha teak hmun ah chuan kan inzui hnak hnak a,a bula awm hi a hahdamthlak takzet.
"khita sava khi i hmu em? " a tih chuan sava thingkua a thlawk lut chiah second nga hnu vela rawn thlawk chhuak lehnghal chu ka han en nghal vata.
"a thlawk kual anih khi... "
"a fate chaw zawngin chawl pawh chawl lovin nilengin a thlawk kual anih khi..."
"a pa a awm ve lo em ni...? "
"a fate a ngaihsak lo pawh ani mahna ... a pa in a fate a thlahthlam avang khian anu khian a fate khi a thlahthlam ve anih vaih chuan an thi vat ang"

"a pa in a ngaihsak lo anih pawhin a fate tan chuan a bei hram hram tur ani asin "
" mahse amah chauh chuan thil awlsam tak ani lo ang tikhian zanah a fate ti lum reng rengin hun a hmang leh anga chutah thla an neih veleh thlawh a zitir leh nghal anga...khitiang thil zawng zawng khi a tih nachhan chu a fate a hmangaih vang ani"

Sava naute khi keimah ah ka inchan a ka lung a awi thei tlat lo, chhungkua chu an ṭang rual tur ani lawm ni, anih loh vek pawhin an fate hma hun atan chauh pawh engkim an huam tur ani dawn lawm ni.
"a pa chu awmse chuan a awlsam sawt ang mawle bakah theih tawp an chhuah tur ani asin "
"a dik chiah....fate tana ṭha tur anih phawt chuan engkim kan ti mai tur ani" a tih takah chuan a sawi tum ka hre nghal mai, ka nau pai lai tana ṭha tur anih chuan an ina awm mai pawh huam tura min fuihna ani.Chumai bakah Asher an min pui lo mahse chak taka awm turin entirna a pe ani.
"mahse mahni chauh chuan a harsa alawm... "
"mahni chauha a harsat chuan in ṭanrual angai dawn anih chu "
" mahse engtin.... "
"a rilru hneh i tum chhin dawn lawm ni..."tih pahin ka kut chu a rawn hum vang vang a, "Coco....i thei ani tih ka hria mahse zuang lovin i kal beuh beuh angai dawn ani " a tih chuan ka ngaihtuahna a kal thui takzet. 

Read More

My Drug is You-12 by Remruati Bawitlung(Haylor)

CHAPTER-12

"min pui rawh, pui ka ngai" ka han ti leh hram a,a hriat hman ka rin tawh loh avangin chhuatah ka phone chu ka han nghat dat a,thawk chhuah hawk hawk pahin ka pa kut chu nghet takin ka han dawm vang vang a,kan baihvai em avangin min ṭanpui tu tur takngial pawh kan nei lo ani a,ka hliam ai mahin ka thinlung hi a na mah zawk.
"Coco...Coco i ni em?" phone ka dah tawp avangin rin loh deuhin aw ka hre ta thut mai!! phone melh vung vung pah chuan ka han ngaithla chiang leh deuh a, aw ka hriat rual rual chuan rang lutuk in phone chu ka la leh nghal vata kan ngaihthlak chian nak chuan Asher an min lo ko lauh lauh chu niin.

Koh ka tum lai tak chuan,"tuman min chhang lo " a tih hnu lawkah a reh nghal daih a,hmeichhe aw hian, "hello " a rawn tih chhunzawm zat bawk. Exam ka nei dawn ati sia engvanga Lily nen awm dun nge maw an nih le?  hepa hian dawt min hrilh ani maw.
"tunah kan inah rawn kal vat rawh.... " thupe deuh hian ka han ti nghal ringawt a,puih ka ngai bawk si a phone dah thei ka ni tawh lo.
*"Coco ani in ka hria...an inah kal turin a ti che"*
hmeichhia in a tih ri ka hriat hnu lawkah phone chu an dah nghal hmak bawk.

Minute15 vel lai a liam hnu chuan pen thawm ka hriat avangin ka han meng siar siar a,Asher hmel ka hmuh chuan ka khi suk ringawt.
"a mar ala awm damdawiin ah hruai vat ang " an tih ri chu ka aw hriat hnuhnung ber ani.

Ka lu an rawn tih chet avang chuan ka harh rual rual in a ban ah chuan ka man nghal chawt a,rang lutuk in ka herh nghal pawp bawk.
"anâ....min thlah rawh.... a na ania " doctor in a rawn tih takah chuan ka thlah nghal vata, ka hawi kual nghal vat bawk.
"hetah hian eng tianga rei nge ka awm tawh?"
"darkar thum vel...."
"khawiah nge ka pa a awm?" tih pahin ka tho thut a, ka biang lah chu a na em em lehnghal.
"hei, hei.... khawiah nge kal i tum?" chupa chuan min lo man nghal vata.

A coat vara a hming in ziak en vung vung pah chuan, "Mr Freddie....min thlah la a ṭha in ka hria " ka han ti vin hlar a.
"ka patient i nia.... khawiah mah ila kal thei lo"
"nat i duh loh chuan kalsawn vat mai rawh " a aia nghet chuan min han man bet leh a, ka sa nghal at mai.
"ka hrilh tawh che kha " a in rin loh lai takin a banah ka herh nghal pawp a, a ṭhingṭhi nghal rawp bawk.
"eng ang hmeichhia nge maw i nih le? "
"ka rawn let leh ang " tih pahin ka tlanchhuak nghal vat bawk.

Ka pa awmna room ber pawh hre lova ka zawn kual mek lai chuan nimin a nurse min enkawl tu nu kha ka hmu hlauh mai, zah pawh dawn lo in ka va pan nghal chawt a min hmuh chuan mak tih hmel takin a meng phawk nghal kawk ringawt.
" ngatinge i hmai hi!! "
"ka pa awmna room min hrilh thei angem?"
"aw... ughh,  i pa hming min hrilh la ka lo check dawn nia "
" nilo.....a awm lo ang, ihhh.... Asher leh Lily te rawn hruai damlo kha" tuman a hming an hriat dawn loh avangin hetiang hian sawi ila a hre thei zawk ang.

" kha kha maw....tunah ka kal dawn chiah asin " a tih takah chuan ka thaw nghal huai mai,vanduai ṭhin hle mah ila vanneih chang ka lo nei ve ṭhin tho anih hi.

Ka pa awmna room kan luh chuan khumah tui takin alo muhil bam a,oxygen mai bakah a taksa ah thil eng eng emaw an vuah nasat em avangin ka ngaih a ṭha lo nghal.
"eng nge a an? " nurse chu ka han zawt sap a.
"a thluak ah thisen a tling a siak chhuah vat angai dawn ani, bakah BP sang alo nei bawk nen tunah rih hi chuan an zai ngam rih lo a mahse a ṭha leh vat mai ang " a tih chuan ka pa hriselna ka ngaih pawimawh rual rual in senso a tam tur zia hi ka ngaihtuah thiam lo zawk. He damdawiin hi damdawiin ṭha leh hmingthang tak anih avangin enkawlna a ṭhat bik mai bakah
a to bik bawk a chu chuan ka rilru a ti hah takzet .

" anih inzaina man chiah hi engzat nge niang... "
"$5000 bawr vel anih ka ring..." ka bing nghal mup mup mai, khawi aṭangin nge chutiang ang zah zah pawisa chu ka neih tak ang.
"min lo hrethiam la...i pa hian chawlh hahdam a mamawh ani " a tih takah chuan ka lo bu nghat a, muangchangin ka chhuak hna hna bawk.

Engthil mah ka ngaihtuah thei tawh lo, ka pa ba, ka pa inzai na man heng zawng zawng hi engtin nge ka rulh vek theih tak ang. Ka pa hian ka nunah buaina bak a thlen loh mai bakah min ngaihsak lo hle mahse pa leh fa inkar hi chu alo chhut chah theih tak tak lo anih dawn hi.
Hmeichhia ah pawh chhel leh tlawm ve mai mai ngai lo ni mah ila, chhungril ah chuan hmeichhe dangte ang tho in awm nem leh no tak ka ni ve tho, mahse ka nun in a zir loh em avangin ṭah chhuak ve ṭhin hle mahse ṭap mai mai hman ka ni ve lo.

Ka awmna room ah Asher ka hmuh chuan rang takin ka hawi sang nghal vah a, rilru hah ang pawhin ka awm duh lo.
"khawiah nge i kal? "
"khawiah mah" ka chhan dan ngeiawm zet avang chuan a chal a rawn chuar nghal tap mai, mahse a insum ani tih hriat tak hian,"kha hei hian i hmai kha dep rawh " tih pahin ka hmai duk dehna tur chu min rawn pe a, ka lo la nghal sawk ringawt.
"i ṭha maw? " ka ṭhalo ani tih a hre ve reng sia engvanga min zawt leh kher nge maw anih le?
"i kal thei tawh ang"
"ka pa in rawn hruai tur che in min rawn tir a "

"i pa bulah chuan angai lo lo tirawh "
"car ah a nghak reng che... i rawn kal ngei ngei angai "
"ka duhlo ka tih chu "
"rawn kal turin ka duh che i ring bik em ni? " tih pahin a chhuak nghal daih anih chu!!  khatiang khan min ṭawngkhum vel amaw!!
Ka ngei em avang chuan ka va umzui nghal vata, lift ah a luh hma hma chuan ka luh khalh nghal thawt thawt bawk.
"i rawn kal dawn lo ani lawm ni? "
"ka rawn kal dawn reng reng lo" ka ti na chungin apa chu hmuh ka tum tho. 

Read More

My Drug is You-11 by Remruati Bawitlung(Haylor)

CHAPTER-11

Kalna tur nei lova kawng sir a ṭhut pah chuan Hunter card min pek chu ka en renga, hepa hian ka taksa bak duh a nei lo ani tih hre chiang hle mah ila a lak aṭanga ka tal chhuak thei lo hi ka inhaw takzet.Ka lakah a thinrima pawisa min pe duh lo anih vaih chuan thil dang chu sawi loh ka pa eitur leh chhiah takngial pawh ka pe thei lo ani a,chuvang chuan hreawm ti chung chungin ka tawrh mai angai ani.
Ka chau mai bakah mut hahdam ka duh avang leh kalna tur dang ka neih loh avangin loh theih lovin inah ka haw leh ta nge nge a,a theih hram chuan ka pa card den na bula awm loh hram hi ka duh.

Kan in râm tawh zet ka thlen chuan ka rin ang ngeiin bike leh car kan in kawtah alo awm leh tawh , ka pa card deng lai hi nan loh hram ka duh asin le.
"naute min ti chau takzet " ka pum dawm pah chuan ka han ti sap a, phur lo zetin inah ka lut nghal vat bawk.
Kawngka ka hawn rual rual chuan ka hma ah tak hian ka pa chu a rawn bawk nghal thlawp a,pa lian pui pui pathum hi an rawn ding nghal khup bawk.
"min pui rawh " thei leh thei lo hian ka pa chuan ka ke chu a rawn kuah nghal vata,an sawisak nasat tawh em avangin chet pawh a che ṭha thei tawh lo.

"chhuak rawh u.... " a engah mah hma in ka han ti nghal ringawt a, pa lian tak tak ni mahse zam hmel hmuh ka tum bik hauh lo.
"pawisa min pe phawt rawh " an rawn tih takah chuan ka pa in pawisa pek tur nei lo in card a khelh pui ani tih ka hre nghal.
"ka nei lo "
"min pe vat mai rawh.... anih loh chuan in in hi kan la ang "
"engmaw?"ka pa pawh sawn deuh pah chuan ka han tawlh hnung deuh hrat a,pakhat chauh pawh hi ka hneh dawn lo tih a chiang reng avangin ka duh chuan ka tlanchhe daih thei mahse eng ang pawhin ka chungah sual mahse ka pa hi ka tlan chhiatsan thei tlat lo.

An rawn kal hnai deuh avang chuan hmanrua ban mai theih tur chu ka han melh kual deuh na in pangpar pot bak a awmlo.
"nat i duh loh chuan tlanchhe vat rawh... " tih pahin min rawn pan ta mai!!
"min rawn hnaih hlek suh... " tih pahin pot chu ka han lek va a,ka hmanraw ken lai a beitham em avang chuan in melh hruk hruk pahin an nui suk ringawt.
"hun kan pek lai che hian tlanchhe vat mai rawh " ka pa rawn khawih leh a tum avang chuan ka theihpathawp a na in a lu ah tak pot chuan ka vaw nghal pawp a, ka in rin hma in lehlam aṭangin ka hmai ah tak a rawn ri nghal sawk bawk.

Min hnek nat em avang chuan chhuatah ka let nghal tawp a,khua em pawh ka hmuh fiah hma hauh in ka sam ah ṭham in min pawt tho nghal pawp a, nichin lawka ka vuak zawh chiah pa hma ah tak khan min ṭhingṭhit tir nghal rawp bawk.
"hmeli... i thil tih hi i hria em?" a thinrim bawk aniang ka hmai ah a rawn beng nghal pawp a,mahse a lu ka vuak avanga a na ti ner nung ka hmuh chuan ka nui nghal suk ringawt.
"i la nui ngam elaw "ka biang lehlam a ben leh pawp pahin chhuatah min nam tlu nghal dawrh a,ka pum ka lo veng hman avangin ka sawh lo hlauh.

Hmeichhia ka nih vang pawh ani mahna ka hmai a an ben bak kha chu engtin mah min ti lo. Chet pawh ka chet ṭhat theih tawh lo avang chuan an zinga pa khat chu ka hmai zawn ah tak rawn kun hniam in,"ni10 chhungin min pek loh chuan in in hi kan la ang "rawn tih khur khur paha min chhuahsan rual chuan ka thaw nghal huai mai.
Ka lu a hai mai bakah ka biang a nat em avangin zangthal pah chuan ka han maimichhing vang vang a,chechang tur pawh ka awm tawh meuh lo.

"i ba kan rul zo chiah a engvangin nge i lo khelh leh ṭhin a"mut hle hle pah chuan ka han ti sap a, ka ṭawng zawng ringawt pawh hian ka hmui a na thei.
"pa ni tlak pawh i ni lo....natna bak min thlen lo " tih pahin ka pa ka va en nak chuan a lu zawnah thi alo tling ta, pum mai!!
"hey.... " tih pahin ka ke in ka han tlawh leh a,a che tawh lo hrim hrim.Thei leh thei lo chuan a lamah ka va tawlh hnai nghal hrut hrut a.
"ka pa... ti der lo teh "ka sawi vak vak chung pawha a harh theih tak si loh avang chuan ka mangang ta hle mai.

Hmanhmawh takin Hunter ka call nghal vata mahse a in ring ral ṭhak ṭhak. Hunter hi sual hle e tilo chuan min pui tu tur awmchhun anih avangin ka call hmasa ber ṭhin. Hunter ka call theih tak loh avang leh mahni pawh ka chet ṭhat theih loh laia ka pa damdawiin a hruai chu thil theih loh tawp anih avangin beisei pakhat chiah ka nei ta chu chu Asher call ani.
Duhthlan tur dang ka neih loh avangin hreh tak chungin Asher chu ka call ta nge nge a,a la tawh dawn lo emaw ka tih hnu ah a rawn pickup hlauh.
"Asher.... " ṭawng pawh ka ṭawng chhuak ṭha thei lo.
"tunah exam ka nei a... nakin ah ka rawn be leh ang che " 

Read More

My Drug is You-10 by Remruati Bawitlung (Haylor)

CHAPTER-10

An chhuah hnu deuh lawkah chuan nizana nurse senior tawh hmel zet khan thil hi a rawn nawr lut a, kei erawh maimichhing chungin ka lo mu ar ar thung.
"hei i thawmhnaw aw... " tih pahin couch ah chuan a dah a, damdawi eng eng emaw a tih pawlh hnu chuan IV bottle ah chuan syringe hian a rawn kap lut a, a che vel chu ngun takin ka lo en kar bawk.
"e... hei damdawi pawh ilo lei tawh elaw " tih pahin nichin lawk a Lily rawn khai luh kha a han en fel vela,a kim bawk aniang a bu nghauh nghauh ringawt.

"ka thawmhnaw hi ka ha thei tawh angem?"
"an discharge hunah che i ha chauh dawn nia,tunah rih chuan kha kha chetpui a nuam zawk ang "
"engtin mah ka awm loh te chuan ka chhuak thei mai lo em ni?"
"enteh... nula, tunah hian nau i pai meka, mahse i mamawh ang chaw pawh i ei loh mai bakah hetiang ang thawmhnaw tight lutuk i hak reng te chuan naute tan pawh a ṭha lo" engvanga ka thawmhnaw pawh chu sawisel reng nge maw an nih le ? ninawm hlawm lutuk.
"i naute hi i uluk loh mai bakah nangmah i in enkawl ṭha lo bawk nen tlema tlemah i chhiah lo chauh anih hi"

A ṭawng hnem em avang chuan in kuangkuah pahin ka maimichhing san daih a,chutichung pawh chuan ala ṭawng char char tho.Tunah tak hi chuan mut hahdam mai mai ka duh asin le
"heihi iron ania i taksa tan.... "
"khawngaihin i ngawi thei tawh em?"a sawi zawh hma hma chuan ka lo ti vin nghal tun a, thinrim ang pawhin a awm chuang lo.
"Asher an hrilh hre vek tur che in min ngen alawm....a eng chiah nge maw i nih le?  nizan ah pawh a hun awl apiangah a rawn thlithlai ziah che a, mut pawh a mu reng reng hleinem"
"anih chuan min ngaihtuah tihna em ni? "
" ni tehreng ang chu... a ngaihtuah loh che chuan a rawn kal tawp nang " a tih takah chuan ka hnuk a ulh ringawt anih chu!!

Hmeichhia mah ni ila ka tawrhchhel em em a, ka ṭah loh na chin pawh ka hre tawh lo, mahse midang in min ngaihtuah ani tih ka hriat hian min khawih takzet.Ka tetlai aṭang tawhin khawngaihna leh ngaihsakna ka dawng ngai lova, keimah hian ka khawsa ve naw naw ṭhin ,hetia ngaihtuah tlak lo leh ngaihsak tlak lo ka ni chung pawha min lo ngaihtuah ve tu an awm hian ka hnuk a ulh lo thei lo. Ka hriat chinah ka nu tih loh ah Asher hi min ngaihtuah a min ngaihsak hmasa ber tu ani hial ang.

"ei chak te i nei em?"
"aih.... "
"mamawh i neih chuan heihi i hmet mai dawn nia " tih pahin a thil rawn nawr luh bawk kha a nawr chhuak lehnghal hna hna a, hengmi te hi ka chungah an ṭhat em avang hian ka awm an ti nuam lo zo vek.
Drip khai an phelh hnu chuan ka ning tawh em avangin damdawiin chung zawlah chuan ka chho ta ringawt a, ka phone lah chu Hunter leh midang dang miscall in a kat nuk tawh mahse hahdam taka awm ka duh avangin ka pickup duh lo.

Chutia boruak ṭha ka lo hip vang vang lai chuan mipa pakhat hian,"i tla nge? "a rawn tih thut avang chuan ka hawi let nghal vata,Pastor Samuel lo ni rengin ka meng phawk nghal kawk ringawt.
"hetah eng nge i rawn tih?naute chu a ṭha"ka lo ti nghal zung zung ringawt, ni e... naute vang bakin a rawn kal chuang hleinem a thil hriat duh ka lo hrilh ani ve maia.
"nangmah zawk kha i ṭha em?" a rawn tih takah chuan chil lem dak pah hian lehlam ka hawi nghal vata,ti lang duh si lo hian chhungril ah ka hlim veng veng mai.
"lungngai suh ka ti tla lo ang...."

"anih inneih lampang te.... "mo atan min duh tak tak awm tawp si lova engvanga chu thu pawh chu rawn sawi sek nge maw anih le?
"enteh Pastor... " tih pahin zam hauh lo hian ka va kal hnai deuh a.
"i fapa hi a hmeichhe hmangaih tak neih tir zawk rawh....chuan ka fa erawh ka enkawl theih dawn loh avangin ka pe ang che u"
"mahse....i thusawi avang hian i va hlim hmel si lo ve " a rawn tih takah chuan ka han nui lui suk a.
"he khawvel ah hian hlimna tak tak a awm lo...chuan ṭangkaina kan neih tawh loh veleh hnawl kan ni bawk ṭhin chu chu nun awmzia anih chu.... "

"i theory chu nangmah ngei pawhin i awih lo anih kha mawle....inhnuai ah chhuk ang hmiang, i hritlang ang thli a thaw emai " he putar hi a fing reuh mange, min hnial dâng dan a hre zek lehnghal.
"ka rîl a ṭam " ka ril ṭamna a rei tawh bawka, ka ti nghal thawr ringawt.
"anih chuan inhnuai ah kan chhuk vat angai dawn anih chu.... "
"room a mut reng kha chu ka peih tawh miah lo ania "
"ka hrethiam e "

__________________________________________

Pastor Samuel an bill vel a lo pek fel vek tawh avangin leh buaipui tu ka neih loh avangin keimahin ka chhuak hna hna a, a ruk tak chuan chhungte neih ve a hlim taka ina haw ka chak takzet mahse chung chu ka mumang ah pawh a la thleng chhin ngai lo.
Loh theih lovin Hunter bulah bawk chuan ka haw ta ringawt a, inchhung ka luh hma aṭang tawhin ka khur nghal der. Chil lem dak pahin chhuanlam siam tur pawh nei chuang lovin ka han lut chhat chhat a, kawngka luh rual chiah a chhuata hmeichhe pheikhawk lo let reng ka hmuh chuan room lam ka pan ding nghal chat.

Ka rin ang ngeiin Hunter chu khumah hmeichhe pakhat nen hian tui takin an lo la muhil a, ka thawm a hriat rual rual chuan rawn harh in ngeiawm zet hian min rawn nuih suk ringawt.
"chhuak rawh.... " chunu chu ka zuk melh nghal khai a, Hunter an engmah a sawi loh avang chuan min hnial ngam bik loh avangin thinrim takin a tho a, room a chhuahsan nghal nal nal bawk.
"khawiah nge i awm? "
"ka damlo... "
" i damlo anih pawhin race i ṭhulh tur ani lo.... "

"ka damlo ka tih chu " ka tih pawh chuan card hi ka hma ah tak hian a rawn theh thla a.
"heihi zanin ami tur ania....buaina dang i neih tawh loh ngei ka beisei... "
"theilo ta ila " ngeiawm zet hian ka han ti ve leh kher a.
"anih chuan hman zana mi i sawisak thu kha ka report ang.... mi thil ti thei tak an ni lehnghal jail i tang rei khawp ang le"
"hmela min tih tir anih kha... "
"anih chuan zanin ah rawn tlai suh aw... " min rawn nuih suk pah hian min rawn fawp nghal tun tun a, "i kal thei tawh ang " tih kher pahin bathroom ah min luhsan nghal daih bawk. 

Read More

My Drug is You-9 by Remruati Bawitlung(Haylor)

CHAPTER-9

"engtin nge i awm?" rawn kal hnaih a tum chuan," min rawn hnaih suh " ka lo ti vin nghal hlar a, ka tai a nat tak em avang chuan dawm vang vang pahin ka kun tlawk tlawk bawk. 
"i thi a put ania.... inchung lamah chho ang " min tih chiai a duh loh vang pawh ani mahna hahdam deuh hian a rawn ti mai a chu chuan min pui takzet bawk. 
"ka thei lo.... ka kal ngei ngei angai " tih tlat pahin bike a chuan mai chu ka han tum zet na in, a nat tawh em avang chuan ka hmui ka han pet fan fan a, ka thlantui in min leih nghal bawrh bawrh bawk. 

"che miah suh" tih pahin ka kekawr kawng chu a rawn phelh thawl nghal va sawk sawk a ṭang thei pawh ka ni tawh lo,ka che ṭha thei tawh lo bawk nen awlsam te hian min pawm kang nghal nawlh a. 
"hmela engthil nge maw i tih le?" ka ṭawng hria ang pawhin a awm lo hmanhnawh takin min tlan pui nghal dawr dawr ringawt. 
Nurse in min rawn hmuh rual rual chuan min pui turin a rawn tlan phei nghal vata, a ṭawng hma hma in,"gurney rawn la vat rawh... tunah " Asher chuan a lo ti nghal zung zung a. 
"awle... " tih pahin chunu pawh chu a tlan let nghal char char bawk. 

Minute hnih hnu vel lekah chunu bawk chu khum nawr lir theih nen hian a rawn tlan phei nghal dawr dawr a, a rualin nurse pakhat a rawn hruai tel ve nghal bawk. 
Khumah chuan min mut tir nghal vata, room pakhat ah hian min nawr lut nghal dawr dawr bawk. 
"damdawi engmah pe suh ang che u " 
"mahse nachhawkna tala kan chiau loh chuan na a ti tawh lutuk... " 
"nau a pai meka eng damdawi mah a ei thei lo "
" min kal tir rawh u... ka kal duh " kha bike intlan siakna kha ka tan a pawimawh em avangin ka lo ti ve chhen bawka, tuman min ngaithla lo hrim hrim. 

"doctor ko vat rawh u.... thi a put nasa tawh lutuk " Asher takngial pawh a aw a khur nasat danah a hlauthawng tih a chiang reng .
Nurse pakhat zawk chu hmanhmawh takin a tlan chhuak nghal vata, pakhat erawh chuan ka BP alo endik thung. 
" Nangpawh i duty na turah va kal tawh rawh " Nurse senior tawh hmel zet in a tih takah chuan Asher chu kal a tum ta mai, theih leh thei lo hian a ban ah ka va man nghal chawt ringawt. 
"khawiah mah kal suh ang che" ka tihngaihna hre lo chuan ka vau nghal khur khur ringawt. 
"ka kal dawn lo...." tih paha a ṭhut tak avang chuan ka han maimichhing nghal vang vang a,nghet takin a kutah ka vuan tlat bawk .

Ka luak a chhuah em avang chuan ka harh nghal kawk a,han thawh mai ka tum nak chuan drip an lo khai mai bakah Asher chu khum bawh chunga tui taka a muhil lai ka hmuh chuan ka khi nghal suk ringawt.  
Khua chu alo var der tawh a ,ka thawmhnaw te chu thlak in damlo kawr min lo hak tir diam tawh , diktaka sawi chuan nizan khan Asher hian min awmpui ka ring miah lo, mahse ka ngenna a ti hlawtling dawn nge dawn lo lo tih enchhin ka duh avanga ngen mai chauh ka ni. 

Ka uak nghal tuarh avang chuan ka kâ hup chungin thawm dim thei ang berin bathroom ah ka tlan lut nghal vata, drip min khai tir bawk nen IV bottle khai kang va chung chuan luak chhuah tumin ka uak nghal tuarh tuarh ringawt. 
Chutia luak chhuah tur awm bawk si lova ka uak tuarh tuarh lai chuan thil hrechhuak ni awm tak hian ka pum ka khawih nghal vata. 
" ka naute... " tih sap pahih ka tlan chhuak lehnghal vat bawk. 

Asher pawh alo harh tawh,a coat var a hak ṭhat mawlh mawlh lai chuan a kawr nghawng ah ka va ṭham nghal sawk a. 
"nizanah khan engtin nge ka awm?" naute chungchang sawi lang duh chiah silo hian ka han ti vin nghal hluk a, a mit ah tak chiang takin ka en kar bawk. 
" mawh.... " 
"engtin mah i awmlo, naute pawh a ṭha " chau tih hriat zet in ka kut pawh thlak pah chuan a han ti chuai raih a,
" mu hahchawl rawh" tih zui sap pahin IV bottle chu a khai ṭha nghal vata,ngawi rengin ka mu ve nghal mai bawk. 

"khawiah nge ka thawmhnaw a awm? " 
"nurse in suk turin a la " 
"hmeli chu leh... "
"naute khatiang anga i hren reng te chuan a thaw thei lo mai anga sin"khik suk pahin puan chu min rawn sin ṭhat tir a, min be ṭha duh lo viau mahse nelawm ruk na riau a nei. 
" nizan khan... ihhh...." Asher bialnu a rawn luh avang chuan ka ṭawng tawp nghal chawt ringawt. 
"hei aw....ka lei kim chuan ka hria " tih pahin a thil khai lai chu ka mutna bul dawhkan ah chuan a rawn dah a, ka lo melh rum ngang mai. 
"Engtin nge hetah a awm tih i hriat? " Asher chu ṭawng zawi hle mahse ka hre vek tho,chunu lah chuan,"naute a ṭha em?" a lo ti nghal sap a, Asher chu a bu zui nghauh bawk. 

Chutia ka hriat theih loh tur khawpa zawia an inbiak zui kher avang chuan ka sa lehnghal up up tawh. 
"tikhan lo mu hahchawl rawh...nakinah nurse a rawn kal ang"  
"khawiah nge i kal dawn? " 
"tlaiah exam ka nei a ka haw dawn...."  
" maw!! " 
"naktuk ah i chhuah theih nghal mai ka ring...i pa rawn hruai chhuak tur che in ka lo hrilh dawn nia " 
"angai lo " 
"anih chuan i bialpa kha i ko mai dawn nia" a tih chuan ka ngawi reng ringawt 
"mangṭha le "tih pahin hmanhnawh zetin chunu nen chuan an chhuak nghal daih anih chu, ka thinrim bawk nen ka puan sin lai chu ka ṭham nghal tawn ringawt.

(tihtur ka neih avangin zanin chu chhuah loh ka tum zet na in a hmingin tlemte tal ka rawn chhuah leh hram"

Read More

My Drug is You-8 by Remruati Bawitlung (Haylor)

CHAPTER-8

Damdawiin chungchang engmah ka hriat loh mai bakah kawng peng a tam bawk si a khawi berah nge kal tur tih pawh ka hrelo.Ka kal thui poh leh ka bo thui ting tawh mai bawk nen ṭhutna ka hmuh hmasak berah damlo lo ṭhu ve karah chuan ka zuk in hnawh ve tawlh tawlh a, min en duh hlawm em em lehnghal.
"i va hlauhthawn hmel ve " ka bula putar ṭhu in a rawn tih chuan chhan pawh ka tum lem lo, bakah ka hlauhthawnna pawh ka hrelo.
"i hmelṭha si a... hetiang anga i in chei te chuan awm ṭha duh lo emaw an ti mai ang che " a rawn tih takah chuan ka inchei dan chu hmu ngai lo ang maiin ka han in en nghal vat a, jeans jacket kiu ṭet pheng phung leh shiny leather pants duh taka ka hak chu ka sit nghal rum rum mai.

"enteh pu a...nangpawh i lu kawlh zet an hmuh hian thi mai tawh turah an ngai ve tho ang " chutia ka lan dan a sawisel takah chuan ka ngaithei bik der lo bakah kei aia upa anih avang hian ka ngaihdan ka sawi ngam loh phah tur ani bawk hek lo.
"nula.... khawi aṭanga rawn kal nge maw i nih le,i va hawihhawm lo em em ve" a bula pitar ṭhu a nupui niawm tak chuan a lo chhan ve khanglang lehnghal. Ka chhan peih tawh loh avangin ka ṭhu ngawi renga bakah hepa hi khawi lai berah nge a awm tehhrep ni? be lovin haw mai chu ka rilruk rum rum tawh.

"Dr. Asher hi khawiah nge a awm?" chu putar bawk chu ka han zawt leh ta nge nge a, mak tih hmel tak hian," engtin nge Asher nen in in hriat?" alo ti sup bawk.
"chu chu a pawimawh ber emawni le, Asher hi ka pasal hual ania.... i lawm tawh em?" ka lo tih zuah zuah lai chuan Asher chu nurse pakhat nen hian an rawn kalphei ta thut mai!! nurse nu awmdan aṭang chuan ka ṭawng kha an hre hman ani tih a chiang reng.
"eng nge hetah i rawn tih?" British awphawi mawi zet leh rîl ngak hian a rawn ti deuh hmuk a ,a aw thum leh pawr deuh tak ringawt pawh hi khami zan khan ka lo luangliam pui daih tawh.

"kan inbe lawk thei angem?" ka tih takah chuan a sana chu a zuk melh zeuh a,a file ken lai chu nurse pek pahin,"min lo va submit sak mai ta che ka rei lo ang "a tih chuan nurse nu chuan min rawn melh ralh pah hian a lo bu nghat a,ka ngaihbel nge pawh ka hrelo min melh dan a dang deuh hi chuan ka sa nghal phat zel.
"min rawn zui rawh... " tih pahin kal mai chu a han tuma, mahse nichin a pitar bawk khan, "bawiha .... rawn let leh vat ang che, henu hi mi ṭha ani lo" a rawn ti leh khanglang anih chu, mahse Asher a awm bawk si a ka insum hram hram angai.

"tehreng mai Pi Grace "
"fimkhur ang che... " a tih chuan a nui suk ringawt.
"Hello....Pu Lincoln kha ilo tlangval tawh hle mai, kan lo ṭawngṭai pui reng ṭhin che ania" midang a biak dan chu a dang zâr mai alawm,mahse a awm ve tho e kei ang mihring hi chu midang te endawng leh biak nawmnah ka ni fo alawm, ngaiah ka nei tawh zawk.
"chawlhni ah kan in hmu dawn nia " Pu Lincoln tia a koh chuan a han tih takah chuan an in hre ṭha viau ani ngei ang.
" mangṭha ule... " a tih chuan ka thaw nghal huai mai, heng tar ṭawngthei lutuk ho hi kalsan thuai thuai ka duh mahse engvanga thinchhe ta em em nge maw ka nih le? hetiang hian ka awm ngai si lova nge ka rai vang zawk?

Inchung lam panin mi pawh ngaihtuah lek lova min chhohsan daih avang chuan thaw hlawp hlawp chungin ka zui chho ve zela, a kal chak em avangin hmuh pawh ka han hmu zui tawh lo.
"lift pawh a hman theih reng sia" tih nuah nuah pahin ka chho ve zel a ka luak te hi a chhuak vek tawh.Damdawiin chung zawl ka thlen chhoh meuh chuan thawk pawh ka thaw ṭha thei tawh meuh lo,mahse ka rin ai daihin khua a thiang in boruak pawh a nuam ka hahdam nghal sawng sawng mai .

Asher chu min hnungchhawn zawng hian khawpui phe uarh chu alo thlir dauh dauh a, a hnung lampang chiah hmu mah ila a dar hlai tak te leh pian inphut mawi tawk tak te chu ka mitthla a ka hmuh leh avangin ka khi suk ringawt.
A nihna takah chuan a hma daih aṭang tawhin Hunter vang hian Asher hi chu ka lo hmelhriat daih tawh, mahse ralkhat aṭang chiaha hmu ka nih avang leh ka engmah a nih loh avangin ka bengkhawn lem lo.

Pastor Samuel erawh kum10 mi lek ka nih aṭangin ka hre tawh thung.Ka nu hi drug overdose in a thi a, khatih hun lai khan ka la te in ka pa lah a rui thle reng mai bawk si a,tuman min buaipui duh loh avangin Pastor Samuel an ka nu ruang chu la in midang te chunga a tih
ṭhin dan ang tho in thliar hrang bik lovin a vui ta ani.
Khami avang khan rulh let ve ngei ka duh avangin Rubby house party ah pawh khan keimah ngei hi ani Asher room a hruai chho tu kha,khatia Pastor Samuel fapa lo rui thle reng ka hmuh khan a mualpho ka hlauh avangin mi dangin an rawn hmuh hma in ka sawn chho ta ani.

Mahse ka lo ruih ve tho avangin rin loh lam daih ah kan kal phah ta ani.Ni e, khatiang anga mipa hmelṭha leh chhelo zûn ngah bawk siin a fawh tawh che chuan in insum thei bikin ka ring lo. Asher kha a rui lailet der ani tih chu hre tho mahila khami zana thil thleng kha a theihnghilh vek avangin chhungril ah ka na takzet.

"fa i tih tlak ai chuan min pe rawh" rawn hawi lo mahse ka penthawm a hriat avang chuan a rawn ti nghal hmuk a, ngawi rengin a hnungah ka ding reng ringawt.
"kan innei dawn lo ani tih hriatchian phawt ka duh " tunah rih chuan pasal nei tur chuan ka la inpeih lo bakah ka mi hmangaih ngei neih ka duh ani.
"ka pa i biak angai ang, keichuan ka fa hi ṭha takin piang se ka duh ber " Pastor fapa sawi awm reng pawh anih hi le, duh lo mahse engtik ah mah tual an that hauh lo ang.
"ka pe mawlh ang che mahse a pian hma chu min thlahthlam tur ani lo"

Hetiang anga ka tih ve tlat loh chuan keimah chauh chuan ka inenkawl thei dawn lo ani tih ka in hriatchian em avangin a puihna ka mamawh ani bakah Hunter ka lo tiam tawh angin biakin hi ka chhuhsak theih nan theihtawp ka chhuah ang, an ni te chuan hei lo pawh biakin te chu an zawng hmu leh vat tho ang. Chutia min thlahthlam lo tura ka hrilh takah chuan hmuh theih khawpin a hnual nghal rawih thei chu chuan ka thin a ti rim ru hle bawk. Min duhlo pawh nise hetiang ang em em a han tih lan te chu ,a inthlahrunawm rum rum alawm.

"i duh duh i ngaizawng thei ang....min thlahthlam lo la nimai " ka ti ta ringawt a, Doctor anih mai bakah tlangval invawng lutuk ,fel , hmelṭha leh chhelo hian a duh duh a ngaizawng thei ang chu mahse heti khawpa hmeichhia te ngaihzawn rawn ,nula ṭha tak tak thlang thei reng si hian engvanga khanu kha duh tlat nge maw anih le? mawl leh lutuk.
"maw... "
"inngaizawng emaw innei pawh kan ni lova...kan rinawm kher angai hleinem"
"i fa hi i ngaihtuah ve miah lo em ni? "

"saw i bawihtei pawh a rawn chhoh saw..."  a bialnu rawn kal phei lai ka hmuh avang chuan ka lo ti nghal vata mahse hawi let lo in a din dan ngai chuan a ding reng ringawt.
"nangmah zawk hi ni a telo a awm thei lo chu... chuvang chuan inti fel vel lo khan inngeih takin awm teh u " tih pahin ka kal nghal nal nal a, chunu zawn ka thlen phei chuan,"he damdawiin a doctor te hian hnathawh tur an nei miah lo niin a lang " kal pelh pahin ngeiawm zet hian ka nuih zui kher bawk.

Nimin atang tawh khan ka awm a nawm loh mai bakah damdawiin rim leh a chhehvel hrim hrim hian ka luak a tih chhuah em avangin hmanhnawh takin garage lam ka pan thla nghal vata, ka bike ka thlen phei hma hma chuan ka uak nghal tuarh tuarh ringawt. Car phenah chuan ka tlan phei nghal vata, luak chhuah tur awm mang si lo hian ka han uak leh tuarh tuarh ṭhin a ,ka mittui te pawh a tling nghal pum mai alawm.
"engvanga hetiang tehhrep hian awm nge maw ka nih le? " ka luh lah chu a hai em em lehnghal,zep lo chuan thil ka ei tha lo bawk nen ka chau takzet.
"i rai no vang anih kha.... " tih pahin tui min rawn pek avang chuan mak tih hmel takin ka han en chho nghal haw a,Asher hmel ka hmuh rual rual chuan ngeiawm zet hian ka meng pual nghal ralh ringawt.

"eng nge hetah i rawn tih?"ka taksa chu khur nasa tawh hle mahse engmah thleng lo ang maiin ka awm lui tlat tho.
" thlahthlam lo tur che in min ti ni lawm ni " min runluih pah chuan a han ti kher a, ka rin ai daihin a ngeiawm zek.
"kal tawh rawh.... "
"i ṭha maw? " ka hmel dang lap a hmuh chuan ka ṭha lo ani tih a hai lo chiang kher mai. Mahse chhang lo in ka phone a rawn rik avang chuan kalsawn pahin ka biak san nghal daih a,race a awm dawn avang leh pawisa pawh a tam deuh dawn avangin duhsak takin Seira in min rawn call hi alo ni a, ka hlawh 10% ka pek ve ṭhin avangin hetiang kawngah hi chuan min rawn hrilh hmaih ngai lo .

" ka rawn kal nghal " phone dah pahin ka bike awmna lam panin ka kal nghal nal nal a, ka awm nuam lo hle mahse ka tel ngei ngei angai, vawikhat pawh hmaih thei ka ni lo.
"tun ang zan rei ah khawiah nge i kal dawn?" hmanhmawh nak alaiin engvanga min rawn la zui cheu nge maw anih le?
"bike race a awm a ka kal dawn mawle " thil zep ṭit ṭet leh thil thup hi ka thiam lo bawk nen tlang tak hian ka hrilh nghal thawr ringawt, mak a tih hmel em em mai lehnghal.

"engmaw?!! "
"mangṭha le"  helmet khum ka tum chiah tih chuan ka tai a rawn nat tak em avang chuan ka ding ngil thei tawh lo, ka ṭhingṭhi nghal rawp a, ka kap aṭangin thisen a rawn lum nghal pup pup bawk. 

Read More