30 days with Mr Genius -1

30 days with Mr Genius

By Remruati Haylor

@remruati_haylor

@haylor_r (mizo quotes) 

CHAPTER-1

" Hetiang em em a satel thi ropui leh vuina ropui hi ka la hre ngai lo "

" dik chiah satel mai mai vuina atan chuan a  inseng hnem mah mah lo maw " ka hnunga pitar pahnih in be ru su su lai chu inseh ruh ṭun chungin ka lo ngaithla kar a,  ka beng an ti kham hle.

Ka bul chiah a ṭhu ka ṭhian leh kan awmpui ni bawk Trinity chuan hlauthawng tih hriat takin min rawn en nghal hrek hrek a, a hlauh ang ngeiin ka lo ter leh at tawh.

" hetaṭang hian chhuah tir nghal rawh " thupe takin Trinity chu ka hrilh a, mi zakzum leh ze zawi tih takah a hreh hle tih hai theih a ni lo.

Chutia engmah ti lova a ṭhut reng takah chuan aw vin leh ṭeng zet hian, " Ka hnunga pitar phiangsen te pahnih hi chhuah tir nghal rawh " ka ti nghal tuarh a, mi reh ṭhep ṭhawp lai a ni bawk a, tlar tawp bera ṭhu te pawhin an hre pha.

Security in hmanhmawh takin chumi te pahnih chu a chhuah tir nghal a,ka pi ṭhiante pahnih an ni lehnghal a kamkhat ka tawk leh hlak dawn a nih hi.

Vuina programme a zawh rualin ka room ah ka chho nghal a, rin ang ngeiin ka pi pawh a rawn lang rang khawp mai.

" khang pitar pahnih phiangsen te kha rawn chhan miah suh " ka kutkawr dum awle vun aṭanga siam ngat phelh pah chuan ka lo sawi khalh a,  a thaw nghal halh a.

" Aurora bawihi....Popo-a(satel) vuina ah tal chuan insum ve deuh la, mi zawng zawng in an hnaih ngam tawh loh che hi "

Ni e, ka thinchhe em a min hrechiang tu chuan min hnaih chu sawiloh min hlau ni te hian ka hria.

" an sawi loh tur tur an sawi a nih kha " ka vin let hlar a, ka thinrim tulh tulh bawk.

Popo hi satel mah nise kum10 lai min dampui tawh a, ka ṭhianṭha ber a ni a ka thuruk engkim ka hrilh awmchhun a ni bawk chuvang chuan a ropui thei ang bera thlahliam ka duh a ni.

" engpawh chu nise vuina a rawn kal zawng zawng te khu ka zuk be lumlam ange , pawi ka ti lutuk Popo chhan nan kan theihtawp kan chhuah tawh a , I thiam loh engmah a awm lo" tih leh chhuah a rual nghal a, ka lungngaih ni anih vangte pawh a ni mahna min hau lo ve khiat.

Popo hi nizanah kha chuan a la ṭha viau amaherawhchu zing ka thawh meuh chuan che tur alo awm tawh lo, rang takin Vet-ah kan tlanpui nghal a,  Veterinarian ten theihtawp chhuah mahse an chhan thei tawh lo. Hetiang em em hian ka rilru ala na ngai lo, ka ṭhianṭha ber ka chan ta mai hi hrehawm ka ti takzet.

Ka pi a chhuak chiah tih in Trinity pawh a rawn lut nghal a kei erawh ka closet sawi hat hlawh khawpa lian ah chuan lut nghalin ka thawmhnaw ho chu kan thlek te te phawt a.

" hei hi ka ha duh ang " tih pahin designer lar tak takina ka hak tur bik liau liau a an ṭhui leh design ho chu ka theh thla pawp pawp a ,Trinity chuan a lo chhar nghal zung zung bawk.

" hei pawh,  hei pawh " duhtawk hun ka nei thei dawn lo.

" New York ah ni hnih chauh i cham dawn sia heng zozai hi i ha hman dawn em ni? " Trinity chu rum zetin ka zuk melh a.
" ka mi hmuh tur te hi ka hmelma te vek midang thluak ei ching an ni a, ralthuam tamtawk tak ka mamawh " tih leh kawrdang thehthlak chu ka rual lehnghal a.

" I ṭhiante nen reunion in nei dawn emaw ka tia" tiin a phun zui sap a.

A hming chuan ka ṭhiante chu ni e mahse ka thil neih bak an duh lo,  ka tlin lohna leh ka chetchiatna lai zawng reng reng in an mit an len a ,lo ngai reng mah rawh u ka hming chhiatna khawi emaw tal an rawn sawi chhuak leh ngei ngei ang.

Popo kan vui zo chiah e tilo chuan ka glam team te ho nen ka pi private jet-in New York lam kan pan nghal vang vang a, zanin ah ṭhian ho oh!  ka hmelma te ho nen reunion kan nei anga naktuk leh naktuk tukleh erawh New York fashion week ah ka kal thung ang.

★NEW YORK★

New York ka kal apianga ka thlenna bik Soho Grand Hotel ah chuan thlamuang takin wine in pahin ka inbual a, bathtub-a mut ar ar paha New York khawpui han thlir vel hi a nuam hranpa ve hrim hrim.

Dar 5 a rik meuh chuan a ber nih tumin ka glam team te ho chuan min buaipui ṭan der tawh, a ṭhenin ka make-up, a ṭhenin ka sam  a ṭhenin ka thawmhnaw leh pheikhawk an buaipui a ka kuttin leh ketin thlengin an kutah a awm.

Darkar 5 meuh insiam nan hun ka hman hnu chuan ka hmelma te ho nena dinner ei turin Japanese restaurant Masa ah chuan ka pen lut chhat chhat ,midang erawh an lo awm ṭhap tawh.

" Hi! " ka tih rual chuan min rawn kuah sap sap hlawm a, Billionaire fanu rual inhmu khawm tih takah kan bag, pheikhawk leh incheina avang ringawt pawhin mi en kan hlawh khawp mai.

" min lo hrethiam rawh u ngaihdam dil nan zanin chu ka treat ang che u" ṭhut pahin ka nui har har a, midang pawhin za lo zetin min lo zawm a.

" Guys... Ka ngai tawh lutuk che u" Aubrey'n a tih rual chuan ka mit ka lo chet kual ralh a, kei chauh ka nilo midang pawhin an awih lo lutuka a rukin an nui tet tet hlawm mai.

Mi paruk lek mah ni ila boruak chu a rit in a rukin kan in er ṭham hlawm a,  ka ṭawngkam chhuak aṭang erawh in khawvela ṭhianṭhaber te pawh kan ang hlawm.

Kan thil order a rawn thleng chiah tih in Luna chuan min rawn nuih pah hian, " Aurora I Pa chu parole in engtik ah nge a rawn chhuah ang? " tiin min rawn zawt ta khauh mai!

Kan vai mai chuan kan ngawi nghal ṭhap a,  Everly chuan Luna chu a nghawk ru zeuh bawk.

" I nu ngaihzawng neih chungchang chanchinbu headline-a a in tlar chuai chuai laia ka pa chungchang ilo ngaihven daih chu a lawmawm letling zawk " nui chungin ka ti let ve kher a,  alo haw ngang mai.

" min lo hrethiam lawk teh u " engahmah ngai lo niawm takin washroom lam ka pan nghala amaherawhchu washroom ka luh rual rual chuan thunun theih loh khawpin ka thaw a rawn hah nghal!

Basin dawm chungin thawk kan la kawk kawk a, midangin ka thawm an hriat hlauh takin tui ka herh haw a, ka bag-a inhaler chu la chhuak in kan hip lut nghal kawk kawk a, ka che chhe teuh hle mai.

" hreptak chuan " inhum ruh chungin ka ti sap a, kha nu kha ka chhuah mai mai hauh lovang.

Ka chhungte hi ka chak lohna ka ti lo thei lo, a bik takin ka pa hi kum 7 kalta khan hit and run vangin kum 18 chhung jail tang tura tih a ni a,  ka pa vang hian beihna ka la tawk chhunzawm zel dawn chu a nih hi.

Washroom aṭanga ka chhuah hma in lipstick ka in hnawih leh te te phawt a, darthlalanga in en vang vang chung hian " tuman an tluk lo che" tiin ka in hrilh sep a, engmah thleng lo niawm takin mahni inringtawk tak chungin ka hmelma te hmachhawn tur chuan ka let leh ta nge nge a.

Ka thleng phei ṭep tawh tih in tha chak zet hian ka ban puamah tak a rawn hmer thut a,  ka in rin hma in min pawt her ta sawk mai !!waiter lek lo ni rengin, a â ta emawni?

Rang lutuk tak maiin a kut chu ka thing thla sawk a, engmah sawi lovin melh ram ram chung hian kal kan tum leh zet a mahse min rawn pawt ding leh hram!

" Eng nge maw I hriat le? " vin deuh tak hian ka ti nghal hlar a.

" Phei tawh suh" a rawn ti ringawt.

Teh ringawt a,  a thu lo.

" nangte hi I hna bak bak thawh I tum niin a lang" inti engemaw fahran hian ka sam ka benga zah pah chuan ka han melh a, " min duh a nih chuan min hrilh tawp mai rawh " ka nui zui hak a.

He waiter hmelṭha zet hi ka hma ah hian a lai duh bik ṭhak lo ,tunge maw nia a inhriat le?

Kei Aurora Walton-i hma ah hian a zam chhe miah lo amaw? a mak hle mai.

" Let tawh suh " a rawn ti leh ngat a, chutah zet zawng ka ngaithei ta bik lo ,a kawra a name plate khawih pah chuan a hming chu ka chhiar kher a; a sang ṭha bawka a mit a tak chuan ka melh en kar a.

" Keifer Wu,  I hna chiah ngaihtuah rawh " tih pahin ka kal lui ngat a.

"Zakthei lo lutuk" ka hriat tawk lekin ka phun zui sep a.

Ka ṭhutna ngaia ṭhut leh pah chuan "Sebastian an min rawn bia alawm mawle " tiin dawt ka sawi ta ringawt a mahse an awih ka ring lem lo.

Sebastian hi ka pasal hual a ni a kan inneih hma in thla 4 chiah a awm tawh chutichung chuan tun thlengin inbiak chu sawiloh kan inngaizawng lo hrim hrim.

Kan chhungte avanga innei tur mah ni ila inneih hi kan hnial lem lo a chhan chu kan pahnih tan chuan hnung lama sa barh ang a ni ringawt,kan rochun tur a puitham bawka kan hlawkna tur hlir ani tih kan hre ve kar. Â lo ta ve ve chu tunge hnial duh bik ang.

" Sebastian nen in in neih hunah chuan sawi hat khawpa pui a ni leh ang chu " Vivian chuan min rawn nuih ver ver a,  henu hi chu midang ho lakah chuan a danglam bik tlat min ṭan zawng lo chuan thil a sawi ngai lo.

" Loh theih nang, ka thil tih reng reng sawi hat hlawh khawpa pui a ni zel lo em ni?"

Queen of extra tih takah mi ai bak bak hian ka che a, ka thil tih reng reng mi nawlpui tih aia chuangliam hret zel lo chu ka duh lo.

" Sebastian leh Aurora te tan? " Gianna chuan a wine glass lek kân pah chuan a rawn toast a,  kan vai mai chuan kan wine glass chu kan lek kang ve nghal a.

Wine ka in tur chiah chu nichina waiter bawk khan ka no chu min rawn chhuhsak thut a, ka phu deuh zawk lehnghal.

" nang bawk chu.... khawi!" tih hluk pahin no chu ka han ban zuai a, a lo tlak nghal pawp a ka nui tawi tap mai.

Waiter zaktheilo tak a ni.

Midangin min rawn nuih tet tet takah chuan zahzelah ka hma a eitur chu ka ei ta ringawt a,  min tih mualpho avang hian a châk dawn lo.

A chetdan avang khan complain ka thehlut a, engtin nge an tih dawn ka hrelo ; a vanduai hle mai thil hi midang angin ka palzam ve mai mai ngai tlat lo.

Dinner kan ei zawh hnu lawkah midang chu an haw sap sap hlawm a,  kei erawhin kha waiter zaktheilo zet rawn chhuah hun kha nghakin car ah ka lo châng ran thung.

Ka mi huat tawh nalaileng chu awlsam takin ka chhuah mai mai ngai lo.

" Chupa phiangsen chu ava rawn chhuak har tak" thinrim ṭun chungin ka phun nung nung renga, ka thaw sa lutuk avangin tui ka lem deuh reng bawk, ngatinge mawni dinner kan ei lai aṭang tawh khan ka za cheng a ,ka thaw a sa huam huam mai.

Rei fe ka nghah hnuah ka nghak chhuak thei hram, ka thlantui lah chuan min bual huh zûi tawh a ka thin lah chu a chhe zual em em bawk.

" Hey ! Nangpa kha" chhuk ta mai lo chuan car tukverh aṭang chuan ka va ti kher a,  midang ka ko emaw a ti aniang alo hawikual daih thung.

" nang kha"

Kawk meuhin ka tih leh takah chuan mak tih hmel takin amah leh amah chu a in kawk a,  car-ah rawn lut turin ka mitmei zeuh a.

Ka ṭawng a hre renga amah ka ko tih pawh a hria mahse a thil ken lai in pahin ka car awm lohna lampangah a kal hmak a nih chu!! 

" hmela mai mai chu" car steering hum ngheh sauh pahin ka phun hluk a, ka ko tih hre lo na nâ na chu a hriat theih ngei turin car horn chu ka hmet ri tuarh tuarh a mahse a rawn hawi duh ṭhak lo.Hmalam panin a kal char char.

Thinrim sa tawh nak alaiin hetiang ang mi luhlul lutuk hi ka ngaithei lo zual hle.

"Aurora Walton-i hi ila hrechiang lo anih hi" car accelerator chu ka rap rum vung vung a,  chupa chauh chu ka melh tawh.

" I cho chhuah a nih hi" inseh ruh chungin chak zet hian chupa lam pan chuan ka tlan chhuak nghal fua a, feet hnih vel chiah in kan inhlat tawh tih ah a brake ka rap nghal tuarh a, hriau hmawr tiat vel lekin ka su hman lo; heihi ka tum dan chiah a ni bawk.

Tlanchhe ta mai lo chuan a kutin alo in dang a, a meng phar nasa mai.

Ka su hman lo chiah chiah tih a hriat takah chuan hlau leh mak ti takin min rawn en a, kei lahin lo nuih ver ver chung hian ka kutzung chal in car chhunga rawn lut turin ka signal zeuh a, min runluih ngam ta bik lo a rawn lut ta nge nge a.


"Seat belt hreng rawh " a ṭawng hma in ka lo ti nghal zung zung a, chutah a hren hma hma in ka tlan chhuahpui lehnghal.

Ka duhna hmunah tak mi reh ṭhep ṭhawp na laiah chuan car ka ti ding a, kan tlan chhung zawngin kan inbe lo hrim hrim, accident hlau reng reng in nghet takin a lo invuan ṭai a, ka nuih huk ringawt.

" I sawi duh chu sawi rawh " nelawm loh zet hian min rawn ti ve khanglang.

" ka duh hunah tak ka sawi ang" ka ti let ve ngat.

Ka kawchhung sa hulh hulh thawk chhuah hak pah chuan chiang zet hian ka va melh a,   thil ka sawi tak tak hma in tui kan in leh te te phawt a, ani pawh kei ang chiahin a thlan dup mai.

" khawi.. "

Ka taksa sa lutuk chu a tih ziaawm beiseiin a beer ken lai chu ka chhuhsak a, zakthei lo tih melh in min melh.

" Hna aṭangin min ban tawh a engthil nge ila duh cheu " a ti thum dãt a, a bag a beer can pakhat chu rawn phawrh chhuak leh in a lem nghal khawlh khawlh a, ka lo nuih sen sen a.

" ngaihdam min dil rawh " ngeiawm zet hian ka va melh a, " ngaihdam min la dil lo a ni lawm ni?" ka tih zawm zat a.

"Lawmthu min hrilh phawt rawh " a tih rual chuan ka lo ner sawk a, meng si deuh lap chung hian a vawikhat nan ka mitah tak min rawn en a, mak tak maiin ka lo mur sung sung nia mawle.

" ngaihdam min dil hma loh chuan he car aṭang hian I chhuak dawn lo" buh deuh hian ka ti lung lung a, beer tlemte chauh ka in sia ka rui der mai.

★ 2:30 pm ★

" Aurora, I rawn harh tawh em ni? "

ṭawng ri ka hriat chuan ka meng siar siar a ,Vivian hmel ka hmuh rual chuan "F*ck " tih ṭhawt pahin ka ṭhu chhuak nghal zawt bawk.

" zing kar kar ah I hmel tehhrep hi ka hmu peih lo" ka lu chu ka dawm vang vang a, a puak keh mai dawn te hian ka hria.

" tlai dar 2:30 a ri tawh, I rawn harh chhuak tawh dawn lo emaw ka ti hman alawm" mak ti takin ka meng nghal kawk a, sana ka en chuan dawt a sawi lo tih pawh ka hria.

" chhuak rawh,  khawiah nge Trinity a awm? " ka ti khur khur a, thawhhlim mood fuh loh nen Vivian hmel hmuh hi ka kham hluah hluah.

" hetahi ka awm, kha hei hi ei rawh " Trinity chuan damdawi tui hi min rawn pe ringawt.

" Engvangin maw? "

" nizanah khan I rui sia, zaninah New York fashion week ah I kal dawn lehnghal"

" Engmaw?  ruih ah min puh ringawt suh" ka lo ti vin hlar a,  rui khawpin zu ka in ngai tlat lo.

" anih I ruih loh chuan nizana I awmdan hriat ila nei em? " a rawn ti ta mai,  ngawi vung vung meuha ka inngaihtuah ngial pawhin engmah ka hrechhuak zo tawh lo.

" nilo, engthil nge thleng?  Engmah ka hrechhuak zo tawh lo" hlauthawng takin Trinity chu ka melh a,  ani pawhin tih ngaihna a hre bik lo.

" Aurora, pawi ka ti lutuk mahse Luna'in I wine leh thil eitur ah khan damdawi a pawlh alawm " Vivian chu inthiamlo tih hriat takin a kun lap a.

" maw!!  Chu chu engvanga tuna min hrilh chauh nge I nih?"

Khum aṭang chuan ka tho chhuak hluai a, Luna hi ka chhuah dawn hauh lo.

" nilo, nilo.... Ka hrilh che tih a hriat chuan keima tan a pawi dawn lutuk, Aurora eng thil mah tih suh " Vivian chuan min dan a tum a.

" I chunga a thil tih tur leh tur loh ka pawisa lo" ka lo ti hmak.

Luna hian ka hmingchhiat a duh avanga hetiang thil hi ti ani tih ka hria.

" khawngaihin... Engthil âtthlak mah ti suh, kawng dang a awm mai ang" ka kut vuan meuh in min ngen takah chuan a kut paih pawp pahin Vivian chu ka en vang vang a.

" khawngaih in " a rawn ti leh sap a.

"Kha thil avang khan waiter pakhat.... " ka sawi zo hman lo thil hriatchhuah thut ka nei!

Kha waiter khan Luna in ka chaw leh wine-a damdawi a pawlh lai vel  kha alo hmu ani mai lo maw, khatianga a chet ngawt nachhan tur kha a awmlo;  anih chuan ka in ai zawng zawng a in vek tihna mahse ka mawl vangin chaw kha chu ka ei ta tho a.

" ni... Nizanah khan mipa pakhat hmuh in nei em? Ka sawi awmzia chu ka bulah?" an pahnih chuan an lu an thing nar nar a.

Nizanah khan kan inhmu ngei a mahse car a ka phurh hnu khan engtin nge kan awm zel tih erawh engmah ka hrechhuak zo tawh lo.

" hreptak chuan "

Ka sam ka tuai phawk a,  nizanah khan ka taksa tih daih nan beer kha ka lo in kher kher a ni, engpawh chu nise khapa kha hmuh leh ngei ngei ka duh, ani pawh ka awm ang hian a awm ve ngei ang.

★ 1 month later ★

" Aurora... Hei I lehkha tur a lo thleng" Trinity chuan dawhkanah lehkhathawn ho chu a dah hnur a.

" thuthar hriat belh I nei tawh em? " tiin ka lo zawt daih thung.

" Keifer Wu kha maw?  Aih,  restaurant aṭang khan an ban ta daih sia a chanchin chhui zui tur a awm lo...hei zanina I kawr hak tur aw...." tih pahin ka lehkha dawn ho chu en turin a la nghal a.

" Eng nge maw tal I hriat hma chu lo ngaihven chhunzawm zel ang che" thupe takin ka ti a wine ka lem zui sek bawk.

" hepa ringawt hi thla that chhung I buaipui tawh a,  tu chiah nge maw a nih le? " Trinity takngial pawhin mak a ti, kei ngei pawh hian ka rilru aṭanga ka paih bo thei lo hi mak ka in ti .

" hahh...mi bik a ni" ka nui zui hak a.

Hepa anga mi rilru thianghlim leh ṭha hi ka la hre ngai lo, a hmelhriat pawh ka ni lova ka thil in tur min in sak thei kha ka ngaihtuah chian pauh leh mak ka ti.

" khapa kha... " ka ti chiah a,  Trinity chu a rawn ṭe thut a,ka thil in lai ka phuh chhuak teuh lutuk.

" Fu*k... I mawl em ni? " ka vin let hrep a, engahmah a ngai lo a lehkha ken lai chu mak ti takin a en ngur ngur ringawt.

" Aurora... Keifer nen in in nei" a ti chhuak hlawl a, phawk fe hian min rawn en a.

" maw? " tih leh a lehkha ken lai chu pawhthlak ka rual a.

Kan en chian nak chuan Keifer Wu nen kan innei ngei a ni tih kan in register na certificate chu lo ni rengin!! 

A awmzia chu dan ang thlapin ka innei tihna!! 


(Fakna khu hmet theuh ang u aw...xoxo)