My Drug is You-40 by Remruati Bawitlung(Haylor)

CHAPTER-40

Motto- Dream Bigger

Tukverh aṭangin ni in min rawn chhun avang chuan ka han meng siar siar a, Asher an nghet takin min kuah ani tih ka hriat chuan zing kar kar ah lawm loh in ka khi vur vur mai alawm.

A kut fawh zeuh paha ka han hawi let nak chuan khap miah lovin min lo en reng chu niin ka in melh chiang kher mai!!
" i harh na a rei tawh em? " khik suk pahin a sam chu ka han nuai saka, ka mumang ani ang tih ka hlau takzet.
"umm...."
" i muhil thei lo em ni? "
"ka mutthilh daih ten ka hmu thei nang che " a ban min kham ṭhat tir pah chuan ka chalah a rawn fawp zeuh bawka,a taksa lum ham ham mai te chuan zûn an nei vek tawh ,kham ni reng a awm dawn lo.

" ehee....khua a let leh chhung nen kan tlai dawn ania tho vat ang "
"reilote chiah ti hian awm ang " nghet taka min kuah tlat pah in a kut vawt zet chuan ka hnute a rawn hup ta mai,tal pahin ka ṭe nghal tuarh ringawt.
" a vawt lutuk "
" engchu maw? " hrelo ang maiin a mu lui tlat anih chu!! chutia a mut luih tak tlat avang leh kei pawhin a bula mut reng hi ka lo duh ve tho avangin khik suk pah chuan a kut chu ka han hum vang vang a, helai hmunah hian cham hlen ka chak takzet.

Engpawh nise let leh tho tho angaih avangin phur lo zet chuan ka in ha hna hna a,a khat tawkin Asher inha lai chu ka va melh leh zeuh ṭhin a, a nui hmel hmuh tur a awm loh mai bakah a tum deuh hmuk avang chuan a thinrim anih ka ring hial chutiang anga a awm avang chuan ka lungawi lo hle bawk.

A ni telin ka pum pawh a ṭhanglian zel mai si a, ka tshirt ho pawh ka ha mar ṭan.
"haw veleh i thawmhnaw hi thlak la a ṭha in ka hria " ka jacket min hak tir zawh chuan min rawn fawp zeuh a ,a thinrim emaw ka tih avanga ka rilru hahna kha a zia nghal huai bawk. Anihna takah chuan rai kawr leh kawrfual lampang chi reng reng hi ka hak ngai loh avangin hak nuam zawk mahse ka ha hreh tlat anih chu!! ka inhmeh loh mai bakah ka hak thiam pawh ka inring lo.

" i thinrim em ni? " a tawp a tawpah ka zawt ta nge nge a,a chhanna a duhawm lo anih pawhin zep ai chuan sawichhuah hi a ṭha zawk hrim hrim.
" Engvang chuan maw? "
"ughh... ka hre bik lo, i tûm reng bawk sia "
"ka hlim hmel anih kha " a tih chuan ka ner suk ringawt,bakah a hmel hi a nelawm loh in nui hmel pu alo nilo bawk nen ka ngaihbel te pawh ani mahna.

"ka hlim lutuk alawm....ringhlel tawh suh " ka khabe khawih paha min rawn fawh a tum lai tak chuan kawngka chu an rawn chum ta dawt dawt mai !! mak tih hmel takin kan in en haw a, min fawh zeuh pahin rang takin kawngka hawng tur chuan a kal nghal vat bawk.

Kawngka a hawn rual rual chuan Lily chuan a rawn kuah nghal thlawp a,a hnungah Freddie mai bakah midang pawh an rawn lut ve nghal bawk. Thil thlen dan chu mak ka tih mai bakah hengho hi engvanga rawn kal nge an nih tih hi ngaihdan pawh ka neilo. Kei ang tho in Asher pawh chuan mak a tiin a ngaihna a hriat loh hmel takzet mahse Lily nen hian an inṭhen tawh an ti sia engvanga rawn kuah leh nge maw anih le?

"Lily... rawn kal vat rawh" Freddie chuan alo ti nghal vata, pawh ṭhen a tum pawhin a aia nghet in a kuah tlat tho.
"henu hian a lo bum chhuak leh tawh che elaw...ka zawng nasa lutuk che lawm...mahse a pawilo ka ngaidam vek tawh che, a pawi reng reng lo"  midang ho chuan min en ṭhap a, Lily in engthil nge a hrilh chu ka hrelo nangin hmeichhe rapthlak tak melh in min melh.

"duhtawk teh... "
"Freddie min dang reng reng suh...henu hi in ngaih ang kha ani lo ania, Asher fa pai reng chungin mipa dang a kawp kual a chutah Asher min chhuhsak theih nan a fa tih tlak ah a vau bawk asin" a ti ta piap piap mai, phut zawk pawh awmlo a dawt a sawi zung zung avang chuan chhan mai dan tur pawh ka hrelo,chutah mi thinchhe lutuk ka lo ni ve bawk nen ka thinrim lutuk chu ka ṭawngchhuak thei tawh lo hrim hrim .

Asher pawh chuan a ngaithei ta bik lo aniang thinrim insum tih hriat tak hian Lily chu a han pawt sawn deuh a,a dim danah hmeichhia anih vang pawh ani mahna.
"engvangin nge dawt i sawi? " a tih takah chuan an en ṭhap ringawt,keilah ka hamhaih in thil thlen dan hi engmah ka hre lo bawk nen sawi tur pawh hrelo in ka ding reng ringawt .

"dawt ka sawi ang maw? nang hian min rinawm loh san ani lawm ni...hei i fa a pai tak hi. Ani hian engtik lai pawhin a thlem kual reng che a, amah i neih duh luatah kei ngei pawh min ṭhen i duh ani lawm ni "
"i rilru tihnat ka duh loh vang zawk ani...kei......"
" maw!!  ka rilru tihnat i duh loh vang maw ni a?  anih thutlukna i siam hma in kei hi min ngaihtuah ve reng reng em? ka rilru na lutuk hi ka â lo chauh anih hi " Asher an a sawi zawh hma hma chuan a lo pawt chat nghal zung zung a, thil awmzia sawi ve tum mahse ṭawng na hun a chang lo ani ber.

" Asher... inthiam lo duh suh, i thil tih hi a dik ani " A theih ang tawkin Freddie pawh chuan alo ti ve bawka, hetiang khawp hian Lily hi a duh lo ang tih hi ka ring pha ngai lo.
" hahhh....khawiah nge i thutiam te kha a awm tak?  in pahnih hian henu hian a bum â vek tawh cheu anih hi, hetiang ang hmeiche lepchiah lutuk pawisa duh vanga mahni taksa zuar duh.... "
" duhtawk rawh " Asher chuan a ti vin nghal ṭhah a, min rawn kawh sawk sawk avang khan ka rilru a na takzet.
" i ṭawngkam fimkhur rawh " tih pahin ka kut a la lawk a, min kai chhuak nghal dawr dawr bawk.

Lawng chawlhna kan thlen chuan Asher kut chu ka thlah nghal vata, engthil ber nge rin a rin loh tur pawh ka hrethiam tawh lo. Lily leh Asher te hi a inhmangaih a an inkar ka ti chhia tih chu ka hria mahse nizanah khan Asher leh Lily te inṭhen thu Briana mai nilo midang titi thawm ngei aṭanga ka hriat avangin an inṭhen turah ka ngai, chuvang chauha hnawl lo ka ni mahse tunah lah khatiang ang thil kha a thleng leh bawk si,engmah hi ka hrethiam tawh lo.

"lawngah hian chuang rawh..."
" nilo.... keimah chauha awm ka duh "
"Coco... a thusawi kha i awih em ni?  kan inṭhen tawh alawm "
"mahse ala rawn umzui tho che lawm....in inkar hi tifel phawt la a ṭha in ka hria "
"tihfel tur engmah kan nei lo "
" inngaihtuahna hun min pe rawh...keimah chauh a awm ka duh"  ka tih tlat avang chuan lungawi loh hmel zet hian a ngawi renga a hnu fe ah chuan, "awle " tih sap pahin lawng dangah a chuang ta ringawt a.

Lily in dawt a min puh na te chu engah mah ka ngai lem lo mahse Asher lehzel dawtin a puh mai bakah a tih mualpho avang khan ka palzam mai mai thei tlat lo. Tuna ka ngaihtuah ber zawk chu Asher nen an inkawp lam nilo in keimah avanga hetiang thil ti duh anih chuan Asher nen han in kawp nghat phei ila chu a ti chhe vek duh hial ang achanchu kum tamtak awm dun in thuruk tamtak an lo in hriatpui tawh a,Asher chak lohna te leh tihchhiat vek theihna tur khawp thuruk a hre ngei dawn chu chuan min ti hlauthawng takzet.

Phur lo zeta room kawngkhar ka hawn rual rual chuan phawk fe a men pahin ka ding nghal chawt a,"engtin nge hetah ka awm tih i hriat ?" Hunter chu tukverh bulah cigratte zuk khuk tulh tulh pahin alo ding reng anih chu!! helai hmun thleng thlenga min rawn umzui avang hian thil duh a nei leh tawh ani tih ka hre nghal.

" a hmun hi a nawm hi le... in kan sa anga kan awm daih dawn mi niang?"
" eng nge hetah i rawn tih? "
"i hmanhmawh anih kha ṭhu hahchawl phawt teh... " a la ti ang deuh deuh a, midang in an rawn hmuh ka hlau bawk si a, kawngka chu ka va kalh nghal vat bawk.

" hna ka nei ania.... sawi vat vat rawh... "
" awle....biakin hmun saw ka duh "
" engmaw? "
"ka nghak rei tawh mah mah che in ka hria "
"anih ka pe thei lo che ti ta ila.... "
"hahhh...chutiang chu a thleng hauh lo ang, Coco i nunah hian mi pawimawh an tam tawh lutuk chung ho chu an nat i phal ngai bawk lo ang entirnan Asher ,i fa ang te "

"tumah i tih nat hi ka phal ngai lovang"
" haha... heivang hi lawm hmangaihna nei lo turin ka enkawl che ,a chhanchu chak lo taka i awm ka duh loh vang ani mahse hei a tlai tawh lutuk tlat"
"Biakin hmun chu ka pe thei lo che, ka thei lo "
"min pe dawn nge dawn lo tih chu han thlir phawt mai teh ang... chuan zanin ah rawn tlai suh ang che "
"ka rai hi.... fa ka neih hnu ah ka ti thei mai lo em ni? "
"anih chuan i rawn let leh dan kawng a awm asin...naute tihtlak, anih loh vek pawhin ba i rul thei lo anih chuan i pa chân " ngeiawm zet hian min rawn nuih suk a, a tih ṭhin dan ang bawkin a kal dawnah ka hmuiah a rawn fawp leh kher a, nam sawn pawp pahin ka hmui chu ka hru nghal vat bawk.

Tlaiah kan haw tawh dawn avangin ka thawmhnaw ho chu ka pack ṭha mawlh mawlh a, haw daih ka chak tawh takzet mahse pawisa ka hlawh theih nan ka bansan mai thei bawk si lo.

 Hunter a rawn kal avang khan ka tum a ruh zual sauh, a lak aṭang hian talchhuah har dawn hle mahse tlem tlem in pawisa ka khawl anga, hun duh dawn mahse ka ba ka rul anih phawt chuan chhuahsan hi ka tan a harsa tawh dawn lo ani.

" nilengin in pack i tum em ni?  kal a hun tawh ania " Freddie chuan thil thleng engmah hrelo ang mai chuan thawveng zet hian a rawn lut a, ka thil tih lai erawh a khaih lak phah lo.
"Freddie... min tih hlim tum duh suh ka ṭha alawm "
"pawi ka ti lutuk...haw daih i duh em? i duh chuan ka hruai haw ang che"
" aih... engvangin nge ka tlanchhiat ringawt ang "
" i ṭha chiah ang maw? "
" umm..."

Lily awmdan kha tun thlengin ka la awih thei lo, hmeichhe fel leh fing tak ani a khatiang ang ṭawngkam ngat phei kha chu a kâ aṭanga a chhuah hi ka ring pha ngai lo. Chutah Lily chauh nilo Asher lehzel pawh a ti mualpho duh ania, khatiang ang hmeichhia kha an awm ang tih ngaihna pawh ka hrelo.

Damlo in entir ho hming ka lo record malh malh lai chuan Asher hi ka bulah a rawn ṭhu thurh a, Lily a awm nge awm lo tih ka enkual nghal vat ringawt. Bakah midang ho pawh hian engmah chu sawi lo mahse min en dan a dang tih ka hre mai mahse min tihbuai phah lem lo.
"ka lo ziah chhawk dawn che mi " tih pahin ka pen ken lai chu min rawn chhuhsak a, " angai lo " tih vin hlar pahin ka la let leh vat tho.

"puih chu engvanga duhlo em em nge maw i nih le?"
" keimah in ka ti ve thei... "
"oh.. c'mon... lawm tur zawk i ni asin"
"ka lawm lo...a tawk em? " tih pahin ka ṭhutna aṭang chuan ka tho chhuak zawt a, ka thil ziah lai nen chuan ka kal nghal nal nal ringawt.