Rainer Black -14 by Remruati Bawitlung(Haylor)

CHAPTER-14

Motto- "Be the change you want to see in this world "

"Khawizu leh tuilum in rawh... ughh... tikhan lo in siam mai rawh u ka va inthlak ange " Nikki chuan kan pahnih in a room lamah min phei san nghal a.

"Engtin nge Chelsea nen in kal hran theih? " Tui pek pahin lungawi zet hian ka lo zawt vat a, chau tih hriat takin thawk halh pahin bottle chu a rawn la lawk a a in nghal khawlh khawlh a.
"ka rui lutuk a engmah ka hre tawh lo. .."

" ka awih thei lo... engkim a buai vek hi " ka thusawi hriatthiam loh hmel zet chuan min en kar pahin a mithmul chu a han kân ak a, ni dawn tak!  nizana Rainer nen a kan inkara thil thleng vel kha a hre ve lo tak!!

ughh...Rainer te chuan bialnu a nei a, engmah hrilh lo law law ila a ṭha zawk ang bakah in hmelhriat satliah nilo...inhmelhriat pawh kan ni lova ka hrilh kher an ngai in ka hrelo.

"Shane an min chahthlak sana chutah nang lehzel ...arghh... Chelsea hi khawiah nge maw a awm tehhrep le...? "ka thinrim lutuk chu ka ang tawn tawn a,mak tih hmel takin min lo en kâr ringawt.

Ka ṭhiante pahnih vanga thinrim nge ka nih a Rainer vanga thinrim nge ka nih pawh ka hre tawh bik lo.Engkim hian min ti thinrim vel vek.

"Shane chuan a rawn be leh tawh che em? "
"aih... engpawh chu nise haw phawt ang, Chelsea chu amah in a rawn haw ve mai ang... "
"aw le... i tih tlat te chuan, mahse subway a kan haw angai dawn nia... "
" urghh... Lalpa leh !!"
Ka phun deuh hluk avangin Kaitlyn chuan min rawn nuih var var a, mit chet kual ralh pahin ka sam chu ka tuai chho phawk a, inthlak turin room lam ka pan phei chhat chhat a.

Subway in kan haw dawn emaw ka tih vek tawh hnu ah Nikki in Chelsea te in thleng chu min thlah ta hlauh a,kan la chau bawk aniang kawng tluanin kan pahnih chuan ka mutthlu tluan ṭhak nia mawle.

"Hey!!  guys... morning ..."
Car aṭanga kan chhuah rual rual chuan Chelsea chu a rawn tlan chhuak nghal vat a.
"Dar 1 a ri tawh .." ka lo ti hmanhnawh ,Nikki chuan min lo nuih hak hak a,a hmanhmawh hmel em em lehnghal.

Chelsea chuan Nikki a kuah hnu ah Kaitlyn nen chuan min rawn kuah leh nghal bawrh bawrh a, han thinrim khum han tum ve ngial ṭhin mah ila Chelsea hi chu a thinrim khum tak tak theih ṭhin lo.

Kan pathum chuan inchungah kan in zui chho hnak hnak hlawm a,ka thawmhnaw thlan rim nam hiam te leh ka taksa ban chuap te hi tifai ka chak tawh takzet.

"engtikah nge i haw bik a?" Chelsea chu rum zet hian ka va melh a, mahse ka thinrim tak tak lo.
"dar10 velah Neon an min thlah alawm... bakah Nikki in a rawn thlah theih dawn cheu tih min rawn hrilh a ka rawn kal kher duh lo a nih kha... "

"Kaitlyn i hnutchhiah ringawt bawk a..."
"a ṭan leh dawn ta...c'mon...ka ngaihtuah avangin Zuri hnenah hruai turin ka ti reng alawm...en teh ka hmangaih zia che hi Kait... " Kaitlyn chuan a makeup hruk fai mawlh mawlh pahin kan pahnih inhnial lai chu min lo nuih var var a, Chelsea chungah hian a thinrim ve miah lo emawni le? Kaitlyn hi chu kan intih thiam loh chang pawha remna siam ziah ṭhintu kha a ni miau alawm.

"urghh...inbual vat ka duh, ka nu miscall a tam lutuk tawh ringawt, ka haw vat angai... " ka kawr hak lai chu ka phelh nghal a.
"guys...ngawi lawk teh u" thil ṭha deuh sawi tur nei niawm takin Chelsea chuan a rawn ti hluai a.

"Sadie... nizana thil thleng min hrilh dawn miah lo em ni?  tiraw Kaitlyn... " an pahnih chuan hriat chak hmel zet hian min rawn melh kar a, min zawt har ka ti reng a ni.
"A thleng ta em? "Kaitlyn in a makeup tih reh lai chawl meuh in kan lam chu a rawn hawi phei a, Hre chak hle mahse Rainer nen a kan awmdan kha ka hrilh ang nge hrilh lo ang tih ka lo ngaihtuah daih thung.

"engmah a thleng lo... a chatthla daih alawm... " ka lo ti bah nuai a.
" Enga!! sex in hmang miah lo amaw?" Chelsea hi chu a thil sawi reng reng hi a rawn uar leh tûk tawh .
"umm... ka ..."
" Shane hi alo gay reng a ni lo maw? "
"Chutiang lam a ni lo... "

"khatiang ang chance ṭha lutuk kha mipa hian an bawhpelh zen zen ngai lo asin...bialnu a nei a nih loh pawhin a duh lo che a ni lo maw ?"  Kaitlyn takngial pawhin ngaihna awmlo min tih hmel takzet.
"ka la in peih lo in ka hria... bakah hetianga tum sa ran a awm hi a ṭha in ka hre lo...guys... mipa kawp kual mai mai nilo keimah min duh tak tak tu ka tawn hunah chuan amah in a rawn thleng ve tawp mai ang "

Ka thusawi chu dik tih hmel takin an lo bu nghat nghat a,thil ngaihtuah zui niawm tak hian an sawi dun zui nghal vung vung bawk.

"anih engthil nge thleng hrim hrim? " an tih chuan khum tlanga ṭhut pahin ka han thaw chhuak halh a.

Nizana thil thleng kha an hriat chak em avang chuan Shane nen a kan awmdan leh kan mutdun ṭep thu te chu kimchang deuh hian ka hrilh vek a mahse kan infawh laia Rainer a rawn luh thut thleng bak kha ka hrilh lo, a bak kha chu hrilh turin huaisenna ka neih loh mai bakah hrilh lo hi a ṭha zawk.

"Rainer in maw lo ni a...? " an pahnih chuan phawk fe hian an han in melh nghal kawk a, an mak ti hmel hi a nuihzatthlak takzet.
" a chhung engtin nge a awm... a nuam em? "
" ka hrelo... a thim vek mai bakah kitchen light dim zet bak a in on lova engmah ka hmu thei lo "

Ka ti tak tak inchhung awmdan vel ka lo en loh mai bakah a thim rek ruk lutuk a engmah a hmuh theih loh ka hriat zawng chu a zau hle a ni tih hi.

"i va han vannei lel lawl tak... Rainer in chu ka hmu ve chak... ee taka Shane hi engtin nge ni dawn ...?"Kaitlyn chu min rawn nuih var var pah hian a rawn ti a.

"engpawh chu nise Shane hi chu Chelsea Webster approve ala ni tho tho... " Chelsea chuan a rawn ti a,khatiang thil a thlen tawh hnu ah pawh Shane chu ala ṭan ve ngar ngar hle.

Mipa duh deuh kan nei a ni emaw, thawmhnaw, pheikhawk leh thil dang dang pawh nise Chelsea approve a nih tawh hi chuan Kaitlyn nen hian lawm takin kan pawm thlap zel, a duh loh zawng a nih tawh hi chuan a sawi chhe hneh thei hle bawk.

In ka thlen meuh chuan dar4 a lo ri ṭep tawh chu niin, Chelsea in min thlah peih loh avangin Kaitlyn nen bus in kan haw phah lehnghal a,nizan ka lo in hnem ve bawk nen vawin zet zawng nilengin ka chau nghulh mai!!

Inchhung ka luh chuan ka nu chu kitchen ah dawhkan bawh chung hian a lo ṭhu kun lap a, a awmdan chu mak ti deuh hlek mah ila ngaihṭhat lohna ka nei lem lo.

Ngawi rengin room lamah ka chhohsan nghal daih a, ka bag chhuata paih let tawp pahin khumah ka lawn nghal thak a,ka mut rual rual chuan ka hnungzang leh kawng kham urh te kha a zia nghal sawng sawng mai.

Ka muhil hman ṭep tawh tih in glass no reh chuai ri in min ti harh nghal kawk a, mutthilh leh mai ka han tum na a ṭap thawm ka hriat zui leh avangin beng chhi kar chung hian ka han tho chhuak nghal vat a, a hriat sual a nih ringin men kual hrak hrak pahin ka han ṭhu deuh vung vung bawk a, ka nu te room aṭanga rawn chhuak ni mai hian ka hria.

"Lucas... "zawi sap hian ka han ti a, a room lam panin ka kal nghal vat bawk.

 Lucas hi ka nu leh tuna a pasal fa a ni a, kum7 mi chiah ala ni bawk a Braydon nen hian kan unau pianpui ang chiah in kan duat in en hranna kan nei ngai lo.

Lucas a ṭap a nih ringin a room ah hnem turin ka va pan ta ringawt a, mahse a room a tumah an lo awm reng reng lo.

Ka beng chhe ri a nih ringin kal lehnghal mai ka han tum a mahse ka nu te room aṭangin thawm ka hre leh tawh!!

Thawm dim thei ang berin kawngka inkhar phui lo kar aṭang chuan ka va bih dek dek a, ka nu pasal Mark a zuirui indawm kun ngai chunga a ṭap khur ngar ngar lai ka va hmuh chuan ka mak ti chu ka meng phawk nghal kawk ringawt.

Mark hi a buai ṭhin em avangin zan dar6 hma in a rawn haw ngai lova chumai bakah zu a in ngai pawh ka hre hek lo, mahse vawin chu a haw hma in a ruih hmel hle nghe nghe.

Ngaihṭha lo zet chungin inhnuai lamah ka tlan thla nghal hlawk hlawk a,ka nu ka hmuh rual rual chuan, "tinge Mark khi? " tiin ka zawt nghal vata mahse min chhang lem lo, hre lo ang hmak in a thil tih lai chu a tih chhunzawm ngar ngar tho.

" khawiah nge Lucas? " ka han ti leh a,tun ṭum erawh ka ṭawng a hre hlauh.
"Jason te inah a kal....zanin i riak chhuak leh dawn em? " min rawn nuih var var pahin tui in tur min lo pe nghal vat a, mahse a mit sem râm aṭang chuan thil dik lo a awm a ni tih erawh hai rual a ni lo.

"Engthil nge thleng? " a mit ah tak chuan ka melh kar a, mahse min hnungchhawn zawng hian a ding nghal daih a.
"dark circle i nei ania fanghma ka lo hnawih sak ang che ,lo chan rawh " tih sap pahin thleng chu puan ro in a hru nghal sawk sawk a.

Nidang chu nise Tagalog (Philippines ho ṭawng) hian min lo be vak vak anga, tun ṭum erawh a mah hi a nguai in nidang angin min lo chhawnchaih peih lo.

" aw le... " zawh chhunzawm tawh lem lovin ngaihṭha lo zet in fridge a fanghma chu ka la chhuak nghal a, ka chan lai te chuan ka nu chu a khat tawk hian ka han melh leh zeuh ṭhin a, min be bawk si lo, a reh tlawk tlawk mai.

Ka nu insut ri hraih ka hriat takah chuan rang takin ka thil chan lai chu ka dah sawk sawk a, a hnunglam aṭangin ka va kuah nghal vat a, a hnungzanga bei hle hle pahin a kawngah nghet takin ka kut ka suih tlat bawk.

"nu ...ka hmangaih che " ka ti sap a, insut leh hrai pahin ka kut chu a rawn hum vang vang a, a beng thek thek bawk.

"Mark hi niminah a hna aṭangin an rawn ban thut a, nizan aṭang khan chawl lovin zu ala in char char a,hnem dan tur pawh ka hrelo... " a ṭap aw ṭawng ṭha hlei thei lo ka hriat rual chuan ka hnuk a lo ulh ve nghal ṭun a, ka sawi tawh angin Mark hi pa harhvang, fiamthu duh leh nui huah huah ṭhin mi a ni a hetianga a awm ta mai hi hriatthiam a har takzet.

"engvangin nge an bân ang le... ?"
"an software thar design kha a partner in alo phatsan a ni awm e, engkim chu ama hming vekin a lo ziak lut a, Mark ve thung chu an ban phah hial a, khang alo thawhrim ve na zawng zawng te kha vawilehkhatah a hlauh tak vek avangin hetiang hian a awm ta a ni..."

Sawi tur pawh ka hre lo, hetiang ang mihring mahni hlawkna tur chiah ngaihtuah ṭhin mite hi ka haw takzet. Ka thin a lo rim pui in huatpui hle mah ila engthil mah tih theih ka nei ve bawk si lo,ka nu tal hi chu ti na tel ve zel lo se ka ti takzet .

Mark hi Software company lian tak mai Epicore corporation ah a thawk a, a tuina zawng tak a nih mai bakah company ṭha tak leh mi mai mai thawh theihna anih lo avangin ka nu pawh hian a chhuang thei hle nghe nghe. Mahse hetiang thil tenawm lutuk Mark a chunga a thleng ta mai hi hrehawm ka tihpui takzet.

" pawi ka ti lutuk... "
"engkim a ṭha leh vek turah ngai ang..."
"Mark hian hna hmu leh vat se ka ti takzet... "
"tunah chuan hun pek hi a mamawh ber... tikhian amah in inngaihtuah harh se kawng dang a hre leh em em ang.. "
" ni e... Mark a ni miau alawm... " kan han nui dun tak nain kan rilru natna te leh hrehawmna te chuan min kalsan lo chiang kher mai,hlim tumin lem kan chang mai mai a ni zawk .

"umm... zanin chu Kaitlyn te inah ka riak dawn a... " ka nu rilru na hmel leh keimah avanga ṭah pawh ṭap ngam lova a awm hi hmuh ka duh loh avangin dawt ka sawi ta ringawt a, ka awmlo a nih chuan a rilru natna te a duhtawkin a tih lang theih zawk ka rin vang a ni.

"Assignment in nei em ni? "
" aih... mahse weekend ah hi chuan riah khawm hi a nuam ve a... "
"an rawn hruai dawn che nge...? "
" ughh...Starbuck bulah min rawn lam ang... " zanin chu kan hun tawn in a zir lo bawk nen nidang angin a phallo bur tawh lo, a ni pawhin ka awm laia hetiang anga awm hi a duh loh vang pawh a ni mahna.

" a nih chuan heihi i hmai ah bel phawt ang... "min rawn nuih sang a, ka sam rawn chul pahin ka fanghma chan sa chu living room lamah a chawi phei a,keipawh in ka zui phei ve nghal a.

"i mu ṭha lo a ni maw?  i dark cilrcle hi a mawi lo takzet..." tih pahin a malchungah lukham a dah a, chutah chuan ka mu nghal thak a.
" chutiang deuh chu... "
"e... niminah Derek a rawn kal a.. "
" eng nge a rawn tih? " ka meng nghal kawk ringawt.

" eng nge ni vak chuang ang... a rawn zawng che mawle, let leh te i tum rilru hrim hrim em? "
" teuh lo... ka nu duhtawk teh, min bun alawm Camelle nen tunah chuan an inzui leh daih tawh... "
"ka greenhouse min rawn tihfai pui a, amah zawk hian neih let leh che a tum a ni lo maw... "ka thinrim hmel a hmuh chuan min rawn nuih hak hak a, Derek hi chuan ka nu hi a ti thiam bawk a, ka nu pawh hian min duh pui in a ngaina hle bawk.

"urghh... ka let tawh dawn lo, ka nu a chungchang hi chu sawi pawh sawi tawh lo teh... "
"ni e... i ta tur chu tunah hian khawi hmun emawni ah a awm mek ang... i la tawng lo pawh a ni mahna a nih loh vek pawhin i hriat loh in i lo tawng  reng tawh maithei bawk... " ka nu thusawi avang chuan ka khi suk a, ka hmaia fanghma a bel lai te chuan ka lo muhil lek lek lehnghal.

Ka nu leh Lucas te nen dinner ei pahin Riverdale (tv serial) kan en ṭhap hlawm a,ka nu nen chuan couch aṭangin tv chu kan en mai a, Lucas erawh chhuatah games khelh pahin a ei daih thung.

"Lucas... woollen carpet a nih hi i ti bua ange " a khat tawkin a zuk ti reng bawk a, Mark erawh ka nu sawi angin room aṭangin chhuah pawh a rawn chhuak duh lova, a room ah ka nu in chaw a han pe tawp nghe nghe.

Ka nu bulah ka lo sawi ve laklawh tawh bawk nen Kaitlyn te in a kal tur angin ka nu chuan pawn thlengin min rawn thlah thlap a, amaherawhchu Kaitlyn te in a kal lovin in a haw daih chu ka tum ta zawk a, hmun danga kal ai chuan keimahin ina awm ka thlang zawk.

Bus rawn thlen nan minute 20 lai ala awm avangin bus stand piaha restaurant ah chuan bus nghah pahin ice cream ei turin ka lut ta ringawt a, bus rawn kal leh kal loh tukverh aṭangin chiang takin a hmuh theih bawk a,thlamuang takin ka ei thei.

Kil khatah ngawi rengin khabe dawm meuhin keimah chauh chuan ka ṭhu ran a, thil ka ngaihtuah nasa lutuk a ka ice cream chah pawh ei nachang hre lovin ka melh ngai chu ka melh vung vung ringawt.

Sana kan en ṭhin a dar8 takngial pawh ala ri der bawk si lo, ṭhian kawm ṭhang ka lo ni bawk nen hetianga weekend hman hi chu a boring takzet.

Ka ning lutuk chuan ka phone ka la chhuak a, ka ṭhiante chu an party leh dawn avangin ka chemistry lab partner Nolan chu ka text ta ringawt a, a rawn reply rang ngei mai.

*i buai em? *
Ka ti ta ringawt a, a ni chu weekend ah pawh hna a thawk ṭhin tih ka hre ve reng sia.
*umm... i tan chuan buai love, eng nge ni ta? *
nuih var var pahin ka han ṭhu rem te te a.
* eng movie nge ka en ang? * tiin ka va reply nghal vat a. Ni e, haw ila movie en daih ila a ṭhat zawk ka ring,hetia ṭhut tlawk tlawk ai chuan....

*wow...kan duhzawng a in an loh khawp kha... * ka nui chhuak hak ringawt, a hma in movie en tum in kan chhuak dun ve ngei a, kan movie en duh alo in ang lo nasa lutuk a park ah kan kal phah ringawt tawh.
*i hriat angin... love story lampang aw haha...*
*umm... kan zawng kual chhin ange * emoji mit siai lem hi a rawn dah tel bawk a, ka lo nui ver ver ringawt.

Reply leh tum a ka type mawlh mawlh lai chuan nui ri ka hriat ṭhan zet mai ka hriat thut avang chuan ka hawi chhuak nghal vat a, Amira hmel ka hmuh rual rual chuan rang lutuk ka kun nghal vat a, min hmuh theih loh nan ka hoodie hak lai lukhum chu ka khum tlat bawk a.

Ka kut lehlam in ka hmui chu ka hliah tlat bawk a, ka lukhum karah chuan ka han melh chho dek dek a.
Zuri, Nikki, Carter, Shane, Zack,Declan leh a tawp berah Rainer te chuan Amira chu an rawn zui lut phak phak hlawm a,an lian hlawm in an chhelo hlawm si a an hmuhnawm tham zawk.

An vai maia an hming nen lama ka lo hre vek chu a mak hran love,kan university ah na nâ na hi chuan an lar hlawm em alawm .

An engmah ni si lovin an hmuh hlau chuan ka biru ang lawp lawp a, engvanga biru ve ringawt nge ka nih pawh ka in hre bik lo. Amaherawhchu an zingah sawn hmelhriat ka lo nei ve nual bawk nen min hmuh ai chuan min rawn hmu lo se ka duh zawk.

Bus rawn thlen nan minutes 10 lai la awm mahse ka bag chu ka ak ṭha sawk sawk a, ka hmui hup chungin a ruk thei ang berin ka put chhuak nghal zawk a, ka thil tih hi a atthlak takzet.

Tuman min rawn hmuh hman loh mai bakah buaina awm lova ka put chhuak thei chu ka lawm in ka han thaw chhuak hak a, phur lo zet in station lam chu ka pan phei chhat chhat a, ka ṭhiante chu awm se kawiah emaw kal ila a nuam ngawt ang.

Mi pali in bus chu an lo nghak ve mek bawk a, an zingah chuan ngawi rengin ka han ṭhu ve kâk a tih tur awmlo na nâ na chu phone bawk chu ka han la chhuak leh a, Nolan a message hnutchhiah chu ka chhiar nghal bawk.

Me before you tih movie chu ka en turin min rawn râwn ve ngei a,hetiang ang movie min rawn hrilh nachang a hria chu ka nuih a za takzet.
*i en ve ngei angai in ka hria... * a duhzawng nilo mahse fiam nan ka va ti let a.
*anih naktuk ah en ila ..i hman te a nih chuan *
*zawhna nilo in ka chhanna a nih hi * ka lo ti let nghal vâr a.

"bus in a kalsan dawn che" tih pahin tu emaw hian ka phone chu hnung lam aṭangin min rawn laksak thut a, ka hawi let nak chuan Rainer chu ka hnungah a lo ding khur chu niin!  ka mitmu chu a pawk chhuak dawn emaw tih mai tur hian ka melh nghal kawk a, tuman min hmu lo emaw ka tia Rainer hian min lo hmu ru leh kar tawh a ni maw?

(Fakna hmehin sec10 tal en kual ang u aw ..)