30 days with Mr. Genius-2

Chapter-2

" Engtin nge a nih theih?  Engtik lai khan nge in in neih? " Trinity chu a chiai nghal vek a kei erawh Certificate en chung hian ka lo nui ver ver thung.

" ka hrelo " ka ti tak na in thla khat lianta a New York a thil thleng kha a ni tih ka ring thiam nghal;  engthil âtthlak dang nge kan tih chiah tih erawh engmah ka hrechhuak zo tawh lo.

" Sebastian nen in in neih hma in thla 3 chauh a awm tawh a, inneih hmain in in ṭhen vat angai ...nilo, hepa hi kan zawn hmuh vat angai "

Trinity a tal buai cheng lai chuan bawp khawkherh meuh in wine ka la in der der a, rilru hah tur ka nih laiin ka hlim veng veng thung.

" C'mon... bengchheng viau teh suh "

" nanghi I rilru a hah ve ngai miah lo em ni? In ṭhenna lehkha in peih fel hman loh chuan Sebastian nen in in neih thei dawn hleinem"

Nia, Rilru hah chu sawiloh engthil mah hi han vei ren run ka nei ngai lo, ka nu leh ka pi te sum ka duh tawkin ka chen thei a ka duh apiang ka nei bawka rilru hahna tur ka nei lo.

"Ka nu, ka pi leh Sebastian ten hrelo se nimai...." chutah Trinity rilru ti hah zual turin " pasal ka nei tawh a pasal dang ka mamawh tawh hleinem " ka tifiam zui zat a,  a ṭap lo chauh.

Sebastian chhungte nen dinner kan ei ho a, kan nu leh ka pi te ho nen an sumdawnna chungchang an sawi khawm nak nak lai chuan kei erawh phone aṭangin Stuart Weitzman pheikhawk tihchhuah thar lei hman tumin ka lo chang ran thung.

" Aurora " a rukin ka nu in min rawn nghawk zeuh a, hetianga chhungkaw chaw eikhawm tih vel hi ka kham hluah hluah.

Ka nu thusawi pawh awih ta lem lo chuan ka kun ngai chuan ka la kun ngar ngar reng a,  ka duh ka neih hma loh chuan engdang mah ka ngaihtuah thei lo.

A khat tawkin ka nu chuan min rawn nghawk sek tawh a, kei lah pek chuan zawi sep hian, " ka zo ṭep " tiin ka lo chhang mai zel a. A tawpah phei chuan a ning ta deuh aniang na zet hian min rawn nghawk sawk a, ka phone chhuatah ka thlauh nghal pawp bawk.

"hreptak chuan" ka ti vin nghal hluk a,  ka han hawi chhuah nak chuan min lo en ṭhap chu niin.

" Ngatinge min en ṭhup reng,  ei leh tawh rawh u" zahzelah ka ti ta ringawt a,  ka mizia hi ka thup lem lova ka ṭawngkam bung deuh hmuk hmuk pawh hi mak an ti tawh lo.

Dinner kan ei zawh veleh thinrim tak chung hian ka car lam ka pan phei hmawk hmawk a, ka pheikhawk chân ve ngat ngat ka lei hman ta lo kha ka la lungawi thei lo.

" Aurora...lo ding teh"

Sebastian chuan min rawn umzui a, ani hi pa hausa , chhelo leh hmelṭha tak a ni a nula ho zingah pawh a tla na khawp mai mahse kei aiin kum 7 laiin a upat vang pawh a ni mahna kan thu a inmil hlei thei ṭhin lo.

" nakinah ka rawn bia ang che " car kawngkhar ka hawn rual chuan a rawn nam khar pawp a, ka lo melh rum ngang mai.

"Tunkar tawp chu khawiah emaw kan zin dawn mi niang ?"

A zam hle tih a awmdan aṭangin a hriat,  hepa hian ti lang lutuk lo mahse min duh tih ka hria mahse atan hian ka rilru vawikhat pawh ka la pe chhin ngai lo,  ka duh zawng chu nuamsa taka ka awm theihna leh ka duh apiang ka neih theihna kha a ni mai .Pasal pawh nei ila ka awmdan hi thlak ka tum lo.

"Khawiah chuan nge zin I duh a? "

 Ngeiawm zet hian ka pan hnai kher a, a awm chul pah hian kan hmui in si lo chiah chiah in ka pawt hniam a che hlek se chuan kan infawp a ni tawh mai.

" zin te chu ka nuam tih zawng tak alawm " zawi te hian ka han ti sa sa a, fawp ta lo chuan car ah ka luhsan daih a. Shades kan vuah te te phawt a, chutah han nuih leh sak pah hian," I kal duhna hmun min rawn hrilh dawn nia" tih leh tlan chhuah ka rual nghal.

_________________________________

"Miss Walton test ah 'D' I hmuh leh chuan college I kal thei lovang " ka zirtirtunu pitar strict zet chuan tlang deuh hian min hrilh a, engahmah ka ngai lem hlei lova.

" Pi Biden college kal hi ka tum ngai reng reng lo" ka lo ti ve hmak.

Tet lai aṭang tawha homeschool char char ka ni a, naupang khirh leh nghal tih takah Pi Biden lo chuan min peihlo san vek tawh . Zirtirtu hi vawi engzat nge kan thlak pawh ka hre tawh lo.

" Aurora "

A ngaihna I awmlo tih melh hian min rawn melh a.

" han ngaihsak leh deuh hlek la College kal thei turin ka pui thei che ania " khunkhan deuh hian min hrilh a,  ka lo nui duh lek chauh.

"Lehkha zir reng pawh hi eng nge a ṭulna , ka duh apiang ka nei thei a engthil dang mah duh belh ka nei tawh lo"

Nakin lawkah pasal ka nei anga chu zawng chu a ni mai nun chu , ho tak a ni.

" ka hrethiam e,  engtik ni ah emaw chuan thil duh ngawi ngawi ila neih ngei ka beisei "  a rawn ti leh a,  a sawi dik thil duh ngawih ngawih hi ka la nei ngai miah lo.

Pi Biden-i a kal hnu ah Trinity chu hmanhmawh takin a rawn tlan lut hlawk hlawk a.

" ka... ka hre tawh " a rawn ti ringawt.

" engchu maw? " ka lo ti hu a.

" Keifer Wu school kalna "

" maw!! "

Ka ṭhutna aṭangin ka ding chhuak zawt a,  ka lawm lutuk hi sawi ngaihna pawh ka hrelo, thil thar neih ai pawhin ka hlim fe zawk.

" Khawiah?  Sawi vat teh " ka vin leh ringawt tawh.

" Horace Mann School ah "

" anih chuan New York a kal turin lo inpeih ang che "

A zan a zanin Los Angeles aṭangin New York lam kan pan nghal a, hepa hian kan inneih chungchang hi hre ve reng reng rawh se. Engpawh chu nise eng rilru pu a lo in register ve ringawt nge kan nih tih hi ngaihdan pawh ka nei lo.

★Horace Mann School,  New York ★

Keifer Wu hmuh beisei in an school kawtah zingkar aṭangin ka nghak ngat ngat a, a changin car chhungah a chang leh pawnah ka tei sek a, mi ka vawikhat nghahna a ni bawka ka thinrim hlur tawh.

"Rawn kal lo na teh " ka inhum ruh a, ka pheikhawk lah a sang bawk nen ka ke hi a mu chum chum thei nia mawle.

" hreptak chuan...hmela mai mai chu " thinrim hlur chungin car chhungah Burger ka ei tuam tuam a, " ka in diet lai a ni asin mawle " tih pahin ka keih belh leh a.

Hmuh ngei ngei ka tum bawka darkar li ka nghah meuh chuan car ṭawng tawh hmel zet a rawn khalh lai chu ka hmu fuh hlauh.

Rang lutuk in car aṭangin ka tlan chhuak nghal a,  a car a park fel lai vel chuan kan inneih certificate keng chung hian ka lo nghak ran a.

A car aṭangin a rawn chhuak chiah tih in ka shades vuah lai chu tlemin kan nawr thla deuh a," Hello " hlim hmel pu sang hian ka lo ti a, mak tih hmel zet hian min rawn en ringawt.

A awmdan aṭang hi chuan min la hria tih a hriat theih.

" Hello... " a ti sup a,  min kal pel hmak a nih chu!!  Kei lah mahni induh tawk ve tak ka lo ni bawk nen sa hlet hlet tak ka ni.

" ding rawh " a din rualin ka shades chu ka nawr chho leh a.

"min hre miah lo em ni? " ka tih pawhin min en ringawt.

" haha... Kei Aurora Walton hi min hre miah lo amaw? " ka nui der vela, I nupui hi min hrelo em ni ka ti ṭep a ni.

" Eng nge hetah I rawn tih? " a tih takah chuan min la hria tih ka nemnghet thei chauh, mahse engvanga induh em em nge maw a nih le keimah zawk hi induh tur zawk ka ni lawm ni?

" ka rawn kal na chhan chu ka pasal rawn hmu turin mawle " ngeiawm zet hian certificate chu a hmuh theih turin ka lek va va a , thil han pehhel kual vak hi ka thiam ve lo.

Certificate a hmuh takah chuan mak tih hmel takin a meng bial deuh kawk a mahse rei a daih lo,  a insiam ṭha leh nghal.

" a lem a nih kha " a in her hmak a,  a kal lehnghal daih! 

" hey!  A lem a nih lo.... Hey!! " ka umzui pawhin a rawn hawi duh ṭhak lo .

Chutah le ka ze diktak a rawn chuak leh ta,  ring leng lawngin midang zawng zawng hriat theih tur hian, " Hubby " ka ti vak a, a thawk chak bawk aniang a ding chawt mai.

" Hubby... " ka ti leh ngat a,  rang lutuk in parking lot lamah min kai phei nghal dawr dawr mai.

" Hubby... Ka ke a na ania, ding rawh "

" khatiang khan min ko tawh suh " awki sang miah silo lungawi lo tih hriat tak si hian a ti a.

" anih chuan duat... He certificate chungchang hi engtin nge kan tih dawn? " ka tih leh chuan a ngaihna awmlo min tih hmel zet hian a han thaw hak a.

"Tunah chuan class ka nei nakinah kan sawi  dawn nia "

" he thil aia pawimawh hi a awm chuang em ni... Duat " runluih nan ka ti leh kher.

Min ning hmel zet hian a sam chu a tuai chho phawk a, tih ngaihna a hre bik vak lo a nih dawn hi.

" anih chuan engthil nge I duh? " a ti ve ta nge nge alawm.

" ka duh maw?  Nangmah "

" fiamthu lo teh " a sana chu a thlek deuh chhen tawh a,  ka mit a ti kham takzet.

"In be lawk ang "

Ni e, kan in ṭhen leh hma in engvanga damdawi pawlh wine kha in nge a nih tih hi hriat ka duh.

" heti hian ti ang,  test ka nei dawn a darkar khat hnuah kan inbe dawn nia"

Ka ṭawng hma hma in a kal lehnghal daih a nih chu!!  Hepa hian engthil nge a hriat a?

" hey... Darkar... "Ka ti chiah a ka sawi zo hman lo ka lam panin car pakhat hi chak zet hian a rawn tlan fua a,  ṭe ṭhawt pahin kawng sirah ka let nghal tawp a min su hman lo hlauh.

" F*ck you " ka ti leh hman hram pek a.

" I ṭha em? " tih pahin tu emaw hian hnehsawh zet hian min rawn pawt tho nghal lawp a,  Keifer Wu lo ni rengin engtin nge helai hmun hi a rawn thlen hman pawh ka hrelo.

" ka...ka kiu leh ka khup a na "

Na tur reng pawh a ni a pilh sen hler hlur mai.

Keifer chuan an school doctor hnenah min hruai ta ringawt a, na tuar ngai lo tih takah na ka ti hlarh hlarh khawp mai mahse na ti hmel angin ka awm duh bik hauh lo.

Doctor in ka khup pilh lai a dressing lai chuan ka bulah Keifer chu a lo ding ve reng a,  a ṭul ang ang in doctor chu alo pui bawm bawk.

" na dang I nei em? "

Doctor a kal hnuah min ngaihtuah hmel tak hian min rawn zawt a,  nuih ver ver pahin ka lu ka lo thing nar nar a.

" a na em? " a rawn ti leh a.

" aih.. " ka ti tak na in na ka ti lutuk hi ka mittui erawh a tling pum tho.

" a nat chuan na ti hreh suh " ka kut chu a rawn la a, ngawi rengin bandaid a bel mawlh mawlh a mit khap miah lovin a che vel chu ka lo en reng a. 

" duat... test I nei sia ngatinge I kal mai loh? "

Test kha a ngaipawimawh hle sia ,engvanga test thulh meuha heta rawn awm nge a nih? 

Hepa vang hian zawhna chhiar sen loh ka in zawt reng zawng chu a nih hi.

" nangmahin I in buaipui thei dawn em ni? " tiin min zawt let hlauh.

" anih chuan ngatinge wine ah khan damdawi an pawlh tih hrereng chungin I in? "

" Restaurant kha an hming chhe dawn a " a ti daih,  keimah lam chu a lang lo hle mai.

"Hemi chungchang hi engmah ka hre tawh lo" tih pahin certificate chu a en a, " ka tih sual ah ngai la ,naktuk ah in ṭhenna lehkha kan buaipui dawn nia "

Kei ang tho in ani pawhin engmah alo hre bik lo a nih dawn hi mahse ka rin aiin a dawngsawng thiam daih mai.

" in ṭhen duh ta lo ila "

Ka thusawi avang chuan ka mit ah tak min rawn melh kalh a,  min chhan hma in Trinity a rawn lut hman; hun lo lutuk ka lo call kher kher a ni.

" Aurora... Eng lai nge na?  Ruh tliak te a awm em? " a rawn phi cheng a, ning hmel zetin ka lo meng kual ralh a.

" naktuk dar 11 ah court ah kan inhmu dawn nia " a ti sup a,  a chhuak nghal a.

" ehe... Court a ti elaw,  In in ṭhen nghal dawn em ni? "

" ngawi rawh,  ngawi chim cham rawh " Trinity chu ka vin vak a, " dawn mai mai lo, Trinity... hetah hian luh ve ka duh " ka la ti ang deuh deuh a,  a ni lah khabe tla lo chauh in a ka hau a.

" maw? Eng nge I sawi awmzia?"

In then chu sawi loh " New York ah ka pem dawn " tih pahin ka nui ver ver a.


(I back hma in fakna kha aw)