30 days with Mr Genius -13

 CHAPTER-13 

Ka thawhna restaurant ka thlen chuan buaina a thleng tih pawh hriat loh in alo reh ṭhap tawh a, Taylor hnenah Aurora awmna ka zawt nghal a,  dawr hnung lam chu min lo kawhhmuh vat a. 

Rang takin dawr hnung lamah chuan ka tlan phei a mahse Matt'an Aurora kut uluk takin vura a lo dehsak lai ka va hmuh chuan ka ding chut a.  Maktak maiin Matt chu ka thik in a hmel ka hmuh zawng ringawt pawh hian ka sa nghal hle. 

Hetianga awm theihna dan hi nei lo mah ila nghet takin ka inhum ruh sauh sauh a. 

Ngawi rengin Matt-a kut paih thlak sawk pahin Aurora kut chu ka va dawm chawt a ,kaihthawh pah hian ' Fimkhur ta che ' ka ti vin hluk a, thlarau hmu ang maiin min lo en thung. 

' Keifer ' a ti chuai raih a, ka va inlan thut vang pawh a ni mahna ala hamhaih hle tih pawh a hriat. 

Engmah sawi lovin Aurora chu ka kaichhuak nghal dawr dawr a, theih chu nise Matt'an a khawihna kut hi sil tir hial ka duh. 

Aurora hi hmeichhe tih sam tak a ni lo bawka alo ṭang ve tlat a chu chuan ka thin a ti rim zual. 

' Eng nge hetah I rawh tih? ' ka kaihna kut paihthlak pah chuan a ti a, ka insum hman lo chuan, ' Kha pa kha engvanga I bula awm nge a nih? ' ka ti chhuak tawl a, mak tih hmel takin min rawn en nghal kawk a. 

' Chu chu a pawimawh ber lo,  I nu i hlau viau a ni lawm ni engah nge I rawh chhuah? ' 

' Khapa khan I kut kha engtin nge a tih? ' tiin ka chhang ta zawka, in chhang mil lo viau mahila kan in chhang tawk viau tho e. 

Min rawn melh râm râm chung hian ,' I thik em ni? ' tiin min zawt let khauh. 

' Aw... Kha pa ' ka ti chiah a, ka sawi thui hma chuan ka ngawihsan leh daih a. 

Engvanga thik em em nge ka ni tih hi han hrilhfiah vak ngaihna ka hre lo. 

' Car ah lut phawt rawh 'Car kawngkhar hawn pahin a hriat tawk lek hian ka ti ta ringawt a. A hnathawh hun a pel tawh bawka thlah haw ngei ngei ka tum tlut tawh a ni ber. 

Ka ngaih tih ṭhat nan a ni zawk mah aniang chu, him taka in a thlen phawt loh chuan ka mut theih dawn loh vang a ni. 

Hriat chak hmel taka min rawn en chho ha chung hian ' Mawh I thik tiraw? ' a rawn ti leh a, ka tih ngaihna hrelo chuan ka tukhum ka hiat ta ringawt a. 

Matt ka thik nia a hriat takah chuan min rawn nuih ver ver a, a tum hmel pawh hlim hmelah a rawn in thlak danglam leh ta .

' Ka kut hi vur in min deh sak rawh aw.... umm... ' ngen ngawl deuh hian min rawn en a,  amah melh khai chung chuan ka lo bu nghat a. Ka nem ta riau a inhriat na ka nei. 

A in chhung kan luh rual chuan kan hma ah tak nu pakhat ,a hmel en mai chuan kum 40 vel lek hmel pu hian min lo nghak rân a .

Aurora in ' Ka nu ' tia a phun sap takah chuan tunge a nih zawh buai ka ngai lo. 

Anu nen an inmelh dan aṭang chuan a inkar a ṭhat ka rin loh avang chuan Aurora en chung chuan inthiar fihlim chu ka tum a mahse ka ban a rawn chelh pah hian kal suh ti niawm tak hian min rawn melh a, chutia kal phal lo ta na nâ na chu inthiar fihlim ka tum ta bik lo. 

' Buaina I nei leh ta em ni? ' Aurora chuan a bag couch a paih pah chuan a ti a, anu erawh in shades vuah reng chung chuan a lo nuih sak thung.

' Wow... A chhiat loh hi le ' a shades kar aṭang chuan min rawn melh a, an nufa inkar anih avangin ṭawng ka tum lo. 

' Ka nu' a ti fiak nghal ṭhak a, ' min rawn zui rawh ' tih leh pawna chhuah a rual nghal a. 

A nu chuan a shades vuah lai pawh thlak deuh pah hian min rawn en a, min rawn siai zeuh a tichuan Aurora chu a zui chhuak nghal a. 

Keimah chauhin inchhungah chuan ka ding ngawi reng a, minute 5 lai a liam tawh avangin ka va chhuak ang nge Aurora rawn luh hun ka nghak ang tih chuan ka inkhap nasa hle. 

An rei tak em avang chuan ka va chhuak ta nge nge a mahse Aurora rawn lut tur nen chuan kan in tawk a, eng thil nge thleng tih zawh ka tum zet na in thinrim tih hriat tak hian min rawn kalpel fua a,  ngawi rengin ka zui lut leh hna hna ta zawk a. 

' Arghhh.... ' a thinrim inhrosa chuan kawngkhar bula Vase lian zet in tar chu a ti tla keh rêm rum a, thil pawi dang a khawih leh loh nan choka lamah chuan ka zui lut a. 

Ngawi rengin fridge chu a hawng rawk rawk a, beer Can pakhat hi a la chhuak a. A hawng chiah tih chuan a soda chu a rawn phuh thut a .

' Hreptak chuan ' au ṭhawt pahin beer chu a paih pawp a. A ṭhu hnawk a. A hmai chu hupin a inhnit nghal hlawp hlawp a. 

Aurora ṭap hlawp hlawp lai ka hmuh chuan a bulah ka lo ding ngawi ve reng a, tih ngaihna ka hre der lo. 

Hmeichhe awm khauh tak leh tawrhchhel tak ani a hetianga a awm hi ka vawikhat hmuhna a ni bawka, min ti lungngai takzet.

Aurora chu dim takin ka zuk kuah a,  ka awm a a inhnit hlawp hlawp lai chuan a lu chu duat takin ka chul heuh heuh a, a tawpa tawpah a rawn ṭap chhuak ta nge nge a. 

Rei tak a inbun ruah hnu chuan mut a duh nge duh ka zawh chuan a lo bu nghat a. A chau bawk a niange khumah a mu chiah tih in a maimichhing nghal vang vang a. 

A muthilh tawh ringin puan ka sin ṭhat tir a, a rawn meng siar siar a zawi sap hian, 'La haw suh ' a rawn ti sep a. 

' Ka haw dawn lo hahdam takin awm rawh ' tia ka chhanlet chuan min rawn nuih ver ver a. 

Keihi ka rilru ka hlauh tawh a nih hi, ka nu inah tui takin a mu a ka tih loh tur tur thil ka ti a ni mahse ka nu lakah inthiam lohna ka nei dêr lo. 

' Ih!  Ka nu khan pasal neih leh a tum a ' a mittui chu a rawn tling nghal pam a, ' Mahse  neih a tum tak tak lo tih ka hria, treatment lak a duh avanga a awmbo chhuanlam mai mai a ni. Ka nu khan thisen cancer a vei a chuan vawiin ah ka hrechhuak ve chiah ' a mittui chu a rawn luang ngiai ngiai a. 

' Khatih chhung zawng khan amahin alo tuar char char a keilah in engmah hre lovin a chungah ka sual em em a, tunah pawh hria anga awm chu sawi loh a lakah ṭhat pawh ka chhuah thei lo ania ' ṭap chhuak lo turin a inpet fân fân a, a kut hum saka a thusawi lo ngaihthlak mai loh chu tih theih ka nei lo. 

' A natna hi hria anga ka awm chuan a rilru ka tih hah zual sauh dawn avangin ka pi in zep turin min ti a mahse hun a nei rei tawh lo tih ka hriat hian awmdan tur pawh ka hrelo' 

' I nu chuan hlim taka I awm hi a duh bera, I nu tan I mittui hi ti tla tawh suh ' a kut chu ka la a, a duh ang ngeiin vur in ka deh saka. Theih chu nise kuah vawng vawng a hnem mawlh mawlh ka chak ,mahse engthil hian nge min dang bet tlat ka hre lo. 

A mutthilh hnu chuan pheikhawk nen a mut avangin a pheikhawk chu ka phelh saka, nileng in hetiang anga pheikhawk sang a bun thei ringawt pawh hi thil mak a tling. 

A mutna bula ṭhut pah chuan a hmuiah ka fawp zeuh a ,a kut chu nghet taka hum in amah thlir reng chung chuan ka ṭhu renga. Reilote ah khum bawh chung chuan ka muhil ve ta nge nge a. 

___________________________________

Ka harh chuan zing dar 5:30 a lo ri vâ tawh a, Aurora erawh ala mutui hle. 

A kut ka vawnna chu dim thei ang berin ka la sawn ṭhem ṭhem a. Ka nu awm lai chu nilo se chuan a harh hun thleng ka nghak ngei ang. 

Hun harsa a tawh lai anih avangin hrehtak chung chuan ka hawsan a ,ka rilru ah a awm reng thung. 

Inchhung ka luh chuan ka nu pawh a lo tho tawh a rin loh tak maiin min lo nuih sâng a. 

' Excer I la zo tawh em ni? ' alo ti vâr bawk. 

Ka nu dawt hrilh ka duh loh avangin ka nui ringawt a,  chhang lovin a ṭhutna êp chiah ah chuan ka ṭhu ve nghal a,  Chinese herbal tea chu min thlit saka ka in ve nghal mai bawka. 

Thingpui ka in lai te chuan Aurora ringawt ka rilru ah a awm a,  a kianga ka awm thei lo hian ka awm a ti nuam thei lo. 

Ka ṭhut tum reng avang chuan ka nu chuan' Bawiha... Rilru hahna I nei em ni? ' tiin min rawn zawt thut a ,mumang ram aṭanga harh chhuak thut ang maiin ka phu zuk a ,' Maw! ' ka lo ti hu bawk. 

' Tun ṭum ka rawn kal chu vei nei I ang hle mai, I nui hmel takngial pawh ka la hmu lo' 

' Engmah a ni lo, ka chau deuh a tin ni' 

' E taka vawiin ah Texas aṭangin Medical student ho in an rawn tlawh dawn cheu tih ka lo hria a , in conference neih turah chuan thil tamtak I zir chhuah ngei ka beisei ' a tih chuan ka nui tawi tap a.  

A nihna takah chuan Medical conference na a kal lovin ka Physics project buaipui ka tum zawk a ni mahse loh theih loh in ka kal a ngai dawn a nih hi. 

' I Pa pawh a lehpek ah chuan a rawn kal hman tawh ang, a ngaihtuah lutuk che a mahse I ṭhat thu ka hrilh tawh a, a thawveng huai ve ta ngei ang ' a titi siam siam lai chuan khawvel dangah ka awm daih thung. 

Ka school kal tur chu ka nu in min thlah a duh tlat a, a lo tih fo tawh ṭhin dan a nih avangin ka hnial lem lo a ngaiah ka nei tawh zawk. 

' Sweetheart.... I kawr ka lei thar kha naktuk ah chuan I ha dawn nia aw...' ka nu nen chuan kan inzui thla chhat chhat a.  Ka nu tih lawm loh ka hlauh luatah keimah zawk hian ka hlimna tur ka ngaihtuah ve thei ngai lo a nih ber hi. 

' School thleng min thlah angai lovang.... Mall lamah I peng mai dawn nia ' ka rilru a awm chu ka sawi chhuak hlawl a, ka nu hmela lungawi lohna rawn lang chu ka hmu thiam nghal. 

' Bawiha... Hun rei tak hnua ka thlah leh theih na hun che a nih hi ' ka nu in a rawn tih takah chuan hnial in awmzia a nei dawn lo tih ka hria. 

' ka hrethiam e ' tih paha car a ka lut tur chu ral lehlamah chuan Aurora car ka va hmu thut a, car chhung aṭang chuan min rawn nuih san san bawk. 

' Bawiha ' ka nu in min rawn koh avang chuan ka ṭhu lut vat a. Ka nu a awm vang nge ni Aurora pawhin min rawn pan a tum buai lo. 

School lam pana kan tlan lai chuan side glass chu ka en reng a, a chhanchu kan hnungah Aurora a tlan vang a ni. 

I chhiar zawh veleh khawngaih takin fakna khu min lo hmeh sak hram dawn nia.