My Drug is You-47 by Remruati Bawitlung (Haylor)

CHAPTER-47

Motto- Dream Bigger 

In lam panin ka let lehnghal nal nal a, Coco ngaihtuah lo angin awm tum teh mah ila ka rilru a nuam thei chuang lo.Call duh viau mah ila ka call anih chuan amah ka rin tawk loh vang ani tih ka hriat ve kar avangin phone chu na takin ka hum ran a, a chang leh hma lam en ngut ngut pahin thil dang daih ka lo ngaihtuah thul.

Zan a rei deuh tawh avangin thawm dim thei ang ber in car chu ka hung ṭha a, garage aṭanga inchung luhna an kalh tawh avangin in hnung lam aṭangin ka hel leh ngei angai dawn anih hi. Chutia ngawi renga ka kal hlawk hlawk lai chuan car hi chak takin a rawn tlan lut hlawl a, headlight in min chhun sût avangin ka mit chu ka kutin ka lo hliah nghal vat bawk.

Car din rual ruala Coco aw ri ka hriat chuan rang takin ka va pan hnai nghal vata, min rawn hmuh rual rual chuan nghet takin min kuah nghal vawng vawng mai.
" i ṭha maw?  na i nei em? " thawk hlawp hlawp pahin ka ṭha nge ṭha lo tih chu a check nghal zung zung a,a awmdan chu mak tih hmel takin ka lo en reng thung.

"engtin mah ka awm lo.... khawiah nge i kal? "

"damdawiin ah ka rawn kal a... mahse i haw tawh thu min rawn hrilh sia rang takin ka rawn let lehnghal alawm... "

"mahse engvangin nge i rawn kal? " chik zet hian ka han zawt zela.

"thlalak ka dawnga.... ughh " a ipte chu a zen ruk ruk a, thil hrechhuak niawm tak hian ,"ka room ah ka phone ka theihnghilh daih alawm... engpawh chu nise i ṭha a ka lawm takzet " a ti nghal zung zung a,mahse thil thlen dan hi ka la hrethiam lo.

" Lily hmu turin i kal lo em ni? "
" maw!! engvangin nge ka kal ringawt ang, hmuh nachhan tur ka nei hleinem... " thil thlen dan hi ka hriat dan nen khan a inang ta hauh lo mai,Lily khan chiang takin thlalak nen min hmuh vek tawh Coco hi Lily hmu turin a kal lo anih chuan hemi thawmhnaw ngei ha hian damdawiin ah chauh nilo hmun dangah a kal tihna ani,a thusawi hi ka rin loh vang nilo in kha thlalak bak bak a finfiahna ṭha kha a awm lo.

"engmah a rawn thawn lo che maw.... thlalak tih vel pawh"ka han ti leh ngat a mahse thawnlo a tih ve tlat avangin" ka hrethiam e... " ka ti sap ringawt.

Engpawh chu nise bul kan ṭan ve dawn chiah ani a,atan pawh engkim min hrilh nghal vek hi ala harsa ang tih hi ka hriatthiampui. Kan mizia a inan loh mai bakah inhriatthiam tawn nan pawh hun a duh rei deuh maithei chuvang chuan thil engkim min hrilh a min rin ngam hun tur hi dawh thei takin ka nghak phawt mai tur ani.

Ka hmuh chakna a rei tawh mai bakah a bula awm ka thlahlel tawh bawka,amah ka hmuh hian ka hahdam huai in ka hria.
"ka lut dawn mi niang... " tih pahin a hmuiah chuan ka han fawp vang vang a, min kuah pahin alo bu nghat bawk,diktaka sawi chuan a hmel hmu lova ka muhil bo daih mai tur te hi ka ui lawk.

Khum pakhat ah kan la mutdun theih loh avangin mutthilh hmasak tir tumin puan chu fel takin ka sin tir a, a mutna bulah ngawi rengin a maimichhing lai chuan ka en vawng vawng a,ka rilru in amah ka neih avang hian Pathian hnenah lawmthu ka sawi ru mawlh mawlh bawk.

A bulah awm reng mah ila naktuk maia ka duty bo leh daih mai tur te chu ka huphurh lawka, a kut te reuh te no thep te hi engtik lai pawha chelh reng ka chak takzet. A chang leh a hma a a rilru ka lo tihnat sak avang khan keimah leh keimah ka inhua a, a hma daih tawh a ka lo tawng lo te kha ka thinrim leh hnuhnawh.

"i chau lo em ni?  zuk mu tawh la " ka thlakhlelh ang hian min thlahlel ve lo pawh ani mahna.
"muhil phawt rawh... "
" khatianga min en reng te chuan ka muhil thei hleinem..."
" ughh.... " ka tho vut a, ka inthiam lo leh hnuhnawh mahse a bula awm reng ka chak vang zawk ani.
" khawiah nge i kal dawn? "
"ka mu dawn"ka lo ti hmuk a, tihbuai ka duh loh vang zawk ani.

Rawn ṭhut chhuah pah hian, "min mangṭha lo in maw?!! hetah hian lo ṭhu rawh " a tih takah chuan sawm nawn ka ngailo chiang kher mai.
Rang takin a bulah ka va inrawlh ve nghal thak a, ka ban kham pahin a mu hle hle bawk.

En reng ka duh bik loh avangin a sam chul pahin a khat tawk hian ka zuk melh leh zeuh ṭhin a lungawi tak hi ka ni ringawt, min dawi â zo tawh pawh ani mahna hetiang em em a a zûn a ka uai tak mai.

A mit khap fak fak lai ka zuk hmuh chuan,"muhil tawh rawh a tlai tawh... " ka han ti leh ringawt a,nghet taka min rawn kuah paha a rawn hawi chhoh chuan ka tum loh deuh in,"damdawiin ah nilo hmun dangah i kal em? " ka ti chhuak hlawl ringawt, ni e... ka rilru ah a awm miau sia lawm,khapa kha engang mi nge anih ka hrechak takzet mahse Coco hian ṭhian leh hmelhriat tamtak a nei ngei anga lo thik ngawt thei pawh ka ni lo.

urghhh!!! Kan nunhlui emaw kan chanchin pakhatmah in hriat tawn sak hauh si lo hian ka awm dun chu ani sia thil mak pakhat ani ve hrim hrim.
___________________________________________

Nizanah kan mu tlai bawka Coco chu tui takin ala muhil sak sak a, kei erawh hna ka neih avangin ka thawh ngei ngei angai thung.

Nuih vur vur pahin ka ban kham chunga tui taka a muhil lai chu ka en renga, kan pahnih hian reilote ah fa kan nei dawn ani tih hi rin harsa ka la ti takzet, mahse inzawmna thuk tak kan neih tawh avang erawhin ka lawm hle thung.

Ti harh lo thei ang berin ka ban chu ka han ti tawlh zal zal a, mutdun kan tum loh tehlul nen khum khatah kan tawp leh nge nge zel.

Ka thawmhnaw ṭhenkhat ka lo la dah hlauh avangin ka inbual zawh chuan ka apartment a let leh kher ngai tawh lovin ka insiam nghal mawlh mawlh a,Coco chala fawh zeuh pahin inhnuai lamah ka chhukthla nghal vat bawk.

Ka tho hma viau emaw ka tih pawhin ka pa chu pawn lamah lawn mower(hnim cut na khawl)  nen alo ri leh vung vung tawh.
Kitchen a ka luh chuan Rachael leh Joel te chuan breakfast an lo siam mawlh mawlh a, min hmuh chuan mak an ti hle nghe nghe.

"eheuu.... hetah i riak elaw?" Rachael chuan nuih put put pah hian min lo chhaih nghal vata,fiamthu mah nise ka lai duh bik ṭhak lo.
"in i nei a... hetah i rawn riak leh tho sia in kha luah lo tawp tur che lawm" Joel ṭawngkam na tak tak hi chu ngaiah ka nei tawh, mahse ka bulah bak hetiang hian a ṭawng ngai lo thung.

" Joe....hmangaihna ah a tlu lut anih hi han en ta che a hlim em hi" Rachael chuan min lo chhan nghal vata Joel bawk chuan "inneih lam te i ngaihtuah tawh em? " a rawn tih thut avangin chhan ngaihna pawh ka hrelo.
" hahh.... an inngaizawng ve ṭan chiah a an inneih nghal mai ten "

" Asher ...Lawyer kha a remchan dawn loh avangin Lawyer dang kan ruai mai angai dawn nia.... "
"ka hrethiam e...keipawhin kan lo zawng ange"
"karleh lehpek lawk hi Trail ani tawh a tun thlengin evidence engmah kan nei bawk si lo... Lawyer ṭha tak kan hmuh loh phei chuan...."
" Guys...zingkar aṭang chuan khatiang thil kha sawi lo teh u... C'mon... Pathian a awm alawm kan chak em em ang" Rachael in a tih chuan ka lo bu nghat a,
"Lily hian engthil nge maw a hriat tehhrep ni..." Joel an a tih chuan ka ngawi reng ringawt.

Lily hi a tuartu ani a mawhpuh vak turah pawh ka ngai lo, kei hi ani mawhpuh tur zawk chu mahse thil chiang engmah a la awm loh avang leh mite pawhin min dem thei ringawt bik lo, engkim a chian hun tur chu court in thutlukna a siam hunah chauh ani.

★HOSPITAL ★

Ka white coat siam ṭhat mawlh mawlh paha medicine department lam ka pan hlawk hlawk lai chuan senior doctor ka ngaihsan leh zah em em Dr. Richard nen chuan kan in tawk hlawl a,ka wish zo ka kalpel tur chu min koh let avangin ka ding chawt a.
"eng nge ni ta? "
" Asher... thuthang kha ka lo hria a... " a tih rual rual chuan ka kun nghal lap a, ni e...Stuff ho chuan an hre deuh vek tawh ang tih chu a chiang reng.
"i hnathawk a tihbuai ka duhlo....engthil pawh thleng se doctor ṭha tak i ni a ,i thil tih lai hi ṭha taka i thawh chhunzawm zel ka beisei... ka lo thlir reng dawn che nia " ka dara ben thak thak pah chuan min kalsan zui nghala.

Mi tlemte ka chunga rinna la nghat ngam a awm avangin ka lawm takzet, Dr. Richard a thusawi kha hote angin lang mahse ka tan chuan thu ngaihnawm leh hma lam pan zel tura fuihna ṭha tak ani thung.

Dr.Emy thlak tur ka nih avangin register leh thil pawimawh ho chu ka enfel nghal mawlh mawlh a,midang ang tho a min biak ṭhat duhloh ka rin avangin biak hmasak ka tum bik lem lo.

" Dr. Asher.... i ṭha maw? "
" aw... " ka khi suk ringawt, mahse min biak thut avangin ka mak tihna a tam zawk. Vawin zet zawng ka hna thawh lai pawh a phurawm ta deuh alawm bakah ka rin ai daihin Senior doctor ho hi an zau in hna leh mimal nun dah hran dan an thiam daih mai.

"ṭha deuh in aw.... " tih pahin min kalsan nghala.

Chhun chawlh lawk dawn ah Lily ṭhian ṭha tak Rosie chu rawn lut in damlo awm lai reng chuan ring zet hian,"Coco mi khah?a tan chuan ilo rinawm hi le...hmeichhe pakhat chauh duhkhawp lova midang nun tih chhiatsak ṭhin mi te hi ka huat zawng tak an ni "min rawn tih chhan zet hian a rawn ti lâng lâng a,a thusawi hrelo ang maiin damlo chu ka endik chhunzawm mawlh mawlh reng tho.

"hna thawk tura rawn kal te hi a zak miah lo emawni le? an daih rei pawh ka ning nek love" ka hriat tur kher in a ṭhiante hrilh pah chuan an ṭhian ho chu an chhuak dial a, ka thawveng nghal huai in ka hria.

Damlo rawn in entir a kal liam chiah tih in Jerry chuan,"dude...senior doctor an awmloh vang anih kha a bengchheng em em nachhan" a rawn tih chuan ka nuih a za ngei mai. Jerry leh Freddie te hi chuan engthil pawh ka chungah thleng se min tih thawven dan hi an hre zel mai.

"enteh... Lily kalsan in khanu kha kawp i tum tak tak em ni? "
" Coco.... " hming a nei renga khanu kha tih ṭawngkam hian min khei zâk mai.
" nia... Coco, nanghi ni hi Rosie sawi ang khan in daih rei dawn mi le? hei tunah pawh i nupui tura kan ngaih chu i  ṭhen fel ka sawi awmzia chu court thlengin in kal a ngai ta mai sia"
"min lo hrethiam rawh.... "a thusawi ka ngaihthlak peih loh avangin ka tho daih a
"khawiah nge i kal dawn? "
" Coco ka be dawn mawle... " nuih suk pahin ka thil chak tawh em em Coco biak tumin ka chhuak nghal nal nal bawk.

(Fakna click in minute1 tal en kual tur aw xoxo)