My Drug Is You-35 by Remruati Bawitlung(Haylor)

CHAPTER-35

Motto- Dream Bigger

Briana car in khawi hmunah emawni hian min hruai a,zawhna zawt lem lo in tukverh lam hawi vauh vauh pah chuan ka melh ngai chu ka melh renga, ka rilru ah Asher bak a awm thei lo, Lily nen an awmdun ani tih ka ngaihtuah ringawt pawh hian ka na vek thei, thil dang ngaihtuah ka tum poh leh ngaihtuah a harsa a, darkar tin mai hian ka tuar a zuau in ka nem sawt riau in ka inhre bawk.

" ngatinge hetiang hian ka awm le? " Freddie pawh en lem loin ka melh ngai melh vung vung pah chuan ka han ti sap a.
"engtin maw!! "
"midang chân hlauh avanga nâ ngawih ngawih ang hian... " mittui tling pam chung chuan ka va melh a, insut hraih pahin ka hawisawn lehnghal vat bawk,ka awmdan hi ka duhlo takzet ngatinge Asher leh Lily ka ngaihtuah chhuah apiang hian ka hnuk a ulh zel mai le ?....

"ka malpui ruh leh nak ruh a ruala a tliah pawhin ka mittui far khat pawh a tla lova...ka pa in min ngaihsak duh loh lai pawhin ka ṭap hek lo... mahse engvanga thil ho te te avanga mittui tla leh si nge maw ka nih le? ka taksa pumpui che thei lo khawpa min sawisak ai pawhin tunah hian ka na daih zawk "
"Coco... " Ka kut chu a han hum vang vang a, "hmangaihna vang ani....Asher hi i hmangaih ani"
" nilo...min ti na tu hmangaih hi thil theih loh tawp ani, chutiang chu a thleng ngai lo " tih pahin ka nui lui suk a,ka awmdan hi ka inhre thiam tawh bik lo.

Freddie an car a tih din avang chuan ka hawi chhuak nghal vata,tuipui kamah ka awm ani tih ka hrenghal. Kan tlan rei bawka khua a thim der tawh mahse thla êng bial pup chuan ngaw leh tuipui te chu a chhun êng pup a, khua lah a thiang si a ka hahdam nghal sawng sawng mai.

Lungte vawm pahin lungpui chungah chuan kan ṭhu dun ran a,tuipui aṭanga thli rawn thaw vuk vuk te chuan awm a ti nuam takzet.
"eng nge hetah kan tih? " ka tih chuan a sana chu a zuk melh zeuh a min rawn nuih suk pahin, "a hun ṭep " a rawn ti sup ringawt.
"engchu maw? "
"vawm tawh hrih suh " dil a lungte vawm luh leh ka tum lai chuan min lo dang nghal vata, engthil nge tih a tum tih hi ngaihdan pawh ka neilo.

" le... en rawh le " a tih rual rual chuan a kawhna lam chu ka en nghal vata, tuipui chu rawng pawl hian a rawn êng ta sep sep mai!! mak ka ti lutuk chu ngun takin ka en kar a, reilote ah vaukam chu a eng ta ut mai.
"heng thil te hi eng nge an nih a... an mawi lutuk"
"bioluminescence plankton (mahni a ên na pe chhuak thei rannung)  an nih hi...an mawi teh asin ...."

"engtin nge helai hmun hi i hriat zawka?"
"ka tetlaiin Chilham ah kan awm ṭhin alawm... a khaw ṭhenawm te hi chu ka kutphah ka hriat chian tluk zetin ka hrechiang " a awm tho e, a tir aṭang khan thil a hria in a mikhual lo ka ti reng ani.
"helai hmun hi a nuam takzet.... rilru hah apiangin kal thei ila ka ti ngawt mai "
"i rilru a hah tawh dawn hleinem... helai hmun hi i mamawh tawh dawn lo" tih pahin ka hmai chu a rawn piai zeuh a, a kut chu ka lo bengthla rang ngei mai.

Tuipui kam eng uarh bul velah te chuan kan kal kual a,thla êng hnuaiah chuan ṭiau vut in în te kan sa a helai hmun a cham hlen hi ka chak takzet mahse reilo te kan awm emaw ka tih laiin haw alo hun leh der tawh engmah sawi lo mah ila ka let hreh tawh takzet .

Minute20 dawn lai kan tlan hnu chuan motor chu a rawn ri ta pawp  mai, Freddie chuan a ti ding nghal vata, hlauthawng tih hriat zet hian, "eng nge kha kha...? " ka lo ti nghal vat bawk.
" a ke a puncture... tikhan lo awm rawh thlak chhung a rei lo ang "
"nilo... motor ke hi ka lo phawi ang " ka vawikhat tihna tur pawh anih loh avangin ka hreh hran lo, bakah hmeichhe dang ang ka ni ve lo mipa tih ang hi chu ka ti ve thei mai zel.

"tikhan lo awm zawk rawh "
"Freddie...kan pahnih a kan tih hian kan reilo zawk ang " car aṭanga ka chhuk thlak rual rual chuan ka ṭe nghal ṭhawt ringawt, Freddie chu a rawn tlan phei nghal vata,"perek ka rap in ka hria" na insum tih hriat zet hian ka lo ti nghal vata, car ah chuan min ṭhut luh tir nghal vat bawk.
"lo che suh... " tih pahin ka pheikhawk hnuai chu a han en chiang a, thing bung kut phah tiat vel ah perek chu a inkilh beh tlat avangin ka ke ka tih chet hlek pawhin a na.

"lee... inring rawh, pakhat.... " a tih rual rual chuan a pawt chhuak nghal zawt a, "hmela... khawiah nge pahnihna leh pathumna .."ka in rin loh laia a pawh chhuah thut avang chuan ka vin nghal hlur ringawt. Ka pheihkhawk chu phelh in first kit box chu a han zawng kual nghal vata.
"hreptak chuan first kit box pawh a nei lo anih hi... "
"a thi vak chuang hleinem"
"nilo... tikhan lo ṭhu ang che,motor ke hi kan thlak vat vat ange" tih pahin a rawmawl chuan ka ke chu a ṭawn a,a kal chiah tih chuan pui turin ka chhuk leh ta tho , pangngai taka kal chu har deuh mahse ka tan chuan engmah ani lo.

___________________________________________

★Asher's Pov★

Pawnah mei chhem pahin kan ṭhu tlar ṭhap hlawm a amaherawhchu Coco leh Freddie an awm ve loh avangin thawm awm hlekah an rawn kal ringin ka hawi nghal vat ṭhin a ka bulah Lily awm reng mahse ka rilru erawh hmun dang daih ah a awm thung.

Chiang taka Coco leh Freddie te infawp lai ka hmuh aṭang tawh khan ka awm hle hle thei tawh lo, khataṭang chiah khan Coco hi ka tello pawhin a inenkawl thei ani tih ka inhre nghal, mahse hlim tur ka nih laiin ka hlim hauh lo, ka thil neih hlu ber chân ta mai ang hian ka in hre tlat bawk .
"Asher... tinge i awm a nuam lo em ni? " Lily chuan ngaihṭha lo tih hriat zet hian min rawn melh chho ha a, nuih suk pahin ,"engmah ani lo " ka lo ti sap a, engmah min zawh chhunzawm lo mahse a ngaih a ṭha zan lo tih erawh a hmelah a hriat theih.

"guys... intur in duh em? " Jim chuan lehlam aṭang chuan a rawn ti lauh lauh a, an duh vek avangin leh amah chauh chuan a lak sen dawn loh avang chuan ka kalpui ta ringawt a, zanin zet chu beer in chakna pawh ka nei lo.

Jim chu beer can pawm ṭun chung chuan a kal leh nghal vata, kei erawh wine in ka duh zawk avangin ka han en kual dan dan a, khaw mi te hian wine an siam chhuah ṭhin avangin an siam chhuah ngei hi in chhin hrim hrim ka duh.

"1996 kha a tui " hnung lam ka hawi nghal vata Briana alo ding reng chu niin, ani hi Coco nen pawh an inhnaih viau in ka hria.
"anih chuan... " 1996 tih inziahna üm chu ka la nghal vata," ka lawm e " tih pahin ka kal nghal nal nal bawk.

"umm... Coco hi ka be thei miah lo a, a chanchin i hre mial em? " a tih chuan rang lutuk in ka hawilet nghal vata.
"an rawn la haw lo em ni? "
"aw... rawn haw chu a hun tawh "
" khawiah nge an kal? "
"chuzawng engmah ka hrelo... Freddie nen an chhuak dun tih zawng ka hria " sana ka en chuan dar9 a ri vu tawh mai si a, khawi hmunah pawh kal se rawn haw chu a hun tawh hrim hrim.
"hreptak chuan " ka thil ken lai chu dawhkan ah ka dah sawk sawk a, ka tlan chhuak nghal vat bawk.

Helai khua leh a chhehvel ah hian signal a ṭhat loh mai bakah call tlang lai bik te a awm avangin an pahnih chuan eng ang pawhin call mahila awmzia a awmlo.
Ka mangang em avangin Briana pasal car chu hawh in zawng tur chuan ka kal ta ringawt a, midang tih chiai ka duh loh avangin a rûk thei ang berin ka kal bawk.

Vawin a kan kalna vengah te khan ka va zawng leh ringawt a, hmuh chu sawiloh an hnuhma hmuh tur pawh a awmlo.An kalna tur awm anga ka rin dil kam te leh ramhnuai kawng tlangna chin thleng chuan ka va zawng bawka,hmuh tur an awm lo hrim hrim.
"hepa hian khawiah phiang nge maw a hruai le? "
Darkar zên zâwn ka zawn hnu chuan beidawng takin ka let leh ta ringawt a, an rawn let hun lo nghah mai loh chu tihngaihna pawh ka hre tawh lo.

Room ah pawh awm duhlo in pawnah chuan ka vei lauh lauh renga, ka call tlang thei bawk si lo khawiah nge an awm ang le? 
"Asher... khawiah nge i kal daih a? " Lily ka hmuh chuan ka hrechhuak leh chiah, ka buai lutuk a a awm tih pawh ka lo theihnghilh daih alawm mawle.
"Freddie a rawn haw tawh em? " alo hmuh tak thutin tiin ka zawt ta ringawt a, "ka hrelo... " tiin min lo chhang nghal zat bawk.
"lo kal rawh... ka thlah ang che a tlai tawh "
"ngatinge room ah awmlo in pawnah i din renga "
"intih thawven nan ka awm mai mai ... "



Lily chu a thlenna room thleng ka thlah a, eng eng emaw sawi mahse thil dang daih ka ngaihtuah avangin a thusawi engmah ka hrelo. Tunah tak hi chuan engthil pawh thleng se Coco awmna bak ka ngaihtuah thei lo.
"Asher... engthil nge thleng i va mangan hmel ve ?"
" maw!! "
" ka biak che kha... "
"Lily.... " a kutah chuan ka han hum vang vang a, "kan pahnih hian ṭhian ni ang "

" Engmaw!!! "
"hetiang reng hian ka awmtir thei tawh lo che...i rilru tihnat hi ka duh tawh lo "
" Asher... i fiamthu tiraw? "
"engkimah i kiangah ka awm reng ang... mahse i nun hi zalen takin hmang la ka duh ani... kei min tih lawm tum reng lovin zalen takin awm tawh rawh "
" ka zalen reng alawm... " a mittui chu a rawn tling nghal pam a, he thil tak hi ani ka duh loh chu,  hei hi keimah vanga a mittui vawikhat tlakna a ni tawh lo mahse a tawpna nise ka duh ani.

Lily hi ka chelh reng anih chuan a rilru ka ti na fo dawn ani tih ka hria, ka chhuah zalen anih erawh chuan a tirah na hle mahse engtik ni ah emaw kei min tih lawm reng ngai tawh lo leh a lungawi lohna te leh a thikna te ala sawi chhuak ngam anga,hlauthawng reng reng in hun a hman angai tawh lo bawk ang.

"ka kal daih avang khan i thin a rim lo em ni? " ka zawhna avang chuan a ngawi renga, diktak chuan in tur la siin ka kalbo san daih a chupawh chu a thinrim ngam lo amaw!! ka lakah hian a lungawi lo anih chuan engvangin nge a thinrim mai loh, min tih lawm a tum luatah amah zawkin a tawrh zel hi ka phal tawh lo.

" ngatinge... i thinrim ngam lo em ni ?"
"a pawilo, engmah anih loh kha "
"Lily... engvangin nge i lungawi lohna chu i sawi chhuah mai loh...ka kalbo i hlauh vang em ni? "
"Asher... "
" min chhang rawh... "
" ni e... i lakah hian ka lungawi lo ngam lo a chhanchu min kalsan na chance hi pek che ka duh loh vang ani... "
" anih chu chuan min chelh theih i ring em ni? "
" aw.... inngeih taka kan awm chhung chuan kan in ṭhen ngai lovang... "

" hahh... amak hle mai, i awmdan ang chiah hian ka awm "
" maw!! "
"ka rilru diktak ka sawi chhuak anih chuan ani chu ka chân mai ka hlau ani, a chhanchu hmangaih dang a neih avangin... "
" Asher... tu chungchang nge i sawi...? "
"lut tawh rawh..."
"Coco chungchang ani tiraw? engvangin nge henu hi i ngaihtuah em em a?"
"naute hi ka ngaihtuah vang ani "
"naute i ngaihtuah vang nge Coco i ngaihtuah vang zawk? "


(He thil hi Bioluminisence plankton ten zana eng an chhuah lai anih hi... Coco leh Freddie te hmuh ang kha.. Haha ..Xoxo)