Rainer Black-11 by Remruati Bawitlung(Haylor)

CHAPTER -11

Motto- "Be the change you want to see in this world "

He in hi Shane in nilo in Rainer in zawk maw lo ni a!!  Lalpa leh!! engthil ah nge maw ka inham buai tak hi?

Ka zak lutuk chu khumah chuan hnar hmu lian lurh chungin ka ṭhu reng a,han tho daih tur pawhin ka awmdan a lai kual vel vek tawh.

"chhuak rawh... " tih vin hluk chung chuan hnuailam melh rûn chungin light dim deuh ruih in a a en phak loh na lam hmun thim ah chuan a kal nghal daih a, a thinrim hmel leh meng rûm lutuk hmel ka hmu hman lo hlauh chu vannei ka in ti ru hle.

Ngawi rengin ka kawr chu ka siamṭha nghal sawk sawk a, ka sam pawh ka tuai mam ngun malh malh e. Ding uai pahin Rainer lam chu ka va melh zeuh a, a awmna thim hle mahse min hnung chhawn zawngin a ding tih erawh ka hmu thei. Engmah a rawn sawi leh tawh lo bawka,insawifiah buai lovin ngawi rengin a hmuh loh hlana chhuah daih chu ka rilruk ta zawk a.

Ka lo in hnem ve bawk nen ka din zawng chuan ka lu a hai in a na deuh chhû a, ka pum aṭangin min rawn pump nghat ut ut lehnghal,ka luak chhuak lutuk chuan ka chil ati rial nghal pup pup bawk a, ka uak tuarh takah chuan ka luak nghal mai dawn in ka hria.

Inchhunga ka luah mai ka hlauh avangin hmanhmawh takin kâ hup chung chuan Shane a tlanna lampang ah khan bathroom a awm ringin ka tlan phei ve nghal dawr dawr a, vanneithlak lutuk in bathroom a lo awm tak tak hlauh.

Kawngka alo in kalh loh avangin Shane a awm tih hre tho mahila ka tlan lut nghal pawp a, Shane lah chu bathroom chhuat ah chuan alo mu tual a min chahthlak san daih lehnghal !!  hreptak chuan...

Shane chu ka pen kan thawk a, commode hawn pah chuan ka luak ta nghek nghek mai!! ka hnar ah nen lam tui a rawn chhuak zur zur a, ka chal te hi a na nghal ngut ngut thei nia mawle,ka uak nasa bawk a ka mittui te lah chu a tla nghal zung zung lehnghal.

Ka duhtawk ka paih chhuah hnu chuan ka hmui chu ka kut hnung lampang in ka han hru fai nawk nawk a, thlek bâr pahin ka khar zui nghal chawrh bawk. Commode chhin bawh nguih pahin theih leh thei lo hian ka han flash a, a ri chu naupang thuawih tak ang mai hian ka ngaithla vung vung a, ka harh fim deuh kawk in ka in hre bawk.

"Shane... Shane ..." tih sap pahin a nak ah chuan ka han tlawh che dêt dêt a, harh chu sawi loh a rawn hnâr lehnghal emawni?
"harh teh... " peih loh zet chung chuan sawi harh tur ringawt in a lamah ka va tawlh phei ṭuih ṭuih a, engang pawhin sawi harh tum mahila thi ang chiah a ni tawh, sawi in awmzia a nei lo.

Keimah chauh a Rainer ka hmachhawn tur chu ka peih lo lawk ,engtin tak min hau ang maw ,a ṭawngkam a na thei em em mai lehnghal. A inah a hriat loh in kan lut ru a, ka la luak hrep zui chutah Shane lah chu a bathroom ah a chatthla der lehnghala. Engvanga che khir em em nge maw ka nih le? Aaahhh.... ava han zahthlak tak!

Bathroom ah zankhua in ka awm theih bik loh avangin tap rin chhan chung chuan ka in pawt tho ṭaih ṭaih a,ka pheikhawk pawh hi ka ning ta hle mai mahse phelh tur pawhin ka thatchhe lutuk tawh.

Buaina ka thlen nasat tawh nak alaiin a englai ber hi nge ka khawih fuh pawh ka hre lo shower chu a rawn in on ta thut mai!! ka che fuh thei lo lutuk chu ka thin a rim hlur tawh.

"oh!! Sh*t... " off ka han tum mai a, eng eng emawni herh tur a awm nual avangin eng ber hi nge a off na ka hre mai lo lehnghal!! khawngaih in he shower tehhrep hi tuemaw in min han off sak hram teh u...Lalpa leh!!  ka thi thei takngial dawn!!

Ka mangan tawh mai bakah ka thawmhnaw ro duak tawh pawh a phuh huh leh tak vek hnu chuan vanneih thlak lutuk in ka off thei hram!! ni e, ka huh zawr vek tawh hnu ah a nih chu!! huizz.. engpawh chu nise ka off a a ṭha hrim hrim.

Hlauh leh zah pawh a sawi theih tawh loh chhuata ka thawmhnaw huh far thla tluk tluk chung chuan bathroom aṭangin ka chhuak nghal nal nal a, Rainer awmna lam pawn en ngam tawh lovin thawm dim thei ang ber in kawngka lam chu ka pan phei zal zal a, min rawn hmu lo hram se ka ti takzet.

Kawngka ka thlen phei pawh chuan thawm engmah ka la hriat loh avangin ka han thaw chhuak zui hak a, a tawp nan Rainer va melh leh zeuh pahin ka chhuak nghal daih a,ka thil hmuh avang chuan ka lut leh rang ngei mai .

Chiang takin hmu lo mah ila Rainer chuan kawr pawh ha lovin ngawi rengin a hnungzangah damdawi hnawih tumin a lo bei ngar ngar a ni tih erawh chiang takin ka hmu thei thung.

"engthil nge thleng? " ka hlauh thawn em avangin eng thil chiah nge thleng hriat tum chuan ka va pan hnai nghal chawt a, mahse vin zet hian, "ding rawh... " a rawn tih dum dût avangin ka han ding deuh chut a,ding rawh min ti miau a ka hnaih mai ngam bik lo.

"chhuak rawh...!" a hma aia ngaihno bei lo hian a rawn ti leh hlak a, ka rilru te te chuan kal daih ka duh mahse ka chhungril erawh in ṭanpui turin min ti tlat thung. Puih a duh loh avang maiin kalsan ta daih ila thil dik a ni dawn em ni? engpawh chu nise engvanga in ti na nge maw a nih le?  ughh chu zawng zawh ngam pawh a ni leh chuang lo ngaihtuah buai lo law law zawk ang.

"aih ,puih i ngai alawm... " in hum ruh pahin ka ti ve ngat a, pui tura ka va pan hnai ta mai hi ka la in awih thei lo, he hmun aṭanga chhuah daih hi a finthlak zawk tehreng nen.

"i puih ka ngai lo... chhuak rawh ka tih chu... " a rawn ding ta rûn mai, a awm mai mai pawh a nelawm tawh loh sa nak alaiin min han vin deuh hluk phei hi chuan a hlauhawm zia hi inhria se ka ti takzet.

"khawi damdawi chu ka lo hnawih sak ang che... " a ṭawng hre lo ang maiin damdawi ah lapua chu ka han chiah huh sawk sawk a, amah hnaih tuma ka ke ka pen rual rual chuan a rawn hawi let thut a, dawhkan chu a vaithlu ta tawp mai!!

Ka hlau lutuk chu ka ding khawng nghal awt a, phawk fe a men pah in ka chil ka han lem leh dak a, ka thaw dep dep tawh. Mahse hlau hle e tilo chuan a abs te leh a V line nalh lutuk te erawh ka lo hmuh hmaih lo chiang kher mai,a dar leh ban vel uluk taka workout tih hriat reng reng te chuan a ti chhelo zual ,a hot a ni tawp mai.

"i... i hmai kha... " a hmai a duk nasat mai bakah hliam leh thi a awm nual avangin ka ti chhuak hlawl ringawt,chutiang sawina hun pawh a nih loh avang chuan ka inchhir leh hnuhnawh. He kâ chawng chawng vang vek hi, ka duh duh ka lo sawi chhuak leh phawng phawng ṭhin .

"a thi ania...damdawi hnawih ang " hlauthawng tih hriat tak hian ka tih ngaihna hre lo chuan a kutah ka va vuan nghal chawt a,  mahse a kut a la sawn lova a thing thla bawk hek lo, a awmdan chu mak ka ti letling zawk.

"engvangin nge i chhuah mai loh... " tun ṭum erawh a aw ah thinrim na engmah hriat tur a awm lo.
"puih i ngai a... ka chhuahsan daih thei hleinem che... "
"i ti tak tak em... min chhuahsan chu i duh lo tak tak em ni? " enge maw a hriat a hetiang thil min zawh chiam chiam mai le?

"ka rilru ka thlak daih mai tur asin... " ka tih zawh ruala a khi suk hmel chu chiang takin ka han hmu thei.
"khawngaihin.... i hliam te hi damdawi hnawih vat an ngai... " hmm...  keimah zawkin damdawi hnawih turin kan ngen chu le?  amah hian min ngen ngawih ngawih tur a ni zawk asin.

"a nih chuan engvangin nge i din khawng reng.... "
"ughh... aw, hnung lam hawi rawh... "
min rawn nuih vur vur pah hian ngawi rengin hnunglam chu a hawi ve mai bawk a, ka rin aiin thu a awih phian. Keilah confi zetin ti ṭhang niawm fahran hian ka sam chu ka han tuai chho phawk a, lapua chu ka han chiah huh nawn leh ngat a.

Ka hnawih dawn meuh chuan amah alo sang ve bawk nen ka duh angin ka ban pha ta reng reng lo, a na lai phei chu ka han hmu pha lo hrim hrim.
"uluk ve deuh teh... "ban pha mang lo tih takah ka lo han hru deuh tawk tawk aniang, a rawn sawisel rang emai.

"umm... i ṭhu zawk thei angem? "inthlahrung tak hian ka han ti sap a ,"englo ania ka ban phak lo a" ka tih chhunzawm leh zat bawk.

A rawn hawi let rual chuan engmah pawh min hrilh hmasa lovin ka kawngah a rawn dawm chawt a,dahkan ah min pawm kang nghal nawlh ringawt.
"tikhan a ṭha tawh em? " min rawn la nuih vur vur zui.

Dawhkana ka ṭhut kan takah chuan a hliam chu chiang zet in ka hmu thei ta a, ka rin aiin alo nasa daih mai, a vun a thler nimai hian ka hria mahse ṭhui ngai khawp khawp erawh a ni lo.

"i insual em ni? " bandage bel mawlh mawlh pah chuan ka han ti sap a, a lo bu nghat bawk.
"ngatinge? " ka hre chak tlat a nih chu, hei chauh nilo Rainer chunchang engkim hi hriat vek ka chak takzet.

"i dil chhut hle mai... " tih pahin a rawn hawi let a, hnai set sawt hian kan in hawi tawn ran mai,zamawm tak hi a ni ringawt .

A mit ah tak chiang lutuk in ka lo en kâr a, ka thinphu ri dawt dawt te hi a hriat loh hram ka beisei.Ka thawk te chu a pangngai lo ṭan a, maktak maiin electric in a a man ṭek chhuaih chhuaih ang mai hian ka awm in ka hria.

A ni pawh keimah ang tho in a awmdan a danglam tih ka hre thei, mahse kei ang em em in a hmelah a lang ve lo.Kan in hnaih tawh bawka a thaw lum ham ham te chu ka hre thei.

"ka hmai ah damdawi i hnawih dawn lo em ni...? " tih pahin ka lapaw ken lai chu min rawn thlak sak a,min rawn tawh zawng ringawt pawh hian kan in hip tawnna a sang lutuk a, ka mur nghal sung sung mai, a kut châng te lah chu a pilh hrep hrup a, na a ti ve lo emawni le?

"na i ti lo em ni? " a biang ki lai taka thisen rawn chhuak chu ka han dep hlek hlek a,a duh aiin ka lo ti na deuh aniang ka kut chu a rawn vuan nghal chat a, a thip ti ner hmel ka hmuh chuan ka lo nuih ver ver ringawt.

"i dim lo hle mai... " a rawn ti ram hmaih a, nui lo mahse nuihza hmel a pu thung. Lapa leh!!  a hmui mawlh hi, engvanga fawh chak tlat nge maw ka nih le?

nilo... ka ruih vang aniang hetiang anga ka awm , mahse a hmui bawk chu ka melh leh zeuh thin a, ka dang te chu a ro ta vek emaw tih mai turin ka chil chu ka han lem leh dak thin a.

"lo tuar ve mai mai rawh... "Ka lo ti sap a, ka sam huh far tluk tluk chu a ning ngang aniag min en vung vung pahin a kut lehlam chuan hnung lamah a hui phei nghal thawk a, mak tih hmel takin ka lo melh nghal kawk ringawt.

"ughh....shower ka on palh a " zahzel ah nuih luih sak pahin ka kun ta daih a, ngun takin min en reng a ni tih ka hriat phei chuan hawi chhoh tawh loh mai te ka duh rum rum tawh.

"i mitmeng chu a nalh hle mai" oh!!  Rainer ka aṭanga chhuak atan chuan a sweet lutuk a, ka bengdar te hian lawmthu min hrilh hial se a ṭha ang.

"umm... ka ti tak tak... " awih lo hmel ka lo hmuh leh hman tawh pawh a ni mahna, mahse a rilru a thlak leh nghal daih lo avangin ka lawm ru hle.

Chhanna chang pawh hre lo in ka en kâr reng a, a hmui sen siah mai te leh a heh thi deuh niau te chu ka en ning thei lo. Engatinge maw a hmui pawh chu fawh ka chak em em mai le?

Sadie... hetiang ringawt hi ngaihtuah suh, hawisawn vat rawh tiin ka in hrilh mawlh mawlh na chu ka in thunun zo lo chuan a hmui ah chuan ka han fawp thut ringawt!!

(Note: ka story hrim hrim hi mizo story a nih loh avangin an ram mil thei ang ber tura ka ziah a nia ,an tawngkam alo mawi lo deuh emaw an chezia a lo mawi lo deuh a nih pawhin hriatthiamna nen in lo chhiar hram hram dawn nia 

Chuan ka sawi leh duh chu hnam dang a bik takin American tleirawl ho te hian a tlangpui in kum18 an tlin tawh chuan virgin tawh lo turah an in ngai hmiah thin ,virgin nih chu a zahthlakin an nuihzat thin zawk (an vaiin an ni vek lo ) mahse hetiang ngaihdan an put nachhan chu sex education mumal an neih loh vang a ni. 

School velah te campaign te nei ṭhin tho mahse keini mizo te ang hian an nu leh pa ten an hrilh melh melh ve lo tawp ang, chutiang chiah chuan Sadie pawh hian hrilh tu mumal nei ta se chuan hetiang rilru hi a pu bik lo ang... hehe

Chuvang chuan ka reader te ka chah duh cheuh chu mipa emaw hmeichhia emaw pawh nise i nau, i tunu, i tupa, i fanu, i fapa kha kum 10 an tlin dek dek tawh chuan inneih hma a sex hman that loh zia hrilh hre tawh rawh,a hma hmiah lo ania hrilh mawlh mawlh a hun tawh zawk ... xoxo)