My Drug is You-42 by Remruati Bawitlung(Haylor)

CHAPTER-42

motto- Dream Bigger 

★Asher's POV★

Coco ka hmuh chak mai bakah riah ka tum tehlul nen ka pa in haw tura min tih tak tlat avang chuan ka haw ta nge nge a,mahse ka inchhir nghal der a chhanchu tunah hian Coco hmuh hi ka chak ngawih ngawih.

Freddie hnen aṭangin message ka dawn hlawl avang chuan ka hawng nghal vata, hepa nen hian kan inbiak lohna chin pawh ka hre tawh lo. Coco thlalak min rawn thawn chu ka hmuh rual rual chuan ka khi nghal suk a.
" avan ṭul lo tak " tih sup pahin ka in thar chu ka han hawng rak a,a thim vek avangin light ka on nghal vat bawk.

Inchhung chu luahthar tih takah ka bungrua ho chu box ah ala awm vek a, ka chau bawk nen tihfel pawh tum lemlo in bedroom ah ka lut tlang nghal.
" i va rei em em ve " bedroom light ka on rual rual chuan Lily chu khumah alo ṭhu reng tawh, ka hmuh rual rual chuan ka ding nghal chawt bawk.
" eng nge hetah i rawn tih? " ni e, he in hi Lily min zawn hmuh sak chu ani ngei alawm mahse ka in ani tawh a hetiang hian alo lut ru ang tih rin ngaihna ka hrelo.

"happy thanksgiving.... " ka tihngaihna hre lo chuan thawk chhuah hak pahin room aṭang chuan ka chhuak nghal nal nal a, fridge a water bottle chu la in tui chu ka lem nghal khawlh khawlh bawk.
"kan lawm dawn mi niang... umm... chau tho mahla" a tih rual rual chuan bottle chu ka nghat chawrh a, "Lily a neitu phalna la hmasa lova mi ina luh hi dan kalh ani tih i hria em? "
"mi in ani hleinem...ka bialpa in ania phalna ka lak kher angai hleinem "
" hriatthiam tum teh...kan inṭhen tawh "

"keichuan ka ṭhen ve lo che....a chhanchu ka hmangaih vang che ani "mittui tling pam chungin za lo zet hian min rawn nuih suk a, diktaka sawi chuan hetiang anga a awm hian na ka ti lo ani bik lo,hrehawm ka ti a hmuh harsa ka ti hle bawk.Lily hi ka hmangaih a kalsan harsa ka ti mahse maktak maiin ka hmeichhe hmangaih aiin aletin Coco hi ka thlahlel zawk!! engtik lai pawhin hmuh ka chak ngawih ngawih renga ,in hnial buai reng mah ila a bula ka awm tawh hi chuan mi â ang maiin ka nui ṭhin, midang ta tur anga ka ngaihtuah ngat phei hi chuan ka thinrim hlur thei.

" ka tihpalh " tih bak sawi tur ka nei lo, insawifiah na tur ka nei lova chhuanlam lah ka nei hek lo, tuna ka duh zawng chu Lily kaltir hi ani.
"kan in hmangaih kha..."
"mahse ṭhen che hi ka duh ani... "
" min ti na takzet,ka thinlung hi i ti na takzet asin ...vawikhat chiah i rawn let leh thei lo em ni?" a mittui a rawn tla nghal zawih zawih a, hruk sak tumin ka kut ka chet uai hman mahse a rilru ka tih no mai mai dawn avangin nghet takin ka inhum ruh ta zawka,a hmel hmuh reng hi nuamlo ka tih avangin ngawi rengin room ah ka luhsan nghal daih bawk.

Ka awmdan hi ka inhrethiam tawh bik lo, Lily a ṭah khan hrehawm ka ti mahse a hma a ka rilru put ang kha ka pu tawh hauh lo engang pawhin a mittui tla mahse let tumna rilru ka nei loh avang chuan mak ka in ti zawk hial.

Nidang chu nise a mittui chu sawiloh ho te te ah pawh nise a nat hlau in ka phi chung anga, chan ka hlauh luatah lehkha zir ṭhulh ṭhak in amah hmu turin ka chhuak vang vang ang. Tunah chuan ka ṭhiante zawng zawngin i chak lohna chu Lily hi ani tia min chhaih luai luai Lily mittui ngei pawhin ka rilru a thlak zo tawh lo.

___________________________________________

Report thehluh tur ka lo enfel mawlh mawlh lai chuan Clara chu ka bulah a rawn ṭhut vut a, mi en vung vung pah chuan "enteh... Asher, Coco kha i fa pai tu ani tih min hrilh miah suh " a tih chuan ka khi suk ringawt, engvanga thinrim miah lo nge maw ka nih le? midangin an hriat pawh ka pawisa tawh lo .

" ani tiraw? Lily hi engtin nge i tih dawn?" engpawh sawi se Lily hming hian a chhunzawm ngei ngei,mahse kei ngei pawh hian engthil nge ka tih dawn ka hre bik lo.

" ka hrelo... "
" maw!!  ka hrelo a?... Asher fiamthu ani lo ania... kum nga lai in inkawp ve tawh a hetiang ringawt hi chuan i ti thei lo ang"
"anih ka tih tur chu min hrilh la... " ka tih chuan a ngawi reng ringawt, ni e...ka thutlukna siam hi a atthlak tih chu ka hria mahse hei aia thutlukna ṭha min râwn theih chuang si loh chuan engvanga lo buai ve chhen nge maw an nih le?

"enteh... Hetiang anga Lily i tih avang hian i hlim chuang lo ang, heihi hre reng rawh...i rawn let leh anih pawhin ani chuan alo pawm tawh lo ang che " ka pen hum lai rawn lak pawp pah chuan chhuatah a paih daih a, thinrim hmel zetin a chhuak tau nghal nghawng nghawng bawk.

Clara thusawi ho zawng zawng kha ngaihpawimawh loh hmel zetin ka han thaw chhuak hak a, pen chu chhar tawh lovin a dang ka la leh ngat bawk.
Ka thil tih lai ka chhunzawm mawlh mawlh lai chuan ka piah lawka ṭhu Jerry chuan min rawn nuih vur vur pah hian"Lily ṭhianṭha te ho chuan a mal te te in an rawn chhuahchhal dawn che niin a lang... huizz hmeichhia te hi chu hriatthiam an har anih hi " thawveng zeta a rawn tih chuan ka khi suk ringawt, Freddie phei chu awm se Clara kha bem daih rawh tiin min râwn leh tawh ang.

Report submit tura Dr. Richard office lam ka pan lai chuan ka in rin loh laiin room thim zet pakhat ah hian Lily in min rawn pawt kawi thut a, ka kawr nghawngah nghet taka ṭham pahin min fawp nghal tawn tawn bawk.
"Lily... engthil nge maw i tih le? "
"shh... ṭawng suh... "ka benga a rawn thawk lum ham ham pah chuan a mawng leh mal vel te chu min zut tira, mipa pangngai tan chuan hnar har tak ani mahse thil ṭha ani loh tih ka hriat ve kûr avangin ka in la hrang thei hram,engmah sawi lo in rang takin ka chhuak nghal daih bawk.

Hmui liah zeuh pahin ka white coat chu ka siam ṭha nghal sawk sawk a, tlangval harhvang thisen lum tih takah ka hmeichhe duh em em in khatiang anga min tih tawh kha chuan insum a harsa takzet.

"Asher....khatiang khan min kalsan reng reng suh " Lily in min rawn zui ani tih ka hriat chuan a hma aiin ka kal chak sauh a, ka kutah a rawn vuan nghal vat bawk.
"i duh ve tho kha...ngatinge i insum tlat zela "
"Lily chutiang mai mai atan hun ka nei lo... "
"inbia ang...engkim hi kan sawi fel vek angai"
" sawi dun tur engmah kan nei tawh lo "
" Asher Edwards... " a rawn tih tuarh avang chuan ka ding thut a,min en kar pahin ka kutah nghet takin a vuan tlat bawk.

" i thil tih avang hian ila inchhir khawp ang...heihi hre reng rawh ngaihdam min la dil khawp ang "
Chutia kan lo awm lai tak chuan Dr. Leah a rawn kal thut avangin Lily chuan ka kut thlah pahin a in la hrang nghal vata ,Dr. Leah in min rawn kal pel pah chuan, " in pahnih in ka office ah min rawn hmu ru " tih pahin a kal lehnghal nal nal bawk.

★
Dr. Leah office ah chuan kan ṭhu ngawi renga, ani erawh lungawi loh hmel zetin tukverh lam chu a thlir vauh vauh thung.
"in pahnih hian in in ngaizawng tih kan department a awm zawng zawng hian kan hre vek mahse damdawiin ah hi chuan tihlan phal ani lo, buaina in neih lehngat phei chuan fimkhur ang che u "
" kan tihpalh... " Lily chuan alo ti nghal vata, kei erawh ka ngawi ngul thung.
"khatiang a ring khan in ti buai tawh suh ang che u... helai hmun hi intih buaina hmun nilo in damlo enkawl na hmun ani tih hre reng ang che u....in kal thei ang "

Chhuah kan tum lai tak chuan Dr Leah bawk chuan, " Asher biak che ka duh " a rawn tih avangin Lily chuan min rawn melh hrek pah chuan ngawi rengin a chhuak nghal nal nal a kei erawh ṭhu tawh loin Dr. Leah hmanchhawn zawng chuan ka ding ran a.

"tunlai hi i point a hniam sawt riau mai... bakah hmanni khan i in exam lo tih ka lo hre bawka engvanga inthlahdah sawt em em nge maw i nih le? "
"a lehpek ah ka exam leh mai ang "
" Asher!!...i ngaih ang mai mai a awlsam chu ani lo tawp ang... "
" Enteh... Dr. Leah i sawi tum chu ka hria mahse hei aia thil pawimawh zawk hi a tam lutuk "
" awle... ka hrethiam e "tih pahin ka darah chuan a rawn vuan a, " i kawr nghawnga lipstick kai hi tifai rawh " tih pahin min chhuahsan nghal bawk.

_____________________________________________

Ka duty zawh veleh haw tlang lovin Coco thawhna restaurant lam pan chuan ka tlan tlang ta zawka,diktaka sawi chuan ka hmu chak tawh em ani, naktuk emaw a lehpek pawh ka nghak thei tawh lo.

Vawin nilengin eng nge a tih ang? damdawi a ei em?  chaw a ei ṭha em? tih vel mai mai chu ka rilru ah a awm renga, thil dang ngaihtuah ka tum poh leh ka feelings te chu ka thunun thei lo tulh tulh a, amah ka ngaihtuah na lamah mi â ang maiin ka lo nui leh vur vur ṭhin.

Henu hi drugs ang mai ani,a ngawl ka vei a.. a nî telin a zûn ah ka uai hnup hnup zel chu anih hi. A hma khan amah ka ngaihtuah lo tihna ani lo mahse tun hnai te aṭang hian ka ngaihtuah nasa zualin a bula awm chu ka chak ngawih ngawih renga, engvanga hetiang anga awm vak nge ka nih tih hi ka in hrethiam tawh bik lo.

A hma kha chuan Lily avangin Coco ka ngaihtuah pawhin ka inthiam lo ngawih ngawih ṭhin a rinawm lo ang hial ten ka in hre ṭhin, tunah erawh sakei rilṭam ang maiin hrehawm tihna awm hauh lo in amah chu ka bitum char char a, tih lungawi ka tum em em bawk.

Restaurant ah chuan ka lut a Coco ka hmuh mai loh avang chuan kil khatah ka ṭhu ngawi reng ringawt.
"hi!! Selvia ka nia.... eng nge i order ang?" tih pahin waitress chu ka bulah lehkha nen hian a rawn ding ran a,a awphawi aṭangin Australian ani tih ka hre nghal.
" Asher... " lo in hmuam ûp tlat thu a awm lo, ka hming chu ka lo hrilh ve nghal bawka,a ruk tak chuan Coco awmna zawh mai chu ka rilruk tawh.

Coco dinner eipui ngei ka duh bawk si a mi pahnih ta tur ka order chuan min en ha ringawt mahse a chhan erawh min zawt lem lo.
"aw le... reilo te ilo nghak leh lawk dawn nia "min rawn siai zeuh pah hian napkin hi min rawn pe kher a,nuih vur vur pahin a kal nghal vat bawk.

Tui in pahin napkin chu ka han keu a ka rin ang ngeiin phone number alo awm!  mahse biak zui ka tum loh zia chu hria se a thinrim viau ang. Hetiang thil hi ka vawikhat tawnna anih loh avangin mak ka ti lem lo, ngaiah ka nei tawh zawk.Chhelo leh hmelṭha tak tak te pawh ni mahse bialnu ka neih avangin ka be zui ngai lem lo.

A chhiat loh em avangin Freddie leh Jerry ten an duh leh ka rin avangin ka theihnghilh loh nan dawhkhan ah langsar deuh hian ka dah a, ka en lai min rawn hmuh chuan a awmna aṭangin min rawn nuih ver ver bawk.

Coco a rawn lan mai loh avang chuan a thawk tawh lo anih te ka ring rum rum tawh mahse ka call chuan surprise ngei ka duh bawk si a dawhthei taka lo nghah mai loh chu tih theih vak ka nei lo.
" hei aw...." tih pahin waitress chuan tui hi min rawn pek belh a, min rawn beisei vang ani tih ka hriat avangin phone chu ka ensan ta ringawt a, polite lo min ti dawn mahse pawi ka ti lo.

"ughh... min lo hrethiam lawk " a kal tur chu ka ko ding ta ringawt a, ṭhu turin hrilh lo mah ila ka ep chiah ah chuan a rawn ṭhu nghal tharh a mahse Coco awmna zawh ka tum lai takin a rawn chhuak hlawl mai!!

Coco in min rawn hmuh chuan mak tih hmel ai mahin thinrim hmel a pu zawk.Ka eitur order nghah chawrh pah chuan, "kha ..." hi a rawn ti hmuk a, surprise ka tum tehlul nen min surprise let zawk!!
" Asher... eng nge ni ta...? " Coco awm lai lai in waitress chuan a rawn la ti ang deuh deuh a,buaina ka tawk ngei dawn anih hi.
"ughh.... Lemonade min rawn pe dawn mi niang " ka ti ta ringawt a, "aw le... " tih pahin a kal nghal hlauh .

" ughh...i awmna zawh ka tum a chuan a rawn ṭhu ...." ka thiam ang tawk a ka insawifiah nuah nuah lai chuan dawhkana napkin a phone number awm vu a hmuh avang chuan ka ṭawng tawp chut a, a thinrim nge thinrim lo tih ka en nghal vat ringawt.
"i thil order hi i ei bâng anih chuan pawisa i chawi dawn ania " tih pahin mahni eitawk aia tam order a, chaw khawhral chu pawisa chawi tur tih in tar chu a kawk va va a,keilah mi pahnih tan ngawt ka lo order lehnghal. Pawisa chawi hi ka hreh tihna nilo in hetiang avanga pawisa chawi hi a zahthlak vang zawk ani.

" anih chuan min eipui rawh... "
" ka ei tawh... " kal daih a tum avang chuan a ban ah ka vuan nghal chawt a,midangin min rawn en ṭhap avangin a hawikual nghal hrak hrak bawk.
"ṭhu rawh... "
" ka hman lo...." a tih rual rual chuan ka pawt ṭhu nghal chawrh a.
"ka ban a hun tawh... ka kal dawn "
"anih engvangin nge i thinrim? "
" Asher... ka pa ka tlawh ngei ngei angai chutiang sawi hman ka ni lo " tih pahin a tho daih a, a appron awrh lai chu counter ah dah in a rucksack nen chuan hmanhmawh takin a chhuak nghal hlawk hlawk bawk.

A chhuah daih avangin ka thil chah pawh ei lo in a man chu dawhkanah ka dah tawp a Coco chu hmanhmawh takin ka umchhuak ve nghal bawk.
"ding rawh... " a hriat loh der tlat avang chuan, "ding rawh " ka han ti leh a, a kal chak em avangin ka um leh ta nge nge a.
" Coco... car ah lut rawh" min la ngaithla duh chuang lo, "Coco... car ah lut rawh ka tih chu " chutah zet zawng ka thin in a tuar ta lo car ben chawrh pah chuan,
 " Car ah lut rawh" vin zeta ka tih takah chuan phut zawk pahin a ding nghal chawt a.
"lut rawh... "zawi sapa ka tih chuan ngawi rengin a rawn let leh nal nal a,car ah chuan ngawi rengin a lut nghal vat bawk.

Biak pawh in be loin an in lam panin ka khalh a, a khat tawkin ka va melh leh zeuh ṭhin a a lungawi loh hmel takzet.
"min pehhel tum reng reng suh " kawng melh ngur ngur pahin ha seh chilh ran chuan ka han ti sap a, a awmdan hian ka thin a ti rim zual.
Chutah ka ṭawng hrelo ang maia lehlam a hawi tlat avang chuan car chu kawngsir ah ka ti ding nghal tuarh a,steering hnek chawrh pah chuan,"ṭawng ta che " ka ti nghal tuarh ringawt.

Thinrim tawh nak alaiin "kal vat vat ang " tih chiah in min rawn chhang lehnghal!! Ka insum theihloh bakah ka tihngaihna hrelo chuan ngawi rengin ka sam chu ka han chul thuak a,heti ringawt hi chuan ka thinrim zual zel dawn avangin car aṭang chuan ka chhuak daih ringawt.

Chutia thinrim insum, inseh ruh ṭeuh chunga ka din reng lai chuan hnung lam aṭang hian ka dar chu a rawn khawih a, ka hawi let rual rual in ka fawp nghal tawn tawn ringawt.
Awmze neilo a ka vin hrep avang khan ka inthiam lo leh hnuhnawh,kan chal insik tir chungin a biang chu ka kut pahnih chuan ka han dawm bawk a, " ka tihpalh"  ka ti zui sap bawk.
" a pawilo...a pawilo" min rawn fawp let ve nghal tawn tawn a,a hniam em avangin chawi kan pahin car hma ah chuan ka ṭhuttir ta ringawt a, kan inthlahlel bawk aniang a hmun pawh sawi lovin kan in fawp tawn tawn mai.

"i va chauh hmel ve ?" a dâng lep avang chuan en vang vang pahin ka han ti sap a.
"nizan ka mu ṭha lova...hahh...ka luak a chhuak vek thei nia mawle"
" anih chuan inah kan let zawk dawn mi... i pa chu keiman ka lo va buaipui mai ang "
" aih... angai lo, vawin ah kan in a awm kha a haw thut avangin ka kal ngei ngei angai... ka pa ril a lo ṭam tawh lutuk ang " a tih tlat avang chuan hnial ka tum lem lo.
" anih chuan kan hmanhmawh angai anih chu... lut rawh " fawp zeuh pahin car ah ka lut nghala.

Car chu tih nung mai ka han tum a mahse Coco chu lut mai lova kawngkar dawm vang vang paha a lo inseh ruh fan fan lai ka hmuh chuan car aṭangin ka dawk chhuak rang ngang mai .
"Asher...!!" a tih rual rual chuan a ṭhingṭhi hnawk a, nau vei tur ang mai hian a rawn sang ta vak mai chutah thi a rawn pu zui nghal ṭiam ṭiam bawk.

"engtin mah i awm dawn lo" ka jacket chuan thi chu ka dawm nghal vata, rang takin car ah ka pawm lut nghal vat bawk.
Damdawiin lama kan tlan let lai te chuan ka kut chu a za veka, ka chiai ani ber. Damlo emergency tam tak ka lo buaipui hnem tawh nen tunṭum zet chu Coco anih vang aniang ka che hlei thei lo, ka hlauthawng in ka che pelh phung bawk a, tih hmasak ber tur pawh ka hrelo.

" Asher.... thawk han la vang vang teh.. " Coco zawk chuan a rawn ti a, hnem tur zawk ka nih laiin keimah zawk hi hnem ka ngai tunah tak hi chuan ngaihtuahna mumal pawh ka pu thei lo.
Engvanga hetianga awm tlat nge maw ka nih le? doctor dangin chhungte enkawl tur chuan ka inring tawk lo an lo tih ang zawng zawng kha ka nei vek in ka hria.

Damdawiin kan thlen rual rual chuan Coco chu an nawr lut nghal vata,kei erawh lut turin huaisenna ka neih loh avangin pawnah ka lo nghak thung.Pawnah awm mah ila ka ṭhu hle hle thei bik chuang lo, a tuartu zawk emaw tih mai turin ka vei kual chhen a, an nawr luh lai pawha min rawn la nuih ver ver thei khawpa hmeichhe tawrhchhel hi ka la hmu ngai lo.

Minute 15 vel hnu ah Dr. Gary a rawn chhuah rual rual chuan ka va pan nghal vata,ka hlauthawng bawk aniang ṭawng nachang pawh ka hrelo.
"Misoprostol a ei a... a bak chu i hriat kha " atih chuan ka inhum ruh nghal vata ka bing nghal mup mup bawk,engkim mai chu a reh nghal duk a mak tih hmel zeta en haw pah chuan ka tawlh hnung nghal hrut a, Coco pawh hmu lo in engmah sawi lo chuan ka kal nghal nal nal bawk .

Hrilhfiah ngai lovin Misoprostol chu nau tih tlakna damdawi ani tih chiang takin ka hria , a awmzia chu Coco in nau a ti tla tihna!! mahse engvangin?  Naute awm tawh lo chu lawm tur ka nih laiin ka lawm hauh lo, ka rilru hahna te chu kiang duak tur anih laiin a hma aiin ka rilru a na zawk.

Ka chhungte kawngah an thang mek a, anmahni lo chhawn ka duhloh avangin rang takin damdawiin chu ka chhuahsan nghal vat bawk.
Ka rilru natna ai mahin Coco ka huatna chu a nasa zawk, naute a ti tla leh dawn tho tho ani tih lo hria ni ila chu ka buaipui hauh lo ang. A tan engkim ka ti a, ka hmangaih ka chân a ,ka mualpho pui bawk mahse chu pawh chu duhkhawp lovin engvanga ramhuai ang maia che nge maw anih tehhrep ni!!

Haw hle mahila apa buaipui hman lova damdawiin a kan kal leh daih avang chuan apa in lam panin ka inkhalh leh ta nge nge a, henu hi ka nun a a rawn lan aṭang hian haw hle mah ila amah ngaihtuah lo thei lo in min siam a, engtik lai pawhin min ti buai reng dawn chu anih hi.

Nurse awm tho mahse a enkawl tu zawk a awm miau si loh avangin Coco pa chu chaw ka pe a, a taksa ka hruk fai sak bawka chutah khumah zun alo cheh huh dup avangin a bedsheet ka thlak sak vek bawka thiam lo hle mah ila nurse in min pui hlauh a kan zo hma phian.
★

Ka In luah a ka luh rual rual chuan kawngka chu ka khar nghal ṭhuai a,light pawh on lo in couch ah chuan thatchhe zetin ṭhu nghal hnawk bawk,Coco pa ka pawm kual nasa bawka ka chau takzet zet .
" i rilru ava hah hmel ve " Lily aw ka hriat rual rual chuan ka ṭhu ngil nghal zawt!,bati dawhkana rawn hung pah chuan ka dar chu a han hmet vela mahse eng nge hetah i rawn tih?  tih pahin ka tho nghal daih thung.

" hahh... khatiang khan awm teh suh, hetah lo kal teh " tih pahin min kai lui tlat a, dawhkan chu dinner ei mai theih turin alo peih fel vek chu niin.
"ṭhu rawh...dinner mai mai anih hi" min pawt ṭhu a, min rawn nuih ver ver pahin wine chu a han thli chhuak kar kar bawk a.

"Asher... engthil nge thleng?  i rilru ava hah hmel ve" serious deuh taka min rawn zawh takah chuan Lily kha a rawn let leh nimai in ka hria.
" Coco in nau a ti tla"
" maw!! "
"huaisen takin a pai tlang tawh a, a tih tlak ka ring lo " ka la ti fân tho.
"Nau a ti tla maw!!  mahse neih ngei kha a tum sia... Asher henu hian alo chhaih kual mai mai che ani lo maw!"
" hahh... eng nge pawi" za lo zeta nuih suk pahin wine chu ka han tlak pap a.

" harh ta che...  kan pahnih a min pawh hran hnu ah nau a tih tlak leh daih hi!!...hmeichhe fing tak ani "
"va haw tawh rawh... zan a rei tawh " tih pahin ka tho daih a mahse min pawt ding leh hram.
"kan pahnih a kan ṭan dun hi angai ani, hetiang ringawt hi chuan henu hian min ti chhe vek thei ang "
" Lily... tunah chuan nilo ka chau lutuk "
"Asher!!  nau a tih tlak tawh hnu ah pawh ila kalsan duh chuang lo amaw!! harh ta che a dawi ã mek che anih hi "
"naute vang ringawtin kan inkar hi a tawp tur tihna ani hleinem"

" anih engvangin nge naute vangin min ṭhen si...mawh? min chhang rawh mawh?"ka kawrah ṭhamin min sawi sek avang chuan a kut chu ka paih thla pawp a, "keimah chauha awm ka duh... chuan naktuk ah password ka thlak bawk ang " tih pahin room ah ka luhsan daih a,ka thinrim lai ani bawk nen side table chu ka tlawh thlu nghal ṭhuai ringawt.

Ka chau em avangin khumah ka let nghal tawp a, ṭe vak vak paha bungrua a paih chhe ri te chu hre reng mah ila tho turin tha ka nei tawh lo, dan a hnekin reilote ah ka muhil zui nghal mai bawk.

___________________________________________

Ka phone vibrate chur chur ri ka hriat rual rual chuan ka harh hlawl ringawt !!tawp hman mahse ka phone ka check nak chuan ka chhungte miscall alo tam ngang mai. Rang lutuk in ka tho chhuak nghal vata,ka lu a na in mut ka kham lo takzet.

Thawmhnaw engmah ka hak loh avangin carton aṭangin ka tshirt chu ka phawrh chhuak nghal vata, nizanah khan ka chau bawk aniang ka phelh lai pawh ka hre tawh lo.Tshirt hak sawk sawk pah chuan ka awm vela hamna hnu hma ang maia vual ṭuak chu hmu reng mahila ka hmanhmawh em avangin ka ngaihsak zui lemlo.

Room aṭanga ka chhuah rual rual chuan ka thawmhnaw chhuat vela let phung ah chuan ka in chhuih nawk a, in chu ramsa in a a sawisak ang maiin a hnawk nuai a, ka bungrua leh lehkhabu te chu chhuatah a let phung bawk.

Couch bula hmeichhe pheikhawk khing lo let bal ka hmuh rual rual chuan nizanah Lily a rawn kal tih chu ka hrechhuak nghal zawk a heng thil zawng zawng hi a thinrim avanga paih darh ani tih ka hre nghal bawk.

Dahfel hman ka nih tawh loh avangin a hnawk ang ang chuan ka chhuahsan ta ringawt a,hmanhnawh zetin damdawiin lam pannin ka in khalh chhuak nghal vang vang bawk.

Coco awmna room ka thlen chuan lut ta mai lo in ka insum theih loh ka hlauh avangin ka han in hum ruh te te pawt a, haw hle mah ila ka hmuh chak miau avangin ka lut ta nge nge a, ka thinrim luatah insum hman lo in ka va chet vak loh hram ka beisei.
" Asher... ilo thleng ani maw? "an vai mai chuan an lo la awm kim ṭhap a, Coco chuan thei leh thei lo hian min rawn la nuih ver ver anih chu !! chawplehchilh in ka nem nghal vek.

Thinrim insum theih loh tih te chu tih ve mai mai Coco ka hmuh rual rual chuan ka va pan hnai vata, engmah sawi buai lo in ka fawp nghal vawng vawng bawk. Ka huatna te chu khawngaihna ah a inlet veka,ka rilru ka thlak chiang kher mai !
" ka hmangaih che " a rawn tih chuan vawikhat pawh inngaihtuah nawn lovin" keipawh in ka hmangaih che "ka lo ti let nghal var a, in nuih var var pahin duhthawh takin ka han fawp leh vang vang a, ka fawp ning thei lo ani ber.

" naute awm tawh lo mahse... ka kalsan chuang lo ang che, engtik ah mah " ka tih chuan min rawn nuih ver ver pah hian, " naute chu a awm reng alawm " a rawn ti sap a, mak ka ti lutuk chu sawi mai tur pawh ka hrelo.

"Phir an lo ni a... mahse pakhat erawh kan chân ta ani " Joel an a rawn tih pawh chuan awih harsa ka ti takzet, a chhanchu misoprostol thawh dan hi ka hrechiang a, Coco awmdan nen ngaihtuah phei chuan thil mak a thleng te anih ngawt loh chuan naute damna chance hi a tlem hle mahse tunah hian chu thil mak chu a thleng mek bawk si.

" thil theih ani lo " pakhat zawk chân mahila ka lungawi em em tho mahse awih harsa ka la ti fan tho.
" Pathian chuan thil mak a ti thei alawm theihnghilh ngai reng reng suh " ka pa chuan a rawn ti nghal vata, ni e... Pathian chuan thil theih loh pawh ati thei a,chu thil mak tak chu tunah hian a thlentir mek bawk.
" Coco... Pathian vang liau liau ani " ka tih chuan alo bu nghat a, a mittui lo tla phang hruk sak pahin a chalah ka fawp zeuh bawk.

Chutia hlim taka kan lo awm lai chuan mipa pahnih hi an rawn lut hlawl mai,room en kual hruk hruk pah chuan " Asher Martin Edward a awm em? " a tih chuan rang takin ," eng nge ni ta? " tih pahin ka tho nghal vata. Pakhat zawk chuan police patch min rawn hmuh pah chuan,
"Lily Fernandez khawiha phuh i nih avangin man i ni e " a tih chhunzawm zat bawk

END OF SEASON 1

Ig- @remruati_b

fb- Remruati Bawitlung /Haylor Sept

(thlaleh ah ka exam tawh dawn avangin loh theih loh in season 1 leh 2 a ṭhen angai tlat mai!! mahse a aia ngaihnawm leh ropui zawkin ka rawn let leh vat ang tih ka tiam a che u....Xoxo) 

( a duh duh tan Hepa hi Hunter angin lo mitthla ru)