Rainer Black-5 by Remruati Bawitlung(Haylor)

CHAPTER-5

Motto- "Be the change you want to see in this world "

Ka ṭhiante chu mall ah lengkual tum in an kal kawi a chutih lai chuan kei erawh Braydon a zilh hau na ka ngaithlak peih loh avangin ka haw tlang nal nal thung.

Ka haw tlai deuh hi chuan min rawn call sek zel, kum18 ka ni ve tawh a naupang anga min en hi a bansan dawn lo chu a nih hi!

Vawin chu nidang aia hma a ka haw avangin Braydon chuan mak alo ti ngawt ang chu. A mak ti hmel tur ka ngaihtuah zawng ringawt pawhin ka nuih a za lawk.

Inchhung ka luh rual rual chuan apple pie rim a lo nam huk a !! Braydon an engtik lai aṭang khan nge apple pie siam dan a lo thiam tak ?

Ka hnar len phei vut vut pahin ngawi rengin kitchen lam chu ka pan nghal chat a ka ngaih a ṭha lo lek lek.

"hey... sweety... " tukin zinga Braydon bialnu thar kha alo awm chu niin, a apple pie siam chu oven aṭangin alo la chhuak mek a,a buai hle e ti lo chuan min rawn la nui var var thei nia mawle.

A sam buang thang ngil zet te ,a kawrfual par sen khup khuh lo chiah chiah te leh a sneaker var bun te chu ngun takin ka lo en leh hman tawh.

Braydon chuan Amira te ang hmeichhe sexy, confi leh makeup ngaina tak kha a duh ṭhin sia,engtin nge maw henu hi a duh ve teh mial ni.

"H... Hi...!! " mak tih hmel takin ka mithmul chu ka han ti kang âk a, apple pie siam dan a thiam avang chuan ngaihsan hmel zetin buk nghat nghat pahin ka hmui ka lo ti sawi zeuh bawk.

"han dai deuh se a ei theih vat ang... kha i tem chhin duh em? "
"oh!!  okhay... " ka rin aia a fel phian avang chuan awki sang lai rut hian ka lo chhang a, a fork min rawn pek hmang chuan tlemte ka han pir zeuh a,liah zeuh pahin hawi kual hrak hrak chungin ka tep zui chap chap bawk .

"eng nge a an? "
" a tui... ughh... a tui lutuk... " awkward zet hian ka lo bu nghat nghat a, ngun takin min lo en reng lehnghal.
"haha...tui i tih zawng a nih chuan kan dawrah rawn la ei la a ṭhat dawn chu... "
"pie in zuar amaw? "
"aw...engpawh chu nise Kendra ka nia.. chuan nangchu Sadie... " ka chhan hma chuan a lo ti nghal zung zung a, han en mai hi chuan ṭha vûr ni lo mahse a mizia ang hi chu Braydon tan hian a ṭha mah mah lo maw?  ughh... ka û chu ni tho mahse Braydon hi chu a lerh ve em a...

"umm...ka han inthlak phawt ange? " inchung chu ka kawk zeuh a,hetiang anga hmelhriat thar ka neih hi chuan ka awmdan hi a lai zût zel, zahzum lutuk hi ka pianpui pawh a ni mahna.

"kan lo peih fel ange... " min rawn nuih leh ver ver a, a in nei tu zawk mah ni ila ka khawr deuh ṭut mai, chutah lai zet in inchung lamah ka tlan chho zui nghal nal nal bawk a,midang chuan min rawn hmu se ngaihna awmlo min ti leh ngawt ang.

Ka room a ka luh rual rual chuan ka bag chu fel takin chair ah ka dah nghal thlap a, thawk halh pahin ka pheikhawk nen khumah ka let thla nghal tawp bawk .

Rei pawh ka mut hma chuan kawngkhar rawn kik ri karh karh ka hriat avangin ka thu chhuak nghal vat a.
" rawn lut rawh..."  ka lo rin lawk ang ngeiin Braydon chuan ka awm nge awm lo tih a rawn enfiah leh dak dak tawh,a tih ṭhin dan pangngai a nih avangin ngaiah ka nei tawh .

Kawngka a din khur pah chuan ,"Bawihte...i va rawn haw hma ve "a ti a, ka mit chu ka lo chet kual ralh a, hmm... amah vanga haw hma ka ni reng sia, hetiang zawhna min zawt leh dawn tih hre lawk ila chu ka ṭhiante rual khan ka leng daih ang mawle.

"nia ,chuan...Kendra nen chuan thla engzat nge? "A bialnu thar chungchang chu ka zawt ta daih a,laih hmel zetin a tukhum chu a hiat nauh nauh a, min chhan hun ka lo nghak reng thung.Eng nge a hriat pawh ka hrelo Amira nen an in ṭhen chungchang takngial pawh min hrilh ve lo ania, ka lungawi lo takzet.

"umm... kar hnih vel... " enga!! ka kâ ka ang phuau ringawt. Kar hnih chiah maw!!  chuan kan in ah ka nu ang maiin a rawn khawsa bawk a.
" a la rei lo mah mah lo maw? " ka tih chuan min hrilh fiah tumin khum tlangah chuan a rawn ṭhu khur a, engmah min hrilh ve loh avanga in thiam lo hmel te pawh a pu.

"an dawrah ka thawk a... chuan i hriat ang hi a ni mai...enteh, Amira chungchang kha chu ka sawipeih lo ania " ka rilru hria niawm fahran hian a rawn ti zui zat a, zawh ka lo tum ruk tehreng nen.
"chuan..." ka han thluk vang vang a,"ughh... apple pie pawh a siam thiam khawp mai" nuih vur vur pahin ka ti ta zawk a, a ni pawh lai zetin a nui chhuak zui hak hak a.

Tun ṭum zet zawng Braydon pawh Amira nen a an inkawp lai nen a tehkhin kha chuan a mizia pawh a danglam ta khawp mai. Kei takngial pawhin pa rorum, chak leh rilru na thei lo anga ka lo ngaih ṭhin hial kha a ni ṭhin a, tunah chuan Kendra vangin a lai ve put put ta lawm.
____________________________________________

Kan ṭhian ho a college bus a kal ho kan tum avangin Chelsea leh Kaitlyn te chu nidang zawng aia hma ah kan in an rawn thleng tawh a,ka hmai ka chei lai chuan ka hak tur hai in ka closet chu an lo lipse nasa mai.

"thawmhnaw nalh i nei ve thlawt lo, kekawr bul,kekawr tluan, tshirt leh sneaker chauh hi fashion pawh a ni tawh lo " Chelsea chuan ka thawmhnaw en pahin hnehsawh zet hian min rawn kap zui a, a sawi dik reng bawk.

"hmanhnawh rawh... kan tlai dawn nia... " Kaitlyn meuh pawhin min tûr tawh. Inchei vak mi ka nih loh avangin sunscreen ka inhnawih thuak thuak a, nidangah chuan ka mit hmul er zet ti lang chiang turin ka mit ka dum ve ṭhin na in hun a awm lo bawk nen lipgloss ka inhnawih mawl leh tawp a,ka lan felfai zawk nan sang takah ka sam ka ṭawn vah bawk.

Kan hmanhnawh em avangin inhnuai lamah kan in um thla ti tih tawh a, chuti chung pawh chuan ka ṭhiante pahnih chuan hmanhnawh turin min la tûr zui mawlh mawlh a.

"hey... Sadie morning... " Putea bawlhlawh paih tur pawh chhang lovin kut vai let pahin ka nuih hman ṭawk.

"i putea vang hian in in a rawn kal pawh hi a phurawm loh zo vek zel... " bus a kan chhuan hnu ah pawh Chelsea chu ala phun phei mawlh mawlh a, Kaitlyn pawhin a pawmpui tih hriat takin alo bu nghauh nghauh bawk.

"a duat em cheu kha... " ṭan ve ngang ngang tak ka ni,thisen ah inzawmna nei lo mah ila ka chhungte hi ka ṭhiante takngial pawhin an sawi chhe thei lo.

" nahh...a hmel en reng reng hian mafia te pawh a ang alawm, chutah a ulhbun kah nat hmel zet kha alo hru fai ziah lehnghal.... " Chelsea hi chuan engkim hi a sawi hnehsawh thei ve hrim hrim.

Ka putea chungchang sawi tawh hi chuan a nelawm loh ve bawk em a tin ni. A khabe hmul ṭuak var vo duhdah zeta ṭo kikawi chhup te leh a mitmeng thim khui te hi a hlauhawm hranpa ve hrim hrim. Cowboy lukhum parh Mexico aṭanga a chah ngei mai kha a taksa peng ang maiin a khum kher thin bawk a, a ulhbun ngainat em em lah hi nitin in zu han hru fai ziah ṭhin a mawle.

Miten hlau ṭhin hle mahse a lan ang ngawt hi a ni bik lo, a fel in min duat ve thei teh mai ania.

★ Vanderbilt University ★

"first period kan nang hman lo ṭep alawm... " inchung lamah ka inzui chho hlawk hlawk hlawm a.
"Sadie a tlai em alawm... "
" Hey... guys Zankhua in group ah khan pawt lo ula chuan thlamuang takin ka mu anga zingah hma takin ka tho ang chu " ka lo ti ve tân a, ka ti tak tak bawk.

"thu pawimawh chiah alawm kan sawi ... " nuih luih hak pahin ka mit ka lo chet kual ralh a, ka thiante kalna tur block chung chuan ka ding nghal tau a ,"i fiamthu em ni?  Rainer kha a chhelo, Rainer kha in hmu ve em? eng nge a sawi ...tih vel mai mai kha thu pawimawh chu maw ni a "

"C'mon Sadie...a ni hi chu topic pakhat a ni ve hrim hrim.... "
"hahh....ka awih thei lo, ka kal dawn... " an pahnih chuan ka kuah a, kan class tur ṭheuh ah kan in ṭhen darh thei ta hram a.

An pahnih hi chuan a ngaihna hi an awm thlawt lo, nizanah lah zankua deuh thaw in group ah Rainer leh mipa chhelo chungchang hlir zu han pawt char char peih a mawle.

Vawin chu first class ah Chemistry practical ka neih avangin lab coat hak mawlh mawlh pahin laboratory ah ka tlan lut dawr dawr a, class an lo ṭan daih tawh avangin ṭhutna awl lam tlar hnung lam chu kun kut kut pahin ka pan phei nghal chat a.Explanation tih buai ka duh loh avangin thawm lah chu kan dim em em khawp lehnghal.

Rin loh lutuk maiin tlar hnung berah chuan Rainer chu amah chauh a thatchhe zeta lo ṭhu khur lai chu ka hmu ta thut mai!! ka ding ngil nghal zawt a!! chutah a ngai te bawkin min ngei hmel zet hian min rawn la melh kur zui.

Ni e, min ngei kher lo mahse midang a melh dan hi a ngei hmel in a ngeiawm hranpa ve hrim hrim.Ka thawmhnaw ah emaw ka hmelah diklohna a awm emaw ka tih phah ziah lehnghal.

Rang takin hma lamah ṭhutna awl ala awm leh awm loh chu ka thlek kual nghal vat a ,ka hmu mai lo lehnghal.
"Buaina a awm em ni?" ka hawi kual nasa ngang aniang Lab assistant chuan a rawn ti nghal vat a,midang ho lah chuan min rawn en ṭhap lehnghal.

" aih... a... aih... " Rainer melh zawk zawk pah chuan ka ti bah nuai a, ka thluak hi a chawmawlh zo vek tawh a nih dawn hi pangngai tak pawhin ka ṭawng chhuak hleithei ṭhin lo.

" a ṭhat chu... SOP kha chhiar la, i chhunzawm ve nghal dawn nia... "
" aw le... " phur lo zetin Rainer bulah chuan rem leh rem lo hian ka va ṭhu ta nge nge a, ka awm dan dek duk hi tinge pawh ka hre lo, hepa bulah hi chuan ka ṭi duk zel ,a ni lah chuan hetiang a awm lo thei lo hian min siam a tum rân emaw tih mai turin a ṭhu khur lehnghal a.

Chil lem dak pahin ka sam ka han hui phawk a,in la confi zetin SOP chhiar pah chuan pawhdawh a gloves leh transparent glass chu ka la chhuak a ka vuah nghal mawlh mawlh bawk.

" haha....vawin chu Benzoic acid Benzanilide hmanga siam tur a nih hi... " zahzel ah mahni leh mahni chu ka inbia a,a hriat theih turin ka va ti kher lehnghal ,min lo chhan ve ringin za lo zeta nuih pah chuan ka va thlek leh zeuh a,a bawp sei zet khawkherh chung hian a hma a SOP chu alo bih ngur ngur a, ka tawng hria ang pawhin a awm lo.

 "oh!!...a ni leh lo " a dik lo zawk ka lo chhiar chu niin,page dang chu ka keuh lehnghal thawk a ka zak lutuk chu lehlam hawi chungin ka in siam chhe zui nghal mawlh mawlh a, ka sa nghal hut hut mai,ka thlan a tla lo chauh tawh .

"umm....concentrated sulphuric hi test tube ah dah angai a" ka zahzel ah naupang ang maiin ka phun bul bul a,a ni lah chu a ṭhut ngaiin ala ṭhu ngul reng a, chutichung chuan ka lo zam ve em em ringawt, ka chet buai phah hrep lehnghal.

 " umm... conc. H₂SO₄" ka phun neuh neuh a, chumi ringawt pawh chu a bur kan zawn chiam chu le ka hma lawkah a awm reng sia, a van hahthlak ṭhin tak em.

Pangngai taka awm hram hram tumin ka han thaw chhuak leh hak a, heti ringawt hi chuan ka che pelh phung dawn tlat.

Ka thil tih lai chiah ngaihtuah tum in dropper chu ka la lawk a, sulphuric acid chu hip chhuak in test tube ah thun mai ka han tum a mahse Rainer an a ṭhut dan sawn tuma a chet ṭual ṭual takah chuan ka kut a khur ta mai !!

Nilo... Sadie Focus, Focus....

Ka drop lawk theih loh avang chuan min rawn puih tumin a kut phah hlai zet chuan ka kut chu hum hnan in test tur chu a rawn dawm ta mai!! ka zawi nghal vek a, ka thinphu pawh rawn pawk chhuak tur ang mai hian a ri nghal zawih zawih a,ka ṭhu khawng reng ringawt.

" fimkhur rawh..."thum zet hian a rawn ti sup a, a zawih em avangin ka hre thei lo lek lek.
" ugh... ka ka lawm e... " ka rin aiin ka chhang pangngai phian.

A puihna chuan... ni e, a puih na in Sulphuric acid chu test tube ah chuan ka thlawr lut thei ta hram a... huizz... ka ropui lo khawp mai, khatiang pawh tih hleih theih loh chu.Tinge maw ka chet khir theih em em le?

Rainer chu a awmdan ngai ang bawk chuan a awm leh a, a awm dan hi a boring thlawt midang biak nachang pawh hrelo. Hei tunah pawh tlar hnung berah kan pahnih chiah in kan ṭhu a, inhre lo ang maiin kan la awm chu a nih hi.

"Nitric acid kha min lo pe thei angem? " a aia ring chuan ka han ti leh a, min nin hmel zet hian a thaw chhuak nghal hak a, tunah chuan ka tawng a hre tawh tal alawm.

"la ve mai rawh... " Enga!!  hahh,  a fiamthu em ni?  a hma chiah ah a awm a, chupawh chu min pe thei lo amaw!!  keima tan lo va ban ṭung ṭung kha a mawi chiah loh avangin mawihnai takin ka dil a ni ve mai a,ṭha deuh in min chang tal tur a ni asin .

"hmela a biak che kha... " Derek a aw ka hriat rual rual chuan ka hawilet nghal vut a,thlarau hmu ang maiin ka meng phawk nghal kawk bawk.

"Derek... eng nge hetah i rawn tih? " an ni chu group B an ni sia, heta awm tur hi a ni lo asin.

" hmela ka ṭawng chu i hrelo em ni? " ka zawhna pawh chhang lovin Rainer hma ah chuan a inhum ruh ṭun a,a ngaihna hrelo zetin ka en tawn chhen ringawt.

Chutia Derek an a inhum ruh khum pawh chuan Rainer chuan a ṭhut dan tlem pawhin zu han ti danglam duh eih lo a mawle!! ngeng ve ngat ngat tak a ni.

" ka bialnu hi lo tibuai tawh suh... " Enga!!  ve ringawt a.

" bialnu hlui zawk " ka lo ti hnanhnawh,nia a pawimawh em alawm .

"hmela... ka ṭawng chu i hre thei lo em ni? "

Derek a chu a au titih ta mai,thawm a ring tak em avang chuan midang ho pawh chuan min rawn en nghal ṭhap hlawm a,an in hrilh ru nghal sep sep lehnghal, ka zak bawk nen khuk ral chem chem ka chak takzet.

Chutah zet zawng a ning ta ngang a niang, ning hmel zetin a han thaw chhuak hak a, SOP khup thuk pah chuan Derek a hma ah tak chuan a rawn ding run a,engah mah ngaih loh hmel zet hian ," in bengchheng dun hle mai " tih chiah a sawi , a lab coat dawhkan a dah tawp pah in class laklawh lai chuan a chhuak nghal daih bawk.

Derek a ka huat rual rual in Rainer pawh hian ka thin a ti rim takzet. Engvanga midang hi ning em em nge maw a nih le?  mi ṭha ber ang ziazang a. Han bia ila ṭawng peih loh hmel zet hian thu tawi te te awmze nei deuh ngeiawm si hian min chhang ang hmuk hmuk a.

"Sadie... inbia ang... " Derek chuan a rawn ti dek dek a, "min khawih suh... " ka lo ti vin hlar a.

"Ka be duh tawh lo che... hmu che pawh ka duh tawh lo" tih let hrep pahin laboratory aṭang chuan ka kal chhuak ve nghal hlawk hlawk a.