April 25, 2019
CHAPTER-34
"She is the light that lighten my dark soul"
"Hey... " tih paha dawhkana ka bag ka dah rual chuan a lo phu deuh zawk ! a bul lawka chair chu pawt chhuak in ka ṭhu ve nghal a.
" Hey... i in ve duh em? " min nuih sang chung hian a lo ti nghal vat a mahse a mitmeng erawh in a lungngaihna a thup bo hauh lo .
" aih... Braydon hi ala mu em ni? " a hmel chu chiang zet hian ka en kar a, ka ngaih a ṭha lo telh telh.
"nizan a chhuak kha a la rawn haw leh lo hrim hrim, zankhua in ka call a mahse pickup lo...chuan nichin deuh khan a rawn haw mek thu min rawn hrilh leh ringawt a, engmah hi ka hrethiam lo "
"engvanga chhuak nge a nih? "
"nizan dar 11 vel khan thil pawimawh tih tur a neih thut avangin hmanhmawh deuhin a tlan chhuak nghal a ,a chhan erawh engmah ka hre lo " a ti chuai raih a, ka û chet dan chuan min ṭhawng takzet ,mak ka tih ber zawk chu engthil pawimawh chiah nge a tih ang tih hi a ni!
" umm... a rawn thlen ṭep tawh chu engkim a ṭha leh vat mai ang " ka ti ta ringawt a, han hnem ve teh mah ila keimah zawk zawk hi ka ngaih a ṭha lo.
Kendra chu za lo zeta nuih pah hian a lo bu nghat a, a rilru puitlin zia leh a dawhtheih zia ka hmuh hian ka û hi vannei ka ti in inkawp tur ve reng an ni.
Diktaka sawi chuan Braydon hi ka hre chianga ka û mah nise Kendra hi a phu lo ka ti takzet. Ka û tan hian Kendra hi ka duhpui a mahse Kendra tan erawh ka û hi ka duhpui hlawl lo, ka û aia ṭha hi a phu in ka hria.
"Engpawh chu nise ka lawm takzet " Kendra en vung vung pah chuan ka ti sap a, min tiam tawh angin ka û a bail chhuak a lawmthu hi ka hrilh seng dawn lo chu a nih hi.
" a ho lutuk... ka tih tur ve reng alawm, Sadie i nghawng a mi kha eng nge? "
Ka nghawng chu a rawn tuai thuak a,a rawn khawih na lai chu mak ti tak chunga dawm pahin phone ah chuan ka han in en vat a, hickey(love bite) duk ruih mai ka hmu chiah chu ka meng phawk nghal kawk ringawt!!
Rainer an ka nghawng a fawh khan he thil lianpui hi a lo hnutchhiah a ni maw!! min hrilh tur a ni asin,Braydon an hmu se chuan min ṭhat duh ang.
"oh!! " Kendra chu hlauthawng zet hian ka va melh zeuh a, a ni lah in a lo hai lo ngang mai min rawn nuih ver ver pah hian,"tunge a nih chu ka hre lo na in a hnutchhiah lian mah mah a nih kha " tiin min rawn fiam zui a, ka lo sen nghal ṭawn ṭawn ringawt.
"umm...Braydon an a hmuh loh hram ka beisei " nui pât pât pahin ka ngawng chu ka nuai ka nuai ta ringawt a.
"naupang i ni tawh lova i duh duh ti turin chhia leh ṭha hriatna i nei tih hi Braydon pawhin a la hrechhuak vat mai ang,mahse i û in a rin na che hi ti chhe suh engtik ah mah "
Kendra rilru ang hi ka û hian pu ve se ka ti takzet, engtik ah nge naupang ka ni tawh lo tih hi a hriatthiam theih ang?
Naupang kum 5 mi ang leka en reng nih hi ka kham tawh takzet.
"ka hrethiam e "
Pawn lamah car ri kan hriat avangin kan pahnih chuan ka in en vat a, in hrilh chawp ngai lovin Braydon a ni tih ka hre nghal.
" Sadie... han in thlak vat rawh,i ngawng a mi kha a hmu palh ang "
Kendra chuan hlauhthawn hmel tak hian a rawn ti nghal vat a,buk nghat pahin ka bag chu dawhkan aṭangin ka pawtthla a inchung lamah ka tlan chho nghal a.
Ka room kawngka ka khar rual rual in tukverh aṭangin ka û chu ka zuk bih dek dek a, car aṭanga a rawn chhuak lai ka hmuh chuan thawk chhuah hak pahin parda chu ka pawt phei a, ka khumah ka let nghal tawp bawk.
Khuma mut pah chuan inchung chu khap miah lovin ka melh vung vung a, tukin zinga Rainer nen a kan awm dan te, min fawh dan te leh nawmna namen lo min pek dan te chu ka ngaihtuah let leh a, ka mur sung sung thei nia mawle.Hepa hi chu engtik ah mah ka kham thei ngai lovang, in hmu zo chiah pawh ni ila ka ngai lehnghal vawng vawng mai .
Hickey hliah nan kawr nghawng nei ka ha ta ringawt a, nidanga ka hak ang tho kekawr bul leh sneaker chu ka inbel leh tawp a, ka sam sang takah ka ṭawn mar pang bawk a, ka insiam zo lehnghal der.
Class kal a hun leh tawh avangin hmanhmawh takin inhnuai lamah ka tlan thla nghal a,kawngka ka hawn rual chuan balcony a Braydon leh Kendra te inhau ri ka hriat chuan ka ding nghal chawt !!
Engang pawhin ka beng chhut ngawng tumin haider han tum teh mah ila Kendra in nizanah keimah min kalsan in Amira nen in lo awm dun reng a ni tih hi ka awih thei lo, a tih ri chu chiang takin ka hre thei .
Ngatinge pawh ka hrelo Amira hming ka hriat zawng ringawt pawh hian ka awm zawn hi a rawn na nghal vawng vawng a, Kendra ka lo nat pui ve nge Amira hi ka thik vang pawh ka hre lo.
Braydon chu thinrim insum tih hriat tak hian inchhungah a rawn lut nghal hlawk hlawk a,engang pawhin thinrim mahse min hmuh chuan za lo zet hian min rawn nuih suk a.
" bawihte i kal tawh dawn em ni? " min rawn kuah pahin ka lu ah a rawn fawp zeuh a.
"ka lo thlah ang che " a rawn ti leh a.
" angai lo... Kendra saw ṭha deuhin sawipui la a ṭha zawk in ka hria " balcony a ding reng Kendra chu ka va melh zeuh a.
" han in beng dai phawt se nakinah ka be mai ang "
"engpawh chu nise ngaihdam i dil ang tih min tiam rawh " ka tih chuan a khi suk a.
" aw le... ka let leh veleh ka dil ang " a ti a.
Ka ú nen ngawi renga college lam kan pan lai chuan,"nizanah Amira bulah i awm em ni? " tiin ka zawt hlawl ringawt!! a ni pawhin ka zawh a ring bik lo aniang mak tih hmel takin min rawn en nghal kawk a.
"ughh... chutiang pawh chu a ni chiah lo "
Lalpa leh!! Amira bulah a awm tho alawm, eng thil dang nge an tih ang tih pawh hriat va ni suh .
"chuan Kendra i kalsan daih amaw?... Braydon ,Amira hi theihnghilh tum tawh rawh "
Amira hi ka kham tawh takzet, a hming ringawt pawh hian ka luak a ti chhuak.
Rainer vangin ka û a kalsan a tunah a move on ve chauh a, a rawn beisei leh a ,engthil nge maw tih a tum chiah ni ? Rainer tan emaw ka û tan emaw pawh nise ka duh lo ve ve.
" a nau a damlo a min mamawh alawm... engthil mah a thleng lo ka ti tak tak " thinrim miah lovin a insawi fiah a ,dawt a sawi lo tih chu hre tho mah ila Kendra a kalsan daih avang khan ka lawm chuang lo.
"i nun a nia engthil pawh ti turin zalen mahla Kendra hi tlem talin ngaihtuah ve rawh...i inchhir hma in "
" ngaihdam ka dil ang ka tih tawh kha... bakah Amira thiamloh pawh a ni hleinem engmah hrelo in in mawhchhiat ringawt zel a...." a tih rual chuan seat nghenchhan nghen pahin ka thaw chhuak nghal hak a, engmah ka sawi thui duh tawh lo.
Amira hi hmeichhe sual tak a ni hran lo mahse khati khawp khan a rilru a tih nat sak tawh avang khan ka ring leh thei tawh lo, a bul hnaih a awm tir pawh ka duh lo .
Eng black magic nge maw a hman bik ni heti khawpa mipa a dawi at theih?
_________________________________________
Corridor a ka kal phei lai chuan hnung lam aṭangin Chelsea leh Kaitlyn te chuan min rawn kuah thut a, zanhnih lai kan in be tawh lova hun rei tak hnu a inhmu leh te pawh kan ang alawm.
" Sadie.... dawt sawi miah suh ang che nizanah khawiah nge i riah? "
Chelsea chuan ka mit ah tak chiang taka rawn en ran chung chuan min rawn vau ti tih ta mai a, a zawhna avang chuan mak ka tiin Braydon an alo va be leh tawh a nih ka ring nghal.
" umm... khawiah mah " ka in her vut a,an pahnih chuan ka kalsan nghal hlawk hlawk a mahse min rawn umzui leh tho.
"Sadie thil zep ruk i nei tiraw? i ṭhiante hi min hrilh ve dawn lo em ni? "
Kaitlyn chuan zaidam tak hian a lo ti ve bawk a.Engkim min hrilh vek laia zep ruk ka lo nei bik chu ka in thiam lo takzet mahse engtin nge ka hrilh fiah tak ang.
" sawi nghal rawh. ..bialpa thar i nei em ni nge i in zuar ṭhin zawk ?" Chelsea in a rawn tih chuan Kaitlyn chuan alo nghawk zeuh a, a mitmei nghal zeuh bawk.
" chutiang pawh chu a ni chiah lo "ka lo ti chuai raih a.
" a nih engthil nge... nizanah i û bulah dawt kan sawi phah ringawt alawm, a pawi lo i sawi duh lo a nih chuan keini pawhin engmah kan hrilh tawh bik lo ang che " Chelsea chu a thinrim ṭan tawh, engkim hrilh vek ka duh mahse khawi lai ber aṭanga ṭan tur nge pawh ka hre lo.
" ihh.... ka "
Sawi ka tum lai tak in Rainer leh a ṭhiante ho an rawn kal phei ṭham ṭham avang chuan ka ngawi ta daih a, min rawn kal pel pahin Rainer chuan min rawn nuih suk bawk a, ka lai lutuk chu ka kun daih ringawt.
"Sadie tunah khan Rainer an a rawn nuih che " Kaitlyn chuan mak tih hmel zet hian min rawn en a, a chi ai a ni zawk mah a niang chu.
" ni e... keipawhin ka lo hmu " Chelsea a ṭawng rin theih em avangin an pahnih chuan midang tam loh na laiah ka pawt phei dawr dawr a.
"Nizanah Rainer inah ka riak " ka ti chhuak nghal phawng
ringawt.An pahnih chuan ramhuai hmu ang maiin vawilehkhatah a meng phawk nghal kawk a, an dãng nghal vek bawk.
" Eng... eng maw? Rainer inah i riak amaw ?"
" shh.... in ṭawng ring lutuk " hawi kual vat vat pahin ka lo khap nghal vat a.
" engkim min hrilh vek rawh "
An hriat chak avanga hrilh nilovin hriat ve an phu avangin Rainer nen ka chungchang chu an pahnih chuan ka hrilh ta vek a, Rainer kan in a a rawn riah thu te, kan in fawh dan te chu ka hrilh vek a mahse a vawrtawp min thlen pui dan erawh kha chu engmah ka hrilh tel lo thung.
Ka sawi zawh meuh chuan an mak ti lutuk chu ṭawng mai nachang pawh an hre lo, an ding khawng reng ringawt.
" umm....Rainer hi i duh em ni? " Kaitlyn chuan a aia chik hian min rawn zawt a, ka duh a ni tih hi keipawh in ka in hria mahse Rainer nen a kan inkar hi a chian loh mai bakah amah duh lo tura min hrilh avang khan ka thinlung hi ka la hawng ngam chiah lo.
" ummm.... ka duh in ka hria " kun lap chung hian ka ti sap a, ka ṭhiante bulah hi chuan ka zep hran lo.
" oh!! God! " an pahnih chuan hlauhthawn hmel zet hian min rawn en a, tun ṭuma kan thu sawi hi chu a serious em avangin ni dang angin a ṭha lutuk an ti liam mai tawh lova min ngaihtuah tazet hmel an pu thung.
"keipawh ka in ring hman bik lo... engvanga bad boy ho hi an zûn a uai awlsam em em nge maw a nih le? " chhuanlamah ka ti ta ringawt a, dikna chen pawh a awm.
" Chutiang te chu thil thar pawh a nih loh chu " Chelsea chuan a lo ti awlsam et a.
" ka ngaihtuah takzet che... i ú in hrechhuak ta se a ṭha lo viau ang ,engkim a kal dik lo leh vek a ni mai " Kaitlyn in a tih chuan Rainer hi min duhpui chiah lo a ni tih ka hre thei.
"ni e... Sadie, i luh thuk hma in bansan la a ṭha in ka hria... Rainer hi chuan rilru natna bak a thlen lo ang che" Chelsea meuh pawhin min duhpui lo mahse keimah berin ka duh miau a vawilehkhata han bansan tawp chu a harsa ang.
"a ni pawhin min duh alawm... min duh lo se nizanah pawh riak turin min sawm lovang " inring tawk tak hian ka lo ti let ve ngat a, ka nun a nia ka duh zawng chu ka ti ve tur a ni dawn lawm ni.
"Hepa kher kher hi chu a ṭha kan ti lo... kan duhpui lo che.... bakah Amira nen an inkawp a ni lawm ni? " Kaitlyn chuan a rawn ti leh a.
" a nih a duh thu che a hrilh tawh che em? " Chelsea chuan a lo ti ve bawk a.
" Amira nen an in kawp lo... bakah Rainer hian min duh thu min la hrilh chiah lo mahse min la hrilh vat ang " ka lo ti let ve hlar a, kan awmdan ngaihtuah kha chan ka lakah feeling engemaw tal a neih ve ka ring.
" Sadie hriatthiam tum teh... "
" umm... class ka nei dawn, kan kal tawh ange " tih pahin ka bag chu ka vuan nghet sauh a, in hum ruh ṭun chungin class lam panin ka kal nghal nal nal bawk.
Class zawh veleh Nolan nen Library ah kan project tur vel buaipui in inhma tawn chuan kan ṭhu a ran a, class chhung zawngin leh tun thleng pawhin ka ṭhian te thusawi avang khan ka awm a nuam thei lo.
" Nolan i nu eng nge a an tawh? " ka rilru lak pen tumin thil dang daih chu ka sawipui a.
"a ṭha a dam vat ang.... Sadie kan project hi a khirh dawn riau tlaiah kan stayback loh pawhin zanah kan tih dun angai ang " Nolan chuan a pencil ken lai chuan min rawn khawng keuh a.
"keichu ka hman reng, i hman hun hun ah a ni mai " ka lo ti nghal var a, Nolan hi chu a buai ṭhin si a a chang hi chuan ka khawngaih ṭhin.
" a nih chuan zaninah in inah ka rawn kal ang... tlaiah chuan ka nu awmpui ka ngai a ka hman dawn lo "
" aw le... ka ú ka lo hrilh lawk dawn nia, eng nge maw in tur i duh em?" ka ti nghal zat a.
" duh e... " a mit tih zim san pahin a han in kuangkuah a, Nolan hi ka ṭhian nilo se chuan ka star hrim hrim ang .A hmelṭhat chu thuhran nise a fel in a caring si a, a in nghahna tlak takzet bawk.
" keiman ka zuk la ang" thawh a han tum zet a.
" ehemm... vawiin chu keiman aw "ka awm ben thak thak pah chuan ka han ti a, kan nui ri ngam bawk si lova ka hmui ka hup tawp
In tur la tura vending machine hma a ka din vauh vauh lai chuan hnung lam aṭangin tuemaw hian min rawn din hliah khup a, phut zawk paha ka hawi let nak chuan Rainer a lo ni a!!
" Hey... " za lo zetin ka lo nuih suk ringawt.
"class i nei dawn lo em ni? " hmm... class tih vel leh Rainer hi a in hmeh ve thlawt lo.
"aw... " tih ringawt in ka chhang a, vending machine lam chu ka hawi leh daih a. Ka ṭhian te thusawi kha ka la hriat kar avangin ka theih ang tawkin mawihnai tak si in Rainer hi hlat ka duh.
"Morin... thil diklo a awm em ni? "
" aih... ka hmanhnawh deuh a " tih pahin coke can pahnih chu ka la sawk sawk a hmanhnawh takin library lamah ka tlan nghal a.
Coke pakhat zawk chu dawhkan ah ka dah a, pakhat zawk erawh ṭhut pahin ka hawng nghal a ka hmanhnawh bawka ka thaw deuh hluam hluam lehnghal.
"sawpa saw i rawn hruai em ni? " Nolan chuan ka hnunglam chu a melh daih a.
" tu maw? " tih paha ka hawi let nak chuan Rainer an min rawn zui chu lo niin, kan in en fuh chat lehnghal.
" ai.... aih " ka sawi zawh hma hma chuan Rainer chu ka bula chair chu pawt chhuak in a rawn ṭhut nghal thurh a, barakhaih thut ang maiin phawk fe hian ka lo melh haw ringawt .
☆Choose Love and be kind to others ☆
(fakna khu chhiar zawh velah hmet keuh ang u aw .. xoxo)
0 COMMENT:
Post a Comment