Rainer Black-39 by Remruati Bawitlung(Haylor)

CHAPTER -39

" They saw devil but I see Angel" 

"Kendra!! "

Sawi mai tur pawh ka hre lawk lo ,a ni ang tho in keipawhin ka hmuh thut avang hian ka hamhaih nghal vek a mahse ka rilru ah erawh Braydon a rawn lang hmasa ber thung.

" Sadie... kha kha Rainer a ni lawm ni "

"aw... ughh, ka... ka sawifiah thei ang "

" nilo...in in fawh kha" a hmela hlauhthawnna te chuan keimah zawk hi min ti hlauthawng zual a, ka ú a hrilh ang tih mawlh ka hlau.

"khawngaihtak in Braydon hrilh lo hram rawh " a enga mah hma chuan ka ti nghal ringawt a.

"an in huat zia pawh i hre ve veka engtin nge hetiang thil hi i û chungah i tih theih zawk?"

" ka... ka hre bik lo "

 Ni e, kei takngial pawhin hetiang thil ka û chunga ka tih nachhan hi ka hre tawh bik lo. Tunah hian ka rilru hi thunun in a awm mek a, Rainer a zûn ah hian chhuah lehna awm tawh lovin ka uai let der a ni tih hi tuman an hrethiam pha kher lovang.

" a hlauhawm lutuk a ni tih i hre ve lo em ni? "

Chu chu tupawn Rainer chanchin an sawi dan a ni. Hnaih lo turin leh a hlauhawm zia min hrilh chamchi thin mahse keichuan a hlauhawmna ka hre ve tlat lo, hlat a hnekin mi rilru ṭha tak a nih zia ka hriat chhuah phah zawk.

"Chhanna pakhat mah ka nei lo, ka û i hnaih na chhan ang chiah kha a ni mahna " ka ti hul hak a.

Kendra pawh hian kei ang chiahin Braydona lerh zia leh a luhlul zia a hre ve vek a chutichung pawh chuan tun thlengin a la chelh ṭang ṭang reng tho.Braydon hnena thil danglam riau a hmuh ang chiah khan keipawhin Rainer ah hian thil ṭha tak ka hmu a ni.

"ni e ...chhuah lehna a awm tawh lo tih erawh hre reng ang che "

Ka awmdan min hriatthiam pui avang leh ka tang ngheh tawh zia a hriat chuan min khawngaih em avangin a mittui chu a rawn tling nghal pam a, a lo tawrh nasat tawh zia leh Braydon avanga a mittui a lo tlak hnem tawh zia a ngaihtuah chhuah leh vang pawh a nia nge.

" engtik ah emaw ka û chu ka la hrilh em em ang mahse hun min pe rawh "

Rainer nena kan chungchang hi ka û hnena zep hlen hi ka tum bik hauh lo mahse tun tut tut a hrilh nghal tur chuan huaisenna ka neih loh mai bakah inngaihtuahna hun ka la mamawh. 

" ngun takin inngaihtuah la fimkhur hle ang che " sawi lo tura ka ngen tlat avang chuan a ti ta nge nge a, ka û ang lo tak maiin rilru zau tak a put avang hian ka nihlawh takzet .

" ka lawm e " tih pahin ka kuah nghal thlawp a, kan in hriatna la rei lo hle mahse ka û tak tak angin ka en hmiah tawh.

☆

Thil tisual ang maiin inchhunga ka luh chuan ka zam in ka û hmuh chu ka hreh nghal em em ringawt a, ka hlauhthawn em avang chuan engmah a la hriat ve loh thu ka in hrilh nawn nghal mawlh mawlh bawk .

" vawiin ah class kal lovin khawiah nge i awm? "!!

 Braydon an a rawn tih rual chuan in chunga ka cho tur chu ka ding nghal chawt ringawt !! vawilehkhatah ka taksa chu a rawn lum nghal pup pup a ,ka thlan te lah chu a rawn hnam chhuak nghal ṭiam ṭiam bawk.

" ka...ka " ka dang a awk leh tlat tawh!  zawhna ni ta chu engtin nge class ka kal lo tih hi a hriat theih ?

"Michael an a rawn zawng che a mahse a hmu lo che, khawiah nge i kal ?" Michael bawk chu!!  ka û ṭhianṭha tak leh ka nel ber mah nise ka û hnena min hek reng mai hi chu ka kham tawh takzet.

" ka project buaipui in ka chhuak lawk a nih kha"

 Rainer nen kan awmdun tih hrilh tel kher lo mahila dawt ka sawi bik lo, laboratory ah kan kal miau alawm.

" naktuk hi weekend a ni tawh a buaipui na hun a tam lutuk, mahse class kal lo ṭhak khawpa buaipui tur erawh i ni lo " thupe deuhin ka tih tur  leh tih loh tur a sawi avang chuan ka lo thaw chhuak deuh hak a.

" C'mon.... naupang ka nih tawh loh hi "

 kan ṭan leh dawn ta, ka û strict tak mai leh a nau zalenna duh em em mai hi a chhan ngai bawkah kan in hnial reng mai dawn chu a nih hi.

" kum18 i tling tawh emaw tling lo emaw ka thusawi hi awih ringawt mai rawh, tiam chin awm lo in grounded i ni e "

(grounded chu discipline siam nana school emaw thil pawimawh ah chauh loh chuan chhuah phal lova in hren na )

" Enga!! "

" i room ah chho nghal rawh... i ṭhiante inah pawh kal phal i ni tawh lo " a tih rual chuan ka thinrim lutuk chu ka inhum ruh nghal ṭun a,engmah sawi lovin rum zeta melh pah chuan ka room lamah ka tlan chho nghal hlawk hlawk a, room ka luh rualin kawngka chu ka khar nghal ṭhuai bawk.

"ka haw lutuk che "

Tih vin hlak pahin ka bag chu chair ah ka nghat chawrh a, ka lo tih ṭhin dan ang chiah in khumah ka lawn nghal a ,ka khup bawh chungin ka ṭah chhuak lutuk chu ka in hnit nghal hlawp hlawp bawk .

Ka û duhloh zawng ka tih apianga hetiang zawnga min hrem ziah ṭhin hi chu ka kham tawh takzet ,vawi khat phei kha chu kar khat dawn chhuah min phal sak lo lehnghal tun ṭumah pawh hian a daih rei leh viau ang le.

Dinner pawh ei duh lovin ka titau chu khuma ka mut ngat reng lai chuan ka room kawngkhar chu a rawn kik leh karh karh tawh a, ka û hmel ka hmuh peih thlawt loh avangin blanket a inkhuh ṭhat pahin ka maimichhing nghal daih a, min hrem chhung chu ka be dawn bik lo.

Ka chhan duh miau loh avangin kawngka kalh lo mahila a rawn la kik char char avang chuan ka ning lutuk chuan a tawp a tawpah blanket tlawh hlim pahin ,"keimah chauha awm ka duh " ka va ti nghal tuarh a, ka ṭah na lamah ka mit te lah chu a bui chur lehnghal.

"umm...i thinrim viau em ni? " kawngka a rawn dah dek dek pahin Nolan an a rawn tih chuan ramhuai hmu ang maiin ka mengphawk nghal kawk a,ka mit vai a nih ringin mak ti tak chungin ka ṭhu chhuak nghal zawt bawk!!

"Nolan hetah engtin nge i awm theih?" ka mitvai hmu sual mai mai a nih ka la ring hram.

"vawiinah ka rawn kal ang ka tih tawh kha "

" mahse Braydon kha, nilo i rawn lut ru em lo tiraw? "

A rawn lut ru te anih ngawt loh chuan Braydon hian awlsam takin ka roomah a rawn luh tir hauh lo ang .

"nilove i û nen pawh ka in bia alawm... c'mon tho rawh hun kan ngah lo a nia "

Khum tlanga ṭhut pahin ka hnungzangah a rawn beng thak a, nuih let ver ver pahin phur takin ka sam pheng zet chu ka ṭawn tawm tawp a,ka tho chhuak nghal bawk.

Ka û in chhuah phal lo mahse midang rawn leng a phal tal a, kawm tur ka neih avangin ka lawm takzet.

" dawhkan ah khan lo in rem fel rawh engmah ka la ei lo a ka ril a ṭam lutuk"ka pum tuai nauh nauh pah chuan ka ti a, ka ril a ṭam tawh bawk a ka pum a thip vek tawh.

"aw le...rei lo la ,thinrim avangin chaw nghei tawh suh " nuih vur vur pahin min rawn fiam a ka lo nui tawi tap mai.

Thawm dim thei ang berin leh ka û hmuh hlau tak chungin kitchen lam ka pan chhat chhat a, ka hlauh ang ngeiin ka û chu kitchen ah a lo ṭhu khur mai.

 Min rawn hmuh chuan min rawn melh hrak hrak pahin a hrawk chu a han thian nghal kharh kharh a, ka hmu lo der hmak thung.

"oven ah pasta ka dah i duh chuan i ti lum nghal thei ang " a rawn tih pawh chuan chhang lovin fridge a sausage chu la in ka thial chuap chuap a, in tur zawngin cold drinks kan dahna chu ka bih duk duk a.

"beer a awm tawh lo bawnghnute kha in mai rawh " ngeiawm zeta a rawn tih leh rual chuan mit tih chet ralh pahin coke bur lianpui chu ka la chhuak nghal a," ka be peih lo che tih i hriat kha " tih kher pahin fridge chu ka khar nghal chawrh bawk.

"engpawh chu nise Nolan kha mipa fel tak a nih kha " ka thil ei lai ka phuh chhuak ṭep.

Ni dawn tak Nolan'n an inbiak thu kha a sawi tak,engtak chu sawi ang maw ka û in fel a tih ve ngei a nachhan,ughh...Nolan hi chu a fel ve hrim hrim a ,a awm ve tho e .

"ka hria alawm " engah mah ngai lo ang deuh hian ka lo tisam et a, chhungril ah erawh ka mipa ṭhian kawm fel a tih ve ngei avangin ka au vak vak thung.

Ka û hi chuan a rin tawh laklawh hi chu engthil ah pawh nise a ring deuh bur ṭhin chutiang chiah chuan Nolan pawh hi ka room a rawn kal tir ngam khawpin a ring leh bûr tawh a nih hmel.

"han chho tawh rawh zan a rei mai dawn " amah zawk chu a ding nghal uai a, zanin chu a chhuak har emai party na ah kal lovin inah a awm dawn a niin a lang.

" ka putea te nen inkhel kan en dawn a i duh chuan i rawn kal ve thei ang mahse hmun dangah i chhuak thei tihna erawh a ni lo ania " chhuah phal loh ka nih thu chu min rawn hrilh nawn leh kher pahin a kal nghal nal nal a ,lungawi lo zetin ka lo ner nang nang thung.

Braydon a chhuak tawh bawk a rang takin oven a pasta chu ti lum nghal in eitui dang leh coke bur lianpui ka lakchhuah taka kha ka pawm nghal ṭun a, tlaivar tur ang maiin alawm le ka in puahchah ni.

☆

Nolan an lehkhabu a chhiar neuh neuh lai chuan khumah ṭhu in ka eitur lak chhoh ang ang chu ka ei nghal mawlh mawlh a ,ka ṭamchhawl hman lo chauh a nih kha.

"eng nge i nu chu a an? " ka hriatchhuah thut avangin ka zawt hlawl a.

"ṭhat lam a pan zel niin ka hria.... a hmuh chak thu che lo hrilh tur che in min chah nghe nghe asin "

" a ni maw!!  keipawhin ka hmu chak takzet " a nu hi ka la hmu lo na in Nolan a mizia aṭang hian nu fel tak a ni dawn tih a hriat mai.


" naktuk ah ka kal dawn asin "

"umm... i hriat kha ka û in min la hreng dawn, weekend boring tak a ni leh dawn a nih hi "

"a nih chuan damdawiin a ka kal zawh veleh ka rawn kal thei ang "

" i ti tak tak em?  chuan movie kan en bawk anga " phur takin ka lo ti nghal zung zung a, ṭhian ngaina tih takah mahni in ka awm dawn loh phawt chuan ka hlim leh em em tawh.

"ni e... i duh duh kan ti dawn nia "

Min rawn melh vung vung pah hian ka hmai rawn khawih tum chuan min rawn ban ta thut mai!!! min rawn fawp dawn emaw ka tih avangin chet nachang pawh hre lovin phawk fe hian ka lo melh nghal kawk a, sawi mai tur pawh ka hrelo.

"i ei ṭawp teh mai ania,i hmuiah cheese a kai nuai mai "

Nuih vur vur pahin ka hmuia thil kai a rawn nuai reh takah chuan ka lo thaw nghal huai mai mahse nidanga ka hmuh ngai loh deuh a mitmeng hriatthiam har zet chuan thil awmang lo deuh min ngaihtuah tir phah.

___________________________________________

Braydon an kan in piah lawka ka putea te car silna dawrah awm turin min tih tlat avangin phur lo zet chung hian counter chu ka nghak ran a, a ni erawh Kendra te dawrah a thawk ka tih tawh kha chutah chuan a kal daih thung. Inah awm kher lo mahse ka û hi ka hlau bawka ka chhuak ngam chuang reng reng lo.

Ning hle mah ila Nolan an nizana min lo tiam tawh angin a nu a kân zawhah a rawn kal thei hlauh a, ka û in rawn len a lo phal lehzel bawk nen kan pahnih in dawr kan nghak thei a a nuam phian lehnghal.

"lo ti ve duh tawh suh keimah pawhin ka ti thei reng alawm bakah midang pawh an awm tho a"

Ka car sil lai lehzel min rawn tihpui vek avang chuan ka inthlahrung chuan ka ti deuh chhen a, a ni lah chu a phur sauh emaw tih mai tur hian car bal zet te chu a nawt ang sauh sauh a.

"i chau tawh em kha lo va hahchawl zawk rawh "

" i rawn kal aṭangin i la thawk char char a midang hi tih tir ve tawh rawh "

" Sadie bawihte customer pakhat kan nei leh a saw mi saw i tihfai hnu ah chuan i haw thei tawh ang " ka nutei chuan a rawn ti hlauh a mahse dar2 chiah ala ri a ka hlawh tlem phah dawn avangin haw mai ka tum bik hauh lo.

"ka hmanhmawh hran lo, dar 5 thleng ka lo awm zawk ange " peih tawh lo hle mah ila pawisa hlawh nan chuan ka la ti ve ṭang ṭang .

" hahh... va hahchawl zawk rawh i hlawh pawh a tlem phah dawn chuang hleinem " ka rilru hre lawk niawm tak hian min lo chhang let nghal vat a.

"umm... mahse "

"swimming pool a hnahthel tla min lak chhuahpui avanga lawmthu sawina ah ngai rawh "

Ka lo inthlahrun ve tumhrang ṭhin avangin ka nutei chuan a ti ta ringawt a mahse ka in thlahrung lutuk tur erawh a zia deuh.

Nolan a lo awm ve reng bawk nen ka nutei hian min khawngaiha min ban hma tir a ni tih chu hre tho mah ila vawiin zet zawng ka phur vak lo bawk nen ka hnial ṭha duh lo.

" Nolan lo va inthlak rawh car pakhat chiah a awm tawh bawka keimahin ka ti thei mai ang "

" kan pahniha kan tih chuan kan zo hma zawk ang " a sawi dik viau nangin ka tibuai hreh zozai tawh.

"aw le... engemaw vawt deuh ka in chak "

Sawi chhan nei deuh hian ka han ti kher a, hetianga ka ti te a nih ngawt loh chuan Nolan hian engtikahmah keimawhin min sil tir dawn lo reng reng tih hi ka hre ve kar.

" tahkhan min lo nghak rawh ka va la ange "tih pahin hmanhnawh takin a tlan nghal a, keilah lo nghah chu sawiloh car lo sil ṭan hman tumin ka tlan chuak nghal dawr dawr thung.

Nuih hawr hawr paha car sil tuma ka tlan chhuah nak chuan ka car sil tur chu eng dang nilovin Rainer car classic Mercedes Benz ngei kha lo ni rengin, nuih tawp riai riai pahin ka ding nghal chawt bawk.

"Rainer " ka tih sap rual chuan a glass chu a down nghal a,a Shades vuah lai phelh pah chuan a signature hman uar em em,rum zet hian min rawn melh leh rûn tawh.

(chhiar zawh vekeh Fakna mawlh kha aw)