My Drug is You-49 by Remruati bawitlung(Haylor)

CHAPTER-49

Motto- Dream Bigger

Ka buai bawk aniang phone ka en hman loh mai bakah vawin ni hi ka nu leh pate anniversary tih ka lo theihnghilh leh hman peka,Joel an min rawn hrilh leh lo phei se chu ka theihnghilh let der ang.

Ka tlai tawh mai bakah Coco in min lo la nghah thu Joel an min hrilh tel bawk avangin inthlak lovin in lam panin ka tlan tlang ta zawk a,ka duty zawh khan awm khaw muang mai mai lovin lo haw tlang ta hle hle i lang chuan ka hrechhuak hma nimai tur.

Inchhung ka luh rual rual in room lamah ka tlan chho nghal vata mahse Coco hmel reng hmuh tur a awm lo.
" Coco.... "room dangah a awm ringin ka ko ta ringawt a, a reh dûk lehnghal. Rang takin guest room leh hmun dang dang chu ka zawng kual nghal vat bawk a, min kalsan tawh anih te ka ring hial.

Tumah an awm tak lovah chuan Coco call tumin ka phone chu ka la chhuak nghal vata a miscall alo tam ngang mai.
" hreptak chuan... " ka phone silent mode ah kan lo dah chu le!! hna thawh laiin phone silent a dah vek tur an tih avangin ka dah lo thei si lo amaherawhchu ka phone check vat nachang ka hrelo erawh ka thiam lo hulhual.

Coco ka call chuan rang takin alo la nghal vata, ka thaw nghal huai mai.
" khawiah nge i awm? "
"ka pa a tlu sual a tunah in lam panin ka kal mek... " alo ti nghal zung zung a,keipawh rang takin car lam panin ka tlan chhuak nghal hlawk hlawk bawk.
"keipawh ka rawn kal nghal" tih leh chak zeta tlan chhuah ka rual nghal.
" nilo.... rawn kal duh suh, i chhungten an lo nghak reng tawh ang che"
" minute 10 chhungin ka rawn thleng ang.... " min hnial leh hma in phone ka dah nghal hmak, engpawh sawi se min dang thei chuang lo ang engtik lai pawhin atan ka awm reng anga, ka pui zel bawk ang.

Coco te in ka thlen rual rual in inchung lamah ka tlan chho nghal vat, a pa room ka luh chuan fel takin alo mu fel thlap tawh a Coco erawh ka hmu lo thung.
" khawiah nge Coco...? " nula pakhat lo awm ve zawh pah in a Pa BP leh pang vel chu ka enfiah nghal zung zung a,a pang tlemin a lum deuh tih mai loh chu a normal vek.

" Asher!! " Ka hawi let rang kher mai, Coco chuan chawhtawlh in tui a rawn chawi lut a,pheikhawk sang a bun mai bakah a thawmhnaw hak aṭang chuan a insiam vek tawh hnu ah an rawn call tih a chiang reng.
"a insawh na em? " tih pahin chawhtawlh chu ka lo laksak nghal vata, a lu a lo thing nghal vat bawk.
"kal tawh rawh...hei i tlai dawn ania "
" anih nang? "
"umm...a khua a sik bawk si a, zanin chu ka riahpui ang "

"i kal loh chuan keipawh ka kal dawn lo..."
" nilo... "
" kan pahnih in kan riahpui mai dawn nia... "
" Asher nilo... " tih pahin ka hma ah tak a rawn ding a,"i kal ngei ngei angai...keite chu a lehpek ah pawh ka kal thei reng alawm "
" i tello chuan ka kal duh bik hleinem... "
" ka kal theih loh pawhin nang tal i kal loh te chuan... "
" mahse... "
" min ngaithla teh...va kal phawt la hetah i rawn let leh zawk dawn nia... "

"buaina i tawh chuan min rawn hrilh vat ang tih min tiam rawh... "
" aw le.... chuan... " khum mawng lama gift box lian vak lo chu min rawn pe a,"ka lawmpui lutuk tih min lo hrilh sak dawn nia.... " a han tih sap a,keiin hriat pawh ka lo hriat tawh loh laiin ani chu alo in buatsaih vek ania Joel an a chawimawi thiam che a tih kha ka hrechhuak zawk mai.

Min nawr luih tlat avang chuan ka kal ta nge nge a, mahse dinner kan ei zawh veleh ka let leh vat dawn tho avangin kal pawh pawi ka tih loh phah.

Hotel a ka luh rual rual chuan reservation kan tih lawk vek tawh avangin ka hming ka sawi chuan waitress in ka chhungte awmna lamah min hruai nghal vata, tun ṭum chu kan chhungkua chauh a ei tur kan nih avangin ka tlai chhan an hre vek tawh bawka chhuanlam siam hran angai lem lo.

" ka tlai avangin pawi ka ti lutuk... " tih pahin ka ṭhu nghal sawk sawk a,ka pa chuan min rawn melh khai pah hian, " Khawiah nge Coco? " a lo ti nghal vata.
"a rawn kal thei dawn lo... "
"anih tinge i rawn kalsan...? "
"duhtak..." ka nu chuan alo khap nghal vata, mahse ka pa ngaihdan chuan Coco in buaina a tawh chuan ka awmpui mai tur ani tih hi anih avangin ka dem hran lo .

"Ughh... engpawh chu nise ka lawmpui cheu... " tih pahin ka indap ruk ruk a," ka gift car ah ka theihnghilh daih... " ka tih phei chuan ka pa chu a rum nghut ringawt.
"a pawilo... i rawn thleng tawh bawka, kan ei ṭan mai dawn mi? " ka nu chuan min lo chhan nghal zung zung a, ka nu hi awmlo se chuan ka pa hian min melh tlu tawp tawh ang.

"Asher... i kawr nghawng kha siam ṭha rawh... " Rachael chuan min rawn hrilh ru sa sa a, za lo zeta nuih suk pahin ka han insiam ṭha nghal zung zung a,ka hmanhmawh em avangin engmah pawh ka ngaihtuah hman tawh lo a tin ni.

Kan ṭhut ngawi ṭhap avang chuan Rachael nghawk zeuh pah hian,"tinge kan ṭan nghal mai loh, tunge kan nghah?"ka han ti sap a.
" Lily... " ha seh chilh ran a a rawn tih takah chuan ka meng phawk nghal kawk ringawt.
"maw!! "
" a rawn kal ve alawm... tunah washroom ah a awm"
" tunge sawm? "
" ka hrelo... "

" pawi ka ti lutuk... ka nu hi chu in hriat kha... " tih pahin Lily chu ka bulah a rawn ṭhu ta mai!! nikum a ka nu leh pa te anniversary a a hak tur kawr ka pek pawh kha a ha ani tih ka hmuh hmaih lo chiang kher mai.

Tuman kan sawm bawk si lova ka hmu thut chu mak ka ti takzet.
"umm.... ka pa ka nu ka lawmpui lutuk cheu, rei tak in dam theih nan duhsakna ka hlan a che u... "
" kan lawm e... " ka nu chuan alo ti nghal vata, midang erawh kan ṭhu ngawi ṭhap thung.

" Eng nge hetah i rawn tih ...." a zah leh zah lo tur pawh ka ngaihtuah tawh lo, ka rilru a awm chu ka sawi chhuak nghal phawng ringawt.
" ughh... Asher kum dangah pawh min sawm ziah kha... "
" Lily....hriatthiam tum teh.. "
" pawi ka ti lutuk mahse i bialnu ka ni a,ka rawn kal ve chu a pawi viau em ni... ?"
"in bia ang "ka chhungte ka zah mai bakah lungni vak lo mahse engtik ah mah an kal tir dawn lo ani tih ka hriat avangin a ban rek ah ka vuan lawk a, kal chhuahpui ka tum lai takin ka pa chuan, " ṭhu rawh u... " a rawn ti ta hmuk mai,kal chhuahpui na chi ani tawh lo.

" ka pa... "
"kan kim tawh bawka, ei tawh ang u..." a tih takah chuan ka vawnna chu ka thlah ta ringawt a, Lily chuan min rawn nuih suk pah hian,"zanin pawh kum dang ang bawkin video ka siam leh a....haw veleh kan en ho leh dawn nia " ala ti ham ham zui.