30 days with Mr Genius - 16

@remruati _haylor

 CHAPTER -16

' Hmeli chu leh ' Peter melh pah chuan ka phun sap a ,ani pawhin alo hrethiam nghal. 

Hmui phun hian, 'Insum rawh ' tiin min rawn chhanglet a, ka lo ner nâng a. 

Ka inngaihbel vang nge pawh ka hrelo Rosy chuan min rawn melhrûm ni te hian ka hria a, ka lo duai duh bik ṭhak lo. Runluih nan Keifer bulah chuan ka tawlh hnai sauh a. 

Zirtirtupa in tih dan tur a sawi lai chuan ka ke chu Keifer pheikhawk si deuh hian ka va dah kher a, kan pheikhawk chu a zuk melh zeuh a, a ke laksawn daih a hnekin a aia insi tur hian a ke chu a rawn khang phei a, hre miah lo angin awm tlat mahse nuam ka lo ti ve em em ringawt. 

' Group ah in in ṭhen dawn nia' 

Kan zirtirtupa in a tih chuan phur fahran hian Keifer bulah chuan, ' Awm dun ang ' ka lo ti nghal zung zung a, min chhang lem hlei lova. 

Mahni thu in group a inṭhen tur chuan ka kal darh sâng sâng hlawm a, Keifer nen group khatah kan awmdun vek tawh tih in zirtirtupa bawk chuan ,' Keifer nangchu I thiam vek tawh bawka Rosy nen hian midang in lo tihpui dawn nia ' a rawn ti ta maia, Keifer chu mangan hmel zet hian ka han melh nghal vat a hmuh theih khawpin ka hnual chutah Rosy lah chu a lo nui ver ver lehnghal.  Ka melh rum ngang mai. 

' Group ah hian ka awm zawk ange 'tiin Keifer chuan ka rin loh dan deuh in a lo chhang nghal vat a,  mak ti takin ka melh nghal ha a. 

' Anih chuan group-ah I awm tho anga midang I lo tihpui tel bawk dawn nia ' tiin kan zirtirtupa chuan a chhang a, ka thaw nghal huai mai. 

Peter chu a rûkin ka bulah chuan a rawn tawlh hnai zeuh a, ka hriat tawk lek hian, ' Rosy in zirtirtupa kha hrilh ru lo se chuan a ko hrang miah lovang ' a rawn ti sa sa a,a hma aiin ka thin a rim zual . 

Keifer nen group ah kan awmdun avangin Rosy hian Sir bulah Keifer an pui turin a dil a ni tih ka hrethiam nghal. 

' A chak dawn lo' tih pahin ka bag chu ka ṭham tawn a, zaizir in inbeng dai turin min lo hrilh nghal vata. 

' Eng nge kan tih dawn? ' 

Kan practical tih tur takngial pawh ka hriat loh avangin Keifer chu ka zawt ta ringawt a. 

' Sangha ti them aṭang hian DNA kan la chhuak dawn? ' a lo ti sam êt a, ka lo bo hu thung. 

' Maw!!  Enga? ' ka ti chhuak nghal lûng lûng ringawt .

Practical chu kan han ti ve ta chêng a, Rosy chuan Keifer chu a ko peng deuh chhen renga, kham ru viau mah ila kan zirtirtupa berin midang zirtir tura a tih miau avangin engmah ka ti thei lo. 

' Keifer ka thiam leh tawh lo' a vei kual lai chuan ka lo ko peng lui ve ngat a, ka thiam lo chu thuhran nise Rosy avang ringawt pawh hian koh ve hrim hrim hi ka duh a ni.

Ngawi rengin Keifer chuan min rawn tihpui sawk sawk a, Isabelle in alo ko ve leh bawk nen a kal lehnghal. 

 Keifer an koh tak chhen avang chuan ka hriat tawk lek hian 'Hreptak chuan ' tiin ka phung deuh renga, ka lung a awi thei tawh lo. 

' Ka lo pui dawn che mi? ' Chemical ka duh duh ka pawlh kual lai chuan kan group ami tho mipa pakhat chuan a rawn ti nghal vat a, pui tu tur ka neih avang chuan hawi chhoh pahin ka nuih nghal ver ver a, ka thaw nghal huai bawk . 

' Kha heihi lo keng rawh ' tih pahin test tube chu min rawn pe a. 

Ka classmate mah nise Keifer chauh ka buaipui bawka, hepa hi ka lo hmu ngai miah lova hetia min rawn puih takah chuan a hmel hi ka theihnghilh tawh ngai lovang. 

' Chris....ka nia ' Test tube a thil pawlh pah chuan nui vur vur chung hian a rawn ti a ,ka insawi hma in, ' Nangchu Aurora ' a rawn ti zui zat a, ka lo nuih ringawt. 

Ka hming a hriat takah chuan ,' Ka lar viau em ni? ' tiin ka zawt a, min rawn en pah chuan a nui nghal vur vur a, ' I hmelṭha a chuan I chhelo bawk ' tia min chhan takah chuan hawi san vâh pah hian ka sam chu hnung lamah ka thehphei nghal hawrh a .Hawi cham tawh tak ka ni .

Keifer kâ atangin hre ngat phei ila chu ka hawi sang lutuk hi ek ka rap pheng phung thei ang. 

' Ka hria alawm ' tiin Chris chu ka lo chhang sam et a ,a tih ngaihna hrelo chu a nui leh ringawt ṭhin a. 

Chris chuan a tlangpui min tihpui nghal zung zung a, kan titi pah bawka rin aiin kan in kawm ngeih phian lehnghal. Keifer pawh ka bulah rawn ṭhu mahse an koh buai reng avangin ka zawt duh lo law law. 

' Aurora heihi Centrifugation lo ti la keiin PCR ka lo va buaipui ange ' Chris an a tih chuan ka lo bu nghat a . Vawiin zet zawng Chris zarah ka hrethiam ve deuh bawka nuam ka ti thar riau mai .

Ka thiam ang ang in Centrifuge machine chu kan ti kual vela ka vawikhat hmanna tur alo ni bawk nen ka bo hu mai. 

Keifer puihna dil tumin kan ko dek dek a, engmah ka sawi hma hma chuan, ' Ka hmanlo Chris in puih tir mai rawh ' a rawn ti hmak ringawt. 

Engmah pawh ka sawi tawp si lova. 

' Mahse I buai loh kha ' ka ti leh ngat a, nia a buai miau lo a ,a practical tih lai pawh khawl ah a dah daih tawh a nghah pahin a ṭhu mai mai tho sia. 

' Ka buai ' tih pahin a tho thut a , midang in ko miah lo mahse ava tih pui kher a nih chu!!  

Keiin hetah puih ka ngaih laia pui ngai lo ava pui daih chu ka ngaihdan a ni lehpek tawh lo hle. 

' Hepa hian engthil nge maw a hriat le? ' phun sep pah chuan ka thiam ang tawk chuan kan ti kual vel a. Keifer hian Chris a thik chu a ni êm lo maw? 

Nilo, hepa hian midang thik tur pawhin min duh tak tak lo tih ka hre ve kâr. 

Vawiin a kan practical tih lai a vawikhat nan ka tih hlawhtlin avangin test tube keng chung hian ka ṭhutna lam pan chuan intithei tak hian ka phei a.  Mahse midang hmuh loh in Rosy chuan ka kalna turah tak chuan a ke a rawn dah zeuh keilah ka lo in bun sâng ve bawk nen Rosy ke ka pal rual chuan chhuatah ka ṭhingṭhi nghal rawp a, ka test tube pawh chu chhuatah a tla keh nghal chuai bawk. 

Thawh mai nachang pawh hre lovin phawk fe hian testtube tla keh nuai chu ka en renga, ka mâng vek mai hian ka hria. Tih ṭhat lehna hun a awm tawh bawk si lova zero ka hmu ngei dawn a nih hi. 

Midangin min lo en ṭhap lai chuan Chris chuan min rawn kaitho nghal vata, Keifer pawhin min rawn kaihthawh a tum ve chiah bawka mahse Chris a chet hmasak zawk avangin a kut chu a hum ta ringawt a. 

Ka ding chiah tih in engmah sawi set set lo hian Rosy hmaiah tak chuan ka beng nghal pawp a, midang chu ka chet dan avang chuan an lo mengphawk nasa mai. Rosy vanga tlu ka ni tih an hrelo niin a lang. 

' Engvanga I ke kha rawh dah lui kher nge I nih? ' tia ka zawh chuan a hmai dawm pah chuan a mittui chu a ti tla der vel a, lemchan thiam tak a ni. 

' Ka ni lo, engtin nge chutiang chuan min puh theih zawk ' a mittui hruk pahin a ṭap vela midang lah chuan an lo thlem sap sap lehnghal .

Rang takin Keifer chuan ka kut chu rawn chelh in min kaichhuak nghal dawr dawr a, ka hawi let leh pawh chuan midang hmuh lohin Rosy chuan min rawn nuih a nih chu!! ; sa vet vet tak ka ni. 

Midang in min hmu lo ta maw tih in Keifer chuan min vawnna chu a thlah nghal hmak a. 

' Engvanga min dang nge I nih, khanu thil tih kha I lo hmu em? ' ka ti nghal hlawih hlawih a, let leh hial te ni ka duh ni. 

' Khanu khan ala hre khawp ang ' tih pah in let leh chu ka tum a, ka ban rawn vawn pah hian, ' Kal suh ' hi a rawn ti sap a, a awmdan chu mak tih hmel takin ka lo en ringawt. 

' Engvangin maw?  rosy chu I va ṭan ve a ' tih vin hlar pah hian min vawn na chu thing thlak ka han tum a ,engmah sawi lovin a lamah min pawt let nghal dawrh a, nghet takin min kuah nghal vawng vawng ringawt. 

' Eng nge maw I hriat le? ' 

Ka tal deuh pawhin a aia nghet in min kuah bet sauh a, zawi te in  ka beng bulah hian, ' I in ti na em? ' hi a rawn ti a, ka taksa hi a zawi nghal vek mai hian ka hria ; ka thinrimna te pawh a reh nghal hmak mai.

Mipa tamtak ka lo tawng tawh na in hetiang hian tumahin min la ti ngai lova awmdan tur pawh ka hrelo. Mak tak maiin a vawikhat nan ngaihsakna leh min hrethiam tu ka tawng ni ang mai te hian ka inhria. 

Nghet taka kuah let pah hian, ' Na lo , lo in ti na law law ila ṭha tur ' tih pah hian ka nui nghal ver ver a, ka rilru te te chuan khatiang khan tluk fo tur a nih hi tih te in ka ngaihtuah tawh vel. 

I chhiar zawh veleh fakna khu aw... Xoxo