Rainer Black -54 by Remruati Bawitlung (Haylor)

CHAPTER -54

"You watch me bleed until I can't breath"

Engang pawhin hmuh loh der duh mah ila ka hmu tih a hriat tawh miau avangin pangngai taka awm chu ka tum hram hram a, ka sam a tawi mât tawh vang nge ni mak ti hmel te pawh a pu.

Rainer lak aṭanga tlan chhiat daih chi a ni tawh bawk si lo, hmachhawn mai a ngaih tawh avangin amah melh kân hmak pahin ka kalpel ve sak a en pawn en zui lovin hma lam ka pan char char.

" Hey... Hey.... nangni pahnih hi eng nge awmzia? " Chelsea chuan chik zeta min rawn en pahin min rawn pawt ding nghal.

" Ni e... Rainer kha i pehhel a ni lawm ni? " Kaitlyn pawhin alo ti ve bawk.

" Khapa hming kha vawikhat pawh hriat leh ka duh tawh lo "

Ka sawi zawng ringawt pawh hian ka thin a rim nghal ṭun thei, hepa hi ka theihchhung chu ka pehhel ang.

" Engvangin? " mak tih hmel takin an rawn ti rual nghal ṭhawt .

" Kan inkarah engmah a awm tawh lo "

" Han sawi chiang vat teh " Chelsea in min lo nawr leh tet tet tawh.

Ka ṭhian te pahnih chu engkim Rainer min tih dan te ,nizana thil thleng zawng zawng te leh ka û in min man chhuah dan te chu ka hrilh nghal vek a, mahni in ka pai rei bawka ka thaw nghal huai mai.

" Enga!! chupa mai mai chu! "

Chelsea thinrim lutuk chu a in hum ruh nghal a, mi ngei hi a pe pa thei bawka engmah ti thei lo mahse a melh rum leh ngawt ang chu.

"A ni lo pawh midang an tam emai " Kaitlyn takngial pawhin min hnem leh tawh, engvanga hnem ngai bik ziah nge maw ka nih le? 

" Sawi tawh suh u... tunah chuan keimah chauh a awm ka duh "

Ka ṭhiante bulah awm mah ila Rainer ka hriatchhuah zel tho avangin rilru lak penna tur ka duh.

" Ngai lo...phuba kan la ve ang, aw.... " min khawngaih hmel takin Chelsea chuan min rawn kuah nghal vawng vawng a, ṭah duh lo hle mah ila ka mittui a tling nghal pum mai.

" Chelsea ...." Kaitlyn chuan Chelsea chu a va mitmei zeuh a, " Sadie ni e...va in ti thawveng rawh, mahse i kiangah i ṭhiante hi kan awm reng a ni tih theihnghilh suh ang che " ka dinhmun min hriatthiam pui avangin alo ti nghal zung zung a, Chelsea pawhin a hnial lem lo.

" Class leh ah kan inhmu dawn nia... mahse i kal hma in... " Chelsea chuan ka sam tawi bawk si, thur bim bem chu min rawn tuai man sak thuak thuak a, "Khapa kha melh pawh melh tawh suh ang che .... he khawvel ah hian awm ve lo angin ngai hmak ang che " min fuih lai chuan ka lo bu nghat nghat a, Chelsea thusawi mah nise ka zawm ngei angai.

Kalna tur ber pawh hre lova hma lam ka pan chhat chhat lai chuan Nikki in 'Once you go Black you'll never go back ' a tih lai te kha ka hrechhuak vawng vawng a, khatih hun lai khan engah mah ngai lo mahila tunah hian alo dik zia ka hre chho telh telh!!

A hma ai zawngin zûn alo ngah zia leh kalsan alo harsat zia ka hrechhuak a, thil tamtak kan lo tih dun tawh avangin ka nun ngaiah ka let leh thei angem tih pawh ka hre lo, second tin mai hian amah vangin ka thinlung hi a na ngawih ngawih reng a , hetiang anga tawrh reng mai hi hrehawm ka ti takzet.

Mahni leh mahni intih buai hram hram tumin Chemistry laboratory ah chuan experiment tiin ka vei kual chhen a , Chemistry genius kan tih mai en mai pawha chut tih hriat nghal em em Peter pawhin ka awmdan avang chuan min en tawp.

" Sadie i ṭha maw? " a tawp a tawpah min rawn zawt ta nge nge.

"Ka rilru ah hian thil pakhat chiah a awm a chu chu ka paihchhuak thei thlawt lo " vei tawn sek pah chuan ka ti a, ka thusawi chu a hriatthiam loh hmel kher mai .

" umm.... thil kan va ei phawt dawn em ni? " a tih takah chuan min puih theih mial takin tiin thawk chhuah hak pah hian ka lo aw nghal.

Peter hi chu a chut hmel tawh nak alaiin brace leh tarmit lianpui a vuah lehnghala midang chhaih leh hmusit pawh a hlawh phah fo reng a ni.

Peter nen chuan thil ei turin Cafeteria ah chuan ka inzui lut hnak hnak a, inbe miah lova eitur kan ei lai chuan Peter chuan," I awm a nuam deuh tawh em? " a rawn ti sup a, a hmel en mai hi chuan min ngaihtuah ve tak tak in ka hria.

" Ka...ka hrelo"

Ni e,  tunah pawh hian Rainer lo chu thil dang ngaihtuah ka nei meuh lo, a inchhir lo a ni tih hriat tak maia min melh dan te kha ka mithla ah a cham renga, ka thil ei pawh hi a tui thei lo.

" Professor te hian min nawr nasa leh lutuk a...mahse rilru tih hah nan hmang duh suh, ka pui ang che" ka hnung zangah chuan a rawn beng thak thak a, buk nghat pahin a darah chuan ka bei nghal hle hle bawk.

Tunah tak hian kuah emaw hetianga dara bei hle hle na tur hi ka mamawh ber. Theih phei se chuan ṭah nghal hawm hawm ka chak.Mahse ka ṭap a nih vaih chuan Peter mangang lutuk hian min hnaih duh tawh loh phah hial ang.

Chutia thil ei pawh ngaihsak lek lova inhnem na tur ka lo zawn lai chuan Carter rawn lut lai chu ka hmu ta thut mai!!  chutah amah chauh a ni lo tih ka hriat chuan Rainer a tel ve ka ring nghal bur.

Nilo..... hemi te ho hi ka tlanchhiat san vat a ngai, ka hmachhawn a nih vaih chuan ka insum zo lo hi ka ṭap chhuak mai ang tih ka hlau.

Engvanga helai hmun kher kher a rawn kal teh thut nge maw an nih le? 

" Peter washroom a kal ka ngai " tih leh thawh ka rual nghal, a ni pawh chuan min hriatthiam hmel takin ka kalna tur kawng chu min lo kian nghal vata, engmah min zawt zui lem lo.

Minute 5 dawn washroom kawngka bula ka ding vung vung hnu chuan ka inngaihtuah nasa bawka, inhum ruh vut chungin ka huaisen ta thut emaw tih mai tur hian, " Engvanga biru bik reng nge maw ka nih le? " ka ti chhuak hlawl .

Kei hi thil tisual tu zawk ka ni reng reng lo, kha mi tenawmpa kha biru tur zawk a ni asin .

Ka sa nghal phat, thinrim tak chungin washroom aṭang chuan ka chhuak ta nge nge a mahse ka thil tih hi thil dik a ni em tih erawh ka hrelo a chhanchu Rainer hmachhawn tur hian huaisenna ka nei hlawl lo.

A ngai te bawkin Rainer te ṭhianho an rawn luh tak hnu hian boruak chu a ni nghal huk a, a bengchheng sawt hle bawk chutah vanneihthlak lutuk in Rainer a awm lo hlauh lehnghal! huizzz...

" Peter.... ka rei em?"

Nui lui sang chunga ka let leh nak chuan Peter chu a lo awm tawh hauh lo, mahse bang darthlalang vek a nih avangin pawn ah hmanhmawh taka a kal hlawk hlawk lai erawh ka va hmu hman thung.

Chair a ka bag let bal chu la in rang takin Peter chu ka um zui ve nghal hlawk hlawk a mahse pawn ka thlen meuh chuan ka hmu hman tawh lo.

" Sadie... "

Mipa aw ka hriat avangin ka hawi let zawk a, Shane an min lo um zui reng chu niin! min hmu lo mahse pawi ka ti lo asin.

"pawi ka ti lutuk... ka nau in Rainer chunga a thil tih avang khan "

Hahh!!  Carla kha Shane farnu maw lo ni a! Rainer leh Carla te hi hun rei tak aṭanga lo in hre tawh an ni tih ka hriat hnu phei hi chuan a hma aiin ka na zual zawk.

" Chu chu ka hnenah sawi suh " ka lo ti bah nuai ringawt, engpawh min hrilh mahse a tlai tawh lutuk engmah siam ṭhat theih a ni tawh lo.

" An inkarah engmah a awm lo ania"

Confi lutuk a a sawi ngam chu mak ka ti zawk,tak tak nise ka ti takzet bawk mahse an inkar ah enge maw awm lo se engvangin nge Rainer khan a fawh!!... urghhh engmah hi ka awih tawh dawn lo bum in ka awm nawn tawh dawn bik lo.

" Shane....an inkarah thil lo awm pawh nise eng nge pawi, an chungchang hi ka lo buaipui tur a ni love "

Nui lui sak mah ila ka mittui chu a tling nghal pum a ,Shane an thil dang a sawi leh hma chuan ka inher daih a amah hnungchawng zawngin hma lam pan chuan ka kal nghal nal nal a, min koh ri pawh hre reng mah ila ka hawi let duh tawh lo.

Ka û tih lawm nan hrim hrim nidang zawng aia hma ah chuan ka haw a, inah ka luh phei chuan ka û chang nilo in a ṭhiante ho pawh chuan mak an lo ti hle nghe nghe.

" Sadie min rawn zawm ve nghal rawh " Kendra chuan a lo ti nghal var a, ka û mitmei veng ru ran chung chuan ,"khawiah ?" ka lo ti nghal .

" pawnah sawn pool party kan nei a ....kan ṭan deuh chiah "

Ka û in va zawm ve a phal nge phal lo tiin ka va melh hrak a ,a hmelah phallo hmel a put tak loh avang chuan ," ka han inthlak ange " tiin ka chhang let a.

Nimin aṭang khan thil mumal ka ei loh bakah ka mut mang loh avangin dark circle ka nei kulh tawh a, chau hle mah ila ka û in min rin leh theih nan chuan a bula awm tam hram hram ka ngai .

Ka tui chenna bra chu ka ha a hnuai lamah erawh kekawr bul mawng khuh chang chang ka ha thung .

Pawn ka chhuah meuh chuan ka putea chuan eng eng emaw ni hi a lo hem vut vut a (BBQ),ka û te ṭhian ho mai piah lamah an bialnu te niawm tak tak pawh an awm nual .A ṭhen tui an cheng a, a ṭhen an lam thul mahse family party anih vang nge rui buai tih vel an awm lo thung.

"Sadie kha heihi ei rawh "

 Nu Madilyn chuan a lo ti nghal zung zung a mahse engmah ei chak ka neih loh avangin ka ei ta lem lo.

Ka thil tih engmah a tui loh avangin putea eitur siamna bulah chuan ka lo ṭhu ngawi renga, ka rilru aṭangin Rainer hi ka paih bo theih thlawt lo chu a nih hi.

" Bawihte nuam i ti lo em ni? "

Ka û aw ka hriat chuan ka phu deuh zawk mai, nidang chu nise mak ka ti lo ang mahse a chungah khatiang thil ka tih hnuah pawh min haw miah lo a ni tih ka hriat hian ka hlim takzet mahse a hma ang erawh kha chuan min ring mai mai tawh dawn lo tih erawh ka hre kar.

"ai.... nuam ka ti lutuk "

"hla saw i ning em ni?  ka va off tir ange"

" nilo... angai lo, û... " ka lawm em avangin ka kuah nghal vawng vawng a.
" ka tihpalh " ka ti zui sap bawk.

" keipawh.... ka rawn thlen har em avang khan ka tihpalh "

Ka û nen kan inkar a ṭhat leh takah chuan ka thaw deuh huai mai, unau tih takah kan in tibuai rei thei meuh lo chu a nih hi amaherawhchu ti lang lo mahse a rilru erawh ala dam tak tak lo.

Chhuanlam eng eng emaw siamin ka room lam ka pan thei hram, thil ka ei loh luatah ka pum a nat phah lehnghal, ka pum na a reh takin tiin apple chu ka ei chho niap niap bawk a mahse ka kâ a tui loh em avangin tam pawh ka ei lo.

★6 am ★

Zan ka mut ṭhat theih loh avangin hma takah ka harh a, ka tho mai peih loh hnuah dar6 ah chuan ka tho chhuak ta nge nge a , ka pum bawk chu a rawn na leh tawh.

Inphih fai hmasa lovin inhnuai ah thil eitur in ka chhuk thla chhat chhat a mahse engmah eichak ka neih loh avangin fridge a cake chu a hming lekin ka ei a, ei tam lo mah ila puar angin ka in hre tho.

A hma aiin Braydon a strict tawh bawka college thleng chu min thlah thlap a, hna thawh tur a neih avangin a let leh nghal vat bawk.

" Peter.... "

 Laboratory ah Peter a awm ringin ka lut tlang nghal mahse ka koh rual rual chuan a thil tih lai dah in Peter chu tlanchhiat a tum ta mai!!

" engthil nge maw i hriat le? " tih pahin a tlanchhuak tur chu ka va dang nghal, a hlauthawng bakah a thau bawk nen a thlantui in a bual huh hluam mai.

" Sadie...engtin mah min ti suh, khawngaihin min kal tir rawh "

 a hlauthawng a ni tih hai rual a ni lo... nilo kei hi min hlau a ni zawk mah, chutah ṭah a tum ta mai a awmdan avang chuan sawi mai tur pawh ka hre lo.

" Engtin nge ka tih ngawt ang che? "

" Min kaltir rawh " ngen tak meuh in min ngen tawh.

" Thil awmzia i sawi phawt loh chuan i kal lovang "

A hma aiin kan inti hlauhawm lui a, hetianga ka tih loh chuan engmah a sawi dawn lo.

" Sawi rawh " ka ti vin leh hlar a.

"Rainer leh a ṭhian ten hnaih tawh lo tur che in min ti alawm... ka hnaih leh che a nih chuan min sawisa dawn a ni "

" Enga!! "

Rainer leh a ṭhiante maw!!  mahse he thil hi engvangin nge an tih.

" Sadie.... khawngaihin ka bulah awm tawh suh, min kalsan rawh "

A hlauthawng lutuk hmel ka hmuh hian a ti der thei lo hrim hrim chubakah hemi te ho hi engkim ka zawh fiah vek angai,an lo ti tak tak a nih chuan ka ngawi mai mai bik dawn lo .

Ka thinrim bawk nen Peter ka khawngaih bawk nen inseh ruh ṭun chung chuan Rainer te ṭhian ho hmu tur chuan ka kal nghal vang vang a, an ṭhianho ka tih tawh kha Rainer erawh hmuh ka tum hauh lo.

Chutia khua pawh hmu lova ka kal hlawk hlawk lai chuan Nolan a rawn lang hlawl mai mahse tih tur dang ka neih avangin hmu lo ang maiin ka kalsan nghal.

" Sadie.... khawiah nge i kal dawn classroom chu helam pang hi alawm " tih leh min rawn zui a rual a.

"Hemi te ho hi ka nun aṭangin bo se ka duh " ka lo ti hmuk hmuk ringawt.

" Rainer maw? " min rawn umzui zel chung chuan a rawn ti a, a ring dik nghal chat bawk.

Chhang lovin Rainer te ṭhianho awmna ṭhin lam chu ka pan zela mahse tum loh deuh maiin room kawngka bulah Carla in Rainer hnung lam aṭanga a kuah chawt chawt lai tak chu ka va hmu ta thut mai!! 

Pen leh turin chakna ka nei tawh lo, men phawk nghal kawk pahin Nolan nen chuan kan ding nghal chawt bawk.

An awmdan chu chet nachang pawh hre lovin ka en reng a , ka thin zawn mai pawh nilo ka awm vel zawng zawng hi a na in a rawn tawt nghal up up a ,thawk a harsa in ka thinlung hi tham nawk nawk ang mai hian a rawn na nghal ut ut bawk .

" Sadie kal ang "

Nolan'n tih vin hluk pahin min rawn hmuh hma chuan min pawt let nghal dawr dawr a , naupang chhia ang maiin melh ngai melh ngur ngur pah ka zui zel tawp.

Mi awm lohna lai kan thlen chuan min kaihna chu phelh in min ngaihtuah tih hriat tak hian min rawn kuah nghal vawng vawng a mahse ka lo inla hrang nghal vat thung .

"Engtin mah ka awm lo min ngaihtuah suh " khik luih sak pahin ka lo ti hul hak a mahse Nolan ngaihdan a nih loh hmel ngang mai .

" ṭap rawh.... i rilru a nat chuan ṭap mai ta che ngatinge paukhauh tak anga lan i tum reng " min tih khum zek a, mahse rilru na lo ang maiin hian ka lo nuih liam mai mai ringawt .

" Sadie.... i lungngai hmel hi hmuh leh ka duh tawh lo tun aṭang chuan duh lo mah la i kiangah ka awm reng tawh ang " tih vin hlar pah chuan kal daih a tum a mahse ka ko hman.

" Nolan... " a ding nghal chawt a.

"minute khat chiah ka mittui hi ka ti tla thei angem?"

 ka tawt em avangin ka dil ta ringawt a, ka ṭah a chhuak a ni tih a hriat avangin ngawi rengin bang ngheng in a ding nghal a, kei erawh bang phenah ka ding daih thung.

Tah pawh ka duh lo,ka hmui pet fan fan chung chuan ka mittui chu a rawn luang nghal zung zung a, Nolan an ka thawm a hriat ka hlauh avangin ka kâ ka hup tlat bawk .

Carla leh Rainer te awmdun lai ka mitthla apiangin ka awm chu a rawn tawt zual sauh a, hetiang anga awm hi duh lo hle mah ila ka mittui a tla zel bawk si. Hetiang anga chak lo taka ka awm hian ka in haw takzet.
______________________________________________

★1 week later★

Kar khat chhung ngawt thil ka ei mumal tawh loh mai bakah ka mut ṭhat theih loh avangin ka hmelah a rawn lang chhuak ṭan tawh a, engang pawhin rilru na lo angin awm tum teh mah ila Rainer leh Amira chu sawi loh Carla nen pawh ka hmuh tel zeuh zeuh reng avangin ka pangngai thei meuh lo

(Chhiar zawh veleh fakna khu aw...)