Rainer Black-51 by Remruati Bawitlung(Haylor)

CHAPTER -51

"I hate when she is too friendly with other guys"

Rainer chu balcony ah thil ngaihtuah nei niawm takin amah chauh in a dak vung vung leh tawh a, ka ko te a nih ngawt lo chuan tumah in an va hnaih duh tawh lo.

A ban a tliaka, hliam na tak tak a nei bawk mahse chung te chu a tan chuan a na reng reng lo, Rainer ti na tur chuan Sadie leh mipa dang awmdun lai hmuh kha a tawk em em.

Hetiang hian hmeichhe lakah ngat phei chuan a la awm ngai lo.Sadie nen an chungchang engmah hre lo mah ila a lo atchilh tawh hle a ni tih a awmdan aṭang hian mimawl ber pawhin an hria ang chu.

" Thil kan ei chhuak dawn, i rawn kal ve dawn em? "

Ka thusawi hre lo ang maiin a awmdan ngai ang chuan a awm renga,mahse a hre vek a ni tih erawh ka hre reng thung.

"Hetiang anga I awm lai hian Sadie erawh hlim takin a awm ngei ang "

Sadie hming ka lam takah chuan a melh ngai melh reng chung hian a han ding ngil deuh a,ka thusawi leh tur ngaichangin a beng erawh a rawn chhi kar thung.

"I lung a leng a nih te chuan va be la ... awlsam lutuk "

Tihel deuh in ka ti kher!

Sadie leh mipa pakhat inkuah lai a hmuh aṭang khan ala nui leh lo hrim hrim, hetiang hian thil ngaihtuah ngut ngut nei niawm tak hian a melh ngai a melh ngur ngur renga, a nin zawngin midang an awm phei chuan kut a thlak nghal pawp a ni mai.

" Engvangin nge ka biak ringawt ang? "

A tawp a tawpah a rawn ṭawngchhuak ve ta!!  min chhang hmuk hmuk mahse biak in min chhang ve tawh a,a ṭha tho tho .

" I biak loh te chuan mi ã ang maiin i awm tak hi....hahh...bakah Sadie insawi fiahna te pawh ngaithla ve phawt rawh "

" khanu hming kha ka hriat theih turin sawi tawh suh "

Rainer hi chu ka hrechiang , biak duh hle mahse a chapo na hian engtik ah mah a tih tir dawn reng reng lo tih pawh kei tluka hrechiang an awm kher lovang. Hetiang hian amahin a tuar tlawk tlawk reng anga, a thinchhe em em bawk ang.

" Engpawh chu nise Nikki in restaurant ah min nghak reng tawh ... i rawn kal dawn a nih chuan ka lo nghak ang che " motor a khalh theih loh avangin ka nghah ngei ngei a ngai, chutilo chu midang in an phur ngam dawn reng reng lo.

" Ka ril a ṭam lo "

Setan leh!! hahh.... vawiin nileng in tui bak a la in lo, chutichung chuan a ril a ṭam lo a nih chu!!  ka awih a ring emawni le?

Hmangaihna hian thil a lo tih theih hi le... hetiang ang mipa rothap lutuk thinlung pawh a sawp zawi vek thei ania.

"Rawn hruai tur che in Sadie va koh kher angai em ni?"

Ngeiawm zeta tih pahin ka phone chu ka han la chhuak der vela,ka call leh duh tak tak dawn tih a hriat avangin a thinrim chuan ka jacket nghawng rawn ṭham pawp pah chuan min rawn melh khai a, engmah sawi lovin min nam sawn nghal dawrh a ,a kal nghal nal nal bawk .

A kal liam chiah tih in ka jacket siam ṭhat pah chuan ka khi nghal suk ringawt.

Awlsam lutuk....tikhan a rawn kal a ni mai lawm.

Sadie ka lam rik apianga a danglam vek ṭhin hi kei ngei pawh hian mak ka la ti, mahse thil a awlsam phah sawt a a nuam dawn phian.

Kan ṭhian dangte awm huat huat na kara awm tir ka la duh loh avangin leh hliam neuh neuh a neih avang in hahdam thei ang berin muang changin midang hnungah ka tlan pui a, a mu tlem bawk aniang seat hnung nghen ar ar pahin a maimichhing vang vang mai.

"I ban kha eng nge a an tawh? a nat chuan min rawn hrilh vat dawn nia " a rilru lak pen ka duh avangin eng eng emaw ka sawi pui lui hram hram a , amaherawhchu hre lo ang hmakin a awm leh tlat tawh.

" I party dawn em? "

" aw" a rawn ti hmuk.

Tun hnaite aṭang khan party kal a bansan hmak sia, hei pawh hi Sadie vang bawk a lo ni leh reng tawh a niang.

" Zanin phei chu hmeichhia an tam dawn teh a nia ...i duh ber ka tihpui ang che "

"Sawi tur i hriat loh chuan ngawi mai rawh "

Tih hlim ka tum bakah ka ti lui tih a hria ni maw!  ni e, a ni nen hi chuan kan in hrechiang ve bawk em a ni. Keimah ang lo taka ka awm lui vel hi a kham viau ta ve ang.

Kan tlan muan deuh bik avangin midang ho chuan parking lot ah min lo nghak ṭhap tawh a, Nikki pawh an zingah alo awm ve bawk.

Kan ṭhian ho hi midang kan an lohna chu khawi hmunah pawh kal dawn ila kan in hrilh hmasak loh leh in nghah khawm hi kan tum hram hram ṭhin ,ṭhian ho nilo in chhungkua kan ni zawng mah aniang chu.

" Hey... " car aṭanga ka chhuah rual rual in Nikki chuan min lo kuah nghal a, Rainer best friend mah nise an mizia hi a in ep thawk.

" Hna thar i nei ta bawka kan chhuah ho lohna a rei ta hle mai " ka lo ti nghal zung zung bawk.

Chutia kan titi khawm nak nak lai chuan tum loh deuhin kan awmna aṭanga hla vak lo ah Sadie ka va hmu hlawl mai!! engvanga helai hmun kher kher a rawn kal nge maw a nih le?

Rang takin Rainer ka va melh nghal vat a, vanneih thlak lutuk in a hmu ve lo hlauh, Sadie pawhin min rawn hmu bik lo.

Sadie chauh nilo in mipa pakhat ka la hmuh ngai pawh nilo hian a rawn zui tel ve a ni tih ka hmu lehzel bawk nen Rainer an a va hmu leh ang tih ka hlau takzet.

Mahse ngawi lawh teh!!  Sawpa sawn Sadie duh lo chung biak luih emaw khawi hmun ah emaw hruai luih a tum niin a lang.

" kal ang u "

Rainer an a hmuh ka hlau avangin ka ti nghal zung zung ringawt. Chumaibakah sawpa saw Sadie hmelhriat a ni tih an awmdan aṭanga a hriat nghal vek avangin thil lian tham a nih ka ring lo,a bialpa te pawh a lo nimai thei asin .

"Ni e kan kim chuan lut ila "

Nikki in a tih chuan kan ril a ṭam hlawm tawh bawk a niang tumahin hmun danga kal hmasak an rawt lo.

Inchhungah luh tuma kan in zui dam dam lai chuan ring zet hian chupa chuan Sadie hming a rawn lam ta mai!!  Rainer tan chuan hai der theih a ni lo. Kan vai mai chuan Sadie te awmna lam chu ka hawi phei nghal ṭhap bawk.

" Derek min thlah rawh "

Chupa chuan a ban ah a man beh tlat avangin Sadie chu tal chhuah tumin a lo ṭang ve mek a , engtin nge Rainer a awm tih hriat tumin rang lutuk in ka va melh nghal vat bawk.

Ka rin ang ngeiin a thinrimna te chu a lo sosang leh tawh ngang mai , tuna a awm dan hi han en ringawt pawh hian engmah pawisak a nei tawh lo a ni tih a hriat theih.

Rainer an Sadie te lam a pan nghal hmak avang chuan midang ho chu mak ti takin an in en ha hlawm a, kan hlauthawng tlang angiang a hnungah kan zui nghal huk bawk.

" Thlah rawh "

Hnek nghal lova warning a pe hmasa ringawt pawh hi thil mak a tling , Sadie mitmei a ven ve deuh vang te pawh a ni mahna.

" Ngangpa bawk chu " Chupa chuan cho zet hian a lo ti let ve nghal at, ṭhelh an ngai ngei dawn a ni tih hai rual a ni lo.

" lo in rawlh ve suh "

Chupa bawk chuan a rawn ti nawn leh ngat a, Sadie lah a thlah duh der lo lehnghal! chutah zet zawng Rainer thinchhiat lai leh thinrim lai a lo ni lehzel bawk nen khawih a tum ta mai!! a che rang lutuk a tumahin kan dang hman lo, chupa hmaiah tak chuan a kut veilam chuan a hnek dak ta awrh mai.

" Rainer khawih tawh suh "

Rang takin Sadie chu a rawn in rawlh nghal zat!

Rainer alo dan avang hian an vai mai chuan mak an ti in a â a nih te pawh an ring hman hial ang mahse keichuan a tan a hlauhawm zia hre reng chung pawha hetiang a ti ngam hi hmeichhe huaisen tak a ni in ka hria. Rainer an alo atchilh nachhan pawh zawh buai ka ngai ta lo a lo danglam bik em a nih hi.Hmeichhe tamtak tih ngam loh a ti ngam tlat.

Khawih luih a tum tlat avangin Sadie bawk chuan khur dar dar chung in Rainer melh chho kar pah hian , "Rainer... min en rawh, ka mit ah hian en rawh " a han ti leh a, kan vai mai chuan kan lo ngawi dak hlawm .

Sadie pawh hian a thinrim lai hi chuan a hlau ve tho mahse dan tumin a huaisenna zawng zawng a sawm khawm a, kan ngaisang letling zawk a chhan chu in hriat angin tumah hi Rainer va hnaih ngam pawh kan awm loh hi .

" Keimah chauh min en rawh " thuawih takin Rainer chuan a melh chhuk run a, second tlemte an in melh vang vang hnu chuan mak tak maiin Rainer chuan a kut hum ruh sa vek tawh chu a thlah thla ta riai riai mai!!

Kei ngei pawhin ka thil hmuh lai hi ka awih thei lo, khati khawp khan a thin a rim a , a thinchhiat zia leh insum a harsat zia pawh ka hre vek chutih lai kara hmeichhia lehnghal a dar pawh chen lo hian a mitmeng hmang lekin a bengdai thei amaw!! engtin tehhrep nge maw a tih bik ni?

Chutia chet nachang pawh hre lova kan thlir ṭhap lai chuan engmah sawi lovin Rainer chu a kal nghal nal nal a, ka zui nghal avangin midang pawhin min rawn zui ve nghal vat bawk.

Parking lot kan thlen phei rual chuan car chung ben rik ṭhuai pah hian, " Khanu kha tu mipa mahin an hnaih tur a ni lo " a ti vin nghal hluk ringawt .

An vai mai chuan mak ti takin Rainer chu an en ha hlawm a, a awmdan avang khan Sadie a duh a ni tih chu tu tan pawh hriatthiam loh ngaihna a awm lo .Rin loh lutuk maia Rainer ber kher hmangaihna a a tluk luh tak avang hian an hamhaih hlawm hle bawk.

Rainer chu Nikki car ah a luh daih avangin midang ho pawh chu an car ah an lut sap sap hlawm a ,kei erawh Rainer an 'va thlah rawh' tih melh a min rawn melh avangin Sadie ka thlah phawt angai.

Khati khawpa rei Amira in a tihbuai chung pawh khan kawng laiah pawh nise a kalsan hmak hmak a, vawikhat pawh Amira thlah tur in emaw pui turin min la ti ngai lo mahse Sadie erawh a thinrim ber lai pawhin a ngaihtuah em em tho a nih hi .

"kal ila... " Nikki chuan a rawn ti sap a.

"kan va thlah phawt ange " ka tih takah chuan ka sawi awmzia a hre nghal.

" thil thleng kha a mak takzet rin phak bak a ni .... urghh... engpawh chu nise Rainer chu keiman ka lo buaipui vek mai ang " a lu thing nar nar pahin min rawn nuih suk a, a car ah a lut nghal a kei erawh Sadie zawng turin ka let lehnghal.

"Ka thlah ang che"

Zawn pawh ngai lovin ka va hmu nghal, a hma a ka lo thlah tawh vang nge ni min rawn hmuh rual chuan min rawn nuih nghal ver ver mai.

" Ngatinge min thlah leh i tum? "

Zawhna khirh tak tak hi min zawt a, Rainer an thlah rawh a ti ka ti thei ngawt bik si lo. Bakah a hma pawh khan Rainer an hruai haw turin min ti tawh a, him taka thlah haw hi ka tih turah ka ngai hmiah.

" khapa kha a rawn let leh palh ang "

Boruak rit lutuk tur tih ziaawm nan kan han uang vela, a lo nui leh ver ver tawh.A hlim lo a ni tih hriat reng chung pawha hetiang anga min rawn nuih ver ver tawh hi chuan a nelawm in a duhawm takzet.

" A hma in mipa dang pahnih chuan tunah mipa dang leh bawk "

Car a luh pah chuan ka zawt a, bialpa a lo nei chiah em tih hi hriat vek ka duh, a hma mite pahnih kha chu Rainer hriat sual liau liau an nia tuna mi pawh hi a bialpa a nih loh vek chuan a hre sual leh bawk a niang.

" ni e... insawifiah tur pawhin ka thusawi a ngaithla duh bawk si lo "
A kawchhung tawt lutuk chu a han thaw chhuak hak hak a chutichung pawh chuan hlim hmel a pu lui hram hram reng tho.

"anih chuan vau mai rawh " a nui chhuak hak ringawt.

"i lo hmu em a mit te kha... ka vau zawngin min en thlu tawp thei ang chu haha.... "


(Ka luh lehna tur test leh interview pe in ka zin kual char char a ,ka duh ang pawhin ka type tam hman meuh lo ,min lo hrethiam hram hram dawn nia )