30 days with Mr Genius -17

 CHAPTER -17

Class-a kan let leh hnu ah pawh chuan hlim viau mah ila Keifer mizia chu a in thlak leh hmak tawh a. Min hre ngai lo ang maiin a awm leh hmiah tawh a, melh pawh min rawn melh lo. 

Nichin lawk kha chuan nghet takin min kuah a tunah lah engmah thleng lo ang maiin a awm leh daih a, a rilru a thil awm hi ka hre chak takzet. 

School banah veleh Keifer bulah chuan ka va tlan nghal vata,  phur zet hian, ' Ka car ka keng lova... haw rual ang aw' ka va ti nghal zung zung a,  min chang lo hrim hrim. 

Hepa hian a rilru a thlak zung zung zel, kan inbe ṭha viau emaw ka tih laiin min be lo leh hmak a, amah ka nel dawn veleh a inla hrang leh daih zel. Ka sawi thiam dan chuan nel a duh lo a ni ber,  anu vang bawk a ni leh ang chu. 

' Anu in a rawn hmu pawh ni hleilo ' lungawilo tak chung hian ka phun phei mawlh mawlh a. 

Haw na tur pawh nei lova ka kal lai chuan hnung lam aṭangin Chris chuan min rawn ko a, min thlah haw theih tur thu a sawi takah chuan Keifer an min phur duh lo bawka chûan luih ka tum bik lo. 

Chris chuan ' Kan leng kawi dawn mi niang? ' tiin min rawn zawt a ,'Aw ' ka tih rual rual chuan kan zawnah tak Keifer chu a rawn ding thut a, car chhung aṭang chuan vin zet hian, ' Rawn lut rawh ' a rawn ti hluk a, Keifer ang lo takin a vîn lutuk a Chris nen pawh kan in en ha ringawt. 

' Chris... Nidangah kan leng zawk mai dawn nia ' ka tih lai te chuan car kawngkhar chu a rawn hawng tut tut a, a dawh thei lo hle mai.

Min chhan hma hma in car ah chuan hmanhmawh takin ka lut nghal a , Chris  ka bye bye lai lai chuan chak zet hian a tlanchhuak nghal fua ringawt. 

Ka rilru te te chuan a car hi a ṭawng tawh ropui sia a chhiat leh te pawh ka hlau leh hnuhnawh. 

' Nichin khan min phur duh si lova engvanga rawn thinrim leh hnuhnawh nge I nih a? ' thil zep ṭit ṭet hi ka thiam ve lo ka tih tawh kha, ka zawt tlang nghal pawp zel mai a ni. 

' Ka duh lo ka ti loh kha ' tiin min rawn chhang leh khauh tawh, ka dâng nghal der mai. 

' Mahse engtin mah min chhan loh kha... ' ka ti chiah a, Keifer khan min chhang lova keiman thutlukna ka siam vek tih ka hriat chuan ka ngawi leh ta daih a. 

' I think em ni? ' tiin ka zawt leh ta zawka.

Ni e, Amah hnaih tu hmeichhia reng reng chu ka thik vek ang hian thik ve se ka duh vang a ni. 

Hma lam melh ngur ngur chung hian ,' Pasal nei lai I nih kha ' a hriat tawk lek hian a rawn ti sup a, ka hre hman tho. 

' Maw!!? ' 

' Ka nu khan engtin nge a tih che? ' tiin min rawn zawt daih a, engmah a hrelo emaw ka tih laiin a lo hre leh vek tawh. 

' Chu chu engtin nge I hriat? ' 

' Ka hriat dan chu a pawimawh ber lo,  a vau che em? ' thutak fe hian min rawn en a. 

' Hlauthawng suh engmah a hre lo' ti a ka chhan chuan, ' A vau che em ka tih chu? ' a rawn ti leh ngat a .

' Vau e... Min vau zam ṭep alawm ' ka lo ti nghal zung zung a;  min vau miau a ka zep nachhan tur ka hrelo. 

' Mahse awlsam takin ka zam mai mai dawn hauh lo ' tih paha ka inhum ruh lai chu min rawn hmuh chuan a khi nghal vur vur a. ' Khatiang tur kha ' tiin a phun zui sap a. 

A nu nilovin kei min ngaihtuah zawk avang hian mak pawh ka ti, mahse chu ai chuan a nu a hlau miah lo hi mak ka ti zawk. 

_________________________________

A tukah pawh chuan practical class chu kan nei leh a, Rosy phiangseni pawh a rawn kal leh tawh .

' Henu hian eng nge hetah a rawn tih ve sek a' Peter bulah chuan ka phun bul bul a. Ka ṭawng ring deuh aniang min rawn nghawk nghal sawk a. 

' E taka Keifer Apartment bulah chuan I insawn dawn tak tak em ni? ' tia min rawn zawh chuan ka lo but nghauh a 

Keifer appartment ep chiah a ruak tih ka hriat rual rual in a ni la la in ka insawn lut nghal a,  mahse a nu ala haw lo bawka ka la riak lut lova Keifer pawhin engmah a hrelo a ni. 

' I mak ve ngawt mai, Lal in anga nuam in I nei renga , Keifer vang chauhin hmun zim lutuk ah I insawn dawn chu a ni sia... Hepa hi I hmangaih ve ngawt mai' Peter an hmangaihna chungchang a rawn sawi chhuah takah chuan ka beng a very nghal zâr mai. 

' Hmangaihna maw? ' ka lo ti hu a. 

' Hmangaihna ni lo se engvang nge ni chuang ang ' ti a min chhan takah chuan ka khi suk a. 

Tunah Keifer laka ka awmdan hi hmangaihna chu maw ni a,  anih chuan hmangaih ka nei ve thei tih na em ni?  Aurora thinlung pawh neilo an tih kha ka ni tawh lo tihna em ni?

Nilo... nilo ...ka buangrua ang chauh a ni tih hi ka inhrilh nawn mawlh mawlh a ngai a ni.

Practical kan tih laklawh lai chuan Keifer chu ka va melh leh zeuh ṭhin a, a hmelṭha a ni tih hi inhria se chuan a chimawm reuh ngawt ang, a hre lo chung pawh hian a ngeiawm tawh ania. 

' Duhtak ' a hriat tawk lek hian ngeiawm zet hian ka va ko a, a rawn hawi rual chuan a bottle min pek kha dawhkanah ka hung chhuak kher a, min rawn nuih let ve dawn emaw ka tih laiin tum hmuk chung hian lehlam a hawi daih ringawt. 

'Phiangsen chuan ' ka in rin hma in ka lo ti leh hman tawh. 

Ngawi rengin practical ti reng chung hian ama bottle zawk chuan tui hi a in kher a, a bag ah dah lut tawh lovin ka hmuh theih tur laiah chuan a rawn hung kher bawka, ka lo khi ver ver mai alawm. Min tih lawm dan hi chu a thiam ve ngawt mai. 

Ka ṭhut mai mai lai chuan Rosy chu Keifer lama a phei lai chu ka hmu a, a dawhkan bulah chuan a ding nghal hmak bawka, an thusawi ka hre thei bawk si lova ,tlar hnung lamah alo ni bawk nen ka hawi let chhen tawh mai. 

' Peter sawnu saw Keifer hlat thei ang berah awmtir ka duh ' tiin Peter bulah chuan ka ṭuan leh ta ringawt a, ani pawhin tih vak ngaihna a hre bik lo.

Rosy pawh chu midang in an lo koh avangin a rawn let phei lehnghala mahse ka zawn a rawn thlen chuan dawhkana ka bottle dah ṭha hle hle lai chu a rawn nek tla kher a, a tilui tih pawh ka hria. 

Mi thinchhe lutuk tih takah ka ṭhutna aṭang chuan ka tho chhuak nghal zawt a, mahse engmah ka ti hman lo Keifer chuan min rawn kalpelh fua pah hian Library ah tih ringawt hi a rawn sawi a, a sawi tum ka hrethiam nghal. 

Class laklawh lai lai chuan phur zetin Library lam ka pan nghal a,  rin ang ngeiin Keifer chu alo awm a lehkhabu a lo en kual vel mek bawk . 

A awmna ka va thlen chuan ngawi rengin lehkhabu hi min rawn pe a, lehkhabu hming ka chhiar nak chuan " Zaidamna " tih hi alo ni a. Practical atana min puitu tur a la dawn emaw tih nak alaiin .

' Nga... ' ka ti hman chiah tih in lehkhabu pahnih "Zawldawhna " tih leh " Insumtheihna" tih lampang hi a rawn chher chhuan leh a .

' Heng hi engatan nge I tih? ' 

' I ta tur a nih kha... Hei ka ta tur chu ' tih pah hian practical puitu chu min rawn hmuh va va a, mahse heng lehkhabu te hi engvanga keima tana la nge a ni tih hi ka hrethiam thei lo. 

' Mahse engvangin ?' tia ka zawh chuan. 

' Engkim I nei pawh a ni maithei mahse heng thil pathum te hi I nei lo ani ' zep miah lovin min hrilh tlang nghal vek a. 

' Rosy I ṭan vang chu ani em lo tiraw? ' ni e ,Rosy lo chu hetianga tih nachhan tur hi a nei tlat lo.

' Rosy hi I enliam ve mai mai ang tih min tiam rawh ' 

' Ka rin dan chiah a ni. Kha nu kha ka tih nat I hlauh avangin hetiang thil hi I ti ani tih min hrilh miah suh ' ka sawi zawh rual rual chuan min rawn fawp nghal vawng vawng a, a rawn thleng tehthut lutuk a ka lo inring hman lo. 

' Ani vang kha a ni lo, heng thil te hi I mamawh avanga pe che ka ni. Chuan min tiam thei angem? ' a rawn tih leh chuan ka lo bu nghat a .

'Rosy chu engtin mah ka ti lovang, I fel chhung chuan ' ka ti let kher a, ngeiawm taka han ṭawng vel hi ka pianpui ti ila a sual lovang. 

' Class ah phei tawh ang ' Keifer chuan a rawn ti leh a, a ruk tak chuan ka kham lo takzet. 

' Umm.. ' tih bakin ka chhang lo , a kal hma in vawikhat ka hmuiah a rawn fawp leh zeuh a, nichina min fawh khan a ti mai mai lo tih min fawh nawn leh hian a ti chiang chiah. 

Class a zawh veleh washroom ah ka kut ka sil fai hnu chuan chhuah lehnghal mai ka han tum a mahse toilet pakhat aṭang hian hmeichhe pakhat in ka chanchin chhe tak tak a a sawi ri ka hriat takah chuan ka sa leh phat rawh. 

' A Pa jail ah a tang lehnghal a ni lawm ni, engmah a nih bik loh chu ' tih ri ka hriat rual rual chuan ka pheikhawk man to zet pawh ngaihtuah lo lêk hian kawngkhar chu ka tlawh hawng nghal ṭhuai a, ka rin ang ngeiin Rosy a lo ni a; a aw aṭang khan ka hre lawk sa ti ila ka sawi sual lovang. 

'Tunah khan eng maw I sawi? ' tih pahin ka inhum ruh nghal a, ka huat zawng a rawn chhakchhuak anih vaih chuan ka kut hi a in ring reng tawh .

Rosy lah chuan min hlau tih hriat tak hian min rawn melh kar a, a thaw dêp dêp ta ve ang. 

' Eng.... Engmah ka sawi lo' tiin min rawn chhang bah nuai a, midang an awm loh lai chuan a huai ngam bik lo. 

' Ka Pa chungchang vawikhat pawh lo sawi tawh reng reng suh ang che , kal rawh' min hlauh em avang chuan ka ti ta ringawt a, pumrua ah engteh ual ni lo mah ila ka chhel in ka kawlh bawka tumah hi ka hlau bik lo. 

Rosy chu hmanhmawh tak hian toilet aṭang chuan a rawn chhuak nghal a, mahse min rawn kal pelh pah hian ' Zakthei lo lutuk ' a ti sap ri hi ka hre zui zat a , kawlh tih takah ka va umzui lehnghal.  

' Hmeli ' tih pahin warning pawh pe lovin a tukhum sam ah tak ka va ṭham nghal sawk a , ka rin ang a ni lo alo duai bik lo nasa mai ka samah a rawn ṭham ve nghal a. 

'Keifer hi lo zar buai ve tawh suh, chu ti lo chu I chak lovang ' Rosy chuan min rawn vau ve khanglang a, ka lo ngaithei bik ṭhak lo. 

' Hahh.... Keifer hi maw ka pasal a nih hi' ka ti let ve sak a, a aia na in ka sam chu a rawn ṭham sauh a. 

Chutia thlah hmasa zawk nih tum bik lova kan inṭham tawn ran lai chuan vawilehkhatah Rosy chuan ka sam a tham na chu a rawn thlah thut a, na tuar niawm tak hian leiah a ṭhingṭhi ta thut mai, ka mak ti lutuk chu ka en reng ringawt. 

' Khawngaih in min ti na tawh suh ' Rosy in ṭap chunga a rawn tih rual chuan Keifer 'an vin zet hian, ' Aurora ' a rawn ti ri chu ka hre zui zat a. 

Hetianga Rosy a awm nachhan hi ka hre ve chiah. Chinghnia beram vun sin a nih hi ni. 

Keifer aw ka hriat takah chuan ka ṭhamna chu rang takin ka thlah nghal vata, Keifer bulah engah mah ngai lo tura ka lo intiam tawh avang khan ka kut chu ka hum nghal vata ,ka thinrim luatah a thusawi pawh kha ka lo theihnghilh a tin ni. 

Rang takin Keifer chuan Rosy chu a rawn buaipui nghal vata, a kaih thawh lai te chuan sawi hmasak ber tur pawh ka hrelo. 

' I ngaih ang kha a ni lo ' ka lo ti ringawt a, chutiang bakin ka sawi thiam tlat lo. 

' Aurora duhtawk rawh, I thil tih hi I hria em? ' en pawh min en lovin Rosy chu a kalpui nghala. Engkim hi a thleng tehthut lutuk a ngawi rengin ka enzui vawng vawng ringawt. 

Fakna khu aw