Rainer Black-35 by Remruati Bawitlung(Haylor)

CHARTER -35

"I want to share every important things with you " 

"Sadie rawn chhuak lawk teh... "

Rainer chuan kan bulah Nolan a awm ve a ni tih hmu lo ang mai hian a rawn ti kher a chutah min hnaih sêt hian ala rawn tawlh phei zui.

Rainer chet dan avanga Nolan hmela mak tihna leh hrilh hai hmel chu ka lo hmuh hmaih lo nasa mahse rawn in rawlh buai lovin ngawi rengin a thil ziah lai chu a chhunzawm lehnghal mawlh mawlh.

"eng nge? "

 Nolan ka zah em avangin Nolan melh hrak hrak pah chuan zawi te hian ka lo ti sap a, Rainer lam phei chu ka hawi duh lo hrim hrim .

"thil hmuh tur che ka nei " a kut lehlam in ka chair nghenchhan chu a vuan a lehlam erawh dahkan ah a nghat khur thung .

"ka la buai hrih. ..nakin ah min hmuh mai dawn nia "

Ka tih rual chuan ka pencil ken lai chu min rawn laksak hmak! Nolan hian kan thusawi a hre thei vek a ni tih ka hriat ve kur avangin ka ṭawng ṭha vak duh lo.

" a rei lo ang "

"Rainer...tikhan min hmuh mai rawh " tih paha ka hawi phei nak chuan min rawn ṭhut hnaih em avangin a mit ah tak ka han en fuh chat a, a mitmeng paw châk mai thutak lutuk leh hriatthiam har tak ka hmuh rual chuan ka hawi sawn rang kher mai.

Eng ang pawhin min sawm mahse ka kal dawn lo a ni tih a hriat chuan ngawi rengin ka notebook chu khup in ka bag ah a kung lut hmak ringawt.

" engthil nge maw i tih le? "

Ka lehkhabu dang pawh chu a khup leh a lak kan a tum lai tak chuan Nolan'n lehkhabu chu a rawn nem bet ta hmak mai!! 

Rum lutuk tak mai hian Rainer chuan a melh nghal kúr a ,kut thawh nghal duh mai hmel te pawh a pu in ka hria.

"nakinah a tih mawlh mawlh kha "

 Nolan hi mi zaidam tawpkhawk a ni a, a rawn in rawlh tawh chin ah hi chuan a ngaithei lo ve ngang a ni mai.

"i kut hi la sawn rawh " tawi fel at ngeiawm zet si hian Rainer chuan a ti a.

"hetah midang lehkha zir lai rawn tibuai suh...i zir ve duh a nih chuan ṭhutna awl ala tam mai "

Nolan chuan ṭha deuh a tih pahin kan piah lawk a ṭhutna awl chu a kawk a mahse Rainer ngaihdan a lo ni lo ngang mai, ri hluk ṭhin leh puak thut thei reng tih takah in hum ruh chung chuan a ding ta uai mai !! midang ho chuan an rawn en nghal ṭhap bawk.

"Rainer... duhtawk rawh "

Buaina nasa zawk a chhuak dawn takngial a ka hriat avangin ka lo in rawlh ve nghal vat a, kan thawm a ring bawk a min rawn hau ṭep tawh ang.

" Nolan... zanah kan ti ṭha leh mai dawn nia " tih pahin ka lehkhabu chu ka bag ah ka khung lut nghal mawlh mawlh a.

 Rainer melh cho kar pah chuan, " min rawn zui rawh " ka ti sap a, ka bag chu ak ṭha in ka kal chhuak nghal hlawk hlawk a.

Rainer chuan ngawi rengin ka hnungah min rawn zui ve nghal hlawk hlawk a,
Library aṭanga kan chhuah rual rual chuan midang an awm lo bawk a, hawi let hraw pah in vin hler hlawr hian,"Eng nge? " ka ti nghal ṭhah a, a chet dan avang khan ka lungawi lo a ni tih hi hre ve reng reng rawh se.

"khapa phiangsen nen khan zanah eng thil maw tih in tum? "

" Rainer.... khapa phiangsen a ni lo Nolan a nih kha, i ṭawngkam fimkhur deuh rawh "

"hming a nei ve phiangsen a ni maw? " ngeiawm zet a rawn tih kher pahin a nui lui suk a.
"thil dang sawi tum suh engthil maw tih in tum tehhrep a? " a ti zui zat bawk.

"Project kan ti dun dawn, i lawm tawh em? "

" ka pui ang che ka tih kha... "

"Nolan hi mi thiam tak a ni a... rawn tihbuai kher che ngai lovin min tih pui thei alawm " ka awki a hniam tawh hle, hetiang anga in vin hluk hluk reng hi ka kham tawh takzet.

" khapa khan ka kutthlak vawikhat pawh a dawl dawn mi le? "

A chapo em avang leh mahni a in fak chawp avang chuan ka mit ka lo chet kual ralh a, sawi dik viau mahse ei loh hmel zet hian ka lo ner zui suk bawk.

"engpawh chu nise ngatinge hetiang hian i awm thut? " Rainer pawhin a awki a hniam tawh bawk a, ka san bik nachhan tur a awm lo.

" engtin maw? "

"tukin zingah kha chuan engkim a ṭha vek a mahse tunah min pehhel i tum leh a " min hriatthiam lo hmel zet hian min en a, a rilru buai hmel hmuh hi a khat bawk a hmuh a nuam ve hrim hrim.

"ka awmdan a ngai reng alawm " dawt ka sawi avangin min man chhuah vat loh nan ka hawi sawn daih a.

"nilo... tukin zingah kha chuan ka hming lam mawlh mawlh chungin a vawrtawp i thleng a nih kha... tunah... "

" Rainer.... " ip chawih chungin ka lo pawt chat nghal vat!!  ka zah em avangin ka biang chu a rawn sen nghal vek a, a ni lah chuan kan bul hnaiah tumah an awm lo tiin a sawi phawng phawng tawh mai si.

" eng nge? " nuih vut vur pah hian a rawn ti a.

"eng nge min hmuh i duh chu sawi rawh"

" min rawn nui rawh "

" min hrilh hmasak phawt loh chuan ka zui dawn lo che " ka ti ve tlat a, amah ang tho in ka luhlul ve thei tho.

"vawin ah class bunk ang " ka lo meng phawk nghal kawk a.

" Class bunk a!!  teuh lo "

" vawiin chiah... nidangah a thleng leh tawh lo ang "

" nilo... a hma pawhin Derek nen kan bunk tawh a, ka û in min man chhuak a min grounded phah lehnghal"

Engmah ngaihtuah chiang hmasa lo chuan ka ti chhuak nghal phawng a, ka sawi loh tur thil ka sawi tih ka hriat chhuah meuh chuan ka sawi fel vek tawh.

"tuna i thil sawi kha sawi ṭha leh rawh" thinrim hmel zet hian a rawn ti a.

"engmah a ni lo "

" Derek nen chuan khawiah nge in kal? "

"Rainer... thil hi min zawt vak vak ṭhin teh suh " min tih dan ang chiah in ka lo chhang let ve ngat a, a thinrim zual sauh ermaw tih mai tur hian a meng thip hlur tawh mai.

" hahh... ka rin ang i lo nih loh tawp hi" a sam tuai thuak pah chuan a rawn ti kher a nih chu!!  ka ngeng a chhun nghal zak mai.

"a nih chuan engvangin nge min zawh... i thik em ni? "

" thik... i sawi awmzia chu kei hian Derek chu ka thik ang maw... hahh, i dream nasa mah mah lo maw " min tih zek pah chuan a in her vut a, mahni induh tawk leh inring tawk tih takah vawikhat pawh rawn hawi let lovin a kal nghal nal nal a,ka lo en zui vawng vawng ringawt.

" ka hmui hi ka veng hman ṭhin lo " ka hmui khawih pah chuan ka in hau ru mawlh mawlh a mahse Derek kha a thik lo a nih si chuan engvanga thinrim ve ringawt nge a ni tih ka ngaihtuah let pawhin ka hrechhuak thei chuang lo bakah engthil nge min hmuh a tum chu ni ta ang ?

Library ah let tawh lovin ka assignment buaipui tum in laboratory lam ka pan ta ringawt a, rilru lak pen tum in thil dang tih tum eng ang mah ila ka rilru ah Rainer bak a awm thei chuang lo.

Eng eng emaw ka test kual vel lai chuan mi chhe sawi chu koh aiin a hnai tih takah Derek hi a rawn lut hlawl a, hmu lo ang deuhin ka thil tih lai chu ka chhunzawm mawlh mawlh tho.

"Sadie ....in be lawk ang " min rawn hmuh rual chuan min rawn pan nghal a, vawiin ni hi eng nge maw an hriat vek ni tupawh mai hian thil min hrilh duh an neih tak thut ni.

"ka laklawh lutuk... tikhan sawi rawh "

A engamah hma a lo biak ṭhat duh loh ngawt kha ka duh bik loh avangin ṭha deuh hian ka lo chhang let a.

"Camelle nen kan inṭhen " a ruk chuan ka phu deuh zawk!!  mahse engah mah ngai lo anga awm hram hram ka duh.

" chuan... "

" Sadie... ka rilru put hmang chu i hriat vek kha kan pahnih hian a hma ang khan awm leh ang "

" Derek ka... "

" ka hmangaih che Sadie .... Camelle nen kan inkawp lai pawh khan ka theihnghilh ngai reng reng lo che, i laka ka rilru put hmang pawh a la danglam reng reng lo "

Derek a mitmeng chuan dawt a sawi lo tih ka hria, a awmdan leh a thusawi engkim mai chu ngun takin ka lo ngaihthlak sak a ,Camelle nen an in kawp atanga an chet buai tak dan te, class a kal ṭhat loh mai bakah a party nasat dan te, zu a in nasat tak dan te chu ka hmu hmaih bik lo, mahse let leh tur chuan ka kal thui tawh mah mah.

" tuna ka nundan hi engkim kalsan vek ka duh mahse min puih loh chuan keimah chauhin ka paltlang thei lo... Sadie ka mamawh takzet che... min ngaidam hram rawh " tih pahin min rawn kuah nghal thlawp a, tiang ang em em hian Derek hi a beidawng in a la lungngai ngai lo.Amah hi ka hrechiang ve tawk bawk a a tawrhna hi ka lainat in ka lo na ve em em ringawt.

"tiang hian awm suh... " ka ti leh ringawt a,chungril ah erawh Camelle ngeina hlir in ka khat thung.

" ka ngai tawh lutuk che...kuah reng che hi ka duh thin asin" kei ngei pawh hian a kuah te a engkim mai kha ka ngai lo ti ila dawt ka sawi ang, mahse ṭhian ang bakin ka en thei tawh lo a let leh pawh ka duh tawh lo.