ZERO-5 by Remruati Bawitlung (Haylor)

Chapter-5

.
A khat tawkin Jade chu ka han sawi leh nawk nawk thin a, harh chu khawilam a hnar lo chauh.
" khawngaihin i khalh chak deuh thei angem"
" tehreng mai " tih pahin a speed a han san vak mai a ka sawi hma kha ka ngai vawng vawng.Zing lam anih tawh vang te pawh ania nge motor tlan pawh a tlem sawt riau in ka hria, a rukin motor rawn tlan ho reng reng chu ka lo thlithlai ran a, ka mut chuak hle mahse ka maimichhing ngam lo hrim hrim. A khat tawkin ka phone chu ka han hmet eng leh zeuh thin a ka duh aiin sana a kal chak riau.
.
Kawng peng kan thlen phei meuh chuan thawm hriat tur a awm tawh meuh lo ,hawi kual hruk hruk pah chuan
"vei lamah aw" ka han ti sap a, a lo bu nghat bawk.
Rei pawh kan tlan hma chuan thawkleh khatah car hnunglam glass chu an rawn vaw keh ta chuaih mai!! te thawt pahin ka kun nghal vata,bike ri vung vung ri ka hre zui zat bawk.Chupa chuan car pawh chu a ti ding nghal chawt a, engthil chiah nge thleng thlithlai tur pawhin ka hawi chhuak ngam tawh lo .A nghet thei ang berin Jade chu ka kuah bet tlat a ka mittui a tling nghal pum mai.
.
Kan car khalh tupa chu tuemaw hian a rawn tham chhuak ta pawp mai!! ka hlauh em avang chuan tute nge an nih tih pawh en ngam lo in ka beng ka hup ta ringawt a,thawk pawh ka thaw tha ngam tawh lo.
" Jade... harh teh " ko ring ngam chiah si lo in a beng bulah chuan ka zuk ti leh sap thin a, awmzia a awm der mai bawk si lo.
Car a rawn rik leh dawt thin avang chuan ka huaisenna zawng zawng sawmkhawm in ka han dak chhuak dek dek a, mipa rual hian chupa chu an lo sawisa reng chu niin ,thisen chhuak nasa hle mahse ka chhan ngam der mai bawk si lo,mittui tla zawih zawih chungin ka au chhuah loh nan tiin ka kâ ka hup hram hram a, an hnek apianga lo phut zawk zawk mai loh chu tihtheih ka nei der bawk si lo .
.
Chutia hriat chhuah hlau taka ka lo inhup ve tang tang lai chuan an zinga pakhat nen chuan kan mit a intawng fuh ta chat mai!!! min rawn hmuh avanga hlauh chu sawi loh a chet hian ka che thei tawh lo hrim hrim. Chupa mitmeng hring kak mai chuan khap miah lo in min rawn en ta ran mai, khawvel hi a reh nghal duk in ka hria ,midang au in bengchhang hle mahse a mit a la san eih lo.
"Lalpa min pui hram teh " tiin ka tawngtai nghal mawlh mawlh a, chu bak tihtheih ka nei lo.
Ka chil ka han lem leh dak thin a,ka tha a khur der der bawk.Zawhna ni ta chu engvanga min ti buai nge an nih?
.
Ka hlauthawng in ka mangang hle tih a hre ve te pawh ani mahna ,helmet khum pahin bike ah chuan a chuang nghal daih a,an zinga mi pakhat thil a hrilh zeuh hnu chuan midang ho chu bike ah an chuang nghal sap sap hlawm a,rei pawh an awm lo tih in pakhat tih loh chu an tlan bo ta diak hlawm a. Chupa ka la kal ve lo, la chambang pa chuan min rawn nuih suk pahin car ah a rawn lut ta mai!!
" tu... tunge i nih? eng nge i duh?"
"thlah haw tu tur cheu mawle " tih pahin car engine chu a tinung ta hlat hlat a.
"engvangin nge min rawn tihbuai? khawiah nge khapa kha a awm? " ka rilru ah zawhna chi hrang hrang chu a rawn lang nghal zut zut a,a chhanna erawh hepa chiah hian a hria.
.
"khapa kha maw? " ngeiawm zeta min rawn nuih pahin car chu a khalh chhuak ta a, khapa kha engtin nge a awm tih en tumin ka hawi let leh nghat a kawng sirah engmah hre lo in an lo hnutchhiah chu niin.
" Lalpa leh!! damdawiin panpui vat angai asin "
" lungngai suh a thi lo ang....vawi thum vel bak kut a tuar lo "
" maw? engmah a hriat loh saw ,in that tep alawm"
"nula,... i va tawng hnem em em ve " chutiang anga min rawn tih takah chuan chhang let ila kut min thlak hreh dawn lo tih ka hriat ran avangin ka ngawi ta zawka.
.
Khawi hmun emaw ah min hruai daih ka lo rin mek lai chuan kan in kan thleng ta hlawl mai!! mak ti tak chung chuan car atangin ka chhuak nghal vata,chupa chu biak ka han tum zet na in heng mite hi nel loh a that zawk ka rin avangin ka be duh ta lo.
"Khami te kha tute nge? " Jade chu car atangin pawr zet hian a rawn chhuaka
"i lo harh daih tawh maw? "
" aw... tinge? "
" Jade....ka hlauhthawn zia kha i hre ve miah lo em ni ? chuan nang i lo chatthla der char char amaw?"
"ehe... i pi car hi engtin nge kan tih ang " Jade chungah ka lungawi loh em avang chuan inchhungah ka luh san daih a, ka thin a rim takzet bawk.
.
Room ah ka lut chiah tiin Jade pawh chu ka khumah a rawn bawk nghal thlawp a en pawh ka en peih lo.
"a tirah chuan ka chatthla ve tho alawm.. "
" mahse min phatsan alawm... bakah khapa kha tunge?"
"Ryan anih kha Zero hmelma hlun F gang ami "
" anih chuan ....khapa vang khan maw min rawn umzui a ,khang ....khang gangster ho khan... chuan nang ilo chatthla der bawka ,ka awih thei lo.
"Tina hriatthiam tum teh.... rawn harh pawh ni ila engmah ka ti thei chuang hleinem"
"anih chuan ka pi car khu engtin nge kan sawi tak anga ?"
" naa... Ryan vang vek "
.
Chutia Jade nen kan lo inhauh buai mek lai chuan ka pi a rawn lut ta thut mai!!
" Valentina... khatiang kawr nen khan khawiah nge i kal ?" ka pi in min man chhuak mahse ka thaw huai mai, a chhanchu a car ka ti chhia tih ala hrelo tlat a chhan chu hre tawh chu nise a car chungchang min zawt hmasa daih zawk ang ".
" ughh...ka pi " engmah ka sawi hma chuan inhnuai lam atangin thawm lian zet mai a rawn ri ta bur mai!!  A rin em avangin kan vai mai chuan kan te nghal thawt a,engthil nge thleng tih hriat tum in rang lutuk in tukverh ah kan dak nghal thap bawk.
" awi.... ka car!! " ka pi car tuemaw in a su tih ka hmuh chuan mak ka tih rual rual in ka lawm.
" ka car.... awi ka car " tih pahin ka pi chu inhnuai lamah a tlan thla nghal luah luah a ,Jade nen erawh ka inen a kan in nuih suk thung.
.
Thil thlen dan hi a mak takzet ruahman lawk te pawh a ang zawk,car su tu lah chu chhuizui theih loh in a tlan bo daih lehnghal a, mahse a hmel erawh chiang takin ka hmu thung, tunah chuan ka pi pawhin kan tihchhiat ani tih a hre tawh hauh lo ang le.
"Tina.... kan him ta "ka pi car an rawn sut chhiat avang chuan kan inkai a kan han zuang leh rih thin, ka rilru hahna te pawh a bo nghal duak in ka hria.
" lawk... Jade ,Ryan kha "
" ngatinge Ryan chu.... "
"kawngsirah an hnutchhiah alawm "
"maw? "
" inthlak ila va kal vat ang.... "
" i mawl mi? Zero bak an ringhlel leh chuang lo ang, police in an man anga a tha daih zawk " a tih chuan ngaihtha lo zetin ka lo bu nghat a.
.
Breakfast kan ei laklawh lai te chuan Jade muthlu tur chu ka va tlawh harh leh zeuh thin a,ka pa in min man chhuak ang tih ka hlau takzet.
" pa... ka pi chuan FIR a thehlut ta mi? "
"umm.... kan zawn chhuah vat ka beisei "
" zawnchhuah a awlsam viau em mi? "
"a harsa vak lo.... in pahnih hian police station ah in rawn kal angai ang "
" maw!!  police station a! " Jade nen chuan hlauhthawn hmel takin kan in melh nghal kawk a.
" thu hre tu ah in tan angai alawm.... ei vat vat ula ka rualin in kal nghal dawn nia "
" mahse... "
" in thil hmuh ang kha sawi ula ni mai "
.

.
Huphurh takin chungin police station lam panin ka pa chu kan zui phei chhat chhat a,a ruk tak chuan ka hlauthawng hle.
"Tina... khatiang khan awm suh, car pakhat in tuemaw in a rawn su ti ila a tawk mai "
" mahse... khang ho kha chiang takin ka hmu bawk sia lawm chuan ka pi car su tu hmel pawh"
" ho lutuk ....tunah chuan i pi car in a sut chungchang bak min zawt dawn chuang lo.... "
" awle.... lo va lut rawh minute2 hnu velah ka rawn lut ang "
" rei suh ang che " tih pahin Jade chuan ka pa chu a zui lut nghal hlawk hlawk a, kei erawh thawk ka lak kawk kawk phawt loh chuan ka ziaawm thei lo.
.
"engmah ka hmu lo " tih sup pahin  ka han thaw chhuak hak a, confi zetin inhum ruh teuh chungin police station ah chuan ka lut ta zal zal a,police ho an an lo thut thap avang chuan ka zam leh hnuhnawh.
" Tina... helamah" Jade in min rawn koh na lama hawi ka tum lai tak chuan mipa pakhat sang zet mai leather jacket ha chu ka su ta chawrh mai.
" ka tihpalh " tih pahin kan hawi chho chiah mai chu ka mengphawk chiang teh e!!