CHAPTER -31 


I get jealous because I am afraid that someone is going to make you happier than I do.

– Frank Ocean


Kei ang lo takin mut pahin Carolyn chu ka ngaihtuah reuh reuh a , ka thutlukna avang khan ka inchhir lo , mahse thil atthlak tak ka ti in ka in hre thung .


Ka thiante leh ka chhungten min nawr na ang ngeiin vawikhat tal hmeichhe lak ah ka inhawng leh ta chu a ni a , ka zam in a rilru ka tih nat sak ka hlau takzet a ni .


 Ka nun a bung thar ka kai nan hian hmeichhe pakhat pawisawi lo chu ka hnuk lut tel ve a , ka hma ka sial avanga kha thutlukna kha siam ka nih rual in Carolyn nilo se chuan hetiang rilru hi ka pu hauh lo ang le . 


A lakah hian eng rilru dang mah ka pu lo ka tih chuan dawt ka sawi ang amaherawhchu Tetei laka ka taksa, ka thinlung leh ka rilru zawng zawng ka pek ang erawh kha chuan ka pe thei lo thung . 


A tukah chuan nidang zawng aia hma ah ka kal a mahse kei aiin Carolyn a hma zawk tlat mai .


Ka office kawngkhar bula ṭhuna ah chuan ke hlang chung hian a lo ṭhu kun lap a , a hmel ka hmuh chuan kei ang tho in a mu tha bik lo tih a hriat mai a . 


Min rawn hmuh rual chuan alo ding nghal vat a ,engmah sawi lo mahse zawhna leh sawi tur hlir in a khat tih hi hrilh kher ngai loin ka hre tlang nghal vek a , a sawi tur hi ka ngaithla chak tawh hle bawk a ni. 


Ṭawng tumin a ka a ang hman zuau tih chuan ngawi reng hian office ah ka luhsan daih a ,min rawn zui rawh tih chawp ngai lo a min rawn zui luh ve nghal avang chuan a rukin ka lo nui a , mahse min rawn hmuh hma in rang takin ka insiam tha lehnghal vat thung . 


' Ih .... nizan chungchang vel kha ' a ti khur deuh der der a , a zam hle aniang a kut a sik a sik mai . 


' Eng nge ? ' engmah hre tawh lo ang mai hian chair a ṭhut pah chuan ka ti kher a , han fiam vel hi nuam ka ti ve hrim hrim . 


' Ihh... kha nizan vel kha , kan pahnih ... ' a tih nuah nuah lai chuan , ' Kan pahnih hian kan inngaizawng a chuan ka bialnu i ni a eng nge thil dang ' ka lo tih khalh daih a , a mak ti lutuk chu a mengphawk chiang khawp mai .


A awmdan ka hmuh hian ka insum zo lo ṭep a ni .


' Awm... awm lo e ' a ti bah nuai a . Thil dang a sawi leh hma chuan 


' Anih chuan i chhuak thei ang ' ka lo ti hmak a , a hawihai ngei mai . 


' Aw le ' tiin min chhang ta ringawt a, ngawi renga chhuah a tum lai chuan , ' Thil pakhat ' ka tih avangin a rawn hawi let leh a .


' Kan pahnih inkar chauh a ni tur a ni , midang tumah in an hre tur a ni lo ' thupe deuh chuan ka ti leh a mahse min hnial buai lo in a bu nghat a , a chhuak nghal nal nal bawk .


Chutah pawnah a chhuak chiah tih chuan lawm avanga au ri in a chhunzawm zat a , ka ṭhut hmunah ka lo nui nghal vur vur ringawt . 


Nidang ang bawkin dar 8:30 atangin ward ka round tan leh a , nizanah thil eng eng emaw ka ngaihtuah avangin ka mu tha thei lo lehnghal a ,  ka lu a na deuh bur mahse Carolyn avang khan ka mood a fuh hle thung . 


'Pekpeki... nizanah i mu tui em ? ' tiin naupang kum5 mi lung tha lo avanga kar 1 chhung damdawiin a awm tawh chu ka zawt a ,eng ang pawhin mood fuh lo mah ila damlo bulah chuan hlim hmel ka pu sang reng a ni. 


Lu thing pahin alo kimki chawih chawih a , a zak hmel ka hmuh chuan ka nuih a ti za angreng hle .


A nu chuan rang takin ' Dr Noela hi chu kan ngaisangin kan star teh mai ania ' tih pahin a fanu chu a en a , Pekpeki chu a nu hnungah a lo biru nghal daih a,kan han nui leh rih a .


Ka kal hma chuan nuih pahin , ' Pekpek lo dam vat vat rawh aw , i chhuak thei ṭep tawh a nia ' ka ti a , ka ipte a sweet pakhat chu la chhuak in ka pe nghal a . 


Ward-I ka round zawh chuan pawnah Rinhlu an min lo nghak reng tawh a , a haw ṭep tawh avangin Petrol ka lakpui lawk dawn a ni . 


' Bro ... engtik ah nge i hman ang ? ' 


'Ward ka round zawh hunah ' 


'Anih chuan quarter ah ka lo nghak mai ang che ' tih pahin a phone chu a en zeuh a , Joysie phone call anih avangin a hmet thim lehnghal daih thung. 


' Joysie in nizanah pawh khan a rawn call char char che in ka hria ' ka lo ti a .


Rinhlua hian Joysie hi a duh in a hmangaih em em a , hetianga awm reng lo hian an inkawp leh vat ka beisei a ni . 


' Tuar ve reng reng rawh se,  a duh duh danin min ti kawi a ka hlutna hi a hrelo tlat ' fiamthu titak deuh hian a ti a mahse Joysie hian rawn umzui lo ta se chuan a buai zawkah a tang leh tho ang . 


' I tih dan dan khan ti teh mahse Joysie tello hian ... ' ka sawi zawh hma chuan Ward - III lamah thawm kan hriat thut avangin kan pahnih chuan kan tlan lut nghal a ,room chhung chu a rimchhiat em avangin Rinhlua phei chu a uak nghal ṭhawt a. 


Carolyn in damlo zun bawm alo thlauh chu niin!!


' A pial palh a ' alo ti nghal vat a , a kekawr leh chhuat vel te chu a huh zûih bawk a ka thinrim lutuk hi ka insum hman lo ṭep a ni . 


Midang hmuh laia hauh ka duh loh avangin ngawi rengin Carolyn chu ka kaichhuak nghal dawr dawr a , zun hing rim a nam rum rum lehnghal a,kei ngei pawh hi ka uak lo chauh a ni.


 A rim chhiat em avangin Toilet ah ka kai lut ta ringawt a .Han tih vak ngaihna pawh ka hrelo .


' I thil tih kha i hria em? ' ka ti vin nghal hlur a . 


' Ka ... ka tihpalh ' a rawn tih rual chuan lehlam ka hawi nghal vat a ,ka thinrim insum tum tih ngaihna hrelo chuan bang ka chum dawt ringawt . 


' Hospital ah hi chuan min rawn puih tum tawh suh ka ti che a ni lawm ni ' a aia vin chuan ka ti leh a , a hrehawm ti chuan hnuailam a melh tlat thung. 


'Awmtea ni a ni sia , kán pahin puih ka tuma ' zawi te te hian a ti a , min hlau tih hi a awmdan aṭang ringawt pawh hian hai theih a ni lo , mahse a tih tur ni miah lo a ti  miau a hauh hi a phu ve réng a ni . 


Ka hauh tak tak hma in Rinhlua a pawh a rawn lang vat a , ' Noel , insum rawh ' a rawn tih takah chuan Carolyn hriat tawk lek a zawi hian  , ' Va haw la , va in ti fai rawh ' ka ti sap a , hmanhmawh takin bathroom atang chuan a tlan chhuak nghal dawr dawr a  . 


Ka office a a rawn kal hnu lawk khan a haw nghal daih emaw ka tih laiin in ti fel tawkin damlo zun paih alo tum tih chiang reng reng . Henu hi chuan hahdam takin min awm tir thei ngai dawn lo a nih hi . 


Rinhlua petrol ka lakpui zawh hnu chuan dawrah ka kal kawi leh te te phawt a , ka thil lei ho a man ka pek lai chuan Rinhlua chuan pencil bag leh scrap book hi a rawn khai phei a . 


Lo nuih sawh deuh reuh pah hian 'Khang kha enga tan nge i tih ? ' tia ka zawh chuan , ' Heihi Carolyn in a duh ang tiraw 'tiin min lo chhang a, ka tum reng vang nilo in ka nui tawp chiang khawp mai . 


Rinhlua a hian Carolyn nena kan inkar hi engmah hre ve lo mahse ka bialnu thil a leisak hian ka ngaihdan a ni chiah lo . 


'Duh lo ang ' ka lo tihsak a mahse a leisak ta tho a . 


Rinhlu'an a thil lei ho a man a pek lai chuan car ah ka lo va luhsan a .Keimah zawk hi a ruka inkawp duhtu zawk ka ni a mahse nikhat em pawh ala ral lo a , harsa ti tu zawk ka ni nghal der in ka hria . 


' Bro... kha hei i thil tur ' Car a rawn luh pah chuan a ti a , 'I mamawh em a ka rawn leisak che a nih hi 'ti fuh in tih hmel zet hian hmul ziah na hi a rawn lek kang va va a . 


' Ka nei reng alawm ' 


'Anih chuan ngatinge i hman mai loh , Bawiha i ṭhianpa ka nih angin duhsak takin ka hrilh ang che i hmuihmul kha shave ve em em tawh rawh ' hi a rawn ti a , ka tih ngaihna hrelo chu ka lo nui ringawt.


Rinhlua hian ka landah leh inchei dan hi vawikhat mah ala sawisel ngai lo a mahse ka hmuihmul hi chu a ngaithei lo ve ngang a nia nge a sawisel ve ta nge nge alawm . 


Kan Petrol la haw chu quarter ah pawh kalkawi lo in ka duty chhunzawm lehnghal a , vawiin chu inentir an tlem bakah emergency engmah a awm lo bawk nen zing lama Carolyn ka tih dan bawk kha ka ngaihtuah zui reng a , ka inthiamlo tulh tulh mai . 


Zan dar 7 a rik meuh chuan haw turin ka in dah fel ṭan a , a nihna takah chuan tlai dar 4 thleng chauh kha duty tur ka ni a mahse midang ka ngaihtuah avangin ka awm khawtlai lui a ni . 


Ka indah fel lai chuan Nurse Rintei a rawn lut thut mai a , min rawn hmuh rual chuan a meng phawk nghal kawk bawk . 


' Ehee... Noel ila awm elaw ? 'mak tih hmel zet hian a ti zui a .


'Eng nge ni ta ? ' a hmanhmawh hmel em avang chuan ka lo zawt let vat a . 

Emergency a awm a nih te ka ring hman rum rum tawh . 


' Light ala in on sia , i off theihnghilh anih te ka lo ring a , damdawi sample rawn en paha rawn off ka lo tum a ' inthlahrun hmel taka a rawn tih takah chuan lo nuih pah hian , 'I duh duh kha va la rawh ' phal takin ka lo ti a . 


MR ho hian an rawn kal apiang hian damdawi sample min pe ziah thin a , chung ho chu parcel lianpui ah ka dah khawm mai thin a , staff ho in an duh duh an la a a then erawh damlo hnenah kan pe thin a ni . 


Ka in dah fel hnuah pawh ala hai ruk ruk reng avang chuan , ' Ka lo zawnpui dawn che mi , eng damdawi nge i duh a ? ' tiin ka zawt ta ringawt a . 


' Tai na damdawi mawle, Carolyn-i a period a ....saw a na ti a mu reng mai  ' a ti ta mai a .


' A nih chu mawle ' tih ringawt in ka lo chhang a , chhungril ah erawh ka ngaihtuah hle thung . 


Carolyn damdawi tur a nih vang nge ni sawisel miah lo in ka zawn pui ngat ngat a , mahse a ei tur ang erawh heng damdawi zozai zingah hian a awm miah lo nia mawle . 


Hreptak chuan .


'Noel zawng duh tawh suh zanin chu lo tuar phawt sela naktuk ah damdawi dawr in hawn hunah ka zuk leisak mai ang ' Nurse Rintei chuan a ti ta ringawt a ,Ward lamah duty a ngai bawk nen hmanhmawh takin a chhuak lehnghal a . 


Nurse Rintei a chhuak chiah tih chuan parcel chu bang lamah ka tlawh phei nghal dawrh a , engvanga awmlo phiangsen nge maw a nih le ? 


Haw nghal ta mai lo chuan ka jacket hak lai pawh chu ka phelh sawk sawk a , heating pad nen duty room lam chu ka pan nghal a vanneih thlak takin tumah an lo awmlo hlauh . 


Heating pad chu plate ah ka dah a , uluk takin tuilum awmsa chu ka leih lut a , a daih mai loh nan ka chhin thlap bawk . 


Heating pad tui sa a ka chiah chhungin damdawi lei tumin Kawn lamah ka inkhalh thla nghal a , hetianga ka vir buai hian Tetei ka hriatchhuah phah zawk nghe nghe . 


Tetei kha a period apiang in a khua a sik loh leh a mut phah ziah thin a , a thil tur lei reng reng in ka vir buai thin kha a nia , a awmloh hnuah pawh hian ka tih tur ve rengah ka la ngai te pawh a ni mahna . 


Carolyn in na a tawrh ai chuan tiin damdawi dawr chu ka hawn tir leh a , haw lamah a eichak nia ka rin eitur leh in tur ka lei haw nghal bawk a , minute 5 pawh ka thang hman lo ang damdawiin ah ka let leh nghal a , hah pawh ka sawi hman lo a ni ber e . 


 Ka heating pad chiah sat sa kha polythene ah ka thun bawrh bawrh a , hmanhmawh takin Carolyn te awmna quarter lamah ke in ka tlan chhuak lehnghal a , rei tak va hmuh pawh ka tum lo .Hengho hi pek a ,kal lehnghal daih ka tum a ni . 


Quarter ka va thlen chuan tum loh deuh in Rinhlua leh Carolyn te pahnih inchhung a an in zui lut chiah lai chu ka va hmu hman ta mai a , ka tlan lai pawh ka ding chawt a mak ti takin an inzui lut lai chu ka thlir liam ta ringawt a. 


IG - @remruati_haylor 































 


CHAPTER -30

“If your absence doesn't bother them then your presence never mattered”

Ka mak ti lutuk chu chet mai nachang pawh ka hrelo ka dinna aṭang chuan , ' Tunge i nih ? ' tiin ka au vak a , ka chhehvel chu a reh nghal duk mai hian ka hria .

' Tunge awm ? ' tia au chung hian room atang chuan ka chhuak leh a tumah in min chhang lo .

Room ah bawk chuan ka let leh a , tukverh te chu ka han endik kual vela mahse a lo inkhar fel thlap vek bawk sia . Thil ka hre sual a nih te ka ring rum rum tawh .

He envelope hi a hma khan helai hmunah hian a awm pawh ka hrelo ,pawna ka chhuah hnu lawka hmu ka nih avangin mi rap ru takzet .

Kan inah hian mi an rawn lut ru a ni thei mai angem nge helai hmunah hian a awm renga ka lo hmu lo zawk .

Ka rilru chu a insual nghal a , hlau ru hle mahila mi dawihzep leh tlanchhe nghal zung zung chi ka nih loh avangin in aṭanga tlanchhuah nghal daih chu ka tum hauh lo .

Envelope tamtak ka dawng tawh a helai hmunah hian a awm reng anga ka hmu lo mai mai zawk aniang tiin keimah leh keimah chu ka inhrilh a, ka insiam chhunzawm lehnghal mawlh mawlh a mahse ka beng erawh ka chhi hra reng thung .

Envelope ah hian thu ngai hlir a in ziah thin avangin a chhunga thu inziak pawh  chu chhiar tumna pawh ka nei tawh lo .

Zawhna lo awm ta chu heng thil zozai hi tu rawn thawn nge ni ta ang ?

' Aaaa..... Min star deuh tu an awm aniang ' ka ti liam puat a , hlauh nachang pawh ka hrelo .

Ka nutei bulah mitthi ralna tur pawisa lak angaih avangin damdawiin ah ka kalkawi zuai a , Dr Noela pawh hmu reng mah ila ka hmu lo der tlat a , a office pawh ka kalpel hmak mai.

Ka nutei a buai deuh avangin a purse a cheng zahnih chu lo va la mai tura min tih avang chuan nurse duty room lam chu ka pan nghal a , ani hi chu a buai thei lutuk a khawtlang ah pawh a inhmang ve hman ngai meuh lo, engkim ah hian ka kep vek a ni ber  .

Hmanhmawh naklaiin ka pu phone hlui ve tawh tak mai ka khawilo kalna a ka hum chhuah ve ziah thin chu alo ri ve sek a , message kan chhiar nak chuan V'an damdawiin kawtah min lo nghak daih tawh chu niin .

Duty room ah chuan Dr Rinhlua a lo awm lehnghal a ,ka va hmu thut bawk nen thlahrang emaw tiin ka la phu zuk zui mahse  min rawn hmuh rualin  ' Hello ' a rawn ti takah chuan thawk deuh huai pah hian ka pen lut nghal hlawk hlawk a .

' Min ti phu alawm ,eng nge hetah i tih ? ' tia ka zawh chuan , ' Eng ni love lapua lak ka tum a ' tiin min lo chhang nghal vat a .

'Khawiah nge i kal dawn ? i va nalh ve ' puan ka bih at avang chuan min rawn zawt a, ka nutei purse keu ruk ruk pah chuan, ' Khawhar inah ka kal dawn ' ka lo ti sam et thung .

' I va fel ve khawhar inah te i kal tawh a '
hi a rawn ti a .

' Ka kalna a rei tawh, nula lawm ka nih tawh  ' fiamthu ti tak, nui chung si hian ka lo chhang a .

' Ka ti tak tak i fel lutuk ' hi a rawn ti leh a .

Khawhar ina ka kal tur hi mak a ti nge ka kum phu lova ka chet nulat avang hian mak a ti tih pawh ka hre lo .La naupang chhia hle mah ila helai ah chuan nula anga en kan ni tawh a , thil thar pawh a ni hran lo .

Kum 17 lek mah ni ila khawtlang ah theih ang ang in ka in hmang tawh a , a tur ve rengah kan ngai tawh zawk a ni .

V'an min lo tur ve sek bawk nen ka hmanhmawh deuh hlek avang chuan ka kal mai ang tih pahin kal nghal daih chu ka tuma mahse ka kal hma chuan Dr Rinhlua chuan ' E ... taka ' a rawn tih leh takah chuan ka hawi let leh a , 'Ka haw ṭep tawh a , ka haw hma in khawiah emaw min chhuahpui leh lawk hman angem ? ' zam hmel tak hian min rawn zawt a .

Chhuah te chu ka chak zawng tak alo ni bawk nen vawikhat pawh inngaihtuah nawn lovin ' Aw ... school chawlh leh hmasa berah aw ' awlsam deuh hian ka lo ti a ,ka chhandan avang chuan a tih ngaihna hrelo chu buk nghat nghat pah hian a nui ta ringawt a .

Corridor a ka tlan phei hlawk hlawk lai chuan Dr Noela hi a office atangin a lo chhuak ve chiah bawk a , hmeichhe luhlul leh ngeiawm thiam tak ka ni ka tih tawh kha hmu lo ang mai chuan ka tlan pel hmak a , ' Min lo nghak rei tawh em ? ' tih pahin scooty ah chuan ka chuang nghal thak a .

V-a chuan damdawiin lam melh chung hian , ' Doctor-a saw ava thinrim hmel ve ' tih leh tlan chhuah a rual nghal a , keilah ka lo hawkdak ve bawk nen ka hawi let leh kher a ,Dr Noel an ding meuh hian min lo thlir reng chu niin .

' Awihawm loh e ' ka ti ringawt a .

'A hnek a na zek, a hmel kha ka ngainat zawng a ni lo ' phun nuah nuah chung chuan kan tlan liam a .

Dr Noela nen hian kan inkarah engmah ala thleng lo bawka hetiang anga ka pehhel a ka hmu loh reng chuan zawi zawi a ka theihnghilh theih ka inring a , amah avanga ka rilru tihnat reng hi hrehawm ka ti a ,tih nat tawh loh ka tum ruh hle .

Khawhar in kan thlen chuan ka ṭhian ten min lo nghak reng tawh a V-a nen pawh kan kal hrang nghal hmak a , thian ang chauhin awm tawh mah ila midang in min sawi zui tawh lo se kan duh avanga kal hrang mai chauh kan ni .

Inchhung ah kan ṭhu fel chiah tih chuan rin loh deuh maiin Duhawma chu ka bulah hian a rawn thu nghal thurh a , a hmel ka hmuh chuan mak ka ti angreng hle .

'Eng nge hetah i rawn tih? ' ka ti nghal ringawt a.

Duhawma hi Phullen khua a nih loh mai bakah damdawiin atanga a chhuahna kha a rei leh tawh deuh avangin ka hmuh ruala mak ka ti pawh hi a awmlo hran lo .

Reilote tak tak kan in kawp ve zuaih chauh kha a ni a ,a fel thin tehreng nen ka then hnuah heti khawp hian min ti buai ang tih hi ka ring pha ngai lo .

Phone ah manganthlak khawpin message min rawn thawn thin a , ninawm khawpin min rawn call tlut tlut thin bawk . A chang leh a reh vang vang a , a chang leh kan khua ah hian kan inhmu leh nawlh zel bawk a, a awmdan hian mi rap lek lek  thin.

' Zawhna ka zawh che chu ' ṭawng rin hlau tak si hian ka ti leh a .

' I dam maw ? ' tiin min lo chhang daih thung .

Ka thinrim insum zo lo chuan zawi te hian' Haw rawh ' ka va ti leh ringawt a , a nui duh lek chauh .

Hepa hi ka hrechiang thawkhat bawka keimah vanga khawhar ina rawn kal ve ringawt a ni tih pawh hi ka hai lo nasa .

Thinrim hle mahila mipui zinga awm kan nih avangin ka ṭhian te chuan ngaihsak lo der tur chuan min hrilh mawlh mawlh reng a, engmah ti thei ta lo chu lungawi lo deuh chung hian ka ṭhu tum bur reng a.
Duhawma lah mi ṭawngtam zawk zawk alo ni lo bawk nen a ṭhu ngawi ve reng ringawt  .

YMA secretary in thu a sawi lai chuan Duhawma pawh chuan a ning ve ta deuh aniang a tho nulh a , engmah sawi lo in a chhuak ta daih mai ! Ka lawm lutuk hi sawi ngaihna pawh ka hrelo . Ka ṭhian te chu ka va kheuh nghal zeuh a , an ni pawh an lo nui tawp .

Thusawi tu in a sawi rei deuh bawk nen ka ning chuan hun khawhral nan ka phone chu ka kheuh nuap nuap reng a , tum loh deuh mai hian Christian-a message ka dawng thut mai a second 1 pawh a ral lo ang , rang lutuk tak mai hian ka hawng nghal a .

*Ka lo zin a , i hman em?*

tih te mai hi alo ni a , ka ṭhian te hriat loh in ka nui nghal ver ver ringawt .

Kan inbiak loh na a rei tawh bawka ka lo theihnghilh hman thelh a ni . Engtik lai pawhin Noela buai in ka buai a , tun atang chuan muang changin ka rilru atangin ka paih anga , hma lam ka pan ve tawh ang.

* Hman e * tih ringawt hian ka chhang let a , a rukin ka lo duh ve deuh bawk nen  Noela ka theihnghilh na kawnga ka rilru la peng thei tu ber a ni in ka hria .

Christiana nen chuan in hmuhna hmun tur kan sawifel nghal a , keilah ta pek chuan hmuh ka lo chak ve deuh bawk nen ban hun pawh ka nghak hman tawh lo ,thusawi lai lai chuan ka ṭhian te bulah chuan Christiana ka hmuh tur thu chu ka hrilh sauh sauh a ,ngawi rengin pawnah ka chhuak nghal daih bawk .

Inhmuh na tur hmun kan sawina lam chu ke in ka pan a , khawhar in aṭanga hla vak lo ka thlen chuan hnunglam aṭang hian tu emaw hian ka kã a rawn hup ta thut mai .

Ka tal nghal vak vak a min thlah rang ngei mai .

Ka kã rawn hup tupa lah chu tudang ni lo in Lalduhawma lo ni rengin . Ka hlau hman ngei mai .

' Lalduhawm i va han mawl tak ' ka ti nghal tuarh a , ani lah chu alo la nui vur vur zui .

' Ka fiam mai mai che a nih kha '

' Fiamthu na chi pawh a ni lo ' tih hmuk pah chuan kal lehnghal daih chu ka tum a mahse min rawn pawt let leh hram a .Ka ning lutuk chu ka thaw nghal halh ringawt.

' Khawiah nge i kal dawn ? ' tiin min rawn zawt leh a , ka ning bawk nen a lehpek awm tawh lo tur chuan , 'Ka bialpa ka hmu dawn min rawn tibuai tawh suh ' ka ti let sak sak a , a hmel chu vawilehkhat ah a rawn danglam nghal vek a , a mit a sen nghal vek bawk .

Ka kal hma chuan ' Ka sawi chu i hria em , ka kal dawn ' ka ti leh hram a , mahse ka banah nghet tak mai hian a rawn man bet nghal chawt a , a awmdan hi a diklo tawp mai .

' Engthil nge maw i tih le ? ' ka lo ti vin hlar a ,thinrim aw khur dar dar chung hian ' Tunge nia i in hria a ' a rawn ti ta mai a , hetiang ṭawngkam hi Duhawma hian a hmang ngai si lo a ,hlauh na in min rawn man nghal.

'Lalduhawm min thlah rawh ' ka tih pawh chuan a aia nghet hian min man bet a , min rawn fawh a tum ta mai .

Mi zaidam tawpkhawk thinrim hmel a vawikhat nan ka hmu a, mak ka tih tluk zetin min kal tir mai mai dawnlo a ni tih pawh hrilh chawp ngai lovin ka hre chiang hle.

' Hmela i chak dawn lo ' tih pahin a hmaiah chuan ka beng nghal sawk a , engah teh vakah mah a ngai lo ,a thin ka ti rim zual sauh zawkin ka hria .

Ka hlau lutuk chu au pawh ka au thei lo . A palian in a chak mai sia ,keia han hneh chi ziazang a ni lo mahse ka theih ang tawkin ka lo bei let ve a , a duh ang ang in min ti kual thei bik der lo .

Kan in sual buai na lamah chuan a ipte atang hian ka envelope dawn thin ngei mai kha a rawn tla chhuak nawlh mai a , ka mak ti lutuk chu ka mengphawk chiang teh e .

' Nang. ... nang hi ' ka ti bah nghal nuai a , ngeiawm zeta min rawn nuih pah hian , ' Aw ni e ,keimah vek ' a ti ta mai a !!

★ Dr. Noel's POV ★

Carolyn leh a bialpa hlui inphur chhuak lai chu ka thlir liam vung vung a , Carolyn laka ka rilru put hmang hian ka rilru a tibuai takzet . Mipa dang in an hnaih apiang hian ka lawm lo a ,ti lang lo mah ila ka thik hle thin .

Hmeichhe naupang ang lek chuan ka en lo tih hi ka in pawm thlap chutih rual chuan naupang mai ala ni a , a laka hetiang rilru ka pu hi ka inthiamlo hle thung .

Engtik lai pawhin min zar buai a ,ka lakah a duh duh a sawi mai thin mahse naupang mai ala nih avang hian enliam mai mai tur ka nih laiin hetiang rilru a chunga ka pu ta mai hi hrehawm ka ti takzet .

A chang chuan midang pawhin nula angin an en tho alawm tih te in ka in thiam chawp a, a chang leh min zar buai nasat em avanga feeling nei ve mai mai chauh ka ni tih te in ka in thiam chawp thul mahse hmeichhe dang pawhin ani ai ai hian min ti buai nasa thin zawk a tuma chungah hetiang hian ka awm ngai lo .

Amah ah hian thil special tak awm lo mahse ka rilru hi a ni telin a tibuai telh telh chu a nih ber hi .

Pawnah meizial zuk mai mai paha thil eng eng emaw ka ngaihtuah lai chuan ka patient hlui Lalduhawma chuan min rawn su chawrh a ,a hmanhmawh bawk aniang a thil thlauh pawh hrelo in a kal nghal vang vang a , ngawi rengin ka enzui ta ringawt a .

Ka zial zuk lai pet vu chung hian a thil thloh chu ka zuk chhar a , kan en chian nak chuan Carolyn-i envelope dawn ang chiah chiah kha lo ni rengin  mahse ngaih that loh na ka nei hran lo .

Envelope chu ka dawnkanah ka dah mai a a chhunga thu inziak pawh en lo chuan thil dang ka tih chhunzawm hmiah hmiah a .

Engang pawhin buai in thil dang ngaihtuah tum mah ila Carolyn in " Mizo mipa diktak chu a thutiam ah a ding tlat thin " a tih bawk kha ka hrechhuak leh a , ka Pen ken lai dawhkan a dah pah chuan ka chek zui tlak a .

Kha thil kha engvanga lo sawi reng reng nge maw ka nih ni . Ka rin loh deuh zawhna min zawt a , ka lo in tiam tawh ang ngeiin ka lo 'aw' mai kha a ni a mahse khatiang thutlukna lianthiam awlsam taka ka siam kha ka inchhir leh hnuhnawh hle .

Ka rilru mai nilo ka thinlung hi hmeichhe dang laka inhawng leh tur chuan ala in peih lo , thil atthlak tak ka lo ti kha Carolyn chungah pawh ka inthiamlo takzet .

Thil ngaihtuah paha ka melh ngai ka lo melh vung vung lai chuan Rinhlua a rawn lut a , ka thil ngaihtuah hria niawm tak hian , ' Tetei bawk i lo ngaihtuah leh tawh a ni maw' hi a rawn ti lut a , ka lo nui ringawt thung .

' Bro ka ti tak tak ania henu hi engtik ah nge theihnghilh i tum , nilo i theihnghilh ngai dawn lo tih chu ka hria mahse hetiang hian awm reng suh , hmeichhe dang te pawh hun pe ve la ' a rawn ti leh a , ' haw la , lo han mu rawh ' a tawng thui hma chuan ka lo ti daih a .

' Aw le ' a dar chu a chhin ãk a , ' it hurts to let go, but sometimes it hurts more to hold on ' tih pahin ka darah a rawn beng thak thak a , ' Thiana , ka haw ṭep tawh a ,a tawp nan vawikhat chiah ka ngen leh ang che . Khawngaih takin vawikhat chiah tak tak hmeichhe pakhat chiah tal hun pe ve rawh chumi hnu a i rilru i thlak thei ngang lo anih chuan ka ti lui leh tawh ngai lo ang che ' Thutak fe hian a ti a , a chhuah hma chuan , ' Ka ngen che a nih chu ' a rawn ti leh hram a , a thusawi hre lo ang mai chuan ka paper check lai chu ka lo bih san daih a , a thusawi engkim kha pakhat te mah hmaih lo in ka hre vek thung.

Rinhlua baka Tetei theihnghilh a hma lam pan tura min duh tu hi an awm lo ang . Engtik lai pawhin min fuih a , a sawi ang hian vawikhat chiah hmeichhe pakhat tal chance pe ta ila Tetei hi ka theihnghilh theih phah angem ?

Thawk chhuah halh pahin ka ṭhutna atang chuan ka tho chhuak a , Rinhlua ang bawk in kei ngei pawh hian Tetei hi theihnghilh tawh ila ka ti takzet mahse chutichung chuan ka inkharkhip tlat thung si .

Ward ka round zawh veleh ka office ah bawk chuan ka let leh a , Muan'in missed call alo hnutchhiah avangin ka call let nghal a , Tetei thlan siam chungchang kha a nih loh ngei ka beisei .

' Missed call ka hmu chiah a ' ka tih chuan rilru tawt tih hriat tak hian a han thaw chhuak hawk phawt a ,zawi te hian , ' UTetei death Certificate ka hai chhuak leh a , keichu ..... ' a ti a , a ngawi leh vang vang a .

' Keichu hetianga awm reng lo hian a rawn let leh tawh ngai dawn lo a ni tih hi kan pawm tlan a hun tawh in ka hria ' a ti chuai raih a , a aw atang ringawt pawh hian sawi harsa a ti tih hai theih a ni lo .

' U Noel .... '

' Umm... '

'Nangpawn UTetei hi theihnghilh tawh rawh , kan thlah a hun tawh in ka hria ' a rawn ti leh a , chhan ngaihna ka hre der lo .

Tetei boral aṭangin kum heti zat hi a ral leh tawh a , awlsam takin theihnghilh thei ni ila chuan hetiang tehhrepa ka beih nasat hi angai lo ang . Ka rilru natna te hi hun in liam pui chu sawi loh darkar tin mai hian ka ngaih a zual a , ka lo hmangaih zia ka hrechhuak telh telh zawk a ni .

Muani nen kan in biak zawh hnu chuan haw turin ka insiam a , chutih lai tak chuan Nurse Rintei a rawn lut a .

'Noel '

Tim deuh hian min rawn ko a , ka stuffs te nen kan in pawh tlan zawk nan 'Sir' ti lo in ka hming ngeiin min ko vek se ka duh avanga in 'Sir' tir lo ka ni .

' Eng nge ni ta ? ' ka lo ti vat a .

' Free Mobile clinic chungchang vel kha engtin nge ni dawn ? ' tiin min rawn zawt a .

'Khami chungchang kha chu meeting leh ah kan sawi ho dawn mi niang ' kei aia Senior zawk a nih angin keimah a thutlukna siam tawp lo in ka han rawn der a .

'Aw le ... ngai dang a awm chuan min lo hrilh leh mai dawn nia , kan in peih reng ania ' phur tak hian a ti a .

Thawk ho kan ni a , in zah tawn hi a pawimawh in kan tih makmawh a ni .

A kal tur chuan dawhkana ka envelope dah chu a rawn kawk a  ' He envelope pawh chu a va common ve mawle , Carolyn pawhin a dawng leh tawh a ' a ti a , ' A khawhar in kal turin thawm a hria a ni awm e ,pawna ka chhuah hlan in bedroom ah alo awm ringawt te kha a ti in ka hria ' a tih chhunzawm leh a , chutichung pawh chuan ngaih that lohna ka la nei chuang lo .

' E taka .... Kan nau-i hi ilo hrethiam hram hram thin dawn nia , a ṭawng phawng phawng zel mai bawk sia . I duh loh zawng alo ti anih pawhin a ai awh in ngaihdam ka dil nghal e ' inthlahrung tih hriat tak hian a rawn ti a .

Nurse Rintei pawh hian Carolyn awmdan hi engkim a hre vek a, ka lakah a inthiamlo thin hle tih pawh ka hria mahse hrehawm a tih loh nan ka hai der lui thin a ni .

' A ho lutuk , engmah a nih loh kha ' ka lo ti vat a, ka ti tak tak bawk .

Carolyn hian min ti buai thin hle mahse a chang chuan ka hlimpui in ka ni hman a tih nawm phah fo a , ka tan chuan a ninawm ngai reng reng lo a ni .

Nurse Rintei a chhuah hnu lawkah chuan ka haw ve nghal a , Quarter lam pana ka kal lai pawh chuan kha envelope bawk kha ka ngaihtuah zui zel a , inchhung ka lut tur kawngka ka ban chiah tih chuan thil hriatchhuah thut ka neih avangin ka hawi let vut a , kawngkhar hawng ta mai lo chuan ka car ah ka lut ta zawk a .

Rang takin khawhar in lam pan chuan ka in khalh chhuak nghal a , engvanga ngaihtha lo har em em nge maw ka nih le .

' Hreptak chuan ' tih pahin car steering chu ka chum dawt a , Carolyn a him leh him loh ka hriat phawt loh chuan let leh ka tum hauh lo .

Thil awmdan chu ka ngaihtuah a , Duhawma hian a hma aṭang daih tawh khan Carolyn hi alo umzui tawh a , an inah te pawh a lut ru tih thleng chuan ka ngaihtuah chhuak zel a , Carolyn tan a him lo tih hi engvanga hrechhuak tlai em em nge maw ka nih le ?

Khua a lian lo bawka awlsam deuh in khawhar in awmna lam pawh chu ka hre nghal mai a mahse motor a tlan luh theih loh avangin ke in ka kal a , rei pawh ka kal hma chuan hmeichhe au deuh that that ri chu ka hre ruai ruai a mahse zai ri a bengchen deuh avangin chiang takin ka hre thei lo thung .

Ka han kal thui leh deuha rin ang ngeiin Carolyn leh Duhawma te inchai buai lai chu ka va hmu vat a , ka sa nghal zak mai .

Ka thinrim insum zo lo chuan ' Zawnga ' tih pahin Duhawma ka hnek thal nghal tawp a ,leiah ka rek bet nghal chawt bawk ,naupang mai ala ni bawka ka tha chu hneh lo tak a ni .

'Vawikhat pawh Carolyn hma a i rawn in lan leh chuan Police kutah ka hlan ang che ' tih pahin ka manna chu ka thlah a , a hlau bawk aniang engmah sawi lo in a tlan chhe nghal nal nal mai .

Duhawma hi rei tak ka lo enkawl tawh a , ka patient a nih ang ngeiin a bulah vawikhat pawh ṭawngkam na ka hmang ngai lo mahse damdawiin aṭangin a chhuak tawh bawka a chungah Doctor ngilnei tak anga lan reng hi ka tum hauh lo .

Duhawma a tlan chhiat takah chuan nghet takin Carolyn chu ka kuah nghal a .
' A ti na che em ? ' tiin ka zawt nghal mawlh mawlh bawk .

' Envelope kha ' a rawn tih rual chuan , ' Ka hria , ka hria ' tih pahin a lo ti na hman nge hman lo tih te chu ka enkual nghal zung zung a keimah zawk hi ka mangang in ka chiai vek a ni ber e .

'Khawilai nge na ?, A khawih hman che em ? ' tia ka zawh pawh chuan a lu a thing zel a , a mangang hmel ka hmuh hian ka lainat takzet .

' A rawn kal tawh dawn lo , a tlan chhe daih tawh ' tiin ka thiam ang ang chuan ka hnem a , hmeichhe pachang tak a niin ka hria vawikhat pawh a tap ri eih lo.

Lengkhawm an rawn ban tan tawh avangin car lamah ka hruai phei nghal a , min rawn nang chin hma in ka tlan chhuah pui nghal daih bawk .

In lam ka pan pui takah chuan a thla a muang tih hriat tak hian seat nghenchan chu ngheng in tukverh lam chu a thlir vauh vauh reng a, sawi tur a ngah thin tehreng nen amah lo ang takin a ngawi reng a , chu chuan min ti ngaihtha lo zual hle.

A ṭawng tawh dawn lo emaw ka tih hnuah , ' Engtin nge i hriat ? ' tiin zawhna min rawn zawt sep a , boruak tih zia awm nan , ' CCTV kal thei ka nih hi ' tiin ka lo chhang daih thung a , a ni pawh a nui ve ta ver ver mai alawm .

Damdawiin tlang kan thlen chhoh dawnah chuan a tawp nan na a neih leh neih loh chu ka zawt nawn leh ngat a , engmah na a neih loh thu leh a tih nat hma a ka thlen hman thu min hrilh takah chuan ka thaw nghal huai mai.

' Ngatinge pawnah khan in awm reng reng, a ko chhuak che mi?  ' zawh ka tum lo na chu ka hriat chak avangin ka zawt leh ta tho a .

'Aih .... Christian-a hmuh tuma chhuak zawk ka nia , khapa khan min lo dang bet alawm ' tiin tlang tlakin min hrilh a , mahse a chhanna min pek chuan min ti lawm lo hle .

Hei vang hi lawm henu danglam em em na chu , han zep tit tet hi a nei ve lo .

' Chupa chu tunge ? ' hre reng mah ila ka zawt leh ngat a .

' Kha i hnek tawh kha ' tiin min lo chhang sam et thung .

' Anih chu 'tih ringawt in ka chhang leh a , an awmna quarter kan thlen thlengin kan in be leh tawh lo a ni .

Ka ngawih tak reng avang chuan ani pawh ngawi rengin car aṭang chuan a chhuak hna hna a , kawngkhar a khar fel chiah tih chuan keipawh car aṭang chuan ka chhuak ve nghal a , ka che vel chu mak ti takin min lo en reng ringawt .

' Mimawl nu ' tih pahin a sam chu ka tuai thur saka .

Engmah thleng lo ang mai hian ,' Ka bialnu i nih kha mipa dang hmu tawh suh ' ka ti chhuak phawng mai a , ka thil sawi hi kei ngei pawh hian mak ka ti .

' Engmaw? ' alo ti nghal hu a , car a luh pah chuan , ' Mizo mipa diktak chu a thutiam ah a ding tlat thin i ti a ni lawm ni  ' ka ti a , ka tlan chhuah san nghal daih a . 

IG - @remruati_haylor
































 CHAPTER -29 


You didn't love her , you just didn't want to be alone . 

You didn't love her ,because you didn't destroy the people you love.


Dr Noela thusawi kha a rilru tak tak a sawi loh ka rin vang nge ni ka la thutak ngam lo a , ka ngaihtuah duh lo lui te pawh ti ila a dik zawk mah ang chu . A ti tak tak lo anga ka ngaihtuah hian hrehawm ka ti a mahse a tih tak tak ka ring ngam chiah bawk si lo . Ka awmdan hi a lai kual vel vek . 


' Aaa.... min lo chhang lo law law se ' tiin ka hui pup pup reng a , ka eng tih mah a tui thei lo . 


Amah ka challenge avanga khatianga rawn ti vel mai mai kha ni mahse min duhlohna ṭawngkam a chhahchhuah loh avang hrim hrim pawh khan lawmna tham a ni . Min duh let ring lo chungin ka zawt kha a ni a mahse ka rilru tak tak ka sawichhuah avang erawh in ka zãng huai thung. 


Dr Noel hi ka pasal leh ka ngaihzawng ni turin duh in suangtuah vak vak thin mahila chhungril ah erawh ka chan loh tur  leh ka neih theih ngai loh tur mipa a ni in ka hre tlat thung a , a tan ka tlin tawk loh zia ka ngaihtuah chang phei chuan a rukin keimah leh keimah hi ka insit fo thin a ni . 


School kan kal avangin nithum vel chu damdawiin ah ka kal tawh lo a Noela pawh ni thum lai ka hmu tawh lo tihna anih chu ,mahse tlai khat chu Dr Noela ṭawngkam avang khan beiseina thar ka neih leh tlat pek avangin ka va kal leh ta nge nge a , ral khat aṭanga hmuh ngai pawh nise vawikhat va hmuh zeuh a haw leh nghal mai ka tum a ni . 


Engang pawhin han theihnghilh emaw han thinrim khum tum ve thin mah ila amah ka duhna a len zawk em avang hian ka duh dan ang diak diak pawh hian ka awm hlei thei tawh meuh lo chu a nih ber hi . 


A office-ah alo awm loh avangin let lehnghal daih chu ka tum a mahse ka hawi kual duk duk lai chuan a ṭawngri ang deuh ka hriat avangin va chian tum chuan chumi lam chu ka pan phei nghal a . Dr Noel chu Corridor ah putar pakhat a patient ni bawk nen chuan an lo ṭhu dun reng chu niin , an titi tui hmel em avang chuan va tihbuai tumna ka nei hran lo , hetia ralkhat atanga ka hmuh ringawt pawh hian ka duhtawk em em a ni . 


Chu putar chuan Dr Noel hnenah chuan nupui a neih tawh leh tawh loh thu te a zawt a , a la neih loh thu a a chhan takah chuan bialnu a neih leh neih loh a zawt leh khoh peka , chu zawhna zet chu a chhanna ka hre chak takzet, ka za nghal zek zek nimai hian ka hria  . 


A chhanna nghakin ka mit chu ka meng kar a , ka beng ka chi ran bawk second reilote mah nise a chhang har ka ti in va nawr luih mai te ka duh tut tut hman tawh a mahse nuih paha ' Neilo e ' tia a chhan takah chuan ka rin ai daihin min thawng . 


Hetiang anga a chhan hi lo ring lawk sa tawh mahila thil thleng avang khan beiseina chhete ka neih ve phah a mahse chupawh chu tunah hian tih chhiat vekin a awm a ni . Thil nihna diktak sawi mahse ka rilru a ti na in ka rin phak bakin min thawng. 


Muang changin hnung lamah ka tlawh hnung hret a ,thawm dim thei ang berin gate lam chu ka pan nghal a . Ka rilru te te in mimawlnu i va han ã tak em i beisei loh tur tur i beisei a i thiamloh vek a ni . Induh tawkna chhete pawh i nei nange tiin ka inhau phei mawlh mawlh a .


Ka rilru chuan Noel laka ka tlawm zia leh ka beisei loh tur tur ka beisei a ni tih hrereng mahse ka thinlung erawhin a pawm ve duh tlat lo a , engpawh thleng dawn se a tawp thlenga beih a duh na lai tak hian min ti buai takzet a ni . 


Thil ngaihtuah ngut ngut paha hma lam ka pan mek lai chuan hnung lam aṭangin URinhlua hian  ka darah a rawn vuan thut mai a , ka phu lutuk chuan ' Awi Karei! Lucknow ! ' tih pahin ka tlan che ti tih ta mai a.


' Hey , Hey .... Keimah ' tih pahin ka banah a rawn chelh nghal vata , keilah ka tih ngaihna hrelo chuan zahzelah a hnungzanga ben thurh pah hian , ' min ti phu alawm ' ka la ti zui . Ka chet dan avang chuan URinhlua pawh a nui ringawt. 


' Ka ko che a i hre thei bawk si lo a ' a rawn ti leh a , thil ka lo ngaihtuah nasa lutuk a a ṭawng ri pawh ka lo hre lo reng reng . 


' Khawiah nge i kal dawn ? ' 


' Hei Damdawiin ah ka kal dawn a , Ka cham rei tawh dawn si lo a Saturday ah chuan chhuak tak tak tawh ila ? If you don't mind ' tiin min rawn zawt a , chhuah pui ka lo intiam tawh avangin ka chhuahpui ngei ngei a ngai tawh ngei ang le . 


'Aghh... nia ' ka chal hiah neuh neuh pah chuan ka ti a , ' Kan kal dawn nia ' ka tih chhunzawm leh a .


Min chhan leh hma chuan Dr Noela chuan , ' Khawiah maw in kal dawn a? ' tiin a lo in rawlh hmanhmawh a , a ṭawngri kan hriat rual chuan kan pahnih chuan kan hawi phei nghal vat a , a lo kal lai pawh ka hrelo . 


Ka thinrim lai a ni bawk nen ka in rin hma hma chuan , ' I hriat ve tur a awm lo ' tiin ka lo chhang nghal vat a , ka chhandan avang chuan URinhlua pawh a mengphawk deuh kawk in ka hria . 



Dr Noel meuh pawhin ' Engmaw? ' tiin min rawn zawt nawn leh ngat a , a hriat theih loh vang nilo in a nghal vang hrim hrim a ni in ka hria . 


Chhan pawh ka chhang peih tawh lo buaina lian zawk a thlen hma chuan Rinhlua bulah chuan ' URinhlu ka kal mai ang , chaw ei tui aw ' tih pahin ka inher a , in lam pahin ka kal nghal nal nal a ,ka hawi let leh tawh lo . 


Dr Noel nen hi chuan khatiang vel kha kan nia , ani chu mi puitling a chhiar a ni tawh a keilah tleirawl kum pawh la tling lo naupang che treat a min treat mai mai kha ka la ni a kan in mil thei lo hrim hrim . A chang chuan naupang anga min ngaih avanga min fiam vel mai mai ni te hian ka hre thin . 


Ka rilru na tawt bawk si tih ngaihna hrelo chuan USangsangi bulah ka thil tawn te chu a chipchiar thei ang berin ka hrilh a mahse Dr Noela hming, a kum leh a hna thawh erawh ka thup tlat thung , ka chhai phak loh beisei anga min ngaih ka hlauh vang te pawh a ni pakhat . 


'Engpawh chu nise chupa chu tunge a nih reng reng a hetiang em em a i vei tak mai ' tiin USangsangi chuan min rawn zawt leh a , a hre chak bawk aniang tunge a nih min zawt deuh sek reng tawh mai .


' Khatiang lam kha chu ka sawi peih lo min nuihzat palh ang ' ka lo ti ve tlat a ,' Engtin nge ka tih ang tih hi a pawimawh ber zawk ' tiin ka chhunzawm leh a .


' Mate .... lungngai mah ta che . A duh lo che a nih chuan kal tir mai rawh . Mipa in a duh che a nih chuan engtik lai mahin a ngaihna hre lo (confuse) in a siam ngai lo ang che ' alo ti hmak a mahse ka lo dang duh bik lo .


' Nangpawh Doctor-a kha i theihnghilh theih bik loh kha ' ka lo ti ve hmak a , min chhan ngaihna a hre der lo .


A ni pawh hian a hming a sawi duh loh , an thawhpui doctor ve tho duh deuh mai a neih thu hi min hrilh min hrilh thin a , a ni phei chu kei aiin beisei ala bo ve leh chhawng , chupa chuan a message takngial pawh a reply ngai lo a ni awm e , a  rilru na hi a khat tawkin a rawn tap thin a , keilo in bun ruah na tur dang nei hek lo thiam leh thiam lo in ka lo hnem ve thin a ni . 


Hetiang khawp hian mipa ka duh thei hi mak a tih tluk zetin kei pawhin a thawhpui Doctor-a kha a duh thei hi mak ka ti takzet. Ani chu nula hleitling leh chhelo , hmeltha leh bright tak a ni a khapa khan a duh lo thei hi mak ka ti zawk . 


Kei nen chuan tehkin theih pawh kan ni lo , kei ve thung chu tleirawl lehkha thiam thei bawk si lo , awm ho bawk si ka ni a ngaihtuah chian hi chuan a mak hran lo a awm hliah hliah zawk . 


Inrinni alo nih meuh chuan Dr Rinhlua ka lo tiam tawh ang ngeiin khua fan pui turin damdawiin kawta thing ṭhuthleng ah chuan ṭhu chung hian ka lo nghak a, ka nutei ka dil a a phal vek tawh avangin ka phur hle nghe nghe .


Han len chhuah vel hi nuam ka ti bawka , in a ka awm dawn loh phawt chuan ka phur em em thei zel chu a nih ber hi . 


Dr Rinhlua nghaka ka lo ṭhut mai mai lai chuan Noela chu a office aṭang hian a rawn chhuak hlawl mai a tum loh deuha hmu ka ni bawka ka ṭhutna atangin ka lo ding nghal uai ringawt. 


Ka hlauh ang ngeiin min rawn hmuh rual chuan min rawn pan nghal chat a , min min rawn fiam leh anih vaih chuan ka ngawi mai mai tawh lo ang . A hma pawh khan min ngaihzawn pawh a hnial loh thu in min fiam tawh a ,ka duh em avang hian a duh duh danin ka thinlung hi a infiampui thei tihna a ni lo . 


Ka bul a rawn thlen meuh chuan ka sawitur hrelo chuan, ' Eng nge hetah i rawn tih ? 'tiin ka lo zawt pek a , alo zam bik lo nasa a dar chhin ãk pah chuan , ' Keimah ngei pawh hian heta ka awm nachhan hi ka hre bik lo ' tiin ngeiawm zet hian min rawn chhang let a .


Ka va han ã tak em! Hetiang zawhna mawlmang lutuk hi lo zawt lo tawp tur ka ni asin mawle . Doctor a ni a , doctor ber damdawiin a a awm nachhan han zawh ṭut mai chu a atthlak takzet . 


'Engpawh chu nise mi thluak hmang lo nu nilo nilo ka bialnu ' tiin a nui zui a ', vawiin ah eng nge i tih dawn? ' a rawn ti leh vela , min fiamdan avang hian ka rilru a na takzet . 


Kha thil avang khan min fiam chhunzawm dawn a ni tih ka lo hriat lawk vang te pawh a ni mahna ka lo ngaih thutak duh loh luih nachhan kha. Min ngaihzawn a hnial loh thu a sawi khan tak tak nise ka lo ti hman takzet mahse a tan chuan fiamthu ang lek chauh a ni a chhanchu ngai thutak tur pawhin min duh ve miau lo alawm . 


Min duh ve lo anga ka ngaihtuah zawng ringawt pawh hian ka thinlung hi a na vawng vawng mai hian ka hria , ka lo duh ve na te kha fiamthu nan a hman leh ngat phei hi chuan min ti na lehzual . 


Ka rilru ti na hle mahse a awmdan ngeiawm tak avang hian in dawm kun nghal mai ka tum bik lo , hawi san deuh vah pah hian , ' I hriat ve kher angai lo' tiin a rul tawk lek hian ka lo chhang a , a nui duh lek chauh .


A ṭawng leh hma chuan Dr Rinhlua a rawn kal hlauh a , thil hre lawk ang mai hian , ' Hello ' tih pahin ka bulah chuan a rawn ding nghal a , ' Min lo nghak rei tawh em? ' a ti zui zat bawk.


Noela melh zak zak pah chuan , ' Rei lo e ' tiin ka lo chhang nghal vat a .


' Anih chuan kan kal nghal dawn mi niang ' tih pahin ni a sat deuh avangin a lukhum ken lai chu min rawn khum tir a , nuih pahin ka lo khum ṭha nghal vat bawk . 


Dr Rinhlua hi Noela ṭhianpa a nih vang nge ni ka ring in ka nel nghal em em a , ka chungah a ṭha in a fel em em bawk a, thinlung leh tihtak zeta min duhsak tute zinga mi a ni in ka hria . 


' Khawiah nge kan kal hmasak ber ang ? ' tiin kal pah chuan ka zawt a mahse min chhan hma chuan Dr Noel chuan URinhlua chu a rawn ko leh ta mai a , ' Rinhlu dar 2 ah online meeting kan nei dawn' a rawn ti khoh peka ,Dr Rinhlua lah chuan thil hrechhuak niawm tak hian a lu chu a han dawm vang vang a ,' Ni dawn tak ' a ti zui sup a .


' Carolyn engtin nge kan tih tak ang ? ' tiin min rawn zawt daih a , hriatthiam loh hmel zet hian ka lo en thung . 


' Dar 2 ah meeting kan nei dawn sia kan let leh hman lo ang a ' a rawn ti leh a,a hmel aṭang hian a inthiamlo a ni tih ka hre nghal .


Ṭamdil ah leh hmun hran hran ah kal kual kan lo tum tawh avangin dar2 a meeting hman leh tur chuan kan let hman tawh dawn lo tih ka hrechiang chumai bakah khawchhung ah bak signal a ṭhat loh avangin khawi hmunah pawh kal dawn ila heta kan let leh ngei ngei hi a ngai a ni . 


Dr Noela lah chuan tifuh intih hmel zet hian min rawn en a , ka ngaihbel nge pawh ka hrelo kan kal leh theih dawn loh avang hian a hlim hmel in min nuihzat hmel riau hian ka hria . 


'Helai hnai vel mai mai ah hian kan kal mai dawn nia' ka lo ti ta ringawt a , a bu zui nghat a .


Dr Rinhlua inthiamlo lutuk chuan ' Pawi ka ti lutuk , meeting hun tur an sawichiang har lutuk a ' a tih lai chuan Dr Noela nui hmel chu ka va hmu fuh a , ka thin a rim thar thut ringawt.


' Hawh... kal ang ,hmun dangah chuan naktuk ah kan kal mai dawn nia ' Noela melh ram ram pah chuan Dr Rinhlua banah chuan ka vuan kher a , kan pahnih chuan car ah kan lut zui nghal a . 


Kan tlan liam hnuah pawh chuan Noela khan ka thin ala tihrim reng avangin ka ṭhu ngawi renga , ka bulah URinhlua a awm ve tih pawh ka hre chang tawh lo,pawnlam ka thlir san daih a  . 


'Carolyn khawiah nge kan kal hmasak ber ang ' tia min rawn zawh rual chuan rang takin ka hawi let a , ka awmdan avang chuan , ' Ngatinge ka chungah i thinrim em ni ? ' tiin min rawn zawt a . 


' Nilo .... teuhlo mai . Kha Noela kha lawm ka thin ti rim tu zawk chu . I lo hmu em min rawn nuihsawh velin ka hria ' ka rilru a awm ang ang chu ka sawi chhuak a 


'Lo hmu miah lo ' tiin min lo chhang a . 


' Ka hmusual lo hrim hrim , Noela khan min rawn nuihsawh chiang alawm ' phun nung nung chung hian car ah chuan ka ṭhu lut a , URinhlua erawh a mawi tawk lekin alo nui thung . 


Kan ṭhu lut fel chiah tih chuan motor chu a han ti nung hlat hlat a , ' URinhlu .... tui kan pai em? ' tiin ka zawt nghal a , a ni erawhin nuih pah hian , ' Aw ' tih ringawt in min chhang a , min chhang tawi hle mahse sawi tur la nei ang deuh hian min rawn en vang vang a , mak tih hmel takin ka lo en thung . 


' Carolyn ngatinge min ù bik zela ? ' tia min rawn zawh takah chuan a ngaihna hriat loh hmel zet hian , 'Engmaw? ' ka lo ti hu a . 


Lungawi loh hmel deuh hian , 'Noela pawh i ù ngai si lo a ngatinge min ù bik ? ' tiin min rawn zawt tawl a , han chhan mai dan tur pawh ka hrelo .


' Ka ù lawm i nih , a ni te chu .... ' ka tia ka ngawi leh daih a .


Ani te chu ka ngaihzawng, ka kawppui leh ka pasal tur anga ka lo suangtuah thin mipa kha a ni miau a ka ù thei thlawt lo a ni, ù tum pawh ni ila ka khawr tlat tawh . 


Ka ngawih reng takah chuan 'A tha vek e' a ti hmuk a ,ka awm a ti nuam lo zo vek .Mahse boruak a chhiat tak tak hma in uang thuang deuh hian ,' i duh duh danin min ko rawh, ka pu pawh min ti la a dik vek mai ' a rawn tih leh takah chuan a fiamthu a ni tih ka man thiam nghal a , ka nui ve leh thei chauh a ni . 


URinhlua chu ka chhuahpui ka ti tak na in rei pawh kan len hma chuan kan haw leh nghal a , mahse kan hun hman ang ang te chu nuam takin kan hmang a , amah pawh ka nel phah in a hma ai zawngin ka ngaina  zawkin ka hria . 


Kan in kawt thleng min thlah thlap a , Dr Noela nen a tehkin phei chuan in fel hleih tak an ni . 


A tuk zanah chuan khawhar ina kal angaih avangin chaw ei kham veleh ka insiam nghal a , thingtlang naupang hi chu an kum phu lo in an nula hma an lo tih thin ang tak tak in mitthi leh khawhar ina ka kal na pawh hi a rei tawh a , la naupang hle mah ila midang ina min hmuh danah chuan nula kan ni der tawh a ni . 


' Ka-te ..... i nutei hnenah ralna tur pawisa chu i lam kawi mai dawn nia aw,hei inkhawm turin ka kal dawn nia 'ka insiam laiin ka pu chuan a rawn ti a , ani pawh kohhran upa a ni a , chawlhni zan inkhawm takngial pawh a hlah ngai lo , kan pahnih chuan mahni buai buai in ka buai ve hle ani  . 


Kan insiam lai chuan kawngkhar ri rawk ri ka hre thut mai a , keimah chauha awm ka ni bawka ka meng tang nghal ru ringawt . Ka hlauh vang ni lo in mi an rawn kal nia ka hriat vang a ni .


A rawn rik leh takah chuan room ah ka awm daih sia mi an rawn kal anih ringin room atang chuan ka chhuak ta nge nge a mahse tumah an lo awm lo .


An rawn luh hreh a nih ringin pawn lam chu ka va en leh kher a , mahse angai te bawkin tumah hmuh tur an awm lo . A reh tlawk tlawk mai .


' Mi hmanhmawh lai lai a ' tiin ka phui zui sap a . 


Ka la insiam zawh loh avangin kawngka chu ka khar tha sawk sawk a room-ah bawk chuan  ka let leh a , mahse ka thil va hmuh chuan min thawng takzet. Dawhkan a envelope pahnih hmana ka dawn thin ang chiah chiah kha ka hmuh rual chuan ka ding nghal chawt ringawt . 





















 CHAPTER -28


'Dont wish for it , Work for it '


Hlim ru tak chung hian damdawiin ah bawk chuan ka let leh a , Phullen hi a boring viau ka lo rin nen ka rin aiin a nuam dawn tlat . 


Damdawiin kawt ka thlen chuan Nurse pakhat nen hian kan in tawk thut mai a , tukin zinga Noela vanga tap kha a ni tih ka hre nghal.


 Kal pel mai ka tum lai chuan mak tih hmel zet hian min rawn en ang he haw a , ' Ehee.... Dr Rinhlu eng nge hetah i rawn tih ? ' chunu chuan a rawn ti ta mai ,min hmelhriat ang hu in tunge a nih ka hrechhuak thei miah lo thung . 


'Ka rawn kal mai mai ' tiin tha takin ka lo chhang a , a kal nghal mai dawn emaw ka tih laiin , ' Min hre tawh lo maithei mahse MCON ah ka lut thin a , kha Pediatric Ward ah pawh kan duty ho tawh kha ' a tih pawh chuan a hmel ka han en thin a , ka ngaihven zawng anih loh vang nge ni tun hi ka vawikhat hmuhna a ni thung . 


Nurse tamtak ka lo duty pui tawh thin a ka lo thawhpui ve nual tawh bawk ,thawk nghet an nih lem loh hi chuan a tam zawk hi chu ka hre zui tawh ngai lo a ni . 


' ZMC ah ila thawk em ? ' tiin min rawn zawt leh a .


' Aw ... thawk ve hram hram e ' tih pahin ka nui a , Phullen ah lehzel minlo hre der ve tu a awm chu thil lawmawm tak ah ngai phawt mai ang . 


Tihtur ka nei lo bawka tiin nilengin phone ka khawih loh leh lehkhabu chhiar pahin ka mu vel mai mai a , Noel'an damdawiin ah zuk pui ve turin min sawm lawm lawm mahse ka chawlh lak lai anih avangin zuk puih chu kaha se ning chung chung a mut pawh ka thlang zawk mahse hetianga in a  awm nilen hi inhremna tlukah ka ngai thung. 


Ka pui duh loh avangin a lungawi vak lo aniang min hrem nan ka motor ke pawh siam tir duh viau mah ila workshop awmna min hrilh duh miau lo a ka motor ke ber a thep reng bawk sia khawiah mah ka kal thei lo . 


Hepa hian eng chen nge min hrem dawn ni , a nikhat na ah pawh hetianga awm reng hi heti khawp hian ka ning tawh ania . 


A tuk zingah pawh chuan beisei nei deuhin khanu ka hmuhna hmunah bawk khan a hun ngaiah chiah ka zuk kal nawn leh a , dar 8 thleng ka nghah hnuah pawh hmuh tur a awm lo , a hming tal ka lo zawt lo kha ka inchhir takzet . 


Noel an khawi hmunah mah min lenpui duh si lo a , helai tlangdung hi ka vawikhat kalna a ni lehnghal a khawi hmun mah ka hre bawk si lo , tihtur dang nei hek lo chu lehkhabu chhiar pahin ka mu nileng chu a ni leh mai . 


Ka pianahnu lamah hetiang em em a nin hi ka la nei ngai lo , ka zin tawh na ah chuan ala boring ber ang . Khanu vang khan nuam ka lo tih ve hman tawh tehreng nen hmuh tur a awm leh tawh si lo a , helai hmun hi ka ning leh nghal der mai. 


Ka mut nilen takah chuan ka ning lutuk chuan khanu bawk kha hmuh leh inbeisei in kawnah bawk chuan ka zuk chhuk leh ta nge nge a , hetiang ang em em hi chuan Joysie lakah pawh khan ka awm ngai lo . Henu hi chu hriatchian chakna in ka khat a ni ber .


 Kawn ka zuk thlen thlak pawh chuan tumah hmelhriat nei ta lo chu ngawi rengin ka vei ka vei a , ka beidawn tawpah ka haw leh ta ringawt a . 


Damdawiin kawt ka han thlen choh leh meuh chuan tlai dar 3:30 alo ri leh der tawh a, Noela ward fang tur nen kan intawk takah chuan a dara va kuah thuk pah hian ' Bro ... Engtin nge hetah hian i awm reng theih zawk ? Intih thawven nan lengchhuak ila anih loh pawhin ka motor ke siam tir ila ' ka han ti vel a . 


Hetiang hmun boring lutuk ah hian kum chanve  chuang haw miah lo a a awm thei hi mak ka ti takzet a ni . Keichu awm ve ila chuan ka haw sek loh leh depression te pawh ka neih phah hial ania ka rin ni . 


'Min khawih lo teh .... I nin chuan min rawn pui ve rawh ' tiin min lo chhang thung a .


Mut kham lo tih takah a thinchhia in damlo tan lo chuan biak ngam pawh a ni lo. Noela hi chu doctor ni tura piang ka ti mai a hna a tlin in a thawkrim em em a, engang pawhin thinrim in chau mahse damlo bulah chuan a nui sang thei reng a , ṭawngkam vin pawh a hmang ngai lo a ni. 


' Leave la lai ka nih hi damdawiin hi ka ning hluah hluah,a rim ringawt pawh hian ka luak a ti chhuak  ' tih pahin ka han uak der vela, puih chu ka tum lo nasa  . 


'Damdawiin i nin chuan haw tawh mai rawh ' tiin min lo chhang hmak a, ka puih duh loh avang hian a thinrim tak tak lo a, awlsam takin a thinrim dawn lo tih pawh ka hria mahse a ṭawngkam nelawm loh lutuk hi chu midang tan chuan ngaiah neih a har ve viau ang  . 


Haw chungchang kan sawi takah chuan thutak fe hian ' Rinkim ....Aizawl ah lo haw zawk rawh , damlo mamawh tu che tamtak an awm laia helai a lo awm reng hian sawt na a nei lo . Surgeon i ni a hetah chuan i duh angin engmah i ti thei dawn lo ' tia ka thlem pawh chuan a ngaithla ṭha duh lo . 


Noel hi Surgeon thiam leh lar tak anih ang ngeiin amah mamawh tu pawh tamtak an in tlar dul thin a , a clinic pawh a lun thei khawp mai . A clinic a inentir dawn chuan a hma kar a appointment lo lak lawk vek ngai khawpin a lun thin a chutichung pawh chuan a inchuh in an inchuh thin a ni. Chutiang chu a nih laia hmeichhe pakhat vang maia helai thingtlang kil khawra a tawm reng mai hian a ṭhian ka nih angin min ti rilru na takzet .


'Khatiang thil kha chu rawn sawi tawh suh , hetiang dinhmun a ding leh thei tur ringawt pawh hian ka bei nasa asin ' tiin min lo chhang ta zawk a . 


Noela hi rawn let leh turin duh viau mah ila helai hmuna a awm aṭang hian a in thlakdanglam sawt in a hlim sawt em em a , kei takngial pawhin ka hmuhhmaih lo nasa mahse helai hmuna bihruk reng hian awmzia a nei lo , a thiamna a phochhuah theih tak tak dawn loh chu thuhran nise Tetei theihnghilh in hma lam panin a puk tawm rengna atang hian rawn chhuak sela khawvel tak tak hi huaisen takin rawn hmachhawn se ka duh a ni. 


A rilru tih handam nan Phullen ah awm se ka tih tluk zetin a hma hun ka ngaihtuah em avangin Aizawl ah rawn chhuk thla tawh se ka ti a ni . 


'Vawikhat chiah in ngaihtuah ṭha leh rawh ' ka tih leh pawh chuan. 


' Rinhlu min thlem tura rawn kal i nih chuan engtik ah mah ka rilru ka thlak dawn lo ' alo ti hmak a , a thil tumah a chiang mai si a han thlem leh vak ngaihna pawh ka hre tawh lo . Ama duh hunah te lo chuan a rawn let leh dawn lo a nih hi . 


' Mut i kham lo a nih kha han mu rawh ' boruak tih ziaawm nan fiamthu titak deuh chuan ka lo ti ta ringawt a . 


Taka Phullen ka thlen zan atang khan Noela hi ala mu mang lo tak ,hei aia rei phawh hi a lo mu tawh lo reng thei bawk , tihian rim takin khawl ang maiin damlo tan a thawk char char a , a buai lutuk hi a hriselna pawh a ngaihtuah hman meuh lo anih ber hi . 


Noel-a nen ward lam pana kan inzui phei lai chuan Nurse duty room atang hian ka lo zawn ruk reng thin, ka hmuh chak em em leh ka rilru luah khat tlat thin tunu ngei mai kha a rawn chhuak a nih chu !! 


Tum loh lutuk tak maia ka hmuh thut avang chuan ka mak ti lutuk chu ka mengphawk viau ta ngei ang . Ṭawng mai nachang pawh hrelo in ka en reng a , a tak a nih leh nih loh ka chian a ni zawk mah ang chu . 


Chunu chuan Noela a hmuh rual rual chuan rang takin a kal nghal daih a , a awmdan kha a mak ka ti takzet hlauh nei te pawh a ang alawm . 


Zawhtur ka ngah tehlul nen lo biak nachang pawh hrelo in a kal liam lai chu ka lo thlir vung vung ringawt. 


Kei ang tho in Noela pawh chuan awmze neilo a khik vur vur pah hian chunu kal liam lai chu a en zui ve bawk a , Tetei thih hnua hetianga a awm hi ka vawikhat hmuhna a ni. 


' I hria mi ? ' tiin ka rilru a awm chu ka zawt phawng a . 


'Carolyn kha maw?  I hre zawk em ni? ' tiin min rawn zawt let hlauh thung . 


' Carolyn ' tiin ka phun zui sap a . A hming ka hriat zawng ringawt pawh hian ka hlim a ni . 


Carolyn ka hmuh ai mah khan Noela awmdan hi mak ka ti zawk . A mood off leh thinchhiat lai ber pawhin khanu vang khan a nui thei ania , mimawl ni bik ta lo chu ngaihthat lohna ka nei nghal . 


Engmah ti lo a ka din reng lai chuan inngaihtuah chhuak niawm tak hian Noela bulah chuan ' Ka kal ' tih pahin Carolyn chu ka umzui nghal a . 


' Khawiah nge i kal dawn ?' ngaihthat loh hmel tak hian min rawn zawt zui a ,hawi let pah hian ' Thil te te ' ka ti a , hmanhmawh takin ka tlan zui nghal a .


Engkim kha a thleng teh thut lutuk a kei ai mahin Noela hian ka awmdan avang khan zawhna min zawh tur a ngah zawk in ka hria . Engpawh chu nise ka mizawn ka hmu tawh bawka awlsam takin ka kal tir mai mai tawh lo ang . 


Carolyn chu damdawiin kawtah chuan ka va umpha hlauh a,a hming ngeia ka koh avang chuan mak tih hmel tak hian min rawn en a rang takin a insiam tha zui nghal vat bawk . 


' Ehe...Dr Noela bula mi kha i ni tiraw ? Nangmah i ni tih ka lo hre miah lo.In in hria em ni? ' tiin min en vang vang hnu chuan a rawn ṭawng chhuak a.


Ni e , min hre tur pawhin a hmanhmawh em a biak pawh a biak hman meuh lo a nih kha . 


' Mahni ṭhiante chu hmelhriat ve awm tak  ' fiamthu pah chuan bul ka han ṭan te te phawt a , ' Eng nge hetah i tih ? ' tiin ka zawt zui zat a .


' Noela ṭhianpa maw i nih ? ' tia min zawh chuan ' Ka zawhna i la chhang lo ania ' ka lo ti nghal vat a . 


' Ka nute'in min ko a , damdawiin ah hian kal tawh loh ka tum asin mawle ' tiin a phun zui nuap nuap a , a sam pheng tak mai pawh kha a la pheng tluang zel a nih hi . 


' Anih chuan i haw tawh dawn em ni ? Ka lo thlah ang che' an in thleng zuk thlah in beisei deuh chuan ka zawt a .


'Hei ....helai lawk hi ania thlah ka ngai lo ' tih pahin kan awmna aṭanga hla vak loa damdawiin quarter chu a kawk a , nichina a sawi tak a nutei kha nurse a nih ka ring thiam nghal mai . 


Anih chuan Noela nen an lo inhria pawh kha thil mak a ni ta lo . Chu aia ka thin tirim tu zawk chu hetah damdawiin tlangah ngei an lo awm ve reng laia kawnah hmuh inbeisei in ka lo zuk zawng kual vel thin kha a ni . 


' ughh....in test chu i pass ta em ? ' ka sawi tur hrelo chuan ka rilru a awm ang ang chu ka zawt zel a , zawh tur ka ngah tehreng nen amah ka hmuh chiah hian ka sawi tur zawng zawng pawh kha ka hrechhuak zo tawh lo . 


' Awi... min zawt suh ka pass thei ngai dawn lo a nih hi . Zirtawpni ah kan test leh nghal dawn a tun ṭum chu ka pass ngei ngei angai .Aaaa ...ka zir peih lo e mahse zir a ngai bawk sia ka kal mai ang ' tiin amah leh amah chu a in chhang nghal zung zung a .


 A mize langtlang lutuk mai leh thup tit tet a neih ve loh vang te pawh hi aniang a ngainatawm ka ti in min ti nui lo thei thin lo . 


' Kan in hmu leh dawn nia ' tih paha a kal lehnghal daih avang chuan  ' Ka motor ke kha ka la siamtir lo a , workshop awmna i hre mial em ? ' tiin chelh khawtawi nan chuan ka va zawt a , a rawn hawi let ta nge nge alawm . 


' Vengthlang ah a awm ' a rawn ti a . 


' Vengthlang chu khawiah nge ? ' tia ka zawh leh takah chuan a han thaw chhuak deuh hak a , 'Main road a tlan char char a ni mai ' a rawn ti leh a.


' Mikhual ka nih hi tlan char char pawh ni ila a awmna lai tak ka hrelo ang , min zuk hruai lawk la a rei lo ang ' thiam taka ka han tih vel takah chuan ngaihtuah nei niawm tak hian a ngawi vang vang a. 


Chhanna min pek hma chuan nichina ka nurse hmuh bawk khan ' Dr Rinhlu ' tiin min rawn ko thut mai a , engkim a rawn ti bam zo vek . 


Chunu rual chuan Noela pawh a rawn kal tel a , hepa hi chu a mak ve ngawt mai a mimal nun leh a hna hi a thliar hrang thiam ve ngawt mai, khatiang khawp khan a rilru a tih nat saka ,tunah tha takin a thawh dun pui leh thei ania chumi chu nilo se chuan henu bulah pawh hian a awm tawh lo tawp ang . 


' Hetah ilo awm reng e law ,I la mikhual awm sia vawiin tlai chu khua ka lo fan pui dawn che mi ? ' tiin polite tak hian a rawn ti a , min duhsak avanga rawn ti ani tih hrereng mah ila Carolyn bula ka awm theihna chance a nih avangin ka bawhpelh thei tlat lo . 


' Hei Carolyn hian workshop ah min kalpui dawn a ' ka tih rual chuan an vai mai chuan mak tih hmel tak hian min rawn en nghal hu hlawm a , Carolyn phei chuan i ã mi tih melh in min rawn melh in ka hria. 

Noela pawh nidang anglo takin a rawn inrawlh nghal vat mai alawm  . 


' Lehkha zir lo a len te chu a chak zawng tak alawm ' ngeiawm tak mai hian Carolyn en reng chung chuan a ti a, Carolyn chuan alo melh rum khawp mai .


Hemite pahnih inkar ah hian eng nge maw  chu a awm ngei in ka hria mahse ka confirm te a nih ngawt loh chuan thutlukna siam nghal mai erawh ka tum lo thung. 


' Hawh URinhlu kal nghal mai ila , kan awmrei hman lo ang ' Carolyn chuan min nel hmel tak hian a rawn ti ta mai a , ka hming ngeia min koh nghal avang chuan mak ka tih tluk zetin ka lawm . 


' Kan rawn let leh vat ang ' Noela siai zeuh pah chuan ka car awmna lam panin Carolyn nen chuan kan in zui chho nghal a , khami te pahnih khan an rawn ti bam dawn emaw ka lo ti hman a thil an rawn ti awlsam ta zawk a nih hi . 


' Doctor maw i nih ? ' tiin min rawn zawt a , chhan ngaihna ka hriat loh avangin ka lo nui ringawt a .


' Mi fate hi chu an lo bawn bik e ....Doctor te an nih laiin kei ve thung chu test na ah pawh ka pass thei lo ania ' beidawn hmel tak chuan a ti chuai raih a , han thlem vak ngaihna pawh ka hrelo . 


' Eng subject nge in test leh dawn a ? ' a hnual sawt tak em avang chuan ka zawt a . 


' Physics.... thiam pawh ka nei lo ' tiin min chhang zui a . 


Tum loh deuha ' Ka lo zirtir dawn che mi ? ' ka tih rual chuan kei ngei pawh hian hetiang thil ka sawi ta mai hi ka awih lo . 


Physics hi ka subject thiam ber leh nuam tih ber a ni a engtik lai pawn ka zir peih mahse midang zirtir tur khawp chuan ka taima lo thung . 


Higher Secondary kan kal lai pawhin hmeichhe ho hian min zawt luai luai thin a , ka bialnu hlui ngei ngei pawh ka zirtir peih loh laia Carolyn-i zirtir ka tum ta mai hi nizan lama ka mut ṭhat loh vang kha aniang .


' I ti tak tak em ? Engmah thiam ka nei lo ania ' a tih pawh chuan ,' Naktuk tlaiah aw ' tiin ka lo chhang zel a .Ka zirtir peih vang nilo in a bula awma amah hriat chian ka duh vang leh a hlim hmel hmuh hi nuam ka tih vang zawk a ni . 


Ka car chu workshop ah ka dah a , Carolyn nen pawh kan in nel phah hle . A ṭawng duh in zawhna mak tak tak leh atthlak tak tak min zawt deuh reng bawka , a bulah hi chuan a lungngaih theih loh ti ila ka sawi sual lo ang . Noela ṭhianpa ka nih vang te pawh a niang min nel nghal em em a , min ring nghal thlap bawk a ni . 


Noela nen zanriah kan kil dun lai chuan Noela bulah chuan naktuk aṭanga ka puih tawh tur thu leh Pediatrician ka nih angin naupang lam ka lo chan tur thu chu ka hrilh a , heng thil zawng zawng pawh hi Carolyn-i hmuh leh ka inbeisei avanga ti ka ni . 


Henu hi ka addict dawn tlat in ka hria . 


' Ka sawm lai che in i duh lo a , tunah chuan a theih tawh loh' alo ti hmak a ,a hma zawngin min sawm char char a ,puih ka tum veleh a phal leh lo a , hepa hian eng nge maw a hriat ni ? 


' Lawmthu min hrilh zawk ta che ' Ka tih pawh chuan . 


' Leave la lai i nih kha ' a ti tlat a, a khat tawkin haw turin min nawr sek bawk a , keilah in haw ka la tum lo nasa mai si. 


Night duty tura a kal tur chu kawngka a pel chiah tih chuan , ' Ka ṭhutna tur kha lo zuk buatsaih lawk rawh u ' ka ti leh ngat a , min chhan hma in kawngka chu ka khar leh daih bawk a naupang in ti thiamlo te pawh kan ang alawm. 


A tukah chuan Noela thu lo in phur takin duty tur chuan damdawiin ah ka chhuk thla a , ka ṭhutna tur siam lo mahse nilenga quarter a mut chu ka tum tawh lo . 


Damdawiin ka thlen chuan nidang zawng aia tam inentir tur chu an lo thu hnur tawh a , Noela nge nge pantu pawh a ngah lehpek khawp mai .


 Ngawi renga corridor a ka phei lai chuan nurse pakhat upa ve tawh lampang hian ka hming chuan min rawn ko thut mai a , ka hming a min rawn koh avang chuan ka hawi ã nasa hman khawp mai . 


' Dr Rinhlu .... min lo zui rawh helamah hian i ṭhutna tur chu a awm ' a rawn tih pawh chuan midang a bia emaw tiin hnunglam chu ka hawi leh hram a , mahse helai hmunah hian kei nilo Dr Rinhlua dang an awm loh avangin nurse chu ka zui nghal vat a .


Noela hi chu han vin in han ti hmak hmak thin mahsela a rilru tak tak a nih loh zia a lang chiang hle in ka hria . 


Kal pahin nurse chuan ' Engtin nge kan koh ve ang che ka sawi awmzia chu Noela hi chuan pu emaw Doctor tih a duh lo a kan vai mai hian ṭhian koh in kan ko mai thin ' tiin a ti ti phei bawrh bawrh a , ' I duh duh danin in min ko thei alawm ,a thiang vek  ' tiin ka lo chhang thung .


' Anih chuan Dr Rinhlu tiin ka ko ang che ' tih pahin a nui phei har har a , In lak leh intih eng nge maw vang nilo in Noela style copy ka duh loh avang zawkin keichuan Dr Rinhlu tiin min ko ngei se ka ti a ni . 


Rei pawh ka thut hma chuan inentir tur chu an rawn lut nghal zung zung a , hun la lo thei ang berin ka lo en nghal zung zung bawk mahse ka rin aiin an lo tam daih mai . Ka en zawh vat ka inrin avangin chhun thil pawh eilo a en zawh vek law law chu ka han tum zet a mahse tlai dar 2 a rik pawhin an rawn luhbelh zel ta mai !!


Ka mangang chuan hming lam tunu chu ka ko ta ringawt a , mi engzat nge la bang tia ka zawh pawh chuan an lo la tam naniang mai.


' Eng nge awmzia , naupang inentir tur an va tam em em ve ? ' tiin ka zawt ta ringawt a , ZMC chu nise ka hrethiam mahse hetah chuan tuman ka awm tih pawh an hre silo a , heti zat naupang inentir tur an awm ta mai hi mak ka ti takzet . 


' Nizanah Aizawl aṭanga rawn kal naupang doctor a ṭhut tur thu an au vang kha aniang ' alo ti sam et a , ei erawhin mak ti takin ka lo en thung . Heng thil zawng zawng hi Lalrinkima tih vek a ni tih hrilh chawp ka ngai lo . 


' Hmela mai mai chu ' tiin ka phun a , ' eitur eng nge maw ka duh ' tih pahin roomah chuan ka lut leh a . A khat tawkin sana chu ka bih deuh sek reng bawk , in entirtur ho zawng zawng ka en zawh vek chuan Carolyn ka zirtir hman lo ngei ang le . 


Mahni thutiam a din loh hi ka hreh tluk zetin naupang ho hi tih beidawn ka duh bawk si lo , ka rilru a buai takzet . 


A khat tawkin hming lam tunu bulah chuan mi engzat nge la awm tiin ka zawt sek tawh a , ka nin vang nilo in ka thutiam a din ngei ka duh vang zawk a ni . 


Chutia naupang rawn lut leh tur nghah paha ka sana ka lo bih sek lai chuan kawngka bul atang hian Carolyn chuan tray chawi chung hian, ' Ka lo lut lawk thei angem? ' hi a rawn ti a , ka hmuh rual rual chuan lawm loh in ka lo nui leh ringawt tawh . 


'Lo lut rawh ' tiin rang takin ka lo chhang nghal vat a , a hmel ka hmuh rual hian ka rilru hahna zawng zawng kha a bo nghal vek in ka hria .


' In entir an tam sia heihi ka nute'in va pe rawh a tia ' tih pahin ka dawhkan ah chuan thingpui leh a hmeh hi a rawn dah a.


' Ka lawm e ' ka tih rual chuan kal lehnghal mai chu a tum a .


' Niminah ka zirtir ang che ka tih tawh kha ' ka tih chuan a rawn hawi let leh a ,' ka nutei ka dil a mahse .... ughhh englo ania ' a ti chuai raih a ,a awmdan atang hian a inthlahrung leh hnuhnawh a ni ngei ang . 


' Ka zo ṭep,nurse duty room ah min lo nghak rawh ' ka tih leh chuan thil sawi duh nei niawm tak hian a ding reng a , a tawp a tawp ah chuan , ' Ka nute'in i zaktheilo lutuk min tia , kan ti leh lo mai dawn em ni?' hi a rawn ti chhuak hlawl a . Henu zep neilo lutuk hi chuan min ti nui dawn alawm mahse a thutak em avangin ka insum leh ta zawk a . 


'Ka lo hrilh ang i nutei chu , min lo nghak rawh aw ' ka tih chuan 


' Aw le ' a ti a , nuih ver ver pahin a chhuak nghal a . 


Ka en zo ṭep tawh tih chuan Noela chuan min rawn nuih pah hian ' Bro , ka lo malis dawn che mi ? ' hi a rawn ti lut ham ham a , a nghal ngaiin ala nghal reng anih dawn hi . 


Hetianga a awm loh na hi kum tam alo ni ta , zawi zawi in ngai a awh chho zel tih ka hmuh hian kei tluk lawm an awm lo ang . Phullen hi alo ngeih tak tak a nih hi . 


' F*** you ' ka lo ti a , a nuih chu a za tulh tulh mai .


'Min rawn pui rawh ' ka tih chuan , 'Ka night dawn si lo a ka haw mai a ngaih hmel ' min nuih pahin a ṭhutna atang chuan a tho nghal a .

' Vawiin chu i fel angreng sia , workshop a i car dah pawh ka lakpui mai ang che ' min tih el deuh chuan a rawn ti leh a , ka tihngaihna hrelo chu ka lo nui ringawt. 


' E... taka bro ka car chu min lo zuk lak chhuah sak tak tak rawh ' a chhuak tur chu ka hrilh a .


' Eng nge i tih dawn ? ' tiin min rawn zawt nghal vat a . 


' Carolyn nen lehkha kan zir dawn a , ka hman lo ang ' tiin ka lo chhang thung . 


Chutia Carolyn nen lehkha kan zir tur thu ka sawi takah chuan Noel ngaihdan a nih loh hmel ngang mai , a rawn let leh ngat a .


' Rinhlu naupang mai a nih saw ' thinrim tih hriat tak hian a rawn ti a , keimah nge Carolyn a duhsak zawk pawh ka hrelo . 


' Ka hria lawm ' ka lo ti sam et a .


' Kum 17 chauh ala ni a , kum a tlin hun tal nghak rawh ' a rawn ti leh a.Engvanga Carolyn hi hauh ta viau nge a nih pawh ka hrelo , nge ani pawh hian a rukin kum 18 a tlin hun alo nghak ve reng zawk. 


' Chu Kum 18 ang chu a ni tawh mai alawm ' ka ti a ,' Rinkim lo ngaihtuah vak duh suh Carolyn hi ngaihtuahawm a ni lo . Nang leh kei kan awmlo a nih pawhin a ni chuan midang a nei tho tho dawn chuvang chuan a kum ah buai lutuk suh ' ka ti zui zat a . 


Thil nihna tak pawh a ni reng a ni , kei lo pawh hi hel tu tamtak a nei dawn tih a hriat reng , tumahin a kum an care tak tak tawh lo chuvang chuan amah duhsaktu leh  ngaihtuah tu bulah hian him takin awm se ka duhpui zawk a ni. 


Inentir tur ho ka en zawh meuh chuan dar 4:20 alo ri der tawh a , chauh pawh sawi lo in rang takin Nurse duty room lamah ka tlang nghal a , Carolyn leh a nutei niawm tak zinga nurse pakhat min lo be tu kha an lo awm a . 


' Dr Rinhlu ....i chau em? ' tiin nurse chuan min lo zawt nghal vat a . 


Lehkha a lo zir mawlh mawlh tawh avang chuan ka zahzelah ' Chau lo e .....Ka rei em? ' tih pahin a ep chiah ah chuan ka ṭhu nghal thak a . Carolyn chuan a nutei melh hrak pah chuan min rawn signal nghal zeuh a ,ka lo hrethiam nghal .


Nui vur vur chung hian nurse kawra name tag chu ka en a ,ka ù rual daih ni mahse  ' Nurse Rinte.... Carolyn hi reilote chauh zirtir i phal em ? 'tiin ka dil ta ringawt a , keiman ka dil vang nge ni alo phal khawp mai . 


Nurse Rintei chu duty angaih avangin ward lamah a phei zeuh zeuh reng a , Carolyn nen chauh kan awm avangin a ngaihtuah deuh aniang a rawn lut deuh sek reng bawk a mahse thil sual ti tur nilo in lehkha zirtir tur ka nih avangin engahmah ka ngai lo . 


Carolyn kan zirtir tak tak mai chu a basic pawh ni lo in a thlahtute atang tak meuh meuh a zirtir chu alo ngai a , hetiang em em a Physics man lo hi ka la tawng ngai lo . Engmah thiamlo in class 12 lai a ni thei te hi mak ka ti zawk hial a ni . A thiamlo lutuk a , ka lu te hi a ti na zo vek in ka hria . 


Dawhthei takin bei ngei sei rundung ti chung zelin ka kal chhoh pui beuh beuh a , kan bai chho a ni zawk mah ang chu ,rin aiin a man chak phian . 


Darkar khat vel chawl lo a kan tih tlak tlak takah chuan a ning ve ta deuh aniang , a ham deuh sek tawh a , a rukin ka nui ka nui mai . 


Hetiang thil ka ti ta mai hi tunah pawh hian ka la awih thei lo , ka ã tak tak tawh a nih hi . 


Carolyn in ngun taka lehkhabu a keu kual lai chuan remchang ah la in , ' I phone number ka la nei lo ania ' ka ti chhuak hlawl a .


' Phone ka nei lo ka tih tawh kha ' alo ti sam et ringawt. 


Anih chuan phone ka nei lo a tih khan alo ti tak tak reng amaw !! min hnawl vang nilo in . 


Tun ang laiah mi zawng zawng in phone an neih tawh laia phone ala nei lo bik chu mak tih ai mahin ka awih lo zawk. A number min pek duh loh avangin neilo angin alo awm reng maithei bawk . 


' I ti tak tak em ? ' 


' Ti tak tak e ... ngatinge i awih loh ? ' tiin min rawn zawt leh a , ka lo nui ringawt.


A lehkhabu khup thak pah hian ' E taka .... 'tiin thutak fe hian a rawn kun hniam a , a awmdan ang ang chuan ka lo awm ve zela .


' Noela love letter ka thawn kha min lo lak let sak leh  ' a rawn ti sa sa a mahse ka lawm teh chiam lo . 


Carolyn hian Noela a duh tih hi rin rukna ka lo nei tawh a mahse a kã ngei aṭanga hriat chu thil ngaihthlak nuam a ni lo . 


' Ngatimaw ? ' tiin ka nui lui a .


' A ṭhianpa i ni tho a engkim i hre vek tho anga ' tiin bul a han ṭan te te phawt a.

' Ka duh tih chu i hre tho anga mahse love letter kha lak let leh ka duh ' a rawn ti leh a .


Thiam takin ka zawt zela , Noel'an engkim min hrilh a rin avangin engkim a bul atang chuan zep nei miah lo hian min hrilh vek a . Noela a duh thu te , a tih mai mai loh zia leh beiseina ala neih thu te chu min hrilh vek a a ṭawngkam tin mai chuan min vit sawk sawk a ni ber mahse thil pakhat mak tih deuh ka nei .


' Chuan a duh loh thu che tun thlengin ala hrilh lo che amaw ? 'tia ka zawh leh chuan a lu alo bu nghat a .


Hei tak hi a ni mak ka tih chu , Noela hian hmeichhia a duh loh reng reng chu tlang takin a hrilh hre mai thin mahse Carolyn erawh a duh duh danin a awm tira tun thlengin a duh loh thu ala hrilh lo a, ti beidawng zawng emaw pawhin ṭawngkam ala neilo hi mak ka ti ani . 


Anih chuan Noela hian Carolyn hi alo duh ru ve reng a ni thei mai angem ?


 Nilo , Nilo thil atthlak tak tak a ngaihtuah reng hi ka bansan vat angai a ni . 


' Kha heihi lo ziak rawh , ka va zung lawk ange ' ka ti a, room aṭang chuan ka chhuak nghal a , pawnah rilru tih thawven pahin Cigarette zuk ka tum a ni . 


Pawn ka thleng chiah tih chuan ka han indap vel a lighter ka theihnghilh daih avangin lak tum chuan ka let lehnghal a mahse Noel'an kawngka bul atanga Carolyni alo thlir reng lai ka va hmuh rual chuan ka ding thut a , hrilh ngai lo in engkim chu a chiang thawkhat viau in ka hria . 


Vawikhat pawh inngaihtuah nawn lo in rang takin ka inher a , pawn lam pan chuan ka kal nghal nal nal a. 


Kal pah chuan thil eng eng emaw ka ngaihtuah a , ngaihtuah na a kal thui duh takzet . Noela hian  Tetei thih hnuah hmeichhe dang duh a nei leh te anih ngai chuan ka tan chuan hei aia thu lawmawm hi a awm leh tawh ngai lo ang mahse kan hmeichhe duh alo inang erawh thil buaithlak tak a ni thung .


Kha lehchen kha he hun Tetei lo hmeichhe dang a ngaihven hun tur hi kan lo nghak tawh a , engtin nge hemi te pahnih inkarah hian ka lo inrawlh theih tehlul ang . Ka ṭhiantha ber leh ka unaupa neihchhun tia ka lo chhal thin hian hma lam a pan ve beuh beuh a ni a , engvangin nge vawilehkhat ah a hlimna hi ka lo tih chhiatsak theih tehlul ang . 



____________________________________________ 


★Carolyn's POV★


Test na ah ka pass avangin inah pawh haw hmasa lo in damdawiin ah ka kal tlang nghal a , pass chiah chiah mahila pass tho a nih avangin Dr Noela pawh hian a hre ve ngei tur a ni . 


' Ka pass ve thei a ni tih hi a hre khawp ang' tiin ka phun phei mawlh mawlh a. 


A room a luhchilh ngai lo in corridor ah Dr Noela nen chuan kan in tawk hlauh a , ka melhrum nghal ul ringawt. 


' Ka pass .... i hmu em ka pass ' tih pahin a kut chu ka la a , ka answer paper chu a kut ah chuan ka hmehbel chawt a , a en vung vung ringawt. 


' I thusawi kha ila hria em ? ' confi zet hian ka tih chhunzawm zat a , ani pawhin ala hria a ni ngei ang .


' Eng nge i duh ? ' tiin min rawn zawt a , ngeiawm zet hian ka lo khi sak ringawt.


' Ka duh chu maw ' amah en kar chung chuan ka nui a , a thil tih theih ngai loh tur  mahse keiin a ka duh bawk si chu ka ngaihtuah a , ka hremna tur hi a hriat hunah chuan a thusawi ngeiawm tak avang khan ala inchhir khawp ang .


' Inngaizawng ang ' ka ti chhuak tawl a , a thil tih theih loh tawp tur a nih avangin a tlawm lai hi hmuh ka chak tawh takzet . Ka rin ang ngeiin a hriat tirh chuan mak ti hmel a pu ve a mahse a insiam tha nghal vat thung . 


' Aw le ' alo ti sam et ringawt.


Ka rin loh dan lutuk tak maia min chhan avang chuan keimah zawk chu mak tiin ka mengphawk nghal kawk a .


' Maw ! ' ka lo ti nghal hu bawk .


Mak tih avanga chilthli tla lo chauha ka lo an phuau lai chuan ' Ka sawi i hriat vek kha ' min rawn nuih pahin ka khabe chu dawm in ka hmui chu a nawr chip a , ka harh nghal kawk in ka hria . 


' Mi thluak thawl nu ' tih pahin ka chalah na lo te hian a rawn kuk fawk a , a kal nghal daih ringawt.


' I... i ti tak tak em ? Mawh ?  Mizo mipa diktak chu a thutiam ah a ding tlat thin ' tiin ka au zui leh kher a , mahse hria ang pawhin a awmlo . 


Hrem ka tum ve tehreng nen amah zawkin min hrep let daih a , khapa kha chu a bum ve theih thlawt loh . A thusawi kha tak tak nilo mahse ka lawm hman takzet , engpawh chu nise Dr Rinhlua lakah lawmthu sawi ka ba nasa takzet a ni . 



 






























 Chapter -27 


'You are everything i never knew i always wanted '


Ka motor ke a thep leh ka hlauh avangin ka tlanchak ngam lo a Phullen khua ka thlen meuh chuan dar7 a ri tawh a , khaw tawntirh a naupang ho infiam lai chu Noel-a awmna ka zawt ta ringawt a ,an lo hre ngang mai .Chutiang bawkin midang pawh ka zawt chho zel a , a lar bawk aniang hrelo pawh an lo awmlo a nih hi. 


Damdawiin tlang ka han thlen chhoh meuh chuan ka motor ke pawh alo thep leh tawh a , ka thleng hman hlauh chu a tih zia khawp mai , khanu chungah khan lawmthu sawi mawlh mawlh tlak ka ni . 


Noel-a awmna quarter chu zawn buai ngai lo in Creta dina zawn chu a ni tih ka hre nghal mai a , a awm tih ka hriat avangin kawngka lah chu kik ṭha ve ta mai mai lo chuan ka sawi vak vak kher a,alo hawng duh der lo . 


Hepa hi ala inthlak miah lo anih dawn hi .A room pawh hi a kalh  hmak zela , luh dawn pawhin kik phawt a ngai thin. 


Ka insawi hma chuan a tawp tak tak nan tiin ka han sawi leh vak vak a , a ning ta deuh aniang a rawn hawng ve ta nge nge alawm. 


' Surprise!! ' ban phar meuh in ka ti a , alo lawm viau dawn emaw ka tih laiin min hmuh rual rual chuan kawngka chu khar leh daih a tum ta mai ! 


' Hey .... hey ... ' tih pahin ka ke veilam chu ka rawlh lut hman hram a , ka ke a khar chilh avang chuan ka au lui vak a , nat erawh a na lem hlei law . 


' Hmela ... lo hawng mai mai teh chutilo chu i kawngkhar hi ka vaw chhia a ni mai ' tih pahin ka theihpatawp in kan pawt leh vak a , chutia ka tha zawng zawng hmanga ka pawh ṭang ṭang lai chuan a vawnna chu a thlah thut mai a , ka balance ka hlauh a leiah ka thal tawp mai . Min rawn kaitho ta mai lo chuan min luh san daih lehnghal a . 


Noel-a nen hi chuan hetiang hi kan in dawnsawn dan anih thin avangin thil thar a ni tawh lo . 


MBBS kan zir dun lai pawhin hostel ah kan awm dun thin a , ka room ah lehkha zir ṭhulh meuh a a rawn len ngun thin em avangin ka ning in vawikhat chu kawngka ka hawn duh lo a , ani lah mi nghal tih takah ka room kawngkhar kawpza chu a herh phawi hmiah mai a, kan Director pawhin warning min pek phah hial tawh a ni . 


Rang takin ka in perh tho nghal vat a , ka kekawr mawng benfai thuak thuak pah chuan , ' I mikhual pa hi i dim lo lutuk ' tih pahin inchhung ah ka lut ve nghal a.


 Chair pakhat lo awm chhunah chuan ka ṭhu nghal hmak a , ka pheikhawk tlawh phelh pah hian , ' Ka thawmhnaw saw min va lak teh , Car ah ala awm ' ka ti zui ham ham a . 


A tir aṭang tawh khan tlawh a duh loh thu leh amah a awmtir turin min ti tawh a mahse ka ngaihtuah deuh avangin chawlh la meuh in ka han kal lui ta tho a nih hi . Min lo lawm vak lo pawh hi mak ka ti lo mahse ka ṭhianpa ania a duhdan ang diak diak in thil hi ka awm tir dawn lo reng reng . 


Mi rilru chhia leh sual a ni lo bawka ngawi rengin lungawilo tak chung hian ka bag chu min va laksak a , a rawn luh rual in ka malchungah ka bag chu a rawn theh phei pawp a .

' Naktuk ah haw rawh ' a ti zui zat bawk .


' Teuh lo karkhat vel ka cham dawn ..... Engpawh chu nise i car saw engtik a i lak nge ? Car thar i nei tih pawh ka lo hre ve reng reng hleinem ' tia zawh pah chuan ka bag a Beer can pakhat chu ka la chhuak a . Ka beer ken lai a rawn hmuh rual chuan rang takin kawngka chu a khar nghal vat a .


' Dry Village a nih hi ' a ti zui a mahse ka engah mah a thawk ve lo . 


'Hei lo pawh hi ka la ngah mai , a case in ka rawn keng alawm . A changkang chi pawh ka nei MR ho in min pe a ' tih pahin ka beer ken lai chu vawikhat ka han lem zeuh a , ka chau bawka ka zang nghal huai in ka hria . 


' Chaw i ei tawh em? ' 


' Khawia mi nge ka ei anga , ka Gari sawn min rawn thlenpui tawk tawk a nih hi, kawngah ka riak lo chauh , hmeichhe pakhat in min rawn pui hlauh a ' tiin ka lo chhang a . Min rawn nuih pah hian , ' A hnute a lian em? ' tiin a rawn uang a. 


Hetianga a awmloh na hi kum tam a ni tawh a , fiamthu a thawh ve te pawh hian thil mak a tling tawh a ni . 


' Bro khanu kha ka rilru ah a awm reng mai , hmuh leh ka chak takzet ' ka tih chuan .

'Joysie chiah ngaihtuah rawh ' tiin Joysie thlavang chu alo hauh nghal vat a. 


Joysie hming a rawn sawi chhuah takah chuan ka rilru tawt lutuk tih ziaawm nan ka han thaw chhuak deuh hawk a ,Beer chu ka han lem leh te te phawt a' Kan inthen tawh ' ka ti chuai zui raih a . 


Min hnem dan a hre lehpek lo aniang ngawi rengin ka beer ken lai chu min rawn laksak a , ka sir a rawn ṭhut pah chuan beer chu vawi hnih vel a han lem a , ' Anih chuan i rilru a awm reng nu chu neih ngei tumin bei mai rawh ' fiamthu titak deuh hian a rawn ti a .


Nuih pah hian , ' Ka hmuh leh ngei ka beisei ' beidawng ru tak si chuan ka ti ta ringawt a . 


Ka inbual zawh veleh chaw ka ei nghal a mahse a chawhmeh min chawpsak ho ka hmuh rual chuan ka mengphawk deuh kawk a ni ber . 


'ehhhh....' kan ti nghal ringawt a , thil dang ka sawi chhunzawm hma chuan , ' Mi min rawn suah a nih kha ' alo ti nghal vat a , a nih ka ring rengah . 


Heng chawhmeh zozai hi Noel-a hian a siam lo tawp ang , siam chu sawiloh a ei duh pawh ka ring lo.


Chaw ka ei lai chuan Noel chuan ,' Damdawiin ah ka zuk kal lawk ange ' tih leh hmanhmawh taka chhuah a rual a , a hmanhmawh danah emergency case a awm aniang . 


Tete'in a kalsan aṭang khan Noela hi hmuh theih khawpin a tla chak a , engmah sawi ngai lo mahse a tuar na hle a ni tih a mizia aṭangin a hriat theih a ni . Ṭhianho zingah rawn tel in han nui ve thin mahsela tu pawhin a hlim lui a ni tih kan hai lo. 


A tirah phei kha chuan a lo intihhlum ve mai kan hlauh avangin a hriat loh hlanin kan veng thin nghe nghe . Tetei alo hmangaih zia leh a kalsan ta mai hi a tawrh nat zia sawi ngai lo in kum tamtak a ral hnuah pawh ka la hre chho zel dawn chu a nih hi . 


Chaw ka eikham veleh ka chau bawk a thleng sil hmasa ta mai lo chuan ka han mu zal ar ar phawt a ,minute 5 pawh phone ka khawih hman lo ang tih chuan mut chhuak in min rawn zem nghal er er a , thleng sil tur pawhin tha ka nei tawh lo . 


Ka harh leh chuan zing dar 5 chauh alo la ri a ,Noel erawh hmuh tur awmlo mahse ka chaw ei na thleng zawng zawng kha alo insil danah nizanah Noel'an min lo silfai sak vek a ni tih chu ka hre nghal a . 


Inphih fai hmasa lo in tei kual pah chuan damdawiin lamah ka chhukthla a , damdawiin kawt a thisen far nuai ro vek tawh te chu ka hmuh hmaih hauh lo .Ka rin ang ngeiin nizanah emergency case an buaipui tih chu hrilh chawp ngai lo in ka hre nghal mai .Doctor ve tho ka ni a nizanah pawh khan duh chuan zuk pui thei reng ka ni mahse chawlh ka lak lai a nih avangin damdawiin kaihhnawih thil hrim hrim ah hi chuan inhnamhnawih ka tum lo . 


Damdawiin chhung ka luh chuan room hmasa berah Noela office chu alo awm a , luh ka tum zet a mahse thawm ka hriat avangin lut lo in kawngka phenah ka ding ta zawka . 


' Grace hna thil ni lo ah chuan min rawn call tawh suh ' Noela chuan a ti a mahse mak ka ti hran lo a chhanchu hmeichhia in an va beisei hian a duh loh zawng an nih chuan tlang takin a hrilh mai thin heihi Noela danglam ve na a ni . 


' Duh che hi a pawi viau em ni ? I duh ang ngei chuan ka rawn call tawh lo ang che mahse khanu i biak ang tho khan min be ve rawh ' chunu chuan a ngen hian a ngen a . 


Thil mak ka tih ve deuh pakhat chu hmeichhia amah lo ngaizawng tute reng reng a duh loh thu a hrilh lawm lawm hnuah pawh an la umzui leh zel tho hi a ni . Mi zaidam tak leh frank tak a ni a , mi rilru tihnat hi a hreh hle bawk chuvang chuan a rilru put hmang hi tlang takin a sawi mai thin a ni . 


Chunu chu tap chung hian a rawn tlan chhuak a , kawngka phenah ka ding bawka min rawn hmu lo hlauh . 


Kekawr ipte zen chung hian ka lut a nidanga ka koh thin dan ang bawkin , ' Rinkim ' ka ti nghal ringawt a, nizanah a mu hman meuh lo aniang a hmel aṭang ringawt pawh hian a thinchhe dawn tih a hriat  . 


Min hmuh rual chuan sana a en nghal vat a , ' Han mu leh rawh ' tih ringawt in min lo chhang thung . 


' Hmeichhia hi engzat nge i hnawl dawn , move on hi i tum ve miah lo em ni? ' ka ti nghal thawr a . Ka lo hmuh ve danah chuan Tetei aṭanga move on hi a hlau ni berin ka hria . 


' Ka peih lo ania ' tih pahin chair ah chuan a ṭhu a , a mut a chhuah hmel khawp mai . 


' Nangmah hian i tum lo ve hrim hrim a nih hi .... ' ka thinrim chuan ka ti phiar phiar a ,' Hma hun thui tak i la nei hetiang hian awm tawh suh ' ka tih zawm zat a.


Zingkar leh kar lo pawh a sawi theih tawh loh ,heng thil zawng zawng hi amah ka ngaihtuah avanga sawi vek ka ni . A hma ang khan awm leh sela , a hma ang khan hlim leh se ka duh vang a ni . 


' Rinhlu khatiang thil kha chu rawn tharthawh lo teh ' a tih pawh chuan. 


 ' Ka thar thawh hleinem i nunpui reng zawk alawm .Tetei chu a thi tawh engtik ah mah a rawn let tawh dawn lo. Vawikhat ka sawi nawn leh ang Tetei chu a thi tawh 'ka tih leh takah chuan a dawhtheihna in a tlin ta bik lo aniang ,a ṭhutna aṭang chuan a rawn tho chhuak uai a .


Vin zet hian   , ' Ka hria Tetei a thi tawh a , a rawn let leh tawh dawn lo tih pawh ka hria mahse eng ang pawhin theihnghilh tum mah ila ka thinlung leh ka ngaihtuah na ah hian a thi ve thei lo . ' a rawn ti a , a beidawng ani tih hai theih a ni lo .


'Anih chuan vawikhat tal hmeichhe dang chhuahpui rawh ' tiin ka challenge ta ringawt a . 


' Ka tum alawm mahse hmeichhe dang ka biak apiang hian Tetei laka rinawm lo angin ka in hre tlat thin a a chhan ka hre bik lo ' a ti chuai raih a, ka lainat takzet .


Ni e , Tetei kha a thikthu a chhia in hmeichhia tupawh kha a thik thin a , Noela tan chuan hriat chhuah loh theih loh a ni ta ve ang . 


' Bro hetiang ringawt hi chuan single in i thi thei ang ' boruak rit lutuk tih ziaawm nan chuan ka ti ta ringawt a , ani pawh a nui ve ta nge nge alawm. 


Mipa kan nih avang hian kan rilru hahna te hi kan pai reng tur a ni bik lo . Mihring ve tho kan ni a hmeichhia ang tho in kan rilru hahna te min lo ngaihthlak sak tu tur kan mamawh ve tho a ni .Noel pawh hian hetiang thu hi ka hnenah lo chuan tuma hnenah a sawi ngai dawn lo tih ka hria chuvang chuan ka hnenah tal a vei zawng leh rilru hahna te hi sawi ve se ka duh a ni . 


Ka tih tur hrelo chu ke in khaw chhungah ka zuk tei kual vel a  , ka car ke min pump sak tunu bawk kha ngaihtuah reuh reuh paha ka kal lai chuan ka lam pana a rawn kal lai chu ka hmu ta thut mai !!


Mak ti tak chung chuan ka lo en renga , ka mit vai a nih ringin ka mit ka han nuai leh a ,a tak a ni ngei bawk si . Rin loh lutuk tak maia ka hmuh leh avang hian intawng leh tura duan lawk kan nih te ka ring hman rum rum mai alawm mawle . 


Ka mit vai mai mai nilo in a tak ngei a ni tih ka hriat takah chuan ka va pan hnai vat a , nuih vur vur pah hian , ' Good Morning ' ka ti a .Min hmu thut chu kei ang bawkin mak a ti ve aniang , min rawn melh kawk a . 


' Eheee.... ' tih bakin min chhang lo . 


A sam pawh a pheng ngaiin ala pheng reng a nih hi , a hmel erawh a tih chhiah phah lo . 


' I rilru ava hah hmel ve ' a rilru a hah hmel em avang chuan ka zawt vat a .


'Ah ... Englo ania , Vawiin ah kan test dawn a ka pass hlauh chuan ka vawikhat pass na tur a ni dawn a mahse ka fail leh ka ring 'tiin min chhang nghal zung zung a , min chhan dan avang chuan ka nui chhuak nghe nghe . 


' Anih chu mawle.... ka car ke min pump sak avang khan lawmthu ka la sawi miah lo a , ei chak te i nei em ? ' tia ka zawh chuan , ' Ugghh.... neilo ' tih pahin ngaihthat lo hmel zet hian min rawn en chho vang vang a 'Mikhual mi i nih ? ' tia min rawn zawh thut takah chuan ka nui chhuak lo thei lo .


 Henu hi Happy pills a ni ringawt. 


' Aw ... a ni mai aniang chu . Chuan eitur chu ? ' ka han ti nawn leh a.


' Tihpalh lutuk nidangah a ni mai , i hriat angin test tur kan nei bawk sia ' tih pahin hmanhmawh tak hian a kal nghal daih a mahse ka hun tha neih hi bawhpelh ka tum hauh lo .


'Anih chuan I phone number min lo pe rawh ' tiin ka va au zui leh hram a .


' Phone ka la nei lo ' tiin rawn nuih seih pah hian min rawn chhanglet a . A phone number min pek duhloh avang chuan ka phun zui hluk a . Khanu kha ka la hmu leh khawp ang . 



















Blog Archive

Popular Posts

Visitors