Rainer Black-48 by Remruati Bawitlung(Haylor)

CHAPTER -48

"You know it hurts me but you do it anyway"

An in hmuhna hmun tur nia an sawi kan va thlen meuh chuan rin ang ngeiin mi 20 bawr vel chu an lo awm luih luih ngei a Declan, Shane leh Josh te chu lo sawp zawi vek tawh mahse thinrim loh hram erawh ka tum tlat thung.

Rang takin Sam leh Blake te chuan an pathum chuan an va kuah hrang nghal vat a, pahnih chauh an nih avangin an lo khawih let lem lo .

" Hmel ho min rawn khawih leh ta che u "

 Zack chuan theih leh thei lo hian a va au khum leh hram a, an rual tawh nak alaiin hmanrua an thawh lehnghal a dawih ka tih em avangin beih let chi ah pawh ka ngai lo.

" Kal ang "

 Nidanga bei let na tur phet zawng ṭhin leh ṭhiante thlavang hauh em em mai ṭhin berin kal ka rawt tak daih avang chuan ka ṭhian te ho chuan mak ti takin min rawn en ha hlawm a, Declan phei chu ka chungah a thinrim takzet a ni tih a mitmeng aṭang pawhin a hriat theih.

" Rainer... hetiang ringawt hi chuan kan kal thei lo ang " Blake chuan a rawn ti hau a , ka beih let a lo rin vang te pawh a ni mahna.

" hemi te pathum anga awm hi in duh em ni? " zawi si vin deuh hluk si hian ka chhang let a.

A nihna takah chuan pathum chauh an ni a, an hneh dawn lo a ni tih hre sa reng chung pawha an va cho lui tlat hi huai vang a nilo ,a atthlak takzet zawk.

" Kal ang u "

Declan chuan lungawi loh hmel zet hian a rawn ti ta ringawt a, ala tlawm mai lo tih ka hria mahse a beih let theih tawh miau loh avangin duhthlan tur dang a nei lo, min rawn zui mai angai.

A upa ber leh kan râwn ber Declan ber in kal a duh takah chuan tumahin an hnial ngam tawh lo, tlawm tak chung leh hrehawm ti tak chungin chumi te ho chu hnungchhawn in kal kan tum ta a mahse Roger chuan," In tlawm ta mai em ni?  nge i nu in a phal lo leh tawh zawk ?" a tih takah chuan ka ding nghal chut a, ka nu a rawn hmer tel leh kher takah chuan ka ngeng a chhun ta zak mai!!

Ding khawng reng chunga ka inhum ruh lai chu ngun takin Declan chuan min lo en ran a, ka nu hming a lan tawh hi chuan ka sa nghal phat ṭhin a ka insum thei tawh ngai lo a ni tih a hriat vang a ni.

Ka kut chu a za in a hmaia va hnek sawk sawk te chu chak hle mah ila Sadie in insual leh tawh lo tura min lo in tiam tir tawh avangin inbeng daih tum chuan ka kut ka hum ruh ṭun tawh chu ka thlah thla nghal riai riai a, min in tiam tir laia Sadie mitmengte leh a hlauthawng hmel ka mitthla rual phei hi chuan mak tak maiin ka insum theih phah tlat nia!!

Ka ṭhian ten ka beih let tawh ngei an lo beisei vek tawh lai chuan hawi pawh hawi let lovin ka kal nghal nal nal a. Sadie laka ka thutiam bawhchhiah ai chuan mualpho taka tlawm ka thlang zawk a lo nih ber hi .

" Hey!!  hmela min rawn bei let ta che, nge i nu ka mutpui hunah min rawn bei lei chauh dawn zawk ?"

Roger chuan ngeiawm zet leh min tih el zet hian a rawn ti vel pang pang a, chutah a ṭhiante nen min rawn nuih sawh vel takah chuan ka nihna ngaiah ka let leh ta!!

" A inchhir viau ang le " Sam chuan alo ti zui sap bawk.

Vawikhat pawh inngaihtuah nawn lovin leh an tam leh tam loh pawh ngaihtuah hmasa lovin Roger chu ka va bawh thlu nghal tawp a, ka hnek nghal bawrh bawrh takah chuan an vai mai chuan min rawn bawh rawn nghal huk bawk a ,hneh dawn loh mah ila nui leh ngam tawh lo tur khawpa a ha ka hnek bal vek chuan ka duhtawk tho tho.

Ka ṭhian te pawhin min rawn pui tho mahse hmanrua an thawh miau avangin duh ang pawhin a beih let hleih theih loh, mi 10 vel in min vuak rawn nimai hian ka hria.

Rei pawh ka in beih hma chuan police siren a rawn ri nghal vung vung a, ṭhenkhat tlanchhe hman mahse a tam zawk erawh an man hman thung.

___________________________________________

★HOSPITAL★

Min sawisak nat deuh bakah ka ban veilam ruh (upper arm) min vuak tliah sak lehnghal a, ka ban puam ah thir an phum avang leh hliam tenau ṭhui tur neuh neuh kan neih nual hlawm avangin darkar thum vel chu damdawiin ah hian kan awm tawh.

Josh phei chu a inhliam nasat deuh hlek avangin an admit nghal a, midang erawhin admit ngai khawpa hliam liantham kan nei lo thung.

Ka dar dinglam hliam an ṭhui zawh hnu chuan Josh a awmna cabin lam chu ka pan nghal a, kan ṭhian dangte ho pawh an lo kim thawkhat hle.

" Buddy....kha i ban rek tliak a dam deuh chauh a I ban I awrh lehnghal a ni maw? "

 Jonny an min hmuh rual chuan min rawn fiam nghal a, intih buaina a tel ho chu kan hmai a dukin a vung lak hlawma nuih te pawh an ti za zawk.

" Roger pawh a ha hmai i hnek bal a tunah damdawiin ah a awm ve mek " Shane an a tih chuan kan nui nghal ham ham hlawm a, a damlo ber Josh nuih a za hlei hlei .

" tuin nge Police call? " Declan chuan thutak deuh hian a rawn ti chhuak hlawl a.

" Ele... keimah, message ka dawn rual khan in hneh dawn lo tih ka hria a ka report nghal alawm "

Jonny chuan a lo ti sam et a ,a report dan erawh sawi lo mahse Roger te ṭhian ho chauh an man danah a report thiam hle a nih dawn hi.

Kan awm luih luih avangin Nurse in cabin aṭang chuan min hnawhchhuak diak hlawm a, eng ang pawhin hliam in sawisak rawn ni mah ila kan awm khawm tawh hi chuan fiamthu nan bak kan hmang ngai lo.

Motor ka khalh theih loh avangin Declan an min thlah dawn a, ala thinrim reng pawh a ni mahna kan la inbe leh lo.

"I ban kha a na em? "

 Amah aia ka hliam nasat tak avang hian a inthiam loh hmel hle .

" aw "

Tawi hle mahse nidanga ka ṭawng dan ang tho a nih avangin a khi nghal suk a, ka dar na lai taka a rawn ben thuk rual chuan ka lo ner nghal sawk.

" a na " ka lo ti vin nghal hlur bawk.

" ka tih palh... I nu chungchang a rawn sawi khan engvanga bei let lo nge i nih? "

Min zawh kha ka ring rengah mahse Sadie laka ka thuthiam ka hlen loh zia min hriatchhuah tir zawka ka in thiam loh phah hle nghe nghe.

"ka hrilh dawn lo che "

 Ka lo nuih liam puat ringawt ,engvangin nge a chhan ka hrilh tehlul ang Sadie nen kan inkar a ni tlat.

"Keini ho takngial pawhin i nu chungchang kher kher hi chu kan sawi chhuak ngam ngai lo kha a nia mahse Roger lehzel pawhin a ti thinrim zo tawh lo che a nih hi, i lo danglam ta hle mai nilo ...i lo zaidam ta khawp mai "

Mi zawng zawng in thinchhia, luhlul leh insual hrat tih hlir in min ko ṭhin , Declan chiah hi zaidam min titu awmchhun leh min ti hmasa ber tu a ni.

Hetiang anga ka danglam tak zia leh ka zaidam tak zia min hrilh chhen takah chuan Sadie ka tawn aṭanga danglam ka ni tih chu ka in pawm ve ṭan telh telh a, Sadie laka ka rilru put hmang danglam tak zia pawh ka hre chho ṭan telh telh bawk.

Chutia inhnuai lam pana kan inzui thlak lai chuan Declan'n,"Khu khu Sadie a ni em?" a tih ruala ka zuk hawi thlak nak chuan Sadie leh Nolan te inkuah lai chu ka zuk hmu ta thut mai!!

Ka nu hming an sawi rual a ka lo thinrim ve na te kha chu nep te, ka alh nghal puat thei.

" a nih khu, hawh kal ang "

 Khik suk pah hian a rawn ti leh a mahse engah mah ngai lo ang maia han kalsan daih chu ka thei ta hauh lo!

An in kuah lai chu rum zeta melh thlak ngur ngur pah chuan ka inhum ruh nghal ngawt ngawt bawk a, ka awmdan danglam nghal thut chu Declan pawhin alo hmuh hmaih bik lo.

" Rainer kal ang " a rawn ti nawn leh ngat mahse hria ang pawhin ka awm lo.

Nizan ah min duh thu min hrilh zo chiah a tunah mipa dang a kuah leh si amaw!!!  Phiangsen chuan!  Khatih hun chhung zawng khan min lo bum in lem a lo chang lek maw lo ni a!!

Tenawm lutuk!

__________________________________________

*Sadie's POV*

Lab class a zawh rual chuan rang takin Nolan an min rawn um chhuak nghal a, nidanga ka kawm ber ṭhin leh engkima ka kawppui ni ṭhin kha ka pehhel a ngai ta mai hi hrehawm ka ti takzet.

" Sadie.... "

Min rawn koh pawh chuan ka en ringawt a, rang takin ka kalsan lehnghal dawr dawr ringawt.

"Hetiang hian awm tawh lo teh " tih pahin ka hma ah tak chuan a rawn ding nghal a, a hmel pawh hi ka en ṭha duh lo.

"Ka ....ka tihpalh mahse min pehhel  tawh suh"

"Ka lakah hian eng nge i duh? "

" A hma a kan in ṭhianṭhatna kha.... Sadie a hma ang khan awm leh ang "

" kan in ṭhianṭhat na chu nang hian i ti chhia asin"

 A hma anga kan awm leh a nih chuan beiseina ka siam sak leh anga, a rilru ka ti nat sak leh tho tho dawn, Nolan rilru hi tih nat sak ka duh tawh lo.

" Ka thusawi te kha theihnghilh rawh ,engmah ka sawi lo angah ngai rawh "

"chutiang mai mai a theihnghilh awlsam a ni hleinem "

"a nih chuan theihnghilh suh bakah nang ang hmeichhe kawlh lutuk hi tu in nge duh ang ?" min rawn nuih vur vur pahin a hma a a hmaia ka ben chungchang kha fiamthu in a rawn sawi chhuak leh a, a tawp a tawp ah ka nui chhuak hak ringawt.

"I sual lutuk " tih pahin ka kuah nghal vawng vawng a, ka ṭhian ṭha tak leh ka innghahna ber hi chân ka duh bik reng reng lo, hetia kan inkar a ṭhat leh tak avang hian ka hlim takzet.

"Khawiah nge Rainer?" kan in kuah zawh chuan min rawn zawt nghal a, nuih ver ver pahin ," ka hrelo... ka ril a ṭam thil ei ang " tiin ka lo chhang nghal var a.

" Ka treat dawn miah lo che nia " a rawn ti leh a, "keipawhin ka treat dawn bik lo che " nuih dun hak hak pahin kan inzui nghal hnak hnak a.

Nolan phone a rawn rik avangin kan han ding leh rih a.

" Enga?!! " phone a lak rual rual chuan a ti nghal tuarh a, engmah a sawi belh lo a phone chu a ipte ah a dah sawk sawk a.

" Eng thil nge thleng? "

" Tunah khan ka nu a zual thut a damdawiin ah ka kal nghal vat angai.... Sadie nidangah thil chu ka ei mai dawn nia " tih leh tlan a rual nghal , a hnungah ka theihpatawp a chakin ka umzui ve nghal bawk.

" Class i la neih kha rawn kal duh suh "

" Ai... ka rawn kal ve duh alawm " ka ti ve tlat .

Engtin nge Nolan nu a ṭhat loh laiin ka lo awm mai mai theih bik ang, engpawh thleng dawn se ṭhian ṭha tak a kianga engtik lai pawha awm reng ṭhin a nei tih hi hria se ka duh.

__________________________________________

★HOSPITAL★

" Tunah chuan nachhawkna in kan chiu tawh a, a zia tawh e" Doctor in a tih chuan hnara hlit phawi ang maiin ka thaw nghal huai mai.

" Sadie...class i neih kha let leh tawh rawh keichu ka rawn let tawh hrih lo ang "

" I nu kha a ṭha ang tiraw? " keimah zawk hian hrehawm ka tiin ka lo mangan pui takzet .

" A ṭha leh mai ang.... mahse ka nu hian min mamawh a i rualin ka rawn let tawh hrih lo ang "

" aw le "

Inchhungah a luh theih loh mai bakah engmah tih theih kan neih loh avangin let leh chu a finthlak zawk bakah tuna ka class neih tur hi ka project atana class pawimawh tak alo ni lehzel bawk nen.

" lo kal rawh.... taxi awmna thleng ka va thlah ang che "

" nilo... angai lo keimah in ka kal thei "

" a nih chuan i thlen veleh min rawn hrilh dawn nia "

 A hlauthawng lutuk hmel leh a mit sen ram mai ka hmuh chuan ka khawngaih lutuk chuan ka kuah nghal vawng vawng a, tlem talin a rilru a hahdam  phah ve huai ka ring.

" Nolan... ka rawn kal leh vat ang" tiin ka thiam ang tawkin ka han hnem a, ka hnuk lah chu a ulh deuh ṭun lehnghal.

Ka phone a rawn rik rual chuan ka sam tuai chhoh phawk pahin ka phone chu ka han en nghal a, Nolan melh chhoh ha pah chuan, " Rainer a nih hi " ka ti zui sap a.

"I let leh vat angai a nih kha... kal vat vat rawh "

" aw le... "

Ka hnuk a ulh a ni tih hi hrelo se ka duh avangin thawk halh pah chuan ka pickup nghal a,min hmu dawn lo mahse ka nui lui nghal sak bawk.

" Khawiah nge i awm? "Hello pawh ka tih hma hma in a engah hma chuan a rawn ti vin nghal hluk a, ka ṭawng bah phah nghal nuaih lehnghal.

 " umm... ughhh " damdawiin ah ka awm ka tih chuan a chhan min zawt leh ngei anga chutah Nolan hi a thik ropui lehnghal engtin nge ka sawi tak ang?

" ughh... lehkhabu dawrah ka awm "

Dawt ka sawi ringawt!! thudik ka hrilh a nih chuan kan inkar a buaina chu sawiloh engmah hre lovin Nolan hi a sawisa leh duh ngei ngei dawn tih ka hriat lawk sa avangin dawt ka sawi ta ringawt a ni.

" Tu nen? "

Engvanga min zawt thut nge maw a nih le?  Dawt ka sawi nawn a ngaih phah dawn a nih hi .

"Kaitlyn nen... " ka tih zawh rual chuan maimichhing chungin ka hmui ka seh  ngawt ngawt ringawt.

" Ngatinge dawt i hrilh? "

Nolan an zawi te a a rawn ti sap rual chuan ngawi turin ka lo signal nghal vat a,a ṭawng ri a hria a nih vaih chuan buaina ka tawk nghal a ni mai.

" Anih chuan eng nge damdawiin ah i tih?"

 Enga!! Tunah khan engthil nge a sawi?

Rang lutuk in ka hawi kual nghal vat a, ka hlauhthawn ang ngeiin kan piah lawkah Rainer an rum zet hian min lo melh kur reng chu niin!!

Ramhuai hmu ang maiin ka meng phawk nghal kawk a, Rainer lah chu en mai pawh sawn a thinrim takzet a ni tih hai rual a ni lo.

" Rainer... " ka ti sap a.

Engmah sawi tur ka hre lo, han in sawifiah vak ngaihna pawh ka hre hek lo, ka ding khawng reng ringawt.

Ngawi rengin Rainer chu a kal nghal daih a, Nolan pawh ka ngaihtuah hman tawh lo ka umzui nghal dawr dawr a, ka ṭawng hria ang pawhin a awm lo hma lam panin a kal nghal nal nal ringawt .

" Rainer min ngaithla teh "

Car-a a lut tur chiah chu vanneih thlak lutuk in a jacket ah ka va pawt hman hlauh.

" min ngaithla teh " rum zetin ka mit ah tak min rawn melh chiah mai chu ka hlau bawk a niang ka thau ah min man thei.

A hmel ka hmuh zawng ringawt pawh hian biak ngam a ni lo , muang changin ka vawnna chu ka thlah thla nghal riai riai a, engmah sawi lo mahse a thinrim dan chu pui tak a ni.

Rainer thinrim lai hi ka lo hmu fo tawh ṭhin na in tun ang em em a a thinrim ang erawh hi chuan ka la hmu ngai lo.

Ka vawnna ka thlah takah chuan min hnungchhawn nghal hmak a, car ah min luhsan hmak bawk.

" Sadie... Engkim a ṭha vek tiraw? "

 Rainer a kal liam hnu lawkah Nolan pawh a rawn thleng phei vat a, sawi tur reng reng ka hre lo.

" Engtin nge ka tih tak ang? " mangang takin ka han melh ha a, " i lo hmu em a hmai te kha, a inhliam lehnghal a bula awm ka duh takzet " ka ti zui sap bawk a .

" Nolan... Rainer khan min be duh lo, ka thiam loh vek a ni, engthil nge ka tih tak hi? "

"nawr lui hrih suh hun thawl pe phawt la naktuk lamah i sawipui zawk dawn nia "

" mahse a mizia te chu i hriat kha,awlsam taka biak theih a ni dawn lo "

Ka rilru a hah in ka mangmang takzet, thinrim dawn pawh nise dawt kha lo hrilh lo tawp tur ka ni asin.

Mimawl nu engthil nge i tih tak hi?

(Chhiar zawh veleh fakna khu hmet zeuh ang u aw ...Xoxo)