Rainer Black-15 by Remruati Bawitlung(Haylor)

CHAPTER-15

Motto- "Be the change you want to see in this world "

"eng nge hetah i rawn tih?" a ṭhian dang te pawh an awm ve dawn emaw tiin a hnunglam chu ka va melh kher a, vanneithlak lutuk in amah chauhin a lo ni hlauh. Ngeiawm zetin a hnunglam pang chu a va en ve ngat a,tumah an lo awm loh avang chuan min kãn âk pahin a ner zui suk ringawt .

" ka phone kha min pe rawh... " ka phone chu ka han ban zuai a, a aia sangah chuan a keng nghal daih a! a ha uingho zum zet mai lang vâr in min rawn la nuih zui.

"tunge Nolan... ?" ka phone chu a zuk melh zeuh a,tun ṭum erawh a thutak in a mitmeng dûr khui kha ka hmu leh tawh,ngawi lawk teh u... thik hmel te pawh a pu.

"ka ṭhianpa " tih hmuk pahin ka phone chu ka laksak thut a, enge maw sawi tur nei niawm tak hian a rawn ang zuau a mahse ka thaw chhuak hak ta zawk a.

"khawiah nge i kal dawn? "
"ka haw dawn... khawiah nge kal se min tih a? "
"in inah mawle... "kan in chhang tawk lutuk a,ka han nuih ver ver ringawt.

"nangpawh eng nge hetah i tih reng a? "
"bus a haw hi hmeichhe tan a him lo tun ang hun ah leh ngat phei hi chuan... " thupe deuh hian ka zawhna pawh chhang lovin a rilru a awm ang ang chu a rawn sawi chhuak nghal phawng a, hetiang thil Rainer meuh in min hrilh hi mak ka tih em avangin chhan mai ngaihna pawh ka hrelo.

Ngawi rengin midang karah chuan ka ṭhu ran a Nolan nen pawh kan in biak chhunzawm reng tho , Rainer erawh a kal mai dawn emaw ka tih laiin ka hnungah chuan ngawi rengin alo ding ve reng a, bus a chang lo a ni tih ka hre chiang si a engvanga helai hmuna awm reng nge maw a nih le? 

"i kal dawn lo em ni? "hawi let pahin ning hmel zet hian a phone a bih ngur ngur lai chuan ka han ti leh kher a,min chhang duh miah lo lehnghal.
"ka sawi hma kha ka ngai hle mai... " mit chet kual ralh pahin ka ti zui leh sap a, ka thusawi a hriat ngei pawh ka beisei.

Nolan a message tur ka type mawlh mawlh lai chuan min rawn call thut avangin nuih var var pah hian ka pickup nghal vat a, 'hello' ka tih rual chiah a hnung lam aṭanga ning hmel zeta thaw chhuak zui hak ri ka hriat chuan ka han hawi chho vat a, Rainer an rum zet hian min lo melh ngur chu niin,ka nui tawp chiang kher mai!! chutah ka sawi tur pawh ka theihnghilh phah vek lehnghal.

"ughh... aw sawi rawh... " ka lu thing nawk nawk pahin ka ti nghal vat a,min rawn melh dan kha ka mitthla ah a cham nghal vang vang mai.
"naktuk ah i hman engem... ka hna ka chawl thei dawn a.. " Nolan chuan phur hmel tak hian a rawn ti nghal vâr a.
"aw... naktuk ....naktuk ah chuan ka hman ang.. " ka lo ti bah nuai ringawt.
"a nih chuan in inah movie chu kan en dawn mi niang... "
"aw... ka lo nghak reng ang che "

"Chuan zanin ah pawh kan en thei tho alawm... "
"Hna i kal lo mi? "
" ka bang tep tawh ...ka rawn kal ang"
" maw... Tunah maw? "
"Ka rawn kal thei lo em ni ? A nih loh pawhin naktuk ah chuan a ni mai "
" nilo... Ka lo nghak ang che... Popcorn ka lo siam ang " tih pahin ka phone chu ka dah nghal vat a, bus pawh a rawn thleng zui nghal zat bawk.

Hawi pawh hawi let lovin ka tho thut a, midang an luh lai chuan a hnung berah chuan ka ding ve ran a, engvanga hlauthawng ta thut nge maw ka nih le?  Rainer meng rum lutuk hmel ka hmuh vang pawh kha a ni mahna.urghh...engmah sawi lo mahse awm nuam lo deuh a min awmtir dan hi a thiam ve ngawt mai.

" hey... Miss Morin... "
Bus a ka pen lut tur chiah chu min rawn koh avangin ka hawi let leh a, "Sadie zawk... " ka lo ti vat a.
"Sadie ...keiman ka thlah ang che... " eng ang fiamthu nge ni ngai!!  Rainer an min thlah ang maw?  hahh... min fiam mai mai bak a ni lo ang.

" a ngai lo ka lawm e... " nuih let sak pahin ka lut nghal a,a ni pawh in ka chhan dan avang chuan nuihzathmel tak hian min rawn en a,a van hmelṭha tak!!

Kawngka inkhar ri ka hriat rual chuan ka ṭhu zawi nghal hnak a, tukverh lam pawh ka hawi phei duh tawh lo,seat nghen chhan chu maimichhin vang vang pahin ka han ngheng nghal ar ar a, mutchhuak in min rawn zem nghal chiai chiai bawk.

Ka muhil ṭan dawn chiah tihin bus chu a ding nghal tuarh a ,ka harh chian mai bakah hma lamah ka bu nghal lawp bawk.

Ka sam hui chhoh phawk pah chuan ka han hawi kual nghal vat a, midang ho chu tukverh a an dahchhuah sup sup takah chuan ngaihṭhat lohna chang ka hre ve chiah.

"engthil nge thleng...? " ka bula pitar ṭhu chu ka zawt nghal vat a.
" a lan dan chuan car insu a awm anih hmel... " tiin min lo chhang a, sana en pah chuan a nghenchhan nghen leh pah chuan ka han ṭhu awn leh a,an din rei loh hram ka beisei.

Minute sawm hnu ah pawh passenger ho chu kan ṭhutna ngaiah kan la ṭhu ṭhap hlawm a, bus erawh in chet a tum reng reng lo.

"Dear...i hmanhnawh a nih chuan subway emaw bus dang emaw lak mai hi a ṭha zawk in ka hria... "ka bula pitar bawk khan a rawn tih leh chuan za lo zet hian ka lo nuih let suk a, a sawi hi a dik chiah ka haw na tur ala hlat mai bakah keimah chauhin ka ni bawk nen taxi emaw tal lak mai a ṭha in ka hria.

"ngaihdan ṭha tak a nih chu... " ka tho vut a, ka bag ah ṭhat sawk sawk pahin bus aṭang chuan ka chhungthla nghal vat a, tlan mai na chi ziazang alo nilo nasa mai, traffic zam thui zia ka hmuh phei saw chuan ka chhuk thla daih hi ti fuh ka in ti ru hle.

Hawi kual zak zak pahin kawng ka cross a, traffic a zam nasat em avangin a let zawngin ka kal ta ringawt a, taxi ai chuan Subway a haw mai hi a finthlak lehzual.

Ham bai bai pahin subway station lam pan chuan ka kal phei hnak hnak a, haw a ka khum ngei mai a mut zal ar ar chu tuna ka thil chak ber a ni chuan reilo te ah ka thil chak ber chu ka ti ngei bawk ang.

Chutia mahni chauh a ka kal phei chhat chhat lai chuan Rainer car ang deuh hian min rawn tlan pel nghal fua a,Rainer car Mercedes Benz chu ka lo hai lo nasa ka enzui nghal vung vung ringawt.

Car chuan min tlanpel fel zet tawh na in a ding nghal chawt a,a rawn back phei lai te chuan ding meuh chiang zet in in mak tih hmel tak hian ka lo en ha a, Rainer a ni tih ka hriat takah chuan ka haw chhuak nghal hak a, ka zawn ah tak a rawn ding nghal chat bawk.

Ka rin ang ngeiin car aṭang chuan a rawn chhuak nghal a, engvanga khawi hmunah pawh hmuh tura awm reng nge maw a nih le? a ṭhiante bulah khan engvanga let lo nge maw a nih le?  urghh...Rainer ka hmuh tawh ni chuan zawhna sangtamtak hi ka in zawt nghak mawlh mawlh ṭhin a, a chhanna erawh ka nei ngai miah lo thung.

"eng nge hetah i tih? " ka duh aiin a vin, mahse eng vanga min rawn vin ve ringawt nge maw a nih le?  a ṭhian emaw a bialnu emaw pawh ka ni tawp si lo.

"car insu a awm a... traffic a zam alawm... "
" a nih chuan car ah lut rawh... "
"enga! " thupe tak tak a min tih hian ka hua, runluih duhna hi a awm leh ṭhin .
" c'mon... ka pawngsual dawn lo che "

" subway in ka haw mai ang... " ka ti ve ṭang ṭang,a ngaihdan a nih tawh loh hmel ngang mai.
"ok... fine " a car kawngkhar chu a khar nghal chawrh a, "keipawh ka rawn kal ve dawn " tih pahin ka bulah a rawn ding ta hlun mai!! a awmdan mak tak avang hian ka ngaih a ti ṭha lo letling zawk.

A thinchhe si, a chapo si ,a ngeiawm em em bawk a, a engkim hi ka mil lo vel vek.

"ka sawi sual loh chuan i ṭhiante bulah khan awm tur i ni zawk in ka hria... "
"khawi hmunah pawh ka awm thei.. " hmm... hetianga chapo taka a ṭawng hian a Rainer bik hliah hliah chuan a mizia a ka huat ber a ni bawk.

Ka phone a rawn rik leh chuan Nolan a nih ka ring nghal,a hna a bang tawh pawh a ni maithei engpawh chu nise ka haw vat vat angai.

" a nih chuan awm ta si che... "mit chet kual ralh pahin ka phone chu ka pickup nghal a, ka kalsan nghal daih bawk .

Pangngai takin kan in be ve dawn emaw tih pawh hian kan in khei zui fak fak zel chu a nih hi.

"car ah rawn lut rawh.." a ti ri chu ka hre zui nghal a, mahse ka lo luhlul ve bawk nen ka hawi duh bik ṭhak lo phone ka be lui ngat ngat tho , bakah thupe deuh hian rawn ti kher lo se chuan ka lut mahna.

"car ah lut rawh ka ti a ni lawm ni ... " vin zet a rawn tih hluk pahin ka phone chu a rawn pawt thla hlawk a ,a off zui nghal hmak bawk.
" engthil nge maw i tih le? "
" tunah... " a car kawh pah chuan a rawn ti leh ngat a, a thinrim hmel em em lehnghal.

A hmel en reng reng pawh hian hnial ngam na chi pawh a ni tawh lo, ngawi rengin amah en kar chung chuan ka lut ta nge nge a, min tih dan avang hian ka lungawi lo ru hle bawk.

Seatbelt ka hren mawlh mawlh lai chuan driver seat ah a rawn ṭhu lut dawt a,ka phone lah chu a ak hmak lehnghal, Chutah chauh nak alaiin hla chu ring zet hian a volume a san nghal a, a thaw ip pik thlak takzet.

"khawngaihin i ti zawi thei angem? " tih pahin ka han herh zawi nghal vat a, a thinrim viau emaw ka tih lai chuan min rawn nuih leh ang lawi sia.
"a zawi daih tawh alawm... " a hnui liah zeuh pahin a ban chu tukverh ah a han nghat chhuak a, nuih za si insum tih hriat zet hian a car engine chu a han ti nung hlat hlat a ,a let zawngin a in turn pawp a, kan tlan nghal vang vang bawk.

"nichin khan engvanga ka chunga thinrim nge i nih? " ka rilru a awm ang ang chu ka sawi chhuak leh phawng tawh.
" ka thinrim hleinem... "
" enga...?? min vin vak kha " hriatthiam loh hmel takin ka en ha a, a hla play ri ruai ruai chu ka ning na a rei tawh bawk a ka off nghal hmak bawk.

(Mutchhuak, ngaihtuahna mumal lo bawk nen chuan ka type tam thei thlawt lo ,min lo hrethiam teh u ...a boring lutuk hma hian duhtawk phawh rih ang )