July 02, 2019
CHAPTER-47
"I have you and that makes me smile everytime I think about it "
" umm.... movie kha dar5 ah a nia" a tih rual chuan ka sana chu ka zuk melh zeuh a, minute 30 vel chiah alo awm tawh.
"a lo berah darkar2 vel a nia nga i project kan en hman dawn em ni?"
A nihna takah chuan Movie en hi boring ka ti, a theih hram chuan chhuanlam siam a hmun danga hruai daih ka duh, engvanga en pui tura lo remti ve ringawt nge ka nih pawh ka hre lo.
" Project chu naktuk ah kan en mai dawn nia " a lo ti sam et lehnghal, engpawh chu nise movie a ngaihpawimawh zawk danah hian ka enpui ngei a ngaih hmel.
Car ka dah fel hnu chuan engmah sawi lovin chhuah nghal daih chu a tum a mahse a banah ka va man bet hman.
Ka vawnna kut rawn melh ralh pahin mak tih hmel tak hian min rawn en nghal kar a, ka khawih apiang hian a danglam nghal vek ṭhin a ni tih ka hria mahse a insum tlat ṭhin avang hian ka huang chin hi ka pel lui kher ṭhin, min mamawh a ni tih hi a kâ aṭanga hriat nawn mawlh mawlh hi ka duh.
" tikhan i chhuak mawl tawp dawn em ni? " beisei nei deuh hian ka han ti sup a, a ni chauh nilo kei ngei pawh hi a vawikhat nan ka lungphu a rang kher mai.
" Eng eng... nge awmzia? "
Huizz.... tlang takin min fawp rawh tih leh tawl a ngai dawn a ni maw? mahse hrilh ngai lovin ama thu ngeiin min fawp ve tawh se ka duh.
"I chhuah hma in thil tih theihnghilh i nei " kan ti leh ringawt a, mi pangngai tan chuan ka va hnaih danah leh fawp rem tura ka awm danah hian a hrethiam ve tawh turah ka ngai.
" eng chu maw? "
Ka mithmul chu ka han kan ak a, a ngaihna a awm hlawl lo ,hetiang ang hmeichhe zei lo lutuk leh ka type pawh nilo bulah hian engvanga la awm cheu reng nge maw ka nih? ka hun ka khawh ral mai mai a ni.
Ka tih ngaihna hre lo chuan a seatbelt chu ka phelh sak ta ringawt a, " i chhuak thei tawh ang " ka ti bul hmuk bawk.
Popcorn leh in tur vel kan lei zawh hnu chuan theatre lam panin kal dun reng siin inhlat deuh takin ka kal a, ka kekawr ipte zen chung hian a bulah ngawi rengin ka kal ve zel a, ka lo chei mawi hi a ni ringawt.
" Eng movie nge kan en dawn? "
Peih lo hle mah ila phur lo hmel ka pu ngam bik miah lo,a chhanchu a phur lutuk hmel ka hmuh ringawt pawh hian nuam ka lo ti ve ringawt miau alawm.
" Crazy Stupid Love ....a trailer ka en tawh a a hmuhnawm viau ang ,ka nghak rei tawh bawka a tawp a tawpah ka en ve thei dawn ta" a ticket ken lai en pahin a nui nghal ver ver a, a nui hmel ka hmuh rual chuan a rukin ka lo khi ve suk ringawt.
Hahh.... A movie hming reng reng pawh chu hmangaihna ka lo ngaihdan nen a in ang chiah, Hmangaihna hi a atthlak in thil ho mai mai a ni.
Movie kan en laklawh lai chuan ka phone a rawn vibrate ve sek avangin a tawp a tawp a ka phone chu ka la chhuak ta nge nge a, Engvangin nge Declan'n tun ang hunah min rawn call le?
Pick up ta lo chuan Sadie in hmuhnawm ti taka a en dauh dauh lai chu ka melh zeuh a nuih suk pahin ka phone chu ka reject hmak a ,ka jacket ipte ah ka thun lut daih bawk.
Bawp khawkherh chunga ka ke ka lo tih chet hlerh hlerh lai chuan," tissue ... "
mittui tling piau chung hian luh dawna tissue kan lei lawk sa kha min rawn dil a ,rang takin ka lo pe nghal .Movie pawh en lovin thil dang daih ka lo ngaihtuah bawk a ,a ṭah nachhan pawh ka lo hre ve lo.
Sadie chauh nilo midang ho pawh chu an ṭap pur hlawm a, hmeichhe ṭap hmel hmuh hrehawm tih tawh sa nak alaiin hmeichhe ṭap in min han hual phei hi chuan ka tawt nghal up up thei.
Ka phone a vibrate reng bakah boruak dang hip ka duh avangin zun chhuak chhuanlam in theatre chu ka chhuahsan thei hram a ,ka chhuah rual rual chuan rin loh deuhin Declan nen kan in tawk hlawl .
" Rainer kan mamawh che... Roger te ṭhian ho in Carter an lo sawisa ve ringawt a, tunah an frat house ah kan luhchilh dawn " a hmel aṭangin a hlauthawng a ni tih hai rual a ni lo mahse hetiang ringawt hi chuan Sadie ka kalsan thei bik lo.
" Ka hman lo " ka lo ti bul hmuk a .
" I awmloh chuan midang an lut ngam lo, i rawn kal ngei ngei angai "
" Engtin nge hetah ka awm tih i hriat? "
"Sadie nen movie in en a ni lawm ni, chu chu tunah a pawimawh ber lo, i ṭhian te hian tunah kan mamawh takzet che" ni dawn tak ,Sadie in min rawn sawm lai khan a awm ve tak.
Ka ṭhianten min mamawh laia Sadie bula lo awm veng veng chu thil dik nia ka hria bik loh avangin, " lo va kal rawh ru, ka rawn thleng har lovang " tiin ka chhang ta ringawt a, buk nghat pahin hmanhnawh takin min kalsan nghal vang vang bawk .
Ka kal tur thu hrilh tuma ka hawi let nak chuan Sadie chu ka hnungah a lo ding reng tawh chu niin, kan thusawi lai kha alo hre vek a ni tih pawh a hmel aṭangin a hriat theih.
" Umm... ngatinge i rawn chhuah,a tawp tawh em ni? "
" aw... " min chhang tawi tap .
" ka thlah ang che... " tih pahin min chhan hma hma chuan ka kalsan nghal nal nal a ,ngawi rengin ka hnungah min rawn zui ve nghal dawr dawr bawk.
Ka hmanhmawh em avangin chak takin ka khalh a, kawng tluanin kan in be lova in biak na hun lah kan nei hek lo. Tunah hrih chuan ka ṭhiante ka pui phawt anga naktuk lamah Sadie chu hmun dangah ka hruai mai ang tiin ka ngaihtuah zui neuh neuh bawk.
Nidanga ka thlahna ṭhin ah bawk chuan car chu ka ti ding chat a, hetianga han kalsan daih chu hreh hle mah ila ka hruai ngawt thei bik si lo.
" Rainer... " chhuak ta mai loh chuan a ṭhut dan ngai chuan a ṭhu renga, kal turin hrilh ka tum bik hauh lo.
A chil lem dak pah chuan min rawn en kar a, a huaisenna zawng zawng sawmkhawm in khur dar dar chung hian ka hmuiah chuan a rawn fawp nghal zeuh bawka, ka in rin hma in ka lo khi nghal suk ringawt.
A tawp a tawp ah min fawp hmasa leh ta alawm !!
Hmeichhe khur nasa lutuk leh zam lutuk ṭhin te hi ka duh loh ber te leh huat ber te an ni ṭhin amaherawhchu tunah chuan a duhawm ka ti in hmuhnuam ka ti tawh zawk.
" Rainer ummm.... " sawi hreh hmel takin ka biang lehlam dawm pah chuan min en kar a, " Buaina ah i tel tawh lo ang tih min tiam rawh " a rawn ti khauh mai!! chhan ngaihna ka hre der lo.
" Khawngaihin i insual tawh lo ang tih min tiam rawh " a thil sawi ah a chiang in a rilru sawhsawn a tum hmel loh khawp mai.
" heihi ka nihna a ni "
" nilo.... i nihna a ni lo " a hmel thutak khak mai chu chiang zet hian ka en reng a, " khawngaihin " a rawn tih leh ngat phei hi chuan,
"aw le "
Inngaihtuah nawn eih lo in ka tiam nghal der!! Engvanga ka ṭhiante awlsam taka phatsan nge ka ni tih pawh ka in hre der lo!!
Henu hi chuan a duh duh dan in min her kawi kual vel mai mai chu a nih hi, control tumin amah han hnaih ve teh mah ila ka hriat loh karin keimah zawk hi min lo control reng tawh a nih zawk hi.
"ka lawm e... " min rawn nuih sek pahin min rawn fawp lehnghal vawng vawng a, ka thiante ka phatsan avanga inchhir na nei lek lovin min siam leh tak hi.
Duhthawh zet hian ka lo fawp let nghal tawn tawn a, ka kut lah a ninhlei leh ṭan tawh khawp mai, a kawr chhungah zen lutin a awm bawr chu ka ṭham nghal chat a, amah ka dim rual rual in ka che rough leh ṭan tawh hle bawk.
" Rainer.... " hetiang anga ka hming a lam apiang hian nuam ka ti.
"Umm... " rum nghulh pahin a nghawng chu ka fawp a, nilo ka hne dek dek a ni zawk mah.
"Tunah ni lo... ka sawi awmzia chu hetah nilo " rum deuh halh halh pah chuan a rawn ti leh a, car a tih hi a duh lo pawh a ni mahna.
" ka inah kan kal dawn em ni? "
" nilo... umm ka kal a ṭha zawk in ka hria " tih pahin a inla hrang nghal vat a, hetiang anga a tih ziah avanga ka lungawi lo hmel pawh ka pe lian leh nghal hle.
"aw le " ka lo ti leh hmak tawh.
" i thinrim em ni? "
A nuam tilo chuan min rawn zawt leh dak dak a, han thinrim khum theih pawh hi a ni lo .
" kal tawh rawh " ngeiawm zetin car chu ka ti nung nghal thawt thawt bawk.
" umm.... englo ania " thil sawi tur nei ang deuh hian a awm a, a sawi meuh hi chuan min ti thinrim leh nge nge zel.
" ka duh che " tih sep pahin a nui sek a, kawngka a hawng rawk rawk a rang takin a tlan chhuak nghal vang vang ringawt !!
Ka tih ngaihna hre lo chuan ka en zui vung vung ringawt a ,a tawp ah a chet dan naupang chhia tak avang khan ka khi nghal suk a ,hma lam panin ka tlan chhuak nghal bawk.
Sadie in insual tawh lo turin min in tiam tir tawh avangin Roger te frat house lam inlo in ka in kawngah chuan ka kawi phei ta zawka, engmah hre dawn tawh lo mahse hetia a thu ka lo awih ve ringawt avang hian ka nui phei vur vur ringawt.
_____________________________________________
Vawiin chu nidang ang lo takin hma takah College ka kal a, kan ṭhian ho awmna room ka thlen phei chuan tuvakmah an lo la awm lo.
" Dude... heihi eng nge? "
Sam chuan dawhkana ka lehkhabu dah Sadie project atana pawimawh em em mai library aṭanga ka hawh chu a keu nuap nuap a, helai room ah hian lehkhabu kan ken luh ngai loh avangin mak a ti hle nghe nghe.
"khawih suh "
A keu uluk loh em avangin ka lo ti vin hlur a, Sadie hian a lehkhabu te a uluk thei bawka a lehkhabu nilo mahse ka lo uluk pui ve em em ringawt.
Nizana Sadie awmdan naupang chhia lutuk leh a thil min hrilh ngaihtuah let paha ka melh ngai ka lo melh veuh veuh lai chuan tuemawni hian min rawn ko thut a, ka phu chiang kher mai !!
" Rainer.... nizanah khawiah nge i awm? " Zack hmai chu a duk chur a, a mit pawh a meng ṭha thei mang lo.
" khawiah nge Carter? " ka lo ti nghal vat a, thil thleng hi a ṭha lo tawp mai .
" tunah damdawiin ah a awm mahse na lutuk erawh a nei lo "
" a ṭhat chu... " ka ti zui sup a, an buaina ah erawh va inrawlh ka tum lo.
Thlamuang takin ka ṭhu dawn chiah tih in mipa pakhat hi hmanhmawh takin room ah a rawn tlan lut a, Sam an alo va buaipui nghal vat a.
" Tunah hian Declan ,Shane leh Josh te pathum in Roger te ṭhian ho hmachhawn turin an kal mek "
" Chill.... thil serious lutuk a nih loh chu " Hetiang anga han in tih buai bap bap te hi chu a thleng deuh reng a, ka la thutak teh chiam lo.
"Roger an thian 20 vel a rawn hruai a ,Declan te lah pathum chauh an ni thung "
" ava fair lo ve " Sam chuan alo ti nghal nang nang a.
" engmah fair lo a awm lo " tih hmuk pahin ka ṭhutna ah chuan thatchhe zet hian ka ṭhu zui leh ngat a,va puih buai erawh ka tum lo hle .
" kal ve nghal ang u.... " Blake chuan a rawn ti nghal at a, Sam pawh a in ring nghal hle.
" Rainer i rawn kal ve dawn lo em ni? " ka la ṭhut khawmuan ser ser avang chuan Blake chuan a rawn ti leh a.
"I tello chuan an sawisa vak mai ang " Sam chuan a ngen hian min rawn ngen ti tih tawh.
" ka hman lo " ka lo tih hmak avang chuan Blake chuan, "keimah chauh pawh ni dawn mah ila ka pui dawn... keichu ka kal dawn in duh chuan min rawn zui thei ang " tih bung hmut pahin room aṭang chuan a chhuak tau a.
" Rainer lo kal rawh....Carter pawh damdawiin ah a awm tawh hi " Sam chuan a ti leh a.
" ni e ...mi 20 rual bei tur chuan an tlem mah mah an sawisa hlum thei mai ang " pakhat pa pawh chuan a lo ti ve bawk a.
"an lo khawih rawn hrep mai ang...khawngaihin rawn kal rawh "
Min dil ngawrh tak em avang chuan phur lo zet chung hian ka ṭhut na aṭang chuan ka tho ṭuih ṭuih a
,"min rawn zui rawh u" tih leh thatchhe zet chunga kal ka rual nghal.
Hetia ka kal avang hian Sadie thu min tiam tir kha ka theihnghilh tih na a ni lo, khami avang chauh a kal tum lo kha ka ni zawk.Nidang chu nisenise nizan ah pawh khan ka hriat rual la la khan a hmun ka thleng tawh ang mahse tunah hi chuan va inrawlh vak pawh ka tum hran lo, min dil ngawrh em avanga a hminga kal tum mai mai chauh ka ni.
(fakna khu chhiar zawh veleh hmet keuh ang u aw)
0 COMMENT:
Post a Comment