Rainer Black-30 by Remruati Bawitlung (Haylor)

CHAPTER -30

"once you go BLACK you'll never go Back" 

★Sadie's Pov★

Nikki te dawrah lehkhabu hawh ka duh mai bakah a hmunah a chhiar nghal theih avangin Nolan an Nikki te dawr thleng min rawn thlah a, a ni erawh in hna thawh tur a neih avangin min kalsan vat thung.

Nikki te dawr hi lehkhabu dawr a nih chu thuhran lehkhabu chhiar nghal na tur couch lian tak tak pathum a awm nghal a chumaibakah lehkhabu chhiar laia in tur drinks pawh a order theih nghal bawk.

Ka kal hun hi midang tam loh lai tak a nih avangin a hma aiin a reh zual sauh a mahse lehkhabu chhiar nan chuan duhthusam a ni.

Self service a nih avangin ka drinks  order ka lam hnuah ka duh na lai berah ka ṭhu nghal thak a, ka lehkhabu ken lai 'The fault in our stars' chu keu nghal in ka chhiar nghal mawlh mawlh bawk.

Ka rilru zawng zawng nena ka chhiar malh malh lai chuan ka han hawi chhuak a khua alo thim der tawh chu niin!!

 Rang takin ka sana chu ka zuk melh nghal vat a darkar hnih dawn ka awm tawh a ni tih ka hriat rual chuan ka chhiar chin chu bookmark a chhinchhiah in ka khup nghal thak a,ka hun hman tawh a zawnga darkar 2 rei lo ber a la ni hial ang.

Lehkhabu chu a awmna ngaia ka dah let leh hnu chuan ka bag chu ka zip ṭha nghal mawlh mawlh a ka chhuak tur chu Nikki nen kan in tawk hlawl mai!!

"Hello... " tih pahin min rawn nuih nghal sang a, hello tiin ka lo chhang let ve nghal bawk .

" i kal tawh dawn em ni? "

"aw... ka duh aiin ka awm rei "

" an ti chawk asin...ughh...bus in i haw dawn em? "

"a ni mai a niang chu "dar tih kan âk paha ka tih rual chuan a han thaw chhuak nghal hak a.
"thank God!!  keipawh bus in ka haw dawn asin " a ti zui nghal zat a, ni dawn tak a car a kah ṭhat tir tak.

"a nih chu" ka lo ti sap a.

"lawks....kan kal rual dawn nia " tih pahin a nu nen chuan Spanish in an in be nghal mawlh mawlh a, tunah khan Nikki hi Spanish a ni tih ka hre ve chiah mahse a accent aṭang hian Spanish a ni tih engmah a hriat loh thung.

A nu nen an inbiak zawh hnu chuan bus station a hlat vak loh avangin ke in kan kal dun chhat chhat a, khua dur deuh khui mahse boruak awmdan hi a nuam tawk takzet.

"oh! taka i project chu eng nge a an? " min rawn zawh deuh thut avang chuan maw tih nghal hu pahin mak ti tak chungin ka en nghal haw a, engvanga ka project chungchang min zawt daih nge maw a nih le?

" Rainer khan a pui che a ni lawm ni ?"
"kha kha maw...ughh " ka chhang bah leh nuai tawh,ava hahthlak ṭhin tak .

"hepa hi a phakar ve ngawt mai sawm ngawng ngawng pawhin tumah hi a pui ṭha duh ngai miah si lova mahse ring tawp rawh a hmel en aiin Chemistry leh Physics hi a thiam zek a nia a ti tha duh lo mai pawh a " tih pahin a nui nghal hak hak a.

Rainer chanchin  ka hriat belh leh ta!!  mahse a chungchang ka hriat thar a piang hi a mak in a inhmeh lo ṭhin takzet.

" lehkhabu takngial pawh class ah a keng lut ngai si lova "
"chuan ngaithla hmel pawh a pu ngai lo... haha... a nih dan ziah alawm han zawt ila a lo hre leh vek zel " a best friend leh a school luhpui berin a sawi miau a han awih loh ngawt theih pawh a ni lo.

" tunlai hi Rainer nen hian ka hmu ngun riau cheu "
" hahh... teu lo " awkward zet hian ka ti nghal vat a,kan inkar hi thup chu tum ve ṭang ṭang tak ka ni.

"in in kawmngaih viau a nih hmel " a rawn ti nawn leh ngat a.

"a letling thawk zawk "ka tih chuan ka thusawi awih loh hmel zet hian min rawn nuih a mahse engmah min zawh chhunzawm leh tawh lem lo.

Engang pawhin Rainer nen kan inkar hi haider tum teh mah ila tukin zing kha chuan kan thlen tur chin bak bak a thui min thlenpui a nih kha.

"a ṭhat hlauh chu ...Rainer hi chu ka best friend mah nise an hrechiang fe te a nih loh chuan hnaih lo se ka duh "

" a sual i tihna em ni? " hriat chak hmel zet hian ka lo zawt nghal vat a, ka hre chak em a ka insum hman thlawt lo.

"hahh....sual chuang love , ka sawi tum zawk tak chu a hnen atang hian thil an beisei sang leh ṭhin sia, tum loh deuh a an rilru a ti na lai hmuh hi ka duh tawh lo bakah hmeichhia hi ṭhian aia thui a thlenpui ngai chuang lo,amah hi a mal thin em avangin hun a khawhral ve dan a nih hi" a tih chuan hriatthiam loh hmel zet hian ka lo en ha a.

"engvangin maw?" tiin ka lo zawt nghal, hmeichhia a kawp hnem viau tawh awm si a, Amira pawh a ṭhian a nih si chuan engvanga ṭhian anga awm mai lo nge an nih?

"umm...a chhan erawh ka hrilh thei lo che... bakah atan chuan ṭhian awmzia hi a danglam bik a " a sawi engkim hi ka man lo, ṭhian chu ṭhian a ni a awmze dang a neih awm pawh ka hre lo.

" oh!! " tih ringawt in ka lo chhang a.

"well... once you go Black you'll never go back "

Hei erawh a sawi tum ka hrechiang hle  Black a tih khi rawng dum a sawina nilovin Rainer Black tih a ,a hming hnuhnung zawk Black a sawi tumna hi a ni.

A awmzia chu Rainer hi vawikhat i hnaih a nih chuan a zunah i uai anga i tawn hma a i nun ngaiah khan i let leh thei tawh ngai lovang tihna a nih ber chu.

"hei... i kalna tur bus a rawn thleng tawh a nih hi "

Nikki in a tih rual chuan kan hma ah tak Bus chu a rawn ding a,Nikki erawh kan college lamah a awm avangin bus hran a chan a ngai dawn a, ka kal lohna lamah a kal ve thung ang.

" kan inhmu leh vat dawn nia... mangṭha le "tih pahin bus ah chuan ka pen lut nghal a, ka ṭhut fel hnu chuan Nikki chu ka zuk en leh ngat a min lo bye bye lauh lauh avangin nuih ver ver pahin ka kut ka lo vai let ve nghala.

Nikki aṭangin Rainer chungchang thil tamtak ka hriat belh ṭeuh a,min duhsak avanga Rainer hnaih lo turin min warn a ni tih pawh ka hria mahse Rainer mize mak tak leh a nui hmel phen a thil inthup tamtak hi hriat belh zel ka chak phah tlat pek a ,ka ngaihtuah zui nghal neuh neuh bawk.

Bus aṭanga ka chhuk hnu chuan reilote ke a kal a ngaih avangin muang changin ka kal chhat chhat a, kan in aṭanga hla vak lovah Mercedes dum ka hmu ta thut mai!! Rainer ta ang chiah a nih avangin men phawk nghal kawk pahin ka ding nghal chut a,mahse Rainer a nih erawh ka ring ngam chiah lo.

Pangngai takin ka kal lehnghal maia car ka kalpel fel chiah tih chuan ṭul lovah horn an rawn hmet ri nghal tuarh a,phut zawk paha ka hawi let nak chuan Rainer chu car atang chuan a rawn pen chhuak nghal a, tum deuh hmuk thin mahse nidang ang lo takin lungngai tak hmel a pu in ka hria.

"hi!! " tih pahin car kawngkhar chu a khar nghal khap a.
" hey!!  eng nge hetah i tih? " tih tum nei lo se hetah din ringawt nachhan tur a awm lo.

" eng nge hetah ka tih i rin? " min zawt let hlauh, zawhna ngeiawm deuh a lo chhan let hi a talent a nih dawn hi.

" umm...ka hre lo, mangṭha le "hawi let vut pahin kal nghal daih chu ka tum a.

"dinner ei dun ang" a rawn tih rual chuan ka hawi let rang hle ,mahse Nikki thusawi kha ka hriat chhuah thut avangin ka hnial nghal .

" pawi ka ti lutuk... Braydon an min lo nghak reng tawh ang " ka ti deuh kher a,mahse chhuanlam satliah mai mai ni lovin a dikna chen a awm.

"zawhna ka zawt lo che "
"i pa nen in ei dun a ni lawm ni " ka tih pawh chuan " reilote chiah.... khawngaihin " a rawn ti leh hram a.

Zanin hi Rainer awmdan hi en mai pawh hian a danglam tih ka hre thei, nidang chu nise hetiang hian min dil hauh lo ang.Lem a chang te a nih ngawt loh chuan min mamawh takzet hmel a pu.

"reilote chiah... " tih pahin car ah ka lut nghala, ngatinge pawh ka hrelo ka chhungril hian kal tur hian min nawr tlat zel.

"ti daih tawh tur kha a ni " tih pahin a ni pawh a rawn lut ve nghala.

"ka ril a ṭam vang chauh in ka rawn zui che a nih hi... thil dang engmah a awm lo " tiin ka lo in sawi khalh ve nghal zung zung a, a nihna takah chuan tihtak zeta min sawm vang zawk a ni.

Nuih suk pahin a khalh chhuak nghal a ,hla ka hriat ngai pawh nilo hi a play nghal bawk a, ka lo ner nang ringawt.

"eng hla nge maw i play reng le? "ning hmel zet hian ka han thaw chhuak deuh halh a.

"Rolling stone ho hla 'Paint it Black" hahh... thil hi a duh classic thei sia, a car pawh chuti bawk.

"nalh pawh ka ti lo "

"music diktak i hriat hunah nalh i ti ve mai ang " a rawn ti kher a nih chu!! heng ho ai chuan Pia Mia hla Bitter Love pawh kartluan in ngaithla dawn pawh ni ila ka thlang zawk tho tho.

Shack Shake restaurant kawtah chuan car a ti ding a, ka restaurant ngainat ber a nih avangin ka lawm ru hle.

Rainer an ShackBurger a chah a keiin Smokeshack ka chah ve thung a.

Eitur kan order zawh hnu ah mi reh ṭhep ṭhawp lai takin Rainer chuan inti fel fahran hian "kha i rubber i thlauh!! " a rawn ti ta mai!!  ka zak lutuk chu ka lo ip nghal chawih a, kan bul hnaia ṭhu ho lah chuan min rawm nuih tet tet pahin min rawn la melh hrek hrek zui!!

"Enga!! "

"chhuat a mi khi i rubber a ni lo em ni ?" a tih chuan a melh na lam ka zuk en nak chuan eraser (nawhrehna) lek chu lo niin ,engtik lai khan nge ka lo thlauh hman ni.

"eraser maw!! " ka ti nghal haw a.

"eng nge ni se ti tih vak chuan... ?" a lo ti sam et lehnghal.

" ka lo rin dan chuan..... "

America ah chuan Condom hi rubber kan ti mai ṭhin a, nawhrehna erawh eraser kan ti thung mahse British ho in nawhrehna hi rubber an ti ṭhin tih ka hriat loh vang liau liau a ni,ka rilru kawih vang a ni bik lo,min dem ngawt thei bik lo ang .

"condom maw ?" min sawi khalh ,ka duh aiin a sawi ring mah mah lehnghal.
" aw... " tih pahin ka chhar nghal vat a, he thil te reuh te hian min ti zak takzet.

(chhiar zawh veleh fakna khu hmet nghal ang u aw ...xoxo)