Rainer Black-25 by Remruati Bawitlung(Haylor)

CHAPTER -25

"He bends his head just to meet her lips " 

A dar ka chen awrh chauh avanga kan tan chauh a rawn kun hniam ṭhin te,min tichhiat hlau niawm fahrana dim taka min khawih ṭhin te leh ka bula a nuih tam sawt dan te hi danglam ngai lo se ka ti takzet.

Khum tlangah ṭhu in dimna nei hauh lovin a aia duhthawh chuan min rawn fawp lehnghal tawn tawn a,ka kawngah vuan in a mal chunga ṭhu tur chuan min pawt ṭhu a, ka ke in a ke ka karcheh,a nghawngah ka ban chu ka suih zawm rial bawk a, a khat tawkin a sam hnawm chap chu ka ṭham zeuh zeuh bawk.

Min khawih hlek pawha ka tuiral vek laia lungchim taka min fawh phei hi chuan rilru pangngai pawh hi ka pu hlei thei lo, dawi ât vek ang mai hian a tih dan dan hian ka awm tawh mai ṭhin.

Zei zet leh awmze nei tak hian ka kâ chhungah a lei chu a rawn hawl kual zeuh zeuh a,kan in hip tawnna chu a nasa in ka taksa chu a rawn sa chhuak nghal vek a,ka thinphu lah chu a rang sawtin hetiang ang em em hian in fawh hian taksa a thlak danglam thei ang tih ka lo ring pha ngai lo.

A hmui nem them leh hnawm chapin ka nghawng leh ka khabe ruh kual vel a rawn nawr zawng ringawt te chuan ka lo mûr nghal uai uai a, ka dâng te chu a ro sawt in ka chil chu ka lem leh khalh ṭhin.
 
Engang pawhin Rainer min khawih dan vel hian min thlak danglam mahse ka û tshirt khuma let bâl mai ka zuk hmuh chuan tlem tlem in chhia leh ṭha hriatna ka rawn nei chho ṭan telh telh a,chu chuan min hawi sawn tir thei hram.

Ka awm bawr vel rawn ṭham pahin min rawn fawh chu a han tum leh a mahse ka hawisawn leh hmak avang chuan ngaihṭhat loh hmel zet hian min rawn en nghal a.

" ngatinge? " a rawn ti zui sap bawk.

"nichina i thusawi kha hre reng rawh "

"engchu maw? " mitmeng rilṭam leh tawrhhar zet hian min rawn en a.

"mipa khawlo deuh chuan khawihchhiat che an tum daih tawh ang i tih kha " ka tih chuan mit tih chet kual ralh pah hian a sam chu a han tuai thuak a , ka zah leh hnuhnawh avangin ka hmui seh pah chuan ka kun nghal daih a.

"ka hria lawm... infawh mai mai te chu a pawi dawn em ni? " tih pahin min rawn fawh chu a han tum leh a.

"Rainer... " a dara vawn pah chuan ka lo nam deuh a, a mal chung aṭanga chuan ka chhuk thla nghal bawk .

Rûm deuh hak pahin khumah chuan a letthla nghal thawk a,a kut pahnih a a hmai nuai nawk nawk pah chuan a rawn ṭhu chhuak leh a.

"khum khatah kan mu dun thei angem?"

A thawmhnaw huh chhuata a paih tawp kha ka chhar lai chuan a rawn ti sap a,haw chu a tum loh hmel kher mai.

"engtin mah ka khawih lo ang che... " ka va melh leh rual chuan a lo in kuangkuah nghal thak a, engvanga ka bula mu duh tlat nge a nih hi ka hrethiam lo.

"ka.... ka thei lo " a thawmhnaw chair a dah pah chuan ka han thaw deuh hluai a.

" khawngaih in... "

Ka chhanna nghak chuan min en kar reng a,keipawhin a bula mut te chu ka chak takzet mahse kan inkara inhip tawnna nasa lutuk hian ka duh lo thleng min thlenpui ṭhin hi chu a buaithlak a nih hi.

" aw le... mahse i thusawi kha hre reng rawh... " ka thinlung chuan duh lo turin min nawr mahse ka taksa erawh in a hnar thei thlawt lo.

Mut dun mai mai te chu eng nge pawi, engtin mah kan awm dawn chuang hleinem tiin keimah leh keimah chu ka han in thiam chawp leh vel a.

"yes... ma'am " a awm chen vela a ban phar pah chuan min rawn nuih nghal vur vur a.

Khum sirah amah hnungchhawn zawng hian ka mu kawm ngal a mutthilh chu sawiloh ka harh tulh tulh mai hian ka hria.

Insi lovin inhlat deuh takin mu ve ve mah ila boruak chu a ṭang nghal em em a,ka awmdan chu tih ziaawm tum chuan ka han muhil der ngial tak na in awmzia a awm lo.

"i muhil der tih ka hria...bei nasa lutuk teh suh... " a tih chuan ka meng nghal kawk a, hepa bulah hi chuan engmah hi a thup ve theih loh.

" lo kal teh... " ka dara rawn vawn pah chuan ama lam hawi tur chuan min kuai her a, a ban puam min kham tir a ka sam chu a khawih niap niap bawk a . A ban lehlam erawh aman a kham thung.

A awm ah chuan khur dar dar chungin ka kut chu ka nghat a, a ni pawh kei ang tho in a thinphu a rang ve a ni tih ka hriat chuan hetianga ka awm hi ka in dem ta bik lo.

"thil ngaihtuah vak vak suh muhil rawh... "
"Braydon hi naktuk ah a rawn chhuak thei angem le? " thil dang daih ka zawt a.
" a rawn chhuak em em ang..." Rainer meuh in a tih takah chuan ka ngaih a ṭha nghal hmak.

"thil ka zawt thei che ngem?"
" zawhna hi ka hua... " a rawn tih deuh hmuk avang chuan ka hmui ka lo ti pawrh tarh a.

"thil pakhat chiah.. "
" sawi rawh... " min ning hmel zet hian a maimichhing leh daih tawh, duhloh hi a pe na ve ngawt mai.

" umm.... Amira hi a chhelo in a hmelṭha takzet " ka sawi tum lo deuh ka sawi chhuak phawng ringawt, mahse bialnu nei reng chung pawha hetianga ka chunga a awm avang hian bialnu a nei reng a ni tih hriat nawn tir ve hrim hrim ka duh.

Rainer hian bialnu nei reng mahse min fawh chang te, min khawih chang te leh ka bula alo awm ve avang ringawt pawha ka lo hlim em em mai ṭhin hi mak ka in ti in tlawm ka in ti takzet.Mahse ka rilru put ang a pu ve lo hian min ti na zawk a lungawi lo turin dikna ka nei der si lo .

" ka hria... chu chu zawhna a nih loh chu "

Keima sawichhuah zawk ni mahse Amira chhiatloh zia a pawm thlap mai hian min ti na in min ti lungngai takzet.

"in kawp reng chungin engvanga ka bula hetianga awm nge i nih? "

"ka hriat chinah Amira nen hian kan la in kawp lo" a tih chuan phawk fe hian ka meng nghal kawk a,an inkawp si loh chuan an awmdan zozai kha eng nge ni ta ang!!?

Mak ka tih rual rual in ka lawmna a nasa zawk!! Rainer ngeiin kan inkawp lo a tih chuan ka ring nghal hmiah a chhanchu ka ringhlel phal thlawt lo.

"mahse khang...." ka han ti leh dek dek a ,"mu tawh rawh.." a rawn ti nghal hmak.

"tui deuhin mu tawh rawh... " tih chhan nei deuh hian a rawn ti leh kher a,Amira nen an inkawplo a ni tih ka hriat avanga ka hmela hlimna rawng lang chhuak chu a lo hmuh hmaih bik lo aniang.

" mangṭha le " tih sap pahin ka lu ah a rawn fawp zeuh a, zawhna la ngah viau mah ila zanin a ka thil hriat hi ka lungawi pui em em tho.

____________________________________________

★8am★

Silai kah ri ka hriat rual chuan ka harh nghal kawk a,ka pute'n silai a kap leh tawh a ni maw!! heihi a vawikhatna pawh a ni tawh lo,min ti harh phah ziah lehnghal .

Keimah chauhin ka mu lo a ni tih ka hriat chhuah chuan Rainer mutna lam chu ka en nghal vat a alo tho daih tawh chu niin.

Rang lutuk in ka ṭhu chhuak nghal zawt a. Ka û pajama Rainer a hak kha khumah alo let tal a ni tih ka hmuh rual chuan a kawr ka khai ṭhat sak kha ka va melh lehnghal vat a chupawh chu alo awm tawh lo.

Engmah pawh min hrilh lova a kal daih avang chuan lungawi lo ru tak chungin khum atang chuan ka tho chhuak chhat chhat a,mut kham lo tih hriat takin ka ham nghal bai bai bawk.

Ka in phihfai hnu pawh a silai ri ka la hriat cheu avang chuan a ri lo chhuahna lam kan in hnung lamah chuan ka chhuak phei ta nge nge a ,khua lah chu a thiang kuk lehnghal.

In hnung lamah hian ka Putea te hian hmun awl zau deuh mai basketball court pahnih tiat vel bakah swimming pool lian vak lo hi an nei tel bawk a, chutah chuan family party te pawh a throw ṭhin nghe nghe.

Ka putea silai kah ṭhinna lam chu ka pan nghal vat a .Rainer leh ka pute'n silai an lo in kah thiam siak chu niin, Rainer hi haw lovin hetah alo awm reng a ni tih ka hriat chuan ka lungawi lohna te kha a bo leh nghal hmiah.

"morning bawihi... " Ka pute'n min rawn hmuh rual chuan alo ti nghal vâr a.

" morning " ka putea chhang lovin Rainer ka wish a ni zawk mah aniang chu.Min rawn nuih suk avang chuan ka lo lai nghal ringawt.

"kha... kap leh tawh rawh..." tih pahin ka putea chuan Rainer chu silai a pe nghal a,Rainer an target a tin lai vel chuan ṭhutna lam panin ka putea nen chuan kan in zui phei chhat chhat a.

"i bialpa saw ka mi ngainat zawng tak a ni... " ka putea meuh in a tih takah chuan ka meng phawk nghal kawk a, mak ti tak chungun Rainer chu ka va melh leh ha a.

Ka putea hian ka û tih loh hi chu tumah hi a fak ngai lo kei ngei pawh bakah a hmel hi a lo bawrchhawr ve bawk nen tumahin an nel ngai lova a ni pawhin engah mah a ngai lem lo.Ka putea hian hetiang anga a sawi tawh a nih chuan a ngaina hle tihna a ni mai.

" ka bialpa a ni lo... " ka tih chuan mit tih zim sãn chung chuan min rawn en a, ka sawi nilo se chuan a awih miah lo ang.

"umm... engpawh chu nise Braydon hi ava reh ve... " Lalpa leh!!  lockup ah a awm a ni tih hi a hre tur a ni lo, engkim a buai vek a ni mai .
" Kendra nen an awmdun aniang... " ka lo ti liam puat ringawt.

" Pute.... " hlauhthawn hmel tak hian ka en a, Rainer chungchang hi ka û hrilh lo se ka ti takzet.

" hlauthawng suh... i û ka hrilh dawn lo, bakah eng nge hlauhthawn tur awm in in kawp chuang hleinem... " ka rilru hria niawm tak hian a rawn ti a,ka thaw nghal huai mai.

"i mu tui em? "

Rainer chuan dawhkana silai dah pah chuan a rawn ti ta mai!! engmah lah hi sawi hreh a nei der si lo .

Pute an mu dun turah min ngai nghal dawn a ni tih ka hriat avangin hmai sen ṭawn ṭawn chung chuan ka va melh zal zal a, a ni lah chuan phur hmel fahran hian min rawn melh zuk zuk lehnghal.

" aw... umm...nang?" i ngaih ang kha a ni lo tih melh hian ka putea chu ka va melh zak zak a,nakinah ka hrilh tha leh tho ang Rainer awm loh hunah .

"aw... ka mut ṭhat lohna a rei tawh bawk a " a tih chuan za lo zet hian ka nuih suk ringawt.

Rainer an college kalkawngah breakfast ei a tih tlat avangin engmah pawh ka siam buai duh lova mahse ka pum a rik nasat em avangin chhangthawp pet va chungin car lam ka pan lai chuan ka sam chu ka ṭawn phei nghal mawlh mawlh a, Rainer leh ka putea te an la inbiak tui em avang chuan car ah ka lo nghak ringawt a, ka duh aiin an in nel dawn tlat.

Minute 5 vel hnuah Rainer chu car ah a rawn lut ta nge nge a, ka putea nen an in kawm a ta langin ka be ve hman hleinem.

"in in date zawh tawh chuan kan kal thei tawh angem... " nuih vur vur pahin a ipte aṭang chuan condom pali vel hi a rawn phawrh chhuak a, a ṭhutna bula bawm chu hawngin a dah lut nghal mai a, engah mah ngai lo mahse khatiang zah zah a pai avang chuan mak ti takin ka lo en nghal ha a, rilru diklo ka pu lo thei lo.

" hetiang zah zah hi enga tan nge i tih? "
 ten hmel zet hian ka han ner vel a, ngeiawm deuhin min chhang a nih vaih chuan thinrim nghal mai thei dinhmunah ka ding.

" i putean min pe alawm... " Enga!!  ka putea tak hi chu aw... Braydon chunga a tih chuan a duhtawk ve thei mai lo em ni? Kendra nen an chhuah dawn apiangin condom hi a pai tir ve ziah a, mahse Rainer lehzel pek hi chu a ti mah mah a ni min ti zak takzet.

"engvangin nge i lak? "
" ka mamawh tho alawm.. " ala ti ang deuh deuh a.
" Maw...!!? "
"Relax... ngai kawi vak ṭhin teh suh, condom te hi chu kawl reng a pawi hleinem... sex ka hmang dawn tihna a ni chuang lo "

" urghh.... kal phawt ang, ka ril a ṭam .."
" aw le... mahse khatiang khan min melh tawh suh "
" engtiangin maw? "
" rum deuhin...thil ti sual melh in alawm min melh " a tih chuan ka lo nuih ringawt.

(Ghost reader ni ringawt lovin mahni ngaihdan te sawi ve ang u aw chuan fakna mawlh mai khu theihnghilh chi loh ...Xoxo)