My Drug is You-36 by Remruati Bawitlung (Haylor)

CHAPTER-36

Motto- Dream Bigger 

"ka... " a zawhna avang chuan Lily chu ka en nghal haw a, tu hi nge ka ngaihtuah zawk tih hi thlan tur ka hre ta hauh lo.Naute chauh ka ngaihtuah ti ila hai rual loh in Coco pawh ka ngaihtuahzia ka in hre chiang hle bawk si .

"Inzawmna thuk tak kan nei tawh a heti mai hi chuan ka thlahthlam thei lo"
"anih kei ve hi... kei hi min thlahthlam bik ang maw ?"
"nang chuan engkim i nei alawm...chhungkaw ṭha tak, hna ṭha tak bakah nun nuam tak i nei mahse Coco chuan kei lo chu tumah a nei lo, ka puih hi angai ani"

" kan pahnih pawn kan pui thei reng alawm... ka hrilh tawh che kha Coco hian naute ṭha taka a neih theih nan ka pui ang....naute enkawl a fa anga en tura min tih pawhin ka ti mai ang... Asher kan pahnih a kan awmdun chhung chuan engpawh tih ka hreh lo "
"naute ṭha taka neih ringawt hi a tawk hleinem...ka thil tih sual avanga a nun a chhiat ve hi ka duh lo"
"nilo... engtik ah mah ka kalsan ngai lo ang che kan pahnih in kan enkawl dawn alawm" mittui tla zawih zawih chung chuan ka kut chu a rawn vuan a, thing thlak paha ka inlak hran vat pah chuan"ka tihpalh... " ka tih rual rual chuan ka hmaiah a rawn beng nghal sawk a," tenawm lutuk " in seh ruh ṭeuh chungin a tlan lut nghal daih bawk.

Lily hi ka nuna hmeichhe hmasa ber leh awmchhun ani a hetiang mai a ṭhen a
a tihnat hi ka duhdan ani bik lo mahse an pahnih hian ka ngaihsak kawp thei si lo. Lily chelh reng chungin Coco ka ngaihsak angai a, tlema ka lo ngaihsak deuh leh Lily in alo thik thul. Coco han ngaihsak lo ringawt dawn ila mawhphurhna hlen lo mi nih ka duh loh bakah kan thil tih sual rah hi ka fa in a tawrh ka phal hek lo.

Lily ka ṭhen avang hian phatsan a Coco hi kawp daih ka tum chuang lo hetiang ringawta kan awm hi chuan engtik ah mah buaina hi a fel thei ngai lo anga, inhuat na hlirin kan khat zawk ang chuvang chuan a tuamah hi kawp lo in ka mawhphurhna chu ka hlen anga chu chu kan pathum leh ka fa tana ṭha tur ani chuan ka thutlukna hian buaina a chinfel ngei ka beisei bawk.

Lily in min ben avang khan ka dem lo, kha aia nasa a ben kha ka phu zawk.Nuam tawl ka duh avanga kha ka vawikhat thil tih chhin na khan ka hma hun chauh nilo in mitam tak nun a tihchhiat phah a, he ka thil tih sual avang hian engtik ah mah ka in ngaidam thei ngai lovang.

Ngawi rengin Coco room kawngka bulah chuan ka ṭhu kun lap a,kha ka thutlukna siam avang khan ka hlim phah reng reng lo, ka awm a ti nuam lo in hrehawm ka ti zawk.

Chutia ka lo ṭhut kun lap lai chuan thawm ka hriat avangin ka ding nghal vata,rin ang ngeiin an pahnih chuan an rawn lang zui nghal mai bawk.Min rawn hmuh rual rual chuan Coco chu a ding nghal chawt a,mahse a ke na erawh ka hmuh hmaih bik hauh lo chu chuan min ti thinrim takzet bawk.
"hey... Dude... " Freddie an a rawn tih chuan,"inbia ang... " tih pahin inhnuai ah ka chhuk thla nghala, ka thinrim lutuk chu ka inhum ruh nghal vat bawk.

"eng nge ni ta? " ka hawi let rual rual chuan Freddie chu ka hnek nghal sawk a, ka insum hman tawh lo.
"hmela...i va rawn thlah har em em ve, a ke a tih nat kha i hmu em?" ka sawi zo chiah tih in ka hmaiah a rawn ri ve nghal sawk bawk chutah tlawm mai ka tum bik lo a kawr nghawngah chuan ka ṭham nghal tawn a.
" i tih nat kha i hmu em? a rai tih i hre lo em ni? "
"hahh... nang hian i ti na daih zawk, i fa anih angin i mawhphurhna pawh i hlen hleinem " Freddie an a tih chuan mak tih hmel zet hian ka en a, hepa hian engtik lai khan nge heng thil zawng zawng hi alo hriatchhuah, engmah ka hrilh si lova.

"engkim ka hre vek tawh....i thup reng angai tawh lo ang " tih pahin ka ṭhamna chu a paihthla nghal pawp a," chuan heihi hre reng rawh... i fa apai avang hian ka chuahpui theilo tihna ani lo"
"nang hian i chhaih kual vel mai mai ani tih min hrilh miah suh "
"maithei....tuin nge ṭhiante fa pai lai chu duh bik ang... nangmah ang tho hian keipawhin nuam tawl pui ka châk ve tho alawm "
"hmela... "
"i ṭawngkam fimkhur rawh....chuan lo lungngai lo la nang aiin Coco leh i fa hian min mamawh zawk ,i bialnu chiah i ngaihtuah thei tawh ang " ngeiawm zeta min rawn nuih suk pah chuan car ah a lut a, a tlan chhuak nghal bawk.

" Dammit...! " lei chu ka han chhuih khu laih a, khapa khan alo chhaih kual vel mai mai amaw!! chuan ka fa hian ani kha a mamawh zawk amaw!! hahhh...he naute hi fa ani a tuman min luahlan thei ngai bawk lo ang.

" hawng rawh... " Coco room kawngkhar chu ka chum nghal dawt dawt a,a rawn hawn nghal mai loh bakah ka thinrim bawk nen ka chhuih ti tih tawh.
"eng nge? " rawn hawn pah chuan alo ti vin nghal hlar a,ngawi rengin ka lut tlang nghal pawp pawp bawk.
"in mu dun tawh em? " a engamah hma chuan ka han ti nghal thawr a, ka zawh tum tak pawh ni lo mahse chu chauh chu ka rilru ah a awm avangin ka zawt lo thei lo.

"Engchu maw? "thinrim tawh nak alaiin a hriat loh der tlat avang chuan ka tih ngaihna hre lo chuan bangah ka nawr bet nghal chawt a,"min chhang rawh... Freddie nen in mu dun tawh em? "ka han ti leh nghal tuarh a, a hmela hlauhna rawn lang chu ka hmuh hmaih hauh lo. A mittui tling pam mahse chiang takin min melh kâr a"chhuak rawh... " inseh ruh ṭeuh chungin a ti zui sap bawk.

"Fa i neih hma tal chu mipa tello hian i awm thei thlawt lo em ni? "
"chu chu ilo buaina tur ani lo "
"a tawpah an ti na leh tho tho dawn che ani tih hi hre ta che"
"nangmah ang hian maw? Asher ...tudang nilo in nang hian min ti na asin "
"Engmaw!! "
"chhuak rawh...i ngaihsakna hi ka mamawh tawh lo"

Kei hian a rilru ka tihnat sak amaw!! A mipa kawp ṭhin te nilo in kei hi maw a rilru ti na tu chu!! Rang takin ka inla hrang nghal vata ka thinrim insum zo lo khatiang anga ka chet tak avang khan ka inthiam lo leh hnuhnawh .
"i chhuah loh chuan police ka call ang "
"chu chu i tih angai lo ang " tih sap pahin ka chhuak nghal nal nal a, ka room kawngkhar khar chawrh pah chuan ka tshirt chu phelhin ka theh thal tawpa,ka rilru hah leh tawt lutuk te chu a zia deuh beisei in shower ah ka inphuh tir nghal seng seng bawk.