Rainer Black-46 by Remruati Bawitlung(Haylor)

CHAPTER -46

"Why her? " 

Nizana Sadie te chhungkaw bula ka awm hnu aṭang phei kha chuan a hma ai zawngin chhungkua a awm ve chu ka chak zual a, ka pa a awm thei lo a nih pawhin Samantha nen a kan inkar tal hi ṭha se ka duh avangin nizan zankhua deuhthaw a ka in ngaihtuah hnu ah Samantha nena kan inkar ṭha lo tak hi chingfel tura ṭan la turin ka rilru ka siamfel nghal bawk.

Samantha dinner ei puia sawm turin ka chapo na te dah ṭha in a office lam chu ka pan a, a ruk tak chuan ka hreh in let leh daih te pawh ka duh rum rum.

Kan inkar siam ṭhat tum ka nih avangin a office-a ka luh hma chuan hlim hmel put hram hram tumin ka han nui lui suk a, lem chan hi alo hahthlak a nih hi!! tum zui hmuk pahin ka jacket chu ka han siam tha te te a, kik lovin kawngka ka hawng nghal rawk bawk.

Kawngka ka hawn rual rual chuan Samantha leh mipa pakhat couch-ah inbawh chunga an lo infawp tawn tawn lai chu ka zuk hmu nghal!

Vawilehkhatah ka alh nghal phat!!

Insum te chu khawi lam ka va hmuh rual rual chuan chupa chu couch aṭang chuan ka ṭham tho nghal lawp a, ka hnek zui thlu nghal tawp bawk.

" Rainer duhtawk rawh "

Hnek leh ka tum lai takin Samantha chu kan inkar ah chuan a rawn tla zep hman! amah zawk hi ka hnek hman tep ka kuttum pawh a hmai zawnah ka lek vu hman tawh.

" hnek tawh suh ,khawngaihin..." a hlauthawng a ni tih a aw khur der der aṭang hian a hriat theih.

A sam pheng phang te leh a kawrkilh pawh la in kilh zo mang lo ka hmuh rual chuan in seh ruh chungin ka kuttum chu ka la thla riai riai a, rum zetin chupa chu ka zuk melh zui leh khai a, a hmel ka hmuh hian ka hnek leh duh mai dawn avangin lehlam hawi hmak pahin ka in hum ruh nghal vut ringawt.

Hetiang thil thleng hi a vawikhatna nilo mahse ka tawrh nat dan erawh a ngai reng thung.

 Samantha in a sam thur zet mai a tuai mam thuak thuak lai chuan chupa chuan a hnar thi chu a tuai fai mawlh mawlh thung a, inchhirna nei lek lovin min rawn melh ram ram pahin room aṭang chuan a chhuak nghal daih a chu chuan an min ti thinrim zual hle.

" Eng nge i rawn tih dawn? " a tih rual chuan hawi pawh hawi let lo in ka khi nghal suk ringawt, ka nuihzat vang nilo in ka thinrim tawpkhawk vang zawk a ni.

 Kan inkar siamṭhat chu sawiloh khatiang lampang kha ngaihtuah leh tawh lo turin ka rilru ka siam fel nghal.

"kan contract a dinner ei dun tih phiangsen kha i tih angai tawh lovang "tih hmak pahin kawngka bula pot chu ka vai thla nghal pawp a, let leh tawh lo turin hma lam panin ka kal nghal nal nal bawk.

Nidanga ka tih ṭhin dan ang bawkin building chung zawl ah ka rilru lak pen tumin pushup ka ti ngar ngar a, vawi 90 ka tih hnuah pawh ka rilru aṭangin kha thil phiangsen kha ka thai reh thei chuang lo.

" fuck... "

 Ka hah tawh em avangin tih vin hluk pah chuan cement charah chuan ka let thal nghal tawp a, khapa kha damdawiin panpui ngai khawpin ka lo hnek lo kha tunah hian ka inchhir leh hnuhnawh.


★2 hours later ★

Chemistry class ah Sadie a kal lo an tih a avangin zawng turin ka chhuak nghal a, engvanga zawng kher nge ka nih pawh ka hrelo.

A hmel ka hmuh loh hlek hi chuan mak tak mai in hmuh ka chak em em zel a, ruak huai ang hian ka in hre tlat ṭhin bawk. In be dawn lo mah ila a bula ka awm phawt chuan ka lungawi em em tho.

A awmna tur awm anga ka rin Chemistry laboratory ah leh library ah ka zawng ve ve a chutichung pawh chuan a hmel hmuh tur a awm chuang lo ,ka zawn hmuh loh avang chuan ka thinrim ṭan titih nghal mai lehnghal.

"a rawn kal lo phiangsen emawni le? " phun sup pahin ka phone ka la chhuak nghala, a la lo anih vaih chuan an inah ka kal ang.

Thinrim ṭun chunga Sadie call ka tum lai tak chuan balcony aṭangin ground lam chu ka zuk thlek thla zeuh a, vanneihthlak lutukin Sadie leh a ṭhiante pahnih in be mawlh mawlh lai chu ka zuk hmu fuh hlauh!!

A ṭhiante a biak paha a nui ver ver hmel ka zuk hmuh chuan thinrim hle e ti lo chuan chhan awmlo in ka khi nghal suk a, ka chhungril tawt lutuk pawh kha a zia nghal sawng sawng bawk.

A chang hi chuan ka bulah awm lova a ṭhiante bula a awm daih avang ringawt pawh khuan ka thik a, a nuih lehngat phei hi chuan hruai hran daih a khap miah lova a nui hmel thlir ngawt ngawt mai ka duh rum rum ṭhin.

"hmela ka farnu i lo melh vel elaw?"

 Ralkhat aṭanga Sadie ka lo thlir mai mai lai chuan Braydon an min rawn pawt her nghal sawk a, college a ka hmuh leh avang erawhin mak ka ti amaherawhchu ka hmelah ka ti lang lo.

" a pawina a awm em ni? "nui suk pahin ngeiawm zet in Sadie chu ka zuk melh leh kher.

"hmela " ka jacket nghawngah a rawn ṭham nghal a," melh pawh melh hlek suh " min rawn melh khai bawk.

A farnu lo melh ringawt pawh chu a haw ngang a nih dawn hi a mit pawh a sen vek thei alawm mahse hetiang anga a awm avang hian min ti luhlul zual sauh thung.

" a lehpek ah ka lo reng tawh dawn nia "

Ngeiawm zetin nuih vur vur pah hian ka ti leh ngat a, ka lo rin lawk ang ngeiin ka hmai ah a rawn ri nghal sawk.

Braydon a thinrim hmel ,hmai sen vek tawh ka hmuh chuan ka sam tuai thuak pahin ka in beng tho nghal a, ka khabe sawi rem nawk nawk pah chuan kan in hma chhawn nghal ran a.

"I melh lai ka hmu leh a nih vaih chuan ka kuttum hi a in ring reng ania "

" I hria em... i farnu khu ka duh chuan ka laksak daih thei che asin"

 He thu hi ahma in ka hnenah alo sawi tawh a, chuvanga hrilh let ve chauh chu ka ni. Amaherawhchu dawt ka sawi bik hauh lo ka duh chuan an pahnih hian ka then hrang daih thei mahse a ni ang ka nih loh avanga zahngaihna la lantir mai mai chauh ka ni.

" Phiangsen che chuan... "

Min rawn hnek leh a tum lai tak chuan hmeichhe pakhat hian a rawn ko thut a.

" Babe kal tawh ang " chu nu chuan min hria niawm tak hian min rawn melh hrek hrek a mahse a hmel ti danglam leh in a bana kuah pahin a hmuiah a rawn fawp nghal zeuh bawk a,a bialnu thar a ni in a lang .

A bialnu in kal a duh tlat avangin a hnial ngam bik lo, min rawn melh khai pahin," ka sawi kha hre reng ang che" a rawn ti leh hram a, an inzui phei nal nal lai chuan ka lo khi nghal suk a .

Tun ṭum kan buaina ah kha chuan kut thawh ve ka tum hauh lo a chhanchu a unau nu chunga ka thil tih avang hian min hnek ve hrim hrim se ka duh chuti lo chu thudik a hriatchhuah hunah min hnek turin chakna a nei tawh dawn si lo.

" engvangin nge i khawih let loh? "

Ka jacket ka siam ṭhat lai chuan Declan chuan a rawn ti a, kan in tibuai lai kha ngawi rengin a lo hmu leh vek tawh a nih dawn hi.

" nidangah chuan khawih na hun remchang kha i zawng reng ṭhin kha a ni sia " a rawn ti leh a, Sadie zuk melh zui zeuh pah chuan," chutia mi? " tiin nuih suk pahin ka chhanglet ringawt a.

"Braydon i hmuh tawh hi chuan nilengin i mood a off ṭhin kha a nia" ka lo nuih vur vur avang chuan a rawn ti kher a, ka tum chiang khawp mai.

"hepa lakah hian i nem sawt ta khawp mai chhan ṭha deuh te a awm a ni lo maw? " min zawh vel dan aṭang hian Sadie nen hian min ringhlel a ni tih ka hai bik lo.

"Engmah a awm lo " tih hmuk pahin ka inher vut a,kal ka tum lai takin ka hnung lam aṭang chuan rang zet hian min rawn kuah thuk a...

" midangin min nghak reng tawh a nia"a ti a.

"kal sawn teh "

Kan pahnih in kan ṭhian dangte awmna lam pan chuan kan kal nghal a.

Declan an room kawngka a hawng chiah tih in Sadie'n min rawn koh thut avang chuan ka hawi phei nghal a, Declan lahin mak tih hmel takin min rawn en nghal hau lehnghal mahse Sadie ka hmuh avanga ka hlimzia erawh thup bo theih a ni lo ka hmelah a rawn lang chhuak nghal.

" Rainer ka be lawk thei che ngem?"

Declan awm ve reng mahse thil serious lutuk a nih ka rin loh avangin, "sawi rawh "tiin ka lo chhang let a , a hma aiin a zam hmel sauh in ka hria.

"umm....class zawhah ka project min en pui thei angem? "

A vawikhat nan a project tih pui turin Nolan nilo in keimah ngei min sawm ve ta!! Hetiang ang em em hian ka la hlim ngai lo.

"Ban ah min lo nghak dawn nia " ka tih takah chuan thawk huai pah min rawn nuih nghal ver ver a, a zam lutuk hmel te lehzel pawh hi a duhawm takzet.

Room-a luh lehnghal tum chuan kawngka chu ka ban a.

" ih...chuan movie ticket pahnih ka nei a i hman chuan.... "

" ok"

A sawi zawh hma hma chuan inngaihtuah nawn pawh ngai lovin rang tak hian ka lo chhang nghal! kei ai mahin ka bula ding hian mak a ti zawk!

"Khati kum zozai kha kan lo in hre ve tawh a vawikhat pawh movie en turin kan sawm chhuak thei ngai lo che" Inchhung kan luh rual chuan Declan chuan a ti nghal mawlh mawlh a ka lo ngawi reng thung.

"ṭhianpa khanu kha i duh a nih chuan tlang deuhin min hrilh rawh " a rawn tih rual chuan ka hawi let vut a, Sadie ka duh anga a sawi avang chuan ka mitmeng pawh a nelawm loh nghal hle.

"Engmah a awm lo "

" I in pawm duh lo a nih kha "

 A rawn ti leh ngat a mahse chhang buai lovin ka ṭhutna ṭhin ah chuan thatchhe zet hian ka ṭhu zui nghal.

Sadie ka hmuh hian ka hahdam in ka hlim ṭhin tih chu ka hria mahse ka duh tihna erawh a ni lo, a û tih nat ka duh laia a ni lo duh te chu thil thleng thei lo tawp a ni.

Message ka dawn avangin ka phone chu ka ipte aṭangin ka la chhuak nghal a, Sadie in ,*"ka lawm e"* tih ringawt hi a lo thawn chu niin ,thil ho te mah nise min ti nui lehnghal vur vur tawh.

Chutia keimah ang lo taka ka phone bih chunga ka lo nuih vur vur lai chuan ka ṭhian te chuan mak ti takin min lo en ṭhap hlawm a, thil maktak hmu te pawh an ang.

" Eng nge? " hawi chhuah pah chuan ka ti tum nghal hmuk a.

" i tho â em ni? " Zack chuan a rawn ti nghal.

"thil thleng hlimawm deuh a awm em ni? " Carter pawhin a rawn ti ve bawk a.

" kan hre ve chak ania min hrilh ve rawh " fiamthu titak deuh hian Declan chuan a rawn ti ve leh kher bawk .

Ka awmdan a danglam tih pawh ka lo hre lo, engtin nge ka awm?

"Thil thleng engkim kan hrilh vek ṭhin a mahse a ni chuan thil pakhat pawh a sawi chhuah ve ngai loh hi zawt zawt duh suh u " lungawi lo tih hriat takin Shane chuan remchangah a rawn la ve nghal bawk a, kei ngei pawh hian ka awmdan ka hriat bik loh laiin eng chu nge ka hrilh an phut? !!

"Amira nen in in kar a ṭha lo hle sia engtin nge i la nuih vur vur theih zawk?"

 Shane hi chuan Amira chungchang bak min sawipui tur a hre lo a nih dawn hi.

 Amira in kan chungchang alo va hrilh leh tawh a ni maw, engvanga kan inkar chungchang hi ka ṭhiante hmanga chinfel tum ziah nge maw a nih?

"Lungngaih na chhan tur ka nei em ni?"bawp khawkherh pah chuan a aia thatchhia hian ka han ṭhu leh a.

"I duh lo a nih chuan hnawl ve mai rawh hetiang anga hmeichhe rilru ti na kual vel lo hian "

Shane nen ka in chhan leh fak fak ṭan tawn avangin Zack chuan buaina a chhuah leh hma in "Guys...hmeichhia te chu kawp a ṭhen leh mai mai tur an move on leh vat zel tho " a tih chuan midang ho chu an nui nghal dar dar a, Shane erawhin min rawn melh khai thung.

"Amira hi keipawhin ka lo khawsak pui ve zuai tawh a...zei hle mahse zun a nei viau lo " Carter chuan intithei tak hian a rawn ti vel a, hetiang thil lampang sawi tawh hi chuan midang ho lah hi an lo phur nghal hlut zel.

"Hey.... hey tikhan sawi vak vak suh u Rainer an a thik ange" fiamthu in an tih pawh chuan engah teh vakah mah ka ngaih loh avangin ka lo nuih liam vel mai mai ringawt.

" E taka Shane nangpawh hmeichhe kawp zuai i neih ve hman kha " Blake an a tih chuan Shane chu za lo zet hian a khi nghal suk a.

"Sadie kha tiraw?" Carter chuan alo ti vat a, chu hming zet chuan ka beng a verh nghal zâr mai.

"....hahh khanu kha maw? in hre lo anih kha infawh a zei thlawt lo " nuih pahin elsen zeta a tih lai vel chuan ka hriat loh kar in ka lo in hum ruh hmanhmawh .

"A ni fawh ai chuan lollipop fawh pawh a hlawk zawk bakah a ni ang hmeichhe awlsam lutuk " a tih leh rual rual chuan ka sa nghal zak! ka insum hman lo chuan ka ṭhutna aṭangin ka tho chhuak thut a Shane chu ka ṭham tho nghal lawp mai!

" Rainer....thlah rawh" ka hnek hma in Declan'n rang zet hian min lo dang hman .

Kan rik tak hlut avang chuan midang ho pawh chuan min dan tumin an lo ding uai hman hlawm a, ka awmdan avang hian mak min tih hmel hle nghe nghe.

" Amira chungchang an sawi in i haw tawp si lo,engvanga Sadie thlavang hauh ta em em nge i nih? "

 Shane an tihchhan nei deuha a tih lai chuan khap miah lovin rum zet hian ka lo melh khai reng thung, awlsam taka kaltir mai mai ka tum hauh lo.

" ni e... nidangah pawh i nuih liam vel mai mai ṭhin a ni lawm ni ?"

" Rainer la thutak lutuk teh suh fiamthu vek a nih kha " midangin an rawn tih liam liam hnu ah pawh ka lung ala dam thei chuang lo.

" Rainer....engmah a nih loh kha "

 Declan meuhin vin zeta a rawn tih takah chuan buaina siam ka duh bik loh avangin Shane chu ka thlah ta ringawt a, min lo man bet tute kut ho chu ka thing thla pawp a, room aṭang chuan ka chhuak nghal a.

__________________________________________

Class banah Sadie hnenah min lo nghak turin ti mah ila a ni aia ka hman hma deuh hlek avangin car ah ka lo nghak ta zawka ,vawiin a thil thleng zozai avang ringawt pawh khan ka chau in ka rilru lak pen na tur ka duh.

Rei pawh ka nghah hma chuan darthlalang rawn kik keuh keuh ri ka hriat avangin peihlo zet chung hian ka han meng a,Sadie emaw tih nak alaiin Nikki in min lo nuih ṭhaw ringawt.

" rawn hawng teh " a tih chuan ṭhut ṭhat pahin kawngka ka hawn nghal a.

" i mood a fuh leh tawh nange?"

Ka lo bu nghauh a, Engtin nge maw a lo hriat leh tawh ni?

"i mood a fuh loh hi chuan i mithmul pahnih inkar leh i chal hi a chuar tup zel "

"Eng nge i rawn tih? " nuih pawh ka nui peih lo.

"I nu in min ko a, ka car a chhe lehzel bawk nen ka rawn zawng tawp che " ka nu hming a sawi zawng ringawt pawh hian ka thin a rim nghal hlur thei.

" Engthil ah? "

"A ngai te bawk enthla tur che in min ti leh tawh .... engpawh chu nise nui ve tawh teh ti ber bur kha chuan i hmelchhe teh mai a nia "

Nuih a hnek in a hma aia thinrim hmel ka put phah zawk, ka nu hming ka hriat rual hian khapa hmel kha ka hrechhuak leh ṭhin.

Khalh chhuak mai lova kan ṭhut dun reng takah chuan Nikki chuan, " tunge kan nghah kal ta che " a lo ti ve sek a, Sadie ka nghak a ni tih han sawifiah vak ngahna ka hre der lo.

" ka peih lo " Shitt... chhuanlam siam tur kan hriat miah lo chuh...

"enga? " Nikki chuan mak ti zet chung hian min rawn en ha ringawt.

Chutih lai tak chuan Sadie pawh a ṭhiante nen an rawn thleng phei ve chiah bawka Nikki in Sadie a hmuh takah chuan hrilhfiah leh chuan ngai lovin hrethiam niawm tak hian min rawn nuih ngal var mai alawm.

" hahh... kha i nui ve ta alawm,in in date na turah ka tibuai palh ang che u subway in ka haw mai ang " tih pahin chhuah nghal a tum ta mai,hetiang anga a awm hian engkim hi a ti awkward zo vek.

"Dawr thleng ka thlah ang che " tih pahin car aṭangin ka chhuak nghal a, Sadie nui hmel ka hmuh rual hian ka zâng nghal huai hian ka in hria.

A ṭhiante nen an inthlah fel hnu chuan amah fiam nan hrim hrim ning hmel zet in car bulah chuan ngawi reng in ka lo nghak ran a , a ṭhiante pawh khan min hmu thut kha mak an ti in an hamhaih deuh in ka hria, kan inkar a thil thleng kha a zep a ni tih hai rual a ni lo.

" min lo nghak rei tawh em? "

A awmdan hi a lai ṭut zel, a rilru thianghlim zia leh tawnhriat ala neih loh zia awlsam takin a hriat theih.

" aw "

" min rawn hrilh mai tur a nia bakah ka ṭhianten party na a kal turin min sawm a "

" Enga?  engtik ah? "

" Zaninah.... i kal ka ringa aw tiin ka lo chhang ve hmiah asin "

"ka kal dawn lo " ka lo ti hmak, a nihna takah chuan Sadie hi khatiang ang hmun bawlhhlawh lutuk ah khan a kal ka phal lo.

" mahse.... "

" lut rawh... " ka vin tak em avang chuan a lo ngaithei bik ṭhak lo, a hmel nelawm sar kha a rawn meng phungpui nu nghal hra a, kan tan chuan thil thar a nih tawh loh avangin kan in hnial buai leh ngei dawn a ni tih hrilh chawp ka ngai lo.

"kal ka chak bik reng reng hleinem... i awm ka rin avang chauh a remti mai ka ni " in hnial buai ka peih lo avangin ka lo ngawi reng thung.

"bakah i kal loh pawhin keimah in ka kal ve thei tho alawm... "

 He a luhlul na leh a thu duhna tak hi Sadie mizia a ka huat ber lai leh amah min hip tu ber a ni thung. Keimah ang chiahin a luhlul in a thil tih tawh loh ah chuan a rilru sawh sawn tir a har hle bawk.

"aih... " ka ti bul hmuk ringawt.

Party-a a kal apiangin buaina a tawk loh leh a rui chhe thei hle a ni tih hi ka lo hmuhhmaih ngai bik reng reng lo, a ruk in ka lo thlithlai kar ṭhin.

"ka dil hleinem che "

" tun aṭang chuan party ah i kal tawh ngai lo anga, zu pawh i in tawh ngai lovang a tawk em? " car chung chu ka beng nghal dawt a, min run luih na chi a ni tawh lo tih a hre chiang khawp ania nge a ngawi dak mai alawm.

" car ah lut rawh " tih pahin kawngkhar chu ka hawn sak a, ngawi rengin min hlauh hmel taka a luh takah chuan a chungah ka sual viau em ni tiin ka ngaihtuah chhunzawm nghal a, ka vin em avang khan ka inchhir leh hnuhnawh hle bawk.

Ka awm ti nuam lo zual turin Nikki chu alo awm ve tlat bawka, Sadie tan erawh a thawven thlak huai thung ang.

Car ka tih nun hma chuan ka ṭhutna bula ka cigratte dah chu la chhuak in inthlahrung lo zetin ka han ṭan khu nghal luih a, Sadie chuan a lo ngaithei lo leh tawh ngang mai a khuh nghal khak khak bawk.

 Cigratte ka zuk apiang hian Sadie in a huat zia ka hrechhuak ve ziah .

Ngawi reng hian ka zial nawr hlum na tur thir phek lian vak lo hi ka hma ah chuan a rawn lek kang va a, a hmel aṭang chuan laksawn mai a tum hmel loh, chutah Nikki lah chuan min lo nuih vur vur lehnghal .

" Eng nge? " hre reng mah ila ka zawt nawn leh ngat.

" nawr hlum rawh " hahh... thu a duh ka tih tawh kha, a tet tet nen hian a thu hnial hi a har phian a nia.

" a ral ṭep tawh "

Nikki melh hrak pah chuan ka ti leh a, Nikki pawh hian nghei turin vawitam min lo nawr lui tawh ṭhin a ka zawm leh dawn chuang lo a ni tih a hriat avanga nuih za a ni zawk mah.

" ok... a nih chuan i zuk zawh hunah min rawn hrilh dawn nia " tih hmak pahin car aṭang chuan chhuah a tum ta mai!!  a fiamthu em ni? engvanga mi khei dan thiam em em nge maw a nih le?

Kawngkhar a hawng chiah tih in a kiu ah ka va vuan bet hman, chhuah a tum tak tak nia mawle! a chhuah tak tak pawh ka lo ring lo asin, a tet ang aiin a rilru a lian reuh hle mai.

"a nih chuan kha... " a ngai te bawk maw!

"a rei tawh lo ang " keilah ka lo luhlul ve bawk, Nikki alo awm ve lehzel bawk nen han tlawm mai chu ka tum bik lo.

Nawr hlum ka tum lo a ni tih a hriat takah chuan a seat belt chu a phelh nghal rawk rawk a, a chhuak tak tak dawn a ni tih ka hre ve kar mahse tlawm ka duh loh tluk zetin hetiang vang mai mai a min kalsan daih chu ka phal bik lo.

" ok... fine " tih vin hluk pahin keimah ngeiin a thir phek ken lai chu ka va lak sak a, ka nawr hlum ruala Nikki mak ti hmel te chu en pawh ka en peih lo.

Duhthlan tur dang ka nei miau lo ka  cigratte aiin Sadie ka thlan zawk mai angai a chhan erawh ka hre lo, zial zuk hi tha ka tih loh ve tho vang te pawh a ni mahna .Engpawh chu nise a tawpah a tlawm zawkah ka ṭang leh ta duai duai chu a nih hi.

" i zu tawh lo ang tih min tiam rawh " ka tlawm a ni tih tih belh chhah turin min la zawt ang deuh deuh a.

" aw le... ka zu tawh lo ang " Nikki chu ka va melh zeuh a, a mak ti lutuk chu a khabe chhuatah a tla lo chauh.

Kei ngei pawh hian mak ka in ti ve tho, engvanga tlawm hi hreh ta miah lo nge ka ni tih ringawt pawh hi a mak tawk tawh hrim hrim.

Nikki te dawr kan thlen chuan Nikki in an dawrah lut lawk turin min tih tlat avangin ka va zui lut ta nge nge a, Sadie erawhin car ah min lo nghak thung.

" ka awih thei lo... khati kum zozai kha tumahin i zial zuk lai an dang thei ngai lo che nilo i thil tih lai hrim hrim engpawh tumahin kan dang thei ngai lo che a tuma thu i awih ngai hek lo....mahse Sadie thu erawh i awih hle si " a ti phei nghal mawlh mawlh a.

" a te ropui si...a Asian mit rapawm zeta min melh kha ka duh hleinem"

" hey!!  racist viau suh " a nui zui nghal hak a," mahse a asian mit sawn a khap hnan tawh che a nih ber hi "

" engthil nge? "

" engmah a awm lo "

" a nih ka kal.... "

" lo la ding lawk teh " tih pahin ka kutah lehkhabu hi a rawn hmehbel chawt a, ka  zuk chhiar nak chuan 'How to date' tih hi a lo in ziak kulh a.

"tuna i mamawh ber a nih kha ...hmeichhe han ti dan vel thiam mahla in date dan erawh i thiam lo "

"ka mamawh lo " mi ka date ngai loh avang ringawt in hetiang lehkhabu hi ka mamawh tihna a ni lo bakah indate tih vel hi ka mamawh lo.

"tikhan ti tawp zel suh.... la rawh ,nakinah lawmthu min la hrilh dawn nia "

Min pek luih tlat avangin Sadie hmuh hlau tak chungin ka jacket hnuaiah ka thun ta ringawt a, car lam panin ka let lehnghal a.

Fakna khu hmet zeuh ang u aw ...xoxo