Rainer Black-42 by Remruati Bawitlung(Haylor)

CHAPTER -42

"Take my hand

Take my whole life too, 

For I can't help falling in love with you"

Kan thil tih zawh chiah kha ka ngaihtuah let a, nuih ver ver pahin a sam thlantui in a tih hnawm chap ah chuan duat takin ka lo chul sak heuh heuh a ,ka thinphu rang lutuk te chu tih zia awm tum chuan ka awm chu ka sep lawp lawp a. Ka thlan tui in min bual huh nasat mai bakah a na te chu la reh lo mahse Rainer hmel ka hmuh ringawt pawh hian ka dam sawng sawng thei in ka hria.

Tlema kan awmdan a pangngai tak hnu chuan Rainer chu ka bulah chuan a let thla tawp a, ka mit ah tak chiang taka rawn en lehin ka mittui ka biang vela tla niai chu min rawn hruk reh sak pahin ka hmuiah a rawn fawp zeuh a,"lo hnai teh " tih pahin a ban kham turin alam ah chuan min pawt hnai bawk a, inchung thlir dun pahin ka sam chu a chul heuh heuh bawk.

" ka tihpalh,ala na em?" a rawn ti sap a, a inthiamloh em avangin vawi engzat nge ngaihdam min dil dawn ni.

" umm... tlemin" a na miau a, a na lo tiin dawt ka sawi peih vel lo.

" i bula ka awm tawh hi chuan ka insum thei ṭhin lo a tin ni "

Keichuan insum thei ka ti zawk a chhanchu ka phalna la hmasa lo chuan min khawih ngai lova, ka in rin hun thleng leh ka in peih hun thleng min nghak ṭang ṭang bawk.He thil hi ka inngaihtuah fe hnua ka thutlukna siam a ni a, ka duh thu ngeia ti ka nih avang Rainer thiamloh pakhatmah a awm lo.

" Rainer inthiamloh angai lo " a awmah ka kut phah chu ka nghat a, a khat tawkin ka beng thek thek bawk a.

"ka chunga khatiang thil titu khan tuna ka rilru put ang hi a pu ve angem? "

A thusawi ka hriat thiam loh em avangin mak ti takin ka han melh a, a mitmeng chu natna leh hrehawmna hlir in alo khat a, thil tamtak a ngaihtuah tih hriat takin a melh ngai chu a melh vung vung bawk.

" engthil maw i chungah an tih ?"

" thawnthu sei tak a ni, i hre duh kher lovang " a tih phei chuan ka hre chak nghal zek zek a ,sawi tura nawr luih mai te ka duh.

"sawi vat vat teh... " hre chak hle mah ila ka hre duh tak tak em tih erawh ka chiang lo a chhanchu Amira chungchang pawh alo ni maithei.

Urghh!!  Sadie. ..tun ah hunah Amira ringawt ngaihtuah lo teh.
Ka hrechak lutuk hmel a hmuh chuan khik suk pahin ka kutṭang karah a kutṭang chu a rawn rawlh lut a, thawk hak pahin a hmer nghal vawng vawng a.

" i hre duh tak tak ang maw? " a rawn ti leh ngat a rum zet a melh ram ram pah chuan ka lo bu nghat a , engvanga thil hrim hrim hi min zawt nawn reng nge maw a nih le? 

" I vannei in i perfect bik min tih lai kha i la hre em em? " tia bul a ṭan chuan ka lo bu nghat a, ka sawi lai pawh ka la hrechiang khawp mai.

"kei hi ka vannei in ka perfect bik reng reng lo mi vanduai tak ka ni zawk asin....Kum14 mi chiah ka nih laiin Nicolas (Nikki) nen frat party ah kan kal ru a,kan vawikhat na a ni bawka zu pawh kan in hnem ngang mai,kan rui lutuk kha kan che hlei thei lo a ni ber. "a tih zawh rual chuan a han thaw chhuak hak a, ka rilru te te chuan party na ah a kal hma ka lo ti hle.

" ka ruih tawh em avangin hmeichhe pakhat chhelo fahran leh inha bul zet mai hian room ah min chhoh pui ta ringawt a, room a kan luh rual rual chuan khumah min bawh thlu tawp a, duhthawh zet hian min rawn fawp nghal huam huam bawk a chumai chu duhtawk lovin ka kekawr chu min phelh luih sak bawk a, ka mipatna chu rawn fawp in a khal kual vel chiam bawk. Ka rilru harh fim vek in duh lo hle mahila ka chet theih tawh miau loh avangin khami zan khan kha nu nen khan tih luihna in kan mudun ta ani "

A sawi zawh rual rual chuan mak tih na in ka khat nghal! Rainer hian sexual harassment alo tawk tawh amaw !!! Hmeichhia te chungah chauh a thleng ṭhin emaw ka lo ti a mahse mipa te chungah pawh alo thleng ve thei tho a nih hi mahse Rainer ka duhna hi chhete pawhin a tlem phah lo .

" midang hria an awm tawh em? "

 Mak ka tih rual rual in ka lo thinrim pui zawk! khatiang ang hmeichhia tenawm lutuk a tawng fuh avang khan ka lainat in hmeichhia te hi a rin tawh loh nachhan ah ka puh hmiah.

" nangmah chiah.... Nikki takngial pawhin a la hre lo "

" i nu pawhin a hre miah lo amaw? "

" uhmmh...Samantha maw?" tih pahin a khi lui suk a, "a ni hian engmah a hre ngai lo,min ngaihsak bawk hek lo. A chang hi chuan ka piang ve tih pawh a hrelo niin ka hre ṭhin "

"Engvanga i nu hi haw em em nge i nih? ka sawi awmzia chu....."

Ka tum loh deuhin ka zawt phawng ringawt!! mahse a nu chungchang zawt mahila a hma ang khan a lo thinrim nghal hlur tawh lova, a in hawng tak em avang hian mak ka ti lek lek zawk.

"ka duh duh min pe tawpa mahse ka bula awm aiin a ngaihzawng te bula awm a thlang zawk, inah pawh a awm ngai mang lo ,Nanny(nau awmtu) a hire tawp a chu chuan min enkawl mai ṭhin.

Samantha Walker hi en ringawt hi chuan hetianga a awm hi in ring pha bik miah lovang ,tupawh maiin a an zah rawn leh ngaihsan rawn a ni a kei ngei pawh hi a ngaisang tute zingah chuan ka tel ve nghe nghe.

"Tlai khat chu kan school Paris trip chungchang sawipui turin ka school bang chu a room ah ka tlan cho a mahse a room a ka thil hmuh i hre duh em?" rawn kun pah hian a rawn ti sap a, amah chu ngun takin ka lo en kar ringawt.

" ka mit ngeiin mipa pakhat nen an khawsa lai ka hmu " a tih rual rual chuan ka mengphawk nghal kawk a, Rainer an a nu a lo huat em em nachhan kha ka hriat takah chuan ka dem ta hauh lo mai, kei ni ila chu tun thlengin ka hmuh duh tawh ka inring lo.

" chuan engtin nge i tih chupa chu i hnek hrep em? " ka lo ṭang lutuk chu ka hah vek thei ,Rainer ni ngat ila chu a hmunah chupa chu ka pawt darh vek ang mawle .

Ka lo thinrim pui lutuk a ka zawh loh tur tur pawh ka zawt ta zeuh zeuh mai.

"hnek e..." tih pahin min rawn nuih suk a, "damdawiin kalpui ngai khawpin ka hnek mahse ka nu erawhin inthiamlohna nei hauh lo in ka thiam loh ah a puh thla ta veka khata ṭang khan engmah hi a kal fuh thei tawh lo,ka nu laka ka thil duh zawng chu a ngaihsakna tlemte chauh mai hi a ni "

" chupa chu police i man tir lo a nih chu..." ka tih chuan lungngaih hmel tak hian min rawn en a, ka kut khawih neuh neuh pah hian," man tir ka duh ṭhin alawm mahse  ka thei lo "

Eng nge maw a hriat a tun ataka a zaidam tak viau le? Hai rual loh in heng thil rapthlak lutuk zozai avanga anxiety leh Pannic attack nei ṭhin a ni tih hi hrilh ngai lovin ka hre nghal a, heng a thil paltlang tawh te ngaihtuah hi chuan a puitling zawk ka ti takzet.

" mahse heng thil te hi engvanga keimah kher min hrilh nge i nih? " ka han ti leh a, a mak ve bawk em a ni engvanga a thuruk te hi ṭawmpui duh ta tlat nge a ni tih hi ka hrethiam thei lo.

Engvanga Amira pawh nilova kei kher min hrilh nge a nih?  Lalpa leh!  Rainer bula ka awm tawh hi chuan ka rilru hi zawhna hlirin a khat reng mai chu a nih hi.

" i chungchang ka hriat tam tluk zetin ka chungchang hi hre ve la ka duh a ni "

Min chhanna avang hian lawm avangin ka mittui a tla thei takngial dawn in ka hria. Rainer hian min duh ve tak tak emawni le?

"ka lawm e " ka ti ta ringawt a,

A nihna takah chuan duh chauh nilo in ka hmangaih a ni tih hi hrilh ka duh takzet ,a zunah hian ka uai takzet tawh a ni tih hi hrilh ta ila min hmangaih thu hi min hrilh let ve angem le?

Maimichhing paha a ban ka khawih vel na lamah chuan pawng deuh thluah thluah awma ka hriat avangin en chiah tum chuan ka han meng a, a thisen zam pawng mai mai emaw ka tih kha ka han en chiah takah chuan ser a ni mai hian ka hria mahse a tattoo in a khuh hneh em avangin zut loh chuan a hriat loh.

" Rainer heihi ser em ni? "

Ka kawihna lai chu a ban lak kan pah chuan a han thlek vel a, "umm" tih ringawt in min chhang.

"I banah hian a awm thluah mai ngatinge? "

" ka inzaina a nih hi....in tihnat ka lo tum fo tawh ṭhin alawm" hei erawh zawh thui lutuk ka duh lo, a nun hlui hrehawm tak te kha hriatchhuah tir leh hi ka tum tawh lo.

" chuan ser te hi tattoo in i khuh bo tihna em ni? "

"a chinfel dan awlsam ber a ni miau a "

Rainer hi ka rin ang alo ni tawp lo mai, duhdah taka khawsa thin angin lang mahse a thil tih engkim hian a phenah chhan ṭha tak tak hi a lo inthup bo ziah a, a tattoo chhut nachhan mai mai pawh hian thawnthu thui tak a neih zel avang hian a chungchang hriatbelh zel hi ka chak.

☆5:15 pm☆

Balcony aṭanga thli rawn thaw heuh heuh chuan min ti harh hlawl a, ka han hawi chhoh nak chuan Rainer'n mutthilh sak sak pahin nghet takin min lo kuah chu niin,ka nui nghal ver ver mai . 

"ka hmangaih che " zawi sap hian ka han ti a, a mutthilh avangin ka thusawi erawh a hrelo.

Mut lehnghal mai ka han tum a mahse a lo tlai ruih tawh avang chuan sana chu ka han thlek zeuh a dar5 a lo pel der tawh chu niin ka phu deuh zawk bawk!!

" Braydon " thil hriatchhuah ka neih avangin min kuahna kut chu amah ti harh lo thei ang ber chuan ka han dah sawn a, a chau bawk aniang a harh eih lo hrim hrim.

Rainer a mu lai hi kaihthawh duh viau mah ila a la muttui em avangin kaitho ta lo chuan ka in ha nghal sawk sawk a ,ruak veka ala awm avangin puan chu ka sin ṭhat tira thawm dim thei ang berin ka chhuahsan nghal zal zal bawk.

Bus station ka thlen rualin bus a rawn thleng hlauh a, reiloteah in pawh ka thleng vat. Kawng tluanin Rainer leh kan awmdan vel kha ka ngaihtuah let a lawm loh in keimahin ka lo nui leh ver ver ṭhin.

In ka thlen chuan vanneih thlak lutuk in kawtah ka û car alo la awm lo hlauh a, a awmzia chu ka û a rawn la haw lo tih na, vawiin hi ka vanneih ni a ni ringawt alawm.

Ka lo chau ve deuh bawk nen ham bai bai paha inchhung ka luh rual chuan Nolan chu couch aṭang hian a rawn ding chhuak nawlh a, min lo la nghak reng a ni tih ka hriat hian nuam lo ka ti letling zawk.

" Sadie i ṭha maw? "

" i lo la awm elaw....ngatinge i haw mai loh "

"engtin nge khapa nen in chhuah daih hnuah ka hawsan daih thei ang che, i û rawn haw thut ta se engtin nge i tih anga ?" min hau titih ta maia, Nolan lehzel hi chuan min hau lo se ka duh.

" a rawn la haw chuan lo hi, bakah dar6 a ri dawn tawh a i nu i kân dawn lo em ni? " ka ring kham lutuk chu ka han dawm a, ka bam bai bai reng bawk .

"Enga!! call pawh la lovin khawi hmunah emawni i chhuak daih a, ka lo nghah che avangin ka nu bulah pawh ka kal lo " Rainer angin vin ve lo mahse a thinrim  takzet a ni tih hi hai rual a ni lo.

" pawi ka ti lutuk, ka chau lutuka mut ka duh naktuk ah kan sawi tha leh dawn nia " tih sam et paha inchung chhoh ka tum lai tak chuan ka kiu ah dawm in min pawt her nghal sawk a, hnaih zet hian min pawt bet tlat bawk.

" khapa nen khan khawiah nge in kal?  engtin nge a tih che?  a khawih na che em? bakah hepa hi mi hlauhawm a ni tih hi hria la ka duh "

Rainer chungchang hetiang anga a sawi takah chuan ka kham ta hle mai ,engvanga Rainer nena kan chungchang pawh chu min zawt peih em em nge maw a nih le? a hriat tur thil a awm chuan ṭha deuhin ka hrilh mai ang.

" min thlah rawh " tih vin hluk pahin min vawnna chu ka paihthla tawp a,mak tih hmel takin min lo en kar bawk. " Kan kalna pawh chu engvanga hre chak em em nge maw i nih le?  ka nunah hian lo buai lutuk teh suh. Nolan engvangin nge min ngaihtuah em em? "

" a chhanchu ka duh vang che a ni " ka mit ah tak chiang taka rawn en pah chuan a ti ta mai!!  ka nghing nghal lawih in ka hria.

" Engmaw? "

" Engkim hi hre ve tur i ni asin,i thil tih engkim hriat vek ka duh a, ka thei lo a nih pawhin puih hram hram che ka duh bawk ṭhin ,humhim che ka duh a i hlimna hi ka duh ber a ni .Ka ṭhian ṭha tak i nih mai bakah ka nuna mi pawimawh tak i ni asin "

"chuan ka hnung lam aṭangin min lo bum reng amaw?  ka ṭhian ṭha tak angin i awm vela mahse i ni lo "

Nolan awmdan hian ka lung a ti awi lo takzet. A chungah eng rilru danglam mah ka put loh mai bakah Rainer hi ka hmangaih a, rinawm loh san emaw a thik tura awm hi ka tum lo bûr.

" Sadie... hriatthiam tum teh, i lakah hian engmah ka beisei lo ka duh zawng chu i hlimna leh i himna hi a ni "

" nilo.... engtin nge i lakah hian ka him a ni tih ka rin theih tawh ang ni, ka hlimna i duh tiraw ka thil tih ang apiang hi min lo en tawp la ka hlim a ni mai "

Nolan a hma ah chuan a rilru tur pawh ngaihtuah lovin ka ti ta piap piap mai. A nihna takah chuan ṭhian ṭha tak a ni emaw ka lo tih laia hetianga a awm avang hian ka haw takzet.

"engtik ni ah emaw chuan khapa khan i thinlung ala ti keh chhe vek anga chumi hunah chuan ka hnenah i rawn kal dawn nia, ti hlim tur che leh humhim tur che in i tan ka lo awm reng ang ,ngaizawng tur che ni lo in "

" chhuak rawh " Rainer hi engvanga puh chhe em em reng nge maw an nih le?  min ṭha tak a ni tih hi engvangin nge a awih duh miah lo.

"ka thusawi kha hre reng rawh mangṭha le " inhum ruh pahin Nolan chu a chhuak nghal hlawk hlawk a, ka ṭhian ṭha tak leh ka harsatna ah pawh ka lo pun ziah ṭhin kha ka chan takah hian ka ruak vek in ka inhria a, ka lungngai takzet bawk.


(Rainer sexual harassment ka tawn tir nachhan chu kan fanu ang bawkin kan fapa te pawh hian sexual harassment an tawng ve thei tih hria la ,i fanu i ngaihtuah ang chiahin i fapa pawh thlithlai ṭhin ang che. Hmelhriat loh te laka an him loh chu sawiloh hostel, school leh zirtirtute lakah pawh an him zo tawh lo a ni tih hria la engpawh tawng thei vek kan nih avangin i fanu/fapa in thil a hrilh ngam loh khawp che in in hmuam up suh ang che. )

Fakna chu chhiar zawh veleh hmet keuh ang u aw