February 01, 2019
RAINER BLACK
Remruati Bawitlung (Haylor)
Ig- @remruati_kath
fb- Remruati Bawitlung/ Haylor Septh
PROLOGUE
Meet Sadie Morin !!
Hey!! Sadie Morin ka ni a,kum 18 thla hmasa khan ka tling chiah bawk. Totonto, Ontario(Canada) a piang ka nih angin Canadian ka ni nghe nghe amaherawhchu ka nu hi Philipino a ni daih thung!! a awmzia chu Philipina - Canadian ka ni tihna a nih ber chu!!
Kum4 mi lek ka nih lai in ka pa in min boral san a, a hnu deuh lawkah ka nu in ka unaupa,ka pa fa hmasa Braydon Morin nen Toronto aṭangin Nashville, Tennnesse(USA) ah a thiante bulah min pempui ta daih a, chutah chuan kan in bengbel ta a ni.
Nu la upa lo tak leh hmelṭha tih takah ka nu chuan Kum 5 kalta mai khan pasal dang min neihsan leh vat a, kan unau a min chhuahsan tak daih avangin chutaṭang chuan ka û Braydon chuan a theih ang tawkin min enkawl chho ṭan ta a, ka nu pawhin thlatin pawisa tlem a zawng chu min rawn pe ve ziah tho.
Ka û thla zâr hnuai a seilian ka ni bawk a ,a chhungkaw neih chhun ka lo ni lehzel bawk nen min duat dan leh ka thlavang a hauh dan chu puitak hi a ni ringawt!! ka mipa date tur thlengin a phalna lak hmasak phawt angai ,engpawh ti dawn ila a duhzawng a nih loh chuan tih luih ngam a ni tawh ngai lo.
College ṭha taka kal tir min duh avangin Nashville a boarding school ṭha berah min awmtir char char ṭhin a, College ka kal hma kha chuan boarding ah ka awm char char ti ila ka sawi sual lovang.
Ka û hi ka sawi tawh angin ka pa fa hmasa a ni a, kum 5 laiin kan inthlau, tette aṭanga chhungkawpa chan chang reng ṭhin tih takah a rualpui te aiin a puitling bik hle bawk.
Braydon nu hi Dutch a nih avangin kei ang lo takin vun ngo sâr leh sam buang a nei bik thung a,a palian in a hmelṭha hle bawk .
Kei erawh thlahpawlh(biracial) tih takah vun hang lam ka nei ve thung a (mizo te vun ang hi),Asian thlah tih takah ka tawi in ka tê bik hle, ka tê navang e ti lo chuan 'hmelṭha' tih erawh ka hlawh hle thung.
Ka û nen landan ah kan inang lo lutuk hi chu unau chu sawi loh ram hran mai pawh nilo inhre ngai lo tawp angin in sawi pawh ni ila tupawhin an awih vek ang.
Tunah hian ka nu ṭhiante (ka pute tiin kan ko mai ṭhin ,thisen a inzawmna erawh kan nei lo) te in bulah ka û nen kan khawsa ve naw naw a,workshop bakah motor silna hmun an neih avangin chutah chuan ka û nen kan in hlawh mai ṭhin,chumi chauh nilo part time job pahnih lai ka û hian a thawk tel bawk.
________________________________________
CHAPTER-1
Motto- "Be the change you want to see in this world "
★VANDERBILT UNIVERSITY ★
"Sadie.... thu pawimawh lutuk hrilh tur che ka nei!!"
Class aṭanga ka chhuah rual rual in Chelsea chuan washroom lam pan in min kai phei nghal dawr dawr a, a sam kir buk chhap te leh a kekawr arh zet hak te chu a kalpui phe hlawp hlawp a min vawnna lah chu ka thlah hlau niawm fahran hian min kai bet tlat lehnghal.
Mak ti hle mah ila hetianga a tih fo avangin ngawi rengin ka zui ve mai bawk .Tunṭum chu party na a kal turin min sawm tawh loh hram ka beisei.
Washroom kan luh rual rual chuan midang an awm nge awmlo tiin toilet te chu hawng kual in a check nghal vat vat a, a awmdan chuan ka ngaih a ti ṭha lo lek lek!! a bialpa Neon nen an in ṭhen te hi a ni lo maw?
"tumah an awmlo.... "
"eng nge?" zawi sap hian ka lo ti sa sa a.
" enteh.... " midang hriat hlau tih hriat tak hian a han hawi kual leh hrak hrak phawt a,thil tiru tur te pawh kan ang zawk.
"Eng nge? i sawi vat loh chuan ka dawp dawn che a nia" nuih tut tut pah chuan ka bag a pen chu la chhuak in ka han tin der a.
"ihh... Derek leh Camille te in fawp lai ka hmu...." ka nui tawp nghal riai riai, an inkawp a ni tih ka hre na chungin min ti na em em tho, ka rilru natna chu thup theih loh khawp in ka hmel pawh a inthlak danglam chiang hle!!
"Derek nen kan in ṭhen tawh " a ri chang chang chauh, meng khup nghal lap in hnungchhawn zawng chuan ka ding nghal daih a,Derek hming ka hriat tawh hi chuan ka hnuk a ulh nghal ṭun zel.
" Enga!! engtik ah !!" Chelsea hmel a mak tihna te chu ka hriatthiam pui a chhanchu engmah ka hrilh ve lo tlat alawm.
"karkhat vel chu a ni tawh... "
"eng... engvangin ?"
" uughh... min lo kawp a Camille nen ..." a mak ti lutuk chu a ang nghal phuau a, a khabe chu chhuatah a tla lo chauh!!
"Maw!! Chupa phiangsen chu " nichin a thawm a dim ang aiin a au ring , keimah zawk hian a ṭawng ri midang in an hriat ka hlau tawh zawk.
" mahse... ngatinge engmah min hrilh loh, Sadie i bestfriend hi engmah min hrilh lo amaw!! ?" lungawi lo tih hriat tak hian a han ti leh a, Derek an min kawp ai mahin engmah ka hrilh lo chu a la na zawk mah in ka hria.
"hrilh cheu ka tum alawm.... Kaitlyn nen... "
"Kaitlyn pawh i la hrilh lo amaw!! engtik ah nge min hrilh i tum a ?"
"ughh....ka hrelo "
" anih i û in a hre tawh em? nilo... ala hrelo tih ka hria Derek a hmel ala him pial danah " chhan ngai lovin amah leh amah chu a in chhang zo nghal vek.
"a hre tawh... kan inṭhen tih chu mahse kan inṭhen chhan erawh a hre lo... "
" a kawp hnu ah che pawh i la ṭan cheu a maw?!! hrilh la a phu tawk chu a hmu mai dawn alawm ..." a ngaihna i awm lo tih nuih hian min rawn nuih chhuak hak a,a thinrim a ni zawk mah ang chu.
"kan in karah inhuatna siam ka duh lo alawm..."
Ni e, kan in ṭhen chhan ka û ka hrilh lohna chhan chu kei ai ai in alo la na leh anga,Derek hi a hmel hmuh tlak loh khawpin a sawisa duh mai ang.
Chutah rilru na ang pawhin ka awm ngam lo ,Derek a chan a chhe dawn lutuk a chubakah kan inkarah hian ka û a lo in rawlh ve ka duh lo.
"engpawh chu nise Kaitlyn in min lo zawng tawh ang... " a tih rual rual chuan message kan dawng rual nghal!!,phone pawh en lovin kan in nuih suk a , "Kaitlyn Wang " tih rual pahin washroom aṭang chuan kan in zui chhuak nghal a.
Kum hnih kan in ngaihzawn hnu ah Derek an min kawp avanga kan inṭhen thu Kaitlyn kan hrilh ve chuan kei ai ai in min lo thinrim pui zawk a,an han in sawi chhiatsiak tak tak mai chu rilru na e ti lovin ka nui ka nui ta mai.
Nidanga kan tih ṭhin dan ang bawkin class ban ah university bula restaurant ah chuan thil ei turin kan pathum chuan kan ṭhu leh ṭhâm tawh a,tlemte mah ni ila kan bengchheng ve em em ringawt.
"Sadie...Vawin chu bus in kan haw ho mai dawn mi? " Kaitlyn in a tih chuan Derek bawk ka hrechhuak leh ta!! nidang chu nise class ban veleh helai restaurant ah ngei hian kan ṭhian pathum ho hian thil min eipui leh ngei anga, chutah in thleng min thlah loh pawhin mall velah kan leng leh mai mai awm sia.
Kar khat lek mah nise ka lung a lengin ka ngai tawh takzet. Naktuk hi inrinni alo ni leh reng tawh a,Derek a awm loh chuan weekend ah eng nge ka tih tak ang ti a ka inngaihtuah lai chuan Chelsea chuan in ti thei fahran hian,"zanin chu ka ṭhiannu in house party a kalna tur a hria a min sawm ve asin " kan pahnih chuan min rawn melh tawn zak zak a.
" Bam!!! ṭhulh chi a ni tawh lo, kal ngei ngei ang u...Derek pawh a rawn kal leh ngei ang "
" ni e... a tello a i hlim theih zia hmuh tirna hun remchang tak a niin ka hria... "
Keichu ka lo ngawi leh dâk tawh ,kum 18 ka ni emaw ni lo emaw engtik ah mah ka û in kal ve a phal dawn chuang lo.
"Sadie... " an pahnih chuan ka chhanna ngaichangin min en kar a, a mood tih chhiat ka duh lo takzet bakah keimah vangin an ṭhulh fo tawh lehnghal mahse ka û hi .....
"umm... " ka kut seh pahin ka han thaw chhuak hak a, zahzel ah ka bag kheuh niap niap pahin "in hriat angin... " ka han ti dek dek a Chelsea chuan ha seh chilh ran chungin a hmui hup deuh pahin zawi sap hian ,"Saw mi tenawm pahnih... " kan piah a dawhkan melh hrak hrak pah in an chungchang sawi lo niawm takin a tukhum chu a han chul leh vel a, keini lah in kan lo manlo nasa a melh na lam chu ka hawi phei rual haw ringawt!!
"in mawl a mi... nge in en nghal a... " Chelsea chuan a ti vin zui hlak a.
Derek leh Camelle te in si riala an ṭhu dun lai ka va hmuh chuan ka kawchhung hi a rawn sa nghal up up a,an infawp zeuh zeuh lai ka hmuh phei chuan ka thin zawn chu ṭham nawk nawk ang mai hian a rawn na nghal zawk zawk a, ka en tih hria niawm fahran a a kut Camelle malchunga a dah kher te sawn min ti na zual.
"hmela chu ka rin aiin a zak thei lo... "Kaitlyn in a tih nauh nauh lai chuan Camelle nen kan in melh fuh chat avangin ka hawi let rang kher mai!!
A hawiher, a mitmeng leh a awmdan vel aṭang sawn a intih theihzia leh min runluih a ni tih te chu ka hai hauh lo, neih let leh chu sawi loh ral khat aṭanga lo tuar tlawk tlawk bak engmah ka ti ve ngam lo chu a nih hi.
"sawtiang anga kan in ha chhing ve a nih chuan tupawh in min duh ang chu..."
"makeup tello chuan a hmelṭha bik lo emai...helai hmun hi hotel emaw a ti a nih hi... saw an in ti lo chauh a nih saw... "
Engang pawhin sawichhe mahse Camelle chhiatloh zia leh hmelṭhat zia chu tlang hriat a ni tho tho, mi bully a ching tih mai lo chu sawisel bo a ni ringawt.
"washroom ah ka kal lawk dawn " ka tho vut a,ka ṭhiante lah chuan chhang pawh min chhang lo in phone min khawihsan daih lehnghal , sawi nawn tawh lem lovin washroom lam panin ka kal nghal nal nal a.
Khami te pahnih awmdun hmuh kha ka peih tawh lo takzet, hetah an rawn kal dawn tih hria ila hmun dangah ka kal daih mai tur.
"urghh... Sadie, hetiang hian awm lo teh.. move on tawh rawh " dim na nei lek lovin ka hmai phih pah chuan ka han in nuai nawk nawk a, theih chu nise an chuah hma chu heta tawm char char mai hi ka duh.
Washroom aṭanga ka chhuah rual chuan Derek nen kan intawk hlawl mai!! rin loh deuh a in hmu kan ni bawk a ramhuai hmu ang maiin alawm kan mengphawk ni .
" oh!! hi... " za lo zet hian min rawn nuih suk a, a ha var rual ṭhah te leh a biaksum ka hmuh rual rual a tuiral lo tur in ka insik ru mawlh mawlh a,kan inthen hnu hian a ṭha zual sauh nimai hian ka hria.
Min kawp dan vel te leh min ṭhen dan vel kha ka ngaihtuah chhuak lo thei lo, chu chuan min ti thinrim leh hnuhnawh a ka hmelah a rawn lang chhuak hial.
Biak takngial pawh ka peih lo, tum hmuk pahin kal pelh mai chu ka han tum a mahse nikum valentines day a ka bracelet pek kha a lo la bun tih ka hmuh chuan ka ding chut a.A ni pawhin ka hmu tih a hriat chuan sawi tur hre lo fahran hian, "ughh...ka phelh vat ang " a tih chuan ka khi suk ringawt.
"i duh duh danin i ti thei alawm... i duh chuan i paih thei ang... "
"Sadie... min haw viau mi? "
"lawmthu ka hrilh zawk ang che... i nih na dik tak ka hriat phah a " min rawn melh rum ngang mai,hetiang hian vawikhat min melhna.
"hahh.... in en ta che hetiang te chuan tuin nge kawp reng peih ang che " oh!! a ṭawngkam chuan min khei zak mai !! hre thang lo niawm takin ka awm zawn chu a rawn na leh zawk zawk tawh.
"Min zahpui vang maw lo ni a..." ka han nui lui ngial na a ka mit erawhin dawt a sawi ve thei lo, ka mittui chu ka inrin hma in a rawn tling leh pam tawh.
"High School student pawh kan nih tawh loh hi... inthlak danglam ve tawh rawh, hetiang hian hmanlai mite anga awm hi bansan tawh rawh "
"Party na a ka kal theih loh vang leh tun thlenga ka la virgin avang hian hmanlai min ti maw!!... Derek, ka in peih hma min nghah ka lo ring asin ..."
" khang thil kha ka kham tawh lutuk...engtik ah nge i in peih hun chu ni ang? tunah maw... keichuan tlem talin kan inzawm na tih ngheh chauh mai a ni ka duh mahse hetiang ringawt hi chuan ka peih tawh lo "
"tunah chuan i duh i hmu tawh bawk a ka lawmpui che... party, sex leh hmeichhia i duh duh chu kawp ta pauh che " a hmuh loh turin ka mittui chu ka han hru hul zeuh a.
"ka rilru zawng zawng ka lo pe che kha ka inchhir takzet... " tih pahin ka kal nghal nal nal bawk.
" kal ang u... " ka ti thut a, ka bag ka ah that sawk sawk takah chuan ka ṭhian te pahnih chuan min rawn melh ha a.
Engmah sawi belh lovin ka kal nghal hlawk hlawk a, ka ṭhiante pawhin ka hnungah min rawn umzui ve nghal dawr dawr bawk.
Ka kal dawn a nih tih Camelle in min rawn hmuh chuan a rawn ding chhuak kher a, ka kalna tur dalin a rawn ding lui kher bawk.
Derek an min rawn hmuh chuan inthiam lo hmel a pu ve deuh in ka hria chu chauh pawh chuan beiseina min pe leh ringawt tawh!! Ni e.. kha leh chen kan lo in kawp ve tawh a,min ṭawngkum dan zawng zawng ngaihtuah phei hi chuan hrehawm ti a kun ngawih ngawih zawk tur a ni.
"Love...tun weekend chu rawn riak rawh aw...i ex boring zet theihnghilh ṭhak khawpin ka lo awm ang che" min rawn melh kher pah a Camelle in a tih chuan 'aw ka rawn riak em em ang' ti niawm tak hian a nui vel a nih chu!! ka inhum ruh rang kher mai.
An thusawi hrelo niawm takin ka mit ka han chet kual ralh a ," excuse me... " ka ti ve ngat ,"hmun dangah i ding thei angem" ka tih ruala ka ṭhiante pahnih nui ri zui hak chuan min ti phur zual.
"tunge? " pheikhawk sang a bun avangin a khabe ka thleng awrh chauh a, ngeiawm zet a min rawn en khum luih vel pah chuan lehlam chu a han hawi kual vel a ,"oh!! nang lek chu niin... " ka thin in a tuar lo ṭep tawh.
" aw keimah... " ka han nui lui suk a.
"Miss Tan...ka lo hmu lo che alawm mawle "
Enga!! tunah khan ka vun rawng vangin min hmusit vel amaw!! heihi ka vawikhat tawnna ni lo mahse ka vun vanga min chhaih nawmnah ni hmasa bera ka rilru nat ang tho khan tunah pawh ala na renga engtik ah mah ngaiah ka nei thei ngai bawk lovang !!
"Umm...Camille kan kal dawn mi niang " Derek chu min rawn melh hrak hrak pahin a rawn in rawlh nghal vat , mahse min chhan a hnek in a chhuahpui nghal daih bawk.
"Sadie... kal ang u, dar4 subway kan nang hman lo ang "
"zanin party kha dar engzat nge... " ka ti chhuak phawng ringawt!! tuna ka rilru a awm zawng chu party leh a kaih hnawih ho hi ka ti ve thei tho a ni tih Derek hriat tir ka duh chuvang chauh a kal tum chu ka ni .
An pahnih chuan in melh ralh pah in an nuih chhuah loh nan an han in sum deuh a, Chelsea chuan min rawn kuah pahin ," kha chu ngaihtuah buai duh suh... i û chiah buaina a ni tawh mai"
"ka û chu ka ching fel thei mai ang " ka tih takah chuan an han au tak tak mai chu restaurant a awm ho chuan min rawn melh ṭhap mai alawm.
( pic hi Sadie Morin aw)
Ka story chhiar thin tute zawng zawng kha in tello chuan chapter pakhat pawh ka puitlin thei lo a nia ...chuvang chuan in kutah ka in nghat leh tawp mai...Xoxo)
0 COMMENT:
Post a Comment