My Drug is You-58 by Remruati Bawitlung(Haylor)

CHAPTER-58

motto- Dream Bigger

Ka awm hahdam dawn chauh a ka phone a rawn ri lehnghal mahse damdawiin lamah emergency a awm thut ṭhin avangin engtil pawh nise ka phone hi ka en ngei ngei angai.

"tu phiang nge maw ni leh le? " vin hluk pahin ka han en a, Joel a lo nih reng avangin dar zat ka en nghal vat bawk.

"eng nge...? " ṭawng peih loh hmel zet hian ka han ti sup a,tun ang zan reiah tawh hi chuan min rawn call tur ani lo asin le.
"i address min rawn thawn rawh"
"enga tan...? "
"hey... rawn thawn mai mai teh " tih pahin phone chu a dah nghal hmak.

Hepa hian eng nge maw a hriat le?naktuk ah pawh min zawt thei reng sia.
Thawk halh pahin peih lo zet chung chuan ka thawn ta nge nge a, û ten an tih tawh hi chuan ka hnial thei ṭhin lo chu anih hi.

Joel an min rawn call aṭanga minute 10 pawh ala ral em hma chuan doorbell a rawn ri leh râng râng tawh!!
"Joel tehhrep chu... " ka thinrim lek lek,a bik takin zanin hi chu ka chau zual asin mawle.

Mutthilh der han tum teh mah ila chawl lova doorbell a rik reng avang chuan ka tho ta nge nge a, Joel hi chu a ngeiawm thiam mai bakah ka la muhil lo tih a hriat ve reng avangin rawn lut lo chuan a haw dawn lo tih ka hrechiang hle.

Kawngka ka hawn rual rual chuan beer rawn khai kan va va pah hian, "surprise !!" a rawn ti lehnghal a, nuih pawh a za tawh lo.
"address kha rawn thawn lo tawp tur che ka ni asin... " tih pahin inchhungah ka lut nghala, min rawn zui lut ve nghal vat bawk.

"wow... couch chiah i châng tawh elaw.. " tih pahin couch ah chuan a ṭhu a, tv chu ring zetin a en zui nghal bawk.
"umm... a dang chu in thar ah an sawn phei vek tawh... "
"i in dang ve ringawt a, i thawmhnaw te hi i su peih dawn em ni? "
"oh!  c'mon..."
" ka hria ka hria.... nang hi chu ka nu suk takngial pawh i duh lo ania i mak ve ngawt mai " ni e... ka thawmhnaw hi chu midang in an khawih emaw an suk emaw ka duh loh avangin keiman ka suk loh chuan ka dry clean tir mai ṭhin .

"Eng nge i hriat a, i rawn lan thut? " beer can hawn pah in a bulah chuan ka ṭhu ve nghal a, mutchhuak tawh hle mah ila ka ṭhu ve ran tho.
"nangmah chauh a kalsan che ka duh lo alawm... a bik takin zanin angah phei hi chuan... " a thutak em avang chuan mak ka ti zawk hial, Joel hi chuan min ngaihsak tawp thei dawn lo chu a nih hi, buaina emaw hun harsa emaw ka tawh hi chuan a rawn lang vat zel.

" ka ṭha lawm... "
" ka hria chuan ka lawmpui a che... fanu hmelṭha tak ani, a hming i phuah tawh em? "
" ka lo la ngaihtuah chhin ngai miah lo... "
"i va han hahthlak ṭhin tak... keichu ka fanu tan hming tamtak ka phuah tawh asin... " a tih chuan min khawih takzet, Joel hian fa ka neih avang hian min lawmpui takzet ani tih ka hria mahse a rilru pawh a nat phah viau ang le.

"Rachael-i a ṭha maw? " ka lo ti nghal vata, nuih suk pahin a bu nghat bawk.
"i vannei takzet...engpawh chu nise pa i ni tawh a,rilru nghet put a hun tawh a nia....taka Coco chu i propose ta em?"
"aih... "
"tinge? i tum leh ta lo em ni ?"
" ka hrelo... ughh....khum pahnih ka nei lo ania ,i riah dawn chuan couch ah hian i mut angai ang " fiamthu pahin thil dang daih ka sawipui zaih a, diktak chuan Coco propose hi ala hun lo pawh ani mahna chuvang chuan hetiang thil hi chu sawi ka duh hrih lo.

Chutia beer in paha kan ti ti mai mai lai chuan ka phone a rawn ri leh tlang tlang tawh.
"i phone a rik kha la ta che... "
"engmah ani leh chuang lo ang"
"khawi.... zan rei ah hi chuan emergency ani tlangpui tawh ṭhin ania " tih pahin ka phone chu min pickup sak ta ringawt a,"hello!! " a tih rual rual a a ngawih tak vung vung avang chuan ka beng ka lo chi nghal hra a.

"kan rawn tleng nghal... " phone dah pah chuan a tho thut a, "tho vat rawh Lily te inah kan kal angai " a tih tak chúk chúk avang chuan ka meng phawk nghal kawk ringawt!!
"engthil nge thleng? "
"kal pahin kan sawi dawn nia... " tih pahin ka jacket chu a rawn thehphei nghal vata, hmanhmawh zeta a tlan chhuah tak daih avang chuan ka umzui ve nghal vat bawk.

Lily te in lam pana kan tlan lai chuan Joel chuan,"Lily bathroom ah a in kalh khum tlat a, tunlai hian mahni in thah a tum fo avangin ka nutei(Lily nu) mangang in a rawn ko ta ringawt che anih hi... " a hma pawh a min rawn koh tawh avang khan ka la serious duh tawh lem lo mahse Joel hi a hlauthawng em a, va kal a va endik ve hrim hrim hi a ṭha a ka hriat avangin ka dang lem lo.
"vawin thil thleng vang kha emawni le? i lo hmu ve em Lily awmdan kha a mak takzet.... "
"va thleng phawt ila engkim a hriat vek mai ang.... "

Lily te in ah chuan kan tlan lut a rang takin a nu chuan, "Bathroom ah hian a in kalh khum leh tlat tawh a, thawm engmah hriat tur pawh a awm zui tawh lo " hlauthawng tih hriat tak hian alo thaw hlawp hlawp a, bathroom kawngkhar chu hawng tum in tihchhiat alo tum ve vang pawh a ni mahna a khem deuh nuaih mai.

"nute tuboh a awm em? anih loh pawhin thir tiang "
"aw... aw awm e " tih pahin thirtiang chu a rawn la nghal vata, Joel an vawi tum vel a han vuak chuan awlsam te in a in hawng mai bawk.

Bathroom kan hawng chiah chu Liky awmdan ka hmuh rual rual chuan ka tlan lut nghal vata, bathtub ah tui alo herh liam pur pur a chutah chuan alo in hnim pil tlat avang chuan ka pawt chhuak nghal lawp bawk.

"Lily... harh teh " a mar a awm tawh loh avang chuan CPR(Cardiopulmonary resuscitation) ka han ti nghal vat a,midang erawh a hlauthawng bawk nen ka che vel chu mangang tih hriat tak hian min en reng ringawt.
"thaw chhuak ta che... c'mon... " ka beidawng duh bik lo, ka theih ang ang chuan ka han ti zel a, kei takngial pawh ka hlauthawng tawh kher mai.

"Asher... a rawn thaw " Joel an a rawn tih chuan a mar chu ka han en dik nghal vata, a rawn normal telh telh avangin bathtub ngheng chung chuan ka ṭhu nghal tawp ringawt.

Lily chu a nu leh a unau ten an rawn buaipui nghal vat a,damdawiin panpui ngai khawpa a awm lo chu ka lawmna tizual tu ani.
"i ti ṭha lutuk... " Joel nen chuan thawk kan han la kawk kawk a, kan hah bawk aniang kan ṭhu hle hle mai.

Lily chu ngawi rengin khap fak fak chungin a mu ngawi reng a, a mittui a luang ngiai ngiai bawk.

A kut velah thuk vak lova in zai hliamna a awm nual avangin a pem ho chu ka tuam sak mawlh mawlh a, engvanga hetiang thil hi ti nge anih ka hrelo takzet.

Zu rim a nam ham ham mai bakah damdawi ruih a nei tih ka hriat avangin a ruk tak chuan ka thinrim takzet,hetiang thil alo tih ṭhin vang anih dawn hi in tihnat leh inthah pawh a hlauh loh nachhan.

"i zawh tawh chuan kan kal mai dawn mi? " Joel chuan rawn luh pah chuan a han ti sap a,ka lo bu nghat bawk.
"ka zo a ni mai... " tih pahin firstkit box chu ka kalh mawlh mawlh a,"mangṭha le " tih pahin ka tho nghal vat bawk.

" Asher....kha thil kha ka tih a ni lo... " a rawn ṭawngchhuah hlawl avang chuan Joel nen kan in en ringawt a, tih vak ngaihna pawh ka hrelo.
"dawt in ka puh che anih kha... mahse ka duh vang ani lo... "
"eng nge awmzia ?" a thusawi chuan ka beng a verh nghal zâr mai.

"dawt a ka puh loh che chuan ka medical licence hi tihtawp ah min vau a... hetiang em em a thui erawh kan kal hi ka ring pha ngai lo " a mittui a tla nghal zung zung a, a thil sawi awmzia hi ka hrethiam lo takzet.
"tu in maw vau che? " Joel chuan alo ti ve bawk a.
"ka hrelo.... message bakin kan inbe ngai lo,hmanni lawk a thi ta ka pu khan damdawi lei phal loh a ruk in min lei tir a kha kha vau nan min hmang ani,engtin nge an lo hriat pawh ka hrelo ...."

"a tirah kha chuan Coco i thlan daih avanga ka huat em che avangin khatiang thil tih kha pawi tihna ka nei lo... mahse ka chhungten an hriat khan ka rin aiin an lo la serious ta sia, court thleng hi chu kan thleng ka ring pha ngai lo.... Asher ka tihpalh takzet, min ngaidam rawh "
"aw le ka hrethiam e... mu phawt rawh "
" min ngaidam rawh aw... "
"ka ngaidam che... mu tawh rawh " a ruih em avangin a maimichhing nghal siai siai a,rei lo te ah a muhil zui mai bawk.

"i khalh haw thei.... " tih pahin Joel chuan car chahbi chu a rawn vawm phei a, car a luh pah chuan, "tunge niang le Lily vau tu chu?  hei vang hi nimaw a hreawm ti lutuk hetiang anga a awm nachhan... " a han ti a.
"a thusawi kha i awih em ni? " nuih suk pahin car chu ka han ti nung hlat hlat a.
"hetiang hian awm suh... A awmdan kha i hmu ve lo em ni "
"hmu e... a bum theih in awm suh,zu a in a damdawi a rui bawk chuan a thusawi kha ila awih cheu em? " ka tih chuan a ngawi ta daih a.

(Fakna hmeh in minute1 tal enkual tur aw ...)