Dr Noel 2 - 24

 CHAPTER -24 

Min rawn hmuh rual rual chuan Dr Noel chuan kawngka chu a khar lehnghal daih a , ka meizial zuk lai pawh hre chang tawh lo in seh kawh vu chung chuan ka um nghal a , a thil hmuh kha a ngaih ang a nih loh zia hrilh fiah ka tum ruh hle bawk . 

' Min lo ngaithla lawk rawh i hmuh ang kha a ni miah lo ania ' ka tih pawh chuan hre lo ang maiin a kal lui ngar ngar a , a hnungah ka zui zel tho . 

Ka thusawi pawh ngaithla duh lo a a kal zel avang chuan ka ning chuan vin deuh tak hian , ' Vawikhat tal ka thusawi hi ngaithla ve rawh ' ka ti ṭhat a , a thawk ṭha bawk aniang ka inrin hma in a rawn hawi let thut a , ka la su chawrh zui. 

Chutah meizial kha ka lo la pet chu niin , a tshirt var lutuk tak mai chu a dep dum ta kulh mai .

Ka meizial chu min rawh pawh thlak sak te te phawt a , ka ṭawng leh hma chuan , ' Ka lakah hian engmah i in sawifiah a ngai lo ,a ṭul na pawh a awm lo ' tih pahin meizial chu leiah a paih pawp a , min kalsan nghal nal nal a .

Chutia Noela kal liam lai ka lo thlir reng lai chuan Mama chu ka bulah a rawn ding ve a  , ' I bialpa mi ? ' tiin min rawn zawt a .

' Ni mai mai lo ..... nangmah vang vek min ngai dik lo vek ang ' tiin ka lo vin let hrep a .

' I bialpa a nih si loh chuan a thikthu a va chhe em em ve ' a tih chuan Mama chu mak ti takin ka en a .

Mama hi a thik avanga thinrim a ni thei mai angem?

' A ni lo ang , a thinrim ve mai mai aniang ' tiin ka lo ṭang ve tlat a, a chhan chu midang a thik hi ka rin phak loh mai bakah ka rin ngam loh vang a ni . 

Mama chuan ka lu a rawn kuk ṭawlh pah chuan ' Mimawlnu.... thik lo nise a thin a rim ringawt lo ang ' a rawn ti leh a .

Ka sam pheng zet mai hui phawk pah chuan , ' Nang lehzel chuan Mimawlnu tiin min ko lo teh ' ka lo ti let nghal vat a , vin hle mah ila a ruk tak chuan ka hlim veng veng mai . 

Dr Noel hian ka duh tih hi a hriat na a rei tawh a , ka duh zia pawh ka ti lang nasa thin hle mahse a ni chuan vawikhat pawh min la chhang let lo . Min duh ang pawhin a awm ngai lo a , min duh loh thu lah a sawi hek lo . Beiseina min pe ngai lo a , min ti hnual zawng lahin a awm ngai bawk si lo . Min duh loh mahse a ruk chuan pasal atan ka lo hual lawk daih tawh a ni . 

Mama nen chuan workshop lamah kan inzui phei a , chet chhiat tawh sa naklaiin  , ' Naktuk ah rawn kal leh la , zu leh ila ' a rawn la ti zui . Ka cigarette ah lai chu phawrh chhuak in a awmah ka hmeh bel chawt a , 'Ka nghei tawh dawn ' ka tih zawm zat a ,a awih loh hmel ngang mai . 

' Ka ti tak tak ania ' a awih loh hmel em avang in nghawk pah chuan ka ti leh a .

' Engmah ka sawi loh kha, saw i bialpa sawn min hnek loh hram ka beisei ' Dr Noela va melh zeuh chung hian a rawn ti vel a .

' Ka bialpa a ni ziah lo ' ka lo ti ve tak na in ka rilru chuan ni tak tak se ka ti takzet .

' Aw le aw le ka hria ka hria .... mahse a duh che tih erawh ka chiang ' confi zet hian a tih zawm zat a , a tak tak ni lo mahse ka lo lawm ve em em tho .

' Keimah zawk pawhin ka hrelo ania .... confi viau thin suh ' 

' Kan la hria ang chu ' tih pahin uHenry chu ava pui nghal vat a , kei erawh Dr Noela melh hrek hrek pahin uHenry te sirah chuan ka va ṭhu zum dui a , ka thil ti ru lai min man fuh thei lutuk a min ngai khawlo tawh viau maithei a ni . 

Dr Noel chuan a car ke a siam tir hi alo nia , helai hmunah hian ka kal khat tawh tehlul nen engvanga vawiin ni kher kher a kal rual kher kher nge maw kan nih le ? Mood a rawn ti chhe zo vek . 

UHeny chuan ' Bawihte motor ke hi rawn pump rawh le ' a tih rual rual chuan rang takin motor ke pump na tire inflator chu ka pawt chhuak nghal vat a , workshop a awm tih takah ka kawr leh kut te chu a dum niau tawh a . Dr Noela bulah hian inlak no tum eng ang mah ila tih tur min hrilh zel sia , ka fai reng thei bik lo . 

Dr Noela alo awm ve reng bawk nen ka che te chu a khawr vek a ,ka zam bawk aniang motor ke pump na te lah chu ka vuah lut thei der lo .

Chutia vuah luh tuma ka hawlh rawk rawk lai chuan Dr Noel chuan ka thil ken lai min rawn laksak pah hian , ' Ka lo ti ang ' a rawn ti a , ka zei lo lutuk a a hmu thei tawh ngang lo aniang . 

Ka inthlahrung chuan thawh kan pah hian ' Ka ti thei reng alawm ' a lo ti nghal vat a , ka thusawi hria ang pawhin a awm leh tawh lo . Ka thusawi engkim hi a hre ve vek awm sia engvanga min hre lo der tlat zel nge maw a nih le nge min be peih lo zawk . 

Awm nuam lo deuh chung hian Mama bulah chuan ka va ṭhu leh ta ringawt a , Dr Noel hian ka duh lutuk a ni tih a inhriat atang hian min be ṭha duh lo sawt riau a hriatna te ka nei tlat peka , hrehawm ka ti takzet .

Ka ṭhut rual chuan Mama chuan' Ka tih reng kha a duh che ka tih tawh kha ' hi a rawn ti ringawt a , engmah hre chiang lo a beiseina min pek avang hian ka thin alo rim nghal ringawt . 

' Sawi tawh lo teh .... vawikhat pawh min la melh lo biak pawh kan la inbiak loh hi ' ka lo ti vin hlar a , ka ṭhu tum bar bawk . 

' Engmah hi i hre ve si lo a ' tih pah hian min rawn kuah a tum leh a ,' vawiin hi eng nge i hriat a ,min kuah cheng reng a '  lo indan pah hian ka ti a . 

Vawiin chu Mama hian ka kalna apiangah min zui renga , a khat tawkin min kuah deuh sek reng bawk . Hetiang mi hi ani ngai si lo a , ninawm lamah a kal tawh . 

' Lo che suh ' tih leh nghet taka min rawn kuah a rual lehnghal a , ka ning lutuk chuan nam sawn deuh pah hian , ' I va han ninawm tak ' ring deuh tak hian ka lo ti nghal ṭhah a ,mahse engah mah a ngai duh miah lo .

Min rawn run luih emaw tih mai tur hian ka sam kir bip bep pheng zet mai chu min rawn tuai thur sak leh ngat a, ka ning lutuk chuan thawh san daih ka tum lai tak chuan Dr Noel chuan , ' Carolyn heihi khawiah nge ka dah dawn? ' tiin min rawn zawt ve ngei a nih chu !!! Min rawn biak avang hian mak ka ti takzet . 

Mama chu mak ti taka en chung hian , ' Aw ka rawn kal ' tih leh thawh ka rual a , Mama lah chuan min rawn nuih pah hian min rawn la siai zuk zui .Tire inflator chu rang takin ka va dahsak nghal a . Tunah khan Mama awmdan vel kha ka hrethiam ve chiah .

Noela thik turin min rawn kuah vel a ni tih te , a ngaihsak ka hlawh theih nan alo ti vek a ni tih chu hrilh ngai lo in ka hrethiam nghal vek a , a tum ang ngeiin ka ning hmel a hmuh khan Dr Noel pawhin min rawn ko hrang ta ngei bawka , ka ngaih ang em em a min ngaihsak lo tawp chu alo nih bik loh hi . 

Noel hmuh loh in nui ver ver chung hian ka let phei leh a , phur zet chung hian Mama bulah chuan ka va ṭhu leh a zawi te hian , ' Hawh ti leh ang min rawn kuah leh rawh ' ka va ti sur sur a , a ni lah pek chuan ner nung chung hian , ' Ka peih tawh lo ' tih pahin min thawh san daih ringawt. 

Ngawi renga nut leh bolt ka chhar khawm mual mual lai chuan Mama chu a rawn ṭe thut mai a , kan vai mai chuan kan tho nghal suau bawk . 

Thawm awmna lam ka va en ve nak chuan ka ṭe nghal ṭhawt a, ka rap lutuk chu ka ka ka hup nghal vat a.

Mipa pakhat bike rawn siam tir ve tho kut chu chain hian alo ei chu niin , a thi nasat mai bakah chupa lah chu a rui bawk nen chain alo zuk zen palh aniang . 

' Lalpa ka duh thei lo , a kut hi la chhuak vat ang u ' ka ti nghal chul a a thi nasat em avangin tumah in kut lawnga zuk khawih nghal mai chu an tum der lo . 

A kut an lak chhuah rual chuan puan in an lo tuam sak nghal vat a ,mahse thisen a rawn hnam chhuah zel avangin amah in an dawm tir ta ringawt a , amah a lo kai ve bawk nen dawm pawh a dawm tha hlei thei lo . 

'Drugs addict ania a thisen a thianghlim tawh lo maithei glove tello chuan tumahin lo khawih suh u ' UHenry chuan alo ti ve bawka , zuk pui ngam pawh an awm lo . 

A thi nasa bawk nen glove lo thlen hun lo nghah ringawt chu ka thei tawh lo,engmah sawi set set lo in ka jumper hak lai chu ka phelh sawk sawk a , thisen chhuak nasa lutuk zuk hup pui ka tum lai chuan Dr Noel chuan min lo dang vat a , ' Glove an rawn la dawn keiman ka ti ang ' a tih pawh chuan min vawn na chu ka lo thin thlak sak pawp a ,' a thi mai anga sin ' tih pahin ka zuk hup pui ta tho a .

A thisen a thianghlim emaw thianghlim lo emaw hetiang ringawt hi chuan ka en liam thei thlawt lo a ni . 

Chutia ka zuk hup pui takah chuan Dr Noel pawh chuan glove tello hian min rawn dawmpui vat a ,rang takin ka kut chu a paih thla nghal vat bawk .

' I kut kha va sil vat rawh , keiman ka buaipui ang ka tih kha ' ka hriat tawk lek hian a rawn ti a . 

' Glove i bun loh hi keiman ka lo ti ang ' tiin ka lo ṭang ve tlat thung . 

Chutah zet zawng a dawhtheihna in a tlin ta bik lo aniang ' Min hnial suh , i kut va sil vat rawh tunah ' a rawn ti vin nghal ṭhah mai a, a thinrim hmel ka hmuh rual chuan ka ding nghal zawt mai . 

Chutih lai tak chuan ' Hei ... hei glove ka lo keng ' tih pahin Mama chu a rawn tlan phei hlawk hlawk a , vanneihthlak lutuk in ka jumper kha alo chhah hlauh a thisen kan kai hman lo ve ve a ni . 

Rang takin chupa chu damdawiin ah an phur chho nghal vat a kei erawh in an hnungah scooty in ka zui chho ve thung a , thisen kha a chhuak nasa bawk sia ka scooty khalh lai pawh ka rilru ah a awm thei lo , ka tha te hi ala khur in ka hria. 

Damdawiin ka thlen hnuah pawh darkar chave ngawt chupa kut chu an buaipui a , ka nutei sawi dan phei chuan a zungtang chu an rin aia a lo chhiat nasat loh avangin Saitual panpui nghal kher ngai lo in Dr Noel an a buaipui thei hlauh a ni awm e. 

Pawnah thinphu dep dep chunga kan lo nghah ṭhap lai chuan room atangin Dr Noel chu a rawn chhuak a , ka biak hma hma in a office ah min luh san daih a , ka umzui nghal vat bawk . 

A office kawngkhar ka thlen chuan a dawhkan bulah min hnung chhawn zawng hian alo ding reng a , luh pawh a in thlahrun awm leh zo vek . 

' Ka lo lut thei angem? ' chhuanlam ah ka ti ta ringawt a , chhan pawh min chhang lo .

Min chhang miau si lo a luh a phal aniang chu tiin ṭi zet hian ka lut tlang ta ringawt a , boruak te hi a rit churh mai hian ka hria . 

' Eng nge a an ? ' ka ti dek dek a vin lutuk tak mai hian ,' I thluak tlemte tal hi hmang ve thin ta che ' a rawn ti ta mai a , ka phu chiang bawk aniang pen khat in ka tawlh hnung nghal hrut thei nia mawle . 

'Khapa khan eng natna nge a vei i hria em? ' tih pahin a rawn hawi let a , a thinrim lutuk chu a mit te a sen vek a hetiang em em a Dr Noel thinrim hmel hi ka la hmu ngai lo , chuan a hlauhawm hle bawk . 

Chhan pawh ka chhang ngam tawh lo , mittui tling pam chungin amah chu ka melh kar reng ringawt . 

' I dam chhung in natna hlauhawm tak i vei thei asin thluak thawl leh lutuk mai .I puih pawh kan ngai lo , helai hmunah hian vawikhat pawh rawn kal tawh suh ' tiin min ankhum zek a , ṭawngkam vin a hmang ngai si lo a ka rilru a ti na takzet . 

A hma ah ka mittui a tlak mai ka hlauh avangin ka tawlh hnung hrut hrut a , ka insum thei tawh dawn lo takngial a ka hriat takah chuan ka inher vut a , mittui tla chungin a office aṭang chuan ka chhuak nghal nal nal a , hetiang em em hian tumah in ka rilru an la ti na ngai lo . 

Keichuan nunna chhanhim ka tum mai kha a nia , a pawi viau em ni ? .Natna ṭhalo tak lo vei pawh ni tehreng se an ni angin glove lo thlen hun nghak in ka lo awm mai mai thei lo a ni . 

Read More

Dr Noel 2 -23

 CHAPTER -23

' I Love you But I can't grow with you' 

Kan ti nek nek a First term exam alo hnai leh kuarh tawh a , a ngai te te in lehkha zir nachang reng reng ka la hre chuang lo . Test apiang in ka la fail zat zat a , thiamlo viau e tilo chuan midang angin entawn erawh ka duh leh miah lo thung . 

 Zan khat chu ka nute'in min nawr nasat em avangin lehkha zir turin room ah ka lut ve ngei a mahse lehkha ka zir dawn tih hi ka ṭhianten an hria emaw tih mai turin chhuak turin min rawn sawm leh chat tawh .

Tun tuma min rawn sawm tu te hi chu Tei leh Awmtea te nilo in thil sual ka tih pui thin Mark-a te thian ho an ni thung . 

Zanah ka nutei a duty chuan ka pu alo mu hma thin bawk nen tuma hriat loh in ka chhuak ru thin a , ka nutei duty zawh hma in ka haw leh mai thin a ka chhuak thin tih pawh an hre ngai lo. 

Zandang ang lo takin zu an neih thu leh a rei dawn loh thu in min thlem ngial mahse ka lo hnial ve tlat a , kei ngei pawh hi ka in awih lo zawk . 

' Caro .... i awm loh chuan a nuam lo ' Hlimpuii chuan thiam takin a han ti vel a mahse ka tih tawh lo chu ti lo tlat chi ka ni ka tih tawh kha kal tumna eih pawh ka neilo. 

A nihna takah chuan Dr Noel-a lakah hian mi ṭha tak anga lan ka duh avanga kal lo mai mai chauh ka ni . Mak deuh mai chu tumah in min hauh sim theih loh laiin Dr Noel ve thung chuan a ṭawngkam pakhat lek avangin mipa kawp lawr thin khan ngaihzawng chu sawi loh mipa biak lai takngial pawh ka nei tawh loh phah a , a hmeichhe duhzawng nih ka tum luat ah ka thil sual tih thin te kha muangchangin ka thlauh thla zel zawng chu a nih hi.  

' Eng nge i hriat a tunlai chu i sawm chhuah theih tawh ngai lo reng reng , kan chhuah ho lohna a rei tawh em hi zanin chiah te chu ' 

' Hlimpui phone ka dah dawn , zanin chu lo va ti leh phawt rawh u ' tih pahin phone chu ka dah daih a , a ruk tak chuan lehkha zir ai chuan chhuah daih a ruih bo daih hi ka chak fe zawk. 

Minute 5 vel chu zir peih ve hmel deuh hian ka han chhiar lauh lauh a , ka ning nghal der .

' Ninawm ' tih pahin lehkhabu chu ka khup nghal thak a , peih lo chung chung pawha zir luih hram hram hi ka peih zawng a ni ve lo . 

Ka thianten min lo sawm ve sek bawk nen in a awm ai chuan tiin damdawiin ah ka phei ta ringawt a , engmah ti dawn lo mah ila inah ka awmlo tala a zia deuh. 

Ngawi rengin ka nutei duty na room lam chu ka pan phei a mahse ka nutei aw ka hriat rual rual chuan kawngka phenah ka biru nghal . 

Ka nutei chuan ,' Richard tunah chuan kan la innei thei lo tih i hriat ve reng kha . Carolyn pawhin class-XII ala pass lo a inneih chungchang kha chu rawn sawi tawh suh ' a ti a .

Pu Richard pawh chuan lungawi lo tih hriat tak mai hian ,' Hei lehchen kan in zui ve tawh a ka hrethiam lutuk alawm mahse naupang pawh kan ni tawh lo a hetiang hian kan awm reng mai dawn em ni ? ' a tih rual chuan ka nutei insut hraih hraih ri chuan a chhunzawn zat a . 

'Neih che chu ka duh lutuk alawm , ineih vat pawh ka duh mahse Carolyn hi han graduate ve phawt se la ... aw .... min lo la nghak hram hram rawh ' ka nutei thusawi chu ka ngaithla chhunzawm thei tawh lo , rang takin in lam panin ka tlan haw nghal nal nal a , ka rilru na lutuk hi ka mittui a tla lo chauh . 

Ka nutei hian keimah vangin pasal a lo la nei lo mai mai chauh a maw ? Keimah a ka in tun nun theih hun alo la nghak tang tang chu a ni sia .Keilah in engmah hrelo in Pasal nei ve tawh rawh i senior tawh tih ṭawngkam te kha ka hman khum vela , ka lo va ã tak em . 

Ka nutei tan harsatna ka siam hnem tawh zia leh atan chuan phurrit mai ka nih zia te chu zankhua in ka ngaihtuah a , ka muhil thei meuh lo . Ka ngaihtuah chian poh leh hrehawm ka ti in a lakah ka inthlahrung takzet . 

A tukah chuan keimah ang lo takin class lak lai chuan lehkhabu chu ka keu ve nuah nuah a , ka keu kual vel lai chuan ka lehkhabu kar atang hian envelope pakhat mawi deuh mai hi a rawn tla thla hlawl mai a,mak ka ti angreng hle . 

Awmtea chuan rang takin min lo chhar sak nghal vat a , a chhunga thu inziak kan chhiar chuan 

" Ka lo nghak reng ang che" 

tih te mai hi alo ni a ,tu lo dah nge tih ka hre bawk si lo a han tih vak ngaihna pawh ka hrelo. 

' Tu pek che nge ? ' Awmte'an min rawn zawh chuan ka hriat loh thu in ka lo chhang mai a , ngaihthat lohna pawh ka nei lo .

' Aaa.... i luck lutuk a nih kha ' ani pawh chuan alo ti ve mai a .

Nidangah pawh mipa ho hian lehkha min lo thawn fo tawh thin avangin ka ngai thutak lem lo . 

 Lunch break lai chuan nizan lamah ka mut ṭhat loh avangin dawhkan bawh meuh in ka muhil sak sak a , mumang ka lo neih lai tak chuan tuemaw hian ka hmingpum a min rawn koh avang chuan ka harh nghal zawk a, mood fuh loh lai a ni bawk nen thin a tawi duh ngei mai  .

' Tu fa lubawk nge ka hmingpum a min rawn ko tu kha?  ' harh chiang mang lo in tho phang aw zet hian ka ti vin nghal hlar a , ka hmingpum a koh hi ka huat zia an hriat avangin tuman min ko ngai lo a , tu phiangsen in nge ka hming hnaisai lo hi lo lam ni? 

Keimah rawn ti tu lam chu kan hawi nak chuan V-a lo ni rengin !! Ka harh nghal hawk in ka hria .

'Ramhuai ka nih loh hi 'tih pahin ka bulah chuan a la rawn ṭhu ang deuh deuh a, midangin min report ka hlauh avangin ka hawi kual nghal zung zung a ,Tlar hmasa ber aṭangin Sawm'in min lo melh kur mai . 

' Eng nge hetah i rawn tih ? Kal rawh ' a engamah hma chuan ka lo ti nghal ringawt a , ka hlauthawn em avang chuan ani pawh a nui ringawt. 

Kan school hi te viau e ti lo chuan Art leh Science la ho hi kan in ngeih lo em em a, mipa ho phei chu chawlhlawk laia an insual zin em avangin class room a in luh pawlh hi an khap tlat tawh a,an strict phian lehnghal. 

' Ka kal dawn hlauthawng suh ' alo ti sam et lehnghal a , kei ai pawh hian a ngaih a sam zawkin ka hria .

' Lehkhazir lamah ka mark a chhiat tawh naklai in hetiang zawng hi chuan mark tih chhiat ka duh miah lo ania ' ka vau titih a , a nui duh lek chauh .

V-a hi mahni induh tawk leh keimah ka ni in ti ve tak hi a ni a kan in ṭhen hnu ah vawikhat min rawn biak leh na a ni a , hetiang a ka bula a rawn awm leh ta mai hi kan vai hian mak kan ti ni berin ka hria . 

Ka hlauthawn em avang chuan min rawn en pah hian a ding uai a' Banah ka lo nghak ang che ' tih pahin min rawn siai zeuh a , midang in min report hma in a chhuak lehnghal a . 

Lehkha min rawn thawn tu pawh kha amah hi a ni leh hrim hrim ang . 

' V-a nen in in renew leh tih min hrilh miah suh ' tih pahin Awmtea chu ka bulah a rawn ṭhu a , kan in biak ngai loh thu leh keipawh in khatianga a rawn awm thut kha mak ka tih ve tho thu in ka lo chhang nghal vat a .

' V-a nen in in kawp tawh hi chuan thil ṭha in ti ngai lo . Zu in in dun loh leh school tlan bo in weed te in lo zu thul ' tiin hun kal tawh chu a rawn thawh thar leh a.

Awmtea sawi engkim hi a dik vek mahse eng nge maw hleka hun kal tawh a rawn thar thawh leh zel hi chu ninawm lamah a kal tawh .Bakah ka thil tih sual avanga midang mawhpuh hi tha ka ti lo a ni. 

' V-a thiamloh a ni vek bik hleinem keima duhthu keia ti ka nia keimah min puh zawk rawh bakah khatiang thil kha chu ka bansan tawh tih i hriat ve vek kha ' lungawi lo deuh chuan ka ti a , ṭhat ve tum pawh hian ka nunhlui hian min la umzui zel dawn chu a nih hi . 

' Aw le ka hrethiam e , thinrim tawh suh mahse Mate Dr Noel vangin engkim i sim tawh a amah vang bawkin i tih leh phah lo maw ? ' tiin Awmtea chuan min zawt khoh peka .

' Chutiang sawi suh ' tiin ka lo chhang vat a .

Ni e kan hma hun engmah kan hre lo a , engthil pawh thleng leh thei a ni mahse tunah chuan a vawikhat nan Dr Noel vang hian nun hi nuam ka ti in khawvel pakhat a kan awm avang ringawt pawh hian vannei ka in ti takzet a ni . 

A hma kha chuan damchhan neilo ang maia ka in hriat avangin ho takin ka khawsa thin a , ka nuam tih apiang hrehna nei miah lo in ka ti mai thin a ni, a chhanchu ka khawharna leh lungngaihna te kha a chhawk nia a ka hriat avangin.

Ruihtheihthil tih te hi nuam ka tih avanga ti ka ni ngai lo , harhfim a awma rilru kawm melh melh te kha ka hlau a mal riaua ka inhriat na te hi tih reh tumin thian mak tak tak te ka kawm phah a .Hmangaih nih ka duh luatah mipa tamtak ka kawp bawka mahse tunah chuan khang thil tel lo pawh khan ka hlim thei zia leh kha ka khawvel siamchawp piahlam ah khan khawvel dang alo awm reng a ni tih ka hre tawh a ni. 

School banah V-a chuan min lo nghak tak tak a ka thinrim ru angreng hle . Nizan thil thleng avang khan tun thlengin ka mood ala fuh thei lo lehnghal . Ka nutei lakah ka inthiamlo in keimah avanga a tawrh zozai te kha ka ngaihtuah let phei hi chuan hmuh pawh ka hmu ngam tawh lo ang . 

V-a chuan a tih thin dan ang bawkin , ' I va rei ve ' alo ti nghal ringawt a ' min lo nghak rawh pawh ka ti hleinem ' tiin ka lo chhang vat thung .

' Tikhan ṭang ṭung teh suh , renew pui ah ka sawm dawn lo che... hlauthawng suh ' a rawn la ti ang deuh deuh a . Inngaihzawn ṭhat duh leh lo se engvanga hetianga rawn awm leh thut nge a nih hi ka hre bik lo . 

' I ti tak tak em bakah .... ' ka sawi zawh hma hma chuan , ' Ex te nih pui ṭhat leh hi i duh tawh ngai lo ' tiin min lo pawt chat vat a , thinrim theih pawh a ni tawh lo ka nui ringawt. 

A bulah hian vawikhat ka ex te ka nih pui nawn tawh ngai loh thu ka sawi kha alo la hre reng a nih dawn hi . 

'A that chu .... chutiang a nih dawn te chuan ' nuih pahin ka kal daih a , min rawn zui nghal vat bawk . 

 Diakkawn kan thlen chhoh chuan kan pahnih a kan haw dun avang chuan dawr kawta tlangval lo ṭhu ho chuan min lo chhaih leh dar dar tawh a , min chhaih ngun lutuk a ka nuih pawh a za tawh lo . 

' A ṭhing e ' tiin ka phun zui nang nang a V-a chuan min rawn nuih pah chuan , ' Nuih liam pui ve mai mai rawh , a ho lutuk ' alo ti ve thung a.

' Ka ning alawm mi chaih dan chin tawk pawh an hre lo .... Taka vawiin a envelope kha i va bei sweet vel ve ' tiin ka lo chhaih let zawk a . Amah leh envelope chei par tih vel kha a inhmeh lo lutuk a ka sawi chhuak chak ve hrim hrim . 

Mak tih hmel taka min rawn en pah chuan , ' Eng envelope maw? ' tiin min rawn zawt let hu a , a hre lo tak tak emawni le nge a hrelo der zawk . 

' Kha...vawiin a envelope min rawn thawn kha mawle ' ka tih pawh chuan a hmel atang ringawt pawh hian a hrelo tih a hriat theih, min tih der anih te ka ring hial zawk. 

UBuati dawrah meizial zuk ruk paha kan ṭhut kawi lai chuan Dr Noel chu dawrah a rawn lut thut mai a ka meizial zu ru lai min rawn man chiang teh e . 

Rang takin zial chu ka thukru nghal vat a mahse min hmu ang pawhin a awm duh miah lo, min hre lo ang hmakin zu han awm tlat a mawle .

Dr Noel awm lai lai chuan UBuati chuan , ' Ngani hi in in ṭhen tawh tak tak maw !! ?' a rawn ti lung lung a , V-a lah chuan zep nei lo leh zam map lo hian  , ' Min duh tawh si lo a , ṭhian anga kan awm mai loh te chuan ' ala ti ham ham zui. 

' Ni leh rawh u in in hmeh em kha bakah nangni pahnih hi chu in in kawm ngeih ve ngawt mai ' a rawn ti leh a .

Ni e , V-a nen hian kan inngaizawn hma in rei deuh kan inkawm hmasa phawt a chuvang te pawh chu aniang kan in ṭhen hnuah pawh ṭhian anga kan awm leh theih nachhan hi . 

V-a bawk chuan min rawn en pah hian , ' Ani chu a piangthar tawh a ' tiin min rawn fiam zeuh a , ' Envelope thawn ah min la puh zui ' tih pahin a nui hak hak a . 

Ni dawn tak Envelope chungchang a rawn sawi chhuah takah chuan ka envelope dawn kha phawrh chhuak in V-a leh uBuati chu ka chhiar tir ta ringawt a , V-a chuan alo pha nasa ngang mai. 

' Duh che mahila khatiang khan ka ti ngai lo tih i hriat kha ' tiin a tang ve tlat a , UBuati pawh chuan , ' Star tu che an awm aniang ngai serious duh suh ' alo ti ve bawk a ,thu ho te mah nise tu min rawn thawn nge tih hi ka hre chak zek zek mai . 

' Nang hi chu ngaizawng tu i ngah lutuk hian a ti lerh zo vek tawh che a nih hi . Engpawh chu nise Ka lo nghak ang che tih mai mai te chu ngaih serious tur pawh a ni hleinem tiraw Noel ' inla nel zetin UBuati chuan Dr Noel bulah chuan a ti vel a . 

Dr Noel lah chuan dawr atanga chhuah pah hian , ' A thawn tu handwriting a chhiat danah a dawn awm tawk lek a nih kha ' ngeiawm zet hian a rawn ti kher a nih chu !!! 

V-a chu a nui ri nghal huk a ,  ka thinrim bawk nen Dr Noel ka ngei bawk si , min ti zak lutuk a va um leh a va back kick pawp te nia ka chak ni . 

____________________________________________

Hun a kal chak bawka kan ti nek nek a First Term exam chu kan zo leh der tawh a , engmah ka thiam loh chu sawi loh lehkha ka zir ngai bawk si lo a a engamah hma in fail turah ka in dah nghal hmiah a , ka rilru ka ti hah duh bik ṭhak lo. 

Exam zawh school chawlh lai a ni bawk nen ka nutei chuan damdawiin lamah amah pui turin min ko phei deuh reng a , Dr Noel erawh a buai thin em avangin hmuh tur a awm mang ngai lo .Ka hmuh ve chhunah lah nurse Grace nen an lo awmdun ve ziah lehnghal a , ka thik lutuk hi ka mood te a fuh loh phah vek zel . 

Tuk khat chu damdawiin a ka kal tur room atanga ka chhuak chu ka pu chuan Envelope pahnih min rawn pek pah hian ' Ka-te heihi i thil tur em ni ? ' a rawn ti ta mai a , a hma daih tawh a ka envelope dawn nen khan a in an chiah avangin mak ka ti hle . 

' Pu heihi khawia mi nge ? ' 

' Kawngka bulah sawn alo awm a , i ta tur aniang chu ka ti mai a ' 

Envelope lak pah chuan , ' Pu Damdawiin ah ka phei aw ' tih leh chhuah ka rual nghal a .

Kal pah in Envelope chhunga lehkha chu ka phawrh chhuak phei mawlh mawlh  a , a chhunga thu inziak ka chhiar chuan a hma ami ang chiah "Ka lo nghak reng ang che " tih bawk chu a pahnih ah chuan a lo in ziak ve ve a , min rawn thawn tu ka hre bawk si lo a ,a thil tih dan vel hian mi rap ru angreng hle . 

Kawng pawh en mang lo a envelope in chei par dan vel ka en ngur ngur lai chuan tu emaw ni hi ka su chawrh mai a .

'Kawng en ta che ' tiin a zui nghal zat bawk .

' Awi Karei!!....ka tihpalh lutuk ' Dr Noel anih avang chuan ka ti nghal chul a , a vin danah hian tihsual ka nei leh tawh tih hi hrilh ngai loin a hriat nghal mai . 

' I thluak hi hmang ve thin rawh ' min tih zek pah in thil zawn nei niawm tak hian  kun meuh in hnim(grass)kar chu a en kual a , ka sut na lamah khan thil thloh a nei aniang . 

' Ka thluak te chu ka hmang reng  ,ka mit ka hmang lo zawk alawm ' ka lo la ti zut zut zui . Chhan pawh min chhang peih tawh lo aniang ka ṭawng hre lo ang mai hian a thil zawn lai chu a chhunzawm mawlh mawlh a . 

'Eng nge i zawn a ? ' tia ka zawh lah chuan , ' Kal tawh rawh ' tih ringawt hian min chhang a mahse a thu hi awih ka tum bik der lo .

' Ka lo zawn pui ang che ' ka ti a ,phur zet hian ka zawn tur ber pawh hrelo chuan ka zawnpui ve ta ringawt a .

 Eng tak chu zawng ang maw? 

' Eng nge kan zawn ber hi ? ' titi mawlh mawlh pah hian hnim kar te chu kan keu kual vel a ,ka ṭawng peih lutuk a min ning deuh aniang a ngawi ngul reng mai . 

Chutia hnim ka keu ka keu lai chuan ka envelope dawn ka zakzeh ṭai lai chu a rawn en tih ka hriat chuan rang takin , ' Ka dawng leh a ,tu min rawn pek nge pawh ka hrelo ' ka lo ti nghal ringawt a , lehlam a hawi lehnghal daih a ka lo ner khum nang mai. Min chhang peih lo viau aniang . 

'Kan zawn ber pawh min hrilh duh si lo a engtin nge ka zawn hmuh theih anga bakah sawi a harsa viau mi a ? ' tia ka phun mawlh mawlh lai chuan hnim ka keu  kual na lamah zungbun phakhat hi ka zuk hmu nawlh mai . 

' Aii.... hei zungbun ka chhar ' tih leh bun ka rual a , a lian em em lehnghal. 

' Khawi ... ' tih pahin min rawn laksak chu a tum nghal ringawt a , ka lo phal bik lo .Ka kut chu hnung lamah ka thukru nghal daih a .

' Ka hmuh a nih hi ' tiin ka lo tang ve tlat a . Ka chhar ania ngahnge min rawn chhuhsak a tum ve ringawt. 

A kut rawn dawh pah chuan thupe deuh hian ' Min rawn rawn pe rawh ' a rawn ti leh a , a hma aiin ka kut chu ka lo hum nghet sauh a . 

' I thil zawn lai kha zawng mai mai rawh , ka kal dawn ' tih paha kal ka tum chu min rawn chhuhsak a tum leh ta mai a , tha ah ka hneh ve si lo a a kut ah ka lo seh sak vak a , a kut a la let rang teh e . 

A kut ka sehna chu a na ve ngang aniang , ka seh na lai hup pah chuan' Mi thluak thawl nu ka zungbun kha min rawn pe rawh ' vin zeta a rawn tih takah chuan a kut zungtang chu ka zuk thlek nghal vat a , a zungbun bun thin kha alo bun tawh lo tak tak .

Anih chuan a zungbun a ni tak tak aniang . Arghhhh.... mi thluak thawl nu . A zungbun a ni tih ka hre ve kur sia hnial ngaihna ka hre tawh lo. 

'Sawi ve mai ta che ' tiin ka lo vin let zawk zamah a . 

Ṭha deuh in min hrilh ve mai mai sela chuan neih ka tum bik hauh lo ang . 

A zungbun chu sawi buai lo in ka pe let zal zal a , nupui pawh ala nei tawp si lo a he zungbun hi a kut veilam kut zungte ù ah hian a bun ve ziah lehnghal a , a hlut ve hle aniang tun bak hi a phelh lai ka la hmu lo . 

___________________________________________

School chawlh lai a ni bawk nen ka pu ṭhianpa workshop nei te khan min rawn pui rawh an tih reng avangin pui turin vengthlang lam panin ka in khalh thla a . 

Diakawn ah thil leiin ka ding kawi lawk a uBuati dawra ka ṭhut khawmuan lai chuan Tlangval senior ṭawng thei zet mai Zara leh a ṭhianpa chu an rawn lut a , ka hlauh ang ngeiin min rawn ko leh chat tawh .

' Carolyn vawiin chu .... dawn em? ' tiin min rawn chhaih vel a , nuih pawh ka nui peih lo .

Hmanah uZara hian Rempuia nen a kan in fawp lai min lo hmu fuh tawh a ,a tawng thei bawka a tuk lawkah khawpum a fan chhuak nghal vek thei nia mawle!!

Ka lo hmingchhe sa bawk nen mipa ho hian min chhaih nan tak an hmang lehnghal a , mi khawlo leh lerh tih te pawhin min sawi fo thin tih hi mi ka aṭang pawhin ka hre thin a ni . 

'Mawh Carolyn ? ' a rawn ti leh a , ' Kal mai teh ' tih te mai hian ka lo chhang hmuk a .

'Nang te hi chu i hmel a ṭhat nen i thak ve ngawt mai, bialpa engzat nge i neih tawh? ' tih te in min rawn zawt vel a , hetiang thu hi a lak aṭang hian ka dawng fo tawh a ka ngawih bo san mai mai thin mahse ngaiah erawh ka nei thei ngai dawn lo chu a nih hi . 

' Zara... Mamuani dawr kawtah in rel hrep tawh a ,hmaichhan ah em em hi chuan insum ve thin teh u ' tiin uBuati chuan min lo chhan a .

Mamuani dawr kawtah hian rawlthar leh tlangval ho hi titi pahin an ṭhu khawm ṭhup thin a , hmeichhe chungchang an khel thin a ka chungchang ngei pawh an sawi nasa thin hle tih ka hria mahse rilru tih nat phah nan ka hmang duh ngai lo a ni. 

Zar bala bawk chuan ' Carolyn hi chu kan khaw tleirawl ho zingah chuan a hmeltha ber ang ,a hmel en mai hi chuan a fel hmel mawle han awm tha deuh phei se chuan  ' min tih el zeta a rawn tih leh takah chuan ka ngawi mai mai thei tawh bik lo .

Ngawi rengin ka ding nghal hluai a , ka chhuah hma chuan nuih deuh pahin aw dam dap si hian , ' UZar nangchu i hmel en ringawt pawh hian i thaw a uih tih a hriat. Han in tifai ve deuh la chuan ....' ka ti let ve sak a ,sawi zo lo in ka kal daih a , uBuati nui ri hawk hawk ri chu ka hre zui zat bawk . 

Mipa ṭhenkhat chuan ka hmaichhan ah ngei awm tha deuh la chuan pasal tha tak i nei ang , i nun han uluk deuh la chuan sang tak ila thleng ang tih te in min hrilh thin a a chang chuan keimah leh keimah hi ka insit phah fo thin a ni . 

Ka nun dan avangin mipa tamtak in nupui atan min iai a , ka hun kal tawh avangin mi tamtak in min ngainep a hnunglam atangin min nuihzat a ni tih pawh ka hria, an duh duh sawi mahse pawi tih na ka neilo a chhanchu ka dinhmun ah an din ve miau loh avangin ka nun hi min hriatthiam pui ve lo a ni . 

Workshop ka thlen rual rual chuan workshop neitupa uHenry chuan , ' Bawihte tractor hi a ṭha nge ṭha lo zuk test hmasa ber teh  ' tiin min lo tir lehnghal zat tawh a . uHenry hi chuan min duat bawka , a thu hi vawikhat pawh ka hnial ngai lo . 

' Test dawn chiang  .... tui kan in phawt ' tiin ka lo chhang nghal vat a .

Workshop ah hian a zawng zawng thiam in hre lo mahila helai hmunah hian ka tal tam em avangin welding leh motor ke lo phawi leh vuah te pawh ka thiam ve thlap a , two wheeler leh four wheeler nen lam an siam ṭhat sa tawh te chu a ṭha nge ṭha lo tiin ka khalh chhin thin bawk a , motor part leh hmanrua chi hrang hrang te chu ka lo tih fai sak thin bawk a ka thu mai mai hman ngai bik lo . 

Tui ka in zawh chuan , ' Khawiah nge chahbi ? ' tiin ka zawt a . Workshop a thawk ve tho UHenry nau Mama chuan tractor chahbi rawn theh pah chuan uHenry hriat loh in cigarette chu zaizir hian min rawn dil a , nakinah tiin ka lo signal zeuh a . 

UHenry hian a farnu ang tak tak in min en a , min duat in min duh sak em em bawk chuvang chuan amah pawh hi ka zah in a bulah hian meizial zuk chu sawi loh zu  thin ang pawhin ka awm ngam lo . 

Tractor ṭawng zet mai nithum vel an siam tawh chu a ṭha nge ṭha lo tih test tur chuan kan ti nung hlat hlat phawt a ,' a ri pawh a dik khawp hi ' kan ti nghal ringawt a . 

Motor ka test reng reng hian thui tak ka khalh ngai lo a , workshop aṭanga hla lo te ah hian field a awm a chulai thleng bak chu min khalh tir ngai lo a ni . 

' Ka kal ' tih pahin ban vai chungin field lam pan chuan ka liam thla vut vut a , motor ka khalh lohna a rei tawh bawka ka khawr hman ṭep alawm mawle . 

Ka let leh chuan uHenry ṭhiante chu an bike check fel turin an lo awm khawm laih laih a , kan innel hlawm bawk a an zinga awm hi hrehawm ka ti hran lo . 

' Eng nge ka lo tih leh ang ? ' tiin UHenry bulah chuan ka zawt leh a . 

' Bawihte , vawiin chu tihtur a awm vak lo . Han ṭhu chawl phawt la khalai ah khan greese ilo tat dawn nia ' a tih chuan phur takin ka ti nghal vat a , thil tih paha han titi vel te chu nuam ka ti in an ṭhian ho bula awm hi nuam ka ti takzet . 

UHenry buai lai tak chuan a hriat loh hlan in Mama chu ka va kheuh zeuh a , kan pahnih chuan ngawi rengin meizial zu ru turin bathroom ah chuan kan inzui lut daih a , min lo zawn loh hram ka beisei. 

Bathroom-a ka luh rual rual chuan 'Khawi ka zu chak tawh teh mai ania ' Mama chuan alo ti ve sek bawk a .Ani pawh hian UHenry hi a hlau ve tho a , a bulah chuan zu ngai lo angin a awm hmiah a ni . 

Mama chu commode sirah ṭhu in thlamuang zet hian a han si khu vang vang a keiin zial pet kawh vu chung hian kawngkhar ka lo veng ve thung a, tudang hi kan ngai lo reng reng. 

' Tunlai i nei leh ṭeuh tawh em? ' tiin min zawt a , engkim a hriat ve vek avangin zep ka tum hran lo .

' Teuh lo .... khatiang kha chu ka sim tawh ' ka tih rual rual chuan mak tih hmel tak hian min rawn en a , ' Maw !! ka sim tawh a? Ka awih lo... ' tiin awih loh hmel zet hian min chhang a.

Nia , ngaihzawng neih loh lai kha ka nei ngai tlat lo a mak te pawh a mak ta ve ang mahse Dr Noel an ṭawngkam a neih aṭang khan ka zak lutuk kha neih leh chakna pawh ka neih tawh loh phah a ni . 

' Ka ti tak tak zu pawh ka in tawh ngai lo ' 

' Hahh.... avan mak em em , i heh theih theih nen mahse ka lawmpui che ' a rawn ti leh a , Mama pawh hi ala ã ve sia ka bulah hi chuan han sawi hreh pawh hi a nei lo . 

' Khatiang khan min ti suh aw ....ka fel san daih dawn che zanah pawh ka leng tawh ngai lo ' ka tih phei chuan a awih lo lutuk chu a ner zui nang nang mai . 

' I daih rei awmlo emai ' a rawn ti zui leh hram a .

 Single te, zu in tawh loh te leh zan a chhuah ruk loh te hi ka in hmeh lo viau emawni le ? 

'Ka sawi chuan awih la nimai ' tiin ka chhang zui leh kher a . 

' Lehlam hawi rawh ka zung dawn ' a rawn la ti ham ham zui . 

' Lalzamlian insum ve deuh rawh , kan zuk zawh ah i zung dawn nia bakah .... ' ka sawi zawh hma hma chuan a rawn te nghal ṭhat , a na ti lutuk chu a au chhuak lo chauh .

' Eng nge .... engtin nge i awm ? ' 

' Ka .... ka sazu ka zih hnan ' a tih lai te chuan a ṭhen chawk chawk a , a ngaihna pawh ka hrelo . 

'Khawi .... khawiah maw? ' ka lo la ti hu zui .

' A na lutuk , phelh vat rawh ' tih pahin a kap chu a han hup vang vang a , ani ai pawhin ka lo mangang zawk . 

' Khawi ... lo khawih ve suh keiman kan ti ange 'tih pahin ka meizial ken lai chu ka seh kawh vu a , UHenry koh na chi lah ani bawk si lo . 

Ka theih ang tawka dim in a kekawr zipper chu zih thlak ka han tum chhin a ,a kekawr ka khawih chet hlek lah in na a ti em em mai bawk si . 

' Thawm lo siam tawh suh midang in an rawn hria ang ' tiin ka la vau zek zui .

' Zih hnan ve la chu na i ti ve tho ang ' vin zet hian a rawn ti a , a nat tur zia mit ngeia hmu tu ka ni a , a tuar tu ni lo mah ila ka thaw te hi a chham mai dawn in ka hria . 

'Lo che tawh suh .... 1... 2.... 3 ' tih leh zih thlak pawp ka rual a , a na ti lutuk chu a au chhuah mai loh nan a ka chu ka hup sak tawp a mahse kan phelh hlawhtling hlauh .

' A na em ... ka tihpalh lutuk , tikhan a nuam sawt em .... Tikhan ' ka ti leh chiah chu tu emaw hian bathroom kawngkhar chu a rawn hawng thut mai a , Dr Noel nen kan in hmuh rual chuan kan mengphawk dun chiang ngei mai . 

Read More

Dr Noel 2 - 22

 CHAPTER -22

' When you fall in love with someone, you don't need to think about why. You just know it. ' 

Ward ka round zo office a ka lut tur chu Carolyn Ex leh ka patient ni bawk Duhawma chuan min lo ko a . Carolyn alo tih buai avang khan ka ngaihdan nilo mahse ka patient a nih avangin midang nen angkhat vekin ka en tho a ni . 

' Doctor vawikhat chiah chhuah min phal sak rawh ' a ti a , chhang lo in ngawi rengin office ah ka luhsan a ,' Khawngaih takin ' tia min ngen pah chuan office ah min rawn zui lut zel a . 

A chhuah chuan Carolyn a va tihbuai leh ka hlauh avangin a dilna hi engtik ah mah pawmsak ka tum lo . 

'A rei lo ang minute 5 lek a ni mai, damdawiin hi ka ning lutuk tawh a ,intih thawven na hun min pe rawh ' a tih pawh chuan' Khalai velah khan in ti thawveng rawh ' tiin ka chhang a file chu ka en san leh a . Rawlthar hmangaihna la na ve satliah ah ka ngaihsak a ni . 

A zawhna ka chhan that duh loh avang chuan  a thinrim chuan dawhkan a lehkhabu paih pah hian ' Tuman min dal dawn lo ' tiin min vo khur khur a .

Eng ang pawhin min vau in min ti thinrim mahse ka patient te lakah hian thinrim hmel leh lungawi lo hmel ka pu ngai lo a , hnek thluk tawp chak chang nei ve thin mah ila an lakah kut ka thawh ngai lo a ni. 

A lehkhabu paih chhuata let bal zuk en pah chuan ka file chhiar lai chu ka khup a , ' Ka discharge hunah che i in ti thawveng dawn nia , i khumah let leh tawh rawh ' tiin ka chhang a , a duh ang chhanna ka pek loh avang chuan a hmel atangin a lawm lo tih a hriat theih a ni . 

' I hre khawp ang ' tih pahin ka office atang chuan a chhuak nghal nal nal a , a ni thinrim kha ka thengthawng ah a thawk lo bawka ka file chhiar lai chu ka chhiar chhunzawm leh nghal a . 

File ka en lai chuan Nurse Grace in damlo ho file min rawn pek pah in' Sir .... VC ho kha an rawn kal leh tawh em? ' tiin min zawt a ,an rawn kal tawh dawn loh thu in ka lo chhang a .

Hman zana damlo awmpui tu bengchheng zet ka hnek avang khan khaw mipui te sawi zui ka hlawh em avangin khawtlang hruaitu ten ka office ah min rawn hmuh phah ta ringawt a ni. 

Ka chet dan kha a dik loh avangin damlo te hnenah pawh ngaihdam ka dil tawh a mahse damlo awmpui tu khatiang tak maia a bengchhen avang leh damlo dang a tih thlabar avang khan damdawiin in khapa chungah khan action na takin a la nghal a .Doctor kut thlak a tum avang pawh khan ka hnenah ngaihdam an rawn dil tawh a ni . 

' Bed no.5 kha DNS ilo khai sak leh dawn nia chuan Bed no.2 leh Bed no.8 hi antibiotic kha ilo kal tir chhunzawm dawn nia ' tiin a tih tur chu ka hrilh nghal zung zung a , nurse fel leh smart tak a ni a a hnathawh danah sawisel tur ka hrelo a ni. 

' Aw le Sir ' 

'Chuan Bed no. 3  C .Lalduhawma kha ilo thlithlai deuh dawn nia ' tiin ka chah chhunzawm zat a .

' Engtia thlithlai in ? Khapa kha chu a ṭha tawh viau sia ? ' a aia chiang zawk chuan min rawn zawt leh a , ka pen ken lai dawhkana dah pah chuan , ' Bathroom ah a kal te a nih loh chuan discharge hma chu a khumah khan a awm tur a ni ' thupe tak chuan ka ti a .

Carolyn hi a hmu tawh tur a ni lo , a chet duh dan aṭang khan Carolyn tan a hlauhawm thei a ni . 

' Ka hrethiam e ' a tih chuan , ' I kal thei tawh ang ' tiin ka lo chhang a mahse a kal hma chuan a rawn hawi let leh a , ' Sir , ka bai rawn suah che kha eng nge a an ? 'tiin min rawn zawt a ,ka chhanna hriat chak hmel tak chuan min rawn en reng a. 

A nihna takah chuan a bai ah khan chingit a tel avangin ei lo in fridge ah ka la dah a , min duhsak avanga min rawn suah ni mahse chingit hi rimchhia ka tiin ka ei ngai lo a ni . 

Mitam takin min duhsak avangin thlai thahnem tak min rawn pe thin a , rawng pawh bawl ngai lo khawpin chawhmeh pawh min suah nasa mahse chawhmeh ah hian ka khirh avangin ei lo a ka paih chu a tam zawk a ni . Min duhsak avanga hetiang thil hi ti an nih avangin lawm takin an thil pek hi ka lo dawng thin a , ei duh lo mah ila ka thinlung takin an chungah ka lawm a ni . 

Chhan dan tur ka hriat loh avangin ' Aghh ... 'tiin bul ka han ṭan te te phawt a , dawt ka sawi ang nge sawi lo ang tia ka rilru a insual lai chuan thawm ri rawk kan hriat avangin pawnah kan tlan chhuak nghal vat a , ka chhang hman ta lo a ni . 

Pawn kan va chhuah chuan Carolyn in mipa naupang tap hluam hluam alo thlem lai chu kan va hmu hman a , an bula wheelchair lo let bal ka hmuh chuan thil awmdan ka tin zawn thiam nghal . 

' Grace naupang saw anu bulah va hruai rawh ' tia ka hrilh rual chuan naupang chu pawm in a kalpui nghal vat a , keiin Carolyn ban chu vuan in ka pawt tho nghal zawt a . Henu bulah hi chuan thinrim loh tum pawh hian ka zaidamna hian a tlin thin lo . 

Midang an awm lo bawka 'Engthil nge i tih hi? Wheelchair hi tu phalna in nge i lak chhuah ? ' ka ti vin ṭhah a , hrehawm tih hmel tak hian a ngawi reng a .

Carolyn a danglam ve na chu a thiam loh ah chuan a ngawi reng a , a thiam zawk anih erawh chuan tuma sawi sak a ngai lo ,ama tan hian a tawp thlengin a dingchhuak ngam a ni . 

'Naupang kha a tlei duh lo a wheelchair a nawr loh chuan ' inthiamloh hmel tak hian a rawn ti a . 

' I thluak hi hmang ve ta che wheelchair hi infiamna tur a ni lo ... in in ti na palh anga sin ' ka ti zui hlak a .

Damdawiin hian Wheelchair pakhat chiah a nei a chupawh a tul zual ah lo chuan kan hmang ngai lo a ni . Ka awmtirh aṭangin wheelchair hi ka dil tawh a , kar hmasa ah khan kan dawng ve thei chauh a chuvang chuan ka dimdawi in ka uluk hle bawk . 

' Ka tihpalh lutuk .... i uluk zia pawh ka hre tho a mahse tihdan dang ka hrelo a lawm' ka hriat theih chang chang tur chuan a ti a,chhang lo in office ah ka let san a .Ka vin avang khan keimah zawk hi ka inthiamlo leh hnuhnawh . 

Ka thil tih lai kha chhunzawm leh ka tum zet a mahse ka inthiamloh avangin pawnah ka va chhuak leh a,Carolyn erawh alo awm tawh lo .

Ka office ah let tawh lo in Female Ward-II lamah min koh avangin chumi lam pan chuan ka kal a .Female ward - l ka thlen chuan nui thawm ka hriat avangin kawngka zawnah chuan ka ding a , damlo ho in Carolyn fiamthu an lo nuihpui chu niin ,mi ti pawlh pawlh leh che fel lo ve tak a ni a, amah chauh nilo in Nurse Rintei pawh a lo awm hlauh a ka va in rawlh duh ta lo a ni . 

Nichin lawk kha chuan ka hauh avangin rilru na takin ka siam a , tunah chuan hlim hmel pu sang chungin damlo bulah a awm leh thei a mi hlim thei tak a niin ka hria . 

Female Ward -II a ka luh chuan nimin lawka nau nei Pi Lalnunziri chuan naute hnute pek pahin a fa upa zawk harh ve tawh tak tap chu alo thlem bawka , nichin lawka Carolyn nau awm kha a ni tih ka hre nghal . 

Pi Lalnunziri bula mu damlo chu ka enfiah nghal zung zung a , a file ka en dik lai chuan Pi Lalnunziri chuan mittui tling pam chung hian , ' Doctor...nichin khan ka fate pahnih tap hi an bang duh lo a , a upa zawk min lo awmsak tu kha tunge a hming ka hre ta lo a chungah khan ka lawm lutuk tih min lo hrilh sak rawh aw' tiin min hrilh a , a hming sawi lo mahse Carolyn a ni tih ka hria .

' Aw le ' tiin ka lo chhang vat a . A bula damlo awmpui tu pawh chuan , ' Nurse lah khan a rawn hau hrep lehnghal a , a pawi tak tak a ni ' tiin thupha alo chawi sak a . 

Nurse Grace in alo va hau hrep ni tur a ni mahse a bul tum tu ber ka ni a , Carolyn lakah ka inthiamlo zual hle a ni . 

Carolyn hi a hnawk viau emaw tih pawh hian damlo te a ti hlim in ṭangkai na mual mual hi alo nei ve a , maktak maiin a awm loh chuan damdawiin pawh hi a reh phah hle thin a ni . 

Ward atanga ka chhuah chuan Nurse Grace-i chuan ,' Sir , Zanin chu chaw lo ei la ' tiin min sawm a mahse ka hman loh tur thu in ka lo chhang a . Grace hian vawitam chaw ei ah min sawn thawh thin a , a rilru tih nat ka hlauh avangin tha takin ka hnial zela mahse a lehpek a awm zel avang hian ka tih tawp vat angai a ni . 

Chaw ei a sawmna hi khaw mipui te atang pawhin ka dawng thin a mahse midang inah chaw ka ei ngai loh avangin mawihnai takin ka lo hnar thin a ni . 

' Anih chuan engtik ah nge i rawn ei theih ang ? ' tia min rawn zawh leh lai tak chuan Carolyn pawh ward atangin a rawn chhuak ve chiah a , mahse min hmu lo ang maia a kal daih avang chuan ka enzui vang vang ringawt . 

' Sir ... ' Grace'in a rawn tih leh takah chuan rang takin ka insiam tha nghal vat a . A lehpek awm tawh lo turin , ' Grace tuma inah chaw ei ka tum lo chuvang chuan min sawm tawh suh ' tiin ka chhang hmiah a , ka laka beiseina an neih zel ai chuan a tawp thlenpui nghal zel hi ka duhdan a ni . 

Phone call ka dawn avangin ka phone chu ka zuk melh zeuh a Evelyn alo nih avangin ka phone hmeh thim pah chuan , ' Min lo hrethiam rawh ' tih leh kal ka rual a . 

Evelyn chauh nilo number hriat loh dang dang hian min rawn call loh leh min rawn text fo thin a , ninawm lamah a kal ṭan . 

★ Carolyn's POV ★

Test na ah ka fail leh avangin Miss in ka nutei a ko ta nge nge a , ka live letter kha alo hmuh tak tak aniang ka lakah a thinrim in a ang reng a , lehkha zir turin min nawr reng mai . 

' Min hau tawh lo teh ' ka nutei bulah chuan ka ti ta ringawt a , a ninawm ve em a ni .

Damdawiin bungrua vel dah fel pah chuan a ang chhunzawm zel a , ' Lehkha zir rawh ka tih apiangin room ah i lut ve ziah sia , ilo zir ngai reng reng lo a nih hi. Chubakah  Noel an a hre riau riau ange ,a zahthlak lutuk' a ti tan tan a , ka lo ning takzet . 

' A hre daih tawh ' ka tih phei chuan ka nutei zak lutuk chu a sen nghal vek a , zaktheilo min ti viau ang . 

' Kum 17 chauh i nih hi .Dr Noel ang ngaizawng rual pawh i nilo .Nilo .... ngaihzawng ngaihsak rual pawh i nilo .In Miss chauh pawh a ni tawh lo in Principal pawh in min ko tawh a , a zahthlak em em lutuk . In miss Hlui phei chuan a fail reng chuan final ah a in exam thei lo ang a tih che kha ' 

' Ka in exam lo anga ni mai ' ka lo ti sam et a , ka exam ve an phal lo anih chuan in exam hi ka chak bik reng reng lo . 

'Va haw la lehkha va zir ve rawh , karleh ah in test leh dawn a pass ve ngei ngei tum tawh rawh ' a tih pawh chuan ka rilru te te chuan zir ka la tum chuang lo .

Ka nutei hian Dr Noel laka ka rilru put hmang hi tleirawl hawklak rilru nghet lo leh star satliah ve mai mai angah min ngaihsak avang hian min hau na vak lo ni in ka hria mahse kei ve thung chuan pasal atana neih duh hial khawpin ka duh ve thung a ni . 

' Kha i Love letter hi la la , lehkha lo va zir ngei ngei rawh ' a tih chuan ' Ninawm e ' tih nang nang pahin love Letter chu ka la a  room atang chuan ka chhuak tau nghawng nghawng a , chutah Dr Noel chu kawngka bulah alo awm reng chu niin ka love letter ken lai chu ka thukru rang ngei mai .Ka nutei thusawi kha alo hriat vek loh hram ka beisei . 

' Hi 'tih pahin zahzelah ka nuih sang a ,ngaihna awmlo min tih hmel zet hian min lo en thung . 

' Aghh.... ka kal dawn bye ' tih bah nuai pahin ka letter ken lai chu ka kawr hnungah ka hnawh chho nghal a , awmze awmlo in ka zam ve em em ringawt. 

Ka pen tur chu ka hnungzang a ka lehkha hnawh ngei mai kha chhuatah a tla ta tual mai !  phawk fe hian ka hawi let a ka chhar hma in min lo la chhar khalh zui . 

'Hei thil i .... ' a rawn ti leh dek dek a , Love letter chungchang vel kha a sawi dawn emaw ka tia , a sawi zawh hma hma chuan hnuai lam melh pah hian , ' I duh leh zak thei lo pawh min ti rawh pawi ka ti lo , Love letter pawh kha la rawh , ka ziak ve mai mai a nih kha . Ka duh ve che a ni mai a , tih sual engmah ka nei lo ' ka ti nghal zung zung a , a ngawih reng avangin ka han hawi chhuah nak chuan mak tih hmel deuh hian min lo en reng ringawt.

' Love letter maw ? Eng nge awmzia?' tih pahin a thil ken lai chu a en a , ala ak ṭha hmak zui . 

Lalpa leh !! Tunah khan eng nge awmzia tiin min zawt tiraw ? 

Engkim alo hre vek emaw ka tih kha engmah alo hre miah lo a ni tih ka hriat chuan ã ka in ti lutuk chu tah vak mai ka nap .

Engmah hrelo kha engkim ka hriat tir hi a ni ringawt . Ka zam lutuk vang vek .

'Ka .... ka ti mai mai anih kha , khawi lehkha kha min pe let rawh ' ka ti leh hnuhnawh a , min rawn nuih pah hian ka chal ah a rawn kuk ṭawlh a, ' Mi ã nu ...Lehkha va zir rawh ' tih ringawt hi a sawi a , room ah min luh san daih ringawt. 

Ka zak lutuk chu ka in sik nghal nawk nawk a , ka hmuh leh ngam pawh ka ring tawh lo . 

Zana ka mut lai te chuan vawiin a thil thleng kha ka ngaihtuah chhuak zel a , ka zak lutuk hi ka muhil thei lo a ni ber . Dar 12 a rik hnuah pawh ka mut theih loh avang chuan ka pu bulah ka va insawn ta ringawt a , mut ka tum ruh bawka ka mutthilh lai pawh ka hre lo . 

Ka type hmanhmawh deuh avangin Spelling dik lo pawh a awm leh nual anga , a dik lo lai in hmuh chuan comment lamah min lo hrilh ula ka lo siamtha nghal vat dawn nia . 

 

Read More

Dr Noel 2 - 21

 CHAPTER -2

"Love is that condition in which the happiness of another person is essential to your own."

Dr Noel an zurui pakhat a hnek aṭanga kar 2 a ral leh hnuah pawh mi sawi zui ala hlawh renga , khawpum hi a fan chhuak a ni ber e.

Ka nutei sawi dan phei chuan kan khaw VC member ho Dr Noel office ah an len lut phah hial a ni awm e mahse school kan luh tawh avangin damdawiin ah ka kal tawh ngai lo a ,a kimchang in engmah ka hre zui hman ta lo a ni . 

Pawl 12 kan nih tawh avang leh first batch kan nih avangin luh tirh phat aṭang in kan zirtirtute chu an ṭang nghal hle a , kei tih loh chu an ṭang ti ila ka sawi sual lo ang . Te-i leh Awmtea te takngial pawhin pass ngei an duh thu an sawi laiin kei erawh school hi a hming mai mai in ka kal a , pass tumna pawh ka nei lem lo . 

Science stream pawh hi ka ṭhian ten an lak avanga la ve mai mai ka ni a , school pawh hi tih tur dang ka neih loh avang leh ka nutei vanga kal ve mai mai chauh ka ni . 

Ka nu in min kalsan aṭang khan nun lo hoh zia leh vanah kalpui tur engmah kan nei lo tih chu ka thupui ta ber a , engkim hi ka la dam ve avanga ti mai mai chauh ka ni . 

'Carolyn .... Homework kha i ti em? ' Te-i chuan min rawn zawt a , homework kan nei tih pawh ka lo hre leh pek lo . 

'Kar 2 vel bak school kan la kal lo a, homework min pek hnem hman zia hi ... ka ti peih teuh lo ' ka lo ti sam et a , hrem ka tawk leh mai aniang chu .

' Zirtirtute ho pawh an tan em hi , keichu Class -Xll hi ka pass loh chuan ka pa in min that a ni mai ' Awmtea chuan alo ti nghal vat a , Class -XII pass hi a pawimawh na pawh ka hre ve lo . 

Te-in ' Nia ... Caro , lehkha zir hi ngaihsak ve deuh rawh ' a rawn tih leh chuan thiam tak hian , ' Kan ṭhat lai hun reiloh zia hi in hriat ve tho ka ring hemi hun reilo te pawh chen lo a lehkha kan zir bo daih te chuan engtik hun ah nge nun kan chen ang ? Kan tar hun ah maw? Thih hunah i Class-XII certificate kha i keng dawn lo ' ka lo ti luam a .

'Thil lah hi dik deuh deuh hian i sawi a , mahse engmah hi i hre tak tak si lo amaw ' Te in a tih chuan ka lo haw deuh reuh ve khanglang a , engmah hrelo nih chu ka duh bik der lo . 

'Ni e i hre ber alawm ' ka lo ti nghal vat a , kan in ti thiamlo chu a ni nghal der . 

Kan ṭhian ho hi chuan inhnial leh in tih thiamloh chang han nei ve bap bap thin mah ila kan in haw rei thei tak tak lo chu a nih ber hi tun thlenga kan la in kawm ho ni . 

' In ninawm in hau reng suh u .... saw Miss Hlui a rawn kal ' Awmtea chu a rawn in rawlh nghal vat a .A laiah ka ṭhu bawk sia in hnial zui lo mah ila kan pahnih chuan kan la lungawi lo ve ve a ni tih hriat theih khawpin kan awm thung . 

Miss Hlu'in kan zirlai a sawi fiah lai chuan thil dang daih chu ka rilru ah a rawn lut a chu chu engtin nge Dr Noel hian ka la duh reng a ni tih hi a hriat theih ang tih chu a ni . 

' Enteh Awmte .... ' ka ti dek dek a ani chuan zirlai ngaithla turin min lo ti vat a mahse ka tibuai lui ta tho a .

'Reilote ngaithla lawk la ' ka tih pawh chuan hma lam chu a melh tlat a , min sawipui duh tak loh avang chuan Tei chuan ' Lehkha thawn rawh ' a rawn ti khoh peka .

Nichin lawka in be duh lo kha Tei a rawn ṭawng hmasak takah chuan tihian kan in ngeih chu ani lehnghal mai . 

' Engtin nge ka tih ang? ' tih pahin ka bag a paper chu ka phawrh chhuak nghal a , tlar hnung berah kan ṭhu lehnghal a , titi char char mahila ngaithla ang deuha awm kan thiam bawka Miss in min man bik lo. 

Tei chuan Dr Noel hming ngei mai in bul a han ṭan te te phawt a , I dam lai a ni em ? tia a chhunzawn rual rual chuan , 'Tikhan maw kan tih dawn? ' tiin ka lo zawt nghal vat a , mahse lo ṭawng ve lo tura min tih takah chuan a thil ziah lai chu a sirah ka lo en a , midiang hnenah lehkha ka la thawn ngai loh avangin ngaihdan han thawh vak tur pawh ka hrelo . 

Te'in paragraph thar a chuan kai dawn chuan ziak chhunzawm tura min ti avangin phur takin ka lo ziah chhunzawm a , hla thu bakah ka duh thu te pawh ka ziak kur nasa khawp mai.Chutih lai tak chuan Miss in paper chu min rawn laksak ta thut mai !! 

' In pahnih khan ding rawh u ' tih pahin tlar hma lamah paper keng chung chuan a kal daih a , Tei nen in en ralh ralh chhungin kan ding nghal a Sawm palian-in min rawn la nuih zui. 

Miss chuan engmah thleng lo ang maiin zirlai chu a sawifiah chhunzawm mawlh mawlh a Tei nen erawh kan la ding reng thung . 

Class a tawp ṭep tawh tih in Miss Hlui chuan min thut tir ve chauh a , chutah kan nih tum pakhat te te in min la zawt diat diat zui . He zawhna zet hi zawng chhan harsa ka tih ber te zing ami a ni . 

A then chuan Nurse nih te an tum a , a then in Doctor. IAS nih tum pawh an bang chuang lo .

Ka hun a thlen ve meuh chuan nih tum han sawi mai tur ka hrechhuak thei der lo . Ka rilru chu a blank vek a ,nih tum chu sawi loh nih chak takngial pawh ka nei lo zu nia . 

' Carolyn nang eng nge nih i tum ve ? ' Miss chuan midang ang bawkin min rawn zawt ve a, ka chhandan tur hrelo chuan nuih deuh ṭhaw pah hian , ' Ka thih hma chu hlim tak leh dam leh hrisel taka awm ka tun ' tiin ka lo chhang peka , midangin min lo nuih nghal dar dar mai . 

Miss pawhin tih ngaihna a hre bik lo aniang ṭhu tura min hrilh pahin dawhkan a ka love letter ziah ngei mai chu a la a , dar rik rualin a chhuak nghal nal nal bawk . 

Lunch Break laiin Miss Hlu'in min rawn koh avangin hrehtak chungin office ah ka lut a , Love letter chungchang kha a nih ka ring nghal . 

'Carolyn khatah khan ṭhu rawh ' nelawm loh zet hian a ti a , ka thin a phu nghal dep dep mai . 

Miss Hlui hi chu a thin a chhia in mi hi a hau reng thin a , a hmel te lah hi Tom and Jerry a dawithiam pitar kha a ang lehnghal a , a nelawm loh ve hrim hrim . 

' Miss eng nge ? ' Aw khur dar dar chung chuan ka ṭhu a , min hau leh hrep dawn aniang . 

' I love letter hi i duh let leh a nih chuan test na ah i pass angai ang ' a ti a , ka lehkha zir peih loh zia a hriat avanga hetianga ti hi a ni tih ka hre nghal . 

'I la fail leh cheu a nih chuan i love letter hi i nutei ka lam tir ang .... kal tawh rawh ' a ti ta mai a , ka nutei a koh vaih chuan ka thi a ni mai . 

Miss Hlui hi chuan mi han tih hlauthawn leh han hauh vel dan hi a hre ve ngawt mai mahse a rilru erawh a ṭha phian thung . 

Office atanga ka chhuah rual rual chuan Awmtea chuan hlauthawng tih hriat tak hian , ' Kan Pitar-i chuan engtin nge alo tih che ? ' tiin min lo zawt nghal vat a .

' Test na ah ka fail leh chuan ka nutei love letter kha a lam tir dawn ' ka lo ti chuai raih a, lehkha zir hi chu in nawr na chi pawh a niin ka hrelo .

' A ni maw !! hei vang hi niang pasal pawh a hmuh theih loh nachhan ' Tei chuan alo ti ve tan tan bawk a , min lo thinrim pui hle mahse Awmtea erawhin, ' Lehkha i zir angai tawh tih na a nih chu .Karleh ah test kan nei dawn a zanin aṭangin zir tan rawh ' min lo tih khum hmak thung a , min ti hrilhhai chiang ngei mai . 

Chutia Awmtea meuh in a tih takah chuan Tei pawh chuan zanin aṭanga zir nghal turin min lo ti ve bawk a , lehkha zir hi ka peih loh zia leh ka ngaih hoh zia hi Miss Hlui hian hria se chuan min nawr lui hauh lo ang mawle . 

★ Dr Noel's Pov ★

Ṭhut mai mai paha lehkhabu ka chhiar lai chuan ka nu in min rawn call avangin rang takin ka pickup nghal a ,ka hello hma a a rawn tah avangin thil dik lo a awm leh tawh tih ka hre nghal . 

' Bawiha engtik ah nge ilo haw dawn ? ' insum tih hriat tak hian a rawn ti a ka hriat loh thu in ka lo chhang a .

'Rawn haw i tum tawh lo em ni ? Hei kum khat rawn haw lo in i awm mai dawn a nia ' 

' Eng thil nge thleng? Ka ù in buaina a siam leh tawh em ni ? ' tiin ka lo zawt thung a . 

Kan unau zinga upa ber Joseph-a hian zu in a ching a , a ruih apiang hian buaina a siam loh leh ka pa emaw ka u chiah OP-a hi ro vel avangin insual puiah a cho thin a , chhungkua min ti buai thin khawp mai . 

'Zanin chu zu alo in leh emawni i pa kut thlak leh a tum a , Dawrpui a kan in hmun saw a duh emawni ' ka nu in inhnit hlawp hlawp chunga a sawi lai chuan ka lo inhum ruh a , tih theih lah chu ka nei der si lo . 

' OP-a ko phei mai rawh u ' tiin ka chhang ta ringawt a .

U Joseph-a hian Dawrpui Civil Hospital thlanga kan building saw a hma daih atangin min lo chuhpui tawh thin a , intih buai ai chuan pek mai pawh ka duh mahse ka pa hian pe lo tura min la dan avanga la pe lo mai mai chauh ka ni . 

'Bawiha ... lo haw tawh mai rawh . I u hian duham chin tawk a nei ngai dawn lo a nih hi ' a tih chuan ka ngawi reng a.

'Ro vangin kan buai hi ka ring ngai lo ' ka ti chuai raih a phone chu ka off zui a .

Ka u te pahnih hian nupui an neih ve ve tawh avangin ka pa in inhmun tha tak a pe ve ve a , building ṭha tak an nei ve ve bawk mahse uJoseph hian engvanga ka chan ve tur hi min chuh pui tlat nge a nih ka hrelo . 

Lehkhabu chu chhiar chhunzawm ka han tum leh zet a mahse ka rilru tawt leh thinrim lutuk tih ziaawm tumin pawnah ka tlan ta zawk a .

Aizawl a awm a ka chhungte bula awm hi ka hreh avanga haw duh lo leh helai a tawm tlat hi ka ni lo . Ka haw duh loh nachhan chu helai hmun ah hian rilru hahdam takin ka awm theih vang a ni . 

Tetei theihnghilh chang ka nei ta fo mai a , hlim taka nuih chang ka nei thin bawk a ka tan chuan hmasawn na lian tak a ni . Amaherawhchu Tetei ka hriatchhuah apianga ka awmdan danglam nghal thin te leh awmze awmlo a ka thinrim thut thin erawh hi chu ala reh thei tak tak lo zawng chu a nih hi . 

Ka thinur na te tih ziaawm tuma rilru in sawrbing ngut ngut a ka tlan kual lai chuan damdawiin varanda ah kan patient pakhat,nimin a ka admit tak leh Carolyn-i te in pawt ti tih lai ka zuk hmuh chuan ka ding thut a , min tur tu an awm ang mai hian vawikhat pawh in ngaihtuah nawn lo in ka zuk pan hnai nghal a . 

An bul ka zuk thlen thlak chuan Carolyn in min rawn tibuai tawh suh a tih lai chu ka zuk hre hman a , ka in hum ruh rang kher mai . 

An bul hnai ka thlen rual rual chuan ' Lut rawh , i khum ah let rawh ' tiin chupa chu thu ka pe nghal a , min hlau tih a hmelah a lang nghal .

' Doctor... ' a rawn ti dek dek a .

'Tunah ' vin taka ka tih leh taka chuan Carolyn chu rum takin a melh zui a , a room lam panin a kal nghal a . 

A awmdan avang khan zawhna tamtak ka nei nghal a mahse midang nun a lo inrawlh hi ka duh loh avangin a engvanga tun ang huna damdawiin a rawn kal nge a nih chu ka zawt ta zawka .

' Duhawma khan min ko chhuak alawm ' tiin min lo chhang hmuk a . 

' Nawhchi zuar anga duh duh a koh chhuah thei ami i nih? ' ka ti vin hluk a . Mipa in duh duh huna an koh chhuah theih a nih hi ka duh loh vang a ni . 

'Kan inah rawn kal a tum alawm ... Ngatinge mipa te hian an bialnu hlui te hi an theihnghilh nghal mai loh . Ngatinge min umzui bik reng ? ' a rawn ti let zek a , thil awmdan chu a chiang nghal uarh mai .

A thil sawi engkim chu mimal taka min hrilh ang mai hian ka hria a ,Kei ngei pawh hian engvangin nge Tetei hi ka theihnghilh nghal mai loh . Engvanga a sulhnu engkim hian min umzui reng bik nge a nih ? 

 Chhanna ka nei bik lo . 

Ka tih ngaihna hrelo chuan ' Haw tawh rawh ' ka ti leh ringawt a , alo haw ngang mai .

' Ka duh lo, ngatinge min vin vak kher .Ka thiam loh pawh a ni lo ' tih pahin ṭhuthleng ah chuan a ṭhu tlat a , hmeichhe thinrim hi chu ka thlem thiam loh ber te zinga mi a ni . 

Kal sawn ta mai lo chuan a bulah chuan ngawi rengin ka zuk ṭhu ve a , a awmdan atangin thil dangah rilru hahna a nei tih ka hre nghal . 

Ka biak hma hma chuan , ' Lehkha zir hi i ning ve em? ' tiin min rawn zawt thut a , chu ngei chu a ni a rilru hahna chu .

Ka tum loh deuh zawhna min zawh thut avang chuan chhang lo in amah chu ka en a , lehlam hawi pahin ka khi vur vur ringawt. Hetiang em em a mi rilru inthlak hma hi ka la hre ngai lo . 

' Keichu ka ning lutuk , lehkhabu ka hmuh zawng ringawt pawh hian ka mut a chhuak nghal zel ' tiin a phun zui nang nang a , nui lo turin ka insum chiang kher mai . 

Henu tak hi chu , nui luih ngai thin kha amah avangin nuih insum ka ngaih tak hial hi . A tan chuan buaina liantham tak a ni dawn tih hre reng mah ila a rilru la thianghlim lutuk hian min ti hlim lo thei lo a ni . 

' Engtin nge i zir bik a , Doctor ni tur chuan  lehkha zir nasat angai lutuk an tia . Engtin nge i tih bik ? ' tia min zawh chuan han chhan mai dan tur ka hrelo .

' Heihi ka hmang ' tih pahin ka lu chu ka kawk zeuh a . 

Mak tih hmel taka min rawn en pah hian ' Engtin nge i thluak i hman ? ' tiin min zawt leh ta zel a,henu hi chu mi dangdai ve tak a ni . 

A lu a khawn keuh keuh pah chuan , ' Helai a i thluak lianpui hi zirtirtute thusawi ngaithlak nan hmang rawh , tawng mai mai lo in ' tiin ka hrilh a , harh chhuak niawm tak hian min rawn en a , ' Ka hrethiam chiah , class lak laia ka ṭawng thin vang anih chiah chu ' tiin min lo chhang daih thung .

A chang chuan a ngaihtuahna ah hian eng nge awm ve ang tih mai mai te chu ka hre chak a, ka lo ngaihtuah leh thin . 

A tlai deuh tawh avangin sana melh zeuh pah chuan' Ka thlah ang che ' tih pahin ka tho thurh a , phur takin a rawn ding ve nghal mai bawk a .

Nichin a rilru hah em em kha tunah chuan a nuih leh sang tawh a , chu chuan ka thinrim na leh rilru hah na te kha min theihnghilh tir chiang hle . 

Read More

Dr Noel 2 - 20

 CHAPTER-20

"Even if you tear me to pieces or even if you reduce me to ashes, I would still go back and give you my heart." - Anonymous 

Darkar chanve vel a bo vang vang hnu chuan ngawi rengin a rawn let leh a , a awmdan khan min ti hrilhhai hman takzet .

' Ka tihpalh ' ṭhut pah chuan a rawn ti leh ringawt a , a awmdan maktak avanga ngaihdam min dil ah ka lo ngaih sak hmiah. 

' Sumo a rawn thleng ṭep tawh ' tih hul hak pah hian min rawn en a , maktak maiin ka hawsan daih dawn avanga lungngai hmel a pu ve deuh in ka hria mahse engmah a sawi loh avangin ngaihdan ka siam ngam chiah lo. 

Ka bag ah turah chuan ka kekawr leh tshirt berh vek leh huh hnung mai kha min thun sak thlap a , thil ka tih ve ngai lo in min tih sak vek a hetianga min  ngaihsak tu leh thil min tihsak tu hi ka neih ngai loh avangin ka rilru a khawih takzet .

Ka nu kha chu la dam se chuan engkim min tih sak ve thin anga , keimaha ka tih vek hi angai lo ni mai tur . Ka nutei hi chuan a theih ang tawkin min buaipui ve thin mahse a buai in ngaihtuah tur a ngah thin em a nu leh pate ang tak takin min ngaihsak in thil hi min tih sak hman thin lo a ni . 

Chutia kan intih fel mawlh mawlh lai chuan kan khaw nu Pi Zaii chu hmanhmawh tak hian a rawn tlan hlawk hlawk a , a hah em a thawk pawh a thaw tha thei lo keini lahin tih ngaihna hre loin thil a sawi hun  nghak in kan lo en reng ringawt.

' Noel ' tih pahin motor hma lam chu a kawk a , thawk a han la leh rih thin. 

' Nichin khan ka hmu che in ka hre reng a ni , kawng chhak atangin lung a rawn tla leh thut a lei paih fai tute zinga mi pakhat chu a thi a ,pahnih lung in a delh a pakhat chu nikhaw hrelo in a awm mek .A dang pahnih te erawh an awmna an la hrelo ' a rawn ti ta mai a , ka mak ti lutuk chu ka lo mengphawk nghal kawk a . Ka tha te hi a khur nghal ringawt in ka hria .

' Anih chuan nichina rawn ri huk kha a ni maw ! ' ka lo ti vat a. 

Dr Noel chuan ' Motor ah lo awm rawh ' tih pahin glove chu a phawrh chhuak nghal a hmanhmawh takin Pi Zaii chu a zui nghal vat bawk , kei erawh tih hmasak ber tur pawh hrelo in an kal liam lai chu ka lo thlir vung vung ringawt . 

Midang pawh en tura an kal sup sup takah chuan Noel thu pawh ka awih thei ta lo hmanhmawh takin ka in kap chhuak ve nghal a , a hmun kan va thlen chuan mipui pawh an lo tam ngang mai . 

Dr Noel chuan mipa pakhat nikhawhrelo a lo let reng ah chuan CPR alo ti mawlh mawlh lai chu ka va hmu fuh a ka rap ru takzet . 

Ruang zawngin a then in lung chu kawng thlangah an lum thla , a ṭhen in lung laksawn tumin an lo bei ve mek bawka . Noel chiah doctor a awm bawk nen amah chauhin a che a midang erawh tih tur hrelo in kan lo ding ve ṭhup ringawt. 

Minute 15 vel beidawng miah lo a a beih char char hnu chuan a mar a hmu a ni ngei ang a hah lutuk chu leiah a ṭhu nghal hnawk a ', Damdawiin ah kalpui nghal angai ' a ti chuai raih bawk ,a hahthlak tur zia ka hria a puih theih ka chak takzet . 

Damlo chu motor a phurh nghal theih a nih loh avangin a zawn na tur hlang an siam ah chuan an mut a , chu chuan damdawiin a hruai tu tur motor awmna thleng an zawn dawn a ni .

Mi tlawmngai ten an buaipui nghal zung zung a , a then lung nawr sawn tum a an zik hut hut lai chuan kei erawh rilru mumal lo deuhin ka la ding reng a , ka suangtuah phak bak aia a rapthlak avangin ka hamhaih vek a ,ruang puan a an khuh te chuan mi rap in thil ni lo lo min suangtuah tir phah a ni . 

' Car ah lo awm rawh ka tih kha ' Noel ṭawng ri ka hriat rual chuan ka suangtuah na atangin ka harh chhuak thut a , ka phu nghal zawk a . 

'Car ah lo awm ve daih mai rawh ' ka hlauthawng chuan ka ti ta ringawt a , ã pawh min ti viau ang mahse sawtiang thil rapthlak lutuk buaipui tur chuan ka phal bik lo a tin ni . 

 A glove a thisen kai hnuang te chuan ka awm a ti nuam lo .Damdawiin ah mitthi leh hliam te chu ka hmu ve fo tawh na in hetiang thil hi chu a dan a dang bik zar mai . 

Ka hlauthawng a ni tih a hre ve a ni ngei ang zaidam tak hian ' Lo va kal hmasa la ka rawn kal vat ang ' tiin min hnem a ,mahse ka nghilh deuh dup mai hian ka in hria . 

 ' Rei suh aw ... ' ka ti leh hram a .

Chhan pawh min chhan hma chuan an rawn ko leh nghal a , hliam enkawl na tur hmanrua engmah a nei bawk si lo a a manganthlak viau ang le . 

A glove lehlam chu phelh in' Ka phone hian hla lo va ngaithla mai mai rawh ' a ipte aṭangin phone chu a phawrh chhuak a .

 ' Kal rawh ' tih pahin a phone chu min pe a , min nawr kal dawrh bawk . 

Kal tura min duh em avang chuan thuawi takin car ah ka let ve leh mai bawka , ka tih tur hrelo chu ka ṭhu ngawi renga . Car awmna hi accident thlenna hmun nen khan a in hlat deuh hlek avangin thawm hriat tur pawh a awm lo . 

Ka tih tur hrelo lutuk ka ṭhut ar ar lai chuan Noel an a phone hla ngaihthlak nan min pe tih kha ka hrechhuak thut a , hmanhmawh takin a phone chu ka on nghal a password alo awm miah lo lehnghal chu chuan a phone en ruk pawh min hreh tir leh zo vek . 

A phone menu te chu hreh tak chung chuan ka enkual sak lui hram a Instagram , Facebook leh Apps kan hman tlanglawn ang ho pawh hi alo hmang ve miah lo chu niin , WhatsApp leh YouTube erawh alo awm ve hram hram . 

' A van boring reuh tak , Games bak a nei lo ' tih pahin WhatsApp chu hawn a , a message te chu chhiar ruk sak ka tum zet a mahse a phone chu ka hmet thim leh ta zawk a . 

Midang phone en ru duk duk tur khawpin ka sual lo . 

A phone dah pah chuan ka thaw chhuak zui hak a , ' Password dah ve tal tur ania , min ring leh lutuk a en ruk pawh ka hreh zo vek ' tih pah in nghenchhan chu ka ngheng nghal ar ar a ,hla pawh play ta lo chuan ka lo mutthluk san daih lehnghal. 

Thawm ri ruk ruk ka hriat rual chuan ka han meng siar siar a Noela a ni tih ka hmuh rual rual chuan ka meng zau nghal kawk a , ka ṭhu ngil nghal at bawk . 

' In zo tawh em ni ? ' tiin ka zawt nghal a , a lo bu nghauh ringawt. 

' A nih an dam vek em ? ' 

' Pahnih chiah an dam '

' Nichin a damdawiin a an phurh tak chhiar tel khan pahnih chiah maw? ' tiin ka zawt leh ngat a ,a lo buk leh nghauh takah chuan ka ngawi nghal vung vung a , ngaihtuah na a kal thui duh takzet .

Ka ngawih vang vang hnu chuan ' An chhungte an khawngaihthlak awm e , a hrehawm ngawt ang ' ka ti chhuak hlawl a, ka rilru a awm tak a ni bawk a ka sawi chhuak lo thei lo a ni . 

Chutia an chhungte ka sawi chhuah takah chuan a rilru a khawih deuh aniang , ' Chutiang zawng chuan ka la ngaihtuah ngai lo ' a ti a , a thutak viau bawk .

' Nunna tamtak an chan lai ka lo hmu tawh  thin a ,keimah ngei in a ka chhan hman loh pawh an awm mahse an chhungte lo tawrh nat tur zia hi ka lo ngaihtuah pui ngai lo ' a rawn tih leh phei chuan boruak chu a rit nghal churh a , a reh duk bawk . 

'An chhungte, an mahni hmangaih tute bawk hian alawm tuar na . Ka nu pawh khan hetiang khawp hian ka tuar na ang tih hi a hre awm si lo ' tiin ka lo tuihnih ve bawk a .

 Hetiang thu serious lutuk hi kan vawikhat sawi dun na a ni a ,sawi pawh a duh ngai lo . 

Kan thil sawi avang chuan a sana khawih neuh neuh pahin lungngaih hmel takin a kun lap a ' An hre maithei ' tih pahin za lo zet hian a khi zui a . A awmdan aṭang hi chuan tu emaw chan tawh nei a ang ka ti thin. 

'Chan i nei ve tawh em ni ? ' tiin ka zawt ta nge nge a , rilru a awm reng thup tlat ai chuan zawh mai hi a finthlak zawk . 

Hriat chak hmel taka min chhan hun ka lo nghah reng lai chuan min rawn nuih pah hian ka sam chu min rawn nuai thur sak a , ' Sumo a rawn thleng tawh kal ang ' tiin min chhang ta zawk a . Boruak pawh a zang nghal vek bawk .

Thil hi han zawh ve pawh hian a sawi ṭha duh ngai lo reng reng , engtik ah tak ka bulah hian in hawng ve ang maw . 

' Ka kal lo mai ang , i rualin ka lo haw ve mai ang ' ka lo ti nghal vat a mahse min lo hnial rang kher mai . 

' Thosi leh rannung karah i riak leh duh em ni ? Vangvat te i kai mai tur ania a zuk vak mai ang che i hlau lo em ni?' tiin kal ka duh nan min rawn sawi ṭhaih a .

'Thosi leh rannung mai mai a ho teih teih si , vangvat phei chu ka hlau lo kan tawtawlit thin ' ka lo ti sam et a , min hnial ngaihna a hre tawh der lo . 

Hmeichhia ah pawh a kawlhrawng chi ka ni a , rannung leh pangang te hi engatan mah ka ti lo . Hlauh chu sawi loh kan man khawm a khawi turin burah ka dah khawm ruih thin a ni . 

'I kal hma in heihi ei rawh ' tih pahin hritlang damdawi hi min rawn pe a , ala ngaipawimawh em em zui . 

Ka ei lai chuan damdawi dang strip khat hi ka bag ah turah chuan a khung nghal daih a , ' He hi i khua a sik leh chuan i ei dawn nia chuan i kalna apiangah pai ang che ' tiin chiang takin min hrilh thlap a , min hrilh uluk bawka theihnghilh pawh a hlauhawm zawk .

A ruala haw ka duh thu ka hrilh chung pawh chuan haw turin min ti tlat sia hrehtak chungin ka haw mai angaih hmel .

Ka bag ak chung chuan sumo lam pain a kal a , a hnungah muangchangin ka lo zui ve det det bawk . Pafa te pawh kan ang zawk . 

Kawng nal leh a diak lai deuh kan thlen apiangin min lo nghak zel a , kal a harsat deuh chuan min lo pui nghal vat zel. Ngawi reng hian thil hi a ti a , mahse min ngaihtuah zia leh min ngaihsak zia hi ka hai bik lo . Ṭawngka in min care lo a , thil tih in a lan chhuah tir ti ila ka sawi sual lo ang . 

Midang vin hluk hluk ching leh ṭawngkam mei nei tak tak a midang ṭawngkhum ching a ni lo a , awka zaidam leh dam takin mi a hmachhawn thin a hei vang hian damlo te pawhin biak nuam an ti thin reng a ni . 

Mi famkim a ni bik lo a , zaidam viau e ti lo chuan mi zaidam thinthawk chu a hlauhawm an ti ang chiah hian a thinrim tawh chuan a hlauhawm hle a ni tih hi midang pawh hian hria se ka ti takzet . 

Kawng a nal em avangin Sumo dinna thleng chu min kai phei a , hetiang dinhmun ah hian ding lo ila chu hetiang thil hi a ti dawn si lo a , kan in hnaih theih nan Pathian in rem min ruat sak a nih te ka ring hial . 

' Lut rawh ' 

' Ka kal tak tak ang maw? ' tiin ka zawt nawn leh ngat a , mi tumah hriat a nei si lo a amah chauha a tang tur hi ka ngaihtuah ve leh chhawng . 

' Lo han lut rawh ... i bag ah eitur ka dah a , i lo ei dawn nia ' a tih te chuan Nupa nge Pafa kan an zawk pawh ka hrelo . Zing chaw pawh kan la ei lo ve ve a , a ei ai alo dah leh tawh aniang . 

Sumo a ka chuan luh lai vel chuan driver chu alo be mawlh mawlh a ,eng nge an sawi pawh ka hre lo . 

A hnung ber kil ber tukverh bulah ka ṭhu a , ka ruih tawh loh hram ka beisei . 

Tukverh a dah chhuah pah chuan 'Engtik ah nge i rawn haw ve ang ? ' tiin ka zawt nulh a .

'Ka rawn haw thei ṭep tawh ang ' tih pahin a bag ah lai chu min rawn pe a , biak pawh kan in biak ṭhat hma chuan sumo chu a tlan ta mai a , engmah ka sawi hman ta si lo a ka bye bye zui lauh lauh ringawt . 

Bag chu nghet takin ka pawm a , a bag hi fai deuhin ka suk sak anga a rawn haw veleh ka pe ang . 

Nimin leh vawiin a thil thleng zawng zawng hi engtik ah mah ka theihnghilh leh tawh ngai lo ang a chhanchu Noel nen kan in nel in kan in pawh phah a ka ngai zui nghal veng veng bawk . 

Kan khua kan thlen chuan ka nute in min lo hmuak a , min lo ngaihtuah lutuk hi alo nia . Min hmuh rual rual in a mittui a tling thei hial nia mawle  . 

Ka chuan man pek kan han tum nak chuan Dr Noel an min lo pek sak vek tawh chu niin , driver nen an in biak khan alo pe vek a ni ngei ngei ang .

 Ka chuan man a pek vek chu sawi loh ka chaw ei na man tur nen alo kawl tir thlap chu niin . A pawisa lak ka duh leh dawn si lo a , keimah min pek tum buai lo in driver hi alo kawl tir vek a ni tih ka hriat hian min ngaihtuah ve tak tak angah ka ngai hmiah. 

' Chaw kan ei leh ta si lo a ' tiin Driver chuan Rs500 hi min rawn pe let a , kei aiin ka nutei hian mak a ti zawk . 

' Amak hle mai Noel hi a fel in a zaidam tih chu ka hria mahse hetiang mi a ni tih hi ka hre ngai lo ' ka nutei chuan a ti phei nang nang a .

Hmeichhe lakah hian fel viau mahse a biak dan atang hian a ngaihsak lo tih leh a ler lo tih hi a hriat theih .Kei lah hetiang lama harh hma leh experience nei tlem zawk zawk lo ka lo ni bawk nen ka hrethiam lutuk tlat . 

Diakkawn aṭang in ka nutei nen damdawiin tlang lam panin kan in phur chho a ,min ngaihtuah avanga ka pu nen zana an mut mang loh thu te , keimah chauha min kal tir avanga a inchhir thu te leh min kalpui zel tawh tur thu te chu a sawi chho mawlh mawlh a , mahse a ruk tak chuan kan tan avang khan ka lawm em em thung . 

A tuk tlaiah Dr Noel pawhin Phullen a rawn thleng ve thei hram a ,a car pawh a berh ngang mai .

Ka nutei ang chiahin Noel ka ngaihtuah avangin zanah ka mu mang lo a , be turin a  phone number ka nei bawk si lo . Lo nei ta pawh ni ila ka be ngam kher angem ka hrelo . Engpawh chu nise dam takin a rawn haw thei a , ka rilru kap tu lian tak kha lakkian in a awm ta duak mai . 

Dr Noel chu tlaiah rawn thleng chauh mahse damlo an tam deuh hlek avangin zanah a duty lehnghal a , kei ngei pawh ka tan avangin mut a harsat tur zia ka hria a a chau in a mut a chhuak viau ang le . 

Hah leh chauh pawh sawi lo in a phe nghal char char a , ka nutei phei chuan a ngaihtuah thu kan chaw ei laiin a sawi chhuak hial a nih kha . 

Ka nute'in min koh avangin ka va pui ve a , Dr Noel erawh a buai bawka a rawn haw atangin biak na hun pawh ka la chang lo . 

Chauh hmel viau e tilo chuan damlo bulah chuan ala nui sang thei a ,damlo a biak dan atang ringawt hi chuan mut a kham lo tih pawh a hriat miah loh . Doctor nih hi ava tlin bik tak , ni tura piang te pawh a ni ta ve ang . 

Dar 10 tlangah pawh kan la phe vut vut reng a , emergency case 6 bakah stroke leh eng eng emaw vanga admit ngai pathum an awm tawh a chupawh Dr Noel kutah vek a awm lehnghal. 

Zanin hi eng nge maw an hriat ni case ho te te ah pawh khaw thenawm atang pawhin an rawn kal sup sup a , Dr Noel awm hun an lo nghak reng aniang. 

A ṭhen damlo rawn kan tumin an rawn kal a , a ṭhen in pawnah an lo nghak bawk, zu rui au bengchheng lah an bang lo , a thaw ip pik thlak takzet . 

Ka nutei leh Grace te an buai em avangin ka nutei bulah chuan, ' Damdawi hi ka lo kah luh sak mai dawn em ni ? ' tiin damlo venflon a damdawi kah luh sak chu ka dil a, nidanga ka tih loh dan pawh a ni lo a ka nutei chuan min hnial lem lo . 

Damdawi siam sa vek tawh venflon vuah tawh sa a kah luh mai mai chu ka thiam zawng tak a ni a , ka lo pui ve a nih phei chuan a ṭha dawn em asin . 

Damlo venflon ah ka nutei hriatpui na zelin damdawi chu ka kap lut zel a , mi pakhat hna kha mi pahnih in kan thawh takah chuan rei lo te ah kan zo dawn der mai .

Chutia damdawi venflon a ka lo kah luh lai chuan Dr Noela chu rawn lut thut a , lung nih loh hmel tawkin min rawn en a ka nutei chu midang hriat loh in a rawn ko chhuak nghal a ,mahse thil thleng a awm tih ka lo hrethiam nghal . 

Ka thil tih lai ka zawh veleh ka tlan chhuak ve nghal a , ka nutei te kalna ni awm a ka rin Dr Noel office lam pan chuan ka tlan nghal vat bawk . 

Noel office ka thlen rual rual chuan an ṭawng ri ka hriat avang in bang phenah ka biru nghal vat a . Noel an keimah vangin ka nutei alo hau chu niin . 

'Damdawiin hi tih chhin kual vel na hmun a ni lo , thil diklo thleng ta se mawhphurhna a la thei dawn em ni ? Professional lo chuan engmah hi a lo ti ve ringawt tur a ni lo ' tiin ka nutei chu a hrilh a ,midang tumah an awm lo bawka a thin pawh a chhe sawt khawp mai. 

' Ka tihpalh a ni ' ka nute'in a ti ri chu ka hre zui a .Ka nutei thiam zawkna chu nise hetiang hian a tlawm mai mai lo tawp ang , a hnial let ve tan tan in ka ring . 

Ka nutei hi lo thinrim pui viau in eng ang pawhin Noel hi hnial let duh pawh ni ila a sawi engkim hi a dik miau a ,lo thinrim pui vak theih pawh a ni lo. Zirchhuak tawh certificate nei lo tan damdawiin ah damlo lo enkawl ve ringawt hi a thiang lo tih ka hre ve kar a , hnial thlak ngaihna a awmlo . 

Dr Noel an ka nutei a hau zo chiah tih chuan buaina dang a rawn awm leh tawh a ni ngei ang pu Rama chu hmanhmawh takin a rawn tlan phei a .

' Noel damlo i admit tak Pi Rualkhumi fapa saw zu rui chungin nizan hmasa atang tawh khan a rawn au reng a , zanin phei chu buaina te a siam a damdawiin bungrua te a paih a ni awm e ' Pu Rama chuan Noel bualah chuan a ti nghal mawlh mawlh a .

' Hmuh che a duh thu in a au reng a , beng daih ka tum pawhin a au reng mai , i rawn hmu mai dawn mi niang ' a tih chuan .

' Min hmuh a duh te chuan kan hmu a nga nimai lawm ' alo ti sam et a, mi zaidam thinthawk chu a hlauhawm an tih ang tak tak khan , chupa chuan a cho chhuak ni berin ka hria . 

Ward ah zu rui pa chuan , ' Dr Noel Lalrinkima chu han ko teh u ' tiin damlo ti thlabar zawng chuan alo la au lauh lauh a , a nu niawm tak Pi Rualkhumi chuan beng daih alo tum ve mek bawka , kan buai hut hut a ni ber .

Hepa hi nizan ah pawh zankhua in a au tawh a , damlo damdawiin a riak ho in ka nutei bulah an complain tawh nghe nghe a ni .

Dr Noela a hmuh rual rual chuan chupa chuan, ' Nang hian ka nu i ti dam thei nange Daktor pawh i ni lo ' tiin a lo an khum vel a , hnek tum niawm takin a kawr nghawng ah a han ṭham sak vela . 

 Dr Noela mi zaidam lutuk pawh a zaidam reng thei tawh bik lo , damlo hma a nui lui hram hram thin ,thinrim loh hram hram tum thin khan damlo pawh zah zo tawh lo in chu zu rui pa hmaiah tak chuan a hnek ta ṭhuai mai a, a na bawk aniang chhuatah a let nghal tawp mai ! 

Vawilehkhat ah damdawiin chu a reh nghal duak bawk .

Pu Rama chuan rang takin chupa chu zuk kaihthawh a tuma , mahse a harh thei der lo .

' Noel engtin nge kan tih ang , a thi mai ang a ' hlauthawng tak chunga a tih chuan .

' Kan phum a nga nimai ' alo ti hmiah a , pa ve tak chu a ni . 

Read More