Rainer Black-7 by Remruati Bawitlung (Haylor)

CHAPTER -7

Motto- "Be the change you want to see in this world "

"min thlah rawh u.... "Braydon an a tih pawhin mi pali vel chuan an la man bet tlat a,ka û chiah sawtianga an tih bik avang sawn ka lungawi lo kher mai, engvanga dang bet tlat bik nge maw an nih le?  Rainer pawh an thlah tho sia....

Braydon an puitui nei lova an en ṭhup lai chuan ka huaisenna zawng zawng sawmkhawm in ka ding chhuak ve ta hlawl a !! midang ho chuan puih a hnek in phun sep sep pahin min en ṭhup ringawt, dawihzep hlawm lutuk mai .

Ka din chhuah takah chuan Rainer chuan min rawn melh hrawk a ,mak ti hmel te pawh a pu.

Braydon pawh hi he university ah hi chuan mi thinchhia, mi insual hrat tia lar ve hat kha a nia, unau nu a lo nei reng chu mak an ti pawh a ni mahna.

Unau kan ni tih hi kan thup lo na in ka û vanga midang ṭih nih ka duh lo a chuvang chuan a theih anga tam sawi chhuah loh hram ka tum ṭhin mahse hei loh theih loh in an hre ta vek alawm .

"thlah rawh u...." boruak a ziaawm deuh takah chuan ka inrawlh ve a hun tawh ni a ka hriat avangin security bulah chuan ka va ti ve hlak a, min ngaithla lo chiang kher mai.

"hahh...unau nu a!!" boruak a zia awm dawn chauh emaw tih nak alaiin Rainer chuan aw ki ngeiawm zet hian a rawn ti leh kher a, ka ngei em avangin rum fe in ka hawi let nghal hraw ringawt .A mit meng rum leh thip lutuk chuan min lo melh kûr tawh a,ngeiawm leh min ei loh hmel zet hian min rawn nuih zui kher lehnghal.

"i kut hmawr pawhin tawk hlek suh ang che " ka û chuan ala rawn ti ang tak ṭawk ṭawk a,ka thlavang a hauh luatah buaina a tawk reng mai chu a nih hi.

"hahh... tawk a!!  hetiang hnute pawh neilo hi maw!! " Enga!! hmela mai mai chu!! ka zak lutuk chu khawvel hi a vir nghal muai muai hian ka hria a, ka biang leh ka kawchhung a rawn sa nghal hut hut a, ka thlan a tla nghal bawrh bawrh bawk . Midang ho lah chuan ka zahna tizual turin min rawn en pah chuan min rawn nui huk lehnghal.

Security in ka û an hruai hran daih avangin an hnung ah ka zui ve nghal hlawk hlawk a,ka ngei em avangin corridor a kan kal peng tur chu ka va hawilet leh ngat a, a hmui thi liah zeuh pah a min lo la en zui reng avang chuan ka kun nghal daih a, ka kal liam zui bawk.

Class pawh kal chhunzawm lovin inah kan haw tlang nghal nal nal a, ka û ṭhiante ho leh Kendra pawhin min zui haw ve nghal bawk.

"bawiha.... a thi nasa ropui si a na em? " Kendra in ka û hnar thi a tihfai lai chuan ka putea nupui Madilyn chuan an bulah ṭhuin hlauthawng tih hriat takin in a lo ve ti chhen a, ka û ṭhiante nen erawh couch ah kan ṭhu ngawi fâr hlawm a, kan ṭawng hlek chuan Braydon a thinrim a sosang leh mai dawn a ni tih kan hriat kâr hlawm avangin tumah ṭawng hmasa nih kan duh lo.

"in block ah a rawn kal tih pawh tuman kan hre lo... " George chuan tumah an rawn lan ve loh chhan chu ka bulah a rawn sawifiah sap sap a,thawk halh pahin ka lo bu nghat ringawt. An vaiin rawn kal phei se chuan buaina nasa zawk a thleng ngei ang.

"Love... a nat chuan sawi chhuak mai la... " Kendra chuan a pem a damdawi hnawih mawlh mawlh pahin hnuk ulh aw deuh hian a han ti sap a, a ni pawh kei ang tho a hlauthawng hma leh chiai hma a ni tih ka hriat avangin a rilru tur ka hriatthiampui.

A pem vel an tihfai a damdawi an hnawih zawh chuan Braydon chu inthiam loh hmel tak hian ka bulah a rawn ding a,a chungah ka lungawi vak loh avangin lehlam ka lo hawi hmak a, ka dara rawn vawn pah hian "Bawihte... a ti na hman che em? " a rawn tih chuan lungawi lo tih hriat zet hian ka han melh a.

"aih... " tih ringawtin ka chhang.
"umm... a ṭhat chu... "
"khawngaihin kum 18 ka ni tawh a ka thlavang hi hauh lutuk tawh suh... keimah in min awm tir ve mai mai rawh... " ka vin hle na in ka thil ngaihtuah zawk chu ka û hian hetiang anga keimah vanga buaina a tawh reng hi ka duh tawh lo,naupang chhia ang maia min ngaihsak pawh hi ka duh tawh hek lo.

"ka hria lawm... mahse zah lo taka an khawsak khum che hi ka duh lo "
"khatiang te kha chu engmah a nih loh kha" tih pahin ka û lo hrilh tu Michael chu ka va melh kher a, ka û ang chiah in an ni pawh hian ka thlavang an hauh tih chu ka hria mahse hei hi chu an ti mah mah tawh a ni.

"engmah a ni lo a...engah mah ngai lo mahla kei chuan ka ngai ... an ti nawn leh a nih pawhin ka thil tih ngai ang tho hi ka ti leh ang " ka û ṭawngkam chuan naupang mahni pawh inhum zo lo angin min in ngaihtir a, min rin zawh loh em avang hian ka thin a rim hle bawk,nula ka ni tawh a zalen takin min awm tir ve tawh se tih hi ka duhthusam ber a ni .

" zalen takin min awm tir ve tawh rawh... " lu thing pahin ka han ti sap a, inchungah ka tlan chho nghal dawr dawr bawk.

Ka û chunga ka lungawi loh em avangin khumah lukham pawm chungin ka ṭhu tum bâr reng a, ka mittui tling pam tawh chu a luang chhuah mai loh nan ka han khap fak fak bawk a, karkhat vel ka nu bula awm phei ka rilruk rum rum tawh.

"Sadie... " Kendra chuan ka room kawngkhar chu a rawn kik ri karh karh a, thawk halh pah in, "lo lut rawh " ka lo ti deuh hmuk bawk.

"umm... " inthlahrun hmel takin a rawn lut dek dek a, khum tlang ah ṭhu in ka lukham pakhat zawk chu a rawn ban a, ka kuah dan ang chiah chuan a rawn kuah ve than bawk a, a chezia nelawm zet chu ngawi rengin ka lo en kâr ringawt.

"ka û in min ngaihtuah zia chungchang min rawn sawipui dawn a nih chuan ka ngaithla peih lo a nia... " a engah mah hma chuan ka lo ti nghal hluk a, ka vin mah mah in ka hria.
"thu diktak a ni bawk sia lawm... ughh Braydon hi ka ngaihtuah takzet buaina a tawh bik hi ka hlau... chuvang chuan nang tal hi chuan ti thinrim suh "

"Carter leh Rainer pawh an in rawlh a amah chauhin a tuar bik dawn hleinem... " ka thusawi avang chuan a khi deuh suk a, rilru na hmel a pu mah zawk.
"He university ah hian Bachelor aṭangin ka zir ṭan tawh a, i û pawh hi hun rei tak ka lo hre tawh ṭhin ka hriat chinah buaina a tawh apiangin leh a bik takin Rainer nen an intih buai aṭang phei kha chuan amah chiah hian warning a hmu ziah ... "

"engvangin...? " fair lo tih hmel zet hian ka han ti a.
"a chhanchu Rainer nu hi Kan university chancellor a ni tlat alawm... hepa hian eng anga tam buaina siam tawh mahse an haider sak zel alawm...a tawpah i û bawkin a tuar leh ṭhin" heng thil zawng zawng hi Kendra takngial pawhin an hria ania, a hre hnughnung ber ka nih loh hram ka beisei.

Ka û hian engthil mah hi min hrilh ve ngai lo hi ka lung ti awi lo zual tu a ni, engtik lai mahin min ring ngam ve ngai thlawt lo.

" Rainer leh i û te hi chu an in haw ve em a ni... I û a in rawlh tawh hi chuan Rainer hi a rawn in rawlh tel ve ngei ngei chutiang bawkin i û pawh... bakah Carter kha Rainer ṭhian ṭha tak alo ni kher kher bawk nen "
"eng nge an in huat nachhan...? "
"ka hrelo chu erawh i û i zawh angai in ka hria.... "

Ka û pawh tih tawh mah nak alaiin Rainer chu ka haw leh hnuhnawh. A nu thil ti thei tak a nih avang mai a engmah a tuar ve ngai lo chu a fair lo takzet. He college ah hian thlakhat em pawh ka la awm lo a, buaina ka tawh zozai te hian min ti chau in college kal ka lo phur ve na zawng zawng te kha a bo nghal vek in ka hria.

A tukah chuan ka ṭhiante kalsan in phur lo zet hian class room ah ka ṭhu ngui bâm reng a, nimin a thil thleng avang khan Braydon a nau ka ni tih an hre ta bawk a a hma ang khan tumahin min chhaih nawmnah tawh lo,lehlam zawnga ngaihtuah chuan a ṭha phian.

Professor a rawn lut chiah tih in Rainer chuan a rawn zui lut ve nghal a ka hmuh thut avang chuan mak tih hmel zetin ka lo melh nghal kawk a ,a hmasa bera ka ṭhut vang pawh a ni mahna ka in en fuh chat ringawt!!

A rawn lang chiah tih in inchhunga hmeichhe ṭhu ho zawng zawng mit fuk na ber a ni nghal chu rin lawk sa a nih avangin mak ka ti lem lo,ka hnunga mi te lah chu a phun ru nghal ser ser lehnghal !! class chhung zawng in hetiang hian an awm loh hram ka beisei .

"a hmasa lamah khan aw... Mr. Black"  class a vawikhat rawn kalna mah nise  Professor in a hminga a ko chat thei chu a mak hran lo, mak ka tih zawk chu a duh chuan hnung lamah a ṭhu thei reng mahse ka bula a rawn ṭhu kher chu ka hrethiam thei lo.

Professor in lecture a pek mawlh mawlh lai chuan Rainer hian min en reng ang hian ka feel tlat a nih chu!! keilah awm hle hle thei ta lo chuan ka va en nghal hraw a, min lo en reng tak tak mawle....rang lutuk in ka lehkhabu ka bih nghal vat a, a mit buang paw thak chu nidang ang em em in a rum tawh lo.

"min entir ve dawn lo em ni? "
Lehkhabu, pen leh engemaw tal pawh keng lova a ṭhut mawl tawp avang chuan a tawp a tawp a ka lehkhabu en ṭawm pui turin min rawn dil ta nge nge a, ka lo hre lo der tlat thung.

"ka hmu thei lo... " a ṭawng rin em avang chuan "eng nge? " ka lo ti vin hluk a, ngei nak alaiin min rawn la nuih vur vur zui. A nui hmel han ṭhat dan hi Angel in min rawn nuih vur vur hi a ni ringawt,a biangsum lah saw a zun a uaina tham.

(Fakna khu hmet vek ang u aw ...chuan second 10 tal in enkual loh chuan click in awmzia a awm lo aw ...xoxo)