Dr Noel 2 - 25

 CHAPTER -25

He was beyond damaged. He was broken. Smashed to bloody pieces. He was alone in the world without the one person who could make him whole. And he always would be.

Dr Noela berin damdawiin ah rawn kal tawh suh i puih pawh kan ngai lo a tih aṭang khan damdawiin a kal leh chu sawi loh a lam hawi a zun pawh ka tum tawh lo . Ka nute'in min sawm pawhin chhuanlam ka siam zel a , tunah phei chuan school kan lut leh tawh bawk nen sawm pawh min sawm tawh ngai lo . 

Damdawiin a kal tawh ngai lo na na na chu Noela pawh ka hmu tawh ngai lo a , hmu chak thin viau mah ila min tih dan kha ka ngaihtuah chhuak leh zel a ,tlawm ta riau a in hriatna ka neih tlat avangin ka kal loh phah leh nge nge thin. 

Midang bulah chuan a tih thinrim theih loh emaw tih tur khawpin hlim hmel a pu sang renga , ṭawngkam vin lah a hmang ngai hek lo mahse ngatinge ka bulah hian a vin in min hauh reng bik , ngatinge hlim hmel min hmuh ve ngai loh ? A fair lo takzet . 

Lunch Break lai chuan tiffin ei pahin kan tlar ho chu kan titi a , sawi tur hi ka ngah uchuak thei bik thin lutuk a ṭawngna hun pawh kan in chan thin lo . 

Chaw hmuam ṭun chuang hian Tei chuan  'Dr Noela hi vawi engzat nge i thinrim khum a i tih tauh khum pawh hi ka hre tawh lo ' a rawn ti khoh peka , a sawi dik lutuk a award pek hial tlak a ni . 

Kei ngei pawh hian han chhiar dawn ila ka hre tawh lo ang . A chunga ka lungawi loh apiang hian kar khat dawn te ka hmu lo a, a chang leh pehhel dan kawng ringawt ka zawng a , a chang leh ka be duh lo thul mahse rei erawh a daih ngai lem hlei lo a . 

' Tun ṭum chu ka ti tak tak tawh , khatiang em em khan ka rilru ala na ngai lo , khami zan phei kha chuan mut pawh ka mu thei lo ' inringtawk tak hian ka lo ti a , mahse ka ti laklawh mai mai poh a hun a han kal deuh hi chuan ka rilru hi a dam vat a , ka theihnghilh leh vat zel . 

Noel lakah hi chuan induh tawk viau thin kha ka induh thei tak tak lo chu a nih ber hi . Ka chak lohna lai zawng zawng a rawn phawrh chhuak ti ila ka sawi sual lo ang . 

' I ti ziah alawm vawikhat a rawn bia che anga i nem leh duai duai mai ang ' Awmtea chuan alo ti ve bawk a .

Hemi te pahnih hi chuan min hrechiang leh lutuk a , ka awmdan tur hi sawi lawk dik loh pawh hi an nei thin lo . 

' V-a pawh ka induh khum theih em hi 'tiin ka la ṭang ve ṭang ṭang a .

Awmtea bawk chuan ' An inang hleinem, Dr Noel te chu i atchilh hlum lo chauh a nih ber hi bakah hepa rawn lan aṭang hian i induh tawk ve na te , i luhlul na te leh rilru na ve ngai lo ang maia ka lo ngaih thin na che kha a awm tawh lo.Vawi engzat nge i rilru a tih nat tawh pawh hi chhiar sen a ni tawh lo ' thutak fe hian a rawn ti leh a , kan in hnial buai leh hma in Tei chu rawn in rawlh vat in , ' Mahse a ṭha lam zawng pawhin i inthlak danglam tho alawm tiraw? Hei kan Carolyn pawh a single ve tak reng hi , bialpa chu sawiloh biak pawh i nei tawh lo ania ' a tih rual chuan Tei chu ka lo kuah nghal chung a .

' Lehkha te hi zir peih phah deuh la ṭha tur ' tiin Awmtea chu a phun zui sup a mahse chhang ta lo chuan an pahnih chuan ka kuah dun vak a , tiffin pawh kan ei ṭha hlei thei lo . 

Tiffin kan ei zo chiah tih chuan kan CR Rinpuii chuan Principal in a office a min koh thu min rawn hrilh rual chuan engvanga min ko nge a nih tih chu hrilh chawp ngai lo in ka lo hre nghal, a chhanchu First Term exam na ah keimah chiah ka fail vang a ni . 

Awmtea chuan lungawi lo tih hriat zet hian , ' Lehkha zir ṭha rawh ka ti mawlh mawlh a ' tiin a phun zui sap sap a , ṭhahnem min ngaihpui avanga sawi a ni tih ka hriat avangin ka lo nui ringawt a ,an hreh ang hian Principal hmuh hi ka hreh ve der si lo a . 

' Engpawh chu nise eng em i ti nang , va kal vat vat zawk rawh ' Te'in a tih takah chuan rang takin Principal hmu tur chuan ka chhuak nghal a , min zilh hrep pawh nise a thu ka awih nachhan tur ka hrelo . 

Principal office-a ka luh rual rual chuan a tarmit kar aṭangin min lo melh leh kur tawh a ,nula senior tih takah a thinchhe zek lehnghal. Min koh fo tawh avangin hlauh en ah pawh ka en tawh lo . 

' Ṭhu rawh ' a tih rual chuan ṭhu tura min tih na ah chuan ka ṭhu nghal a , a thil tih lai chu a chhunzawn lehnghal mawlh mawlh a , hawi hrek hrek pahin ka lo ṭhu ngawi reng ringawt . 

Minute 5 dawn ka ṭhut vang vang hnu chuan a rawn hawi chhuak ve ta nge nge a , hun a kal muang ka ti hman takzet . 

' Carolyn.... harsatna i nei em ni ? Ka sawi awmzia chu lehkha zir kawngah hian harsatna i nei em ni ? A khawi lai tak hi nge i hriatthiam loh ' ka rin loh lutuk zawhna chu min rawn zawt daih a , han chhan mai dan tur pawh ka hrelo .

' Class -XII Science bikah first batch in ni a , in zirtirtute hi kan ṭang in kan awm mai mai ngai hleinem. Harsatna i neih chuan puih che hi kan hreh reng reng lo . He school hi nuam lo i ti em ni nge zirtirtute hi inthlak danglam kan ngai zawk pawh ka hrethiam tawh lo ' a ṭawngkam aṭang chuan a beidawng hle a ni tih a hriat nghal mai a , min koh ngun ang hu in hma ka sawn thei si lo a min beidawn san tawh ni te hian ka hria . 

' Class -XI ah pawh kan ti pass tawh che a Selection exam ah erawh kan ti pass thei tawh dawn miah lo che ania ' a tih zawh chuan a ngawi deuh vang vang a . ' Vawikhat tal test na ah hian i pass thei thlawt lo em ni ? Vawikhat tal pass ve rawh . ' a ngen hian min rawn ngen a , Principal awmdan chu mak ti takin ka lo en ha thung . 

'Karleh ah test vawithum in nei leh dawn a , pakhat ah tal khawngaih takin pass ve tawh rawh . Ka lo ngaichang reng dawn che ania . I kal thei tawh ang ' a tih rual chuan a office atang chuan ka chhuak nghal vat a , vawikhat pawh ka ṭawng hman lo . 

First Term exam ah khan nidanga ka fail pui thin te pawhin min pass san vek a . Awmtea phei chu a tang bawka a vawikhat nan first division ah a pass a nih kha . Kei ve thung chu lehkha zir ngai lo tih takah Class-XII hi ka school kal tawpna tur anih mai hmel . 

Second Term hi selection exam a ni tawh dawn a ,ka fail leh chuan Final exam ka in exam ve thei tawh dawn lo tihna a ni . Pass ngei ngei angaih takah chuan lehkha zir thut ka tum bawk si lo a , school bang nghal thei mai turin ka rilru pawh ka siam fel nghal vek tawh a ni . 

School ban apiang hian kei ,V-a, Tei leh Awmtea te nen chuan kan haw ho dial dial thin a , kawn thleng bak kan haw tlan theih loh avangin kawn aṭangin quarter thleng V-an min thlah ta thin a ni . 

Vawiin chu V-a te class an stay back dawn avangin kan ṭhian thum chuan kan haw ho a , mahse kawn atangin keimahin ka haw angai dawn a ni . 

Phur loh zet chung hian keimah chauhin ka kal chhat chhat a , in tawp ber leh kan awmna quarter inkar ah hian ramhnuai ang deuh in awm lohna tawi te a awm avangin chumi inkar bik kawng chu a reh thin mai bakah sava thawm bak hriat tur a awm ngai lo . 

Chutia keimah chauha muangchang a ka kal lai chuan thawm ka hriat thut avangin ka hawi let vat a mahse engmah hmuh tur a awm lo . Mak ti tak chung chuan ka han hawi kual vel a , ka thawm hriat kha ka beng chhe ri mai mai a ni lo tih ka chiang . 

Ka huai thin tehreng nen nidang ang lo takin ka thau ah min man tlat pek a , min zui tu an awm nia hriatna ka nei tlat bawk. Ka hawi let lahin tumah hmuh tur an awm bawk si lo , vawiin zet zawng hlauhna in min man tlat a vawikhat pawh hawi let lo in ka tlan haw dawr dawr mai . 

Thaw hlawp hlawp chunga inchhung ka luh rual rual chuan ka pu chuan , ' Ka-te room ah khan i awm reng sia engtik laiin nge ilo chhuah hman a, hei thingpui pawh a dai hman vek alawm ' hi alo ti ringawt a , a sawi awmzia ka hrelo takzet .

' Pu school ka rawn bang chiah alawm ' mak ti tak chung chuan ka ti a , ka pu hian dawt a sawi ka ring bawk si lo .

' Room ah khan thawm i nei i nei sia nangmah emaw ka tia hei thingpui ka lo lum sak che alawm ' a tih rual rual chuan keimah ka ni lo tih ka hriat avangin room chu ka va endik nghal vat a , ka nutei a awm bawk si lo a thawm chu tu siam nge ni ta ang ? 

' I tar tawh lutuk a i beng chhe ri mai mai aniang ' a ngaih ṭhat nan ka lo tih liam sak puat a , a ruk chuan ka thla a muang lo .Ka pu thawm hriat ni leh min zui tu an awm nia ka hriat ni alo in ang chiah bawk nen ngaihtuahna a kal thui duh takzet . 

A tuk chu inrinni anih mai bakah Awmtea pass lawm pahin tlaiah chaw kan ei khawm dawn a ,ka chhuak khat tawh bawk nen kei aia phur hi an awm leh tawh lo ang . 

Awmtea first division-a a vawikhat pass na anih avangin apa lawm lutuk in a lawmsak ve ngei dawn a , kal loh phalna chi a ni lo . 

In ka tih fel zawh veleh ka inbual fai sar a , darkar khat dawn ka insiam hnu chuan ka nutei bulah ka pawisa pai tur lam angaih avangin loh theih loh in damdawiin ah ka va kal leh ta nge nge a Dr Noela ka hmuh loh hram ka beisei . 

Dr Noela room alo in kalh avangin a awm lo bawka tiin confi zet hian duty room ah ka tlang phei nghal a, ka luh nak chuan ka hlauh ang ngeiin ka nutei leh Dr Noel chu an lo awm a , an buai hmel em em lehnghal . 

' pawisa chu ' ka va ti nghal ringawt a , Dr Noela a awm ve avangin pawisa lak a kal nghal daih ka tum a ni . 

Ka nutei lah chuan pawisa min pe nghal mai dawn emaw ka tih laiin Dr Noel awm lai lai chuan a phun ta mai a ,ka zak bawk si pawisa la lo a kal daih ka hreh ve bawk nen ka ding ngawi reng ringawt . 

' Tikhan mi pass lawmna ah a phur ber ber ah i ṭang leh ta nghal a , a zahthlak lutuk . Engtik ah nge i pass hi kan lawm ve dawn ? In principal pawhin min rawn phone leh tawh kha ' a tih lai chuan min pe vat turin ka lo tur ve sek a mahse mei alh a khawnvartui leih luh ang vel a ni  , ' Second term phei chu selection exam a ni lehnghal tling lo ta la engtin nge i tih anga ? ' tia min zawh chuan thutak fe hian , ' School ka bang mai ang , lehkha zir hi ka kham tawh lutuk ' ka lo ti let hlar a , ka ti tak tak bawk . 

'School ban a ?! hei lehchen i kal ve tawh a . Engpawh chu nise i rawn haw veleh lehkha i zir dawn nia , khawiah nge ka purse pawh hi a awm ni ' tih pahin a purse chu a zawng kual a , ' Taka ka bag ah ka dah tak ' tih leh duty room atanga chhuah chu a rual nghal a . 

Ka nute hian school ban vel chungchang kha ka bang leh duh tak tak dawn tih a hriat avangin a sawi chhunzawm duh lo a ni . Han phun ve thin teh mahse min ti hnual zawngin emaw min ti beidawng zawngin a ṭawng ngai lo . 

Ka nutei chu ka zui ve nghal a , Dr Noel zawn ka thlen chuan nuih paha , ' Thluak thawl lutuk ' a ti ri ka hriat rual chuan ka ding nghal chawt a .

' Engmaw? ' tia ka zawh takah chuan a rawn hawi let a , ' Engmah ' tih ringawt hian min lo chhang pek a , a awmdan avang chuan ka sa nghal phat mai. 

' Enteh ' tiin bul ka han ṭan te te phawt a .

' I ngaih ang em em a thluak thawl chu ka ni bik lo ' tiin ka chhunzawm zat a , ka thinrim lutuk hi ka aw te pawh a khur nia mawle . 

Ka thinrim ve tehreng nen a nui duh lek chauh.

' Ka ti tak tak ania , ka duh chuan test na ah pawh ka pass vek thei ' ka ti vel ham ham a ., 'Hahh.... I pass ve thei te a nih ngai chuan i duh duh ka tihsak ang che ' min ngaihnep hmel zet hian a rawn ti leh a , ka lo inhum ruh rang teh e . 

' Lo ngai reng rawh ka pass anga ka duh duh ka tih tir bawk ang che 'inseh ruh ṭeuh chung hian ka ti tan tan a .

' Kan la hria ang chu ' khik suk pah hian a rawn ti leh kher a , duty room atang chuan min chhuahsan nghal bawk a .