30 days with Mr Genius -12

 Chapter-12

Rang takin min rawn fawp let ve nghal a, tunge ka nih a ka nu kalh zawngin ka awm tih pawh hre chang tawh lek lovin ka fawp tawn tawn a,  a zûn in min bual â tawh chu a ni ber e. 

Aurora chuan rang takin ka tshirt hak lai chu min phelh sak a, ka hnungzang leh dar bawr vel a ṭham tawn tawn lai chuan 

a taksa tereuhte chu ka kut chuan nghet takin ka chelh sak a thung. 

Muang chang in khumah ka bawh thlu a, uluk takin a lu chu lukhamah ka kut chuan ka nghat a. Mipa insum thei leh inthup thei tak ka ni a mahse tun ah hian ka rilru leh taksa erawh henu hian a thunun zo vek tawh a nih hi. 

Chutia khawvel ah kan awm ve tih pawh hre tawh lek lova kan infawh lai chuan ka phone a rawn ri thut a, mumang ram aṭanga harh chhuak zawk ang mai hian ka meng thut a chutah chiah chuan ka thil tih âtthlak tak hi ka hrechhuak chiah. 

' Ka tihpalh ' tih pahin khum atang chuan ka in beng tho thut a, Aurora erawh a hawihai hle. 

' Sawi rawh ' tih pahin phone a ka nu biak pah chuan room aṭangin ka chhuahsan daih a. 

Aurora lakah khan ka inthiam bik lo mahse rilru fim ka put loh avanga khatiang thil kha thleng a ni a, a thleng nawn leh tawh lovang. 

Ka nu chuan Denver, Colorado aṭanga a rawn chhuah chiah thu min rawn hrilh a , thlawhna in darkar 4  thlawk a ni a tun aṭang hian ka inpuahchah angai tih pawh ka hai lo. 

Phone ka dah hnuah ka tshirt chu ka ha nghal mawlh mawlh a, Aurora erawh room aṭang chuan lungawi lo tih hriat tak hian a rawn chhuak a. 

' Eng thil nge maw I hriat le? ' a bag couch a paih pah chuan min rawn vin zui hlâr a. 

' I in siam zawh tawh chuan ka thlah haw ang che ' tih ringawt in ka lo chhang thung. 

' Maw!!  I ã ta em ni, kan in fawp zo chiah a chuan tunah hetiang hian I awm leh amaw? ' hriatthiam loh hmel takin min rawn en a. 

A thusawi chu hre reng mah ila hre lo ang hmakin tukverh chu ka khar san daih a chu chuan a ti thinrim zual hle ang tih chu hriat sa. 

Ka hawi let rualin ' Zawhna ka zawh che chu' tih pahin ka kalna turah tak chuan a rawn ding nghal a, chhanna a hmuh hma loh chuan min zawt ngat ngat duh ang. 

Ngawi rengin a hma a ding reng chung chuan ka en renga, ka thusawi tur a nghah rân lai chuan ka bag ah ṭhat pah chuan ka kal pel daih a , min hriatthiam loh hmel takin min rawn en zui ha a, hmanhmawh takin min rawn um chhuak nghal dawr dawr a. 

Ring takin ' Ding rawh ka tih chu ' a tih pawh chuan car ah ka luhsan hmak a, ani pawh thinrim tak chungin a rawn lut ve mai bawka. 

' Keifer Wu vawikhat chiah ka zawt leh ang che ' Ka lam rawn hawi chung hian a ti tân tân a .

' Sawi rawh ' 

' Engvangin nge min fawh? ' 

Chu zawhna bawk chu,  keipawhin a chhanna ka nei bik lo .Ka fawp chak a ka fawp a ni mai chhan dang a awm lo. 

Hma lam melh ngur ngur chung chuan ' Tihsual palh a nih kha ' tiin ka chhang ta zawk a , a hmelah hmuh theih khawpin ka ṭawngkam khan a ti na tih hai theih a ni lo. 

' Tihsual palh a ' min rawn en deuh ha a, ' Car hi ti ding rawh ' a ti zui zat a. 

' I in thleng ka thlah ang che ' tiin ka chhang a, ka ti thinrim zual sauh emaw tih tur a ni. 

' Car hi ti ding rawh ka tih chu ' a bag aṭang hian teddy bear tereuhte kutphah tia lek hi a rawn hum chhuak a,chu chuan ka hmaiah tak a vawm pawp a .A thinrim em avangin car pawh chu ka ti ding ta nge nge a. 

Ngawi rengin car kawngkhar chu a hawng sawk sawk a, vawikhat pawh min rawn en let lovin a chhuak tau nghal nghawng nghawng a. A kal liam thlengin ka en zui vang vang a, a kal liam chiah tih in min vawmna teddy bear chu ka chhar a, khi vur vur chhung hian uluk takin ka bag ah ka khung lut a, school lam panin ka tlan chhuak leh nghal a.

Classroom ah pawh lut lovin Physics laboratory ah ka kal tlang nghal a, Bella chuan nui chung hian 'Hi! ' tiin min lo chhâwn nghal zar a , nuih let pahin ka ṭhutna ah ka ṭhutsan nghal a. 

Kan project atana kan khawl (machine) siam lai ka buaipui lai chuan Bella chuan, ' Keifer, I note ka lo en lawk? ' tiin min rawn zawt a, en pawh en lovin ka bag-a a awm thu leh lo va la mai tur chuan ka hrilh a. 

Ka bag chhuata tla ri rak ka hriat rual chuan ka hawi let vat a, Bella chuan inthiam loh hmel tak hian min rawn en lâp a engah teh vakah mah ka ngai lem lo Aurora teddy bear chhuata lo tla let bal ka hmuh hma kha chuan. 

Ka ṭhutna aṭang chuan ka tho thut a ,ka in rin hma in ka duh aia vin hian, ' Engthil nge maw I tih le ' tih pahin teddy bear chu ka la vat a, ka bag erawh Bella in a rawn chhar thung. 

Mak tih hmel takin teddy bear ka beng fai lai chu min lo thlir reng a, a tawpa tawpah, ' Kha thil kha a pawimawh viau em ni? ' tiin min rawn zawt khauh a,  kei ngei pawh hian engvanga hlut em em nge ka ni tih ka inhre bik lo. 

' Kha note chu.... ' tih pahin ka note chu ka pe a, ka bag chu ka la hmak a ka ṭhutna ah bawk chuan ka ṭhu let leh a. 

Ka thil tih avang khan Bella chungah ka inthiam lo leh hnuhnawh mahse kha teddy bear tla lai ka hmuh khan ka thinrim ka insum hman meuh lo chu a nih ber kha. 

Classroom a ka let leh hnuah pawh Aurora hmel hmuh tur a awm lo,  a khat tawkin a lo kal ringin kawngka lam ka melh sek a .Engang pawhin lehkhabu chhiar in rilru lak pen tum teh mah ila ka rilru ah a lut thei tak tak lo. 

Chhun chawlh hnuah pawh a rawn inlan tak lovah chuan ka call ta nge nge a,  a phone a in switch off hmak.

Ka tih ngaihna hrelo chu classroom hnung lamah chuan ipte zen chung hian ka vei sek a ,a nihna takah chuan Aurora ṭhianpa Peter chu ka lo nghak a ni zawk mah. 

Peter a rawn luh pawh chuan ka vawikhat biakna tur a nih vang nge ni ka hreh ru khawp mai. 

' Thiam loh I nei em? ' Peter zawn ka thlen chuan ka va ti ringawt a, ka awm dan chu mak a ti hle a ni tih a hmelah a hmuh theih. 

' Ai... Nei lo' a lo ti ha a. 

Sawi leh tur ka hre ta hauh lo mai, kekawr ipte zen chung hian a ṭhut na zawnah chuan ka ding renga  mak tih hmel takin min lo en reng thung. 

' Thiam loh I neih chuan ka hrilh ang che ' ka tih leh ringawt a, Aurora chungchang han zawh tlang tawp chu ka ngam bik lo. 

' Keifer ' ka lam hawiin a rawn ṭhu rem te te a ,' Vawiinah Aurora a rawn kal dawn lo' tiin min rawn hrilh ta nge nge a mahse han tih vak ngaihna ka hre leh tawh lo. 

' Tuman Aurora chungchang an zawt lo che '  tih hmak pahin ka ṭhutna ah chuan ka ṭhutsan a,  Aurora chinchang ka hriat takah chuan ka thawveng huai thung. 

In ka thlen chuan ka nu in rawng a lo bawl fel diam tawh a , class ṭhulh a hruai kha a duh loh avangin amahin a rawn kal mai ṭhin.

' Vawiin ah in zir hnem em? ' ka nu in min hmuh rual rual chuan a tih ṭhin dan ang bawkin I dam em?  tih aiin min zawt hmasa ber a ,ngaiah ka nei tawh. 

' Umm... Zir hnem 'tiin ka chhang chuai raih a. 

' I bag dah la chaw ei ang aw... Hei rawng ka bawl peih vek tawh a nia ' a tih chuan ngawi rengin chair ah ka ṭhu a, chaw chu ka ei nghal mawlh mawlh a. 

' Ei chak lutuk suh I hak ang... Bawiha I sam pawh meh a hun tawh a nih kha... E taka Doctor te I la ni dawn sia lehkhabu ka rawn lei che ania' a ti nghal zung zung a, kei erawh ngawi rengin ka lo bu nghauh nghauh thung. 

Ka nu hian Biology ni lovin Physics ka tui zawk a ni tih leh Doctor ni lovin Astronomer nih ka tum tih hi a hria a nih chuan lung ṭha lo a neih avangin damdawiin ah a awm phah dawn a engmah ka hrilh thei lo. 

Chaw ka eikham veleh ka nu inbual lai chuan vanlam chanchin lehkhabu ho zawng zawng chu ka thukru fai vek a, engtik ah nge Biology nilovin Physics hi main subject ah ka thlang tih hi ka hrilh dawn ka hre bik lo. 

Ka room ah lehkha ka zir mawlh mawlh lai chuan Taylor-i hnen aṭangin message ka dawng nawlh a, Aurora leh an customer pakhat an in tih buai thu hi alo ni a. 

' Bawiha....naktuk zingah football practice I ngaih dawn kha I la mu dawn nange? '  phone ka bih ngur ngur lai chuan ka nu in a rawn ti lut thut a ,rang takin ka phone ka dah nghal a . Ka nu hian routine min siam sak sa vek tawh a zawm ngei ngei tur a nih avangin engtin mah ka chhang lo. 

' Ka mu vat ang ' 

' aw le... Mahse meng rei lutuk suh aw, ka chau riau mai ka lo va mu ange, dawhkanah eitur ka dah a, I ril a ṭam hunah I ti lum mai dawn nia ' min kuah pahin ka lu ah a rawn fawp a, min chhuahsan zui nghal a. 

Ka nu chhuah hnu chuan ka inngaihtuah buai nasa khawp mai, ka ke te chu ka phut sek tawh a kal ka duh rual rual in ka nu in ka chhuak a ni tih a hriat ka duh lo. 

Minute 5 vel ka ṭhut ngawi reng hnu chuan ka ṭhutna aṭang chuan ka tho thut a ,ka nu min hmuh leh hmuh loh lam ka ngaihsak tawh lo... Engpawh thleng dawn se Aurora hmuh a a thlavang hauh ringawt chu ka rilru ah a awm tawh avangin ka jacket ka ha sawk sawk a thawm dim thei ang berin ka chhuak ru ta a. 

Fakna khu hmet ngei ngei ang u aw.... Xo