Rainer Black-36 by Remruati Bawitlung(Haylor)

CHAPTER -36

"she wears Gucci, I wear my smile "

"Derek... ihh... ka ngaihdan chuan ..."

"tunah min chhan kher pawh a ngai lo,i rilru ka ti na tih chu ka hria mahse siam ṭhat leh nan hun min pe rawh ...ka lo nghak reng ang che " tiin min lo pawt chat nghal vat a, keipawhin thil ngaihtuah chiang lova tih tut tut ai chuan tiin ka lo bu nghat a.

"tun aṭang chuan kan inkarah tumah in rawlh tir ka duh tawh lo..."

Ka mit ah tak chiang takin a rawn en a,tih derna leh tih mai mai na a awm hauh lo,tun ṭum bik hi a serious zual in a hnenah let leh turin min duh tak tak in ka hria.

"ka ti ṭap leh tawh ngai lo ang che " a rawn ti sap a ,ka sam tla chham mai ka benga zeh pah chuan muang changin min rawn fawp nghal vawng vawng  a mahse ka rin loh dan deuha a chet thut avang chuan inlak hran vat pahin zahzel ah ka hma a lehkhabu chu ka keu ta ringawt a.

A ni pawh a inthiam lo leh deuh aniang a hmui hnuai lam fawh pahin a tukhum chu a hriat nauh nauh a.

" Umm... Derek ka buai deuh a... "ka chil chu ka han lem dak a, ka hawi chhuak duh tawh lo, lehkhabu melh vung vung pahin ka kun tlat a.

"ka... ka hrethiam e, ka nawr lui lo ang che ,ngun takin ilo in ngaihtuah dawn nia "

Nuih suk pahin ka samah a rawn chul zeuh a, a kekawr ipte zen pahin a kal nghal hna hna a.

Kawngka a thlen dawn chuan ka hawi chhuak a, ka hmui khawih pahin a kal liam lai chu ka en zui nghal vawng vawng a.

"engthil nge ka chungah thleng ta hi !" mak ti tak chungin ka ti chhuak hlawl bawk.

Derek an min kuah lai te min fawh lai te khan engtin mah ka awm miah lo.

 Khatiang khawpa ka mipa duh leh ka ṭhian ṭha ber tia ka lo chhal ṭhin lakah khan eng feelings mah ka nei tawh miah lo a, thinphu han rang ve eih pawh a awm miah loh avang khan mak ka ti zawk hial.

A kuah te, a engkim mai kha ka ngai takzet tih chu ka hai bik lo.... nilo kei hi Derek lak aṭangin ka move on tawh tih na em ni?!!  Ka awih thei lo hetiang em em a rang hian a laka ka rilru put hmang danglam tak kha a bo ang maw!!

Lawm viau tur ka nih laiin mak ka in ti zawk!! Ka hriat ṭhin Sadie kha ka ni tawh tawp lo mai!!

Rainer bulah ve thung chuan ka bula a awm ringawt pawha ka lo mur chuai chuai ṭhin kha chu sawi loh min en hlek pawhin ka awmdan hi a rawn danglam nghal vek a, control theih loh khawpin ka thinphu a rawn rang nghal thin bawk a, mi hran daih ang te hian ka in hre hial ṭhin.

Hetiang hian mihring hi a mihring pui te vêk bulah a awm thei ang tih hi ka ring ngai bik lo ,eng ang pawhin awih duh lo mah ila ka chungah ngei a thleng miau sia!

Ka thil tih tur pawh min ti tui lo zo vek, phur lo deuh chungin ka thil test tur sample chu ka han buaipui vel a, a kar lakah thil dang daih ka lo ngaihtuah leh vung vung zel.

" Sadie... ngaihtuah rawh, i thil tih tur chiah hi ngaihtuah rawh "

Mahni leh mahni in fuih phur chawp in ka ban chu ka han sawizawi vel a, ka lu chu ka han hmet nawk nawk bawk a.

Ka rilru ka sawrbing dawn chiah tih in hmeichhe pahnih hi thil test ve tho turin ṭawng mawlh mawlh pah hian an rawn lut a, pakhat zawkin "vawiin hi Rainer birthday a ni in ka hria " a tih ri ka hriat rual rual chuan ka beng ka lo chhi nghal hra a, mahse an awmna a hlat deuh hlek avangin an ṭawng ri ka va hre pha tawh lo.

Vawiin hi Rainer birthday a ni tih ka hriat takah chuan chhuak tura min rawn sawm dan vel te kha ka hrechhuak leh hnuhnawh a, a birthday amah chauh a hman ai chuan tiin keimah min rawn sawm ve em em a keilah chuan ka lo ti let hrep lehnghal a .

" urghh.... ka â thei takngial dawn "

Rainer mal zia leh a bula awm tura min duh ṭhin zia ka hre ve reng sia engvanga thil hi hre lo ṭhin em em nge maw ka nih le?  Tunah pawh kei tih loh chuan vawiin hi a birthday a ni tih an lo hre leh vek tawh ang chu.

Sample ka buaipui zawh a ka label vek hnu chuan fridge ah ka dah ṭha a,ka lab coat ka khai ṭha nghal bawk a, ka gloves bun lai ka paih hnu chuan ka lehkhabu khung fel nghal in class lehpek nang hman tur chuan ka tlan chhuak nghal hlawk hlawk a.

Corridor a ka tlan phei hlawk hlawk lai chuan step ah Rainer niawm tak chhuk thla liam chiah lai ka va hmuh chuan lecture room lam pan ta lo in chupa chu ka zui ta zawk a, ka chungah thinrim viau mahse a piancham lawmpui tal ka duh, amah ka umzui duh reng vang nilo in hetiang mi hi a nih ṭhin avang zawkin.

Ground ka thlen thlak chuan ka rin ang ngeiin Rainer a lo ni tak tak a, hmanhmawh taka parking lot lam a pan avang chuan a tlan chhuah hma a um phak hman tum in kan tlan tak tak mai chu ka chhip aṭang hian a rawn na thei in ka hria.

Car a ti nung chiah tih in ka va nang hman hlauh, min rawn hmuh chuan glass down pahin mak tih hmel tak hian min rawn en haw a, a shades vuah lai inhmeh zet chu a phelh thla nghal bawk.

" eng nge hetah i rawn tih? " hmm... hetah hian ka kal thei lo em ni? ama ta ang ziazâng a.

" khawi.... khawiah nge i kal dawn? " ka la thaw hlawp hlawp reng a, ka sawi tur lah chu ka theihnghilh daih lehnghal.

"rawn lut rawh... "

" maw!! "

"thil kan ei dawn nia... ka thlah leh ang che " a tih chuan ka sana chu ka zuk thlek zeuh a, lunch time a nih ṭep tawh mai bakah ka ril a lo ṭam ve bawk nen class kal ta lo chuan car ah ka lut nghal a, tui in tur min lo pe nghal vat bawk.

Rainer hi chuan awlsam deuh in min thlem thlu zung zung zel mai chu a nih hi!

Sawi tur kan hre lo dun bawka Rainer chuan a ngai te bawkin eng classical hla emaw ni hi a play leh ṭang ṭang tawh a, tukverh ah a ban nghat chhuak leh in hma lam chu a melh ran a, a shades vuah nen zawng zawng mai hian a chhelo in en loh hi a har ṭhin.

Restaurant tam tak kan tlan pel tawh a, ding mai lova kan tlan rei tawh em avangin, " khawiah nge kan kal dawn? " tiin ka zawt ta ringawt a, a hla play lai herh zawi pah chuan ka ril ṭam leh ṭam loh min rawn zawt leh daih a, uar zet hian ka ril a ṭam thu ka hrilh chuan a hmel ngui bam kha nui hmel ah a rawn in thlak leh vat tawh.

Ka sawi uar bawk aniang Starbucks kawtah chuan car a ti ding ta nge nge a.

" min lo nghak rawh "

Car kawngka khar pahin Starbucks ah chuan a lut nghal a ,rei pawh a awm hma in ei tur leh in tur hi a rawn chawi chhuak ṭeuh a ka lawm zia chu han sawi vak dan pawh ka hrelo.

Eitur ho chu ka mal chungah rawn dah in intur ve thung chu a ṭhutna bul ah chuan a dah a, a seatbelt siam ṭhat mawlh mawlh pahin hma lam panin a tlan chhuak lehnghal a.

Let tawh tur kan nih laia a tlan zel avang chuan thil hmuam ṭun chung hian,"khawiah nge kan kal dawn? " ka lo ti ha a,min chhang lovin min rawn nuih ringawt.

" ka thlah leh ang che i tih kha "

" a hun ka sawi hleinem " a lo ti hmak a nih chu!!  Lalpa leh!! Hepa han fin zia hi, phakar bawk si.

" a nih khawiah nge min hruai dawn? " min hruai na hmun tur hi ngaihdan pawh ka nei lo.

" i hre mai ang " tih pahin a in tur lei matcha lemonade chu a han in khawlh khawlh a, a hla play bawk chu herh ring leh in kan ngawi dun leh kar tawh.

Tlema car a tlan muan takah chuan ka han meng siar siar a, muhil chiah lo mah ila ka lo ṭhu tui hman lutuk a ka chhuk thla peih lo takzet.

In pakhat nalh deuh mai kan thlen chuan hawi kual hrak hrak pah hian, "hetah hian mi kan kal dawn? " ka lo ti nghal vat a,hnim leh thingkung a tam bawk a a hmun hi a thawveng takzet.

" umm... " tih ringawt in min chhang leh tawh, car a tih din hnu chuan a seat belt phelh pahin," i bag kha car ah hnutchhiah suh " a rawn ti leh ringawt a, iPad seat hnunga a dah chu a la nghal bawk .

Car aṭanga a chhuah rual chuan hmeichhe pakhat chhelo zet mai kum 25 bawr vel , sam var sar a mawng chen vel awihawm loh khawpa ngil hi nui sang chungin a rawn tlan chhuak nghal a, Rainer nen chuan an in kuah nghal chat bawk.

Car aṭangin an awm dan chu ka lo en kar a, an in nel hmel in saw nu sawn a duh hmel takzet, an in kar ah eng thil emawni tak chu a awm chiang alawm.

Car a lo awm bik reng ka duh loh avangin ka chhuak vel nghal a, chunu lah chuan min rawn nuih sang pah hian,"hi!  Becky ka nia " a lo ti nghal zung zung a, za lo zeta nuih suk pahin Rainer chu ka va melh zeuh a.

" Sadie.. " tih let pahin kan in chibai nghal a.

Becky inchei dan chu ka lo en chiang leh tawh kher mai, a pheikhawk thlengin Gucci vek a ni a ,a pheikhawk man ringawt pawh hi $1,230 (India pawisa in singriat leh tih vel ) man a ni leh dawrh ang chu , kei ve thung chuan thawmhnaw simple te te chauh ka in bel thung, mahni insit a na duh khawp mai.

Makeup tamtak hmang mahse engkim mai chu a nih dan tur ang thlapin a awm a, a hmelṭha in a chhelo thlawt .

Engvanga Rainer a hmeichhe hmelhriat te hi chhelo em em zel nge maw an nih le?  keimah zawk hian nuam ka lo ti lo ve ringawt zel.

" chuan... Kum khat hnuah i hmel i rawn lan leh ta alawm... ka ngai lutuk che "

Becky lah chuan zep nei map lo hian a rilru a awm ang ang chu a hrilh hmiah hmiah a, Rainer lah chuan a lo huat loh hmel ngang mai.

" inchhungah kan lut dawn mi niang ?"
a tih chuan an pahnih chuan an kal nghal daih a, ka awm ve tih pawh an hre tawh lo.

An hnunga zui chhoh hnak hnak pahin thik ru tak si hian ka lo meng rum ve em em ringawt a, ka mood lah chu a off nghal vek a ,ka lo kal kher kher kha ka inchhir leh hnuhnawh .

"i rawn kal khat sia dinner te in ei ang chu " Becky chu Rainer mal chungah a ṭhu lo chauh, ṭhian satliah an ni thei lo hrim hrim.

" khawiah nge i pa? " Rainer chuan a lo ti sap a.

"umm... Singapore ah a kal, a awm hman dawn si lova keimah min rawn hrilh a, chuan hei kan in hmu leh ta alawm... "

A kut Rainer mal chungah a nghah kher avang sawn ka mit alo kham leh hman tawh kher mai,va pawh ṭhen sawk ka chak.

"chuan hei chahbi...tunlai hi i hmel hmuh a nuam khawp mai, i hmelṭha deuh pawh kha a rawn let leh ta alawm "
A sam te chu a han chul sak a, ka mit chet rual ralh pahin lehlam ka hawi hmak!! a ruk chuan ka thik in an awm dan sawn ka rilru a ti na takzet.

Ka hma ah tak, kan mit hmuh lai ngeiin an flirt ngam a nia, Rainer hian ka rilru tih nat hi a duh ve hrim hrim in ka hria.

" i hmanhnawh hmel sia...ka tibuai tawh lo mai ang che, mahse dinner chu kan kil dun ngei angai ang " Becky chuan inla pangchang tak hian a han ti vel a, ka lo ei lo lutuk hi a ruk in ka ner nawng nawng .

"tehreng mai!! Nashville a i awm reng dawn chuan ..."

"reh vung vung tawh suh... min rawn hmu ve zeuh zeuh ṭhin tawh rawh... " tih pahin chahbi chu a pe a.

" Sadie... min rawn zui rawh " Rainer an min rawn koh thut avang chuan ka lo phu deuh zawk !! ka awm ve tih a theihnghilh daih tawh emaw ka lo ti hman alawm.

Min rawn ko hmingchhe ve teh mah se an pahnih in min kalsan leh daih tawh, min rawn zui rawh a tih miau avangin ngawi rengin lungawi lo tak chungin ka zui ve mai bawk a mahse eng nge kan tih dawn erawh ngaihdan pawh ka nei lo.

An pahnih hian ka mit kham zawnga an awm leh a nih vaih chuan ka haw daih ang tih rilru pu ran chungin inhnuai chhuk thlakna step ah chuan ka zui thla zel a, he in to hmel tak hian inhnuai room thukru deuh mai a lo nei ru reng pawh hi a mak hran lo.

Kawngka pakhat kan thlen thlak takah chuan Rainer an a han hawng rak a, light a on chiah chuan ka rin loh lutuk maiin laboratory hi a lo ni a, a zau in khawl a awm kim vek bawk a, mak ti tak chungin ka hawikual nghal ruai ringawt.

"engmah ala danglam lo....engkim a awmna i hriat vek kha... " Becky chuan a lo ti nghal zung zung a.

"ka hriatchhuah theih hram ka beisei " Rainer an fiamthu a thawh ve pawh chuan ka nuih a za thei tawh lo, ka thin a ti rim hlûr zawk.

"Chuck a rawn haw dawn a, ka hruai angai bawk sia, ka kalsan mai ang che u ...Sadie all the best " min rawn nuih sek pahin Rainer lu ah a fawp zeuh a, hmanhmawh takin chhuak nghal bawk.

A ruk tak chuan ka lo lawm in rawn let leh tawh lo mahse pawi pawh ka ti lo, engpawh chu nise Rainer hian engvanga heta min hruai nge a ni tih hi ka zawhna a la ni fan tho.

"hetah hian i duh hun hun ah i project i buaipui thei ang "

Ka rilru hria niawm takin Rainer an a rawn tih chuan mak ka tih em avangin han sawi mai tur pawh ka hre lo.

" tu ta nge? "

"Professor Alan-a mimal laboratory a nih hi... ka pu ṭhianpa a ni a inthlahrung miah lovin i hmang thei ang "

" mahse..."

" mahse ti suh... college ah rei tak tak awm lovin hetah hian i awm thei ang chuan ka pui thei ang che"

Ngatinge pawh ka hrelo ka rilru a khawih tlat a nih chu!!  tukin zinga thil ka hmuh ang che a tih kha helai hmun hi maw lo ni a, min puih a duh avangin engkim hi keima tan a buaisaih vek maw lo ni a!!!

" topic tur chu i thlang fel tawh em?" mak ka ti tawp thei lo, Rainer hian min puih a duh tak tak emawni le?

"aih....eng ber ka tih dawn pawh ka la hre lo " ka ti tak tak , ka topic duh ho hi scholarship hmuh nan chuan a ṭha tawk lo,chuvang chuan ka rilru a buai hle.

Chair ah chuan ka han ṭhu dat a, ka lehkhabu ka lak chhuah lai chuan kan piaha file inrem khat dul chu a han en nghal vat vat a ,file pahnih hi a rawn phawrh chhuak hlawl a, ka hma ah tak ka en theih tura rawn dah pahin ka bul a chair ah chuan a rawn thu ve nghal a.

" hemi te pahnih hi kan college ah hian ti an la awm lo ... i duh zawk zawk hi i thlang thei ang "

File pahnih chu kan han en kual vel a 'To analyse a sample of Brass Qualitatively ' tih chuan ka mit chu la zawk mahse an pahnih hian an ṭha ve ve a, thlan mai tur pawh ka hre lo.

" khawi hi nge ṭha ang? " duhzawk a lo neih takin tiin ka han zawt let ve thung a.

"ka check kha chuan Preparation of Cuprammonium Rayon threads lampang hrim hrim hi topic ala awm lo a awlsam in buaipui rei angai lo " a lo ti sam et a, a lo ti chhin vek tawh a ni tih hriat reng reng.

Bakah Rainer hian ka hriat loh hlanin ka en theih ngai loh tur topic ṭha leh ṭha lo a lo en sak vek tawh avang hian a inhmeh lo in mak ka ti takzet, lawmthu han sawi mai dan pawh ka hre lo .

" a nih chuan chu chu ka ti ang "ka tih chuan min rawn nui nghal vur vur a ," i duh duh i ti thei ang? " ka notebook rawn en vung vung pah chuan a rawn ti leh kher a.

" heihi a dik lo a nih hi.... Benzyltrimethylammonium hydroxide ah hian alcohol a awm tur "

tha deuhin ka structure ziah dik loh chu min rawn siamṭhat sak nghal zung zung a,ka hriatthiam theih turin a sawifiah nghal vek bawk.

Nikki in Rainer hian Chemistry a tui in a thiam lutuk a tih kha a tak tak a lo nih dawn hi, amah hi a luhlul in a ti ṭha duh lo mai mai pawh a.

"Rainer ka lawm e " ka ti ta nge nge a, thil dang tih sak theih ka chak takzet.

" engvangin? "

" umm... heng zawng zawng hi min buaipui sak vek a "

" ka pui ang che ka tih tawh kha " a rawn ti sap a, an sawi ang em em in Rainer hi a sual lo a ni tih hi midang hian hre ve se ka ti mahse midang bulah hetiang hian a awm dawn teuh si lo.

" ughh... engpawh chu nise Happy Birthday " ka nui nghal hak hak a.

Mak tih hmel tak hian min rawn en nghal, a mitmeng chu hriatthiam har tak a ni ringawt .Lawm hmel a put mai bakah rilru na hmel a pu tel deuh bawk in ka hria.

"ka birthday hre tu awm chhun i ni.. " a nui tawp riai riai a. Kei chauh nilo mitam takin a birthday an hriat sak a ni tih hi hria se chuan mak a ti ngawt ang.

"tuman an wish ngai lo che mi? " a ṭhiante emaw a nu takngial pawhin an wish em em ang.

" aih... ka pa takngial pawhin a fapa upa ber birthday tuk chiah hi ka birthday a ni tih pawh a hre lo "

A lungngai hmel ka hmuh hian ka lainat lutuk a ka mittui a rawn tla mai dawn in ka hria .Hetiang khawpa mi ṭha hi engvanga mal em em nge maw a nih le?

" umm... games kan khel dawn mi niang? " boruak tih zia awm tum chuan ka ti ta ringawt a,a rawn nui suk bawk .

"eng? "

" Dots and boxes, tic-tac-toe te pawh a tam mai" "

" boring... "

Ngeiawm zet hian a rawn ti kher !mahse tun dinhmun a ka games hriat awmchhun a ni miau sia,nuam lo ti mahse ka khelh pui tho ang .

Ka notebook hnung lam ah chuan games khelh na tur chu ka ziak nghal nauh nauh a,ka ziah lai vel te chuan ka hriatna  ṭha tak mai hian min en reng a ni tih a feel thei.

(Chhiar zawh veleh fakna khu sec30 tal hmet leh ang u aw...enkual tur a nih kha aw ...xoxo)