Rainer Black -49 by Remruati Bawitlung(Haylor)

CHAPTER -49

"Becoming a cold hearted motherfucker wasn't really what I planned to do with my life but here I am"

Ka rilru a hah em avangin class a lecture pawh ka ngaithla mumal thei lova Rainer thinrim lutuk hmel ringawt kha ka mitthla ah a rawn lang nawn tluk tluk a dawt ka lo hrilh ta kher kher kha ka inchhir takzet.

Class a zawh veleh Rainer te ṭhian ho awmna ṭhin room lam chu ka pan nghal chat a, chutah chuan a awm ring chiah lo mah ila a ṭhian ten a awmna an hriat ka beisei vang a ni.

Room chhungah lut ngam chiah si lovin pawn aṭanga ka lo thlek dek dek lai chuan Chelsea in min rawn ko ta thut mai!!  ka phu chiang teh e.

" Eng nge hetah i tih? "

" I ṭawng ring lutuk " tih pahin midang in min rawn hmuh ka hlauh avangin ka tlan chhe nghal hlawk hlawk a, ka hnungah Chelsea leh Kaitlyn te chuan min rawn umzui ve nghal dawr dawr bawk.

" Sadie... "

Kaitlyn chuan min rawn pawt ding ta ringawt a, kan vai mai chuan kan hah lutuk chu thaw hlawp hlawp chungin kan han ding leh rih a.

" I va hlauhthawn hmel ve, Rainer nen in in kar a ṭha maw? "

Chelsea hian thil a hre thei ngawt mai min rawn zawt leh nghal chat tawh!!

" Hey!!  dawt sawi tum suh aw... Rainer te ṭhian ho awm ṭhina room a ni tih kan hre ve tho a nia "a rawn ti zui leh zat bawk.

" ni e... hmanni in chhuahdun aṭang khan engmah i la rawn sawi leh miah lo ania " Kaitlyn pawh chuan a lo ti ve nghal bawk a, hrilh vek duh hle mah ila han sawi ṭan mai dan tur pawh ka hre lo.

" Ih... "

Ka tih zawng ringawt pawh a mangang lutuk hmel hi an hai bik ka ring lo.

" Sawi vat vat rawh "

Chelsea chuan midang awmloh na laiah min pawt phei nghal dawr dawr a, a ni hi chu a hmanhmawh ṭhin lutuk a thil hi a ti nghal chung chung zel.

" Rainer an Nolan nen kan inkuah lai min hmu "

" Enga !!?" hrehawm ka tih tawh sa nak alaiin mak tih hmel zet hian an rawn ti rual ṭhawt lehnghal.

"In inkar ah engmah a awm loh thu i hrilh lo em ni? "

" Lo ṭawng suh u... ka sawi dawn alawm " min ṭawng khalh zel avangin ka lo ti vin nghal tun a.

Nolan nen a kan inkar chungchang te, a nu damloh chungchang te leh Rainer nen kan in tih thiamloh dan te chu chipchiar deuh in ka hrilh nghal vek a, ka sawi zawng te chuan an lo ner nasa mai, ka thiamloh ah an puh vek lehnghal .

" Chutiang chuan Nolan an a ti che maw?!! Anih chuan Rainer inah ngaihdam va dil la... alo be duh mial maithei che asin " Chelsea tak hi chu ngaihdan mak pui pui hi a rawn ngaihtuah chhuak ziah.

"nilo.... alo hmuh hniam phah zawk ang che, hun thawl pe la nakinah in la sawi ṭha leh zawk dawn nia "

Nolan sawi ang chiahin Kaitlyn pawh chuan a rawn ti ve leh chiah bawk .Engpawh chu nise Rainer ber hmuh tur a awm miau loh avangin haw vat ila a ṭha zawk, Nolan leh Kaitlyn te sawi ang takin zanin nghak phawt ila naktuk ah tha tharin biak leh ka tum zawk mai ang.

____________________________________________

★A tuk★

Vawiin nilengin Rainer hmuh tur reng reng a awm lova, a awmna ṭhin chu sawiloh a car takngial pawh hmuh tur a awm lo.

Nizan zankhua deuh thaw in ka insawifiah dan tur ka ngaihtuah na lamah mut pawh ka mu thei lova , vawiin ah lah nileng in ka ngaihtuah bang chuang lo ,kan inkar hi a fel hma loh chuan ka engtih mah a tui thei tawh lo chu a nih hi .

"Sadie... I kal tawh dawn em ni? "

 Note pawh la lovin nidang zawng aia hma ah haw daih ka tum avangin Nolan chuan min rawn zawt nghal vat a, a ngaih a ṭhat loh hmel em em lehnghal.

" umm... " ka lo bu nghat ringawt.

"Note pawh i la si lova ,library ah tal i kal dawn lo em ni ?"

"aw... vawiin chu ka kal lovang " ka lo ti chuai raih a.

" Rainer nen in in be tawh em? "

Ka hmel a ngui bawk aniang min rawn zawt lehnghal chat tawh, mahse keimah ai mahin hrehawm a tih hmel zawk in ka hria.

" Pawi ka ti lutuk... keimah vang vek a nih kha "

" Hey!!  tikhan han ti leh na teh " tih pahin ka nui lui nghal ver ver a, min ngaihtuah hmel takin min lo en reng thung.

" ka thlah ang che... "

" nilo... vawiin chu keimah a haw ka duh "

"nangmah chauh chuan a him lo "

" Nolan... min ngaihtuah suh, ka tih ngai loh dan pawh a ni hleinem "

Ka lo tih ve tlat avangin leh a nu bul a kal vat a ngaih avangin min nawr lui duh ta bik lo. A nihna takah chuan Rainer in a kal ka duh avanga keimah a haw tum ka ni zawk mah.

Rainer flat ka thlen dawn chuan min lo zawn loh nan kan ṭhian ho group ah ,*'ka haw tawh a nia '* tih ringawt hi ka va thawn a, hetia ka tih loh chuan min lo nghak leh char char palh ang.

"Sadie... i ti thei em em ang " tiin keimah leh keimah ka infuih phur chawp a, Rainer thinrim lai han hmachhawn ringawt pawh hi thil namai a ni lo, indo na a kal tur ang maiin ka hreh em em ringawt.

Hrehtak chungin ka bag hmer ngar ngar pah chuan chhawng chung ber lam panin elevator ah chuan ka chhuang chho vang vang a, ka thlen san pauh leh ka thinphu a rang ting tawh mai.

Elevator a rawn in hawn hnu phei chuan ka hlauthawng lutuk hi ka thaw deuh hak hak reng tawh a, Rainer a mitmeng rum lutuk leh nelawm loh zet mai hmachhawn tur hian ka inring tawk chiah em tih pawh ka chiang leh tawh lo.

Ka huaisenna zawng zawng sawmkhawm in leh inhum ruh ṭun chungin elevator aṭang chuan ka pen chhuak chhat chhat a, tunah ngat phei hi chuan ka thaw dep dep tawh.

Thil ti sual tu zawk nih hi chuan kan ṭi duk zel mai chu a nih hi.

Ka insawi fiah dan tur ngaihtuah mawlh mawlh pahin corridor ah chuan ka phei zel a mahse doorbell ka hmeh hnu ah pawh tuman an rawn hawng lo.

A vawihnih nan ka han hmet nawn leh a chutah pawh chuan thawm pakhat pawh hriat tur awm lovin a reh ruih reng ringawt.

" a awm lo emawni le? "

Phun sup pahin bang ngheng chung hian ka ding awn laih renga, darkar 1 ka nghah hnu ah phei chuan chhuatah bang ngheng chung hian ka ṭhu ta ringawt a ,reh ruih reng mahse a rawn haw vat beisei in ka la ṭhu ve ngat ngat reng tho.

" khawiah nge a kal ang le? "

Ka sana chu ka bih deuh chhen tawh a, darkar hnih chu ka nghak tling der tawh mahse Rainer thawm reng reng hriat tur ala awm chuang lo.

Chutia chhuata ṭhu chunga a rawn haw pawh ka beisei tawh lo hnu chuan elevator a rawn in hawng ri rang a!! ka lawm lutuk hi nuih ver ver pahin ka hawi chhuak nghal vat bawk mahse Rainer pen thawn a ni ta hauh lo hmeichhe pheikhawk sang bun ri tlek tlek ri a ni ta daih zawk a, chunu chu tudang nilovin Amira ngei a ni bawk .

" Sadie... !!"

Min rawn hmuh rual chuan ka ding nghal zawt a, a ni pawh a menphawk danah hian min rawn hmuh a inring bik lo aniang.

" Eng nge hetah i tih? " chu zawhna chu ka zawh tur awm zawk tak a ni in ka hria.

"umm.... " mahse engmah ka sawi chhuak leh thei tawh lo,ka dang a awk nghal vek ringawt.

" Rainer i nghak em ni? " a rawn tih leh chuan ka lo bu nghat a, a hma aiin mak a tih hmel zual sauh bawk.

"nang? " ka zawt chak tawh bawka ka zawt ve ta alawm.

" Hetah Rainer a awm hleinem party na ah a kal daih alawm...eng chungchangah nge hmuh i duh a ?"

"project chungchang mai mai mawle "ka ti ringawt a, a awih loh hmel ngang mai !! mahse hetiang thil mimal lutuk hi in zawh ngai pawh a ni lo .

" I hmanhmawh chuan i rawn kal ve thei alawm keipawh ka kal dawn chiah asin "

Fel hle mahse ngaihṭhat thlak loh zet hian min rawn nuih ver ver renga, zui ka duh bik lo amaherawhchu Rainer hmuh ka duh em avang leh party na a a awm ngei ka rin avangin ka lo bu nghat a, zui ve chu ka rem ti nghal bawk.

Amira car -a ka luh rual chuan ka sana chu ka zuk thlek zeuh a, a rei berah darkar khat pawh tling lo ka hmu zawk anga ka haw leh vat ang ka ti rilru melh melh reng a. Ka û in min man chhuah ka duh bik loh avangin reilo te tak tak bak ka awm lo ang.

"Braydon a dam maw? tunlai chu ka hmu ngai meuh lo "

A hma ang bawkin nelawm zet hian min rawn nuih sek pahin a rawn ti siam siam a, Ka û chungchang mah nise Rainer chungchang min zawh loh chhung chuan ka lawm tho tho.

" A dam ṭha ...University ah a lut tawh lo a "

" a nih chu... engpawh chu nise a dam ṭhat chuan a lawmawm a nih chu "

Thil eng eng emaw sawiin a nui deuh har har renga, a fiamthu thawh rualin za lo zet hian ka lo nuihpui ve suk suk ringawt. A awmdan aṭang hian Braydon lakah rilru put hmang danglam a nei tawh lo a ni tih a hriat hle bawk.

Party na hmun kan thlen chuan ka rin ang ngeiin frat party alo ni leh ngei tawh a, a ngai te bawkin boruak a rit nghal em em bawk.

"hawh lut ang... nuam han tawl ang hmiang"

Tih pahin inchhungah chuan min kai lut nghal dawr dawr a, midang lamna kara kan va in hnawh phei tawt tawt lai te chuan a rukin Rainer ka zawng deuh renga mahse mi an tam bawka han zawn hmuh nghal mai chu thil awlai lo tak a ni .

" Hetah hian lo ṭhu rawh Rainer pawh a rawn kal ṭep tawh ang " tih pahin a bo nghal daih ringawt .

Amira min kawh hmuhna couch ah chuan buk nghat pahin ka ṭhu nghal a, light phe zawk zawk karah te chuan ka hawi kual hrek hrek reng a, hepa hi khawih ber hian nge a awm tak ang ?

Rei pawh ka ṭhut hma in Amira bawk chu plastic no sen pahnih nen hian a rawn lang leh a, " Sadie... beer nge tui i duh? "

" Tui ka lo in zawk ange? " Party tura kal ka nih loh avangin zu farkhat pawh lem ka tum lo.

" ka ring rengah " nuih sek pahin tui zawk chu min rawn pe a, ka in zawh meuh chuan ka dang ro lutuk pawh kha a zia deuh in ka hria .

Amira a bo leh tak hmiah avang chuan keimah ngeiin Rainer chu zawn ka tum ta ringawt a, hetia ṭhu chunga lo nghah ringawt hian awmzia a nei lo.

Mipui lam leh ri hut hut karah chuan ka va inhnawh phei ve leh tawt tawt a, boruak a rit bawk aniang ka lu a hai in ka khawhmuh te chu a rawn fiah lo telh telh a, hetiang boruak rit lutuk hi ka zo lo niin ka hria.

Ka lu a nat tak em avang chuan ka bula dawhkan chu ka bawh nghal rawk rawk a, ka khawhmuh fiah lo ruai mai tih fiah leh tum chuan ka han khap deuh fak fak a mahse awmzia a nei lem lo.

" i ṭha maw? " Aw thum deuh dut ka hriat rual chuan chupa chu ka rinchhan ta ringawt a, min kuah lo phei se chuan keimah pawhin ka ding thei tawh lo.

" Min pui rawh... "
Tih chiah ka sawi hman, Rainer hming sawi leh ka han tum a mahse a ri chhuak thei tawh lo, ka hriat theih zawng chu ka bul hnai vela music ri ruai ruai te leh light phe zuk zuk te chu an ni tawh .

____________________________________________

Phone vibrate chur chur ri ka hriat rual chuan ka harh chhuak hlawl a, ka lu na lutuk dawm vawng vawng pahin khum atang chuan ka ṭhu chhuak nghal hlawl bawk.

" Tunge... ?"

Meng mang lo in ka khum bula ka phone dah ri chur chur reng chu ka han ban rawk rawk a ka ban fuh theih tak si lovah chuan ka han meng fiah deuh a, ka room a ni lo tih ka hriat rual rual chuan ka harh nghal kawk ringawt!!

" ka phone a nih kha "

 Mipa aw ka hriat rual rual chuan ka mutna bul chu ka va melh phei a ka hlauh ang ngeiin mipa pakhat alo mu tak tak!!

" Lalpa leh!! " phawk fe a men nghal kawk pahin ka han in en fiah nghal vat bawk a, ka bra leh panty chauh ka lo ha tawh!!

 Khawiah nge ka kawr a awm?!! Tunge hepa hi?  Hetah hian engtin nge ka awm theih?

Sadie Morin engthil nge thleng ta hi!!

(Chhiar zawh veleh fakna khu aw )