My Drug is You-38 by Remruati Bawitlung (Haylor)

CHAPTER-38

Motto- Dream Bigger

Lily nen hian Senior year (class X - XII) aṭang daih tawh a inhre tawh kan ni a, a mizia hi ka hrechiang in Asher tan hian ka duhpui ngai lo.

Asher a hmuh tirh phat aṭangin a umzui nghal char char a a neih theih nan chuan Asher lo ngaizawng ve tute pawh a vau hmiah zel mahse Asher hian engmah a hre ngai lo thung. 

Lily pawh hian a mipa kherh lai hi mi mai mai ani lo tih a hre chiang hle, class ah grade sang ber a hmu ziah ṭhin a, basketball ah lah scholarship hmu thei khawpin a thiam a chutah a hmelṭhat leh chhiat loh em avangin hmeichhia te ngaihzawn rawn ala ni cheu,a vanneih bik em avangin khatih hun lai kha chuan mipa tupawh khan an thik vek in ka hria.

Mi sawisel bo leh vannei tiin sawi huai huai ṭhin mahse chak lohna a nei ve tlat chu chu HMEICHHIA ani.

Amah ngaizawng tute leh rawn be tute chu lo um ê a lo chhang vel turin huaisenna a nei tlat lo, hetiang anga mipa zakzum lutuk leh lerh lo lutuk hian amah be tute chu a zah let tlat zawk anih chu!! hahh... in awih lo zawk ang hmeichhe chungchang i sawipui anih chuan a zâk anga a lai nghal em em ringawt ang,kei a ṭhianṭha ber ngei pawh hian hmeichhe chungchang ah kher kher hi chuan ka beidawnpui chiang khawp mai .

Chutiang ang mipa pawh a zûn a uai tir hnawp hnawp theitu chu hmeichhe fing leh fel tak ani tih chu a chiang reng kum hnih zet a zial kual hnu chuan a zûn ah a uai tir mai alawm. Khatih hun laia hmeichhe tamzawk neih theih loh a nei thei bik kha a chhuanawmin rim taka a thawhna rah chu a tawpah a hmu ta nge nge alawm.

Mahse kawng hi a lo ngil reng bik hauh lo, khati khawp khan Asher chu dawi â in kherh kual vel mahse alo la duhkhawp hauh lo, Asher nihpui reng chungin mipa dang a kawpsan lai chu chiang takin ka man chhuak!! chumai pawh ala nilo an mu dun tih thlengin ka hre zui vek a ,engkim ka hria tih hi Lily in a hriat vek avangin Asher bulah bak min be ṭha ngai lo .

Ni e, engkim Asher hrilh vek tur ka nih laiin ka hrilh thei tlat lo a chhanchu an in tih buai hlek pawhin mi â ang maiin a mu thei lova, chaw a ei thei bawk hek lo ,a grade thlenga a nghawng vek laia khatiang thu lo hrilh kha chu hre reng chunga a nun tih chhiat tum ang vel ani.

 Mahse chutiang anih laia nizana Asher an Lily a ṭhen rup mai kha chu ngaihtuah mai teh a harsat tur zia leh a nat tur zia chu, khatiang ang thutlukna siam tur khan vawikhat mai nilo a thla a thla a inngaihtuah ngei ang .

Lily hian a rinawm loh sana, mipa dang a mutpui avang khan ka hua ani lo ,ka huat ber zawk chu dawt a hrilh hnem tawh lutuk vang zawk hi ani,tun thlengin Asher hian ala thianghlim reng turah ala ngai reng bawk atan chuan mi ṭha tawpkhawk Angel hawlhthlak hi ani ringawt. A thil tih dik loh ah pawh nise Asher zawk hi inthiam lo leh hrehawm ti ngawih ngawih in a siam ziah ṭhin a,kei ngei pawh Asher bula dawta min put nasat em avangin Asher chuan hmeichhe kawp lawr leh rinawm lo angin min ngai hmiah tawh engpawh sawi ila min ring tawh ngai lo.

Asher lah hian a rin em avangin a thusawi engkim mai chu alo lem duak duak a,a party duh avanga lehkha zir angin dawt a hrilh ṭhin tih te hi a ringpha ngai hauh lo. A nu leh a chhungten duhpui hle mahse Pastor Samuel ngei pawh hian Lily avanga a fapa inthlak danglam nasat zia hi a hmuh hmaih bik hauh lo niin a lang,a chhanchu Lily leh Coco a en dan kha a danglam lutuk tlat.

Asher leh Lily te chu kum nga lai an inzui a ka lawmpui lutuk mahse Lily in tun thleng pawha Asher ala bum kual cheu hi chu ka hmu thei tawh tlat lo hei vang hi lawm Asher an midang lakah fa a nei tih ka hriat pawh khan ka lungngaih loh nachhan, achhanchu Lily lak aṭang hian a tal chhuah theih ka rin vang ani.

Asher an hmeichhe dang chungchang min zawh khan Coco hi anih ka ring nghal, a chhanchu khami zan Ruby house party ah khan khum khatah tui takin inkuah chial a an lo mu dun lai chu ka hmu tlat alawm.
Rui hle mah ila mualpho taka an awm ka hlauh avangin room pawnah midang an luh loh nan ka veng nghe nghe anih kha.

Khami zan khan an ruih em avanga mu dun mai mai turah ka lo ngaia, naute nghat phei chu ka beisei lo hrim hrim mahse rin loh dan deuha thil a thlen takah chuan Pathianin Asher chhanchuak turin Coco hi a rawn tir anih ka ring hial .

Coco damdawiin a ka hmuh hmasak ber ṭum pawh khan a engah mah hma in ka nel nghal em em ringawt.A mizia mai bakah a luhlulna te chuan ti nelawm lo hle mahse mi rilru ṭha tak ani tih ka hre thei mai. Chubakah an pahnih chuan ka enthla chho zela, in haw em em siin an in ngaihsak tawn em em a, mize inang lo lutuk leh khawsak dan pawh inang lo hul hual mah ni se kei chuan puzzel rem dik awlsam tak ang maiah ka ngai.

____________________________________________

★PARTY★

Coco leh midang ten nghakuai an chiah lai chuan meilum an lo ṭhut bial laih na ah chuan ka va ṭhu ve nghal thawr a, full moon zan anih avangin thla a eng hle bawk.

Marshmallow mei a rawh pah chuan Asher leh Lily te chu ka ep chiah a an ṭhut avang chuan ka va melh zeuh a,Lily chuan hnehtu inti takin ngeiawm zetin min rawn nuih suk bawk.

Thu dun reng mahse Asher rilru ah erawh Lily a awm lo tih a hmel aṭang pawhin a hriat mahse Lily lah chuan midangin an hmulo ang tih hlau niawm fahran hian a kuah bet tlata, Asher lah midang hmuh laia hmeichhia hnawl hmak hmak chi alo ni lo bawk nen a nin tawh hmel takzet.

"Light house chu a nalh hle mai a"ka tih chuan kan en chho nghal ṭhap hlawm a, ral lehlama Light house aṭanga êng rawn de zek zek chuan ka awmna chu a rawn en leh zeuh ṭhin a,a mawi hle bawk.

"dil mai chauh ani sia... engvanga light house siam nge maw an nih le? "Jerry chuan a rawn ti nghal vata, a chhan kan hriat bik loh avangin kan lo bu nghat ringawt.

"anih na takah chuan hotel ania mahse zanah sangha man an awm ṭhin avangin kawng an bo loh nan kawng lo en tu atan an hmang bawk " Briana chuan alo ti nghal vâr bawk.
"khi light house khian thawnthu a nei tlatin ka hria "
"nei e... light house chung zawlah khian full moon zan dar12 ah mi i fawp anih chuan chu mi nen chuan hlim takin in awmdun kumkhua tawh ang "

" chuan zanin hi full moon ani bawk... anih chuan dar12 ah kal vek mai ang u " pakhat in a rawn tih chuan kan han nui ho dar dar leh rih a.
" haha... lawngleng pakhat chauh light house lam panin a kal ṭhin , chu chu i nang fuh angai"
" anih chuan couple pakhat chiah ani maw kal thei "
" ni chiah e... "

"in couple sawi chu keimahni anih ngei ka beisei tiraw Asher? " Lily in a tih rual rual chuan Asher chu ka en nghal vata,ani erawh in Coco ava melh daih thung.

"min lo hrethiam ru" tih pahin Asher chu a tho daih a,dil lam thlir vauh vauh paha beer a in lai chuan a bulah ka va ding ve nghal vat bawk.

" zanin chu Light house ah Coco ka hruai theih ngei ka beisei " a thik tur chuan ka han ti kher a, melh pawh min rawn melh peih tawh lo.
"chu chu amah hrilh zawk rawh... "
" i hriat ve ngei a ṭha in ka hria... bakah kumkhua in kan awmdun tawh dawn bawka i hriat ve ngei hi a ṭha alawm "
"good luck "
" Lily hruaina chance pawh i nei reng ania mahse zanin ah nilo "
"chutiang buaipui nan hun ka nei ve lo "tih pahin beer can chu a hmet sawr a, a kalsawn nghal nal nal bawk.

Zanin Asher awmdan hi a danglam riau nidang angin min thik tawh loh mai bakah engah mah ngai lo ang maiin zu han awm tlata mawle, ani hi Lily in a kherh nasat em avangin let leh a tum te hi ani lo maw?

"i ti thei em? " Briana chu ka bulah a rawn ding a, " zanin chu a awmdan hi a danglam riau " ka lo ti nghal zat bawk.
"Coco hian engmah a hrelo mahse Lily hian light house ah Asher hruai nan chuan engpawh a ti leh duh ang "
" anih chuan kan dan angai anih chu "

Asher hian Coco a duh ani tih hi a inpawm duh tlat loh avangin Briana nen hian ṭang rualin a in hriat chhuah ngei theih nan theihtawp kan chhuah mek ani.

Lily a awm ve chhen bakah Asher hi cho chhuah loh chuan engtik ah mah Lily hi a ṭhen lo anga, Coco pawh a pan hek lo ang chu chu ka hriat chian em avangin amah cho chhuah nan a thikthu chhiatna leh Coco ven him a duhna chu remchangah la in Coco tih nat tum angin lem ka chang ta ani mahse ka rin ai daihin a thawk hma, a hmangaih diktak zawk a inhriat si loh  venhim a duh luat ah a hmangaih nia a ngaih pawh a ṭhen hmak mai alawm