Dr Noel 2 -19

 C

CHAPTER -19 

You know you’ve got it bad when you miss something you never had. At least even for a little while, I was the reason behind your smile

Lum ka tih em avangin ka harh hlawl a  , Noel an nghet takin min lo la kuah reng chu niin ka mutthilh lai pawh ka lo hre lo reng reng .

Ka hawi chhoh chuan ani pawh tui takin a lo la muhil a , a mal chungah ka ṭhut avangin che lovin tih harh hlau tak siin a mu lai chu ka en renga ,ka mur deuh sung sung thei nia mawle .Hetiang hian awm reng thei ila ka ti takzet . 

A muhil lai ka lo thlir veng veng lai chuan a rawn kun hniam thut mai a , a harh emaw ka tih avangin ka lo melh sawn nghal vat a mahse a chet zui tak loh avang chuan a la harh lo tih ka hre nghal ; ka thaw nghal huai mai .Hei ai hian rawn kun hniam leh sela chu kan chal a in toh tawh ngei ngei ang . 

A hmui ro rap mai leh a hnar ngul sang vah mai te chu ngun takin ka en renga , kaihthawh chu kahase a rawn harh ka hlau zek zek zawk . 

Chutia hnai taka hmu reng ta chu eng hian nge min tur pawh ka hrelo , vawikhat pawh inngaihtuah nawn lo in a hmuiah chuan ka fawp ringawt a! a hua em haw lo em engmah ka ngaihtuah tawh lo,ka hma a thil lo thleng tur chu maimichhing chungin ka hmachhawn tawp a ni. 

A thaw lum ham ham te chuan van sang taka thlawk ang maiin min len kual tir delh delh a,ahmui nem thep mai te chuan vanram tlafual ah min chen tir hi a ni ringawt . 

A hriat loh hlanin ka fawp emaw ka tih lai chuan min rawn fawp let ta thut mai!!  ka meng nghal zawk ringawt. Ka phu lutuk chuan a mal chungah ka ṭhu tih pawh ka hre chang tawh lo ,rang lutuk hian din ka tum zuka inchung ah ka lu ka la tauh zui .

' A na lutuk ' tih pahin ka lu chu ka dawm vat a , a malpui rah pawp pahin seat lehlam ah chuan ka insawn phei nghal daih bawk a , ka rap na deuh aniang a rum deuh hak in ka hria . 

Ka awmdan teh thut avang chuan a hrilhhai hmel em em lehnghal. 

' I zia tawh em ? ' tih pahin a han zi mar vel a . Zankhua in a mal chungah ka ṭhu bawk sia a sil ve viau ang le. 

' Aw ... a lum lutuk ' tih pahin zahzelah ka hmai chu ka kut chuan ka han zap vel a ,ka zak lutuk hi tlan bo daih na tur awmse ka ti takzet . 

'I khua a sik tawh lo maw? ' tih paha ka pang rawn deh leh a tum rual rual chuan a kut ben thlak sak pawp pahin ka lo in bum zuk a. Engvanga hetiang a awm thut nge ka nih pawh ka in hre bik lo ,ava han atthlak tak em. 

Mak tih hmel deuh hian min rawn en a , a kut chu a la let leh zal zal ringawt. 

Mipa ka fawh hian hetiang hian ka awm ngai si lo a , Dr Noel nen hi chuan engkim hi ka vawikhat na ang mai hian ka hre thin. Ka zei thin hawrh hawrh nen ani bulah ve thung hi chuan ka khawr deuh tut zel . 

' aw ka ṭha vek tawh , ih englo ania ka zun a chhuak ' tiin chhuanlam ka siam ta ringawt a ,car aṭang chuan ka chhuk thla ve ringawt bawk .

Ka fawp tih kha a hria angem le ? Aaaa.... Engmah thleng lo anga ka awm angai. 

' Engmah a thleng lo , engmah a theng lo ' tiin ka phun zui sep sep a , a hriat loh hram ka beisei . 

Car aṭang in ka chhuk thla ve ringawt a zing dar 4 chauh ala ri bawk nen khua ala thim deuh hlek avangin kal ngaihna ka hre der lo . 

' Helam ah hian rawn kal rawh ' Dr Noel chuan phone flashlight hian min rawn en a mahse tuihawk dai tur a awm avang chuan ' pawilo ka zung leh lo mai ang ' tiin ka rilru chu ka thleng leh ta ringawt a .

Ka zun a chhuak lutuk lo bawk nen ka pheikhawk thar hi a balh ai chuan car a awm hrih hi ka thlang zawk a ni .

Car chunga luh leh tuma ka in her lai tak chuan ' Lo che suh ' tih pahin hnung lam atang chuan a kut khing khat chauh hian ka pum ah min rawn kuah chawt a min pawm phei nghal nawlh bawk, aw leh ai pawh ka ti hman meuh lo . 

'Min ti phu alawm ' tiin ka la vin zek zui . 

Ka fawh chungchang vel kha engmah a rawn sawi chhuak si lo a a hrelo a ni ngei ngei ang chuvang chuan keipawn ka theihnghilh mai angai a ni . Engtik ah mah ka kã atang hian a chhuak tawh lo ang . 

Kan pahnih chuan  motor hnung lamah chuan kan in zui phei hnak hnak a , Saitual a let leh chu sawi loh minute sawm dawn kan kal tawh pawhin kan hnung ah motor alo la awm zel a ,motor engzat chiah nge kan hnungah ding pawh kan hre thei tawh lo, motor tih chet sawn ngaihna a awm lo hrim hrim . 

' Kan hnungah ringawt pawh Motor tang a tam hle mai a,a diak bawk si ninawm ' kal pah chuan ka phun phei nang nang reng a , kawngsir ah zei zei kal angai lehnghal a, chu pawh ala diak em em zui .

' Khua a ṭhat in a khu em em a , ruah a sur in a diak leh em em a . Zun na tur pawh a awmlo a nih hi tiraw? ' tia ka zawh chuan , ' Hetah hian zung mai rawh ' tiin min rawn chhang daih a .

' Engmaw ? ' ka lo ti hu ringawt.

' Motor awm lohna lai i zawn chuan kal thui ala ngai dawn lutuk ' a ti a .

 Nia , kal thui ala ngai dawn tih chu ka hria mahse helai motor ke phenah hian ka zung ringawt thei hleinem chupawh ka mipa duh em em bulah lehnghal. 

' Mahse hetah hian zunna tur a awm loh hi ' tih pahin 407 chu ka kawk a . 

' Helai aia ṭha hi a awm lo .... i ek a chhuah pawn i e nghal thei ang ' tiin min fiam zui zat a , ka nuih pawh a za ve lo .

' Ka duh lo , ka zung lo mai ang ' ka lo ti hmak a , mahse a rilru a sawh sawn duh bik ṭhak lo .

A jacket min rawn pek pah hian ' Kha heihi hmang rawh, ka lo din hliah ang che khua pawh ala var lo a tuman an hmu lo ang che ' a tih tlat avang chuan a jacket chu ka la ta nge nge a , ka zun a lo chhuak ve deuh bawk nen a jacket bih chung in a phenah chuan zung turin ka in phelh sut sut a.

' Min lo en miah suh ' ka ti deuh sek a ,a tawpah phei chuan aw pawh a aw peih tawh lo .

Duhthlan tur dang ka nei miau si lo a , a chet fuh hleih theih loh . 

Thlamuang lo chung chung pawha ka zun lai tak chuan pa pakhat hian ,' Kha in zung elaw ' a rawn ti ta mai a , zun laklawh pawh ka sawi hman lo,' Awi Lalpa ,i jacket ka zun khum alawm ' tih pahin rang lutuk hian ka in perh tho nghal zawt a . Noel phenah ka kekawr ka ha ṭha nghal sawk sawk bawk .

' Nangmah vang ' tih pahin ka zak lutuk chuan a darah ka beng pawp a, ka ṭawngkam avang khan min rawn la nuih vur vur zui . 

Chupa chuan eitur Lays , kurkure leh drinks chi hrang hrang hi a rawn khai tun a, kan awm na aṭanga hla lo te ah nepnawi bungraw phur a awm thu leh chutah chuan midang pawhin an lei sup sup thu te chu min lo hrilh a . Nizan atang tawh khan chaw kan la ei lo a ka ril a tam tluk zetin Noel ril pawh hi a tam ve ka ring .

A phun chiar ve lo mai pawh a , a ruk tak chuan engmah ala ei bik si lo a a chau viau tawh maithei a ni . 

Chupa chu a kal sawn chiah tih chuan zawi te hian , ' i zung leh duh em? ' a rawn ti leh kher a, rum zet hian ka lo melh a , ' Duh mai mai lo ' tiin ka lo vin let zeka .

A jacket pek pah chuan ka kalsan daih a ,ngawi rengin ka hnungah min rawn zui ve hnu hnu mai . 

Nepnawi phur motor awmna kan thlen chuan midang pawhin eitur an lo lei sap sap hlawm a , pawisa engmah ka neih tawh loh avangin ka pawr vak ngam lo kil khatah ka ding zum zat reng mai . 

'Eng nge i ei chak ? ' tiin min rawn zawt a , ka inthlahrun na lam tak alo ni bawk nen a duh duh lei turin ka ti ta zawk a . 

Midang pawh an rawn kal belh zela , midang awm luai luai na karah chuan eitur khai chung hian a rawn in hnawh phei ve tawlh tawlh a , a jacket ka zunkhum ngei mai kha a rawn ha bawk a min ten loh avang hian ka lawm ru takzet . 

Ka lam pana a rawn kal takah chuan ka inthiamlo bawk nen lehlam ka lo hawi daih a ,nimin aṭang tawh khan ka la tibuai char char a engmah sawi lo mahse a lakah hian bat tamtak ka nei in ka hria . 

'I ei duhzawng ka hre si lo a hei chauh hi ka rawn lei mai' tih pahin a thil lei chu min rawn hmuh va va a kan puar na khawp chu a ni nachungin kan ei khawp chang chang chauh a rawn lei a ,uikawm ka ti rilru hle bawk.

'Pawilo ka ei duh vek ' tiin ka lo chhang a ,engchen nge hetah hian kan tan dawn pawh kan hre si lo a, a ruk tak chuan a chuangliam a lei loh avang hian ka lawmlo ru takzet . 

Kal kan tum lai tak chuan nepnawi bungrua neitupa chuan Dr Noel chu a rawn ko a .

' Ka pu i thil lei i theihnghilh ania ' tih pahin eitur chi hrang hrang a lei ai pawha tam hi rawn pek a tum a mahse a lo la duh bik lo .

' Midang hnenah pe rawh keini aia mamawh an awm ang ' Dr Noel an alo tih phei chuan ka lo hrethiam lo takzet . 

A hnawn a hnawn hnuah pawh a lak duh tak loh avang chuan chupa chuan a thil khai lai chu a la let leh ta ringawt a , a kal hma chuan , ' Ka pu midang chuan an mamawh bak bak an lei tun tun a nangmah chiah hi midang ngaihtuah avanga lei hnem duh lo awmchhun i ni chutah mi reithei zawk tan i leikep bawk a , heng thil zawng zawng hi puar khawp leina neilo te hnenah ka lo pe ngei ngei ang , i lei tlem sia in kham ang maw?' a ti ta mai a , an sirah mak ti takin ka lo ding ve reng ringawt . 

' Engmah a nih loh kha , hei kan puar khawp chu kan nei alawm ' alo ti sam et a , eitur a lei tlem em em nachhan hi ka hre ve chiah .

Motor tang a tam sia mahni duh zat zat lei vek ta ila chang lo an awm ngei ṭeuh ang chu chu Dr Noel chuan a lo hre lawk sa vek a ,midang a ken mai bakah neilo zawkte tan ala leisak zui a mi uikawm chu sawiloh a lo thilphal lutuk zawk alo nih hi . 

Thil awmdan diktak kan hriat takah chuan ka ngaisang leh hnuhnawh a , han duh loh viau tum pawh hian a zunah hian ka uai nawn awn awn zel chu a nih hi . 

' Kal ang le ' a rawn ti a , kan pahnih chuan  a car lam panin kan let leh a . Thil thlen dan kimchang hre chak viau mah ila ngawih ka chuh ta zawka . A hmel a ṭhat tluk zetin a rilru pawh a tha tih ka hriat phei hi chuan ka pasal atan ka lo hual ru ve hmiah . 

 Hriat loh karin khua pawh a lo var der tawh a, kawng a diak ve deuh bawk nen kawng ka hmuh theih takah chuan balh hlau tak si hian ka dingdihlip phei ai ai a mahse kawng nalah chuan dingdihlip chi alo ni awzawng lo ' Dingdihlip ve rawh ,a nal lo bik ' ka ti zo chiah tih chuan mawng sawh dawt in ka tawlhthlu nghal pawp mai . 

' A na lutuk , ka mawng hi a na lutuk ' tih pahin ka nui nghal uar uar a . Ka mawng sawh na viau mahila ka nuih a za miau sia thawh nachang pawh hrelo in ka nui uar uar ringawt. Midang in min rawn hmu se chuan mak min ti viau ang . 

Noel chuan min rawn kaitho nghal vat a , a nui ve dawn emaw ka tih laiin a insum nge a nuih a za ve lo pawh ka hrelo a nui ve miah lo. 

' I berh vek alawm ' a ti a . 

Ka thawmhnaw a chirh kai luai chu a kut chuan min rawn ben fai sak nawk nawk a , ka nui nasa bawk aniang kan hnung chiaha Bolero khalh tupa pawh chu a rawn chhuk thla nghal vat a , ka tawlhthlu lai kha min rawn hmu aniang ani pawh a rawn nui thaw mai . 

Ka in sawh nat leh nat loh thu te chu min rawn zawt a , kan khaw pa alo ni hlauh lehnghal a a thlamuan thlak takzet .Chutah kan khua atangin dar 6 velah sumo ,tang ṭhenkhat thiar tur a rawn kal tur thu te chu a rawn sawi luam a , ka hlim viau na in Dr Noela a rawn kal tel ve thei lo tur hian ka lawm a ti famkim thei lo .

A car a haw san daih thei si lo a kawng a tlang hma loh chuan a rawn haw ve thei dawn lo tih na a ni . 

Car awmna kan thlen chuan lut hmasa a lo zuk inthlak hmasa turin min ti tlat a ,ka kekawr hnuaiah boxer ka ha hlauh a ka vannei takzet . Ka kawr lah a berh chu sawi loh a huh hnuang avangin a T-shirt chu min hak tir ta ringawt a , duhthlan tur dang a awm miau si lo a ani erawh in vest leh jacket chauh a ha thung . 

Dr Noel tshirt te , a jacket te hi mi nazawng in an hak theih loh mai bakah hak na chance a awmlo tih ka hre ve kar a , ha thei a ka awm hi ka hlim veng veng mai . 

Ka inthlak zawh chuan kan pahnihin car ah kan eitur neih ang ang chu kan ei a , titi in thil tam tak sawi reng lo mahila kan rilru erawh kan in pawh in kan in nel sawt riau in ka hria . 

'Motor a rawn thlen veleh kal nghal thei turin lo in ring rawh ' tih pahin a rucksack ah chuan ka thil lei ho kha a polythene chawp chuan a khung daih a , ngawi rengin a che vel chu ka lo en reng a . Ka inkhai hnawk ve ropui sia a bag min hawh tir leh dawn a niang . 

' Anih nang ? ' tia ka zawh pawh chuan hrelo ang maiin ngawi rengin bag chu a zip mawlh mawlh a .

' Kal rual mai ila , kawng a tlang hunah ka kal zawk mai ang i rualin ' ka tih rual rual chuan , ' Chutiang ngaihtuah reng reng suh , kal duh tamtak an awm dawn a Sumo a rawn thlen veleh i chuang vat dawn nia ' a rawn ti ta mai .

Nichin lawk kha chuan midang a ngaihtuah em em a tunah lah midang pawh ngaihtuah zo lo in ka tan a chuhhelh leh em em a ,eng chiah hi nge a rilru a awm pawh hi ka hrelo .  

Ngawi renga Sumo kan chan tlawk tlawk lai chuan boruak ninawm lutuk leh reh lutuk tih ziaawm nan a seat hnung nghen ar ar pahin ka pu phone chu ka play tlang tlang a , chutah ka hla duh lutuk tak mai Avengers: Endgame a Iron man Tony Stark a thusawi sawi deh chhana hla a an phuah tak I Love You 3000 tih hla Stephenie Poetri sak ngei mai chu ka han play tleng tleng a,nalh ka ti bawka ka play nawn deuh sek mai , a hla hi hlui deuh tawh mahse ka la duh em em tho . 

🎼Baby, take my hand

I want you to be my husband

'Cause you're my Iron Man

And I love you 3000🎼

a rawn sa thleng chiah tih chuan Dr Noel chuan a ning ta deuh aniang phone chu a rawn off hmak a ,thinrim hmel zet hian car atangin a chhuak hmak a nih chu , mak ti taka en mai loh chu han tih vak ngaihna pawh ka hrelo .

' Play nawn a nin viau te chuan sawi ṭha ve mai mai sela ka off daih thei tho sia ' engmah ka hriatthiam ve loh avang chuan ka ti zui nang nang a .

Hmanni ah pawh bakilh senno mai mai vangin a thinrim ringawt tawh a tunah lah hla vang mai mai in tihian a awm leh thut a , hepa hi ka hrethiam thei ngai dawn lo a nih hi . 

Read More

Dr Noel 2 - 18

 CHAPTER-18

I'll make it feel like heaven, but I swear I'm not a saint

And you won't see the truth 'causе I'll be kissin' it away

Yeah, I'll be all you need until I'm drivin' you insanе

Baby, all I'm tryna do is save you the pain.

Lehkhabu chu dawr hran hran ah ka en kual a, ka zawn kual chhung nen ka lei zawh vek hnuah pawh darkar khat leh tlem bak ka hmang lo .

Noel khan amah nghak turin min ti tlat sia lo hawsan daih kha ka tum bik loh avangin hun khawhral nan iron man pencil bag ngei mai chu ka lei a , pen leh ka mamawh dang te pawh muangchangin ka lam kual zel bawk a chutichung pawh chuan dar 12 :30 bak ala ri lo . 

Khua lah chu ruah sur si lo hian a dur khup a,ruahsur nghal mai tur angin khawpui chu a ri dur dur reng bawk .Kawrlum ka ha lo bawk nen a vawt deuh surh lehnghal a ,ka vei kual nasa bawk a ka taksa te hi a kham ṭhum thei nia mawle  . 

Hun khawhral paha ka vei ka vei hnu ah chuan khawsik in min rawn ṭham leh er er tawh a, ka vei kual peih tawh meuh lo . In a mut mai mai mawlh ka chak , chu bak ka rilru ah a awm thei tawh lo . 

' A van rei tak ' tih pahin van lam chu ka thlir vauh vauh a . Ruah a rawn sur mai a hlauhawm bawk nen ka din na bul hnai maia Book Cafe ah chuan ka lut ta ringawt a . Reilote ah ruah chu a rawn tla nghal mai bawka  ,tifuh ka in ti ru hle. 

Ka tih tur hrelo lutuk chuan lehkhabu te chu kan en kual vela , ruah lah chu a sur duh phian lehnghal.

Ka peih tawh loh thleng thleng ka en kual hnu ah pawh a la rawn lan mai loh avangin ka inthlahrung chuan lehkhabu te chu ka chhiar ta ringawt a , ka awm rei tawh bawk nen ka ning tawh takzet .

 Pawnah lo nghak dawn ila ruah a sur nasa bawk si , hetah awm dawn ila ka awm rei tawh bawk si a ,ka rin aia a rei tak avang chuan ka thin te hi a rim tun tawh a , ka lo nghak ta kher kher hi ka inchhir leh hnuhnawh viau a ni. 

Lehkhabu ka chhiar kar lakah intih harh nan coffee ka lam zeuh zeuh reng a , a khat tawkin sana ka melh deuh sek reng bawk .A tawpah phei chuan coffee lamna tur pawisa takngial pawh ka nei tawh lo a , ruah a sur avangin pawnah ka nghak thei bawk si lo awm nuam lo leh hrehawm ti chung chung in ka ṭhu ve reng ringawt . 

Dar 4 a rik hnuah pawh ala rawn lan mai loh avang chuan ka dawhtheih na in a tlin tawh bik lo , ruah a ban veleh motor ka chang anga ka hawsan hmak ang. 

Emergency Meeting an nei a an rei dawn tih pawh ka hria mahse dar4 pelh thleng thleng an meeting erawh ka ring pha lo a ni . Hetianga rei leh tur si hi engvanga amah lo nghak tura min ti tlat kha nge maw a nih ni . 

Ka thinrim lutuk chu ka hnuk te hi a ulh deuh ṭun tawh a thinchhiat lutuk pawh hi a ni lo. 

Ka rilru a nat avang hian ka hnuk a ulh emaw ka muttui a tlak khat tehreng nen ka thin a rim ve thung hi chuan ka mittui a tling loh leh ka hnuk hi a ulh nghal zel a , ṭawng pawh ka ṭawng thei tawh ngai lo , ka ṭawng chhuah chuan tap aw ṭuau hian a rawn ri chhuak thin a chuvang chuan ka thin a rim tawh hi chuan ka ngawi reng ta thin a ni . 

Damdawi han ei mai tur a awm miau lo a ,ka khawsik chuan min ti zawi in min ti chau vek tawh a ṭhut pawh ka ṭhu ngil peih tawh meuh lo.Dawhkan bawh pahin lehkhabu chu ka chhiar ta ringawt a . 

Tunah chuan Dr Noel nilo in ruah ban hun ka nghak tawh zawk a ,min nghak rawh a tih avang maia nileng leng a ka lo nghah avang khan ka in chhir in ka tlawm rawih rawih hian ka hria . Ka duh a ni tih a hriat avang hian a duh duh dana min tih kual vel a tum a nih chuan heihi a tawpna a ni tawh ang . 

Dam reng chung pawhin lehkhabu ka en tawh chuan ka mut a chhuak nghal thin kha a nia tunah phei chuan mut ka chak lai tak alo ni bawk nen ka lehkhabu chhiar lai chu ka lo mut thluk san daih a , staff in min rawn kaithawh meuh chuan khua a lo thim vek tawh a chutah ka zahna ti zual turin dawr an khar tawh dawn avanga min rawn kaitho an lo ni lehnghal. 

' Awi ka tih palh lutuk ' ngaihdam dil pahin ka in khung vlnú

Rang takin ka ṭhuna aṭang chuan ka tho nghal vat a , ka thil lei ho khai chung chuan ka chhuak nghal nal nal bawk . Ka zak lutuk a ka hnar hi sai tiat tiat in ka hmu lurh mai alawm . 

Ruah ala sur seng seng avangin dawr kawt hul laiah chuan ka ding ta ringawt a , motor phar tur ka melh deuh reng bawk . Motor ka chan lai te chuan ka pum a rawn ri leh ruk ruk thin  a ,sana kan en nak chuan dar 7 alo ri ṭep tawh chu niin .Tun ang hunah pawh ala rawn let lo a nih chuan min hawsan daih tawh a niang . 

' Keimah in ka haw ve thei chiang emai ' tiin mahni leh mahni chu ka in hrilh a , a tello pawhin ka awm thei chiang lutuk ringawt . 

Ka riltam lutuk chu ka pum te hi a na vek tawh a , inah chuan awm ila chu dar 5 velah khan chaw kan ei daih tawh ang. Kan chaw ei hun a pel daih tawh a , ril tam pawh hi a awmlo hran lo . 

Ding khur hlak hlak paha motor ka lo chan lai chuan ka hma ah tak car dum hi a rawn ding a ,tudang ni lo in Noel a ni tih ka hre nghal . 

' Rawn lut rawh ' a chhung atang chuan a rawn ti a ,ka lut lo chiang kher mai lehlam ka hawi san hmak. Rawn lut tura min rawn tih nawn leh pawh chuan hre lo ang maiin ka ding reng a chuan chu sawi loh a hmel ka hmuh zawng ringawt pawh hian ka thin a rim . 

Ka awmdan ah chuan ka lungawi leh tawh lo tih a hrethiam nghal aniang ngawi rengin car atang chuan a rawn chhuk thla nghal vat a .

Ka bul a rawn thlen rual chuan ' I huh vek ang rawn lut rawh ' a rawn ti leh a , in kuangkuah pahin lehlam ka hawi tlat reng tho . 

'Eng nge hetah i tih reng? ' min pawh her pah chuan a ti leh ngat a , ' Motor ka chang ' ka lo ti vin hlur ringawt. 

'Rin aiin meeting kha alo rei a , Minister a rawn kal leh bawk nen thil sawi ho pahin damdawiin kan fang kual a ' ka bula din reng pah chuan a in sawifiah nuah nuah a ,zawh ngai lo a a insawifiah nghal avang hian engthil chiah nge thleng ka hriat theih phah a ,ka rilru pawh a ti nem in a dinhmun tur ka hriatthiam pui a ni mahse rei tak chhung ka lo nghah avang khan ka la lungawi famkim chuang lo .

' Engmah i sawi si lo a ' ka ti leh ringawt a .

' I pu phone number ka nei lo alawm mahse ka hmanhmawh lutuk kan zawh veleh ka rawn kal nghal vat alawm ' zaidam tak hian a ti a . A sawi hi a dik chiah, nichinah pawh khan a rawn tlan chak ka ti reng a ni . 

' Hei ruah a rawn sur belh ania car ah lut rawh , vawt i ti em? ' tih pahin a jacket hak lai chu phalh a tum a . 

' Vawt ka ti lo ' tih hmuk pahin car ah chuan ka luhsan daih a , a ni pawh hmanhmawh takin a rawn lut a , ruah lah chu a sur nghal buan buan lehnghal. 

Ka khua a sik bawk nen ruah do thei ka ni lo tih ka hriat avanga chuang leh mai mai chauh ka ni chumi vang chu nilo se zankhua pawhin motor ka chang duh mai ang .

' Haw hma in chaw kan ei phawt dawn nia ' min rawn rãwn tih hriat nan min rawn en a . 

' Ka ril a tam lo' ka ti zo chiah a , ka pum chu a rawn ri nghal ruk ruk a . Engang pawhin dawt sawi tum teh mah ila ka pumpui hian min phatsan nghal der chu a nih hi . 

Ka duh loh chung tih luih in awmzia a nei dawn lo tih a hriat vang te pawh a niang seat hnung lama a paper bag dah chu a va ban a , ka mal chungah chuan a rawn dah a . 

' Hei hi eng nge? ' nelawm loh zet hian ka ti a , ṭawngkam zaidam taka tih hi ka tum lo . 

' En phawt rawh ' a rawn tih takah chuan a chhunga mi chu ka la chhuak nghal a , artui leh Black Forest pastry pahnih hi ka la chhuak hmasa ber a .Nuih vur vur pah hian ' Vawiin refreshment ka rawn hawn che a nih kha Phullen ah a awm si lo a i ei ve atan ka lo it a ' a ti a , ka lo melh rum ngang mai. 

Phullen ah Black Forest Pastry hi a awm lo a min duhsak avangin a ei ai min rawn hawn tih pawh ka hria mahse an refreshment min rawn hawn avang hian ka lungawi lo takzet . 

A thil tih dan vel hi ka pu nen an in ang chiah , thil tih khawm nikhua reng reng in refreshment a awm chuan ka ei ve atan hian a it tlat zela a ei ai hi min rawn hawn leh nge nge thin . 

'Ka lawm e ' lungawi lo hmel pu reng chung chuan ka ti a , min rawn hawn vang vang avang hian lawm tur ka ni reng a ni .

' A dang pawh ala awm kha ' tih pahin en leh tur chuan min rawn mitmei zeuh a ,a sawi ang ngeiin thil dang pawh alo awm a ka zuk lak chhuah leh nak chuan Chocolate sprinkle donut hi a lo ni a ka hmuh rual chuan ka chil a put nghal zur zur mai . 

Eitur ka hmuh takah chuan tlemin ka mood pawh a rawn zia ve deuh a ruk tak chuan ka lawm in ka hlim takzet a chhanchu hetiang thil hi duh duh huna han ei mai tur a awm loh vang a ni . 

Ka ril a tam tawh bawka Pastry leh milkshake chu ka ei nghal a, ka ziaawm nghal sawng sawng in ka hria . 

 Zan riak thei kan nih loh avangin ruah sur buan buan karah pawh Phullen lam panin a khalh chhuak nghal a la lungawi zan lo mahila pum lam a puar tawh hi chuan thin a chhe reng thei bik lo . 

Kan ngawih rei tawh em avang chuan ka ṭhutna bula Iron man pencil bag melh zeuh pah hian , ' Min lo nghak rei hman em ? ' tiin min rawn zawt a .

' Darkar khat bak lehkhabu lei nan hun ka hmang dawn lo ka tih tawh kha ' tiin ka lo chhang daih thung . A inthiam lo ve deuh aniang min chhang lo in a ngawi vung vung a ,hma lam chu a melh ngar ngar reng bawk . 

Ka ṭhutna nghenchhan nghen ar ar pah chuan ka maimichhin san daih a , vawt ka tih avangin ka in kuangkuah than bawk . Kawng a chhia in ruah a sur nasa bawk sia  ka muhil nghet ngam meuh lo . 

Ka khawsik lah chuan reh a hnek in san lam a pan zel emaw tih mai tur hian min hmet zawi leh vek tawh a , ka taksa te hi a kham ṭhem ṭhum tawh mai . 

A khat tawkin min rawn be leh zeuh thin a ,ka awm a nawm loh em avangin chhan pawh ka chhang ṭha peih tawh meuh lo .

' Iron Man nge i duh GOT7 ? ' tiin min rawn zawt khoh peka , hei erawh chhan loh atan chuan a uiawm mah mah .

Maimichhing chung hian , ' Iron Man fe ' ka lo ti a , ka chhan dan avang hian a nui tih pawh ka hre thei . 

Hetiang zawhna ho lutuk min zawh nachhan pawh ka kawr hma ah leh ka pencil bag lei thar ah Iron man lem a chuang ve ve a , min fiam pahin a rawn ti vel mai mai a nih hi . 

Rei fe kan tlan tawh tih chuan car chu a ti ding ta mai a , men siar siar pah hian , ' Ngatinge? ' tiin ka zawt nghal vat a .

' Ka hrelo , kan hma ah sawn motor chhia a awm a ni maithei ' tia min chhan zawh rual chuan ka maimichhin san leh daih a, in thlen hlan ka nghakhlel tawh takzet . 

Vawt ka ti bawk aniang ka harh leh chuan ka ke chu ka lo hlang chho then tawh a ,Dr Noel jacket ka lo sin ran bawk .Ka mutthilh laiin min lo sin tir a nih dawn hi. 

Kan din leh avang chuan kan hawi kual vela a ngaiah bawk kan lo la ding reng chu niin , thut ṭhat pah chuan kan la din reng nachhan chu ka zawt leh a ,ani chuan lei a min thu leh motor tamtak an tan thu in min lo chhang ta mai a, ka mengphawk nghal kawk ringawt . 

' Kawng a tlang ṭep tawh angem? ' zawh pahin sana chu ka zuk melh zeuh a , darkar khat dawn kan lo ding reng tawh chu niin . 

' Motor an in din thuah hnem tawh lutuk a lei paih fai tur JCB pawh a rawn lut thei lo, sawhdur nen an paih a ni awm e ' tiin min lo chhang heu mai a , a mangan thlak takzet . 

' Ka nutei alo mangang tawh viau ang ' tiin ka phun zui sep a , ' I nutei pawh ka hrilh tawh , ruah hi han bang se ka va en leh a nge' ala ti ang deuh deuh a , anih chuan ka mutthilh hlan in alo va en hman a ni maw ! 

' Ehe...ilo va chhuak hman e law? i kawr a hnawng vek hi i damlo anga sin ' tiin ka hau nghal bawrh bawrh a , engmah tih theih a nei awm tawp silo a lo va en vel kha a tul lo hrim hrim . 

' Ruah sur loh laiin reilote lei ka va paih pui lawk alawm ' ala ti zui , ka tih ngaihna hrelo chuan ka melh rum hrep ringawt . 

' Saitual ah let leh ila kan kal thui tawh viau em ? ' mut ka chak tawh em avangin ka zawt ta ringawt a .

'Thui tawh mahse motor hi a che sawn thei tawh lo motor lian in min rawn din hnan vek tawh ' a ti a , a manganthlak takzet . 

Anih chuan zanin chu hetah kan riah mai angai dawn a ni maw . Inah thlamuang deuha mut ar ar ka chak tawh asin mawle . 

Kan tan rei hmel sia tiin mutthilh leh chu ka han tum a mahse a vawh em avangin ka muhil thei tawh miah lo lehnghal. Khawsik nen ruahsur nen a tawpah phei chuan ka vawt ti lutuk chu ka khur nasa lutuk a ka thi dawn ta mai emaw ka ti hman hial .

' I ṭha maw ? ' tiin Dr Noel ngaihtha lo chuan min rawn zawt ta nge nge a , ka khurh nasat em avang chuan ka pang chu a rawn dep nghal vat bawk. 

' I khawsik i tlun a nih hi ' chiai miah lo hian a rawn ti a , zinga damdawi min pek  ang bawk kha min eitir leh nghal a mahse vawilehkhat a reh nghal duak thei a nih loh avangin ka la khur nasa hle . 

Keimah chauh chuan ka inti lum zo bawk si lo , blanket emaw han in tih lum belhna tur mai a awm loh avangin Dr Noel tih ngaihna hrelo chuan a mal chungah zo zet hian min rawn suan phei ta ringawt a , nghet takin min kuah tlat bawk . 

' Ka duhlo chung ka khur zel sia ka thi dawn a niang a?'  hetiang hian ka la awm ngai loh avangin ka zawt ta ringawt a . 

A taksa lum ngheng in a awmah chuan ka bei hle hle a , nuam ti viau tur ka nih laiin tlun chung chuan nuam tih chu sawi loh hrehawm ka ti takzet . 

' I khua a sik na a rei tawh em? ' tia min rawn zawh chuan ka lo bu nghat a .

'Chhun aṭang khan ' ka tih leh phei chuan a inthiamlo lutuk chuan a aia nghet hian min rawn kuah leh a , min khawngaih deuh aniang ka lu ah a rawn fawp zeuh ringawt . 

@remruati_haylor

Read More

Dr Noel 2 - 17

 CHAPTER -17 

“It hurts, and I cannot fathom the reason why you hold my joy so much in your hands.”

Ka insiam zawh hma hma chuan ka nutei lah chuan Dr Noel ten min lo nghah reng tawh thu leh hmanhmawh turin min lo tur leh sek tawh a . Ka sam lah hi a kir chi alo ni bawk nen, a pheng in a la huh deuh chuap a , ka awm a nuam lo bawk nen thin hi a rim tun thei nia mawle . 

' Sumo dangah ka kal mai ang ' ka thinrim chuan ka ti hmuar hmuar a , ka lo hahchhiau ve sek lehnghal a ,engkim hi ka ning vel vek .

' A rualin tlaiah i rawn haw lehnghal thei a chu bak bak a ṭha a awm lo .A dil mah zahthlak in ,a lo phur duh che hi lawm hle tur kan ni asin . ' ala ti ang deuh deuh a .

' Min phur turin ka ti hleinem, ngatinge i lo va dil thawt thawt a ' ka ti pung pung a .

Ka nutei hian Dr Noel nen kan inkar engmah hrelo in thil hi alo ti zung zung zel , ka duh a ni tih hi hria phei sela chu a zak lutuk anga Dr Noel hi a biak ngam tawh pawh ka ringlo . 

' Kha i bag hi ak la , pawisa pawh ka dah vek tawh . Lo kal rawh , an nghah reng tawh che saw ' a rawn ti leh a .

' Ninawm' ka lo ti vin hlur ringawt. 

Pawnah min nghak reng tawh a , min nghah vek tawh hnuah ka chuang duh leh lo tih chi lah va ni suh . Hmanhmawh takin ka nutei nen kan in zui chhuak hlawk hlawk a , ka tum dan angin thil a kal lo bawk nen ka thinrim lutuk hi ka mittui a tling thei hial nia mawle . 

Dr Noel nen kan pahnih chauhin kan kal dawn emaw ka tih laiin nula pahnih leh pitar pakhat hi an lo chuang reng tawh a . Damlo Saitual damdawiin a kal tur an ni lehnghal in a lang . 

A seat hma ah chuan pitar chu alo ṭhu ran tawh a ,a hnungah ka chuang dawn hlauh a ka lawm ru ang reng hle .

Dr Noel chu en pawh en lo in seat hnung lam chu ka pan nghal chat a , ka awmdan aṭang hian a lakah ka lungawi lo tih hi a hriat ve vek ka ring . 

Ka nutei chuan car a ka luh lai chuan ' Noel ilo ngaihsak deuh dawn nia aw ' a rawn ti lehnghal a , a rukin ka lo ip chawih mai . 

A seat hnungah chuan phur lo zetin nula pahnih te bulah chuan ngawi rengin ka ṭhu ve ran a , ka bula thu zawk hi a zun an siak danah a damlo ber chu a ni tih hrilh ngai lo in ka hrethei nghal  . 

Ka nutei chuan Dr Noel bulah chuan min lo ngaihven deuh turin a chah nawn mawlh mawlh renga , engmah sawi lo mah ila ka nutei kan tlan chhuah san takah chuan ka thawveng nghal huai thei . 

A hma a chuang pitar chu a titi nghal mawlh mawlh a , a khat mawi tawkin Noel chuan alo zawm ve leh zeuh thin a , a bak a hnung lama ṭhu te erawh thehmeh ang hmak kan ni . 

Ka hritlang dawn a niang ka tih tawh kha a khat tawkin ka hahchhiau deuh renga , eng ang pawhin in hup in lehlam hawi thin mah ila ka bula mi te hian min ning deuh nge kai ve an hlau pawh ka hrelo an lawm vak lo in ka hria . 

Hahchhiau chu sawi loh zing ah thingpui chauh ka in bawk nen ka rui deuh bur lehnghal a , a hrehawm takzet . Ka lo chuang ve ta kher kher hi ka inchhir leh hnuhnawh viau. 

Ka bula ṭhu te lakah ka inthlahrun avangin  ka hahchhiau tur pawh ka insum ṭang tang reng a , a tawpah phei chuan ka insum thei tawh lo chu ka hahchhiau nghal tuarh tuarh a, ka bula ṭhu damlo nilo zawk chuan , 'Damlo an awm ve reng hi insum ve la ' tiin min rawn khak zui kher a , chhanglet lo turin ka sehruh nghal tun ringawt . 

Ka rilru te te chuan a samah te keh a , a hmaia hnek pawp pawp te hi ka chak takzet mahse ka chakna chu ka tipuitling hlei lo a . 

Kawng chanve aia thui kan thleng tawh tih chuan ka luak chhuak lutuk rei tak ka lo insum tawh chu ka insum leh thei ta lo .

' Ding rawh , ding lawk rawh ' zah pawh dawn lo in ka ti nghal chul a , ka ṭawng zawng ringawt pawh hian ka uak lo chauh tawh . 

Car a din rual rual chuan ka tlan chhuak nghal vat a , kawng sir hnim lai deuh ah chuan ka va inbun ruak ta nghek mai a.Nizanah ruah a sur bawk nen kawng diak in ka pheikhawk thar pawh a ti berh vek .

 Ka uak tuarh tuarh lai chuan Noel an ka chal chu min rawn dawm sak nghal vat a , ka zak lutuk hi khuk ral chem chem ka chak. 

'Tui hi i in duh em? 'a rawn ti a , uak tuarh tuarh pahin a bottle ken lai chu ka chhuhsak pawp a ,an bulah khan ka chuang peih tawh lo takzet . 

Nidangah motor ka rui ngai si lova , tun tum chu chaw ka ei loh bakah ka damlo ve deuh bawk nen engkim hi a kal fuh lo vel vek . Ngatinge Noel awm lai kher kher in ka ruih le; ka va han vanduai bik thin tak .

' I pang a lum a nih hi ' tih pahin ka pang chu a rawn dep tha leh ngat a, a kut chu ka lo ben thlak sak vat thung. 

' Ka ṭha ' ka lo ti vin hlar a ,a chungah ka la lungawi lo a ni tih a hriat rual chuan a thaw chhuak hawk ringawt .

' Kan thleng ṭep tawh , thlen veleh damdawi kan lei dawn nia ' a rawn tih leh pawh chuan kawng sirah chuan ka ṭhu lui tlat a , ' ka chuang peih tawh lo ' tiin ka lo chhang hmuk a . 

Min rawn kaih thawh a tum pawh chuan ka che sawn duh eih lo , khami te bula chuan leh ai chuan motor dang lo phar pawh ka thlang zawk . 

' Tikhan i ṭhu tung nileng dawn em ni ? ' hahthlak min tih hmel zet hian a rawn ti a .Chhang lo in hma lam chu ka melh ngur ngur ringawt . 

Chutia kan ngawih dun reng takah chuan a tih ngaihna hrelo chu kal mai ta lo chuan ka bulah a rawn ṭhu ve ta ringawt a, min kalsan chu a tum loh hmel hle .

'Reilo te bak a ni tawh dawn lo ' a rawn tih rual rual chuan , ' an bulah khan ka chuang peih tawh lo ' tiin ka lo pawt chat vat a . Ka dinhmun ah hian ding ve sela chu a chuang peih tawh bik hauh lo ang . 

' Anih chuan ti hian ti ang an vai sawn kan chhukthlak tir vek mai dawn em ni ? ' tiin min han thlem leh rih a . 

' Mahse damlo kal pawh kal ṭha thei lo a awm saw ' lungawi lo deuh chung chuan ka ti a .

Chhuk thlak tir vek se tih hi ka duhthusam a ni mahse damlo kal pawh kal ṭha thei lo motor dang phar tir leh tur khawpa rilru chhia ka ni bik lo . 

' Ni chiah e , damlo saw kan chhukthlak tir daih thei lo . Nangpawh i damlo a kan hnutchiah daih thei hleinem che ' a rawn ti takah chuan ka ngawi renga , a ruk chuan a sawi dik ka ti angreng hle . 

' Kal ang le darkar 1 pawh a ni tawh dawn lo ' zaidam taka a rawn tih leh takah chuan ngawi rengin ka in ngaihtuah vung vung a , ka bulah chuan dawhthei takin alo ṭhu ngawi ve reng bawka ka chhan hun a nghak a ni zawk mah ang chu .

Mipa dang ka ngaihzawng te pawh nise min vin phar leh hrep tawh ang , chu chuan min ti luhlul zual anga intihthiam lohna a thleng leh ngei ang mahse Dr Noel hi chu a ni ve lo . Meeting an neih dawn avangin a hmanhmawh tih pawh ka hria mahse dawhthei tak leh zaidam takin min thlem a , min thlem thiam bawka ka rilru a ti nem in ka ngaihdan pawh min thlak tir chiang hle. 

A tawp a tawp ah chuan , ' Lo va kal rawh , ka rawn kal ang ' ka ti ta nge nge a, ka rilru ka thlak takah chuan a nui nghal vur vur a , ' Kan lo nghak ang che ' tih pahin ka bag chu min rawn laksak daih a ,ka kal loh a hlau aniang .Ka bag keng chung chuan car awmna lamah a phei nghal a . 

 Damlo damdawiin a kalpui ngai a awm a ,a ni in emergency meeting a nei dawn bawk a chutiang karah chuan midang lo tih khaihlak ve reng hi ka duh bik lo a ni . 

Thawk hak pahin ' A rei tawh dawn chuang lo ' tia mahni leh mahni in hrilh sep sep pah chuan car lamah ka let ve leh a , an bula va chuan leh pawh hi thih hreh in ka hreh tawh a ni . 

Ka chuan na ngaiah bawk chuan chuan leh ka han tum a mahse ka ṭhutna ah khan  ka hma a chuang pitar kha a lo thu daih a , a hma seat chu an lo dah awl ve thung a. 

' Mami i rui bawk sia a hma ah khan ṭhu tawh rawh ' a rawn ti ta mai a . Mak ti deuh chung hian Dr Noel chu ka va melh a , min lo nuih vur vur ringawt . 

Noela hian an bulah ka chuan hreh tawh zia a hriat avang khan hetiang hian alo ti a niang bakah engmah hrelo angin awm mahse ka bula ṭhu nu in min tih dan te leh ka hahchhiau nasat dan te kha alo hre ve leh vek aniang. 

' Ka pi angai hleinem, hetah pawh hian ka ṭhu thei reng alawm ' ka inthlahrung leh hnuhnawh chuan ka ti a , a ruk chuan an bula ka ṭhu tawh lo tur hi ka lawm takzet . 

Noel chuan ' Hetah hian lo ṭhu rawh ' tih pahin a ṭhutna atang chuan kawngka min rawn hawn sak a , hnial buai lo in ka lut hmak a. 

Kan tlan chhuak chiah tih chuan ka bag chu min rawn pe let a .

' Vawt i ti em? ' tih pah hian tissue paper hi ka mal chungah chuan a rawn dah a , vawt ti mah ila ka lu chu ka lo thing ta zawk a .

Tunah chuan tissue paper a awm ta bawka thlamuang takin ka hahchhiau thei tawh ang . 

Ka khua a lo sik ve ser ser bawk nen ka vawt ti chuan in kuangkuah than chung hian a seat hnung chu maimichhin vang vang pah hian ka ngheng ar ar a , ka thla a muang ta bawka rei lovah ka muhil nghal mai bawk a . 

Motor a din rual chuan ka han meng siar siar a ,in ka hmuh takah chuan kan thleng tawh tih ka hre nghal .

Zik mar pahin ka han ṭhu ngil vat a , Dr Noel jacket ka lo sin reng tawh chu niin . Chutah hnung lam ka han hawi leh a , tumah an lo ṭhu tawh miah lo .

Mak ti takin Dr Noel chu ka en nghal hu a , ' Khawiah nge an awm vek a? ' tiin ka zawt nghal vat a. 

' Damdawiin ah ka thlah tawh , kha damdawi hi ei tawh ' tih pahin tui leh damdawi hi min rawn pe a . Damdawi a lei lai chu sawi loh damdawiin kan thlen lai pawh engmah ka hre lo . 

' Kan thlen na a rei tawh em ? Engmah ka hre lo reng reng ' thophang aw zet hian ka ti ṭuau a ,ka hrawk a na bawk nen ka aw te hi a lawi vek in ka hria   .

' I mu tui lutuk a i harh thei lo alawm ' a ti a. 

Hnial miah lo a thuawi taka damdawi ka ei lai te chuan nuih vur vur pah hian min lo en reng a ,a nel awm loh thin tehreng nen a nui a nui ve ta mai . Ka hmuh tirh kha chuan a hmel en ringawt pawh khan chhungril ah lungngaihna nasa tak nei leh nui ngai lo hmel kha a pu reng thin a , tun hnai te aṭang khan a nui hmel hi ka hmu ka hmu ve ta mai a ,keimah zawk zawk hian nuam ka lo ti a ni . 

A meeting neih na tur ah tlai ṭep tawh mahse chaw ei lo a min kal tir a duh loh avangin ka chaw ei peih lo chung chu chaw min ei luih pui a , ka eina man min la pek sak vek zui . 

Ka kalna tur bookstore hi Keifang ah daih a awm avangin chumi thleng chu min thlah leh thlap bawk a engmah sawi lo mah ila a lakah hian ka inthlahrung ru takzet . 

Zingah keimah min nghah avangin kan chhuak tlai tawh a , ka tihtauh avangin rei tak kan ding bawka , motor ka ruih avangin a khalh muan phah a chutah chaw ka la ei loh avangin a khawmuang leh a , keimah vang bawkin Keifang ah min thlah leh angai bawka ka inthlahrung lutuk hi hrehawm ti lo angin ka awm ta vel mai mai a . 

Bookstore ka thlen rual chuan , ' Kan meeting rei dawn lo a , hetah hian min lo nghak dawn nia ' a rawn ti a , hetiang thil a sawi hi ka rin lawk loh lutuk avangin mak ka ti angreng hle . 

' Lehkhabu lei ringawt a nia , ka lei zawh veleh motor ka chang thei reng alawm ' aw ti ta mai lo chuan ka lo hnial a .Lawm tur ka nih laiin ka ti lang duh bik ṭhak lo a chhanchu chhan awm lo a min vin avang khan a lakah hian ka la lungawi tlat lo a ni . 

'Kan haw rual dawn nia ' a rawn ti leh ringawt a ,'Darkar khat pawh lehkhabu lei hian hun ka hmang dawn hleinem, ka zawh veleh motor dangah ka haw anga a awlsam daih zawk alawm ' tia ka chhan leh takah chuan a hrethiam ve ta a niang .

En pawh min rawn en lo hian , ' Ka tihpalh ' a rawn ti ta nge nge a ,thupha chawi a hreh hmel em avang chuan ka lo hrelo der tlat a.

' Engvang chuan maw? 'mak tih hmel zet hian ka lo awm vel a . 

'I hriat reng kha bakilh avanga ka vin avang che khan' a rawn ti leh a ,ka tih ngaihna hrelo chu ka lo nui der hak hak ringawt . 

' Haha .... awi a ho lutuk khatiang mai mai te chu ' tiin ka rilru ang lo deuh chuan ka lo chhang leh ang lawi a .

Chiang zeta min rawn en pah hian ' A ho lo aniang chu i lungawi loh rei em hi' tiin min rawn chhang leh khoh peka , a sawi dik lutuk a chhan leh ngaihna pawh ka hre tawh lo .

' Anih chuan ka lo nghak ang che ' tih pahin chhuah nghal daih chu ka tum a mahse ka sam kir bip bep pheng zet chu a seat belt chuan a lo kai hman peka , min pawt dak awrh mai .

'Zawnga... a na lutuk ' ka tum loh deuh in ka  ti nghal thawt a .Hetiang ṭawngkam mawi lo lutuk hi ka kã aṭang hian alo chhuak leh thut thin. Ka nutei awm phei se chu kei ai pawh hian a lo zak leh zawk ang . 

Ka sam chu rang takin min rawn phelh sak nghal vat a , ka chet chhiat em avang chuan ka chhuah rual rual in kawngkhar chu ka khar nghal vat a .Chutah ka zah tih belh chhah turin a glass up pah hian min rawn nuih a 'Zawnga hi min lo nghak reng dawn nia ' a tlan chhuah hma chuan a rawn ti leh hram a ,a tlan liam lai thlir liam vung vung pahin ka in siam chhe nghal mawlh mawlh ringawt . 

Read More

Dr Noel 2 - 16

 CHAPTER - 16 

🎼The way you hold me, 

     Feels so holy. 

Ni thum a ral hnuah pawh Dr Noel an chhan pawh awmlo a min vin ringawt avang khan a chhungah ka la lungawi thei lo , ka ngaihtuah chhuah apiang in min ti thinrim zual a , ka tlawm lak takzet a ni . 

Ka lungawi loh lah hian a ti lang kher chi leh ngeiawm thiam tak ka lo ni bawk nen damdawiin a ka kal chang pawh hian ka hmu lo der hmak hmak zel a , hetiang khawpa mahni in duh tawk leh luhlul ka ni chung pawh hian Dr Noel lakah hi chuan ka titau tak tak thei thin lo. 

Ka pu nen chhun thingpui kan lo in lai chuan ka nutei chu parcel pawm chung hian a rawn lut a . A thil pawm chu eng nge a nih kan lo zawt vat a . 

' I u Sangsang'in thil a lo thawn che a nih hi ' a tih rual rual chuan ka ṭhutna aṭangin ka tho nghal vat a , ka nute'in dawhkan a a dah rual rual chuan parcel chu ka hawng nghal rawk rawk bawk . 

Ka u Sangsangi hi ka nuhrawn fa hmasa a ni a ,  min duat in engkim ah min duhsak thei em em a, nau hmeichhia keimah ang rual ka pa fa diktak a nei nachung in a nau aiin min duat zawk emaw tih mai tur a ni .

Thisen ah inzawmna engmah nei lo mahila min duat em avang hian Carolyn-i ù Sangsangi an ti deuh kher thin a ni  . 

U Sangsangi nau RZ-i nen hian inmil vak lo mahila uSangsangi erawh hi chu ka nutei tih loh ah chuan he khawvela min hmangaih ber tu leh min duat ber tu tiin ka chhal ngam hial a ni . 

Parcel ka hawn rual rual chuan Tshirt a hma a iron man lem chuang ngei mai chu chu ka phawrh chhuak hmasa ber a , ka amazon cart a ka lo dah tawh a leina ka neih leh tak loh kha a ni lehnghal a , ka lawm lutuk hi uite vawihkhum ang maiin ka phi cheng mai . 

Mite chuan Korean idol leh actor te an atchilh luai luai laiin engatan mah ka ti ve lo .Keichuan Iron man te , Thor te,Captain America te hi ka duh em em a , a bik takin Iron man phei hi chu ka duh lehzual . A movie chhuak thar a awm pawhin pawisa ka khawl a , ka lei ngat thin a ni. 

' Awi .... hmanah he kawr hi ka duh tih uSangsangi ka hrilh kha alo la hre reng a nih hi ' tih pahin ka pu chu ka hmuh a , ka hak chhin lai te chuan ka pu pawn min lo lawmpui khawp mai . 

' I uSangsangi hi chuan a duat ngawt mai che , thil pawh hi a rawn thawn ngun tawh che in ka hria.  Chawhmeh la zuk thawn ve tur a ni ' ka pu chuan a ti a .

 Ka nutei pawh chuan , ' Ani te chu doctor ania , a hlawh teuh ang chu . Fel bawk , hmeltha bawk hlawh tam bawk a vannei bik ngawt mai ' alo ti siam siam a . Ka nuhrawn Nu Tlani a huat tehreng nen uSangsangi erawh hi chu a fak bang thei dawn lo a nih hi . 

U Sangsangi hi ruh lam doctor a ni a tunah hian Civil Hospital ah a thawk mek a ni . A smart in a polite em em a , amah aṭang pawh hian ka inzir nasa in ka tet lai phei chuan amah nih hi ka chak ber thin ; chutiang khawp chuan ka ngaisang a ni  .

Tshirt chauh nilo thil dang pawh min rawn thawn tel a ,a chhunga box dang lo awm chu kan hawn nak chuan ka rin loh lutuk thil ka zuk hmuh thut avang chuan ka meng phawk deuh kawk a, ka nutei chu ka han melh nghal vat bawk . 

' Ehee .... Sneaker a nih hi' a rawn ti sep a .Ka nutei hian ka awh thin zia a hria a , min rawn thawn chat hi mak a ti niang . 

' Heipawh hi Nike Sneaker ka awh deuh kha a nih hi ' tih pahin ka la chhuak nghal vat a . A to tih ka hriat ve reng avangin bun pawh ka bun chhin phal lo . 

Ka neih phak pawha ka rin ngai loh , a ruka ka lo awh thin em em ka nutei pawh ka dil ngam loh kan nei ta mai hi han react vak ngaihna pawh ka hrelo , chhungril ah hian ka hlim veng veng a , bun hlan mawlh ka nghakhlel. 

USangsangi chu lawmthu hrilh tumin ka call nghal vat a , a buai deuh nge ni phone a la thei leh tawh lo . A thawkrim bawka buai loh lai pawh a neilo a nih hi . 

' Engpawh chu nise Noela alo buai palh ang ,ka let leh vat angai  .Heng ho hi va dah fel la , Grace-i awmna tur quarter kha phiah fai angai dawn a ruah sur hma hian lo va ti vat vat rawh aw' ka nute'in a tih chuan , ' Sweeper pawh ka ni hleinem , ngatinge mi thar an rawn awm thar apiang  hian quarter tifai turin min tih bik zela ' ka lungawi lo chu ka phun zui nang nang a .

A tifai tur Pu Rama pawh a awm reng a mahse ka nutei hi lo awm senior tawh a nih avangin a tlawmngai hian mi awmna tur hi alo tihfai sak turh turh thin a , tunah phei chuan a buai thin em avang hian keiman ka ti vek tawh thin . Hei tunah pawh ti turin min tirh leh tawh hi . 

' Vawiin chiah lo han ti leh lawk mai rawh , kan tihfai sak loh in midang ti tur an awm loh hi .... i fel em kha . ' min pak ti tih a ,ka tihtauh a hlau aniang .Ka tihtauh vaih chuan ka ti fai leh duh dawn si lo a . 

' Hei bak hi chu ka ti tawh dawn lo a nia , an tirhkah pawh ka nilo ' ka ti a , ka tlawm lak na a rei tawh a mahse ka nutei ka khawngaih avanga ti mai mai chauh ka ni . 

'Naktuk ah Saitual ah min kalsan daih dawn kha,i pu in angai awm che' min fiam pah hian a rawn ti vela .

' Zan ka riah i phal loh kha aw .Tlaiah ka rawn haw lehnghal angai dawn bawk sia , ka chau viau ang ' ka lo ti ve bawk a  . 

Karleh ah sikul kan luh tawh dawn avangin lehkhabu lei turin Saitual a ka kal ngei ngei a ngai tawh a , sumo ah ka bet thla dawn lehnghal a ka phur lo takzet ;chutah ka la lãng dawn zui . 

' A hla hleinem Motor a awm hma phei chuan ke in an kal mai mai alawm , damdawiin ah ka va kal leh lawk ange Grace chauh a awm sia a lo buai lutuk ang  ' tih leh chhuah a rual a . 

Tei leh Awmtea te rualin kal phal ve mai mai sela tha tur a nia . An ni chu karleh lamah muang changin an kal anga kei ve thung chu ka nutei hian min nawr lui chung chung zel . Nikum lamah pawh lehkhabu lei turin Saitual ah kan kal ho tawh a mahse zu kan ruih haw avangin ka nutei hian kal rual a phal tawh lo a ni . 

Phur lo zet chungin hmunphiah nen uGrace-i quarter phiat fai tur chuan ka in kap chhuak leh hna hna a, ruah lah chu a rawn sur tan der tawh lehnghal a engkim hi a fuh lo vel vek . 

Quarter ka thlen hma hma chuan ruah chu a rawn sur nghal buan buan a , hmanhmawh takin ka tlan phei nghal hlawk hlawk bawk . Ka phiat fai zung zung  anga ka let leh vat ang chu ka tih nak alaiin Pu Rama chuan tukverh alo la vuah mek a , tukverh atangin inchhung ah tui a luh theih vek avangin puih loh theih pawh a ni lo . 

' Ka-te lo ti duh suh ka zo vat mai ang ' a tih pawh chuan ka lo ṭangkai ve tak mialin tiin ka lo va vawn pui a . Ruah a sur hnem bawka ka huh nghal vek . 

Ka rin aiin kan rei ta phian lehnghal a , kan zawh meuh chuan ka huh nasa lutuk a ka kawr phei chu a sawr theih.

 Huh far tluk tluk chung chuan inchhung a tui lut ho chu ka hru hul kurh kurh a , ka tih zawh veleh inchhung pum chuan ka phiat fai leh vek bawk a , ka vawt ti chu ka khur ka khur tawh mai .

' Ka-te , i hmui pawh a duk vek tawh a nih kha . Nihliap hi la la lo va haw rawh ' Pu Rama chuan a ti ta ringawt a , mahse lo va hawsan daih chu ka tlawm lak ve leh tum hrang a , darthlalang a vuah zawh thleng chu ka awm ve ta ṭhak a . 

Pu Rama nihliap ka hmang ta sa sa ruah ala tla nasa bawk nen haw pahin ka nutei ka sawm kawi a , damdawiin pawh nidang ang lo takin vei nuk nuk tham an lo awm ve tawh a , a reh duk thin avangin mak ka ti mai dawn alawm mawle . 

Ka nutei zawn pahin Dr Noel office chu ka kal pel a , second 2 vel lek mah nise a office ah a awmlo tih ka hmu nghal .

Ward a fang emawni le ? 

Ka nutei chu haw chu sawi loh alo la buai hle a , damlo an tam deuh nge ni a phe vut vut reng mai . 

' Bawihte chaw min lo ei san mai dawn nia '  tray a bungrua rem mawlh mawlh pah chuan a ti a .

Dr Noel rawn awm hma pawh khan a buai sa tawh tehreng nen a rawn awm hnuah phei hi chuan a ni telin damlo an pun belh zel bawk sia a hma aiin a hah lehzual in ka hria . Doctor a rawn awm anga a hahdam ve tawh ang chu kan lo tih laiin a hma aiin hun awl a nei tlem zawk . 

'Chaw rawn ei zawk la i kal leh mai dawn lawm ' a buai tih hre reng mah ila amah ka ngaihtuah avang chuan ka ti a . 

' Ei dawn e , kha i huh vek lehnghal lo va haw la va inthlak vat rawh i damlo ang chuan heihi tihfai turin i chawi phei nghal dawn nia ' tih pahin tray chu min rawn pe a , a buai bawk aniang inthlak la , lo va in ti lum rawn tih pahin min chhuahsan nghal a . 

Thawhnaw huh far tluk tluk nen tray chawi chung chuan ka kal hnak hnak a , hetiang chung hi chuan Dr Noel hmu lo ila ka ti takzet . 

Bungraw tihfai na room ah chuan Dr Noel leh Nurse thar Grace te chu an lo awm dun a , engmah ti lo mahse ka hmuh dun thut avang chuan kawngka zawnah ka ding chut ringawt . 

An pahnih chuan min rawn en zuk a mahse an thil tih lai chu an chhunzawm lehnghal mawlh mawlh a . An thil sawi aṭang hian bungrua an en fel tih ka hre thei . 

Ngawi rengin ka lut a , hmanrua ka dah fel lai te chuan an awmdan chu ka mitsir reng a .U Grace'in Dr Noel ban khawih kher paha a nuih lai te chuan ka lo inseh ruh ve em em ringawt .

Mi thikthu chhe lo lutuk leh ka ngaihzawng te pawh ti lungawi lo khawpa thikthu chhe ngai lo ni thin kha ka thikthu alo chhe hle a ni tih ka in hre ve chiah . An pahnih a ka hmuh dun ringawt pawh hian ka thin a rim in va pawh ṭhen sawk te nia ka duh tawh ni . 

Ka thil rem te lah chu ka dah sawk sawk a , thawm eng ang pawhin nei ring mah ila vawikhat pawh an rawn hawi phei lo . Chu chuan min ti lungawi lo zual a , an rawn hawi ka duh luatah forcep pakhat chu chhuatah ka la thlauh zui . 

Forcep meuh ka thlauh takah chuan an rawn hawi rang teh e , damdawiin bungrua a zawnga tih thianghlim ngai leh uluk ngai alo ni kher bawk nen Dr Noel pawh a rawn ṭawng chhuak ta nge nge alawm . 

'Fimkhur rawh ' a rawn ti chang fak a . Thu tam sawi lo mahse a rawn rik chhuah dan leh a hmel dur khup hian a sawi tam em em tho . 

' Ni e , khatiang te chu thlauh chi pawh a nih loh kha , a thianghlim lo te chu engtin nge kan hman theih tawh anga ' Grace in alo ti ve kher bawk nen ka ngawi reng duh ta bik lo .

Grace-i melh reng pah hian ' A lehpek ah chuan ilo dah tha ve tawh dawn nia ' ka ti hmak a , Dr Noel en leh kher pah chuan forcep chu tray ah ka nghat chawrh a , ka chhuak nghal nal nal bawk. 

Tunah kher kher kha chuan ka dik bik lo tih ka hria . Damdawiin bungrua reng reng hi sorkar atanga an dawn vek a nih avangin neih a harsat zia leh Dr Noel an a dimdawi zia pawh ka hre vek mahse ṭawngkam tha takin min hrilh theih reng laia khatiang zawnga min tih avang khan ka runlui lo thei lo a ni . 

A tuk zingah chuan Saitual ah ka kal dawn avangin dar 6 rik hma in ka nute'in min rawn kaitho a,nimin tlai ang lo takin khua a thiang in khua pawh a dur lo a, boruak a nuam em em lehnghal. . 

Niminah ruah ka do mai bakah nizanah sam huh chungin ka mu leh bawk nen ka tho rit bur a ,ka lu a na ngut ngut bawk . Ka hrawk a thip in ka hahchhiau deuh reng a , ka nutei hlauh ang ngeiin ka hritlang dawn tak tak a nih hi . 

Ka pu in thingpui min lo siam sak diam tawh a . Awm nuam lo hle mah ila engmah sawi lo in thingpui chu ka in nghal a , ka khua te hi a sik dawn in ka hria . 

Chutia thingpui ka in laklawh lai chuan ka Nutei chu a rawn lut , ' Bawihi i kalna tur sumo kha Chanphai lama kal turin an hire daih a mahse vawiin ah Noel-a Saitual ah a kal dawn hlauh a , a rualin i kal ve nghal dawn a nih chu ' a rawn ti ta mai a , ka thil in lai ka phuh chhuak ṭep a ni . 

' Eng nge a tih ve dawn ? ' tiin ka lo zawt nghal vat a .

' Health Minister a rawn kal dawn a , Saitual district a Medical office ho emergency meeting a ko thut a chutah chuan a kal ve dawn a . In vat vat la insiam vat rawh an rawn sawm tep tawh ang che' ala ti ang deuh deuh a . 

' Mahse chaw hi ?' 

' Keifang velah i ei mai dawn nia ' ka nutei chuan alo ti sam et a . 

 

Ka nute in min tur nasa bawka ,ka in phih fai zawh veleh ka insiam nghal a , uSangsangi min rawn thawn sneaker leh Tshirt chu ka ha bawk a nalh ka in ti ngang mai . 

Read More

Dr Noel 2 - 15

 CHAPTER -15 

“If you want me falling for you, then you have to give me something worth tripping over.”

Damlo ka en karlak ah pitar phakhat kum 80 bawr vel ,eng eng emaw vanga rawn in entir tawh chu a rawn in hawl lut hlawl mai a , helai ah hi chuan Aizawl angin dan hi a siam tak tak theih loh . In entir an awm loh hlek hi chuan duh duh hi office chhungah an rawn lut leh mai thin .

 Kan chhangchhe thin khawp mai . 

' Ka pi lo ṭhu rawh ,Eng nge ni ta?'  a in entir tawh na card hlui en pah chuan ka ti a . 

'Englo a nia eee... ' tiin bul a han ṭan phawt a .

' Rawn in entir tur pawh ka ni lo mahse hei in entir na lehkha hlui ken ziah tur i tih avang khan ka rawng keng ta tho a .Ih e...Ka beng na ,tur ut ut mai ka rawn entir tak kha hei a dam ta hmiah mai a , a tih zia tak tak a ni ' a beng a ṭhat tawh loh avangin ring leng lawng hian a ti a . 

' Ka damdawi chawh che kha i ngeih aniang 'a tawng aia ringin a beng bulah chuan ka ti ve leh a .

'Ni e .. I damdawi min chawh ka ei aṭang khan a dam hmak alawm mahse a tui lo lutuk a tui nen lo chuan ei theih pawh a ni lo ' a ti ta mai a .

A card ka en a eardrop ka chawh bawk si ,a buaithlak thin teh e . 

' Ka pi ka damdawi chawh che kha i ei em ni? ' tiin ka zawt leh a , a ei thu in min lo chhang leh heu mai a.

Eardrop ka chawh a , a benga thlawr tur a nih laia a lo ei daih chuan min ti hrilhhai khawp mai mahse a dampui tho a nih hmel a ,ka hrilh hre duh ta lo a ni . 

Hetiang thil hi ka tawng fo a ngaiah ka nei tawh  .Zu in kulcho pakhat drip khai tur ka chawh pawh buaithlak a tih deuh avanga ORS anga lo in hmiah te , nau tih tlak duh avanga min zai chhuah tir tum te pawh an awm nuk a , a manganthlak thin khawp mai . 

Vawiin zet chu damlo rawn in entir an tam bawka chawlh hahdam na hun pawh ka nei hman meuh lo . Damlo admit ngai leh refer ngai erawh an awm lo . 

In entir tur hnuhnung ber a rawn luh hma in Muan'in (Tetei nau) min rawn call avangin phone chu ka pickup vat a . 

'  uNoel ... uTetei thlan siam chungchang vel kha ilo ngaihtuah tawh em? ' tia min rawn zawh chuan ka bing nghal mup a , Tetei hun hnuhnung ber a nih tawh dawn avangin a thlan siam hi ka la phal lo a ni . 

Kum eng nge maw chen a ral tawh avangin Tetei chhungte hian thlan siam an rawt tawh a , kar hmasa khan lo in ngaihtuah turin min ti a mahse Tetei mangtha tur hian ka la in peih lo. 

Chhang lo in ka ngawi vung vung a , a chhungte hi ka zah in an chungah pawh ka inthlahrung mahse nikhat pawh Tetei theihnghilh lova ka awm lai hian engvang tehlul in nge ka phal ang . 

' uNoel.....eng nge i ngaihdan ? ' a rawn ti leh a , ka rilru chuan phal lo mahse an chhungte lakah ka inthlahrun avangin , ' In thu thu a ni mai ' tiin ka chhang ta zawka .

Kei ngei pawh hian Tetei hi theihnghilh a hma lam pan ka duh mahse a ni telin ka ngaih a zual a , thil ho te te ah amah ka hrechhuak a . Kum engzat pawh ral mahse amah avangin ka mu thei lo a , amah ka hriatchhuah zel avangin ka huat a ho in ka rilru a no sawt em em a , mahni leh mahni ka in kil tawih phah a hetiang tehhrep hian ka la awm zel dawn chu a nih hi . 

' I la in peih lo tih ka hria , ka nu leh pa pawh ka lo sawipui dawn nia ' a tih chuan a ngaih loh thu leh an thutlukna ang ang ka pawm thu ka lo hrilh vat a . A pasal em pawh ka ni lova an thutlukna lo dal tu nih hi ka tum lo .

'Ka nu leh pa ka lo sawipui ang keini pawh kan la in peih hleinem ' a tih tlat avang chuan ka aw ta nge nge a .

Muani pawh hian a ù a ngai in a lung a leng thin em em a , rilru inang pu kan ni bawka kan pahnih hian kan in hnem tawn thin a ni . 

Damlo inentir tur hnuhnung ber a rawn luh rual chuan ka rilru tawt tih ziaawm nan ka thaw chhuak hak a . Ka rilru natna te hi pawn lamah tih lan ka tum lo . 

' Hi ... Noel ' tih pahin ka hma a chiar ah chuan chunu chu a rawn ṭhu a, damdawiin tifai a kan hnatlan ni khan a rawn kal ve nghe nghe a ni . 

'Eng nge i harsatna ? ' tiin polite takin ka lo zawt a . 

'Ka thin zawn hi a na thin a , bakah hna ka lo ngah ve bawk nen zanah ka mu tlem in ka chaw ei te hi a tui lo ' a ti a .

Thil tul dang dang ka zawh kual hnuah damdawi ka chawh nghal mawlh mawlh a , card ah thil ka ziah luh mawlh mawlh lai chuan ka kut chu a rawn hum thut a ,rang takin ka lo la sawn nghal vat a . 

' Ngatinge ka message i reply ngai miah loh a , i seen ngai bawk silo ' a rawn ti a , ka message dawn reng reng ka ṭhian te pawh nise office thil a nih loh chuan ka en ngai lo a ni . 

' Ka lo en tawh dawn nia ' ka ti liam puat a , a hmel hre mah ila a hming pawh ka hre lo a ,a message ka seen phah angem ka hrelo . 

' Ka number kha Evelyn tih in ilo save dawn nia , kan in hmu leh vat dawn nia ' tih pahin a card chu ala a , min rawn nuih ver ver pahin a chhuak nghal a . A chhuah rual rual chuan ka chair hnung nghen pahin ka maimichhing nghal vang vang a,ka thaw nghal huai bawk .

Ka thawhna hlui ah pawh min rawn bia a min duh thu min hrilh tu leh hmaichhan meuh a min hrilh tu pawh an awm nuk a mahse tumah ka bawhzui ngai lo . Tetei awm tawh lo mahse amah ah hian ka la lungawi tawk ve em em a ni . 

Chutia chair nghen ar ar paha ka lo maimichhin vang vang lai chuan kawngka chu tu emaw hian a rawn su ri bur a tudang ni lo in Carolyn ngei a ni . Ka office ah chuan a rawn tlan lut rawk rawk a , ka phu bawka ka meng nghal zawk a .

Henu bula ka awm tawh hi chuan ka khawharna hi a reh nghal duak zel chu a nih hi , hei a rawn rik leh bur bur tawh hi .

' Hei card ....card ka rawn keng ' a hah lutuk chu ṭawng pawh a ṭawng ṭha thei lo , ṭhu tura ka hrilh hma in thawk hlawp hlawp pah hian chair ah chuan a ṭhu nghal a , mak ti takin ka lo en reng ringawt. 

In entir tur reng reng Card neih lo chuan min rawn hmuh ka phal loh avangin card a rawn keng ve ni ngei tur a ni . 

' Ward i fan hma in ka rawn thleng hman hlauh ' a ti ang deuh deuh a. 

'I ṭha maw ? ' ka tih rual rual chuan ka bulah a rawn kal nghal sut sut a , a sam keu nawk nawk pah hian , ' Helai hi engtin nge a awm , ka sam hi a tla kawlh vek tiraw ? ' mangan hmel tak hian a rawn ti a ,thil hlauthawn awm deuh a sawi dawn emaw ka tih laia a sam cheng khat thir tiat vel leka tla kawlh chungchang a nih takah chuan ka hahdam nghal huai a , a awmdan avang hian a rukin ka khi nghal vur vur ringawt.

' Han en chiang chhin teh ' a tih tlat avang chuan sam tla kawlh dang ala awm nge awm lo tih zawngin a sam chu ka keu pui ve mai a, a rukin ka nui ka nui mai . 

' Hei helai te hi a pawng vek , a duk em ? Han khawih chhin teh ' a ti nghal mawlh mawlh a .

Khawih tura a tih na lai ka khawih sak takah chuan na a ti leh sia , chung te chuan ka nuih a ti za zual a .

An insualna ah a sam an pawh tlak sak a , a tukhum hi tlemin a pawng deuh bawka a bak chu hlauthawn awm a awm lo. Mahse na a tih em avang chuan thutak deuh hian ' Na dang ila nei em? ' tiin ka zawt a .

Hetiang a buaina a tawh apiang leh a lungawi loh chan apiang hian mak tak maiin nuamlo tihna ka lo nei thin a ni . 

' Nei lo ka taksa a sil tih loh chu' a ti nang nang a , a awmdan engkim hian min ti nui lo thei thin lo .

' I lu chu hei hian dep rawh ' tih pahin ice bag chu ka la a, a lu chu ka deh sak nghal a .

' A na 'a ti tuarh a, min rawn vin lehnghal hlar tawh . 

A ner nasat danah a lu vun hi a na deuh bik a ni ngei ang . 

' A na lutuk i rawn deh tak khan ' a tih takah chuan rang takin ice bag chu ka la sawn nghal zal zal a , deh luih sak chi a ni tawh lo . 

★Carolyn's pov ★

Ka ṭhiante pahnih an rawn len avangin wai wai chhum ei pahin dawhkan kan kil ṭhap a , kan ṭawng duh hlawm bawka ṭawng kan in chan lo a ni ber . 

' Caro .... school luh a hun tep tawh sia lehkhabu i lei tawh em? ' Tei chuan a rawn ti a , ka la lei bik loh thu in ka lo chhang vat a .

' Science stream ho lehkhabu hi chu Saitual ah lei zel angai a a buaithlak ' Awmtea pawh chuan alo ti ve bawka . 

Sikul kan lut ṭep tawh a , lehkhabu lampang reng reng ka lo ngaihtuah leh tawh lo . Tihian sikul luh dawnah ka buai bik leh chung mai ang mahse tun tum chu buai bik ka tum tawh lo . 

' Enteh Christian-a kha in in be leh tawh em? ' Awmtea hriat chak zawng a ni bawka ,Dr Noel leh Christian chungchang hi min zawh hmaih ngai lo .

' Be zeuh zeuh reng e mahse ka pu phone aṭangin ania , a hit vak thei lo ' ka lo la ti ham ham zui .

' I inthlak sawt ka ti , nidang chu nise i kawp leh ṭin ṭen tawh ang mahse i single rei ve tawh reuh zia hi ' Awmte'an a tih rual chuan Tei pawh chuan alo tuhnih ve nghal a .

 Ka lerh thin zia kei ngei pawh hian ka hria mahse engtik aṭang khan nge ka hrelo mipa tumah hian min hip lo a , ngaihzawng neih chakna pawh ka nei lo . 

Ka ṭhiante an haw hnu chuan ka nute in Dr Noel quarter ah file la tura min tirh avangin phur zetin ka kal nghal a , Dr Noel ka hmuh phei hi chuan Sawm palian-i min kehna ka lu na tur ut ut pawh kha a reh vek in ka hria . 

Dr Noel an file la tura room a a luh hlan chuan chair ah ka lo ṭhu ngawi renga , ka hawi kual vel na ah chuan box dum pakhat hi ka hmu fuh hlauh peka , a chhunga bakilh senno chuan ka mit a la nghal zar bawk . 

' Ve ngei a' tih sep pahin bakilh chu ka la nghal nalh a , ka kut hi ka veng hman thin lo .

'A pink ber kher , tu ta nge le ? ' mahni leh mahni in biak mawlh mawlh pah chuan ka kilh chhin vel a . Engvanga hetianga bakilh pink vet vut hi kawl daih nge maw a nih le ? 

Ka bakilh kilh lai chu lakthlak ka tum lai tak chuan hnung lam atang hian vin zetin , ' Dah rawh ' Dr Noel chuan a rawn ti nghal that a , ka phu chiang kher mai . Hetiang em em a a thinrim hmel hi ka la hmu ngai lo. 

Dah ka tum avanga lakthlak tum ka ni reng sia , engvanga min rawn vin vak kher nge maw a nih le ?

 Sual lutuk . 

' Ka la thla dawn reng alawm ' min rawn vin vak avang khan ka ti let ve ngat a .

Rang takin bakilh chu ka la thla nghal vat a , box a ka dah luh hma hma chuan min rawn chhuhsak pawp ringawt .

' C'mon bakilh mai mai a nih hi ' tih pahin ka nui a , a nuih a za ve lo aniang . 

' Chhuak rawh ' ka ṭawng leh hma chuan a rawn ti ta mai a , min khei nghal zawk bawk . 

Engvanga thinrim vak kher nge a nih , engmah tihsual ka neih awm ka hre bawk si lo. A ngaihna ka hrelo takzet . 

Chhan awmlo a bakilh pakhat lek avanga hetiang tak maia min vin avang hian ka rilru a na a ka lungawi bik lo .

 ' Aw le ' tih pahin ka thinrim chuan a file ken lai chu ka pawh thlak sak ve ngat a . Rum fe a melh ram ram pahin kawngka chu ka nam hawng ṭhuai a ,ka kal nghal nal nal bawk . 

@remruati_haylor

 

Read More

Dr Noel 2 - 14

 CHAPTER -14 

“Dear crush, please just smile at me as I smile inside every time I see you. And you’ll know how much power you hold over me" 

A rawn sawi chhuah deuh thut avang chuan ka mak ti chuan ngawi rengin ka en vang vang phawt a ,'Eng chu maw?' ka lo ti hu ringawt.

Ka chhan dan avang chuan lehlam hawi pahin a khi nghal vur vur a , ka thusawi ho te te pawh hian a nuih a ti za aniang chu min nuih leh ringawt zel . 

' Nangmah i ni tih hi rin ngaihna ka hrelo . Khami tuk , i birthday ni ah khan Tetei ... ' a sawi zo dawn emaw tih laiin a ngawi leh thut a , a sam tuai chhoh pahin chiang takin min rawn leh a , ' khami ni khan kan zawng nasa lutuk che ' a ti ta mai a.

Engkim alo la hre vek a nih dawn hi , ka birthday a ni tih nen lam alo la hriat vek avang hian ka lawm lutuk hi ka tah te pawh a chhuak zawk . Min hriat chhuah chu sawiloh amah hi ka hmuh leh tawh pawh ka rin loh laia hetiang thil a thleng ta mai hi ka mumang anih te ka ring hial .

'Khami ni khan 'ka sawi lai lai chuan ka mittui a rawn tlak dawn takngial  avangin lehlam ka hawi daih a .

 Khami ni kha ka nuna thil thleng duhawm loh ber leh hriat chhuah ka hlauh ber a nih avangin kan sawi chhuah tawh hi chuan ka hnuk hi a ulh leh thin.

 Ka birthday hi ka nu min kalsan ni anih avang hian ka nu ka hriat chhuah loh nan nawm chen mai chu ka thlang ta thin a . Zui ka ruih loh leh engmah ka hriat tawh loh nan mutna damdawi te ka ei hmak thin a ni . 

' Engkim ka chan vek ni kha maw? ' ka ti leh ta zawk a , pangngai takin ka sawi chhuak thei hram a ni . 

'Pawi ka ti lutuk , i nu avangin damdawiin atangin in lo chhuak hman tawh a mahse kan tiam ang che khan lawmsak che kha kan tum tak tak ania ' a ti a , a thu tiam ah a ding lo anga ka ngaih a hlauh vang nge ni  a in insawifiah kher nachhan. Mahse ka awm loh hnuah pawh min rawn zawng tih ka hriat hian ka lawm ru takzet . 

' Birthday.... hahh... Birthday tih vel hi engmah a ni lo ' ka ti hul hak a , ka nu he khawvela ka neihchhun ka hriatchhuah leh avang hian ka hnuk a ulh leh tun tawh . Eng ang pawh a mi tawrhchhel leh luhlul pawh ni mah ila ka nu chungchang kan sawi chhuah tawh hi chuan ka rilru a no in ka hnuk hi a ulh nghal zel chu a nih hi. 

Ka hnuk a ulh tih a hria nge ni boruak tih ziaawm nan , ' Khatih hunlai kha chuan naupang te reuhte kha i la nia ' min rawn nuih pah hian a rawn ti a , za lo zetin ka lo nuih let a . 

Ni e , khatih hunlai kha chuan kum13 chauh ka la nia tunah chuan Dr Noel nen hian lo inngaizawng pawh ni ila kan kum hrelo tan chuan a awm lo hran tawh lo .

' Mahse tunah chuan nula ka ni tawh ' tih chhan nei deuh hian ka ti ve kher a. In nel hmel deuh ang hian han awm ve thin mah ila kan pahnih chauha kan awm tawh hi chuan boruak hi a rit churh reng mai . 

' Nia .... insual ṭhelh ngai rual kha i ni tawh a  ' tiin ka huat tur tingtang in min rawn fiam zui zat a , ka lo melh rum ngang mai . 

Kei lah ta pek chuan engmah hrelo in  ' UTetei kha a dam em ? ' tiin a ex hming lamin  ka rilru a awm ang ang chu ka sawi chhuak phawng a , UTetei hming a rik takah chuan a nui tawp chiang kher mai.

Dr Noel an nupui ala neih loh mai bakah bialnu pawh a nei lo an tih avanga a laka beiseina nei tlat ka ni a . A ni in min lo hnar lo bawk nen ngaihzawng a nei lo turah ka ngai hmiah bawk . Mahse a chang chuan rinhlelh na ka nei ve thin tho tunah pawh hian a awmdan atang hian ngaihthat lohna ka nei nghal . 

A ngawi vung vung a , min chhang tawh dawn lo emaw ka tih hnuah rilru hah tawt lutuk ang mai hian a rawn thaw chhuak huk a , en pawh min en lo hian , ' Va lut tawh rawh , i in thlak vat dawn nia ' ṭha deuh hian a rawn ti leh ang lawi a .

Chutia a mood a rawn off vek takah chuan UTetei hming ka sawi chhuak ta kher kher kha ka inchhir takzet mahse an chungchang hi hriat chakna in ka khat thung . 

Amah berin kal tura min tih miau avangin awm luih na chi pawh a ni tawh lo .

' ahhh.... ka ... ka kal ' tih pahin car atang chuan ka chhuak zal zal a ,a awmdan avang khan a awm a nawm loh phah vek .

Inchhung ka luh rual rual chuan room ah ka tlan lut nghal a , darthlalang hma ah ka ding nghal tau bawk .

Dr Noel jacket ka hak lai ngei mai chu ngun takin darthlalang ah chuan ka han en vang vang phawt a ,hmai hup pahin khumah ka let tawp a ka nui chhuak thut ringawt . Midang in min rawn hmu se chuan mi ã emaw min ti ang . 

Sawmi nen kan insual pawh kha malsawmna zel a lo nih dawn hi a jacket ka hak theih phah a . Dr Noel jacket hi mi nazawngin an ha thei lo tih ka hre ve kar a, a hak tir phei chu an tam lo lehzual ang chuvang chuan keima tawkah vannei ka in ti em em mai a ni . 

 Ka pu thawm ka hriat takah chuan min rawn hmuh hma in bathroom ah ka lut nghal vat a , inbual pahin Dr Noel jacket chu ka su fai nghal vek bawka . Ka result avangin ka nutei thinrim ka la tawng dawn tih hre reng mah ila ka hlim em em tho . 

A tuk zingah chuan nidang zawng aia hma ah ka tho a ,ka nutei nen kan mut dun avangin nizanah mutna ah min zilh hrep lehnghal a, ka mut pawh a tui lo . 

Ka sam ka ṭawn lai te chuan Sawmin min kehna kha ka lu vun chu a na ṭhuam ṭhuam a , min tur a ni zawk mah ang chu .Ka sil lutuk hi ka khua te hi a sik dawn in ka hria . 

Rawng bawl ala hun lo bawk nen intih harh pahin damdawiin kawt lamah ka phei a Dr Noel chu alo tho daih tawh chu niin . Damdawiin kawtah chuan a lo tlan kual thauh thauh tawh a, chhun leh zanah damlo enkawl reng reng in a buai thin a ,  zing kara ala walk peih hian a taimak zia a ti lang zual . 

Dr Noel ka hmuh rual rual chuan phur takin a lamah ka tlan phei nghal a ,zing kar hma lutuk ah min hmuh thut vang aniang mak min tih hmel takzet . 

'Good morning ' ka tih rual rual chuan

 , ' I sil em , i lu te a na em? ' tiin min lo zawt daih a , ka awmdan tur hi a hrelawk aniang , min zawh ang zawng zawng ang hian ka awm .

' Aw 'tih bakin chhan ngaihna ka hrelo .

' Tih nawn tawh loh tur tihna a nih kha ' ala rawn ti ang deuh deuh a . Min fiam min fiam thin mahse a chang hi chuan min ngaihtuah ve tak tak in ka hre thin.  

' I va tho hma ve ? ' a rawn ti leh a , lu hiah neuh neuh pah hian , ' ka mu thei lo a ' tiin ka lo chhang nuah nuah a , min rawn nuih leh ringawt tawh .

' Nangpawh ' ka tih chuan ' kan inang chiah a nih chu ' tiin min chhang a .Engvang mu thei lo nge a nih tih hi hriat ka chak leh tet tet tawh .

' Engvang chuan maw? ' 

' Ahh.... mi ka hrechhuak zela ' tih ringawt hian min chhang a , ka bo tulh tulh mai .Mahse a nuih avang hian a fiamthu anih te ka ring leh hnuhnawh. 

Zawhna ka zawh apiang hian tha tak hian min chhang ziah thin a , naupang chhia angin min en thin mahse ka zawhna a chhan dan tam zawkah hi chuan min naupang chhe en reng bik lo a ni tih ka hre thei . 

' Tumaw i hriatchhuah? ' tiin ka zawt lehzel a , ka zawt chik ta deuh aniang a sana melh zeuh pah hian ,' ni hman nuam le ' a ti daih a , a awmna quarter lam panin  a kal nghal vang vang bawk . 

In ka thlen chuan ka nutei pawh alo tho tawh a , a zing tho hmel a pek chhiat tawh sa nak alaiin tukin phei chu nidang zawng aiin a mood a uih hmel zawk . 

Thingpui min rawn pek pah hian , ' Niminah Sawmi nen in in sual a ni maw? ' a rawn ti ta mai a , zankhat chhung lekin khawpum in an lo hre leh tawh a ni hrim hrim ang . 

' Ka ning an ṭawng peih hlawm si ' a engamah hma chuan ka ti nghal ringawt a , tukin ah mi tutu emaw in an lo hrilh leh hman tawh aniang . 

'Miin kan awmdan engkim min thlir reng tih ka hrilh ka hrilh tawh che kha , thil hote pawh nise an khel tawk a tling em em chuvang chuan fimkhur tawh rawh .... Fimkhur pawh angai lo mi sawi ngai in awm tawh lo la a ni mai ' tiin zing kar atang chuan thu ṭha min hrilh tan leh tawh a ,vawiin chu ka beng a tlai leh dawn teh e. 

★Noel's Pov★

Nizanah Tetei ka ngaihtuah chhuah zel avangin ka mu mang tawh lo a ,eng ang pawhin tum mah ila engtik lai mahin ka theihnghilh ngai dawn lo a nih hi .

 Tetei hi Carolyn bula ka awm tawh hi chuan ka lo theihnghilh leh thin a, keimah ngei pawh hian mak ka ti chuvang chuan Carolyn bula ka awm hian keimah leh keimah hi ka in fiah fo thin reng a ni . 

Carolyn hi tleirawl kum pawh la tling lo ni mahse Tetei min theihnghilh tir tu awmchhun a nih miau avangin ka hnaih hi a mawi lo tih hre reng mah ila Tetei ka theihnghilh theih na a nih chuan ka hma ti sial in keimah zawk hian ka pan leh nge nge thin .

Hetianga keimah zawkin ka pan avang hian ka duh tihna a ni lo beiseina pawh pek ka tum lo mahse a bula ka awm tawh hi chuan ka hlim in ka nui reng thin a , a bula awm hi a hahdam thlak ka ti a ni . 

 Damlo ka en kar lakah Carolyn report card nimin a a theihnghilh kha ka en nawn ka en nawn a keimah in ka lo nui leh vur vur thin . Hetiang em em hian result a chhe thei tih ka hre ve chiah . 

In entir tur a rawn luh avangin report card chu rang takin file hnuaiah ka rawlh lut a .

' Ka pi eng nge i in sawisel na? ' tiin ka zawt a . 

' Daktor .... Eng lo ania ' a han ti te te phawt a. 

' Ka serh hi a thak reng mai a ,ka hiah na lamah a thip hler hlur tawh . Kan pa nen hian nupa nun kan hman dawn apiangin condom kan hmang ziah thin bawk sia , kan pa hian a hman dawn apiangin a sil theihnghilh ngai bawk si lo' tiin a mangan na chu a sawi a , mahse thil pakhat hriat thiam loh ka nei .

' Eng nge a hman dawn apianga a sil theihnghilh ngai loh chu ? ' tiin ka zawt vat a .

' Aw condom chu .... kan hman dawn apiangin tui sa ah a chiah hmasa phawt thin alawm ' a ti heu mai. 

'Chuan a lehpek ah in hmang nawn leh tihna em ni ? ' mak ka tih deuh avang chuan a aia chik zawkin ka zawt leh a . 

' Aw .... hman apiang a a thar lei zel chu a hek sak mai mai , tuisa ah kan chiah fai leh vek tho a ' a ti sam et a . Hei aia case mak leh nuihzatthlak ka lo tawn fo tawh avangin mak ka tih rualin ka hrethiampui thung . 

Condom hman hnu hman a that loh zia leh vawikhat chiah hman tur a nih dan te chu tha takin ka hrilh fiah a , condom hmang tawh lo in in danna lo ei tawh turin ka ti a ka chawh tel nghal bawk a , lawmthu min hrilh mawlh mawlh chungin min chhuahsan a .

 

Read More

Dr Noel 2 - 13

 CHAPTER -13 

“I’ll never leave your side, until one day you’ll always see me beside you and finally embrace me with your love.”

Result a chhuah dawn avangin ka nutei scooty hman sakin Awmtea te in ka pan thla vuah vuah a , eng ang pawhin han in chei chhelo in han in ti nalh ve teh mah ila kawng chhia chu sawi loh a khu tel lehnghal a , kawn ka thlen thlak meuh chuan ka paw leh thur tawh .

Awmtea ka sawm kawi a , Tei kan sawm ve leh a traffic police awm ve hek lo kan pathum chuan kan in triple a . Awmtea a lo lian ve bawk nen a khalhtu ber hian ṭhutna pawh ka chang mang lo . 

Scooty chu sawi loh bike khalh pawh ka hnehsawh hle a, Workshop a an bike chhe siamthat ,tumah in an khalh duh tawh loh in bike khalh hi ka zir thin a .

 Workshop neitupa hi ka pu ṭhianpa a nih avangin chu bike ṭawng zet tawh tuma khalh duh tawh loh ,head light pawh awm tawh lo chu kum18 ka tlin veleh min pek min tiam nghe nghe a ni. 

Sikul lam pana thlamuang taka kan zai thlak dial dial lai chuan Sawmi leh Judith te pahnih rawn inphur chuan min rawn umpha a ka lo khalh muang ve bawk nen kan zawnah chuan an rawn tlan a , min rawn tlan pelh pah hian ka sam ah min rawn kek vak ringawt , an fiamthu emaw tiin nuih pah hian , ' Kha ka su dawn cheu nia ' ka ti a kan pathum chuan kan nui uar uar a , mahse anlo fiamthu ve hauh lo chu niin .

' Zawngi, mi zaktheilo nu ' tih pahin Sawmi zawk chuan ka sam ah a rawn pawt sawk a ,kan lo rit ve bawk nen kan kawi nghal zawk a a brake ka hmeh rualin kan te nghal tuarh bawk scooty erawh ka tai rang hman hram . 

' Ui ...kan thi , kan thi vek ' Awmtea chuan a ti nghal tuarh tuarh a , a hmeichhia zawk pawh kan ngawi mai maia a ni hi chu hmeichhia ai pawhin a hlauthawng hma zawk . 

' Awmte chiai vak zel suh , kan vaiin kan la dam kan nunna ai chuan ka nutei scooty kan tih ran hi a pawimawh zawk ' vin zet hian ka lo ti a , ka nutein lakchhuah a phal leh tawh loh mawlh ka hlau . 

' Nia engtin nge kan tih ang , a rang nasa viau em? ' Tei chuan hlauthawng tih hriat tak hian a rawn ti a .

' Engpawh chu nise kal phawt ang u ' ka ti ta ringawt a , thinrim tun chungin kan in phur chhuak leh ta hna hna hlawm a . 

Result chu an han puang ta cheng a , kan thian ho mai pawh nilo kan class ah ka ti chhe lawr lak mahse thil lawmawm deuh mai chu ka fail lo a a tawp berna ka ni lo hi a ni . 

Tei chu a ngai te bawkin pariatna a ni a , Awmtea pawh Sawmna a ni kei erawh ka zir tha peih lo zaw zaw bawk a , a tawp berna nen mark 8 chiah in kan in thlau a chupawh thil tih diklo a awm nge ni ala complain dawn zui . 

Zahna leh hrehawm tihna pawh nei hauh lovin kan haw leh tham tham hlawm a , a tawp berna pawh ni ila ka rilru a hnual ngai lova a hrehawm ngai bawk hek lo, ka pass chuan ka lungawi ve em em ringawt . 

Ka result a chhe hle tih pawh hriat miah lo in Awmtea nen dawrah zial zuk paha kan titi zuah zuah lai chuan dawr nghaktunu uBuati nula senior chuan , ' Noel khi a phone number in nei mial lo maw? ' a rawn ti hlawl a , Awmtea nen kan in melh hrak ringawt.

UBuati mi zakzum lutuk pawhin Dr Noel hi alo duh ve a nih chuan duh tu kan rin ai daihin a ngah dawn tih chu hriat sa .Mipa chhelo leh hmeltha hi chu an hre thei ngawt mai . 

' UBuat i lerh lutuk ' Awmtea chuan alo ti nghal vat a .

' A phone number te chu duh an tam alawm , Zawngin leh Thanglailung a ka ṭhiante pawhin min dil alawm ' a ti ta ang deuh deuh a . Chutia khawdang ami lehzel pawhin an lo ngaihzawn ve zel te chuan ka dinhmun ava derthawmg awm ve. 

' Awi .... kan khua hi chu Pa tan ram alawm , mikhual tlangval chu sawi loh mi pa pawh an chhuah ngai lo ' uBuat'in a tih leh phei chuan hlauthawn na in ka khat nghal .

Ni e , kan khua a hnathawk hmun dang atanga lo kal mipa pawh hmeichhia pawh mi nu leh mi pa pawh an bang chuang lo, tleirawl leh rawlthar lo awm pawh nise tumah hi tang lo in an chhuah ngai lo . A tua pawh nise an ngaihzawn loh leh nupui pasal ah an lo nei hman ziah thin a , chuvanga Pa tan ram ti chu an ni ;chutiang chiah chuan Dr Noel pawh hi an lo kherh thluk daih ka hlau leh hnuhnawh viau. 

' Dr Noel te chu a buai ve awm lo emai' ka lo ti nghal bai bai a , mahse tun atang hauh pawhin an rawn zem tan tawh ania , keilah ka la naupang ve bawk nen min ti mangang ru takzet . 

' E taka ... Scooty kha engtin nge ni dawn ? ' Awmte an min rawn zawh thut takah chuan ka thin a rim thar leh hnuhnawh a . 

' Sawi tawh lo ang , ka thin a rim teh mai ania . Chhan pawh hriat loh in tikhan an rawn ti ringawt a , ka thiam loh pawh ni miah lo ah ka nutei hauh ka tawh leh phah dawn a nih hi ' ka lo ti tan tan a . 

Chutia dawr chhungah phun mawlh mawlh paha zial ka lo fawh put put lai tak chuan ral lehlam dawr ah chuan Dr Noel ka va hmu thut a , ka zial zu lai min phawk rual chuan ka thil zuk lai chu ka hak ta mai a , ka khuh nghal tuarh tuarh bawk. 

' Awmte .... min thukru rawh ' 

' Engtia awm nge i tum a ?' 

' Vat ' tih pahin ka kut chuan ka hui lauh lauh a. 

Khuh tuarh tuarh pahin bihruk tumin parcel in tuang ut phenah chuan ka vak phei ta ringawt a . Ka mize tha lam chauh hmuh ka tum lai hian ngatinge ka thil thalo tih lai hlir a rawn hmuh ziah le ?;  Pawi lutuk . 

Dr Noel laka bihruk tuma ka buai lai chuan Sawm palian-i leh Judith te chu dawrah chuan an rawn lut hlawl mai a , kan in melh Salla hlawm teh e . 

Sawm palian-i chuan min rawn melh ralh pahin Judith bulah chuan ' Ṭhiannu mi phatsan ching ,hnung lam aṭanga mi bum thin te hi ka hua ' min tih chhan deuh chuan a rawn ti vela , vawiin a min tih dan zawng zawng leh ka nutei scooty a chhiat dan vel ka ngaihtuah chhuak a ngawih mai mai ka tum bik hauh lo . 

' Awmte keichu midang kutthlak ching ho hi ka hua , an rilru a chhia in midang an itsik vang a ni duh tlangpui ' ka lo ti let ve ngat a, Sawmi huat tawk a tling ve em em tho . 

Sawmi chuan min rawn hmachhawn ta nge nge a ,kei aiin a lian in a sang daih zawk a ,a lakah chuan ka te chem chem mai . 

 "Tangkapar mi zaktheilo nu  engmaw i sawi a? ' a rawn ti ta mai a , ka lo zam bik lo nasa . 

' Nang ang midang kutthlak ṭulh ṭulh ching hi mi fing an awm ngai lo ka ti ' ka lo ti let ve ngat a , eng ang pawhin hneh dawn lo mah ila insual erawh ka in peih reng . 

' Zawngi Christian-a hi lo hnaih tawh suh ang che ' a rawn tih leh takah chuan hetiang anga min tih nachhan hi ka hre ve chiah .

Christian-a pa leh Sawmi pa hi an thawk ho a , chuvanga be chhe lo mai mai chu a ni . A nihna takah chuan Christian-a hian Sawmi hi a ning in a hlau deuh reuh lehnghal a , zan tin alo be ve sek bawk nen nuam lo a tih thu ka hnenah pawh a sawi hial tawh a nih kha . 

Christian-a hming a rik takah chuan ka lo nui lui nghal vel a , ' Christian-a khan a duh lo che ' ka rilru a awm hmasa ber chu ka sawi chhuak nghal phawng a ka sawi dik chiah bawk mahse hetiang thu hi kei ngei pawh hian dawn ka duh bik miah lo . 

' Engmaw i sawi a ? ' a rawn tih rual chuan , ' Ka sawi i hriat reng kha' ka lo ti nghal vat a , Sawmi thin in a tuar ta bik lo aniang Zawngi tih pahin ka samah min rawn kek ta buan buan mai ; dawr bungrua kan delh tlu nghal rum rum bawk .

Ka duai bik lo ka tih tawh kha nghet zet hian a samah ka tham ve nghal chat a , a chak bawk a min theh leng dawr dawr nimai hian ka hria .

'Hmeli i chak dawn lo , thi rawh ' tih te in min an khum zui mawlh mawlh renga , a nulian bawka ka hneh ngang lo a ni mahse a sam ka ṭham na erawh thlah ka tum bik hauh lo . 

Awmtea leh uBuati lahin min ṭhelh chu sawiloh kan sirah an hlauthawng chu an lo au tuarh tuah ringawt a , ka tlawm mai duh bik si lova ka kawr te pawh a pawt thler vek tawh . Bra lang huar in ka la kek ve ngat ngat reng a , ka theih ang ang in ka khup in a pum ah ka nghawk deuh reng bawk .

Chutia tlawm hmasa zawk nih hlau a kan lo la in keh ngat ngat lai chuan vawilehkhat ah ban tha chak zet hian kan pahnih chuan min rawn pawt ṭhen nghal dawrh a ,chupa chuan ngawi rengin a thiam lo zawk ang maiin keimah chauh chu dawr aṭang chuan min pu chhuak nghal nal nal a . 

' Min thlah rawh , amah zawk khan kut min thlak hmasa zawk a nih kha' chupa samah chuan ṭham lehnghal in ka au zui zel a , ka tal vak vak chung pawha min la thlah duh chuan loh avang chuan a banah ka seh vak a . 

Na a ti ve ngang aniang car a min theh luh tawp pah hian vin zet in ' Ngawi hle hle rawh ' ngeiawm zet hian a rawn ti kher a, Dr Noel a ni tih ka hriat takah chuan ka ngawi chiang kher mai . 

Ka sam te lah chu a pheng in car chhungah chuan a tla nuai a , ka sam ka tuai mam zawng ringawt pawh hian ka lu vun hi a thip ṭhuam ṭhuam mai .

Dr Noel pawh chu car chhungah rawn lut ve nghal in min tlan chhuahpui nghal vang vang a , ngawi tur khan min ti sia engmah ka sawi ngam tawh lo . 

' Kha heihi ha rawh ' tih pahin a jacket chu min rawn pe a mahse ka thinrim lai alo ni bawk nen tukverh lam hawi hmak pahin ka lo ben thlak sak pawp a , a chek zui tlak a . 

Min hau hrep dawn emaw ka tih laiin engmah a sawi ngai lova , thil thleng zawng zawng a hriat ve vek laiin engmah hrelo ang maiin a awm leh daih a , engmah hi a care ve lo emawni . 

Kei ang tho a luhlul alo ni ve aniang ngawi rengin min rawn khuh ṭha leh ngat a , 

' Ninawm ' tih pahin ka beng thla lehnghal a .

'I in khuh loh chuan ka hmu vek ania ' tha deuh a tih pahin min rawn khuh tha leh a ,chutia a tih takah chuan ka kawr Sawmpalian-in min pawh thler sak vek a bra lang tung a awm ai chuan tiin luhlul chhuah tawh lo in ka lo in khuh ṭha ta zawk a, a nui nghal vur vur tih ka mitsir pawh hian a hre thei . 

Quarter kan thlen chuan chhukthlak tumin ka mawng ka kan uk hman a .

' Inbe lawk ang ' a rawn tih rual chuan ka hawi let rang kher mai . 

' Eng nge? ' tiin ka lo zawt nghal vat a . 

Eng vang chiaha inbiak duh nge a nih tih hi ngaihdan pawh ka neilo . 

A sawi hun nghak chuan ka ṭhu ngawi renga , a ni lah hmalam melh ngur ngur pahin a ṭhu ngawi reng bawka . A ngawi reng sia bul han ṭan mai dan tur pawh ka hrelo, a reh tlawk tlawk a ni ber . 

' ihh.... ngatinge min biak i duh a?' hreh tak chung chuan ka zawt nawn leh ta ringawt a . 

Thawk chhuah deuh halh pah hian chiang deuh hian min rawn en a , ' Ka hre chhuak tawh che ' a rawn ti chhuak hlawl ringawt. 

Read More