Dr Noel 2 - 1

 Dr Noel 2

(I Love You 3000)

Ziaktu: Remruati Haylor 

CHAPTER -1

" We were perfect for each other until we met" 

' Noel i luhlul bawka a tawp a tawpah transfer letter chu i hmu ta nge nge alawm . I duh ang ngeiin Zokhaw lamah i awm ang ' 

Lungawi lo tih hriat tak hian Med Sup chuan envelope chu min pe a .

' Nang ang Surgeon hi hetah kan mamawh che tih i hriat kha , kum thum aia rei awm phal i ni lo ania . Kum thum tlin hma a i rilru i thlak leh anih pawhin lawm takin kan lo pawm reng che ania ' a ti leh a .

Ngawi rengin room atang chuan ka chhuak nghal a .

Hetah hian damlo tamtak in min mamawh tih ka hria mahse Tetei'n min kalsan hnu atang khan rilru tih thawven nan thingtlang lamah min sawn turin ka dil thin a mahse damdawiin in min mamawh thu leh Surgeon thingtlang lama awm tir an ui thu bakin min chhang ngai lo .

Kum khat leh a chanve a ral hnuah pawh transfer letter ka hmuh theih tak loh avang chuan keima thu in chawlh ka in pe hmiah a, thil tha lo tak ani tih ka hria mahse ka rilru ipik leh tawt lutuk tih thawven nan thingtlang lamah leh hmun hran hran ah ka zin kual ta thin a ni . 

Ka mamawh zawng zawng Van (camper Van) ah ka nei vek a, a tul anih chuan kawng sir ah te ,lui khamah te Van chhungah te ka riak mai thin . 

Biak pawh theih in ka awm ngai mang lo a ,phone pawh ka khawih khat khawp mai . Transfer letter ka hmuh hma ka thawh tawh dawn loh thu a ka nawr hnu ah leh thla hnih dawn ka awmbo tak tak tàk hnuah chuan a hlawhtling ta nge nge alawm . 

Rinhlua ten futsal khel turin min lo nghak reng tawh a mahse Superintendent room atang chuan khawi mah kalkawi lovin ka psychiatrist ṭhutna damdawi dawr ah chuan ka kawi hmasa te te phawt a . 

Ni e , midang hmuh ah chuan hlim hmel pu in engmah thleng lo angin awm thin mah ila Tete'in min kalsan aṭang khan depression leh anxiety nasa tak ka neih phah a , mahni inkhawngaihna leh dam ve pawh thlakhlelh lohna ka neih thin avangin hun rei tak aṭang khan Psychiatrist ka lo pan tawh thin a ni . 

' Noel i mal lo tih kha hria la , engtik lai pawhin ka biak theih reng ania' Pu Ṭhakima chuan a ti a.

A nupui ka lo zai hlawhtling sak tawh vang te pawh a ni mahna kan in nel in a fapa ang maiin min en a. Ka chhungte bulah anxiety ka neih chungchang hi zep ka duh avangin tun thleng hian amah ka pan tih hi ka nu leh pa te hriat ah ala sawi ri lo.

' Ka ṭha tawh alawm ' tiin ka lo chhang a .

' Engtik ah nge Phullen ah chuan i kal dawn ? ' tia min zawh leh chuan . 

' A rang thei ang berin ' tiin ka chhang a . 

Rinhlua te ten futsal kan khelh zawh hnu chuan ṭhian ho in Andrew te inah chaw kan eikhawm lehnghal a, ka hun awl tam zawk hi ka ṭhian te bulah ka hmang ti ila ka sawi sual lo ang .

Balcony ah keimah chauh a thlifim dawnga ka din reng lai chuan Tetei bawk chu ka ngaihtuah chhuak leh a. Keimah chauha ka awm tawh hi chuan ka lo ngaihtuah chhuak leh ṭhin ,ka ngai lutuk hi kei meuh pawh hian mittui dan zawh loh chang ka nei ta zeuh zeuh zawng chu a nih hi. 

Kawppui chan chu dar lehlam sahthlak ang maia na a ni an lo tih kha ka hriat chhuah phah hial a ni . 

Chutia ka din vauh vauh reng lai chuan Rinhlua chuan ka dar rawn ben thuk pah hian ' I zungbun kha engtik ah nge i phelh dawn?' a rawn ti a mahse chhang lo in ka nui ta ringawt a .Tetei zungbun min pek hi ka phelh hlan nghakhlel ber te zinga mi aniang. 

Rinhlua hian ka lo intihhlum ve mai a hlau nge ni keimah in min awm fal tir khat khawp mai .

' Kum hnih a ral tawh dawn a , phelh tawh mai rawh ' a rawn ti leh a .

' Ka ṭha , ka bulah hian rawn awm reng lo teh ka ning che a nia' ka ti leh a mahse ka ti tak tak lo tih erawh a hre thung . 

' Hmeichhe dang te hi be ve tawh rawh , single in i tar thi mai ang ' a rawn ti leh a . 

Ka zungbun bun lai en pah chuan , ' Hei nupui ka nei tawh ' tiin ka fiamthu zui a . 

Midang bulah chuan hetiang hian nui in  fiamthu thawh lui thin mah ila chhunglamah erawh ka rum vawng vawng thung . 

' Engpawh chu nise Phullen ah chuan ka hman hmasak berah ka rawn tlawh ang che , ka rawn tlawh sawk sawk ang che ' nuih pah chuan a ti a .

' Rawn kal hlek suh , keimah chauha awm ka duh a nia ' ka ti nghal vat a . Ka ti tak tak bawk .

_______________________________________________

  

★PHULLEN ★

Carolyn's Pov 

'Tangkapar..." chu hming bawk chu, ka nutei ani bawk a ring zet hian ka eih leh ta tho a . Ka ṭhiante chu nise ka vin leh hrawk tawh ang . 

' In in exam lai tal hi chuan lehkha zir ve thin la ' ka nutei chuan min rawn hau leh tawh a, mi rilru lian leh luhlul tih takah min hau ngun bawk nen ngai ah ka nei tawh .

Ka pu lah chuan ' Ka-te ...a tawp ber na i ni leh palh hlauh ange ' alo ti ve bawk a .Ninawm, an pahnih hian an tangrual ve ziah .

' Tikhan min ko ve ziah suh ,ka hming i phuah thing lutuk a mi pawn min chhaih phah. ' ka lo ti let tan tan a .

Ka hming Carolyn Tangkapari tih hi ka pu in a sipai  ṭan laia a tawngkapui dawn hming chawia min phuah sak a ni a , tun thlengin ka hming avang hian ka pu lakah ka la lungawi thei lo. 

Ka nutei in ' Nimin a in exam i chhang ṭha hrim hrim em ?' tia min zawh chuan ka thiam vek confi zet hian ka lo ti nghal a . A awih loh hmel kher mai .

' Ka thiam vek i ti zawt zawt a , i fail loh leh a tawp ber na i ni ziah . In class ah zirlai sawm pahnih in awma sawm pahnih na i ni leh tho zel... a zahthlak lutuk .Lehkha tlem tal zir la ,in exam leh tur te kha lo va zir lawk rawh ' ka nutei chuan a rawn ti leh hram a .

Engzat na pawh ni ila keimah ber hian ka zah loh ber te chuan engvangin nge min lo zahpui ve ringawt.

TV en pah chuan 'Naktuk pawh kan la chawl ,zir na hun ala tam emai' thuthleng a mut thluang zar pah chuan ka lo chhang let zawt zawt a, TV channel chu ka hmet kual zut zut reng bawk a . 

' Chawhnu lamah Saitual ah Damdawiin lehkha pawimawh zuk lak angai lehnghal a ,ka awm loh hlanin lo zir ngei ngei ang che' ka nutei chuan a rawn ti leh a ,min vau a ni ber.

Ka nutei hi Nurse a ni a , tunah hian PHC ah Doctor leh Nurse pahnih awm tur an nih laiin Doctor thar ala rawn awm dawn chauh mai bakah Nurse pakhat zawkin naute a neih avangin a chawl leh bawk si a ,kar hnih vel zen zawn chu ka nutei hian amah chauh in damlo a lo buaipui tawh a ni. 

TV channel ka hmeh kual reng avang chuan ka pu chuan ' En ngai hi a en theih loh reng reng , i hmet kual reng a ' a lo ti ve sek a . Kei lahin ka nutei phun lai lai chuan  ' Zanin ah ka birthday kan thian ho in kan lawm dawn a , a lawmna tur Rs200 min lo pe' ka lo ti ve chhen bawk nen a tih ngaihna hrelo chu a thaw chhuak hawk ringawt . 

Kar hmasa atang tawh khan a hah in a mu tha lo zual bawk nen a thin a chhe sawt hle a , a chenpui te pahnih lah hi kan la inmil lo em em lehnghal a , a luhai thlak thin viau ang . 

Engtin nge lawm i tum a rawn tih chuan Wai Wai kan chhum dawn ka lo ti fel than a, chumi chauh lo pawh tum dang kan nei tih erawh sawi tel ka tum hauh lo. 

' I lawm dawn chuan i pu lo awmpui pahin inah in lawm mai dawn nia ' tih pahin ka dil aia tam cheng zanga hi min rawn pe a a rukin ka lo 'Yes ' zui sep a . 

Ka nutei chu Saitual lam pana an tlan liam rual rual chuan ka pu buh zu bilh lai chu a rukin a bel chawp chuan ka chawi chhuak nawlh a ,ka thiante pahnih Awmtea leh Te-i mai bakah tuna ka ngaihzawng ni mek V-a te chu ka pass chhawng leh a , an ni chuan damdawiin chhak ramhnuai lamah an lo han chawi chho a , kei erawh a sehhmeh la turin inah ka let leh thung . 

Damdawiin awmna hi khaw pawn deuh hlek tlangah ,fal deuh nalh hian a awm a ,a bul vel pawh ala ramhnuai khawp mai . Quarter ah kan awm daih avangin ka khua a har thei hle bawk .

' Pu i phone hi ka keng dawn a nia ' tiin ka pu chu ka dil a . Phone ka la neih ve loh avangin ka pu phone hi ka kawl deuh chawt thin a , ngaihzawng ka neih pawhin ka pu phone hmang hian kan in be deuh ber thin , kan in biak zawh veleh ka delete leh mai thin . 

' Rawn haw har lo la , hei ruah a sur dawn nia ' ka chhuak tur chu a rawn ti leh hram a . 

' Aw ... Damdawiin chhakah kan awm mai mai dawn ' tih leh tlan chhuah ka rual nghal bawk . 

Hmanhmawh deuh hian eitur khai chung hian ka thiante awmna lam pan chuan ka tlan chho ve nghal hnawk hnawk a , ka han thlen meuh chuan no ah zu chu an lo thli chhuak fel der tawh . 

' Heihi ka ta tur em ni ? ' hah pawh sawi lovin no pakhat chu ka la a , ka tlak rual chuan ka ner nghal sawk ringawt .

Zu hi tui ka tih em em vang pawh a ni lo , ka sual vang hrim hrim a hetiang a khawsa hi ka ni ti ila ka sawisual lovang . 

Cigarette tan pahin rem leh rem lo hian V-a bulah chuan ka thu a , khawpui lah chu a ri dur dur lehnghal .

Awmtea chuan nem duai hian ' Ruah hi a sur vak duh hmel ka ti , Caro ... damdawiin ah khuan damlo tumah an awm lo tiraw a hran duh hmel ka ti ' a rawn ti a , kan vai mai chuan kan lo nuih a .

Damdawiin ah hian Doctor a awm loh avangin damlo an admit ngai lo a , damlo chu awmse ka nutei hi Saitual ah a kal thei lo anga keini ho pawh hian hetiang hian ka kum 17 na birthday hi kan lawm thei hauh lo ang . 

'I pu zu hi a tui tawp ' Te-i chuan buh deuh nuaih hian a rawn ti a, a lu ah ka lo kuk ṭawlh ringawt .

Ka pu hi Kohhran upa a ni a , buh zu a um nachhan pawh a ruka a sual vang nilo in damdawiin a damlo zu mamawh tana damdawi atana hman tura a um a ni . Ka nutei pawh hian a hau fo thin a mahse tar  upa tih takah rin dan bik te an lo neih tawh thin avang hian damdawi atan ala um ru tho thin a ni . 

' I nutei hi a rawn haw ṭep tawh ang a ,Pathlawi-a nen em ni an kal ? ' Te'in min zawh chuan rang fe hian , ' Pathlawi mah nise min duat zia ' tiin ka lo ṭan nghal hlar a . Nutei te chu ṭan ve ṭang ṭang tak ka ni .

Rei pawh kan awm hma chuan vawileh khatah ruah a rawn sur ta vak mai a , kan rin aia a sur tam tak avang chuan ka ṭhiante ho chu hmanhmawh takin an tlan haw nghal vang vang a . 

Kei erawh ka la rui deuh phual bawk nen ka haw mai ngam lova V-a nen damdawiin varanda ah chuan Cigarette zuk pahin kan ṭhu mai mai ta ringawt a . 

' Exam tur i thiam tawh em ? ' tih pahin min rawn fawp zeuh a , khaw thim chu sawi loh current a awm loh mai bakah ruah a sur nasa bawk nen tu mit mei mah ven tur kan nei lo bawka kan uar dun khawp mai . 

'Chutia duhthawh taka kan lo in fawh tawn tawn lai chuan Car headlight eng lutuk hian min rawn chhun ta thut mai!! , mak ti takin kan hawi phei nghal vat a kan hma ah tak Car pahnih hi an lo ding vung tawh chu niin . 

Ruah sur buan buan hnuaiah chuan Car pakhat zawk atang chuan pa sang leh lian tak mai hi hmanhmawh tak in a rawn chhuak a , a car seat hnung lam kawngkhar chu rang takin a hawng nghal bawk . 

Kan awm ve tih pawh hre lo ang maiin damlo pahnih hi car atang chuan an rawn zawn chhuak ta mai a , thisen tam lutuk ka hmuh rual chuan ka hamhaih nghal vek lehnghal .

' Caro... ka kal mai ang ' tih pahin V-a lah chu a kal daih a ,dan hman pawh a ni lo .

Mak ti taka ka din reng lai chuan damdawiin enkawl tu Chokidar Pu Rama chuan hmanhmawh zet hian damdawiin kawngkhar chu a rawn hawng nghal sawk sawk a .

Kawngka zawn ah tak ka din avang chuan pa sang deuh khan , ' Mami... awm sawn rawh' hmanhmawh hle mahse zaidam tak hian a rawn ti a , a hmel ka hmu chiah chu ka mengphawk chiang kher mai .

Damdawiin chhungah an za vaia an luh vek tawh hnu ah chuan mak ti takin ka hawi let leh a zawi te hian ,

' Dr. Noel-a maw!! 'tiin ka phun sep a.