My Drug is You-63 by Remruati Bawitlung(Haylor)

CHAPTER-63 

Motto- Dream Bigger

★ Coco's POV★

Ka pa a muhil chiah tih in ka mut alo chhuak ve tawh bawk nen ham bai bai chungin ka room te reuh te ah chuan ka lut hnak hnak a,hun rei tak chhung pum puar luah a ka lo vei kual ṭhin avang khan ka pum thep ta vek chuan ruak huai angin min in hriattir.

Mut zâl pah chuan thil eng eng emaw ka ngaihtuah mai mai a, keimah ngeiin chhungkua ka nei ta mai hi awih harsa ka ti in min ti hlim takzet.

Naktuk maiah naute pawh kan la chhuak thei tawh dawn bawk a, kan pathum a hlim taka kan awm ho leh thei tur hi ka phur in ka helhhawlh zawk hial.

Chutia naute hming tur te leh thil eng eng emaw ka lo ngaihtuah neuh neuh lai chuan Tess in min rawn call hlawl mai!! hun rei tak chhung kan in biak tawh loh avangin min rawn call thut avang chuan ka ngaih a ti ṭha lo nghal.

"buaina a tawk leh tawh a ni maw! " phur lo zet chuan ka han pick up a, hello pawh ti duh lovin a ṭawng hun nghak in ka ngawi reng ringawt.

" Coco.... Asher dinhmun hi ka hlauhthawn pui takzet... "
" maw!!  " Asher te engtin nge a lo hriat? rang takin ka tho chhuak nghal zawt a, ka mutchhuak pawh a reh nghal vek.

"Death race ah Hunter an tel tir a tum tih kha ilo la hre ve lo em ni... ?"
"hre.... hrelo,  engtin nge Asher chu a awm? " ka ṭawng pawh a bah nuai a, hlauhthawnna avangin ka thinphu pawh a ri zawt zawt tawh.
"rawn dang vat rawh. ..a tan a hlauhawm lutuk... "

" hreptak chuan... " phone dah pahin car lam panin ka tlan nghal hlawk hlawk a,Hunter an ka tel ai a tel tir tih a hriat reng.Ngatinge maw Asher pawh chuan tel a tum reng reng ni, a hlauhawm lutuk asin.

"mawl lutuk... " ka thinrim bawk nen chak zetin ka khalh chhuak nghal fua a,in tlansiak an ṭan hma in ka dan ngei ngei angai, nilo he thil ah hian ka in rawlh tir leh ngai tawh lovang.

A khat tawkin Asher chu ka call deuh reng a mahse a in ring ral ṭhak ṭhak .
" la teh... Asher la teh... " ka han in hum ruh leh rih ṭhin.
Hunter hmel ka ngaihtuah ringawt pawh hian min ti thinrim a, a hmai ham tawn tawn a hnek pawp pawp te nia ka chak ni.

Asher call tum a ka phone ka va melh zeuh lai chuan Tess bawk chuan min rawn call leh a,ka pickup rual rual chuan ,"ka rawn thleng ṭep ,Asher.... "ka ti hman chiah tih in hlauthawng leh ṭap aw deuh hian, "Asher a accident a... damdawiin lam an panpui mek " a tih rual chuan car chu ka ti ding chawt a, ambulance in min rawn tlan pel nghal fua bawk.

Ka phone chu ka hlauh nghal pawp a, ka hamhaih bawk nen Ambulance ri vung vung ngaithla chung chuan ka meng phawk nghal kawk a,thawk leh khatah engkim mai chu a reh nghal duk a, ka tha a khur a chet ngaihna pawh ka hre lo.

"Tuemaw in a rawn bei thut a... chupa pawh chu an zawng mek ....Coco ...min ngaithla em ? Coco ...." Tess in a ti lauh lauh ri te chu hre vek mah ila chhang tur ka awm tawh lo,khur zawih zawih chungin ka han in hum ruh a,rilru natna avangin ka awm zawn chu a rawn thip nghal vawng vawng bawk.

Hetiang ringawt a awm thei ka nih loh avangin ka han in ti harh chawp leh rih a, ka kut a khurh nasat em avangin engine ti nung leh tur pawhin beih fe a ngai.

Min ṭhawn em avangin ka mittui takngial pawh a tla thei lova, ṭah te ngat phei chu ka thei lo hulhual. Ngaihtuahna mumal ka put theih loh mai bakah hma lam chu ka melh ngur ngur a, ka motor khalh lai pawh ka ngaihtuah tawh lo,eng kawng nge ka zawh pawh hre lovin hma lam pan in ka tlan ngar ngar ringawt.

Damdawiin ka thlen chuan rang takin ka tlanlut nghal vata, chhuat a thisen tharlam tak far ka hmuh te chuan ka vai ruai a ,ka thawk te chu a buai vek a,bang rin chhan in ka theih tawka chakin ka kal hlawk hlawk bawk.
" Coco.... " ka awmna hmun pawh ka hriat loh lai chuan Landon an min rawn ko hlawl a,ka thinrim em avangin rang takin a kawr nghawng ah ka ṭham nghal tawn a mahse ka ṭawng chhuak mai thei lo.

"tunah an endik mek, keimah chiah in ka kalpui a, Hunter pawh a rawn thleng ṭep ang..."thawk lak kawk pahin ka bula thir ṭhuthleng ah chuan ka ṭhu hnawk a, mi â ang maiin ka melh ngai ka melh ngur ngur bawk.

Hunter rawn kal lai te chu hre reng mah ila chet nachang pawh ka hre tawh lo a, ka bula a rawn ṭhut pawhin ham bawrh bawrh chak hle mah ila che turin chakna ka nei tawh lo.
"engkim a ṭha vek mai ang... " min rawn kuah a tum chuan ka kut in lo dang nghal vat a,a kuah chu sawiloh a khawih pawh ka duh lo.

Minute 15 hnu velah ah Asher chhungte pawh an rawn lang ve nghal vata a,lo chhawn tlak pawh ka awm lo.
" Coco.... engkim a ṭha leh vat mai ang " tih pahin Rachael chuan min rawn kuah nghal thawp a, Garce pawh ka bulah a in hnit hlawp hlawp bawk.

"A nakruh pathum leh a malpui veilam a tliak a, a thin a thler mai bakah a chuap leh a thluak ah thisen tamtak a tling bawk... chu lo pawh chu ala awm ang ,kan la endik mek zel e" doctor in a tih lai te chu hre vek mah ila ka mittui farkhat pawh a tla thei lo,chu chuan min ti na zual in ka thinlung hi hmun tamtak a zai thler pawp pawp ang mai hian a na ngawih ngawih a,theih chu nise ṭah chhuah hawm hawm ka chak takzet.

A insawh nat em avangin doctor ho pawhin tih dan tur rel in meeting an nei hial a,an ṭawngkam aṭangin beisei an neih tawh loh thu leh a thih ngei an rin thu an sawi lai te chu ka hre vek a, midang an phili buai lai te chuan ṭhut hmun ah ka melh ngai ka lo la melh ngur ngur thung.

Darkar 6 zet an zai hnu ah pawh a ngai ang chiah in ka la kharh kar a, khawi hmunah mah ka la tho sawn leh lo.Ka chhehvel a mi te leh vei vak ho chu an phe zut zut ang mai hian ka hria a, thawm lah chu a reh duk lehnghal.

"Asher chu an zai zo tawh a... a ṭha leh vat mai ang " ka bula rawn ṭhut pahin Samul chuan engang pawhin min hnem tum mahse Doctor te in biak na a, a thi vat an rin thu leh a damchhuah an rin tawh loh thu an sawi lai te chu ka hre ve kâr.
"kan va hmu ve dawn mi niang... a lo nghak reng tawh ang che... " a tih chuan mak tih hmel takin ka en ha a, a mit sen râm te leh insum hmel ka hmuh hian ka lungngai takzet.

" hawh lo kal rawh... " ka kut a vawn chuan ka tho ve mai bawk a,engpawh chu nise a hmel ka hmu leh thei tur hi ka hlim takzet. Samuel an min hruai luh a tum lai takin Garce chuan ṭap hawm hawm chung hian,"doctor sawi kha eng nge awmzia ... a tawp na tih chu eng nge? a tawp nan ka fapa hi hmu turin min ti amaw?" a tih ri ka hriat chuan ka ding nghal chawt a, mittui tling pam chungin Samuel chu ka en ringawt bawk.

Tun hi Asher ka hmuh tawpna tur maw ni a!!  nilo heihi a tawpna a ni thei lo,   hlawhtling takin an zai a, a harh hun kan nghak zawk tur a ni lawm ni, engvanga a tawp nan a min hmuh tir tum nge maw a nih le?  heng mite hi an â zo tawh a nih hi.

An thusawi ka rin ve duh loh avangin Samuel nuih luih suk pah in ICU ah chuan ka lut a,"ka rei lo ang " tih sap pahin kawngka ka khar nghal bawk.

Room chhunga khawl awm rup te chuan mi râp in min ti hlauthawng zual a,thawk halh pahin ka han in ti pachang lui ve tak na in ,ka hun tawn tawh ah hetiang em em hian ka la na ngai lo .

Muang changin Asher chu ka pan hnai chhat chhat a, ka zam in ka tha a khur nasa hle bawk."i ṭha tiraw? "a bul hnai a kal ngam chiah si lo hian ka han ti sap a, mahse chhangtu awmlo in room chhung chu a reh tlawk tlawk thung.

Asher chu khumah chuan a mu bam a, a ban ah leh a taksa ah chuan hrui tamtak an thlung duah a, a ka ah chuan pipe lian tak an vuah bawk a chumi hmang chuan ala thaw ve ṭawk ṭawk hi alo ni a. A hmai pilh phung te leh duk thluah ka hmuh chuan ka lainat takzet.

"tho tawh rawh... hei naute lak chhuah a hun ṭep tawh a nia.... " min chhan loh avang chuan ka thinrim lek lek," keimah chauhin min kaltir i phal loh kha... hawh kal tawh ang " ka han ti leh a, mahse chhanna reng reng a awm lo.

" a na viau em ni...ngatinge tikhan i ngawih reng a... " tih pahin khum bula chair ah chuan ka han ṭhu dat a, lainat taka en in ,a kut chu ka han hum vang vang a, a khat tawkin ka fawp zeuh zeuh bawk.
"hetianga i awm reng hian min ti na ania...nangmah chauhin tihian i tuar ngawt ngawt bik dawn em ni? ka awm ve reng hi, hetiang hian awm suh " a tawp a tawp ah ka mittui chu a rawn tla nghal zung zung a, ṭah chhuah hlau takin ka kâ chu ka hup ngawt ngawt a, Asher an ka ṭap ri a hriat ka hlauh avangin thawm dim thei ang berin ka inhnit hlawp hlawp ngam chauh.

Darkar khat dawn ka ṭhut ngawt ngawt hnu chuan min hruai chhuak ta nge nge a, room chhunga luh an phal tawh loh avangin pawnah chuan ka ṭhu reng ringawt.
"Coco.... haw tawh ang, nakin ah kan kal leh dawn nia " Samuel an a tih chuan ka mittui hruk zeuh pah hian," a rawn harh ṭep tawh ang ka lo la nghak dawn keichu " tiin ka lo chhang a,a hrilh a hai hmel takzet.

"tunah chuan luh an phal tawh rih lova... doctor in a rawn harh veleh min rawn hrilh dawn alawm... "
" aih... ka duh lo, tihian ka lo nghak mai ang " diktak chuan hemi room aṭang hian an hruai chhuak ang tih mawlh ka hlau ,an hruai chhuak a nih chuan a thi tihna a ni, chuvang chuan an hruai chhuak tur chu ka lo veng tawp a nih hi.

"min ngaithla teh... "ka bulah chuan a rawn ṭhu hnak a, a kawchhung ip pik lutuk thawk chhuah kawk pah hian,"engtin mah a awm dawn reng reng lo....ka fapa hi dam takin he damdawiin aṭang hian a rawn chhuak leh dawn chu chu ka rin Pathian hian min tih hlawhtlin sak ngei pawh ka ring" chiang fek fawk hian a rawn ti a," naute pawh Rachael te nupa in an la chhuak tawh a, a nu hi a mamawh che a ni chuvang chuan haw tawh ang " a ti zui zat bawk.

"hetiang a i awm hian Asher a lawm dawn miah lo a nia "
ni e, naute hruai chhuak thei dinhmun ah pawh ka awm tak si loh avang hian nu nih ka tling lo in Asher an hria phei se chuan ka chungah a lungawi lo viau ang. Mahse eng nge ka tih theih chuan ka tawrh hi a na takzet asin, mi in kawppui chan chu dar lehlam sah thlak ang vel a ni an loh tih ṭhin ai pawh khan a na in tawrh thiam a harsa takzet.

Min thlem min thlem hnu ah chuan haw turin rilru ka siamfel thei ta nge nge a, amaherawhchu thinthi in ka awm thei chuang lo. Lehlamah naute ngaihsak alo ngai a lehlamah Asher. Ka rilru hi a buai in thih daih ka chak takzet.

____________________________________________

Inchhung ka luh rual rual chuan Hunter ka hmu hmasa ber a, ka thinrim insum zo lo chuan ka pan hnai tawrh tawrh a, a hmai ah ka beng nghal ṭhuai ringawt.
" Coco... engthil nge maw i tih le? " Joel chuan a lo chhan nghal vata.
"hepa ruahmanna vek hi a ni, hepa vang hian Asher a accident ani " tih pahin a jacket ah chuan ka ṭham tawn a ,ha chelh chilh ran chungin "ka ngaidam ngai lovang che...chhuak rawh ,heta ṭang hian chhuak nghal rawh "

" Coco... hawh inchungah chho ang "
" Rachael min lo dang suh... hepa hi misual a nih hi... chhuak rawh, heta ṭang hian chhuak nghal rawh " ka ti nghal tuarh tuarh a,a hmaiah ka beng leh nghal sawk sawk bawk.
"hetiang hian awm suh" Rachael chuan min lo ṭah pui ve bawk a.
" hepa hi rawn luh tir tawh suh u...Asher thah a tum a ni, ka chhuah dawn lo che... engkim hi ka la hai lang vek dawn ,hremna chu i la hmu khawp ang "
Inchung lamah min hruai chho nghal vat a,engthil mah ka ei in ka in lo bawk nen ka chau lutuk chu khumah sirah ka ṭhu tlawk tlawk a, keimah chauh a awm ka duh avangin min chhuahsan vek bawk.

Asher room a awm reng pawh a nuam tawh lo, han hawikual vel ila engkim mai chu a sulhnu vek a nih avangin amah min hriat chhuah thar tir leh a,ka mittui a ti far thar leh ṭhin .
"Coco... a ṭap a, hnute a duh a nih ka ring " Rachael in naute chu ṭap chungin a rawn pawm lut a, heti mai hi ka lo ni bawk nen engkim ah min buaipui vek a ka lawm takzet.

Nuih luih suk pahin ka fanu chu ka lo la nghal vat a, duat taka pawm pahin ka thiam ang tawkin hnute ka lo pe nghal vat bawk.
" Ka rawn let leh vat ang...." tih pahin a chhuak lehnghal mai a. 

" bawihte a na em? " a kut a venflon la invuah chu ka han chhem sak heuh heuh a,a ṭap bang dawn emaw ka tih laiin a aia nasa in a tap tuarh tuarh a, hnute ka pek pawhin awmzia a nei lo.
" bawihte ṭap tawh suh a hrehawm a nia " ka thiam ang tawkin ka han chhaih ve tak na in lungngaih na bak min thlen lo.
" ṭap tawh suh.... khawngaihin ṭap tawh suh " a bang duh bawk si lo, ka ṭah alo chhuak ve tho bawk nen kan pahnih chuan kan han ṭap dun leh rih a,kan hahthlak teh e.

Vanneih thlak lutuk in Grace a rawn lut hlauh "khawi le...shhh... ṭap tawh suh le ,ka naute hi a fel a nia" tih pahin min rawn laksak nghal vata, reilote a awih hnu ah chuan a muhil ve mai bawk a,keilah chu khum sir ah ṭhu in thawm nei ngam si lovin ka lo in hnit hlawp hlawp thung.

" a khua a sik a nih hi... kan lo pawm hrih ange " tih pahin a chhuahpui nghal daih a.

Engvanga hetiang thil hi ka chunga thleng nge a nih?  Engvangin nge engkim hi ka tawrh bik a ngaih?

Keimah leh keimah chu ka in ngaihtuah lung hnur a, ka han ṭap leh rih ṭhin.Engkim mai hi titawp vek ka duh, heng buaina zawng zawng leh harsatna zawng zawng te hi ka ti tawp vek dawn.

Kan in hralhna pawisa chu la chhuak in ka melh vung vung a, Asher leh ka chhungte tan ka in ti pachang hram hram tur a ni tiin ka inhrilh mawlh mawlh bawk.
Inhum ruh ṭeuh chungin ka lei bat na te chu ka call ta nge nge a,mahse a ngaih tawh lo thu leh min rawn tihbuai dawn tawh lo thu min hrilh ta daih mai. Mak ka ti lutuk chu han tih vak ngaihna pawh ka hrelo.

Hetia ka awm renga ka inkhung reng hian awmzia a nei dawn lo a nih tih ka hriat avangin zan lai lai ah chuan thawm dim takin inhnuai ah ka chhuk thla chhat chhat a. Engvangin nge ka lo lungngaih ve em em ni, Asher hi a thi dawn reng reng hleinem vawikhat emaw vawihnih emaw an zai leh anga a dam vat mai dawn alawm.Chuvang chuan buaina awm thei zawng zawng ka lo ching fel vek a nga hlim takin ka lo hmachhawn zawk tur a ni.

Samuel te room alo la inkalh lo avangin ka lut ru zal zal a, khum bula drawer chu hawngin biakin hmun inziahna document chu alo awm nghal, hmanhmawh takin ka ru chhuak a, hmun ual au taka a dah avang chuan mak ka ti hle nghe nghe.
" min ngaidam rawh... " tih sap pahin ka chhuak nghal nal nal a,a ruk thei ang berin Hunter in lam ka pan nghal vat bawk.

Hunter in ka luh dawn chuan ka document ruk chhuah chu nghet takin ka pawm bet tlat a, hreh hle mah ila engkim tih tawp vek ka duh tawh avangin he thil hi ka tih ngei ngei angai.

" wow... ka lo lawm a che " min hmuh chuan min lo nuih nghal vur vur a, a awmdan erawh nidang nen a inang lo takzet lungngai tak hmel a pu.
Ngawi rengin dawhkan ah chuan document cho ka theh thla pawp a, rang takin a chhiar a, a nui nghal var var bawk.
"hahh.... ka tih reng kha, nangmah ngeiin min la rawn pe ang ka tih kha... "
"ni e.. i chak a chuan ka tlawm, i lawm tawh em?  min tih nat i duh a nih chuan ka lawmpui a che, mahse hei bak hi chu min tih nat belh tawh suh...khawngaihin Asher hi min laksak suh "

" hetiang mi hi i ni lo ka ti tawh kha.. "
"min rawn tibuai tawh suh, i hmel hmuh leh hi ka duh tawh lo.... thil dang min laksak belh dawn pawh nila engmah neih ka nei tawh lo ....engmah ka neih tawh lo " ka chapo na te dahṭha in ka ngen ta ringawt a, hetianga ka tih loh hi chuan Asher hi min laksak leh mai ang tih ka hlau a ni.

" kan la zo reng reng lo... kan pahnih hian chinfel tur kan la ngah lutuk... "
" lo ngai reng mah rawh thudik hi i thup rei dawn reng reng lo.... hremna chu i la hmu khawp ang " tih pahin ka kal nghal hlawk hlawk a.
"Asher hi a chak i duh a nih chuan i lawyer hi thlak rawh... " a tih chuan ka ding chawt a, hawi let lovin ka kal chhuak lehnghal nal nal bawk.

__________________________________________

Naute a tah mai bakah ka muthilh thei loh avangin darkar khat vel lek ka mu a, mahse Asher a lo tum lawk leh ruahman lawk a nih angin Lily vuina ah chuan Grace leh Samuel te nen kan va inlan ta tho ,naute erawh Rachael in alo awm thung.

Chau hle mah ila ka mutthil theih miau loh avangin in a in dawm kun ngawih ngawih ai chuan hetia chhuah vah hi ka thlang zawk.

Vawin ah a vawi hnih nan Asher an zai leh dawn avangin damdawiin ah ka kal tlang nghal a, midang erawh an buai em avangin nakin ah an rawn kal ve thung ang.

Asher hmu hmasa lovin Freddie chu ka kân hmasa ta zawk a, thil hrilh tur ka ngah em avangin inbun ruah phawt ka duh.

Freddie chu tui takin alo muhil sak sak a, ani pawh hi a rawn harh hnu ah ala ṭawng chhuak leh miah lo .
" naute ka nei tawh a.... hmu la chuan hmelṭha i ti ve ngawt ang... " nuih luih suk pahin ka han ti sap a, engmah hre dawn lo mahse Freddie bula ka awm tawh hi chuan ka thawveng huai huai mai.
"mahse Asher erawh... " ka han ngawi vang vang a,"a hma ang khan awm leh ang u " ka ti zui sap a.

"ih... i hria em Lily a tawp tak tak nan ka va thlah a, mahse ka lungngaihna te chuan min la kalsan reng reng lo... dam vat vat rawh thil tamtak a thleng nasa in hrilh tur che ka ngah teh mai a nia... " ka han in sut hraih hraih a ,"in vai mai hian keimah chauh a min tawrh tir bik in tum em ni...engthil nge ka tih tak hi Hunter lah a thil duh ber ka pe a,mahse ka chhungte ka hmuh ngam loh phah a ,an hriat chhuah hlau reng reng in ka khawsa leh si ...aw...ka nun hi a hahthlak takzet , keimah hi ka inti hlum ve mai dawn em ni "

Freddie an ka kut a rawn hum takah chuan rang takin ka hawichhuak nghal vat a, thei leh thei lova a rawn meng siar siar lai ka hmuh chuan ka lawm ngei mai.
"Freddie... ka ṭawng i hre thei em? " a rawn khap fak fak takah chuan awmngaihna pawh ka hrelo.
"Lalpa leh.... dam vat vat rawh aw... " a kut chu a rawn ti che zeuh zeuh a, sawi duh nei ang deuh a a awm takah chuan hnai taka ka han ngai thla a,"Lily a ni lo " tih te mai hi min hrilh a, mak ka tih em avang chuan ka meng phawk nghal kawk bawk.

" eng nge awmzia...?" a thawk a rawn buai nghal avangin khawl pakhat chu a rawn ri nghal ṭut ṭut a, nurse pahnih an rawn lut nghal vat bawk.
" ka pi min chhuahsan thei angem? " pakhat in a rawn tih takah chuan rang takin, "a ṭha tiraw... engthil nge thleng? " ka lo ti nghal zat a.
" aw....amah chauh a a awm hi a mamawh a ni " a tih takah chuan ka bu nghat a, room aṭangin ka chhuak nghal bawk.