Rainer Black-53 by Remruati Bawitlung (Haylor)

CHAPTER -53

"The love I want, I only found it in you. 

No other one, could ever make me laugh and cry like you do"

Chutia mi â ang maia ka din khawng reng lai chuan Shane chuan Carla chu va pawt hrang nghal in a kal chhuahpui nghal dawr dawr a, Rainer lah chuan ngeiawm zeta min rawn melh pah hian la fawh leh chak hmel zetin a hmui a han khawih leh kher bawk a chu chuan ka thinlung hi na taka vih sawk sawk ang mai hian a rawn ti na nghal zawk zawk bawk.

"In inkarah engmah a awm lo tih min hrilh rawh "

Chu zawhna chauh chu ka rilru ah a awm tawh, chu pawh chu khur der der chungin ka sawi chhuak thei ṭawk ṭawk chauh.

" mawh? " min chhan duh loh avangin ka nawr lui leh ngat.

" I hmuh ang kha a ni mai " a ti duh chauh mahse ka chhanna duh tak min la pek loh avangin kal mai ka tum bik lo.

" Maw?  khatiang thil kha engtin nge ka chungah i tih theih zawk mawh... engvangin nge min rinawm loh san theih zawk ?" ka thinrim em avangin ka mittui pawh a tla thei lo,ka in hum ruh ngawt ngawt ringawt.

" Rinawm loh san a?!!!.... hahh... kan inkarah engmah a awm loh laiin ka rinawm loh san che maw ?"

Ngeiawm zet hian min rawn nuih vela, a nui hmel ka hmuh phei hi chuan a hmaia ben nghal chawrh mai ka duh.

" Eng.... eng nge i sawi awmzia, khang... khang kan hun hman zawng zawng te kha... " inseh ruh ṭeuh chung hian ka ti hul hak a.

"I lo la serious a nih chuan pawi ka ti lutuk... mahse ka tan chuan intih hlimna mai chauh a ni " tih pahin min hnungchhawn zawng hian a ding nghal daih a, " hun khawhral nan " a tih chhunzawm sup bawk.

Rainer chuan timna leh hrehawm tihna nei hauh lo in min hrilh ta piap piap mai!! ka awm na ut ut mai te leh ka kawchhung tawt up up mai te chu ṭah chhuah hawm hawm chak hle mah ila ka la insum ve ṭang ṭang, awlsam taka ṭah mai mai ka tum bik lo.

"A nih chuan ka mit a en chungin min hrilh nawn leh rawh "

Pawm har ka tih em avangin ka la ti lui ve ṭang ṭang ,amaherawhchu ka mit hmuh lai ngeiin hmeichhe dang a fawp tawh a ,a laka beiseina ka lo neih ve te pawh kha second tin in a bo tial tial.

"Ka mit hmuh ah rawn in lan leh tawh suh ang che.... nang ang hmeichhia mipa kawp kual ching leh party hrat lutuk hi ka kham hluah hluah "

Min hnungchhawn zawngin sawi mahse hei zet zawng na ka ti in a sawi leh tur lo dawngsawng tur pawhin chakna ka nei tawh lo.

" ka haw lutuk che " tih sup pahin rang takin room aṭang chuan ka tlan chhuak nghal hlawk hlawk a, khang kan hun lo hman dun ve zawng zawng te leh ka rilru ka lo pek ve na zawng zawng te kha engmah alo ngai miah lo tih ka hriat hian pawm har ka ti in tawrh har ka ti takzet.

Ka ṭhianten Rainer hnaih lo tura min tih lai te kha ka hrechhuak leh hnuhnawh , tun hun hi a thleng dawn ani tih hi lo hre lawk ila ṭha tur, hetiang em em hian ka rilru a ti na lo tur .

Music ri hut hut karah pawh Rainer an, ' min rawn hmu leh tawh suh ang che' a tih ri chauh chu ka bengah a ri nawn tluk tluk reng a, engang pawhin ka beng hup in tih bo han tum teh mah ila chiang takin ka hre zel lo.

"Tawp rawh.... khawngaihin tawp rawh " au vak vak mah ila tumah in an hre lova min ngaihsak bawk hek lo.

Rainer aw ka hriat reng avangin a reh mial takin tiin ka bul lawka beer chu ka han tlak nghal pawp a, ka pum alo ruak bawk nen a sa nghal ham ham bawk.

" Party ching... " nuih suk pahin no khat dang chu vawikhat ah ka han tlak lehnghal pap a, ka rilru lakpen tum engang mah ila ka harh telh telh zawkin ka hria.

No li ka in meuh chuan ka dose alo hniam ve bawk nen ka rui tawh hle amaherawhchu ka rilru a harh kur reng avangin in belh zel ka duh.

Ka zun a chhuah em avangin haw hma in bathroom ah ka kal leh te te phawt a, bathroom lehzel pawh a lun in hmeichhia an lo awm khawm luih luih mai!

" Hey.... I mit chu, i rilru a na em ni? "

Ka zung zo ekin aṭanga ka chhuah rual chuan hmeichhe pakhat inhnawih dum fahran hian cigrattee zuk pawt pawt pah hian a rawn ti a, midang ho erawh eng eng emaw tiin an lo buai hle thung.

"chutiang deuh chu " ka lo ti ringawt ,ka ṭap bawk si lova engtin nge ka rilru a na tih ka mitmeng aṭangin a hriat theih?

"I rui thei meuh nange no tamtak i in hnu ah pawh ..."

Henu hian ka awmdan hi a hrechiang takzet, a hma in hetiang ang hian alo awm tawh tih a hriat reng.

" umm.... " kal ṭha hleithei tawh lo mah ila harhfim ang tlatin ka inhria ka tih tawh kha.

" Engmah hre lova awm hmak i duh em?  ka sawi awmzia chu zanin atan chauh " a rawn tih takah chuan ka beng a verh nghal zar, ka duh chiang alawm zanin chauh chu Rainer theihnghilh vek khawpa awm ka duh.

Mahse ka hmelhriat ngai pawh nilo hian engvanga min lo duhsak ve ringawt nge a nih?

"Kha heihi hip rawh... mahse ka tilui lo ang che " tih pahin basin bula powder var phut tam vak tawh lo chu min kawh hmuh a, eng nge a nih pawh ka hrechiang hle.

" Drugs maw? " nidang ang lo takin mak ka ti teh vak lo, ka lo nuih liam mai mai ringawt.

Rainer theihnghilh tur chuan ka la harhfim hle mahse ka chhia leh ṭha hriatna hmang tur erawh chuan ka rui tawh mah mah, engmah pawisak ka nei tawh lo ti ila ka sawisual lovang, ka û takngial pawh ka ngaihtuah thleng pha tawh lo.

" aw mahse ,Cocaine a ni lo a nia ....hetiang hi chu a hlauhawm ve loh ,nuam i ti veng veng mai ang "

Hahh...a fak thiam kher mai ,drugs hmansual hi hlauhawm loh a awm dawn em ni ? mahse nuam tih veng veng chu ka duh alawm .

" aw le... "

Nuih sek pahin hmeichhe pakhat tih dan ang chuan hrehna nei miah lovin ka hnarin ka han hip lut nghal kawk a, Rainer ka theihnghilh na tur a nih avangin inchhirna ka nei lo reng reng.

Ka thluak chawmawlh vek leh buai chhu mai chu nuam ka tiin min ti phur em em mai lehnghal a, lam hut hut  ho karah te chuan engmah pawh hre mumal lovin ka va bu ve nghawng nghawng ringawt.

__________________________________________

★9:30 am★ 

Ka lu na lutuk rit bur mai leh tui hal huam huam mai chuan min ti harh ta nge nge a, meng tur ringawt pawhin ka mit te hi a kham erh urh mai.

Ham bai bai paha ka tal ṭalh ṭalh rual chuan Nolan hian min rawn ko thut ringawt!!  nilo... ka hresual em ni?

" Sadie... na i nei em? " ka khum tlanga ṭhut pah chuan a rawn ti leh a, Ka mumang nilo in a tak ngei a ni tih ka hriat rual chuan ka meng phawk nghal kawk ringawt.

"Engthil nge thleng ?"

Thut chhuah pahin ka lo zawt hu a, ka lu na lutuk mai te chu ka dawm nghal vang vang bawk .

Nizana zu ka in dan te leh drugs ka tih dan te chu ka hrechhuak nghal uai uai a mahse powder ka hnara ka hip luh hnu lam erawh engmah ka hrechhuak thei tawh lo.

Chutah ka ṭhut chhuah rual chuan khum mawnga Braydon  lo ṭhu kun lap lai chu ka zuk hmu thut lehnghal a, ka phu chiang kher mai!!

Nilo... Braydon an party na ah ka kal tih kha hrechhuak lo hram rawh se ,khawngaihin...

"Braydon " ka zuk koh rual chuan a tho nghal hmak , en pawh min en lovin room aṭangin a chhuak nghal nal nal bawk.

Braydon khan engang pawh in thup tum mahse a mit sen ram mai aṭang khan a ṭap a ni tih ka hrenghal. Engthil nge maw ka tih tak hi?  urghh.... tunah pawh hian ka la ni deuh chhû mai.

" Nolan ka û khan engmah a hrelo tiraw? " ka zawh rual chuan a lo kun nghal lap a.

" Sadie.... nizanah i û nen party na hmun aṭang khan kan rawn hruai haw che tih i hre tawh miah lo em ni.... nangmah ngeiin ṭap chungin min rawn call kha "

" Enga? "

Keiman ka va call maw?  Lalpa leh!!  engmah ka hrechhuak zo tawh lo.

"Zankhua in ilo harh hun nghakin i û kha a tlaivar ṭhak asin... Ngatinge khatiang khan i awm?  Rainer nen in in hmu em ni? "

" Nolan khapa hming kha ka bulah sawi tawh suh... engpawh chu nise ka û hnenah ngaihdam dil ka ngai "

Ka û hriat loh in party na ah ka kal ru a, chutah ka chatthla hmak lehnghal ,thinrim khum lovin ka û hnenah ngaihdam dil vat ka ngai.

" Ka û hian min biak duh i ring em? " ka hlauhthawn deuh avangin ka zawt ta ringawt.

"Umm... va in phih fai phawt rawh,inhnuaiah ka lo nghak ang che "

" aw le... " Nuih suk pahin ani pawh room aṭangin a chhuak ve nghal.

Nolan a chhuah rual rual chuan ka lo thup ve ṭang ṭang ka rilru natna te kha ka hmelah a rawn lang chhuak nghal a, tun lawka thil thleng ang maiin ka tawrh nat dan pawh a nep phah chuang lo.

Tui ka in khawlh khawlh hnu chuan in phih fai tumin bathroom lam ka pan nghala, darthlalangah ka han in en chiah mai chu ka mengphawk chiang teh e!!!

Lalpa leh!!  engthil nge ka tih tak mai!!?

Ka sam sei hnap mai kha ka dar chen lek hian alo tawi ta mai!!  chutah ka mit te chu hai rual loh in a sen ṭuak a ,ka nghawng velah te chuan love bite niawm tak hi a duk thluah bawk.

Darthlalanga in en vung vung pah chuan ka nghawng duk thluah mai chu ka khawih vawng vawng a. Ka mittui a rawn tla nghal sawk mai!

Ka sam ka tan lai te, hetiang nghawng duk nei tura mipa in min fawh lai te chu engmah ka hre chhuak zo tawh lo. Mipa ka mutpui nge mutpui lo pawh ka hre lo.

Engthil nge ka tih tak hi?

Chutah loh theih loh in Rainer'n min tih dan te kha ka hrechhuak leh nghal uai uai a, ka chunga a thil tih avang khan engtik ah mah ka ngaidam leh tawh ngai lovang, engtikah mah .

Ka inphih fai hnu chuan ka inthlak nghal bawka, ka lu la na hle mahse ka û biak hi ka ngaihpawimawh hmasak ber avangin phur lo deuh chungin inhnuai ah ka chhuk thla chhat chhat a.

Rin ang ngeiin Kendra leh ka û ṭhiante ho zawng zawng chu living room ah an lo ṭhu kun lap hlawm a, keimah vanga hetianga awm hi an ni tih pawh ka hrechiang hle.

" Sadie.... " Kendra chuan min rawn kuah nghal vata, min ngaihtuah zia ka hriat hian ka inthlahrung in hrehawm ka ti takzet.

" Kitchen ah a awm va kal rawh " a tih chuan ka lo bu nghat a.

Ka û awmna kitchen lam chu ka pan phei nghal chhat chhat a, chair a ṭhu chungin thil ngaihtuah nei niawm tak hian a melh ngai chu a lo melh vung vung a, hetianga ka û awm lai ka hmuh hian a hma aiin ka na zual.

" Braydon " ka awm tih a hriat rual chuan a ṭhutna aṭanga tho chhuak nghalin min rawn pan hnai a, chiang zeta min rawn en pahin ,"Rainer nen in in karah eng nge awm ?" a rawn ti hlawl !!!



Nizanah khan engthil nge thleng ka hrelo , Rainer nen an in ti buai a nih loh vek pawhin Amira in a hrilh a nih ka ring.

" maw! "

" Amira thusawi kha a dik em,  Rainer nen in chhuak dun em ni? " ka rin dan chiah Amira in min lo va hek leh tawh.

" Ai... " ka lo ti hmak, " Kan in karah engmah a awm lo " ka tih chhunzawm zat bawk.

Ni e, thudik a ni miau alawm Rainer berin kan pahnih inkarah engmah a awmlo a ti miau alawm.

Ka inkarah engmah a awm loh thu ka hrilh rual chuan a thaw nghal huai in ka hria.Amira in hrilh engang mahse ka sawi a nih tawh phawt chuan ka û hi chuan min ring nghal vat zel.

Mahse hetah hian ala duhtawk mai lo, ka û phal loh em em ka tiru a min man chhuak bawk a awlsam takin a lungawi mai mai dawn lo tih pawh ka hrechiang hle.

" Nizan avang khan pawi ka ti takzet... ka tihpalh lutuk " kuah thlawpa ṭah hawm hawm ka chak.

" tiam chin awm lovin grounded i ni tun aṭang chuan khawiah mah i riak sawn leh tawh ngai lovang " tih hmuk pahin kitchen aṭang chuan a chhuak nghal nal nal.

Ka û hian min ngaidam daih tawh tih ka hria mahse ka chungah a lungawi loh em avanga hetianga la awm mai mai hi a ni.

Tun aṭang chuan Rainer theihnghilh in nun bul ṭan leh ka tum ang, ka û tih lungawi leh tumin ka theihtawp ka chhuah anga ,a hma anga kan awm leh theih nan nasa takin ka bei bawk ang.

Nolan an phal lo hle mahse college kal ka duh tlat avangin ka kal lui ta tho a, engang pawhin awm nuam lo in ka lu na ber bur mahse ina awm ai chuan ka project vel buaipui in mahni intih buai ka duh zawk .

" Sadie ka thlah let leh ang che... vawiin chu hahchawl phawt rawh " Nolan chuan a ti chhen a, ka chau hmel viau pawh a ni mahna.

"Braydon ka tih lungawi leh theih nan min pui dawn lo em ni? "

" mahse vawiin chauh te chu... Engpawh chu nise Rain... " a ti dek dek a vin zet hian, " Khapa hming kha lam tawh lo tur che in ka ti che a ni lawm ni " ka ti nghal hluk a, mak tih hmel takin min lo en ha ringawt.

" aw le " thil hrethiam nghal niawm tak hian a bu nghat a.

" Hey... Sadie, Nolan... good morning " Chelsea leh Kaitlyn ka hmuh takah chuan ka thawveng nghal huai mai.

An ni lehzel ka hmuh pawh hian Rainer bawk ka hrechhuak leh ṭhin. Min duhpui lo zia leh hnaih lo tura min hrilh nasat zia te kha ka hrechhuak lo thei lo.

Chelsea te pahnih an rawn lan hnu chuan Nolan pawh class a neih avangin a kal hrang nghal a, tunah tak hian ka ṭhiante pahnih hi ka mamawh takzet.

" wow.. sam thar " Chelsea chuan mithmul tih kan zawk zawk pah hian min rawn chhiah vela, za lo zetin ka lo nui ringawt.

" Sadie...you look horrible " Kaitlyn meuhin a rawn tih takah chuan ka pawm thlap, ka mit a sen nasa in a bui chur vang te pawh hi a ni mahna.

" oh!! saw Rainer pawh a rawn kal a nih saw " Chelsea in a tih chuan ka phu chiang kher mai, chutah ka tum loh deuhin in kan in melh fuh chat lehnghal , ka hawi sawn rang ngei mai. Pehhel tum engang mah ila kan in kal pel tho tho angai.

(fakna kha aw...)